2008-10-05

كل عام وأنا مخرفة


أمس رحت فلم Gourney to the center of the earth علبون طالبة جيولوجية ، وحبيت أني أفيد اليهال عندنا من الناحية الجيولوجية فخذيتهم معاي ... وبصراحة حسيت بفخر لأنهم يكبرون من شأن الجيولوجي عكسنا هني بالكويت ... شنو جيولوجي؟؟ جم معاشه ؟ طاف لوول المهم وقاعدة اشوف جامعتهم وقلت بصوت عالي ياحسرتي على جامعة الكويت (( فقر)) لووول المهم الفلم قصته حلوة ولو ان في معلومات غير صحيحة بس اليهال عندي حبوا الجيولوجيا وعلى بالهم فعلا لب الارض فيه هالسوالف الغريبة لووول
والله من وناستي بغيت أصرخ وأقول ((I'm a geologist)) لوووول خلص الفلم وكانت هذي آخر رحلة لي في عطلة الصيف.




ان شاء الله نشوفكم جيولوجيين المستقبل ما رب ...وهذا استاذنا العزيز :)

رحلة طلبة الثانوي لجامعة الكويت وزيارتهم لقسم الجيولوجي :)


بدأ العام الدراسي اليديد وبصراحة أكثر شي حبيته بالكلية شغل الجيولوجيا لووول والله صكينا على القوائم لوووول منور الجيو والله وشحلات طلبة الجيولوجيا والدكاترة الي يفتحون النفس لووول مسوية لهم دعاية الله يهداج ياسارة .

المهم أن كانوا مسويين مثل حفلة حلوة يستقبلون فيها طلبة القسم ،والحمدلله قسم الجيو من أكثر اقسام كلية العلوم الي نلقى فيه تجاوب بين الطلبة والدكاترة ونفسهم نظيفة والله على كثر الحجي الي يطلع عنهم على سالفة كلاساتهم مختلط ويدرسون مع بعض ... بس ماقول لهالناس الا جملة وحدة ..

(( يكفي نيتهم الصافية ويكفي طيبتهم وعلشان جذي ربي موفقهم .. )) والله أحس الدكتور والدكتور جنهم أهلي الله يخلينا لهم لووول

راح احط صور القسم وتشوفون شلون القسم منور :p ... وبصراحة أول محاضرة كانت طبقات وترسيب مثل دكتوري الي عطاني صخور يحب يلعب بصوته واناحدي فاصلة اهو يغير صوته وانا اقلده لووول جن اوبرا الله يهدانا :)

المحاضرة الي بعدها هم حليوة وبصراحة دشت قلبي لأني مجنونة بيئة وتهمني بيئة الكويت صراحة فان شاء الله راح ابدع ..

الله يخلي الجيولوجيا ويطول عمرها يارب يارب .... الجيولوجيا بكل مكان وين ما تروحون تلحقكم لوول :p


بعد 5 أيام راح أكمل 21 سنة واحس اني بعدي ياهل من ناحية المخ طبعا مو الجسم ، المهم كل عام وأنا بألف خير يارب لووول

على معاش ابوي التقاعدي رقمي ذهبي 10 -10 لوووول

..................................................................................................................

بذكر بعض التخاريف الي كنت أؤممن بها سابقا :

* لما كنت صغيرة على بالي الدكتور مايمرض كلش .

* لما كنت صغيرة على بالي الأبلة مثل الكتاب كل شي تعرفه وانخلقت مدرسة علطول لووول .

*لما كنت صغيرة على بالي الشرطي ملاك كلش ما يغلط .

* لما كنت صغيرة على بالي المغني مو انسان ومايعيش بيننا ولمن اشوفه أشهق من الخرعة لووول .

*لما كنت صغيرة على بالي الصحافة محترمة محد يكتب فيها الا الانسان المثالي >>>> هين روحي للنقطة الي بعدها

*لما كنت صغيرة على بالي ابوي كان اطول من امي ولمن كبروا صار العكس لووول لأن بصورة عرسهم كانت قاعدة واهو واقف علشان لا يبين فرق الطول ... فحطيت ببالي الكبر خلا امي تصير اطول من ابوي لوول .

