2008-10-27

وبعديـــــــــــن؟؟!!!!!




السلام عليكم ورحمة الله وبركاته ...
(( اشكرة موضوع مناجر)) :P
أعزائي القراء
قبل فترة اندزت لنا مسجات تبارك لنا والجرايد عشمتنا بال200 دينار حق كل طالب جامعي ، واحنا حدنا كنا مستانسين ، بتقولون شدعوة!! بقول لكم اي والله صج حتى ال100 فلس تونس هاليومين بصراحة ...
من شاف بورصة الكويت ... اللهم لا شماتة
من شاف غلاء الاسعار ...!!!! بيي لهالنقطة لأنها باطة جبدي شوي ..
نرد على سالفة الاعانة ، أهلنا على بالهم ان الاعانة تكفينا ، اوكي كل مادة آخذها بالجيو يبيلها كتاب كتابين غير نوت المختبر شكبره متين ..
مصرف صراحة .
الجامعة وغلاء الأسعار
اخواني واخواتي :)
بصراحة وشي يبط الجبد ، لمن يحطون الشركات ماكينة حلاو وكاكاو وبعد ماكان الكاكاو ب200 و150 فلس ، صار بربع دينار .. شنو كاكاو بربع دينار ؟؟ مو مفروض الطالب الجامعي له معاملة خاصة ؟؟
فقر ان شاء الله يصكهم ..... شدعوة عليها من ادارة جامعة ماتعرف توقف ببلعومهم يعني ؟؟؟
الكافتيريا ، شوفوا شنو خذيت ... صحن سلطة صغير مع صحن في 4 قطع لحم صغيرة بعد مع واحد بيبسي بس ... بجم ؟؟
ب3 دنانير وشي ...!!!! لا ويقولون لا تشترون من ستار بكس وغيره يهودي مادري كفار يبا ارخص من اكلنا والله ....
شدعوة عليهم ....
وبالأخير رفضوا ال200 دينار لكل طالب جامعي ...
شنو الطالب الجامعي ما يستاهل ؟؟؟
بتقولون أهلنا ؟!!!
بنقول لكم اهلنا فلسوا من بورصة الكويت ... أهلنا وراهم مسؤوليات ومجابلين يهال وطلبة غيرنا شدعوة عليكم ...
جم يعطونا اهلنا مصرف اذا كانت جذي اسعار الجامعة ؟؟
ترا ما يصير والله ...!!!!
نكتب عنهم بالجرايد يعني ؟؟
المشكلة اخواني وخواتي ...
في الدول الغربية اذا جريدة كتبت عن شخص أو عن جهة معينة ، نلقى من ثاني يوم هالجهة متعدلة ومعدلة خطأها ، هني عندنا بالكويت كتبنا عن فلان ولا كتبنا عن هالجهة ..حاربوا الجريدة !!! اذا الغرب الي اهم احسن منا بالتقدم ، والعلم وحتى الدين وبكافة المجالات، ياخذون هالمواضيع بروح رياضية وتصلح غلطها وتكبر بعين الناس..
يبـــــــــــــا ليش هني يحبون المجاملات ؟؟؟
شركات الاتصالات أقول لهم وصلة الانترنت خربانة مو مني منهم يقولون تعالي لنا شرق مادري وين؟
زين مو أنا الي اخدمهم المفروض اهم الي اييون مو مشكلتي اذا عطوني وصلة خربانة ..
شركة اتصالات ثانية ماخذين من خطي 40 دينار زيادة والغلط من الموظف وبعد شهور وروح تعال قالوا ما نقدر نسوي لج شي ...؟؟ احنا الي نتدلع مو ندلعهم ... ان شاء الله تاكلهم فيفا وتطيح حظهم يارب ..
والله مافيهم خير .. والله مافيهم خير ...
لا من بورصة سنعة ...
ولا من رياضة سنعة ..
ولا من مجلس أمة سنع ..
ولا من جامعة سنعة ..
ولا من وزارات سنعة ...
ولا من شركات سنعة ...
ناطرين النفط يخلص يعني علشان يحســــــــون ؟؟؟
قاعدة اكتب الموضوع وقلبي محترق والله .. ليش جذي ؟؟ الكويت تستاهل والله تستاهل .. بس للأسف شكثر بالكويت ما يستاهلون .. ويروحون برا يشترون شهايدهم علشان اييون ينفخون ريشهم على الاوادم واهم مايعرفون ال أ من ال ي .
للأسف وايد كويتيين أكفاء يسافرون برا يشتغلون ، وماخذين حقهم واحنا بديرتنا الأمي ماكل الدنيا والدنايا ..
شخلوا لنا أكثر من جذي احباط ؟؟؟
شخلوا ..؟؟؟؟
أترك لكم التعليق ..

25 comments:

Blog 3amty يقول...

لازم بو أنس يضمن بإستجوابة مسألة ككاوج بو ربع دينار :P

Ducati يقول...

