2008-10-02

الرجل الشرقي ... الى متى ؟؟







في مجتمعنا الشرقي وخاصة لدى دول الخليج نجد الرجل يحاول دائما أن يستحوذ على كل شيء طامس دور المرأة بحيث أصبحت المرأة راضية بما يقرره الرجل لمصيرها ...


في السابق كنت عندما أقرأ عن امرأة سياسية قوية ، دائما أرى نقدها ونبذها لماذا ؟؟ هل لأنها امرأة ؟؟


ولو كان هنالك رجل بمثل منطقها وسياستها فسوف ينال اعجاب الجميع .



أصبح الرجل الآن يضع كل اعتماده على المرأة ، اشمئز من الرجل الذي يضع شرطه الأول بالزواج أن تكون موظفة ، وفوق جرأته يقول (يفضل أن تكون مدرسة أم دكتورة أو أي وظيفة لها راتب قوي ) لكن في السابق كان الرجل يخجل أن وضعت امرأته يدها في جيبها بل هو من يصرف على كل شيء .



ربما تجد عزيزي القارئ تناقض في كلامي ,,, ولكن أردت أن أوضح من كلامي ، أن الرجل اعطى المرأة الفرصة للظهور على حساب تحملها كل شيء .



نجد الرجل اليوم قد تجرد من عاداته التي لا تلائمه ، وخاصة من يدرس في الخارج عندما يعود فهو يقول كنا وكنا وكنا في الخارج وكأنه مواطن غربي ويفتخر بكبرياء بأنه درس في الخارج ولكنه لا يسمح لزوجته أو أخته بأن تكمل دراستها في الخارج .
شاهدت قبل فترة مقطع فيديو يقول فيه الرجل بأني لا أخرج مع اختي لأي مكان خوفا من أن تتعلم الخطأ من الفتيات في الاسواق ، واستغرب كيف لا يثق بأخته مادام يثق بتربيتها؟؟ ليست الفتاة المعرضة للخطأ ، حتى الرجل .
لقد جعل الله القوامة والميراث هما الفارق بين الرجل والمرأة ، ولم يأتي نص في القرآن أو الاحاديث الشريفة تقول بأن ( الرجل شايل عيبه )
استغرب مجتمعنا الذي يقول الرجل مهما فعل فهو مرغوب أما الامرأة فلا مما جعل كثير من النساء تنبذ حياة الشرق ، فيوم الحساب لن يقول الله الرجال لن يحاسبوا ( شايلين عيبهم ) ...
لذا نجد التمرد يزيد في الرجل ، واذا وجد خطأ من المرأة قال تأثرن بالغرب ، لا وألف لا بل الرجل هو من جعل المرأة تصل الى هذا الحد .. ضحكت مرة على كلام والدتي حين قالت مهما فعلت المرأة عندنا فهي مغضوب عليها ...
لماذا يجعلنا الرجال نقول ( ليتني كنت رجل ) كي ( أشيل عيبي ) ؟؟؟
الدين الاسلامي لم يأمر بهذا الشيء فاذا كانت العادات والتقاليد عندهم أهم من الدين فلا داعي بأن يتأسلموا علينا ...
افرح أيها الرجل بما تقوم به ... ولكن لا تلم المرأة ان تفوقت عليك بذكائها :)
خارج الموضوع :
استغفر الله مرة كنا حاطين على قناة وفيها برنامج ديني فالشيخ قعد يتكلم بعصبية ويقول ايتها المرأة غضي البصر حتى أنا لا تطالعيني بالتلفاز لفي وجهكِ واسمعيني حرام تطالعيني @@ ، أمي انصدمت جان تقول زين ليش اهو طالع بالتلفزيون جان تحجى بالراديو وفكنا .. استغفر حتى واحنا بالبيت باطين جبودهم ؟ لوووول
موضوعي هذا لفئة معينة من الرجال وليس كلهم ...
الصورة ل (sean poul ) اعجبتني :)
اذا كانت هناك اخطاء فلاداعي لأني كتبت الموضوع وانا اسمع الاغاني المزعجة :p
شكرا
طموحة مملوحة


38 comments:

Blog 3amty يقول...

مو المشكلة أن حريم قبل اللي مثل عمتي خلصو، عباية وملفع كل سنه وتاكل عيش وتخم الحوش ويالله حسن الخاتمة!