*لما كنت صغيرة كنت أألف قصص وانا قاعدة مو نايمة واصدق القصة واصدق نفسي واحلف استغفر الله بعد >>>>جليلة :p

*لما كنت صغيرة كنت اشوف بعض الجن الي عندنا بالبيت وكانت امي تقول لي هذول مسلمين ما يأذون فلمن كنت ازعل مع اهلي كنت اصارخ اقول طلعوا بليييز سولفوا معاي أهلي مليقيين لوووول مو صاحية والله .

*لما كنت صغيرة على بالي الرسوم المتحركة ناس صجية بس عايشة بكوكب ثاني وكنت حاطة ببالي اذا كبرت بروح حق قريندايزر واتزوج دايسكي >>>>> على كيفج اهو ؟

*لما كنت صغيرة كنت دلالة ونجرية على خبال اختي الي اكبر مني تخطط وانا اروح لأهلي اصلخ واتناجر وأحصل طقتي الحلوة واختي تضحك علي ..

*لما كنت صغيرة وللحين حاطة صورة صرصور كبير براسي وسمعت ان بأحد المتاحف في صرصور قديم كبير فودي اشوف الصرصور شلون كان ؟

*لما كنت صغيرة على بالي القطاوة يسولفون بس بعيد عن الناس فكنت اوقف ورا الطوفة اراقب قطوتي وانطرها تتحجى والله القطوة تنام وتقوم وانا للحين ناطرة لووول ...

ماله داعي اكمل اكثر ... بس الي حبيت اوصله ان هالتخاريف على كثر ما اهي عبيطة الا انها سبب لنجاحي الحين الحمدلله ، كانوا يسموني الخيالية ، البجاية ، الملسونة ، البطة ، أم خدود ، الهبلة ، أم كرشة ، صرصور ... الخ ... مسميات عبيطة كثيرة أصبحت بسبب كل هالتخاربف انسانة ناجحة تطمح للأعلى بعد أن شبعت من كل الحركات الخبلة والعبيطة ولتبدأ مرحلة جدية جديدة من حياتها ..

عقبال 100 سنة تخاريف يا سارة :)

36 comments:

مُحَسّدْ يقول...

كل عام وانتي بخير

وبطلي تخاريف :)

KuWaIt MaStEr يقول...

تخارفيج كلها اشاعات و مو مضبوطه
اهم شي الابله الي حافظه الكتاب حفظ حرف حرف

وكل عام اونتي بخير

و تصدقين انا احب البيئة البحرية اكثر ^_^ لانه فيها اشياء غريبه اكثر من البريه ويارب ثنويتنا على الاقل يودونا البنك الي صوبنا ماقلنا الجامعه بس رحله وحده بحياتي

يعطيج العافيه

أتيت متاخرة يقول...

كل عام وتخاريفج أحلى تخاريف

العمر كله ان شاء الله



شوفي مو بس انتي عندج تخاريف
معظم الناس يحملونها بصمت
من تخاريفي وأنا صغيرة أني كنت أظن ماكو احد بالدنيا الا بيتنا وامي واخواني
يعني الدنيا ما فيها حد >>>> والمشكلة كنت اسال منين يطلعون الي بالمدرسة وياي ووين يروحون بعد المدرسة وعندهم بيت؟؟؟؟؟

Kuwait يقول...

كل عام وانتي بخير وبسج مدح بقسمكم يقولون مداح نفسه ;a

ZooZ "3grbgr" يقول...

نقطتين من تخاريفج



لما كنت صغيرة على بالي الشرطي ملاك كلش ما يغلط

أتوقع هذي بروحها صدمة العمر



لما كنت صغيرة على بالي الرسوم المتحركة ناس صجية بس عايشة بكوكب ثاني وكنت حاطة ببالي اذا كبرت بروح حق قريندايزر واتزوج دايسكي >>>>> على كيفج اهو ؟

نعم نعم نعم؟؟؟؟؟؟؟؟
اشتبييييييييييييين
انا ودايسكي صارلنا احم احم سنه نحب بعض
واهو خاطبني من اهلي بس شارطه عليه يقززني بقرندايزر والمشكلة ليلحين بالوكالة ما تصلح .. تدرين صج كان دايسكي حب حياتي مادري شلون كبرت ولي يومج بس اشوف احد حاط صورة بروفايله دايسكي قلبي يطق حيل هههههههههههههههه

Fashionista يقول...

