2008-10-21

نظفوا ديرتكم ولا تضحكون العالم علينا ..


اليوم أنا ورفيجتي حبينا نمر جمعية الخالدية نييب كشري نتغدى ونكمل دراستنا ... المهم وتوهم فاتحين الجمعية اليديدة ... وللأسف المتخلفيين للحين عايشين ... مامداهم والله ولا كاتبين على الجمعية خرابيط كالعادة وفلان وفلان .. كلهم بيصنعون التاريخ هالفشلة .. قلت لرفيجتي توها توها فاتحينها ... شدعوة لهالدرجة تخلف ووساخة بهالناس ؟؟؟ شدعوة يكتبون على الطوف ماقول الا الله يعينهم على نفسهم ...







الكــــــــــــــــويـــــــــــــــــــــــــت

ياكثر من تغنى بحبج ياكويت .. وياكثر من تناجر وقال أنا أحب الكويت أكثر ... تلقى بيده علبة بيبسي ركب السيارة وبطل الدريشة وحذف العلبة بالشارع ... شدعوة عليك ؟؟؟ وين الي يحب الكويت ؟؟ الي يحب يوسخ حبيبته ؟؟

صج شي يضيق الخلق تلقى الناس تاكل وتملا بطنها ويحذفون اكلهم أو يخلونه ..

ولا تيي وحدة رقيقة ماعبر وكاشخة الاخت وتخاف تلف ويهها لا يخترب شعرها ولا ماكياجها تاكل وتخلص وتقط اهي ورفيجاتها قراطيسها بالقاع ولا تخليه بالطاولة وتروح .. شدعوة عليج والي يبط الجبد رقيقة وتنعم صوتها روحي قحصي احسن لج .. والله صج كل شي الا لمن يقطون قراطيسهم ويروحون ...

اي خير تحبون الكويت ... خير تحبون الكويت ...

تحترمون قوانين الدول الي برا وماتقطون قرطاسة وحدة ...

وبالكويت الماي سايب ... والكهربا مولية ...

والوساخة تارسة الشارع

كل واحد يقول الشارع وسخ من غير شي وقفت على قرطاستي ...

تلقى الشارع حده مقرف ...


شـــــــواطــــــئ الكـــــــويـــــــت

أحلا مكان أحب أروح أقط همي كله هناك .. بس

شلون الواحد يقط همه بهالوساخة ؟ ؟

والله أطالع الي حولي من أرف وأقول شلون اتغزل فيك يابحر ؟؟؟

الشواطئ غثة حدها .. والواحد على الناس المتخلفة الي يشوفهم ماوده يقعد ويكتب خاطرة

ماوده يشم هوا سنع حلو

كافي الريحة اللهم كافــــــــي ...


شــــــــلون أعبــــــر عن حبي لـــــــج ياكــــــويت .؟؟؟

كويتنا الغالية ..

أدري أن وايد ناس يحبونج بس من زود الحب يقطون الزبالة بشوارعج وشواطئج ... ترا هذا زود الغلا والله ..

كويتنا الحبيبة تدرين ان في طلبة معاي بالجامعة يضحكون علي ...!!!! ليش ؟؟؟ لأني أشيل الزبالة من أرضج

لأني ما أرضى تكونين هالمنظر ....

تدرين إني أغار عليج ؟؟ !!!

تدرين إني أموت بترابج ياكويت ...

علشان جذي خليت الناس كلها تضحك وتستعبط ويقطون علي حجي ... بس والله مارضى بورقة صغيرة طايحة على أرضج ياكويت

لأنج غالية .... وغالية ... وغالية ...

ولأني متربية أحلا تربية على ايدج ... وتعلمت أخليج نظيفة مثل ما أحب أني أكون نظيفة ..

ومثل ما الناس تطالعني نظيفة ... أبيهم يطالعونج نظيفة ..

دعوة للمدونين

حافظوا على الكويت ... ولا تقطون شي من دريشة السيارة ...!!! وعلموا ابناءكم النظافة بكل شي

دعوة من كل قلبي وبدون مصلحة لي سوى مصلحة الكويت فوق كل شي

مع تحياتي

طموحة مملوحة

30 comments:

دلة يقول...

تبين الصج؟ احس اللي يعلق بس يقول الكلام لان لسانه فالتوه هههههههههههه ما من ضغينة ولا بطيخ يقولون الكلمة وينسونها بعد ثانيتين

لاتشيلين بخاطرج وخلج على منوالج
ماكو احلى من التمسك بالمبادئ بدونها بتحسين حياتج فاضية اسمالله عليج

Ducati يقول...

