2008-11-07

شخصياتهم بحياتي ..





هلو عليكم جميعا
اليوم ولمن يت لنا ضيفة شحلاتها كانت قطيوة تهبل يوا اليهال يصارخون (( عمة سارة عمة سارة قطوة تهبل تعالي تعالي )) ورحت خذيت القطوة وطبعا استقبلتها استقبال حار حبتني مثل اي قطوة تحبني من أول نظرة لوووول واليهال يضحكون ويصرخون (( تحبج تحبج تحبج )) قعدت والقطوة بحضني اسولف مع نفسي واشوف هالشياطين جدامي وفسرت شخصية كل واحد منهم وماشاء الله بيتنا اليهال أكثر من عددنا لوووول لا إله إلا الله ... فقعدت أحلل شخصية شخصية وإليكم التفاصيل :



.......
.......



أبدي من أكبر واحد فيهم لحد الأصغر :)
عبـــــــــــــــــــــــــــــــــــــــــــود :
شخصية غريبة ، يحب البلاي ستيشن من صغره خلوق جدا أعتمد عليه وايد خاصة اذا محد له خلق يروح معاي مكان آخذه وياي باله طويل فديته ويظل معاي ما يزهق ...وطبعا لازم بالمقابل اغديه أو أعشيه ، مسكين فيه مرض السكري من كان عمره سنة والحين صار عمره 12 سنة ولازم آكل مثل أكله علشان أكون متساوية معاه فما يقول لي ابي شي فيه شكر ... وعلى الرغم من أنه فاشل بالدراسة إلا انه يحب قراءة الكتب ودايم ما يخليني أقرا الكتب العلمية الي يقراهم يشتريهم من برا ، ويقرأ قصص الاجنبية وايد أحب تفكيره وخياله ، بس وايد يصروخ يقول أشياء ماصارت كلش لوووول ابوي يقول في واحد كلامه صواريخ جذاب ، يطالعنا ويضحك يدري عنه اهو لوووول ...
......
.......
.......
فــــــــــاطمـــــــــــــــــــــــــــــــــة :
شخصية سارة الثانية ومن انولدت واهي تحت ايدي واشرافي لووووول نومتها عندي اغسلها وابدل ملابسها وحفاظتها بعد لووول أأكلها واسبحها جنها بنتي حتى كانت تناديني ماما ... المهم كبرت فطوم والحين عمرها 8 سنوات لسان طويل مبلتعة نجرية دلالة ، يقول أخوي ( هذي سارة الثانية ، مابيها تطلع مثلها ) ، بس ماشاء الله خذت من ذكائي بعد لووووول شاطرة بدراستها وتاكل وايد مثلي ، وكل ما قالوا لها خففي أكل تقول (( بصير مثل حبيبتي عمة سارة ))
أحب أقول لها كل أفكاري ، تشاركني الأفكار وايد وتاخذ رايي بكل شي ، بس الشغلة الي تبط جبدي منها انها بدل ما تستغل وقت فراغها بشي سنع تلقونها 24 ساعة مجابلة المسلسلات ، دليل تلفزيون تقول لنا شنو اسم المسلسل ومنو يمثل فيه واي حزة يعرضونه ومتى الإعادة وحتى اغنية المسلسل حافظته، صج صج تبط الجبد .. وأحلا شي فيها أنها تاكل الي جدامها وتاخذ حقها ، تاخذ حقها بيدها ، حتى مرة راحوا السوق جان يقول لها راعي المحل (( شو اسمك يا حلوة .؟؟ )) جان تصرخ (( وانت شكو باسمي بتخطبني ..؟؟ )) صدمة حياته لوووول فديتها والله تربيتي ماتروح علفاضي لووول .
......
.......
......
مــــــــريــــــــــــــــــــوم
