2008-05-03

ليش أكره الريايييل؟؟؟

علشان أكتب عن الرجل ... لازم كوب قهوة يمي وأكتب بالعامي ...

كلمة أرددها بحياتي وايد ومن يوم كنت صغيرة ..(( أكره الريايييل )) منهم من يقول أكيد حبيتي وصار شي خلاج تكرهين كل الرياييل وطبعا عندنا المجتمع الكويتي مثل المجتمع الهندي يحب يألف قصص وايد يمكن اهي من أحد الأسباب بس مو اهو السبب الرئيسي ... يقولون لي شلون ماتحبين أبوج واخوانج ..؟؟؟ أقول أبوي اهو الي مربيني بعد حب من الله في أحد مايحب أبوه ؟؟ واخواني بعد شسوي مجبورة أحبهم كأخواني ..

أسباب عديدة دفعتني لكره هذا المخلوق موشرط تكون هالأسباب تواجهني بس الدنيا علمتني وورتني وايد أشياء جدامي ... وبكتب كل شي عن هالموضوع والي يقول حتى البنات .. ترى أنا ماكتبت الموضوع علشان أدافع عن البنات لأن البنات يبيلهم كتاب يالله نخلص منهم ...

·الرجل متقلب المزاج ..

أغلب الريايييل يطلع اول جم يوم يحليله وطيب،شوي يقلب على شخصيته الحقيقية شرير متسلط ... على باله القوامة حقه خلاص يصير اسد ياكل بالي يبيه ... يشد حيله على أهله وخواته وعند مرته يصير قطو أليف .. آمريني حبيبتي لو تبين عيوني أعطيج أياهم (( أمحق )) ، تلوع جبدي من هالنوعية ... ومصيبة على المرة الي تخلي ريلها جذي لأني أحسه مو ريال مع احترامي ، وعلى خواته لا عيب وتخسين ومالج أمل وماعندنا بنات جذي ... أقول ياعم بس استريح واشرب لك قهوة تعدل مخك شوي وايد أحسن ...

*يا حبهم للمغازل ...

أذكر موقف صار لي بحفل موسيقي وكان أحد الموجهين قاعد جدامي علشان يسمعني وأنا أغني .. وكل شوي يسوي لي بيده ((هاي)) ويضحك ، قلت بيني وبين نفسي (( شفيه هذا ؟؟)) ويقول لوحدة من الموجهات .. ويهها بيبي فيس، زين اسمع صوتي شكو ويهي ؟؟ جان تقول لي وحدة : هذا حده خفيف ترى اهو جذي. .. الريال كبير الشيب تارس شواربه من صجه هذا ؟؟ يبا حتى الريايييل الكبار موصاحييين ؟؟ كل شي صار بالكويت القز ؟؟ والترقيم ؟؟ والمغازل ؟؟؟ ماقول بس الشباب بس هالشي صار مثل العيش واللحم وجبة أساسية ... شدعوة !!! مافي أحد منهم ثقيل ؟؟ والله في بس شوي .. ويليتهم يكثرون ولا ينقرضون بس ..

*يشكون بحريمهم واهم الله بالخير ..
يا كثر الريايييل الي يراقبون حريمهم ... أكيد مرتي تكلم أكيد تعرف واحد قبلي ... شعرفها بهالسوالف ؟؟؟ زين انت من وين لك هالخبرة ؟؟ الله يخلي قصص الغرام .. الأخ تلفونه متروس أرقام بنات والبلى لمن يقول لها اوووف مرتي بطت جبدي كل شوي تدق ... منو قال لك تتزوج دامك مو كفو بيت او مسؤولية ؟؟؟ زين الشرع حلل لك 4 خايف من مرتك ؟؟ اذا قدها روح اتزوج عليها ولا انك تخربط من وراها ترى أخيس شي بالدنيا ان الواحد يستغفل الي جدامه .. خاصة اذا كان قريب منه ..

*الوعوووود ...

تقول نوال بأغنيتها (( أصدق بوعدك يوم خلني أحس انك وفي )) لي يومكم هذا وماشفت ريال صادق بوعوده مادري الي يمرون علي عاهات ولا شنو ؟؟ يقولون لي الناس انتي وين عايشة ؟؟؟ ليش كله تشوفينهم جذي ترا وايد ناس تصدق بوعودها .. أقول اي بس الحين وأغلب الي بجيلنا الله بالخير .... أعدج .. وقسم بالله .. وأحلف بالله .. يقول الرسول عليه الصلاة والسلام (( من حلف بغير الله فقد أشرك)) فما بالك الي يحلف بالله ويجذب؟ ؟؟ عادي صارت هالشغلة ... أو يكون مو قد الكلام .. للأسف .. يمكن ورا هالشي المرة نفسها ؟؟ والله مادري الصراحة .

