2008-09-18

فاضي ... افتح لك مشغل

الحريم أول ماكان عندهم أهمية لسوالف الماكياج والتفنن باللبس ، عقب ماطلعت آلاء دشتي وبدعت بحليمة بولند ... ومن بعدها حنان دشتي وغيرها وغيرها ...
والريايييل قام يقارنون بين حريمهم والفنانات الي يسوون دعايات ماكياج .. الكل قب وقام يتكلم بهالخبيرات التجميل ...
والممثلات اول مايحطون ماكياج عبيط نفس الي الحين قاعدة من النوم ويهها كله ماكياج ومو مخترب لووول..
ويوم ورا يوم ... نشوف البدع قام تطلع .. اوووووف مصممة أزياء ... كل الحريم راحوا لها ...
وحدة فتحت مشغل .... كلهم قاموا يفتحون مشاغل. .
وسبحان الله خبيرات التجميل ماكانوا موجودين أول توهم يطلعون مرة وحدة :p ...
وكل وحدة تقول هذي مو خبيرة تجميل وأنا الأصل والثانية الفرع ...
وكل وحدة تحط تصميم وتقول باقوه مني ...
واسعار خيالية ..
وشجعتهم الدولة تحت شعار (( المنتج الكويتي )) ...
كل الحريم الحين مصممات أزياء وخبيرات تجميل سبحان الله ... وينهم أول ؟؟
كل الحريم يحطون نفس ماكياج حليمة ... ياكثر الي يشبهونج يا حليمة ..:p
رحت مرة معرض .. كانوا حاطينه بصالة أفراح ...
والله توقعت أقل شي الترتيب عفسة فوق حدر ..... وكل وحدة تعرض بضاعتها وحاطة لها جم واحدة تعرض أزياءها ...
وكل وحدة واقفة جنه تقول حق الي يمها (( وخري أنا أحلا منج )) توقف بعصبية والماكياج تارس ويهها والنفسية الخايسة لووول
وذكروني وحدة بالجامعة تقص على البنات تسوي لهم بروشور شكله سهل أصلا ومرقعته بخام مادري شنو .. وتبيعه على 5دنانير وفوق
كميت على رفيجتي قلت لها وديني محل بو 100 فلس واييب لج الاغراض واسوي لج أحلا منها ..
ساعات أدش مشاغل .. اوكي الكويتية تحب تشتري بس مو لدرجة ان ملابس اي شي مرقع فوق حدر وسعره نار... شدعوة عاد ..!!!
غريبة والله أنا استغرب وينهم من زمان ؟؟ اول بس الهنود الي يبيعون بضايع
الحين كل الكويتيات فتحوا مشاغل ..
شي حلو والله أنا ما أنتقدهم بس أنتقد النفسية الخايسة ... والأسعار ترا احنا مو خبول ندفع على شي مو سنع ..
لبس عروس دفش من عواطف الحاي ب1000 وفوق ورفيجتي نفنوف عرسها ب700 دينار ماخذته من لبنان وكل من شافه قال ب2000 دينار وفوق
... ماله داعي تضخيم الأمور واللعب على عقول الناس ...
حطوا سعر معقول ...
ملاحظة :
مو الكل ..... (( البعض)) :p
يظل المنتج الكويتي أولى بس يليت ما يمصخونها ...


تعليق على الصورة ...
ساعات ابطل جرايد الاعلانات واشوف اعلانات الصالونات وكل وحدة كاشخة ... خبيرة التجميل من لبنان فلانة الفلاني .. وخير يا طير لبنان ... يعني كل اللبنانييين يضبطون الشغل ؟؟ويحطون صورة وحدة حاطة ماكياج والله العظيم حديقة مو ويه الوان آخر عبط لووول
وعيونها خاطتها عدل ... آل يعني اغراء :p
ويضحكوني يكتبون تحت الصورة .. (( صورة خاصة بالصالون )) لوووول من حلاتها زين ؟

18 comments:

مُحَسّدْ يقول...

كمية الجكر زايدة بالديرة :)

Kuwait يقول...

لوووووووووووووووول ..
الحين حتى خبيرات التجميل صاروا دكاتره تسويلج تفخ ونفخ وليزر !!
ما انتي أقصاج حيا الله وحده قاصه على الأوادم تحطين ميك اب رايحه صايرتلي دكتوره وفاهمه ليش وعلى شنو أساسا !!

ZooZ يقول...

ترى حطوا بالكم من الصالونات مو تثقون بأي صالون .. أقولكم ليش .. صاحبة أشهر براطم بالمويت واسمحولي ماراح أقول شفايف لأنهم أوفر سايزد !! هذي الفنانة مسيجينة راحت صالون كشخة وفيه فليبينيات يتفخون الشفايف على انهم خبيرات بهالمجال .. وآخرتها حرام شصارت ..

alsaronah يقول...

محسد ...