بنت اختي العزيزة ، انولدت بدون ما تشوف ابوها والحين عمرها 8 سنوات ما شافته الا 3 مرات فقط وتكلمه بالتلفون مريوم شخصية موهوبة جدا ، متفوقة دراسيا ، في بداية مشوارها الدراسي كانت تيي معاي الكلية وتسلم على رفيجاتي وحبتهم وايد ، وصارت بالبيت تقول للكل أنا بصير مثل عمتي سارة ، بدرس فيزيا واتعقد مثلها لووول وبصير في قائمة الوسط الديمقراطي وأصير صحفية واكون مشهورة مثلها ، أختي تقول لها (( لا نصيحة لا تصيرين مثل سارة دوري لج على شخصية ثانية لوووول )) ، المهم مريوم رسامة ماشاء الله عليها ، وتحب تكتب مذكرات مثلي وتكتب أدق الفاصيل ماشاء الله عليها ،حتى مرة نادتني اختي تضحك ولا أختي قاعدة تقرا مذكرتها ولا كاتبة أول ورقة (( لقد وضعت كاميرات تصوير لكل من يفتح هذه المذكرة فأنا أراقبكم لووووول )) بطيناها ضحك والله أنا وأختي جان اقول لها (( عيب تقرين مذكراتها )) ولا كاتبه حديثي معاها بعد هالفضيحة جان أقول حق مريوم ماتكتب الأحاديث الي تدور بيني وبينها ، انصدمت المسكينة لأني ما أخش شي عن مريوم ، حتى اذا ضايق خلقي فمحد بالبيت يحس فيني كثر هاليهال وخاصة مريم ..
للأسف مريم صارت شخصية عنادية وعصبية مسكينة ماتمسك اعصابها ودايم بالبيت اهي الي تنزف ماتقدر تدافع عن نفسها الا بالصراخ مثلي لوووول
.....
.....
......
غــــــــــــــديـــــــــــــــــــــر
ما حتكيت بهالبنت حيييل بس مع الأسف هالبنت من الحين تفكيرها انها ودها تهد دراستها وتتزوج وتعيش حياتها بدون دراسة ،وللأسف يعود السبب لأهمال الأب والأم مع شديد الأسف بس لمن يوا بيتنا الحين مخرعينها بسارة .. كل ماقالوا سارة ارجفوا من الخوف لوووول أصرخ عليهم (( ماعندنا فشلة هني ... هني دراسة وبس )) لوووول وكلهم يسمعوني سيدة ...
غدير تبي كل شي بيد مريم ، يمكن نسميها الغيرة بس انا بصراحة ما أتحمل شخصيتها ، حتى امي تقول عامليها بليين لا تزفينها ، بصراحة خزتها تخرع لمن ازفها تخرني بنظرة شبه حقيرة لووول
المهم أن صراخي نفع وخوفها مني نفع درجاتها صارت أفضل من أول ، وصارت تفكر بمستقبلها اكثر من اول ..
الي يبط جبدي اكثر فيها انها شايفة نفسها اهي الكبيرة فماتبي اخوانها ياخذون حقهم تبي كل شي لها .. حتى بالنوم تبي كلهم ينامون وحلال عليها تسهر انا عناد اروح انومها غصب ولازم اتهاوش مع خواتي علشانها ... انيمها عصب لوول
.....
......
.....
حمنـــــــــــــــــــــــي
شخصية عبيطة لووول نوعيته الطفل الوسيم ، يخاف لا الهوا يخرب شعره ، يخاف لا شي يخدش ويهه .. اذا صارت في عزيمة أو يوا ضيوف فلازم يكشخ بدشداشته البيضا والجل الي بشعره وعطر لميس الي يفوح منه لووول لا ويكشخ علينا بالانجليزي ، وبرا محطم قلوب البنات يقول لنا (( رفيجتي فلانة زفت وحدة معانا بالصف لأن الثانية كانت تبيني اوقف معاها )) احنا ضحكنا ... ساعات أروح باخذه من مدرسته اشوف هالبنتين كل وحدة ماسكته من صوب ويتهاوشون لوووول ، بس حمني طيب حييييل والله واذا قلت له شي يسمع كلامي وما يخالفني واذا قلت له لا تعلم أحد ما يعلم كلش لو شنو ، شخصيته وايد عاجبتني والله بس شغلة باطة جبدي فيه انه قال لنا مرة (( اذا بتزوج راح آخذ وحدة نظيفة )) احنا انصدمنا يعني شنو نظيفة ؟؟ جان يقول (( يعني بيضة )) @@ اي شي ياهل ياهل طوفوا لوووول ، تغريه البنت الجميلة وطويلة الشعر لوووول حط مواصفات الزوجة من الحين ... صج الحلوين مامنهم فايدة لووول
....
....
.....
شهـــــــــــــــــد

