2008-09-16

ومن الغضب ما عقدني ...



شرايكم بينتي ؟؟ :p بصراحة هي بنت اختي وانا افكر اخطفها من أمها وأبوها .. حبها سكن بقلبي وأحس اني ماراح احب عيالي كثرها :)
والله بصراحة لمن اعصب اشتاق لها وايد ... وهذا حل حلو حق عصبيتي ... منو فينا ما يعصب ؟ ؟




* عمركم شفتوا بنت تعصب تشق شهاده تفوقها جدام أهلها علشان تهدا ؟؟

* عمركم شفتوا بنت (( كبيرة)) تعصب تفلق راس اختها بكعب شكبره وتطلع دمها مع فتحة شكبرها خيطوها المسكينة :p كل هذا علشان تبرد حرتها ...؟

* عمركم شفتوا بنت تعصب تكسر كل الاغراض بغرفتها وتطيح اشرطة الكاست من الدريشة ؟

* عمركم شفتوا بنت تعصب تقص شعرها الطويل كله وتودي الخصلة توريها اهلها ؟؟

*عمركم شفتوا بنت تعصب من حرتها تقط القلاسات القزاز على خواتها لو مو موخرين عنها كانت الحين ذبحتهم ؟

العصبية مشكلة يا جماعة ... :p بصراحة مرة عصبت حدي وقبل ما اشتط قفل علي الباب اخوي وقال لي طلعي حرتج ليمن تهدين ... جان امسك علبة الاشرطة واحذفها على الارض وقاعدة ابجي حييل شوي ولا صرصور طالع جدامي .. أنا شفت الصرصور جان اسكت فترة طويلة لووول (( صج ام الحشرات )) :p الصرصور طلع واحد من علاجاتي العصبية لووول .. اخوي على باله مت لووول بطل الباب يطل ..

بصراحة انا كنت انسانة شبه مؤذية ، حتى أذكر مرة كنا رايحين العمرة علشان يفجون عقدتي فطحت هناك اصرخ (( مابي اصلي مابي اصلي)) وامي قعدت تبجي :( شوي ولا اقوم واصلي من نفسي وقلت لهم خلوني بروحي الحمدلله قريت ادعية وارتحت مارديت شقتنا الا بعد صلاة العشاء ...

كانت هالسوالف تصير قبل ما ادش الجامعة .. ماكنت أحس بنفسي صراحة ، شكثر أمي عانت مني ... ومن طولة لساني ، شكثر حبيبي ابوي تحملني ونصحني بالهدوء ..

كنت احس الفترة هذي طلعت كل شحناتي الي خلتني ادش الجامعة .. وأبدع بالمواهب الي عندي من رسم وكتابة ...الخ

ساعات الانسان يحب يكتب سلبياته علشان محد ينخدع فيه .... أنا كنت انسانة معقدة ..وتعقدت من وجود الرجل أيضا لين ايقنت اني اقدر اعيش بدون زوج :p لمن اشوف حالة الحريم وسلبيات الزواج أقول الله يعين الي بياخذني فرحمة له اني قررت اني ما اتزوج :p

حالة الغضب للحين موجودة عندي وساعات اهين الي جدامي علشان افرغ شحناتي الغاضبة .. بس حطوا لي صرصور جدامي ... وشوفوا شلون راح تتبدل سارون :p






26 comments:

mo3ath يقول...

بل بل بل شنو كل هذا :)

اول شي الصغيره مخطوبه ؟ :q

الله يحفظها ويخليها لكم ان شالله

لوووول عصبيتج موصج انتي حدج قفل ، انا بشكل عام هادي مااعصب بس ياويله الي يقدر يوصلني لمرحلة العصبية :)

اهم شي سالفه الزهيوي لووووووووول المفروض يحطون واحد محنط بكل غرفه علشان من تقولين حرف واحد يقطونه بحضنج :q

alsaronah يقول...

لووووووول

شكثر خطبوها والله :)

اي على العصبية ودي اكون باردة ولا اعصب ..

حطيت صرصور بعلبة بكشخ فيها مكتبتي بس الصرصور ريحته خايسة قاعدة ادور على صرصور محنط قديم .. لووول

3bady يقول...

تهبل البنت مشاءالله :)

الانسان يحاول يمسك غضبه مهما كان الظروف

لانه مافي شي ينحل بالصراخ

انتي لا اطالعين سلبيات الناس و تتعقدين منهم خلج من نفسج :)

تره الرياييل مو كلهم سوا فيه بعضهم ناس تفهم و تتفاهم :)

و طوليي بالج اذا فيه شي نرفزج اول شي فكري فيه انج ما اتكلمين احد تمشين مكان اتفرقين فيه اعصابج بحيث انج ما تاذين غيرج :)

مُحَسّدْ يقول...

العصبية تخسرج كل اللي حواليج

الامورة الله يحفظها اتوقع تكون لاعبة جمباز على هالصورة :)

Alromi يقول...