طلابات ومصاريف بنات هالوقت زادت وتستدعي سيارة وجنطة وجوتي وبدلة للعيد وغدا برة وخدامة تمسك الياهل وهي طالعة العرس، وتولد برويل حيات بسويت أمبراطوري وككاو بلجيكي مكتوب عليه أسم البيبي :)

الموضوع بالنسبة لي عرض وطلب، البنات أهم اللي رافضين يعيشون على قد معاش الريال، فالحل أشتغلي واشتري جنطة بـ 500 دينار من فلامودا تره مسوين تنزيلات بسرعة :P

THE BOSS يقول...

يا عزيزتي وينه الرجل الشرقي في هل الزمن ووينها المره الشرقيه في هل الزمن ما كو راحوا باح كل الباقي مجرد بشر باحثين عن المظاهر و اخر التقليعات فلا الرجل رجل و لا المره مره الا من رحم ربي
وفي الزمن البارد ضاع كل شئ فأصبح كل شئ مبني على الماديات لقد فقدنا الرومانسيه و المحبه الخاليه من المصالح و النفاق
بس كافي
عطني ولعه

Fashionista يقول...

شخباري الرجل الشرقي؟

الرياييل انقرضوا

الحين تلقينه ما عنده أي مشكلة إنها مو بس تصرف على نفسها لا و تصرف عليه بعد

3bady يقول...

لوووووووووووول فصلت على الي خارج الموضوع

عدل كلامج الريال مني ما يعيبه شي اكبر دليل لو واحد يكلم وحده بالتلفون الولد ينزف و يطلع من السالفة اما البنت تقعد طول عمرها الحجي عليها

بس لازم الانسان يضحي بكل شي و ما يرده الا السانه علشان يوصل حق طموحة

اذا ما قدر ما ادري شنو الحل يمكن مكتوب عليه انه ما يصير هالشي :)

دلة يقول...

مها الغنيم
سعاد الحميضي
وغيرهم، ماسمعت احد ينقد عليهم!! اعتقد المراة اثبتت روحها في مجتمعنا الكويتي وكسبت ثقة الرجال والنساء في سوق العمل
انا اقول "سوق العمل" لان هذا المهم في وصول المراة لاهدافها المهنية - وهذا الكلام موجود في الاخص بالكويت

اما الجانب الاجتماعي فهو شوي متأخر: نسمع الامهات يقولون المراة مالها الا بيتها والرجل مايحب البنت اللي تكمل دراستها و و و و و من الخرابيط
الحلو ان الوحدة فينا تقدر تصك اذونها عن هالافكار المحبطة وتركز على حياتها المهنية

حبيت ارد على النقطة الولى بس

أتيت متاخرة يقول...

جيتي على الجرح يا تخاريف

بعض الرياييل مو كفو >>> قلت بعض
وهم بعض النسوان مو كفو>>> قلت بعض
بس الي نشوفه الحين ان المرة صاره اهيا المرة واهيا الريال بالبيت
يعني تشتغل للريال زوجة وتوابعها: أم خدامة وطباخة ومربية وسايق ومعلمة ولااااااااااا وبعد جامعية وما يدفع لها راتب
يبا واذا تحجت اتهموها انها يابسةوما عندها مرونة
صج في نسوان مطلعيين عيون الرييايل
بس هم اشوف الريال اذا حصله وحدة ترضى فيه يلعن اسلاف اسلافها

alsaronah يقول...

Blog 3amty....


لكل زمان حريمه ورياييله .. وكل واحد المفروض يحاول يتأقلم مع زمانه يعني مانقدر نقول البنات الحين يخمون الحوش أي حوش ماكو حوش الحين حديقة ونافورة وشغل عدل..

بعدين انا ماحب السوق .. لو يسوون تنزيلات من هني لباجر :p افضل الجنطة ام 4 دنانير تكد والله ...

alsaronah يقول...

THE BOSS ...

مو كلهم يهتمون بالمظاهر والله نقدر نقول أغلبهم .. حتى الريايييل الحين الي يقول امبي طاع جنطتها لووول حافظ كل شي بالسوق استغفر الله صارت فرض عليهم روحة السوق ...

صح كلامك اول لحبوا بعد حبهم شريف وطاهر والكل يدري عنه الحين يكلم 60 وحدة ومتلعوز مسوي من روحه رومانسي ومجروح لوووول


وخد لك ولعة

alsaronah يقول...