نسختي هالبنت تشبهني حيييييل ونفس تفكيري ومشيتي حتى مرة يت الجامعة اخترعوا من كثر ما تشابهني ، مسكينة طلع لها بهاق بويهها فتعقدت أول أيامها تبجي متعقدة ماتبي احد يطالعها .. بس الحين الحمدلله تأقلمت على الوضع واوديها ساعات لعلاجها ، بنت شطورة وأحب سوالفها حتى ثرمة مثلي لووووول تنطق السين (ث) نفس مشيتي حتى مرة أبوي راح ياخذها من الروضة جان يقول للمدرسة وين سارة ؟؟ اخترعت المدرسة قالت ماعندنا سارة ... وكان قصده عنها ، بالبيت ما يناديها الا سارة وترد عليه نعم ... لووووول
تقول لي (( أنا بالمدرسة كله اسولف عنج واقول لرفيجاتي أبي اصير مثل عمة سارة )) بصراحة لمن اسمعها تقول جذي تحز بخاطري فأدرسها ، وأغلب وقتي أدرسهم واهملت دراستي والله بس المهم ترد هالبنت وتصير متفوقة ،لأن طموحها كبير ... وحرام يروح طموحها ..
......
.......
.......
منــــــــــــــــــــــــى
كلمة هبلة شوية عليها والله ، هالبنت تبي تضحك الناس بأي طريقة ، وعن طريق عرض خبالها امام الجمهور ، ازفها بصوت عالي (( يالله انجلعي )) تضحك .. أنا أعصب أكثر (( شنو الي يضحك ؟؟)) ترد تضحك .. استغفر الله مو صاحية والله ، حتى مرة حطيت اغاني حق اليهال كل وحدة ترقص رقص حلو وتكانة اهي تستهبل ... غريبة هالبنت ماتبيني ادرسها علشان لا اصرخ عليها ، مع انها عصلة إلا انها تقعد اول وحدة على الاكل وتخلص آخر وحدة وتاكل بشراهة مو طبيعية ... تتغدا مرتين وتعشى ثلاث مرات ... ساعات احسها متعقدة من شي بس مو جذي ... لازم نقومها غصب من الأكل ... وصوتها لا تسمعونه يضحك والله ... شكلها يكسر الخاطر بس شنو عبيطة وشيطانة .. ودايم لعبها طق مطاقق ويا اخوانها ...
بس والله اهي الوحيدة من اليهال كلهم الي مو قادرة اتقبلها بس مرة وحدة لميتها بحضني .. ولا بصراحة ما تشجع ولا تكسر خاطري لوووول
....
...
....
خـــــــالـــــــد
تشوفون ويهه ويه ريال وجسمه صغير لوووول ، استغفر الله شكله مافيه براءة الأطفال .. واسم الله عليه ياكل وايد ضعيفون وبس الي فيه كرشة لوووول ...
يبجي على الفاضي وبس حق تنقل الأخبار شكثر أزفه ... اييلنا .. يما شفتي شهد شسوت ؟؟؟ شفتي غدير شحطت ؟؟ شفتي سعد شمسوي؟؟ مايخاف من أحد ولمن ارد من الجامعة ايي يساحلني اهو والبقية علشان ما أزفهم ... ماخذن راحتهم هالكورس ما أرد الا متأخر من الجامعة فعافسين الدنيا بالبيت لووول ...
.....
.....
.....
عبــــــــدالوهــــــــــاب
دايم نغني له ( آه يا الاسمر يا زين ) مدلعينه لأن لونه يحطم لووووول مسكين وفقير وعلى نياته ... ينطق بس ما يطق ... حبوب وصافي النية ، مع انه توه ماكمل ال3 سنوات ، بس كافي صوته يخلي الواحد شوي ويبجي لووول ودايم الصبح وانا اجهز اغراضي وملابسي حق الجامعة يكونون اليهال سابقيني لمدارسهم فاهو الوحيد بالبيت يطق علي الباب (( عمة سالة .. بقعد مآآج )) ويبجي ...ماقدر أرده هالاسمر والله أقعده معاي نضحك ونرقص شوي وبعدين اطلع للجامعة ... أحلا شخصية والله لوووول
....
....
.....