بيييه كل هذا شايلته بقلبج

الله يعينج يا وخيتي

وسالفة الإعانه هذي المفروض شغله اوتوماتيك تكون محسوبه من قبل الحكومه

يعني يا حكومه رفعتي معاشات الناس بالتالي ترتفع الأسعار ومحد ياكلها غير طلبة الجامعه الي عايشين على هال100

يعني يا انكم تنزلون الأسعار مثل ما كانت او انكم تزيدون الإعانه

والله يتراوالي حتى لو زادوا الإعانه راح ترتفع الإسعار اكثرو ولا شرايكم

ليبرالي يقول...

ليش زعلانه فلوسج وااايد

ياحبكم للتحلطم قروض وبورصة وكادر وعلاوات إلي يسمعكم يقول الكويتي ناطر على الدوار أحد ياخذه ويعطيه يوميته

حياتي هدف مو عبث يقول...

الإعانه تروح فقط لإشتراك الإيقو والمكالمات والبانزين !

ومصروفي من أمي

:P

وما أعتقد إنهم راح يزيدونها

وبالنسبة للأكل صح غالي على الفاضي

ذيك المره شفت جكن نقست :P

اشتهيت أكله :P

في 4 حبات بس

تدرين جم

نص دينار

ضحكت من قلبي لأن 4 حبات

وأعتقد الجيس الكامل من الجمعية بدينار وشي

بس اليووع كاافر :P

حياتي هدف مو عبث يقول...

نقت

نقتس

:/

3bady يقول...

اشتري من فرع منطقتكم و روحي الجامعة :))

لا تسكتين عن حقج اتخلينهم يبوقون فلوسج روحي راكضي وراهم و طلعي هالاربعين دينار من خياسهم

صيري مثلي انا انسان اتريق الصبح من 8 لي 2 اقزرها على ماي و اذا ما قدرت كلش يوم حافل تعبان اطق لي كوروسانه او اشرب لي قهوه

طوليي بالج و فكري بايجابية

باختصار لا اطالعين داخل فتحة حبة الدونت بل طالعي شكل الدونت اشلون حلوه :))

حـمد يقول...

اهم شي اذا دخلتي على طبيب كويتي سأليه وين دارس وباي جامعة تحديدا :)

alsaronah يقول...

Blog 3amty


اي والله حاجه ... قول له ... علمه .

alsaronah يقول...

Ducati ...

مشكلة والله الي قاعدين نمر فيه وانا ليش قاعدة اكتب بالجرايد وادور لي على وظيفة ؟؟ لأنها مو مكفية أولا وثانيا ماحب أطلب شي من اهلي ... ريال أنا:D

alsaronah يقول...

ليبرالي

اي شي حتى لو معاشي ألف لازم ما اسكت ..

150 سكتنا عنهم 200 طوفوا بعدين ربع دينار ..

250 _ 200=50

50 +50 = 100

100+100 =200

ولمن تحسبها هالخمسين فلس تطلع لك دينار ربحية ... زقوم ببطنهم آمييين

alsaronah يقول...

حياتي هدف مو عبث

اي والله صج أول الطالب الجامعي له معاملة خاصة ... حتى الناس لقالت هذا جامعي تحسين يكبرون منه ... الحين كل من هب ودب قال وييييه طالب جامعي ؟؟ وخير ياطير :(

طيحوا من مستوانا والله

alsaronah يقول...

3bady

ماحب الدونت :P
لوووول

لا المشكلة ان دوامي معتفس من 8 الصبح لل5 المغرب يعني اوكي اليوم انا متريقة عدل بالبيت بس ساعات ما الحق اقوم متأخر ... والله اشتري لي من كاريبو احسن من كافتيريا الجامعة بصراحة ..

alsaronah يقول...

حمد

مافهمت شنو المعنى من هالسؤال لووول

بس اكيد بجامعات برا من صجك ؟؟؟

الي يدرس بجامعة الكويت يطلع منها جنم الي توه منولد مايدري شالسالفة لووول

KuWaIt MaStEr يقول...

يحق لج تتحلطمين
و في مدونات يقولون الكويت شزينه فيها خوش مجلس و يمدحون فيها انا على طول اسحب نفسي بره مدونتهم بلا احراج

والله بردتي جبدي فيهم

انزين اشدعوه 3 دنانير انتي مو طالبة كنز ولا نفط

ياحلوو العيشه بره الكويت ونااسه جو سنع حكومه سنعه شعب ذوق وادب عادات حلووه و احنه غبار & حكومة ميته ماتدري عن هوه دارها & شعب واحد ياكل حق الثاني

للاسف الديموقراطية بدت تختفي بالكويت

و قبل كنت اخذ ربع دينار و اروح الفرع اجيل لي كاكاويات و بطاط و عصير وعلوج ويرجع لي الباجي و الحين قمت اروح الفرع وادفع كي نت

و صح كلامج لو برا الكويت كتبوا عن شخص معين يمكن يعالج نفسه بس لو لكويت يرد عليهم بالسان هالطووله و زياده يجذب فوق شينه قوات عينه

يعطيج العافية

kuwaitawy يقول...