Fashionista


لوووول اي مو سالفة انقرضوا هذي مستغلينها تلقين الريال حاط بباله ان على جكره الزايد عن الزوم حتى ملكة الجمال تبيه لأن الحريم أكثر من الرياييل :p
ومن عذر كل وحدة تقول يالله زين حصلنا ريال ... لوووول

ظل راجل ولا ظل حيطة ولمن تتزوج تقول لا والله ظل حيطة ولا ظل راجل لووول

alsaronah يقول...

دلة

صح كلامج بس هالي ذكرتيهم مجالهم بالاقتصاد أتوقع لمن يخوضون مجلس الأمة تطلع بلاوي الريايييل حزتها ..

حتى السعودية سيدات الاعمار انشهروا وبدعوا واحنا هني نقول فلان وفلان مانقول فلانة ... شفيها اذا اعترفوا ان هالحريم أحسن منهم ؟؟
راح تنقص من رجولتهم ؟؟
يبطون جبدي والله هالنوعية ...
وكفو والله أحب الحريم الطموحات .. يزيدون من قوة طموحي والله :)

alsaronah يقول...

3bady

من صجك؟؟ والله ساعات أشوف قصص بنات يعني اهلها كانوا وايد ضاغطين عليها ولجأت انها تكون علاقة .. ولمن يدرون تنذبح أو يزوجونها غصب؟

يعني الشيطان شاطر ولعب عليها الكلمة الطيبة تشفي والله :(

بس للأسف ومع ذلك قام تزيد نسبة المغازل وخاصة المتزوجين .. تلقاه عنده 4 حريم وعنده رفيجة لوووول والله العظيم ان في جذي وقالوا لي عنه بالاسم :p عفيا عليه قلب ما يتعب ...

alsaronah يقول...

أتيت متاخرة

اي والله صاجة بس هم في حريم خبلات ماعندها كرامة ولا شخصية لمن يستغلها الريال ويقول لها فتحي لي سيارة باسمي وتفتح له سيارة وبطاقة البنك بيده ..
آخر عمري اشتغل والريال ياخذ ثمن تعبي .. الله يخلي اهلي والله الي معززيني ..

شيبون الرياييل؟؟ خل يتزوج اجنبية بس يفكنا ... وخلوا بنات الديرة ياخذون من برا ... ترا الكويتي مو ملاك .. استغفر الله

كاريكاتير يقول...

مرحبا

بداية الموضوع هذا دائما ما يتحدث عنه النساء وليس الرجال ودائما ما يدافع عن النساء هم الرجال وليس النساء واقع غريب

حقوق المرأة السياسية من طالب بها هو الرجل قبل المرأة

اتصور ان المرأة في وقتنا الحالي تعيش حالة تناقض تبي تكون امرأة وتبي تكون رجل

اذا تزوجت رجل تقليدي قالت مو رومانسي واذا تزوجت رجل عصري قالت طمعان فيني

اما الرجل فيبحث عن امرأة من ذلك الزمان البعيد ويبيها على الموضه ولما يتزوج يكتشف بأنها مو نفس ما يبي

لا الحريم عارفين شنو يبون ولا الرياييل عارفين شنو يبون

اعتقد المرأة والرجل هما مكملان لبعضهام البعض يعني مايصير هذا يعيش من غير هذه

التكامل هو من يجعل المرأة امرأة والرجل يحس بانه رجل

سامحوني بس هذا اللي طلع معاي كرجل!!

الـبـيـرق يقول...

أحـنـا مـظلـومـيـن :p

الـكـل يـقـول مـن بـعـد الـسـتـيـنـات الـبـنـات أخـتـربـوا :D

ودي أشـوف حـرمـة تـشـتـغـل بـالـتـجـارة .. لـكـن مـاكـو .. يـا تـرى لـيـش ؟! :P

alsaronah يقول...

ولو اخوي بدر
صح كلامك بصراحة انا للحين ماحددت الصفات الي اتمناها بزوج المستقبل قلت اهم شي الطموح:)

شكرا لك بدر :)

ZooZ "3grbgr" يقول...

الله يهداه الملا اللي بالتلفزيون ضحكتيني اهم شي لا تطالعيني سمعيني بس الغلو في الدين أشوفه أمر منفر

وبعدين صدقيني لو خليت خربت
انا اشوف اخواني واهل بيتي مو جذي
وربينا على الاحترام المتبادل

من ناحية ثانية اشوف ان المرأة لها وايد مقومات تخليها اقوى من الرجل مثلا قدرة تحملها ومقدرتها على اعتمادها على نفسها بالكامل بدون حاجتها للرجل

ملاحظة:
من بعد ما شفت Sean Paul
زين ركزت على الموضوع لووووول

حـمـزة يقول...

