2008-11-08

شوفوا هالفئة المنحطة في المجتمع





أعتــــــــــــــــــــــــــرف

اني صعب أكون على وفاق مع والدتي ... يعني احنا بالبيت 6 بنات كلهم علاقتهم زينة مع الوالدة ماعدا انا والأسباب دائما العصبية الي فيني .. اهي عصبية وانا عصبية حتى السوالف العادية تكون بنجرة لوول

المهم على الرغم من هذا كله وعلى الرغم من نرفزتي الزايدة ، بس عمري ما غلطت عليها سواء بروحي ولا جدام رفيجاتي ...

أنصدم ببنات اقعد معاهم وأدري هالبنات مو قاصرهم شي والتقيت كذا مرة بأمهاتهم وشلون يضحكون معاهم وما يردون لهم طلب وتيي وحدة منهم وتقول (( أمي ......... )) والله العظيم كلام قوي وكبير ...

طبعا انا مبطلة حلجي ... شكو ؟؟

وتيي وحدة تقول أبوي الي فيه وفيه وفيه مالت عليه هالحمار الي فيه وفيه وفيه .... الخ ، والله العظيم يحز بخاطري ليش كل هذا ؟؟

وبقلبي اقول : هذول على أمهم وأبوهم يقولون لهم هالكلام القوي شيقولون عن رفيجاتهم ؟؟؟؟

أنا بعرف شغلة وحدة ... ليش هالسب هذا كله ؟

كل الي اتمناه بدنيتي اني اقدر شلوون اتعامل مع أمي بس خذيت منها العصبية والنرفزة فصعب عليها تتقبلني ... للأسف وأشوف هذول أهلهم يبون يتقربون منهم ، ويقعدون جدامنا يسبون بأهلهم ..

والله ولا وحدة منهم ياية تبي تنادي تقول لي (( يا بنت ال .... )) وقفتها عند حدها ، قلت لها :(( اذا ابوج رخيص عندج عادي تسبينه أنا أبوي غالي علي ولا أسمح لج ولا لغيرج يتجرأ يلعنه أو يقول عنه شي )) ... طبعا قلتها باسلوبي الوسخ لوووول اخترعت البنت ....

لمن يقومون وطبعا نتناقش أنا ورفيجاتي على الكلام الي انقال ، فقالت وحدة (( بنات ما تربوا )) ...

حرام ... ليش كل شي يصير نقول هالبنت مو متربية هالبنت ماتربيت هالبنت اهلها مو مربينها ؟؟ بالعكس يمكن أهلها ربوها احسن تربية بس لمن الواحد يكبر تتغير عنده شغلات (( وايدات )) ، ويتأثرون بالي حواليهم ...

هالفئة زادت والله أكيد مروا عليكم هالاشكال ...

عطوني رايكم بالموضوع

وان شاء الله تتعدل أوضاعي مع أمي .. للأسف من صغري جذي :(




22 comments:

صبا يقول...

انا حدي مصدومه من البوست ؟؟؟!!!

امي وابوي مهما يصدر منهم
عسل علي قلبي,,,

لهم الفضل علي بالدنيا وبالاخره لو مو امي وابوي جان ما وصلت وتعلمت
الوالدين نازله فيهم آيه من رب العالمين ,,,


عفيه عليج لا تسمحين لاي مخلوق كان انه يسبج او يسب اهلج

ولا تماشين هالمستوي من البنات ..
حسبي الله ونعم الوكيل فيهم

الصراحه وايد حجي يقرقع بقلبي بس ما بي اتكلم حدي مصدومه من هالنوعيه من البشر

الله يخلي لج الوالده ويطول بعمرها
,,

alsaronah يقول...

أختي صبا

مامرت عليج هالنوعية ؟؟ أنا ما أماشيهم بس يمرون علي أكون قاعدة مع بنات بالجامعة ويكونون موجودين هالفئة .. البعض منهم وده أكون مثلهم بس والله حتى لو شنو سووا فيني أهلي ما توصل اني اسبهم ...