*الرحمة يا عباد الله ..
خبري الطرار اهو الي يتمسكن أغلب الريايييل الحين صاروا جذي يتمسكنون علشان ياخذون الشغلة وبعدين يردون يفردون عضلاتهم ... مثل مرشحين مجلس الأمة_ والعياذ بالله_ .. استغفر الله شوي ويبوس ايد الأوادم تكفون بس ... وبعد مايفوز يقول عفوا (( بـــــزي)) أو لمن ما يفوز يقول (( هين والله لأوريكم)) ... شدعوة عاد زين وفوق هذا طمع حاطين دوبهم بدوب الحريم ... ياعمي شوف نفسك ومالك شغل بغيرك ... شدعوة عليك ...

· آخر شي سوالف ... يما منهم

أنا من المؤيدين بشدة قسوى قانون ازالة الدواويين ... ليش يا شقول ؟؟ أنا أقول لكم ليش ... الريايييل صاروا الحين مثل الحريم عندهم وايد أشغال بس يقولون والله فاضيين ماعندنا شي(( ناسيين حرام )) يقعدون بالدواوييين وفلان سوا وفلان حط .. وفلانة بنت فلان .. وضبطت بنت علان .. ويقولون ويسووون ... واشاعات وأخبار ... ويتطنزون على الحريم يقرقون، الحمدلله شالوا الدواوييين وفكونا من (( كلام خواشن )) ..
والله قاعدة أكتب وأتذكر فلم رشدي أباظة (( عدو المرأة )) حلو الفلم الصراحة بس أعارضه بشي انه شبه الحريم بالحشرة ... شدعوة حرام عليك الحشرة مو تارسة عينك ولا شنو ؟؟؟ الحشرة كائن أليف تشتغل وهمها عايلتها وبيئتها المرأة الحين استغفر الله همها ستايلها ونفسها يبا لا تقولون حشرات ترى الحشرات لها مكانة كبيرة بقلبي ...


في جزء ثاني لموضوعي لأني وايد سولفت

تحياتي
طموحة مملوحة

2 comments:

البدر يقول...

انا عن نفسي قريته من زمان هالموضوع بس ما كملته لو بصراحه قبل ماقريت غير العنوان بس اليوم قريته كله
وانسدحت من الضحك
انا بعرف شغله وحده انتي بدويه ولا حضريه لان في كلمات بدويه حيل وفي كلمات حضريه تقولينها فحيرتيني بصراحه


ردي على الموضوع


...

بالفتره الاخيره طلعت برامج تهاجم الرجل وبشده وتمثل ان الرجل دجاجه قدام المرأه لين شوهة صورة الرجل العربي حول العالم ( كلام نواعم وغيرها)

وهالنوع من البرامج تدور اي عيب للرجل عشان تحطه وتعرض هالعيب بحلقه لو مدة شهرين ماعندها مشكله بس تستقطب اكبر جمهور عشان الترويج وهذا معروف

بتكلم عن حقوق المرأه السياسيه

المرأه بالكويت صارت مثل الرجل تماما ما تفرق عنه غير بالجسم والتركيب والا الكلمه بالديره الاوله والاخيره بيد المرأه اي ما معناه زمانا هذا زمان مرأه

وطبعا لا ننسى ان الكويت تعيش اسوى فتره في عمرها من بعد ما مسكت المرأه منصب سياسي وحقوقها


مابي اجادل بمواضيع تسبب خلافات


....

بالعكس الرجل ( المكلمه هذي ما تنقط على كل من له شارب ولحيه ابي اللي يستاهلها ) انسان هادي قنوع يحب الخير لناس ما يرد طلب لحد يوفي بوعده

وللعلم انا بوعدج شرايج
اوعدج اني اكلم الشاعر احمد الصانع ويكلملج عبدالكريم عبدالقادر عشان تروحين له ولا هذا مو احد احلامج بس عاد خليني احصله وربي لكلمه لج وللعلم احمد الصانع احد الشعراء اللي كتبو لعبدالكريم على ما اضن ما ادري بس اذكر اني شفتله كم صوره عند احمد واعرف واحد ابوه يعرف عبدالكريم ان شاء الله اذا قام بالسلامه اكلمه لج وهذا وعد مني


.....