شنو سالفة الجن اللي عندكم بالبيت؟

3bady يقول...

الجيولوجيا شي حلو اذكر كنت شاطر فيها ايام الثانوي

صراحة انا محتر منج اشلون صورتيهم جذي بدون محد يصيدج انج قاعدة اتصورين :P

و كل عام و انتييي بالف خير و عقبال 21000 الف سنة

لووووووول اهم شي التخاريف لو بقعد اعلق على وحده وحده بصير الكومنت موضوع :P

مشاءالله خيال واسع اتالفين قصص :P

و نايس بوست :))

غير معرف يقول...

the only course I took in Geology was Geomorphology with Adeeba, it sucked big time!

الـبـيـرق يقول...

كـل عـام و أنـتـي بـخـيـر :)

عـاد يـقـولـون مـدونـتـج أهـي الـمـدونـة الـوحـيـدة ألـي مـا راح يـراقـبـونـهـاوزارة الـمـواصـلات لأنـج مـخـرفـة :d

:p

THE BOSS يقول...

يا الله كل تخريف و انتي بخير و خرف يا مخرف
:)
كل عام و انتي بخير مقدما و عقبال المليون سنه تخاريف
وعطني ولعه

غير معرف يقول...

اسم الله عليج من التخريف كل عام وانتي طموحة وحيوية وكل عام وانتي انتي انشالله =)

انا بعد كنت اظن ان الابلات انوجدوا بهالدنيا ابلات ههههههههههههههههههههههههههه وما اتخيل عندهم ربع وعوايل وحياة مثلنا
فلما تقول لي امي ان ابلتي الفلانية تصير لنا تتلخبط عندي الامور ههههههههههههه

عثماني يقول...

خوش بوست اخيتي

ممتع و خفيف

والله لا يحرمنا من هالتخاريف الحلوة

:)

ذكرتيني بالمواد اللي كنت اخذها من قسم الجيولوجيا عندكم قبل اكثر من عقد من الزمان

د. فريال بو ربيع ليلحين موجودة ؟؟

Barrak يقول...

عقبال 10050 سنه


وحلوه الدكتور مايمرض

هههه

Salah يقول...

Happy Birthday

:)

alsaronah يقول...

محسّد

لا ما يصير بدون تخاريف ماكو طموحة :P

alsaronah يقول...

KuWaIt MaStEr

أفا عليك اصلا الجيولوجيا حتى بالبحر موجودة عيل الرمل والمحار والقواقع شنو لووول؟


حلو اذا قعدت اشرح هالسوالف حق اليهال ابيهم يتعلمون ويتثقفون بدل البي اس بي والربادة :)

alsaronah يقول...

أتيت متاخرة...

لووووول تخريفتج غريبة والله

ذكرتيني بجارتنا لمن قالت حق امي قبل ما تطلع من باب بيتنا .. امي تقول لها ماقعدتي والله ، جان تقول لها والله بزور امي
جان تنصدم سارة لووول على بالي الكبار ماعندهم امهات بس احنا لووول
قلت حق امي يما يما شلون ان عبدالله عندها أم ؟ لووول

alsaronah يقول...

Kuwait

رفسوني من هني لباجر .. أحب قسمي وايد والله عاد الجيولوجيا اهي المادة الوحيدة العلمية الي ماكنت احبها بالثانوي بس الحمدلله اني سمعت كلام اهلي الحمدلله :)

alsaronah يقول...

ZooZ "3grbgr"


لوووووول

ايا الملعون طلع عندك معجبات غيري يا دايسكي .. انا كنت اتعذب من نظرته الحادة وبنطلونه العبيط لووووول ...
امبي الحمدلله طلعتوا مخرفين وياي .. وعاشوا المخرفين عاشوا :P

كنت اتمنى اشوف واحد يشابهه لووول

alsaronah يقول...

Fashionista

لوووول خليتي كل شي ووقفتي على هالنقطة .. والله كنت اشوفهم مع عيال اخوي ، خواتي الي اكبر مني ما صدقوني ولمن وصفت لهم قعدوا يبجون لوووول ..
اقول لج شغلة ؟؟
مرة قعدت من النوم ولا اشوف راس بفراش اختي على بالي اختي لووول مع ان ماتشبهها لووول وحاطة كحل بعد ... رديت نمت وقعدت للحين موجودة وعينها بعيني يمكن 4 مرات والخامسة غمشت عيني وقريت آيات قرآنية ولمن بطلت عيوني اختفت ... قلت حق أمي قالت لي : جبي ولا تعلمين احد من خواتج يخافون لوووول
مالت انا الصغيرة ماخاف اهم يبجون لوول
والله ومر واحد جدامنا واحنا نطالع تلفزيون بس على هيئة انسان يطلعون والله

alsaronah يقول...