حلاته الله يخليها لكم واتربى ابعزكم
انا كنت نفس حالتج بس مع الوقت صرت باااااااااارد اعصابي صارت ثلج لاني فكرت وترى ماكو شي يسوى اني اعصب علشانه وانا فاهم شعورج وحاس فيه لاني مريت ابهتجربه بس الحمدلله عدلت من وضعي وغيرت هلعاده الي فيني وعقبالج

الـبـيـرق يقول...

لا يـحـوشـــك

سـكـنـهـم مـسـاكـنـهـم

:d

alsaronah يقول...

عبودي..

والله انا بنفسي ومالي شغل بأحد بس طبيعة البيت عندنا اذا سكتوا احد يسكتون انا لا لازم ادافع عن نفسي لأني ابي ابين الحق ، مابي انزف وانا مظلومة علشان جذي صرت اتعامل بالعصبية مع الكل ..

alsaronah يقول...

محسد

ماعندي مشكلة اذا خسرت ناس لأني دافعت عن نفسي بعصبية لوووول

الناس هاليومين مايبون احد طيب :)

alsaronah يقول...

الروومي

ان شاء الله اصير مثلك:)

alsaronah يقول...

البيرق

شسوي يعني حرام عليك:(

حـمـزة يقول...

يحليلها البنوتة الله يخليها لكم انشالله >> يحب اليهال وايد لول


حمزة
:)

terkwaz يقول...

سارونه

انتي حدج اكشن


ذكرتيني بامي اذا عصبت من شطانتنا
تحذفنا باي شي يمها قلاص مطاره جوتي ههههههههههههه طابوقه ماتفرق وياها...


لا يايبا جمره الغضب تخسرج وايد
وعليج بالماي اذا عصبتي روحي تسبحي
او نامي ...

مره عصبت وكسرت لوحه شاريتها لغرفتي غاليه حتى ماشلت السعر عنها وندمت..

Kuwait يقول...

بسم الله عليها الصغيرونه ربي يخليها لكم ويحفظها :*
اما عصبيتج ما صارت ولا استوت والحم
لله اني مو اختج جان انا من زمان بخبر كان ..
لان متعتي أطفر الي جدامي وانرفزه لما يعصب وأطلعه من طوره وانحاش ;q

غير معرف يقول...

العصبية اللي من هالنوع ترى وراها سبب:
حساسية زايدة بالشخصية
تفكير ان محد فاهمج
احساس بالظلم
ضغوط واحساس بالضعف امامها
خيبة امل كبيرة
وهلم جره

**

انا مثلج وادري ان عصبيتي المينونة اللي كانت بمراهقتي ترجع ليه حسيت ان الدنيا دافنتني
وافقد صيطرتي اذا فقدت الامل

**

عجيبة صراحتج
P;

alsaronah يقول...

حمزة..

انا بعد احبها واهي طايرة فيني نادتني ماما قبل أمها :p


تركواز..

لووول فديت امج، والله انا خيفة من جذي مرة من عصبيتي ولد اخوي قال لي جبي جان امسكه من هدومه ورفعته فوق وطيحته بالارض لوووول اخترع لووول من يومها يقول للكل جب الا انا هعهعهع:D


KUWAIT
اشوة انج مو اختي جان صارت فيج عاهة مستديمة ...


مجهول ..

لووووول
اول ثلاث اسباب عدل كلامك...:)
العصبية شي حلو ترا الله :)

kuwaitawy يقول...

السارونه


شلونج انشاءلله مرتاحه


ومو معصبه الحين :)


---------


العصبيه هذي موجوده في اغلب الاطفال

وتختلف من شخص الى آخر وفي اطفال تظل فيهم هالعصبيه الى كبر معين وبعدين تروح


وفي اطفال تروح منهم العصبيه على صغر






وغير جذي فهذي وراثه



لكن حاولي انج تتحكمين فيها وتذكرين من اسم الله وتعوذي من الشيطان وقت العصبيه




--------------




الله يخلي بنت اختج لج يارب


والله ماشاءلله مزيونه


ما يصير اخطبها حق ولد اختي ؟؟؟

alsaronah يقول...

هلا حبيبتي كويتية

اي والله من صغري ... امي تقول محد مينني بالبيت غيرج يبون يزوجوني :(
لووووول ساعات تقول لي انتي طالعة على منو اقول عليج علشان اطفرها .. لووول امي عصبية حييل بعد وابوي بعد :) والعصبية في بيتنا يعني كلهم عصبيين بس مو بجنون مثلي ...

هذي اسمها الزين .. وعيدميلادها شهر عشرة معاي راح تكمل سنة ان شاء الله .. يالله من الحين احجزها .. قررت أزوجها :P اضمنيها من الحين افا عليج لووول

alsaronah يقول...

اووووبس توني ادري ان كويتياوي كنت اقراه كويتية لوووووول

سوري:p

آهات وطن يقول...

