2008-10-14

صحافة آخر زمن ..

اليوم رحت حق مقر الجريدة الفلانية لاجراء مقابلة لي علشان اشتغل معاهم بعد ماتركت الجريدة الي كنت اعمل فيها سابقا ..
والسبب في ذلك بسيط ... مروا علي صحفيين كبار لهم اسمهم ومكانتهم وتعلمت منهم الكثير ، بس لمن اييك واحد ويكبر وايد من نفسه وانا اسوي مقالة اطير فلان السما ... اووووف أقول ببالي والله مع اني ماسمعت عن هالصحفي بس من كلامه حسيت انه صاروخ لوووول
المهم ، أن الأخ العزيز قال لي انا راح ادربج على المقابلات والتحقيقات والخ ... مع اني مو بحاجة لهالاشياء لأني مارست الصحافة من كان عمري 15 سنة ولله الحمد ما احتاج لأحد يدربني .
المهم قلت اوكي ، الأخ العزيز كل ما كتبت مقالة قال لي بعدل فيها حجي واضيف اسمي وياج ... ولمن تنزل المقالة واشوف راز اسمه معاي .. واقرا الكلام مافيه تعديلات ولا شي الكلام نفسه نفسه ماتغير ... بعرف ليش هالانانية ؟؟؟
بيسوي تحقيقات واخلص شغله كامل وارتب له الحجي وبالاخير يحطه باسمه ؟؟؟
شنو أنا اشتغل عنده ؟؟؟ المهم بيوم دق علي قال لي سارة عندي الموضوع الفلاني قلت عن شنو؟؟ قال كيت وكيت وكيت وابيج تخلصينهم لي ضروري ضروري ...
قلت له فلان قبل كل هذا وين مكافآتي ؟؟
رئيس التحرير وصاه انه يوصل المكافآت الي آخذها ... هذا حقي وتعبي قال اكيد اول ما اشوفج راح اعطيج اياه ... ولي يومكم مادق ولا شفت رقعة ويهه بالجامعة ...
أنا بعرف ليش هالأنانية ببعض الصحفييين ؟؟
سألني واحد الله يذكره بالخير ، قال لي انتي عرفتي شلون تبرزين نفسج بطريقة ذكية بس ماتقدرين تستغفلين الكل لأن الناس تطالع ظاهرج ما تطالع باطنج ...
قلت له شنو قصدك ؟ ؟ جان يقول لي اشكرة كل مقالاتج تلقين ماخذتها من واحد يعرف يكتب وحاطته باسمج ...
قلت له مو سارة الي تبوق انجازات الناس ولا تنام مرتاحة الا اذا اعتمدت على نفسها وكل مقالاتي أنا اكتبها ، وعمري ماعتمدت على غيري وأهم شي راحتي ورضا نفسي حتى لو مقالتي او رسمتي ماعجبت الناس ...
عالم الصحافة مليييء بالناس الخبيثين الي يحاولون ينسبون أغلب الاعمال لنفسهم ...
لذا أوجه كلمتي للجميع بأن جميع مقالاتي ورسوماتي هي من جهدي وتعبي ..
ال50 دينار الي آخذها على التحقيقات أحبها أكثر من ال100 دينار مالت الاعانة ... وأصرفها وأنا مستانسة ... لأنها من تعبي ..
علشان جذي ماحب ايي واحد مقالاته ضعيفة ورديئة ويسوي لي من نفسه سوبر مان ويرز اسمه معاي على شي ما سواه ...
فرصتي جيدة في هذه الجريدة الجديدة ... ومجلة جديدة أعمل بها حاليا أتمنى من الله ان يعينني على تحمل عبء الصحافة ولكن بالأخير تكون اضافة جيدة لسيرتي الذاتية ..
ادعوا لي التوفيق:)

29 comments:

KuWaIt MaStEr يقول...

مبرووك عليج التعين او الوظيفه
لاتعليق
هل ايام في ناس بالصحافه في ناس تشتغل عندهم هدف بالحياة او طمووح وفي ناس تحب تخرب بيووت

الـبـيـرق يقول...

مـبـروك و عـقـبـال مـا نـشـوفـج رئـيـسـة تـحـريـر أحـد الـجـرايـد و تـصـكـيـن عـلـى بـيـبـي الـمـرزوق :d

mo3ath يقول...

بكل مكان جذي ، ناس تصعد على حساب ناس ثانية

زين انج شفتي مكان ثاني وعلى البركه التعيين ومنها للاعلى ان شالله

لاصرتي رئيسة تحرير لاتنسين اخوج :q

THE BOSS يقول...

حبل الكذب و الخداع قصير و الله يوفقج ان شاء الله وتصيرين مشهوره وتوج صغيره و بداية الطريج
بس اذا صرتي مشهوره مو تكبرين علينا
و لكل مجتهد نصيب


وعطني ولعه

JiBLa CiTY يقول...

وين العشا
:)

صبا يقول...

