2008-10-31

تكسرين خاطري ياكويت !!




هلو عليكم ...

تصفحت اليوم جريدة الشاهد وجذبتني فقرة حلوة ... وكان عنوانها

ندوة العمالة الوطنية والتحديات المستقبلية ، توجه انتقادات حادة لسياسة الحكومة

الغانم : الكويت دولة موظفين لا منتجين .. والأجيال المقبلة ستلعننا !!!

كلام قوي يالغانم بس عجبني والله ، اخواني وخواتي القراء

لي متى مجلس الأمة يدور راحة المواطن المثلى الي تخليه مرتاح البال والواسطة اهي الي تشغله ؟؟

قال لي واحد مرة ان وحدة تشتغل مع امه بالدوام ، وعندها واسطة قوية هالواسطة تخليها تشتغل بمكانين مجرد اسم موجود اوكي ومعاشها فوق ال2000 دينار ، أنا قلت لا مو معقولة جان يقول لي والله ياسارة هذا الي حاصل ، عندج واسطة قوية تمشي أمورج كلها . وخاصة اذا كانت هالواسطة من اعضاء مجلس الأمة المخزييين .

ساعات لمن اشوف حالنا جذي اقول ياربي شعب تعود على الهندي اهو الي ينظف زبالتي ، الأجانب اهم الي يبنون بيوتنا ، يطقون لي كرت وانا نايم ببيتي ، اخلي الشغل على فلان وانا نايم امس كنت سهران بالديوانية .

أتزوج مدرسة علشان تساعدني في البيت وتمول عيالنا بالمستقبل .

لس متى بيفكرون بالمادية ؟؟ لي متى الفلوس تروح وتروح وتروح وللحين ماكو مشاريع يديدة بالكويت؟؟

بنقول الحكومة .. أوكي الحكومة للأسف ماحطت خطة للمواطن علشان هالمواطنين يمشي على عجين ما يلخبط ، ليش مانخلي الشعب منتج مثل ما قال الغانم ؟؟

تصفحت مجلة ذاك اليوم ولقيت استطلاع او تحقيق صغير يتكلم عن امنية حياتك ... وياربي على الناس الفاضية ..

واحد يقول : استلم معاشي وانا قاعد بالبيت بطالي .

والي يقول : اني آخذ معاش قوي .

والي يقول : ماداوم كلش ..

بس عجبني واحد يقول : ان بنتي تصير احسن دكتورة . لا ومو كويتي بعد لوووول

ياناس والله حرام ... شكثر اشوف كويتيين يروحون برا يلقون الي يقدر طموحهم ... والكويت اولى ان نكون موجودين فيها بس ليش علموا الشعب الربادة ؟؟

قالت لي مرة مرت اخوي أن في شركات يديدة اجنبية تبي موظفين كويتيين بشرط توظفهم بالساعة وتعلمهم شلون ينتجون مو بس حضور وذهاب بلا عمل كحال الوزارات الي موجودة عندنا ، بصراحة هالخطوة جدا رائعة . بس للأسف انها ياية من جهة برة .

يعني ننطر الأجنبي ايي يقول ياكويتي تعلم شلون تنفع ديرتك ؟؟

أمس كنت حاضرة محاضرة عن النفط في الشرق الاوسط ، والمحاضر قاعد يناقش الاوضاع ولا يحط على مخطط عبر السنوات البحث عن النفط قام يقل حيييل .. الناس صارت تدور على مصادر طاقة ثانية ..

واهني يقولون لا النفط قاعد لي بعد 100 سنة .. الموضوع مو موضوع مدة وسنوات الموضوع موضوع الطاقة ، مثل الستكر شلون اول ماحطوه كان غالي الحين بمحلات بو100 فلس نشتري درازن :p هم النفط جذي باجر يطييح سعره وناكلها احنا ..

ياكويتييين ... حاولوا تنتجون للديرة

ياكويتيين ... والله ديرتنا تستاهل والله

خلونا نفكر بكل تواضع وبساطة .. مافيها شي ان الواحد يأدي اشغاله بنفسه ... حتى الدين ما حرم هالشي لو ناخذها من الناحية الدينية .

كل الدول قام تتقدم الحين ..كثير من الدول تبنت طموحا كويتيين والكويت للأسف فضلت أصحاب شهادات الابتدائي والمتوسط على هالناس الطموحة المتميزة ...

قدمت هالدول عروضات هائلة عليهم .. علشان ترتقي ديرتهم ويرتقي هالكويتي بعمله ..