الله كريم

الـبـيـرق يقول...

أنـتـي لـو وزيـرة شـراح تـسـويـن ؟! :p

عـلـى طـاري الـبـورصـة .. الـجـنـيـه الأسـتـرلـيـنـي كـان 530 فـلـس .. و ألـحـيـن صـار 430 فـلـس :d

صـج الأزمـة الـمـالـيـة تـسـوي شـي

الـعـقـار نـازل و الـسـمـيـت نـازل و الـدولار و الأسـتـرلـيـنـي و الـيـورو نـاااااازلـيـن

رب ضـارة نـافـعـة :)

Alikingkw يقول...

لا تعورين راسج
الي قاعدة تسوينه صح الشغل زين في كل وكت (بس أهم شي تكونين مستانسه بشغلج)

والإعانة فعلا ما تكفي كمصروف بس توفي احتياجات الجامعة ، أنا كنت أدندن في المطاعم وأحوش لي جم بيزة زيادة عشان أستانس فيهم مع الربع :) و أخفف الضغط المادي على الأهل.

وكفتيريا الجامعة (ولا بيزة) لا طعم ولا قعدة حلوة روحي ستاربكس ودفعي الي تدفعين يسوا الصراحة.

والبورصة تجارة والواحد لازم ما يدخل فيها الا إذا كانت فيه شدة أو على الأقل يجمع مبلغ مع مرور الوكت ويستثمر فيه على قده بدون لا يأثر على معيشته.

وخدمات الشركات فعلا مأساة ومهما كانت الشركة كبيرة و(كشخة) تلقين خدماتها دون المستوى ومثل ما قلتي سواء كان الخطأ من البائع أو من الزبون محد ياكلها الا الأخير.

أنا أقول يا اختي انتي ماشاء الله ممتازة في الصحافة ونشطة وانشاء الله اذا توظفتي راح يكون عندج دخل إضافي من شغلج في الصحافة وانشاء الله يتهاوشون عليج الجرايد ويسون مزادوانتي الربحانة.

بس تفائلي وطالعي الجانب المشرق من الكويت تره موجود.

Miss-Q8 يقول...

لووول .. و الله مادري شقولج يا طموحة
الأكل بالجامعة يلوع الجبد .. اشتغفر الله و الحمدلله عالنعمة ..
روحي جمعية الخالدية وايد أبرك .. عالأقل تقطين على شي يسوى !!


و إلا سالفة الـ 200 آنا استانست إن تبطل الموضوع بالحكومة , بس للأمانة ما تفاءلت وايد .. و قلتها من قبل
إذا فيها اقرار لازمها حل مجلس قبلها .. خو تدرين لازم هالسيناريو قبل كل اقرار لـ قرار حق الجامعة !!!


هدي بالج .. و باجر لج مني كرتون كاكاو
بس قولي أي نوعية تحبين :> ؟

THE BOSS يقول...

على كل الهموم اللي شايلتها

شكلج بتعيزين مبجر

ترى ما فيه شي يسوى

وعطني ولعه

alsaronah يقول...

KuWaIt MaStEr

لاتخليني اهج من الديرة لووول :P

بس الكويت حلوة والله ... نفس التفاح الي يحاوطها ذبان الذبان هذول اعضاء مجلس الامة ... يحاولون قدر المستطاع الافساد فالافساد :)

alsaronah يقول...

kuwaitawy

اي والله الله كريم :)

alsaronah يقول...

الـبـيـرق

يحليلك انت حق التحليل الرقمي لووول

انا لو وزيرة بعينك مساعدي لووول

alsaronah يقول...

Alikingkw

الله يسمع منك .. لا اذا عن الشغل لا تحاتي مضبطة حالي على كذا جهة علشان اضيفهم بسيرتي الذاتية لما بعد التخرج ان شاء الله ...

شكرا لك وايد على كلامك الطيب والله كريم

alsaronah يقول...

Miss-Q8

من صجج؟؟ وحياتج صحن شكبره كشري بدينار من جمعية الخالدية انا ورفيجتي كل يوم نتغدا لوووول

ووالله احسن من اكل الكفتيريا وارخص لوول

اليوم كان موجود راعي الماكينة وقلت له ليش الكاكاو صار بربع دينار ضحك اول شي وبعدين شرح لي ... الحين الماكينة مو لنا ؟؟ شكو الجامعة تاخذ منهم عمولة ؟؟ هذا اول شي وثاني شي يقول التجار رفعوا سعر الكاكاو لووول
وعطاني كاكاوين مجانا لوووول
قلت له انا اناقشك حقنا كلنا مو بس لي انا ترا الاعانة ماتكفي جان يضحك ..
الله يقطع ابليسي .. اي والي يسلمج عاد انا احب الكاكاو .. هالله هالله فيني ...

alsaronah يقول...

THE BOSS

لا تخاف علي ... حدي نكتة والضحك يعوضني لوووول

وعندك ولعة لبووووس مع واحد قهوة سادة لووول