الرجل متقلب المزاج



والله الرجل بغريزته انه اذا شاف نفسه صح حتى لو انه كان غلط وده ان الناس كلها تصير نفسه وتمشي معاه وهذا التسلط
وهذا صح


اما شرير فهالشي بالجنسين وفي الطيبين

اما بسالفة الزوجته الرجال الصجي مو ( طاطا طاط ) اهو اللي يمشي كلامه على كل اهله مو بس خواته


صدقيني الرجال مقصه ينقص عليه بسهوله انتو يا البنات اهــ منكم

بالادب قريت قصه اسمها زوجكي ليس اقوى من الاسد

دور القصه حول بنت تبي تخلي رجلها يحبها
راحت لعالم كانت تتوقع انه ساحر
قالها اسويلج عمل بس جيبيلي شعرة اسد عشان يضبط
طلعت من عنده وقالت بنفسها والله هالبلشه شلون اجيب هالشعره
فسألت رفيجتها وقال الاسد اذا شبع ما ياكل الا بعد خمس ايام

وراحت وكلته ويوم عن يوم قعدت تقرب منه اكثر لين ما وصلت وقعدت تلعب بشعره وابو الشباب مالومه مرتاح

لووووووووووول

المهم وخذت الشعر ورجعت لعالم وقالتله يا ساحر انا جبتلك الشعر
قالها مثل ما قدرتي تخلين الاسد حنون عليج تقدرين تخلين زوجج يحبج لانه مو اقوى من الاسد (كيد المرأه مذكور بالقران )

طبعا مافي تشبيه بين الاسد والرجل بزمنا هذا لو اللي كاتبها من قبل لاحق على هالزمن جان قال قطوة شيرازيه بدال الاسد

لوووووووووووول


اما بسالفة الحب والخيانه كلن يخون وكلن يستغفل اللي يحبه

بس انتي عشان ملطوعه على قولتج او مقروصه تقولن هالكلام

خليني ساكت لا اقولج بلاوي يشيب شعر راسج انا شقول عجل

المهم صدقيني الزين موجود بكل زمن ومكان
والحب شي سامي محد يقدر يخبيه

ويا ويلي على متابعة الافلام الهنديه
وربي الهند شعب يقدس الحب
يوميا اطالع فلم حتى لو شايفه مليون مره بس عشان ابجي وخصوصا هالافلام ( انجلي .. راج ... محبتين )

وداعا

sara يقول...

لووووووووووووووووووووول أنا قاعدة أقرا ردك واَحك عدل أنت مو صج :D

اولا على طاري عبدالكريم الله يقومه بالسلامة اي والله يليت والله أحب هالانسان جد جد ودي ألتقي فيه :)

ثاني شي .. أخوي المرأة خذت حقوقها بس حجي وكلام والصج ماخذت ولاشي..

الحين باطين جبدي على سالفة حجاب الوزيرتين انتو شكو ...؟؟؟ كيفها تتحجب ما تلبس حجاب ... شنو رايحين يطالعن وبس ؟؟؟ غضوا البصر وبسكم عاد تحرش .. بطوا جبدي والله ... يعني الحين اول ما مسكوا المجلس حطوا على هالوزيرتين ؟؟؟ يارب بعد جم سنة مانلقى ولا ريال بالمجلس لأن للأسف ما شفنا منهم الا سواد الويه .. ولو يشيلون مجلس الأمة مرة وحدة والله احسن ... ضياع فلوس وحجي على الفاضي ...

أنا أقول لك الريال بالكويت الحين صار وايد يقارن نفسه بالمرأة علشان جذي قاموا يبطون الجبد أكثر .. أول كان يقارن نفسه بالي برا وبالي معاه ...

شكوا يحطون دوبهم بدوب المرة ... ؟؟؟
هذا شي والشي الي يبط الجبد .. اي الحريم الي تلقى الريال السنع استغفر الله مايكفيها ودها تخليه خروف عندها .. والعكس صحيح ياما حريم يستاهلون والله رزقهم بريايييل يطلعون العين ..


مشكور وايد على كلامك السنع:) وأنا أتحجى بكل اللغات لا تخليني أقلب مصري الحين :p أنا بنت عمك بدوية :p

مشكور أخوي على الرد ... وآسفة على التأخير ...