2008-07-14

لكـــــل قاعدة شـــــواذ

بالفعل أنا انسانة سلبية وقالها لي كثيرون سلبية مع نفسي ومع من حولي ... كتبت مواضيع كثيرة عن أشياء تقهرني في دولتي العزيزة الكويت ... أنا لا ألوم نفسي فما أراه كثير ... جدا كثير حتى قالها لي دكتوري العزيز
ترى الكويت أحسن من غيرها يا سارة لا تتشائمين ...

فعلا ليش التشاؤم ؟؟ قلت يمكن بالحجي أقدر أحل الأمور بس لقيت الأمور تزيد لمن ألقى ناس ما تقدم شي وناطرة الي يمثلونها تسوي كل شي وكل الي عليها هو أن تدافع عنهم .. أنا وغيري حطينا ببالنا ناس على بالنا أنها كفو طلعت طيييييييط وانتو بكرامة ... ما تستحق هالناس المتلونة تكون بالمجلس ...

المهم ... فترة الامتحانات خلتني أبتعد شوي عن السياسة .. وكل ما رحت مكان أقول الله يعزج يا الكويت ..


أدويتنا تصرف مجانا ... و6 ابر شكبرهم عطوني اياها بلاش لووووول ... مو قصدي جذي والله لأني أخاف من الأبر ... أشوف والله وايد يخشون أدوية حق ربعهم وأهلهم وأولهم أختي ... ويبطون جبدي هالنوعية بس شنسوي لكل قاعدة شواذ .
الدراسة عندنا بلاش ... والدولة على دراستنا هذي تصرف لنا اعانة .. (( اهانة)) كمساعدة للطلبة وأنا أشوف انها لا مساعدة ولا شي ... تخلص بغمضة عين ... واسعار الكتب والأكل نار .. وفوق هذا أهلنا ذابحينا وين معاشكم ووين معاشكم كلها 100 دينار شدعوة .... لكل قاعدة شواذ ... لوووول
الزواج ... ماكو دولة تعطي عيالها 4000 دينار وتقول له روح تزوج .. يحليلهم والله لا ونحاسة بعض العوايل ... احنا ماناخذ الا 10000 وفوق ... لووووول ومنو يزيد ....؟؟؟؟ بيييييييييييييييييييييع ويضطر الريال انه يتسلف وياخذ وياخذ وياخذ .... والطقاقة الفلانية ... والفندق الفلاني وبالأخير تيييله هالسحتة الجيكرة .... وشايفة نفسها .. يقول كل هذا علشانج انتي يالسحت ؟؟؟ يندم على انه تزوج لكل قادة شواذ.
وزارة الشؤون الاجتماعية والعمل ... اووووف ورعاية حلوة من الدولة حق ذوي الاحتياجات الخاصة.
وفاحت ريحتهم ... يسوون بلاوي من ورا الناس ... تعبوا هالمرضى واعليا ... صاروا النواب ينادون بحقوقهم ... ماكو اهتمام ... ماكو رعاية ، شكاوي قامت تتقدم ... والضحية هذا المريض المسكين ... لكل قاعدة شواذ .

* الاعلام ... وكاشخين حرية الصحافة ... اوووووف طابين بالعضو الفلاني فيه وفيه .... ولا المكان الفلاني والعايلة الفلانية وفلان سرق من اموال الدولة ، طبي يا صحافة وتحجي ... احجي احجي ، وبأيام الانتخابات يتسارع الصحافيين على النواب .... حط يا فلان مقال عني بصفحة كاملة وأعطيك 2000 دينار . ماقول الا مالت على الذمة والضمير الي عندهم يرفعون بانسان واهو ولا شي ... مايساوي ربع بطيخة علشان 2000 دينار .... لكل قاعدة شواذ.

الباحثين والدكاترة كثر في الكويت الله يعطيهم العافية ... وفي تمويل حلو حق العلم والمعرفة ... هذا الي سمعناه لمن كنا في المرحلة الثانوية ... ولمن بحثت عن الموضوع اكثر لقيت اكثر المؤسسات العلمية في الكويت تعاني من قلة التمويل ... المشاريع تروح برا ... وتستغلها دولة ثانية ونقعد نحط ايدنا على خدنا حاطين على مسلسل سنوات الضياع وعيوني تدمع لميس ما تتحجى وتقول الي بقلبها ...ليش ؟؟؟ لكل قاعدة شواذ.
الدولة تصرف على الفرد الواحد بالعايلة 50 دينار لحد مايكبر ويشتغل ... الحلو لمن اييلك واحد ويتزوج ويقول لمرته خل نيييب يهال وايد وماشاء الله تسطر له مرته 9 ورا بعض ... الله 450 دينار تسوي والله .... مممممممم طمع ... ولكل قاعدة شواذ. وترد سارة حق الاحباط والتشاؤم ... ليش جذي

4 comments:

وطن النهار يقول...

طموحة تفائلي

سارة تفائلي

تفائلي

تفائلي

تفائلي

تفائلي طموحة

مصختها تفاؤل و لا تبين بعد؟



بعد...بعد...بعد

المزيد...المزيد...المزيد

أكثر..أكثر..أكثر

لا توقف..لا توقف..لا توقف

لا خيار آخر نملكه غير التفاؤل طموحة

التشاؤم ببساطة يعنى التمسك بالجحيم


التحلطم المستمر و الشكوى و تكرار الحديث عن ما قام به هذا أو ما سرقه ذاك...ساهم و يساهم لحد كبير بخلق شعور عام بالإحباط و فقدان الأمل بالإصلاح



الوسائل التى نملكها كأفراد و مجتمع كافية و قادرة بسهولة على التعامل مع كل مشاكلنا مع الفساد و الفاسدين...و لكن نحن جعلنا منها وحوش عملاقة و مخيفة لدرجة أنها أصبحت كالآلهة التى لا تموت


خل نكون متفائلين

نتعامل مع المشاكل دون مبالغة أو تهويل

الحياة إيجابية إذا إنت - فقط إنت - تبيها إتصير إيجابية



بعدين كافي انا موجود علشان تتفائلين

مو ؟ :)

sara يقول...

أكيد وجودك كافي :) بدون ماتقول أخوي وطن النهار ....

التفاؤل شيء جميل .. بس أكون أنا وأنات فقد المتفائلين بين ملايين من الناس الي مو متفاءلة او غير قادرة على الاصلاح هذي بروحها مشكلة والله

Meshal يقول...

( الحياة إيجابية إذا إنت - فقط إنت - تبيها إتصير إيجابية )

كلامك سليم اخوي وطن النهار ^_^

وانا وياكم بشلة التفاؤل لوول

الله يصلح حال الديره ويبتعدون عيال الحرام عنها

sara يقول...

التفاؤل :(

الله كريم