بعض الردود جد تبين انهم على نقص..

وتهاجم لمجرد الهجوم، لي عرفتوا السالفة عدل، بعدين انتقدوا الفروقات بين المرأة والرجل..


العالم وصل ما وصل من العلم والتكنولوجيا والعالم العربي لحد الحين في الفروقات بين المرأة والعرب..


الله يعين..


حمزة
:)

mo3ath يقول...

اسمحيلي انا مابي ادش بنقاش عقيم على وضع صاير من ايام بوجهل وربعه لما كانوا يلكونه لوووووول :q

تبين ألبوم sean paul اليديد ؟ :q

يتني فتره كنت حاط اسمه على السياره يعني متشقق عليه لوووووول ، لاتقولين شايفتني من قبل ؟ :q

حياتي هدف مو عبث يقول...

لان عندهم عقدة النقص باختصار ;)

alsaronah يقول...

البيـــرق..

حرام عليك والله ما اختربوا

وبعدين بالتجارة الله يخلي تجارة الكويت كل ماداها وتطيح الله يعين :(

alsaronah يقول...

ZooZ "3grbgr" ....

اي والله صاجة
اهو اهم شي ان مايكون في تشدد زايد بالدين ...

يعني صج ابوي ملتزم وملتحي بس الحمدلله ما يتشدد حيييل علينا من ناحية الفكر وغيره ...

الحمدلله على كل حال

alsaronah يقول...

حـمـزة ..


اي والله صاج وجامعات العالم ارتقت وجامعتنا للحين على مشكلة منع الاختلاط :)

alsaronah يقول...

mo3ath

alsaronah يقول...

mo3ath ...

لوووول دز لي ايميل احلا اغانيه اليديدة

لا ماعرفتك استيعابي بطيء ماركز على السيارات :)

alsaronah يقول...

حياتي هدف مو عبث ....

اي والله نقص :p

Q8Sky يقول...

سمعي اختي عيل هذي السالفه ..

على نفس نهج قصة الشيخ اللي بالتلفزيون ..

دقت وحدة على واحد من البرامج الدينية وكان سؤالها يا شيخ هل يجوز اني اشوفك حاليا وانته بالتلفزيون ، فكان الرده منه ان هذا لأجل العلم وليس لأجل المشاهده المحرمه وهذا يجوز ، الغريب بالموضوع ان البرنامج كان على قناة MBC يعني صدقيني انتي عندج القناة لاتقولين لا ما اشوفها !!

وفي اقتراح حق هذي النوعيات في واير يوصل الصوت والثاني يوصل الصورة شيلو مال الصوره وفكونا !!

..

اما على الموضوع نفسه عندنا مشكلة ان الريال شايل عيبه والمره بكبرها عيب !

alsaronah يقول...

Q8Sky

لا تقول المرأة بكبرها عيب لا تخليني اقلب بوية :p لوووول

لا اخوي والله صج صج صج منبطة جبدي من هالبرامج ساعات استغفر الله يحطون برنامج يضحكون العالم عليه .. ووايد ناس عقدوا الدين مع انه دين يسر اول ماكان في جذي وكانت نفس الناس طيبة .. ماكانت موجودة هالفتاوي الي تحلل كل حرام .. مابي اطلع برا الموضوع بس صج والله الحريم قام يختربون لازم الريايييل يتسنعون بلييييز :p

Kuwait يقول...

الرياييل ماعندهم سالفه ..
تفكيرهم سطحي بالنسبه لمثل هالمواضيع :)
أما على سالفه الشيخ الي تكلمتي عنه ذكرتيني بالمشايخ الي يدورون بالحرم يشوف الآسيويات كلهم ويوهم طالعه عادي واحنا عسى ما يلمنا يا طاير يتلصق غطي وجهج وحجابج إثم وحرام ليش والله فيه استراس مره ومرتين والثالثه جان أستعدل له وأزفه دش بخشمي <-- هذا واحد من الرياييل الشرقيين :)

مُحَسّدْ يقول...

الرجال ليسوا سواسية وكذا النساء

alsaronah يقول...