زيونـــــــــــــــــــة


آخر انتاج للعايلة .... كتكوتة وتضحك، شخصيتها مزعجة جدا توها كملت السنة الشهر الي طاف ... بس شنو تضحك عليها حركات ، اليوم تولتني صراخ ماتبي الا تلفوني ، ماتبي الا القلم الي بيدي ، ماتبي الا القلاص الي اشرب منه .. عبيطة والله
لا تشوفون اذا قلنا لها خشمج تعفس ويهها فوق حدر لوووول ، تحب تنطلق للحياه نحطها بالحوش ثواني ولا مختفية تركض ، واليوم بجت لمن شافت القطوة بحضني تبيني اقط القطوة علشان اهي تيي وتقعد بحضني لوووول ....
ولحد يغني جدامها حتى لو اغنية هيلقية ترقص عليها ... احلا شي بعيالنا الفصلات :D
.....
.....
.....
ســــــــــــعد


أكثر واحد قليل أدب وما يحترم نفسه بالبيت ، لسانه طويل وما يحترم الي وراه والي جدامه وعلى كثر ما أطقه ما يستحي يرد يسب .. ومسكين كل ما دخلوه حضانة يطردونه لأنه يعض اليهال لووووول ، المهم الحين صاير وايد محترم وياي كل ما شافني قال بصوت عالي (( ســــــــــــــــــــــــــــــــــــــــــــــــــــــــــــــــــــــــــارة )) يضحكون عليه ... ويساحلني وايد علشان ما أزفه ... ويخليني اعصب من كلامه بعدين يقول خلاص خلاص خلاص خلاص ... ولا اذا يبي يرقع السالفة (( بحبج بحبج ... والله بحبج خلوني احبها )) لوووول
لا واذا يبي يسولف لازم يقول قبل سالفته (( بقول لج شي )) ... المهم اذا بنص السالفة لهيت ورديت اطالعه يرد مرة ثانية ويقول (( بقول لج شي )) لوووووول سميته بقول شي .. من كثر ما يقولها والله ولا يوم مر ماقال هالكلمة ....
الله يخليهم لنا يارب بس من كثر ما تأثرت فيهم قلت مابي اييب عيال لأن لاعت جبدي لووووول ، في شخصية مو موجودة وهي أول حفيد لنا بس ماعرف شخصيتها لأنها مو عايشة معانا مشان هيك ماقدر اقول عنها اي شي واتوقع عمرها الحين 14 سنة ...
ادري كتبت وايد بس لازم اعطيهم حقهم بمدونتي ... بتقولون ليش تزفينهم وايد اقول لكم ماشييين معاي على عجيبن ما يلخبطش لوووول

18 comments:

على نفسها جنت براقش يقول...

شكله البنات مبلتعات بعايلتكم و الشباب مساكين

لوووووووووووووووووووووووووول

Alikingkw يقول...

ماشاءالله بيتكم عامر أتوقع الملل ما يدور عندكم

بيئتكم ممتازة حق تربية الكاسكو أنصحج اخت سارة اشتري كاسكو راح يصير عندكم أينشتاين :)

الله يخلي يهالكم وانشاء الله يصيرون من الأجيال الصالحين في المجتمع

صار عندي انطباع انج قيادية جدا في البيت (زعيم قومي)) P:

حياتي هدف مو عبث يقول...

انا بخطب سعد حقي :p

اول شي حبيت حمني بعدين تحطمت بسعد :>

الله يخليهم لكم ويحفظهم من كل شر

صووري حمني ممكن :)

Ducati يقول...