لووول هذا للحين بعصر التخلف الي يسوي جذي

وان قال احب الكويت اقوله طل بعينك بلا طل بعينك

:)

KuWaIt MaStEr يقول...

اوووهووو هل اجانب لي الحين عايشين متى يموتون يفكونا تالفين علينا الديره عدل محد شاغلنا غيرهم

انا قبل كنت اقول حق ابوي شحقه الشرطه ماياخذون الاجانب يسفرونهم

ترى الاجانب ياتهم فترى انقرضوا و ردوا الحين ياوو

اي والله كل واحد يي قال انا احب وطني بالتالي عليه خيانة امانه وله مادري شنو

ترى كلمة الاجانب شفره بلوقرزيه

alsaronah يقول...

دلـــــــة

مشكورة حبيبتي حلو الواحد يحط مبادئ جدامه يمشي عليها :)

alsaronah يقول...

Ducati

اتطفر من الفئة الي تشككنا بحبنا للكويت ... أقول لهالفئة سنعوا وزارتكم أحسن لكم لووول

alsaronah يقول...

KuWaIt MaStEr

موشرط والله في كويتييين ما يحافظون على نظافة الكويت مو شرط الأجانب ...

THE BOSS يقول...

يا سلام عليج
بس وين اللي يقرنون القول بالفعل
الحب يعني حب
خاصه حب الوطن

وعطني ولعه

alsaronah يقول...

THE BOSS


ترا الولفة تلوث الجو والجو يتلوث ويصير تلوث بيئي لوووول

مشكور على اضافتك

صبا يقول...

منظر غير حضاري

والله انا هالمنظر يقتلني اموووت من الحره ,,,لا والقهر لما الام ولا الابو يفتحون الدريشه بيدينهم ويسمحون للولد يقط الوصخ ...اوووووووووف

يابعد قلبي ياديرتي ودي احضنها واخشها بقلبي ..وعسي الله يحفظها من الشر يا رب

خوش بوست روعه من اجمل ما سطرتي يالغاليه

:*****

alsaronah يقول...

صبا

مشكورة يالغالية ... انا اذا احد قط شغلة من الدريشة يا اخليه يوقف السيارة انزل اشيله او ازعل عليه زعل مو طبيعي ... لأن صج مايرضون احد يقط شي في بيوتهم ويرضون على شوارع الكويت ومرافقها ؟؟ والله قهر

3bady يقول...

جربيي بحر شويخ احسه هادي

Sn3a يقول...

مادشيت الجمعيه الييديده
احس جني اخون بالقديمه اللي احتضنتي 4 سنين وشي

اما اللي يشخبطون ترا في منهم فنانين
بس فنهم مو على نظافه للاسف

KuWaIt MaStEr يقول...

اغلب الكويتين محترمين
بس الاجانب اي نعم الاجانب اهم ساس البلا
انتي تعرفين شنو الاجانب وله لأ ؟ ترى هذي شفره

alsaronah يقول...

3bady

اي ساعات اروح هناك مع رفيجاتي نلعب بالديارف لووول ...

اي بس بالشتا بالصيف تصكني شمس عجيبة لووول

alsaronah يقول...

KuWaIt MaStEr

فاهمة عليك والله بس هم ما نقول الكويتيين حدهم نظيفين والله وايد يقطون زبالة من دريشة السيارة واولهم اهلي لوول

بانوراما يقول...

الظاهر اهم يكتبون ع الطوف

تهنئة بالأفتتاح

هذا بدال الشعلة يعني :P

شعب الكويت اتكاليين وكسوليين

من جذي يقطون كل شي بالشارع

يقولون في خمامين

في هنوود

alsaronah يقول...

Sn3a


@@ الله يسامحج فنانين مرة وحدة ؟؟ لا يسمعونج لا يمصخونها والله .. على بالج نفس شوارع امريكا الي يطلعون ابداعات والوان تونس ؟؟؟ هني يضحكون والله بروح اصورهم واحطهم بموضوع بروحه لووول

اي روحي الجمعية من داخل تونس امس انا ورفيجتي قحصنا فييها وايد لوول

alsaronah يقول...

بانوراما


هذي المشكلة ... لو يحطون ضرايب ولو الشعب اهو الي يدفع على هالهنود جان لقيتي شوارع الكويت ناصعة البياض :D

kuwaitawy يقول...

يا سلام عالبوست


عجيييييب

----

من ناحية اللي يتغنى بحب الكويت

ويقط علبة بيبسي من الدريشة

وسالفة يحترم قوانين الدولة الللي برا والكوبت لأ


بهذي صاجة

elq87obi يقول...