Kuwait

على طاري هذول مرة واحد سوا جذي جان اقول له ياخي غض البصر .. الناس ياية تتعبد وين بتقعد تخوزز مثلك .. بس يقولون قلعوهم هالاشكال .. استغفر الله عقب ما يطالعها يقول لها غطي ويهج .. مشكلة والله

alsaronah يقول...

مُحَسّدْ

كلامك مانقدر نعارضه لأنه حقيقة :)

Sn3a يقول...

اللي تدش كليه التربيه يعطونها جدولها ويا وثيقه الزواج


لووول كلام البنات مو كلامي بروحي

شوفي بيني وبينج حلو ان البنت تشارك بالمعقول
بس متى يطلع الريال ردي
لما ياخذ كرتها وويغصبها تصرف عليه وعلى البيت

بس والله اذا البنت ماتبي تنطر بيت حكومه
وماتبي المنطقه
تقدر تشاربك بقرض ويا ريلها
الحياه مشاركه
هالشي بيكبرها بعين ريلها ان كان ريال بحأ وحئيئي


يعنني ترا بناتنا يحبون اللبس والكشخه
ومو كل ريال يقدر يشتريلها جنطه مارك جيكبس ولا جاكيت شنل ولا جواتي كرستيان لابوتان

اهيا تشتري هالاشيا من معاشها

الزين يقول...

سمعتي عن الفتوى اللي تقول ان المرأة كل شي فيها حرام ومايجوز الناس يشوفونه حتى عيونها وان عشان حرام مسكينه لا تتكرفس لا بأس بأن تظهر عين واحده عن طريق فتحة صغيييرة بالبوشية تسمح لها انها تشوف جدامها

يخرب بيتهم
من وين اييبون هالفتاوي بس

alsaronah يقول...

Sn3a


اووووف والله اختي اول ما تخرجت من تربية علطول تزوجت لوووول يبون مدرسات الماس مو مدرسة الحمدلله والشكر..
لا وايييج الريال يقول لمرته ماعندي سيارة فتحي لي سيارة واهي تفتح له سيارة وباسمه وبعدين يعاملونها مثل معاملة الحيوانات اكرمج الله وبالأخير يتزوج عليها ويقول لها احمدي ربج قعدتج معاي علشان اليهال بس ...

يخرب بيتهم من تفكير والله المفروض المرة ماتصير ضعيفة حتى لو كان الريال طيب مصيره بيصير ذيب لووول

alsaronah يقول...

الزين


الحمدلله والشكر يعني خلاص اهو المشرع والي معروف من زمان اول البوشية الي تغطي الويه كله ... يطلعون فتاوي بكيف امهم ؟؟ لوووول بتصير كابتن هوك استغفر الله .. مصخروا الحريم والله ... لاحول لوووول

Salah يقول...

"واحنا بالبيت باطين جبودهم ؟"

:)

nice one!

alsaronah يقول...

صلاح

لووووول اي والله شنسوي :)

Alikingkw يقول...

إذا كان الرجل رأس العائلة فالمرأة هي الرقبة التي توجه ذلك الرأس p:

إذا كان النقد الموجه لامرأة سياسة على أساس أنها امرأة ..فهي قوية جدا وخصومها لا يجدون ما ينتقدونه فيعودون إلى التفكير الحجري. (مع ان البشرية حسب ما سمعت في علم الأنثروبولوجي مرت في مرحلة من المراحل بهيمنة المرأة) ...قد لا تكون المعلومة صحيحة لأن سامعها من صديق مع احترامي لمصداقيته :)

فيما يخص الوظيفة ... ترا الحياة صعبة والتعاون لا بد منه :) زوجتي ما قصرت وساعدتني في أثاث البيت وايد إذا ما كانت اهي الي امأثثا الشقة على الغالب :)

بس الحبيب الي يحط شروط في الزواج خل يكمها بعد ويقول أبيها ستة سلندر وباب واحد وفتحة وجلد وديكور خشب P:

أنا لا أؤمن في شروط الزواج والحمدالله عقد زواجنا أبيض ما فيه الا المعلومات المدنية :)

لوووووووووووووول شايل عيبه حلوة هاذي الشباب امخلينا منهج حياتهم لوووول والله خوش شي انسوي الي نبيه والعذر موجود شايلين عيبنا لووووووووول :)

الله يعينكم يا نساء مجتمعنا أنا شخصيا على الرغم من اني رجل وشايل عيبي الا أني أقف لكم وأشجعكم بكل ما أوتيت من قوة