الله يهداك مو كلهم والله لووول :p
في منهم جمالهم طبيعي بس مادري ليش يحبون الأوفر ... تقول لها ماكياجج جذي اوكي تقول لا بعد زيدي لووول

alsaronah يقول...

kuwait

قاعدة تتحجين عني @@ ؟؟

لووووول اي استغفر الله والله مصخرة عندنا وحدة بفريجنا كانت تسوي الماكياج ب10 دنانير وكان ماكياجها حلو والحين فتحت صالون ونفخت خشمها وماتروح بيوت مثل اول وماكياجها من 100 وفوق لووول ولا الحريم خبول يقطون فلوسهم بالهبل .. ويروحون لها .. ملقي الي ترفع خشمها وفوق هذا كله نفسيتها خايسة .. مادري شهالكبرياء الزايد . مكتشفة الذرة الأخت .. لووول

alsaronah يقول...

zooz


لووووول هالفنانة أمس شفتها ... ورافعة خشمها ياربي شفيهم أغلب البنات يشوفون نفسهم ... ابتسامة لله وحدة طلبت تصور معاها جان يعطيها ظهرها وتقول اييييييف لووووول

لا وللي يسلمج والله حتى الأجنبيات عالميات ومشهورات ما يسوون سوات هالي عندنا لوووول


لووول امس رحت عيادة تجميل حق اختي المسكينة لوووول واحنا طالعين من المصعد ولا وحدة ويهها كله بالستر لووول متفخة الآكو والماكو لووول ...


وكل البنات صاروا يشابهون بعض @@ ماتحسين جذي؟

3bady يقول...

خليني انا واقف يم هذي الفل ميك اب

صدقيني انا اطلع بنت يمها << حدي قوي :P

لالا اتغشمر لا اتظنين ظن السوء فيني :P

Fashionista يقول...

أهم شي الصورة الخاصة بالصالون

تخليج تهونين من الخرعة

alsaronah يقول...

عبودي

لووووول من قال والله ماظنيت سوء أدري تتغشمر لووول

alsaronah يقول...

Fashionista


اي والله انا ودي اعرف هالماكياج يعجب بعض الحريم ؟؟
يعني يخرع... والله لو يعطوني مليون دينار ماحط صورتي وويهي مع هالماكياج ويييع لوووول

غير معرف يقول...

المنتج الكويتي اولى اذا كان بجودة منافسيه ومايزيدهم بالسعر

مو يدوبلون الاسعار! والا دراعة بـ ٧٠٠ دينار؟ اروح لندن اقطلي على نفنوف سهرة ماركة احسن

كيفهم لهم زباينهم، والا لو ماكو ناس تشتري جان ماصار هذا الحال
=)

الـبـيـرق يقول...

يـا حـبـكـم للـمـكـيـاج و هـالـخـرابـيـط :D

ركـضـة ورا مـعـارض الـمـكـيـاج لـول

alsaronah يقول...

غير معروف

كثر الدعايات الي مالها داعي تشوش مخ الناس.. يعني احنا مقتنعين ان هالاشياء عبيطة ونشتريها برا الكويت رخيصة واحسن بوايد ... بس في ناس الحمدلله والشكر مع زيادة الاسعار زادوا سعر بضايعهم لوووول عاشوا دور التجار لووول

الله يكون بالعون

alsaronah يقول...

البيرق

لا تجمع :@

في ناس تاخذ معاشها من صوب وتروح المكتبة تشتري لها كتب .. واوراق قص ولزق ومساحات واقلام .. وستكرز واوراق والوان لوووول ... تطلع من المكتبة مخلصة نص فلوسها لووول

الماكياج مو كل شي ...

شلونك انت .؟؟ :D

Salah يقول...

مفهوم الجمال مقلوب في هذا الزمن.

عجبني تعليق للأخت زين على موضوع الأخت واي مي الأخير، انقله هنا وان شاء الله تعذرني الأخت زين على النقل:

"صوني جمالك فإنه فتنة
لا يفتن بالجمال دون العقل الا كل موبق
صوني جمالك لله درك
ما يحفظ خيفة من العين الا الدرر"

ManalQ8 يقول...

الجمال جمال الروح
الي يغطي على جمال الوجه والشكل الخارجي

وكلام الزين زين وما يعلا عليه


==================
محسد

حرام عليك يا ريال

انتو الي تكسرون من مياديف بنات الديرة

والسارونة ما يابت شي من برة

"
والريايييل قام يقارنون بين حريمهم والفنانات الي يسوون دعايات ماكياج ..
"

والله هذا واقع موجود في الديرة
وهذا يضغط على نفسية النساء

والي بيتزوج يفكر بالجمال اولا بعدين يقول اخلاقها
هذا اذا فكر عدل



ما عليه يالسارونة
طولت بالتعقيب
اسمحيلي حبوبة

:)

دمتي بالف خير

alsaronah يقول...

صلاح مشكور على الرد وأعتقد ماراح تزعل لأنك نقلت كلام رائع لها ننتفع فيه وتنفعنا بعد شكرا لك :)

alsaronah يقول...

ManalQ8


لا اخذي راحتج حبيبتي ومشكورة على تعليقج الحلو .. محسد متعقد المسكين الظاهر كل من مرر جدامه يطلع جيكر ولا عيونه تعودت :P
الحين يعصب علينا لوول