بس عندنا هني قمع للطموحات ... وتشجيع على الكسل

كل واحد يقول متى المعاش يالله ... شلون الواحد يحس بلذة فلوسه واهو ماقدم شي

متى راح نتعلم العطاء مثل ما قاعد ناخذ ؟؟؟

بعد 20 سنة الكويت شلون راح تصير ؟؟

اذا احباط من الحين باجر شنو ؟ ؟

اذا كل طالب اول السنة يفكر متى العطلة شراح نستفيد ؟؟

اذا الدولة تشجع وتعطي زيادة عن اللزوم والشعب مستانس على باله هدية .. وياخذها وينكر دور الدولة شراح نستفيد ؟؟

لازم يصيبنا الفقر علشان نحس بالنعمة الي كانت عندنا ؟؟

النعمة زوالة

والكويت تستاهل

فخلونا نتشارك وننتج للكويت علشان تظل معطاء ...

المعادلة ماراح تكون موزونة الا اذا تساوت الحقوق والواجبات ..

وللأسف عندنا كل واحد يبي حقه ويحارب الكل علشان حقه ، بس لمن تقول له سويت واجبك ؟ يقول لك فلان ما سواه ليش انا أأدي واجبي ؟؟ وقفت علي؟؟

دام وقفت على هذا وذاك وذاك عمرنا ما راح نتقدم ....

شي ثاني ..

الدول الغربية تتكلم شوي وتنفذ الكثير ، أما عندنا بالكويت يتكلمون وايد وياخذون بهالكلام وقت طويل وبالاخير ، الأجانب هم اهم الي ينفذون ..

متى سنتقدم ؟؟؟

مواطنة غيورة على ديرتها

طموحة مملوحة

15 comments:

Ducati يقول...

لو قدرنا نقيس مدى انتاجية المواطن الكويتي ما راح نحصل شي يرضي الضمير

انا اعتقد اهي مسألة توعيه ومن ثم مسألة وعي للذات

اذا انا مصمم اني اشتغل وانتج بالتالي انا ملزوم اني اشتغل علشان احقق هالشي

بس المشكله الي قاعد اشوفها ان اذا البيئه الي انت تبي تنتج فيها اساسا ملوثه اشلون راح تنتج فيها؟؟؟؟

الـبـيـرق يقول...

مـوظـفـيـن الـوزارات يـعـانـون مـن الـبـيـروقـراطـيـة ... و الـكـويـتـي أذا مـا كـان خـلـف الـمـكـتـب .. هـذا مـاهـو كـويـتـي !!

الـحـل بـالـخـصـخـصـة :)

alsaronah يقول...

Ducati

معاك حق البيئة اهي الي تساعد زين دام الناس تتعلم الغلط من الغرب ليش ماتتعلم الصح؟؟

alsaronah يقول...

البيرق

جان زين لو صج تتطبق البيروقراطية بالكويت قصدك العكس ..

والكويتي بالفعل يبي مكان مرتاح البال ينطر متى تمر السنين علشان يرقونه ويصير وزير وووو الخ ..

مافكر الديرة شنو استفادت منه ..!!
لا يفكر شلون اهو يستفيد

حياتي هدف مو عبث يقول...

لالالا الخط وااااايد صغير

حسيت عيووني علقت :(

ممكن اتغييرين الخط ما عليج امر

ManalQ8 يقول...

يا بعد قلبي يا الكويت

alsaronah يقول...

حياتي هدف مو عبث

غيرته ناطرة تعليقج

alsaronah يقول...

ManalQ8


اي والله :)

حياتي هدف مو عبث يقول...

مشكووورة على تكبير الخط :)


المشكله ان في ناس تبي تكون منتجه ومبدعة في عملها ودراستها

لكنها تنصدم بالواقع

واسطة

ولد عايلة

تعرف المسؤول

عندك فلوس

تعيش احسن واحد

اذا العكس لأ

تكون اردى واحد

والماديات طغت كثيير على كل التعاملات
حتى بين الاسرة الوحدة

قمت احس ان كل واحد يبي الفلوس له وبس
وحتى لو عنده خييير لكن العين ضيجه


احياناً افكر لو نستمر على حالنا المأساوي اللي عايشينه الحين في الكويت

بعد 10 سنوات شراح يصير فينا

تدمع عيني من القهررر


الله يصبرنا ويعينا على حفظ الكويت
ورفعها للأفضل والأنفع

الـبـيـرق يقول...

سـارة ...