طموووحه صج طموووحه

بعد قلبي والله ...إلا طلعتي صحفيه ؛))

والله يعينج علي العمل بالصحافه ممتع متعب:))))

موبس بالصحافه الاستغلال في كل مكان والله يعينج

ومنها للاعلي ...وانشالله تعبج ما يروح
علي الفاضي

تحياتي وتمنياتي لج بالتوفيق عزيزتي
:*****

Eng_Q8 يقول...

موفقه

بس نصيحه لا تسكين عن حقج وخاصه للمتسلقين

بـنـت بـطنـهـا يقول...

welcome to the club dear :P

بالتوفيج يا ربي بس لا تخلين احد ياخذ تعبج اذا سكتي مرة راح يتمادون الصحافة ما يبيلها احد سهل طيعيني :)

بالتوفيج ان شاء الله وعقبال ما نشوفج فتحتي مجلتج الخاصة :)

3bady يقول...

طوليي بالج هذي عقبة و الحمدالله طافت اعتبريه درس و الانسان يتعلم من هالدنيا و يلقه فيها منتقدين و مؤيديين :)

و الي قالج انتي اتبوقين ما عليج منه هذا انسان حقود و غيور طاااف عطي :)

Ducati يقول...

مم كلامج حلو

انا سمعت وايد من هالسوالف في مجال الصحافه خصوصا
اعلام يبي الي يثبت نفسه

ZooZ "3grbgr" يقول...

موفقة انشاالله وتستاهلين كل خير
واسمج راح يكون من الأسماء المعروفة انشاالله إن نووو تايم بس رسميلج خط واضح وحاولي تلتزمين فيه والله بيكون وياج :)

Sn3a يقول...

لاتكدرين
ولا تخلين طموحج ينزل شعره
هذيل ناس وصوليين
مايقدرون يكتبون الكلمه بروحهم
ولين تعب احد
ياخذون هالتعب كله ينسبونه لنفسهم بكل وقاحه


زين سويتي غيرتي مكانج
ولاتخلين احد يحط اسمه على حرف كتبتيه


موفقه

alsaronah يقول...

KuWaIt MaStEr

الله يبارك فيك :D

انا بس الي بعرفه شلون يحسون بطعم النجاح دامه مو من تعبهم؟؟

alsaronah يقول...

البيرق

ماتوقع هالشي طموحي أكبر :D

alsaronah يقول...

mo3ath

افا عليك حتى الحين لبغيت شي حق الفزعات جاهزة والله بس أنا افزع للكل مو بس لقبيلتي لوول ..

المشكلة أخوي معاذ ان الصحفي علبون اهو كبير فحاط نفسه افهم مني ويقول لي اقري مقالاتي .. والله مقالاتي جدا عادية وماشوف فيها القوة الي اهو يتكلم عنها..

alsaronah يقول...

THE BOSS

الله يسلمك أخوي ... بصراحة بكل شي أصادف فيه عقبات أكون دارية ان بعدها راح يكون نجاح كبير فأنا متأملة خير ان شاء الله ..

alsaronah يقول...

JiBLa CiTY


قريب ان شاء الله ... تبي خروف ولا حاشي؟؟

alsaronah يقول...

صبا

صح كلامج يالغالية بكل مكان .. حتى بالشعر منو الحين يكتب شعر بضمير ؟؟ قلة قليلون وينعدون على الاصابع ولا البقية بس يشترون :D

الحمدلله واشكر ربي واحمده انه عطاني موهبة وماخلاني الجأ للغير الحمدلله

alsaronah يقول...

Eng_Q8


اي والله انا ما سكت وطلعت كل الي بقلبي لازم اختمها بهواش :p

alsaronah يقول...

Eng_Q8


اي والله انا ما سكت وطلعت كل الي بقلبي لازم اختمها بهواش :p

alsaronah يقول...

3bady

حاليا والله قاعدة احاول اني مااندفع بالصحافة مرة وحدة لأن عندي دراسة عندي رسم عندي هدف أول في حياتي لازم انتبه له اولا قبل الصحافة :)

alsaronah يقول...

Ducati

جربت الصحافة برا الكويت وكانت من اروع تجاربي صراحة .. وودي اكمل صحافة برا لأن حسيت لي مكانة هناك .. وأتمنى أن تلقا الصحافة مكانها بالكويت صراحة ... وبكل صراحة حاليا اشوف كل من هب ودب صار صحفي ، بس تحسفت ليش كنت اساعد الأخ وأخلص له شغله والله انه مو كفو

alsaronah يقول...

ZooZ "3grbgr"

أتمنى هالشي والله ... أتمنى من الحين أخطط علشان باجر يكون لي ملف حافل بالانجازات :p قائمة مو سارة .. لوول

alsaronah يقول...

Sn3a

ان شاء الله واشكرج على نصيحتج يالغالية :)

Salah يقول...

بالتوفيق

والله يعينج على الحساد!

alsaronah يقول...

مشكور اخوي صلاح :)

Alikingkw يقول...

مبروك وانشاء الله يرضيج مكان العمل وتقابلين ناس طيبين

والله يوفقج

alsaronah يقول...

الله يبارك فيك

بصراحة أتمنى هالشي والله أهم شي نفسية الناس الي معاي ولقيتهم خوش ناس والله ..

يعطيك العافية

Alikingkw يقول...

الله يعافيج