2008-10-24

لخبطـــــة بتخاريفي 2



مـــــن يستــــــــاهل قلبــــج يــــــا ســــــــارة ؟؟؟






بصراحة ساعات أغني مع نفسي وايد وأذكر أيام الدراسة وشلون كنت اشارك وايد مع الموسيقى وحبي الجم للمايكروفون .. أقول ليش مادشيت معهد الموسيقى ؟ وأرد أقول لا العلم أفضل بكثير ... بس هم هالهواية ماكلة عقلي .. أحب أغني وايد لووول
كل عام و زوزو بألـــــــــف خيــــر


أمس ، ولمن خلصت من الجامعة طلعت رحت سيدة على المركز العلمي لأن أختي مسوية حفلة عيدميلاد بنتها هناك ، زوزو كملت سنة .. المهم انا كنت رايحة مبجر وأهلي كانوا للحين ماطلعوا من البيت فقلت اقعد بالكوفي شوي اشرب لي شي يعدل مزاجي السيء لوول.
وأنا رايحة صوب كراسي كوستا شفت ثلاث حريم قاعدين طالعتهم بنظرة غريبة ... ياربي مارين علي بس من كثر التعب موقادرة اركز ولا يوقفون ويأشرون لي .. طلعوا بنات عمي شهالصدف الحلوة ؟؟ سلمت عليهم وقعدت معاهم نسولف ووالله خنقتني العبرة .. شكثر أحب أهلي وشكثر ودي أكون معاهم بس الظروف تمنعني اني ازورهم علطول ... وقلت لهم هالشي وبصراحة بادلوني نفس الشعور ... مابي اقطع رحمي ولابيهم يحطون ببالهم اني مابي ازورهم او ما أسأل عنهم ..
بصراحة قعدوا يسألوني عن الدراسة وشجعوني وايد على الجيولوجيا والعمل الصحافي ، أحب عائلتي لأنها تهتم وايد بالعلم والدراسة . على الرغم من أن أبوي ماكمل دراسته الا انه كان يحرص على اني اقرا واطلع وابحث بالعلم ..
وبعدين غيرنا الموضوع وسولفنا على ايام اول لوووول ، وضحكوا علي لمن قلت (( أبي بــــر أبي أتلذذ ببداوتي )) لأن لمن كنا نروح معاهم البر والتخييم هناك كانوا يضحكون علي وانا الحق الحشرات ..
بصراحة اكثر شي ونسني بالحفلة وجودهم ..!!! العائلة مهمة جدا بالنسبة لي ورضاهم أكبر همي .. الله يخليهم لي ويخليني لهم لوول ..
واحتفلت زيونة بعيدميلادها وسط الازعاج الي كان موجود لوووول وصوت اليهال وملاقتهم لووول ..
صــــــديقتي دانـــــــــــــة
قبل أمس يتني رفيجتي وكان ويهها متغير حيييييل وفجأة بجت وايد ... أنا اخترعت فرحت اسألها بسرعة شفيها ؟؟ قالت لي ان اختها الكبيرة فيها سرطان .. بصراحة حز بخاطري شكلها .... بس موشرط كل واحد فيه سرطان يعني بيموت، أبوي الغالي وبعد ما شالوا منه الخلايا السرطانية طلعت مرة ثانية ومايقدرون يسوون له عملية لأنه كبير وما يتحمل .
حاولت اهديها بصراحة ، فقلت أروح حق دكتوري وأخوي الغالي الدكتور محفوظ لأنه دايم يدق على الوالد ويطمنه ، فلمن تكلم ويانا بصراحة ماقدرت امسك نفسي وبجيت ... الارادة مهمة والله مهمة ...
والواحد لمن يشوف أحد من أهله مريض لازم يكون وياه بكل لحظة ... مع اني اتغدى واتعشى بروحي في البيت الا اني الحين ما آكل الا مع ابوي ... حتى الأكل أبي أشاركه فيه ،لأنه بحاجة لي وهذا الي حبيت اوصله للجميع ... لا تخلون المريض بروحه ، أمسك نفسي ساعات لمن اشوف شكل ابوي ، دايم أنا الي أدلك له ريله ، ومرة ناداني علشان ادلك ريله ، فطالعته وتنحت أبوي تغير ، أبوي ضعف وايد أبوي شكله مريض حييييل ، أبوي بحاجة لي الحين اكثر من حاجتي له .
لا تخلون المريض يعاني ، ووجود الي حواليه اهو احلا دوا صدقوني ...
هنا تجدونني :

24 comments:

malak يقول...

أول شي كل عام و زوزو بألف خير

و يمعه الاهل تونس الواحد :)


و على رفيجتج الله يعينها و يقوم اختها بالسلامه صعب ان نشوف شخص نحبه مريض و يتعذب و احنا مو قادرين نساعده


و الله شافي ابوج يا رب

و الاراده مثل ما قلتي اهم شي
انا مرت عمي مسكينه فيها سرطان بس متوكله على الله و تقول ابي اعيش عشان عيالي و اللي يشوفها ما يبين ان فيها شي :)

alsaronah يقول...