3bady


لوووول الصورة صورتها لمن كانوا زايرين الكلية تعرفهم ؟؟
شافوني وانا اصور ماعليك :)
شكرا عبودي

alsaronah يقول...

غير معرف

لووووول انت اي دفعة ؟؟
أديبة حبيبة والله بتعاملها مع الكل .. شنو ماخذ المادة اختياري؟

alsaronah يقول...

البيرق


اي اي لا حرج علي لوووول

خل يدشون يقرون على الاقل :)

alsaronah يقول...

THE BOSS....


وانت بخير وبصحة وسلامة ... وعندك ولعة للي رد علي ... بس يوم ميلادي وبعدين نرد نحافظ على البيئة لووول

alsaronah يقول...

غير معروف

لووووول ذكرتني لمن اشوف ابلاتي بالسوق أقول لأمي بصراخ أبلة فلانة أبلة فلانة حاطتهم نجوم مثل الفنانين ماكو مثلهم لوووول

alsaronah يقول...

عثماني

اي موجودة لوووول ....

انت الحين وين تشتغل ؟؟ وشنو استفدت ؟؟ لازم تعطينا من خبرتك شوي :P
يعطيك العافية

alsaronah يقول...

Barrak

تعرف بعد كنت ياهل وخبلة ماعرف شي

alsaronah يقول...

صلاح

وانت بخير ومشكور وايد :)

حـمد يقول...

كل عام وانتي بخير

alsaronah يقول...

وإنت بخير وبصحة وسلامة :)

Sn3a يقول...

انا عقبج بيومين

لول اهم شي بتزوجين دايسكي
ترا انا كنت بتزوج واحد من الببايات وكنت احاتي شلون اعيش وياه واهد اهلي
بس ماني قايله منو لوول


كل عام وانتي بخير مقدما
لي سمحلي الوقت امر اتطمش

mo3ath يقول...

كل عام وانتي بخير والعمر كله ان شالله :)

إذا تبين شي بقسم الجيولوجيا ترى معارفي وايد هناك (دكاتره طبعا مااتعامل) لوووول :)

تخاريفج فلم من كثر ماعجبوني مادري اعلق على شنو واخلي شنو

بس سالفه الينانوه الي بالبيت هذي موضوع ثاني :)

alsaronah يقول...

Sn3a

اعترفي منو ؟؟ :)

وكل عام وانتي بخير مقدما جم يصير عمرج ؟

alsaronah يقول...

mo3ath

وانت بخير وبصحة وسلامة :)

مشكور مشكور

تبي احط موضوع الينانوة بموضوع خاص ;) لووول هالله هالله بالواسطات لوووول ضبطني عاد

Alikingkw يقول...

كل عام وانتي بخير مؤخرا :)
توني أقرأ هالبوست واستمتعت في قرائته
التخاريف ممتعة
احرصي على تخاريفج من الخسارة ان ترتبط التخاريف بالطفولة
حافظي على تخاريفج يا اخت سارة :)

الجيولوجديا مادة حلوة بس شفطت فيها في الثنوية والمدرس ما كان حبيب فتعقدت منها وتعقدت من العلمي وحولت تجاري وانحشت بعيد لوول

أحب الصخر والتراب والماي والزرع اليابس أحس كل شي طبيعي رائع ويصلح يكون موضوع للتأمل.

والبيئة الي تكلمتي عنها (أقصد البيئة الدراسية الي في قسم الجيولوجيا ) أحس انها البيئة الطبيعية والي لازم تكون في كل أقصام الجامعة.

شفت الفلم مع زوجتي المناظر كانت حلوة بس التمثيل ما عجبني والقصة مو لي هناك ... على العموم في الفي آي بي ومع نفيش وناتشوز و دايت بيبسي يصير خوش فلم :)

alsaronah يقول...

اي والله النفيش والبيبسي يحلي الفلم :)