الـبـيـروقـراطـيـة لـهـا عـدة مـعـانـي .. و مـن مـعـانـيـنـهـا أن الـمـوظـف أو الـعـامـل يـنـجـز عـمـلـه و لا يـهـتـم أو يـتـعـمـق بـه .. و هـذا يـنـطـبـق عـلـى ربـعـنـا :)

alsaronah يقول...

حياتي هدف مو عبث

اي والله صح كلامج .. والمشكلة بعد لأن الكل الحين يبي يتزوج واحد متروسة جيبه .. بس الي هامهم سيارتي آخر موديل عندي أحدث تلفون .. ولو تبيه يجمع لك 2+3= ؟؟ ييتنح بويهك ..

الدنيا صارت ماديات :(

alsaronah يقول...

البيرق

والبيروقراطية انك تنفذ عملك وماتدخل العلاقات الشخصية او الظروف الحياتية بالعمل ، الكويتي صار مثل الهندي والله بييب عيالي من المدرسة والله امي مريضة والله اخوي عرسه اليوم ، ووقف معاملات ناس وايد علشان هالعذر التافه

Alikingkw يقول...

في اقتراح قدمه أحد النواب السابقين المخضرمين (حسب ما سمعت) يقول أن الكويت دولة صغيرة وغنية جدا وعدد سكانها قليل جدا ... فلماذا لا توزع ثرواتها على الأسر الكويتية ومن تلك الثروات احتياطي الأجيال القادمة وكل واحد يتكفل في أجياله القادمة.

بتصوري إذا حصل وتم تنفيذ هذا الاقتراح (الذي يتميز بطابع تهكمي) سوف تستحيل وزارات الدولة الى مساكن للأشباح ويتجه كل فرد الي (البزنس) الخاص به.

ربما يكون الوضع أفضل مما هو عليه الآن (بالتأكيد سوف يكون بالنسبة للمواطن الكويتي) وقد يكون أفضل للكويت .. فبهذا الوضع الجديد لن يكون العمل بأي قطاع من القطاعات عمل اجباري أو نابع من حاجة ماسة بل سيكون تطوعي ووطني.

عجبني الاقتراح (على الأقل إذا الكل سد حاجته المادية يبين الفرق بين الشخص الوطني والشخص الي يبحث عن مصلحته الخاصة على حساب بلده)

alsaronah يقول...

بالعكس أحس راح كل واحد يضيع الي وراه والي جدامه ويقعدون فقارة ماعندهم شي ... صدقني اكثر الشعب الحين بايعين الي وراهم والي جدامهم حق البورصة ...

وأجيالنا القادمة المفروض نفكر فيهم عدل مانحطهم بوضع محرج يقولون والله أجدادنا مافيهم خير ... عدل ؟

Alikingkw يقول...

والله مادري بس أحس انه كل واحد مسؤول عن نفسة وأبنائه ومسؤولية الحكومة تكون في اطار الخدمات تعليم-صحة وارباح النفط تتوزع على المواطنين ;) (إلا إذا كان الشعب غير واعي وغير ناضج ومو قد المسؤولية والحكومة لازم تتكفل في أخلاقه ومستقبله ومستقبل عيالة)
ما تعتقدين ان الي يضيع الي وراه وجدامه قاعد يقدم على هذا العمل بإرادته ولازم يتحمل العواقب؟

والأجيال علاقتهم في ربحنا وخسارتنا مو جذرية إذا الواحد خسر في تجارته أجياله يبدون من الصفر ... الدولة موجودة والقطاعات موجودة يتعلم ويشتغل ويبني نفسه بنفسه بس الي يفرق معاه انه ابوه ضيع ثروة بس

اما الناس الي فكرو في عيالهم واستثمروا فلوسهم عدل أو خشو حق عيالهم راح يحسنون من أوضاع أجيالهم القادمة.

وفعلا كلامج صح فيما يخص ان الواحد لازم يفكر في أجياله وفلا هذا حصل قبل عشرات السنين أجدادنا البعض منهم استغل فرص زمانه وعدل أوضاع أبنائه وأحفاده وبعضهم ما استغل أي فرصة وأبناءة وأحفادة بدو من الصفر والحين عايشين في البلد متعلمين وموظفين وبعضهم بنى نفسة بشكل ممتاز واستغل فرص زمانه عدل.

الي أقصده انه المواطن الكويتي المفروض ان يكون واعي وقد المسئولية ويعتمد على نفسه في كل شي حتى في الأموال الي اهي في الأساس من حقه فهو ليس بحاجة لمن يحتفظ بأمواله وأموال أبناءه وأحفاده بالنيابة عنه.