أذكر مرة دكتور قال لنا منو يبي يغير أهله ؟؟ جان ارفع ايدي .ضحك جان يقول منو يبي اهله وما وده يخليهم ؟؟ جان ارفع ايدي

طالعني بنظرة جان يقول لي انتي ما ينعرف لج ... قصدي من هالشغلة أني أواجه صعوبات كثيرة مع اهلي وخاصة لأنهم ما يتقبلون توجهي وفكري ..بس أظل أحبهم لأنهم صنعوا مني انسانة ناجحة ... وأتوقع لو كنت مدللة ومدلعيني وايد جان ما اعتمدت على نفسي بشي وكنت الحين من الفشلة الي تدور على الزواج علشان تفتك من اهلها :p

اختي صبا اذا عندج شي قوليه لا تخشين بقلج وترا هالنوعية مرت على كثير غيري مو بس أنا :)

دلة يقول...

اشاطرج الراي، اللي يغلط على امه وابوه امام الملا او حتى بينه وبين نفسه ترى بمستوى اخر من الادب
الله يهديهم بس استغفرالله

حياتي هدف مو عبث يقول...
أزال المؤلف هذا التعليق.
حياتي هدف مو عبث يقول...

علاقتي مع امي نفس علاقتج مع امج

كل عصبية واهيا عصبية وااايد

بس لو شنو يصير ما ارضى احد يغلط عليها

مره بالثانوية كنت متهاوشة مع بنت معاي

قالت يا بنت ..

وكان بيدي بطل مااي

وحذفت الماي ابويهها بعده البطل

وقلت اكلي تبن ولا تغلطين على ابوي

لا اخلي حالج حال النعال

اهيا انصدمت وحتى كان في مدرسة حدها انصدمت مني وانا الهادية عندهم

وبعدها صارت سالفة عند الادارة

وقلت ابوي الله يرحمه محد يغلط عليه لو منو كان

واللي يغلط يتحمل

ونوعية اللي يسبون اهلهم
مروا علي اشكثرهم

وحدة قالت كلمة وااحد غلط عن امها

قلت لها عيب امج ومهما كانت تبقى امج

قالت اووه ختولي :/


وصح كلامج اللي ما يحترم امه وابوه
مستحيل يحترم الناس الباجي

والله يهديهم ياارب

Mamloo7a Q8ia يقول...

للاسف ان في ناس بهالمستوى
وللاسف انهم مو عارفين قدر والدينهم
وهذا نوع من العقوق
وعقوبته كبيره دنيا وآخره

قال تعالى: {وقضى ربك ألا تعبدوا إلا إياه وبالوالدين إحساناً إمّا يبلغنّ عندك الكبر أحدهما أو كلاهما فلا
تقل لهما أفّ ولا تنهرهما وقل لهما قولاً كريماً (23) واخفض لهما جناح الذّلّ من الرحمة وقل رب ارحمهما
كما ربياني صغيرا}[الإسراء: 23، 24].

Snow White يقول...

أنا نوعي ما أحب أتكلم جدام الناس بخصوصياتي خاصة علاقتي مع أهلي حتى لو كان في بينا خلافات ما أحب أقولها .. تظل في أمور المفروض ما تنقال جدام الآخرين لأن في ناس ممكن تستغل هالشي وممكن تسبب لج مشاكل بينج وبين أهلج ومهما صار الظفر ما يطلع من اللحم والوالدين لهم معزه كبيره في قلوبنا ولهم فضل علينا لو مهما نسوي لهم ما نوفي حقهم علينا الله يخليهم ويحفظهم يا رب .

alsaronah يقول...

دلة

اي والله الله يهديهم ... تغث هالنوعية والله ..

alsaronah يقول...

حياتي هدف مو عبث

زين تسوين والله ... لا صج والله مو طبيعيات هالبنات لأن وايد يتكلمون عن اهلهم بالشين جدامنا علبالهم ان عادي نرضى أحد يتكلم عن أهلنا .. مالت على هالنوعية .. الي مع الاسف أجد أهلهم ماكو مثلهم عسل والله ، وغيرهم مو محصل أهل قاطينهم ... صج الانسان اناني

alsaronah يقول...