MALAK

الله يشافي مرت عمج يارب ... فعلا الارادة احلا شي بعدين الحين ماشاء الله العلم تطور وقاموا يكتشفون علاجات للسرطان يعني الحمدلله الدنيا بخير ..

مشكورة لمرورج عزيزتي

mo3ath يقول...

يمعه الاهل حلوه ولما تلاقينهم صدفه تكون احلى الف مره من القعده المخططين لها ..

الانشغال والضغط ياخذ منج احلى اوقات عمرج ، حاولي تخففين عن نفسج وان شالله تقدرين توفين اهلج حقهم

سالفه رفيجتج تكسر الخاطر صراحه والخبر مايسر عدو قبل صديق ، الله يشافيها ويقومها بالسلامه اهي وكل مريض ..

الصبر والدعاء مع الإراده القوية والرضا بالقدر والمكتوب من اهم عوامل العلاج

الله يشافي الوالد ويقومه بالسلامه ويعطيه طوله العمر على الطاعه

الـبـيـرق يقول...

كـل عـام و ألـي بـالـصـورة بـخـيـر :)

بـعـد الـغـزو زاد مـرض الـسـرطـان بـشـكـل رهـيـب بـالـكـويـت .. الـمـلـعـون صـدام مـادري شـقـل عـالـديـرة :@

الله يـقـوم أخـت رفـيـتـج بـالـسـلامـة .. و الله يـشـافـي والـدج إن شـاء الله

:)

alsaronah يقول...

mo3ath

والله ودي بس مشكلة اهلي مايشجعون استغفر الله يعني ماحب اروح بروحي صراحة .. مهما صار للحين صغيرة على هالسوالف لووول

الله يشافي مرضى المسلمين يارب

alsaronah يقول...

الـبـيـرق

الله يسلمك .. تتوقع صدام شقط على الكويت ؟؟

3bady يقول...

هااابيي بيرذداييي حق زوزوو :))

الانسان لما يحس بضعف يحتاج احد يساعده و يهديي و يخفف عنه

ما اتشوف اخت رفيجتج شرر و ان شاءالله ماكو الا الخير ادعي لها و ان شاءالله ماكو الا الخير

ما يشوف شر ابوج اهم شي الراحه اتخفف من التعب زين اتسوين قعدي يمه ضحكي وياه و لا تحرمين نفسج من اللحظات الحلوه :)

alsaronah يقول...

3bady

أنا ماخذة من طبع ابوي احب اكون بروحي ونفس الوقت اشتاق للمة والسوالف والاهل ... ماراح اخليه ولازقة فيه لزقة عدلة لووول ماراح اهده :D

حـمد يقول...

حضوركم ومشاركتكم تهمنا ! كما ندعوكم لعرض الدعوة والحشد من خلال مدوناتكم ومنتدياتكم وصفحاتكم الالكترونية على الفيس بوك أو غيره

كما ندعو من يملك أي موهبة فنية (رسم ، غناء عزف ، كتابة أو شعر) للاتصال بنا للمشاركة في أنشطة الحملة المختلفة

ترة يمدي :)

alsaronah يقول...
أزال المؤلف هذا التعليق.
alsaronah يقول...

يمدي على شو ؟؟

زين ليش ماقريت الموضوع ؟؟ :)

مشكور على كل حال :) وبحاول اكون موجودة لازم استغل كل الفرص

Eng_Q8 يقول...

كل عام وهالصغيرونه الحلوه بخير

والله يشافيهم ويشافي كل المسلمين

حـمد يقول...

الله يشافي كل مرضانا انشالله

وكل عام وزوزو بخير

وعذريني كنت مار مستعيل :)

قصدي يمدي على المشاركة في المعرض

مع التحية

ليبرالي يقول...

بوست حلو وايد من الموسيقى للمركز العلمي لكوستا لمرض السرطان صج دوخني بس استمتعت بقراءة القلم المبدع سارونه

THE BOSS يقول...

اتمنى لكي مزيدا من التقدم و التوفيق
والطموح ليس له حدود
والله يشافي الوالد
وكل عام و زوزو بخير

وعطني ولعه

Alikingkw يقول...

شدني العنوان (تخاريف طموحة) وبعد ما قريت المدونة لقيتها مليئة بالطموح والجانب الإنساني وخالية من التخاريف.

الله يشافي الوالد واخت صديقتج وكل عام وزوزو بخير

ManalQ8 يقول...

ما شاء الله

الى الامام دائما يا سارونة

موفقة يا رب
:)

alsaronah يقول...

Eng_Q8

وإنت بخير وبصحة وسلامة

alsaronah يقول...

حمد

مشكور على الخبرية:)


وانت بخير

alsaronah يقول...

ليبرالي


هلا والله فيك .... مشكور لمرورك وانطرني بمواضيعي الي تدوخ...

alsaronah يقول...

THE BOSS ...

مشكور اخوي :)

الله يسلمك ...

alsaronah يقول...

Alikingkw

احرجتني بكلامك .. مشكور وايد على مرورك

alsaronah يقول...

ManalQ8

اجمعين حبيبتي :)

Alikingkw يقول...

العفو شكرا لك
استمتعت في القراءة