مساء الخير و الأنوار

هالتخلف شيء يحز بالخاطر و الله ؟ :(

معقولة شوارعنا و شواطئنا و طوفنا و كل شيء بديرتنا وصخ ؟

أبي أعرف ليش كل شيء لازم قوانين و رقابة ليش الواحد ما يلتزم و يحترم نفسه من كيفه ؟

يعطيج العافية بوست روعة و يضيق الخلق على الوضع العام

كفو عليج و الله

سلامي لج :)

Salah يقول...

النظافة من الايمان

يقولون شنو الوطنية... اهي ببساطة انك تحافظ على الديرة مثل ما تحافظ على بيتكم!

alsaronah يقول...

kuwaitawy

تسلم أخوي كويتياوي حياك الله ولا تحرمنا من وجودك :)

alsaronah يقول...

elq87obi

لازم نحط قوانين والي يخالفها يدفع لأن الفلوس اهي الي ترد الناس :D

شوف جريدة الصباح عدد اليوم وشوف صورة آخر صفحة وشوف شلون الناس تستهين بالقوانين ..

alsaronah يقول...

Salah

صح كلامك أخوي صلاح .. أنا علشان أرد حرتي بالبيت أقط كلينسة بالارض امي تقول لي شيليها أقول لها عادي انتو تقطون بالشارع ... وبعدين لمن تروح اشيلها ... انا موقصدي اني اوسخ البيت بس ابيهم يحسون بحب الوطن من كل ناحية ...

alsaronah يقول...

شفت صورة قديمة لشباب وقت الغزو العراقي يشيلون الوساخة ويجمعونهم ... بعز الظروف القاسية ينظفون ... والله على راسي هالشباب واحنا الحين بوقت الرخاء محد حاس انه يوسخ ديرته بقرطاسة صغيرة ... مو لازم ننطر الهندي ينظف الشارع اهو ينظفها علشان ياخذ معاشه ... غير عن لمن احنا ننظفها لأننا (( نحب الكويت )) ...

سيدة التنبيب يقول...

أخيرا لقيت أحد يفكر بالزبالة!

ذيج المرة دشيت السينما مع أخواني الصغار و كانت فاضية بس أربع
( غلمان )مراهقين من طقة اللي يلبسون شورتات و يوقفون شعورهم قاعدين
نهاية الفيلم شلنا قراطيس النفيش و مرينا صوب ما كانوا قاعدين هالأربعة و الله لا يوريج الوساخة اللي تحتهم
هذيلة بس أربعة شحال لو السينما مليانة ؟

يعطيج العافية عالبوست

alsaronah يقول...

سيدة التنبيب

كفو والله انتي واخوانج ... أنا بصراحة مرة طلعت من السينما ونفس الشي متعودين احنا نشيل زبالتنا ولا وحدة تقول لولدها لا تشيل شي اهم يشيلونه ... بطت جبدي صراحة شهالتعليم الخايس ؟

Alikingkw يقول...

الناس الصغار اللي يشخبطون على الطوف مساكين... ضايعين ومولاقين شي يلهون فيه وعندهم طاقات كبيرة ممكن تتوظف بأحسن صورة بس اللوم مو عليهم أغلب دول العالم موفرة لشبابها الصغار أماكن ينغمسون فيها بس ربعنا مو مسوين شي حق عيالهم. نادي واحد(ثقافي-رياضي-اجتماعي-فني) في كل منطقة راح يقضي على ألف عادة سيئة (أنا متأكد) ما أبي أكون متشائم بس (انفخ يا شريم ما من برطم).

في أيام الغزو العراقي الغاشم على الكويت كنت مع عيال الفريج وأعمارنا ما تتعدى العشر سنين كنا ننظف الفريج والفرجان المجاورة وبنهاية اليوم كان واحد من أهل الفريج الله يذكره بالخير يجازينا بعصير وماش ميلو ((عملة نادرة جدا في أيام الغزو)) وكنا أثناء عملنا نحس بمتعة ما لها نظير مع جهلنا بالمكافأة :)

أتوقع من السهل جدا زرع مثل هالقيم في الأطفال وماراح يحسون فيها الا إذا نفذوها وحسوا انهم ينجزون شي فعلا مفيد وخيير (حتى الكبار)

عجبني سيناريو البنت الكشخة الي تقط قراطيس لووول

alsaronah يقول...

Alikingkw

افا عليك :)

مشكور لتعليقك

Alikingkw يقول...

العفو :)