لوول ماشالله الله يخلي لكم عيالكم ويتربون بعزكم

:)

لووول بس ام مذكرات هذي فديتها والله صج صج ضحكتني
وانتوا ليش تقروم مذكراتها مو عيب

بالله كاتبه عن اسرارها اشلون يعني

لا لا مو قبول هالكلام

ManalQ8 يقول...

يا حلوهم الله يحفظهم

:)

انتي العمه المشهورة
الي الكل بيكون مثلها
ما شاء الله

عبودي المفروض تديرون بالكم عليه لانه ذكي ما شاء الله الي يقرا وينتبه وفطين
مدارسنا ما تقيم الذكي

مريوم وين ابوها؟
:(

وغدير ليش انعزالية
وليش عندها هالتفكير؟ اكيد شايفة شي مأذيها؟
ديرو بالكم عليها

-----------------
الله يحفظهم
قصص يحليلهم
:)

الـبـيـرق يقول...

الله يـشـافـي شـهـد .. الـمـسـيـجـيـنـة أكـيـد مـن الـعـيـن :(

و الله يـخـلـيـهـم لـكـم إنـشـالله :)

alsaronah يقول...

على نفسها جنت براقش

لووووول لا مو عن جذي بس الشباب مسالمين ...
:p

alsaronah يقول...

Alikingkw


لوووول الكاسكو راح يصير ازعاج فوق ازعاجهم والله ماقدر ادرس بالبيت من صوتهم والله ...

شخصيتي قيادية من كنت صغيرة علشان جذي الشيب بدا يغزو شعري لووول

alsaronah يقول...

حياتي هدف مو عبث

بحط لج صورته افا عليج ، بس خليج على حمني حطم رفيجاتي والله بس نوعيته ثقيل والله يخاف من الي يغازلونه لووول

alsaronah يقول...

Ducati

والله احترمها ومثل ما انا ما ارضى احد يقرا مذكراتي هم اهي بس اختي ملقوفة حتى قلت لها امج تقرا المذكرات ... جان تقول لي شسوي خالتي خليهم عندج لووول
وايد احترم عقلية مريم .

alsaronah يقول...

ManalQ8



عبود ساعات ياكل شكر وايد علشان يطيح بالمستشفى بس المهم ما يداوم بالمدرسة @@

وغدير نوعيتها جذي لأنها كانت عايشة عند أمها .. وأمها ماتتعب وتدرسهم تقول الي ماتبي خل تصير مثلي تطلع من المدرسة وتتزوج @@ بس لمن قطتهم علينا وتطلقت احنا توليناهم ... بغير مخها بالكامل افا عليج لوووول

مريوم أبوها طلق أمها قبل ما تنولد .. ساعات تكلمه بالتلفون تقول له يبا بسافر مع عمتي سارة برا الكويت مع قسم الجيولوجي يضحك يقول لها انتي بعد مع سارة ؟؟ لوووول ابوها مو كويتي :)
بس تكسر الخاطر للحين ماعندها جواز وطموحاتها تسافر معاي برحلاتي ..

alsaronah يقول...

الـبـيـرق

الله يسلمك اي والله مسكينة حتى غمازاتها الكل يتكلم عنها لووول عطينا غمازتج .. مسكينة والله هالبنت ..

دلة يقول...

حلوة شفافيتج:)))))))

ماشالله انا دايما اقول اليهال يعلموننا اكثر من مانعلمهم
الله يحفظهم واذا لج قابلية تقعدين معاهم وتونسينهم ابد لاتقصين من وقتج معاهم
الله يحفظكم كلكم

alsaronah يقول...

دلة

والله ساعات يضحكون على خبالي لأني ما أقصر معاهم بوقتي بس هم بنفس الوقت ما اعطيهم ويه علشان لا يتمردون لووول

مشكورة حبيبتي :)

BLACK*_*TIGER يقول...

عيال هل ايام اختربوا

alsaronah يقول...

BLACK*_*TIGER



لووووول مو كلهم والله

ManalQ8 يقول...

الله يحفظهم
ويخليج لهم
ويكونون الافضل ان شاء الله
:)

alsaronah يقول...

الله يسلمج يالغالية :)