الله يخليها ويحفظها لوالديها

هذي المواصفات اللي ذكرتيها تنطبق على شخصية البنت الكويتيه في نظر صاحبة قناة سكوب

والله البنات يكسرون الخاطر

وقال الرسول ص

رفقا ً بالقوارير

غير معرف يقول...
أزال أحد مشرفي المدونة هذا التعليق.
alsaronah يقول...

آهات وطن ...

شكرا لك على التعليق .

ــــــــــــــــ

أخي مجهول ..

باستطاعة اي أحد اذا ملك مدونة وشاف تعليقك انه يحذفه .. بس للأسف مجتمعنا يحب البنت الي تنافق وتقول أنا كاملة وماتذكر سلبياتها .. يمكن لحظة الغضب الي عانيت منها كانت بسبب وراثي كما قاله البعض .. وشي ثاني الله خلق وفرق يعني خلاك انت هادي انا خلقني عصبية جدا لازم اكون مثلك .. ورجاء لا تقول بنات النت والاسواق وكأنهم رخاص .. اذا عندك خوات مشكلة وشكلك ماعندك خوات علشان جذي قاعد تكتب هالكلام .. يليت يكون في ذرة احترام ..
اذا كنت تبيني أكتب مثل البنات واقول أنا فتاة هادئة وأحب الجميع .. واسوي من نفسي باباي ويعجبك هالشي فترى المنتديات مليانة بهالبنات :)

شكرا لك

alsaronah يقول...

ثاني شي أخوي .. لو كان اخوي معطيني طراق مثل ماقلت وأهلي ضغطوا علي ..
كنت الحين مثل البنات الي تدور على الخربطة وتقول والله اهلي ماكانوا يعاملوني زين فرحت وارتكبت الغلطة .. خل نكون صريحييين اغلب البنات الي يكلمون هذي حجتهم ترا .. :)

Lavender يقول...

وااااي بنت أختج زووووغة اسم الله عليها الله يحفظها :**

و الصراحه أعصابج تخرع ..

يما يما يما

عفيا لاتعصبين علينا p:

بس اذا خفت الحين زين أشوه الحمدالله !

لأن الصراحه هل أعصاب مشكله !

و بعدين ليش الفضايح !

وإذا بليتو فاستترواااااااااا !!

إستترواااااااااااااااااااااا !

بدعتي الصراحه !!! لوول

alsaronah يقول...

أنا ذكرت سلبية كنت اعاني منها ..احد الاخوة دش وحط اللوم على اهلي وحالته حالة

لاصج والله اغلبهم يبون البنت تسوي نفسها كاملة علشان تترس عينهم...

مولازم اكون كاملة ....

غير معرف يقول...

السلام من جديد

أولا ًانا صاحب الرد اللي تم حذفه

ثانيا ً أهنئك على صراحتك ولو ان صراحتك فيها من الشيء اللي تنلامين عليه بس ولو يكفي انك صريحة ولو كنتي مخطئة أقل شيء زي ماذكرتي مالبستي نفسك قناع زائف

لذا ياأختي الكريمة

مادام عندك العقل والله يزيدك

اجل حكميه وحاسبي حالك وأوكلي الأمر لله سبحانه وتعالى وبإذن الله بتطلعين أفضل انسانة فاهمة وعاقلة وحكيمة

والأهم ياأختي لاتأخذك مجاملات الناس هاذي نصيحة أهديها لك خصوصا ً في عالم النت

لك تحياتي واحترامي على صراحتك

لأني بالفعل ويشهد الله ان عدوي وهو عدوي لو كان صريح معي بنيته الشريرة
وربي له احترام كبير ولو كان تصرفي معه مضاد تبقى نظرتي له كبيرة

لأنه أرحم من أقرب الناس لك واللي ناوي عليك بشر أو يتمثل لك بصورة غير حقيقته

الله يحفظك ويهديك وفرصة سعيدة ياأختي
وعذرا ً على ردي الماضي والله يعلم ان هالحروف والحروف الماضية كانت بغرض انك تستوعبي عالمك الحقيقي وحقيقة تصرفاتك

والسلام عليكم

أخوك
مجهول

alsaronah يقول...

اخي مجهول ...

انا ماكنت ناوية احذفه والله الا لأني أعدت القراءة وشفت اول جملة ماعجبتني يعني أهلي مالهم دخل بعصبيتي ..

وبالعكس اخوي ... أنا ماقدر اقول للناس لا تجاملوني .. وبالعكس أحب الي ينتقدوني وايد .. ولو تشوف بالمنتديات الي اشارك فيها تعليقي حق الي ينتقدوني أهم عندي من الي يشكرون ويجاملوني .. بس كل واحد وحر باجابته .. واعتبر تجربتي هذي حلوة على الرغم من الجنون الي فيها ... لأني قدرت الآن أن اعرف شخصيتي .. وقدرت شلون اوفض وقتي وغضبي بالرسم والخواطر وغيرها من الهوايات ...

أخي أشكرك كثيرا على ردك وأدري قصدك فيه افادتي لا تجرييحي وتقبلته بروح رياضية :)

شكرا لك