Mamloo7a Q8ia

والله العظيم وحدة كانت قاعدة معاي تقول لي عن حبيبها : اوووف متى يتقدم لي كله من أمه خرا عليها .. شكبرها اووف متى تموت ؟؟ خلاص ماصارت .. والله ان خذيته لأنسيه أهله كلهم والله ماخليه يشوفهم نهائيا ... والله يرحمها ماتت أمه ، وماخذاها بدا أهله عليها شي طبيعي وحدة تفكيرها قذر مثل هذي وين الله بيوفجها ؟؟

alsaronah يقول...

Snow White

وحدة من البنات كنت اقول لها ودي اكون حيييل مع امي وودي تكون علاقتنا زينة لأن وايد تظلمني وما تفهمني .. فراحت دقت على بيتنا وقالت كلام قوي عني عند امي ... أنا انصدمت والله والحمدلله امي دافعت عني وهددتها ان دقت ما تخليها ، أنا غلطت لمن قلت لهالبنت وأدري أن أمي تحبني وتخاف علي ... بس ماتوقعت في بنات مثل ما يكرهون اهلهم يبون رفيحاتهم يصيرون مثلهم صج صج ويع

Enter-Q8 يقول...

دائما البنت المشاغبة او العنيده مع والدتها هي اقرب ابنائها لها

يوبا
جربي و انت قاعده من النوم و تشوفينها الصبح
شك بوم لا اراديا
تحبين راسها لا سلام و كلام
شوفي ردة فعلها
و راح تعرفين كل شي
الله يخليها لك و يطولك بعمرها

اما اللي يعاملون والدينهم بهالطريقة
ترى كله سلف و دين
باكر عيالهم يسوون فيهم جذي

elq87obi يقول...

صباح الخير

تدرين موضوع حلو مو الفئه اللي فيه أقصد طرحه

باختصار

و من وجهة نظري و اللي شفته

تقولين في ناس يقولون أمنا و أمنا أو أبونا و فيهم و ما فيهم و أمي سوت و أبوي قال و جدامج تشوفينهم يضحكون و يتغشمرون مع أمهم و أبهم و تنصدمين

شوفي اختي في واحد أعرفه من الربع طيب و هادي و الغلطة ما تطلع منه بس عنده مشاكل مع أبوه سببها عناده و أبوه ما يواطنه من عناده مو لشيء ثاني <<< طبعاً يعاند أبوه على شغلات غلط يعني ما لازم يسويها
فتلاقينه ما يتواطن مع أبوه مو يسبه أو يغلط عليه لا اهوه حيل محترم أبوه مو زين معاه فبينه و بين أبوه أذيه و لويه و عفسة و تعالي شوفي أبوه إذا قعد معاه جدام الناس و جدامي آنا تشوفين مثالية و رقي مو طبيعي من هالأبو و تحسدينه على التفاهم و الولد مسكين الدنيا تصفق فيه و أبوه مو مقصر معاه اهوه و الدنيا على هالولد

يعني مو لازم لما يكون الأبو أو الأم تضحك مع بنتها و الا ولدها جدام الناس معناها بالفعل اهيه طيبه و اهوه حنون فيه ناس نظامهم من تحت لي تحت لا يخافون الله و لا يستحون من الناس و جدام الناس قمة المثالية و الأخلاق و الرقي و الواحد يتمنى يكون مثلهم بس الواقع للأسف مظلم و حده محزن بعدين محد يطلع سوالفه جدام الناس

يعني لما اثنين ينتقدون الجذب و واحد منهم جذاب استحالة يقول آنا جذاب مستحيل لا تقولين في أحد بيعترف و يفضح روحه

و هذا ما يعطيهم الحق انمهم يغلطون الله أمرنا ببرهم و الإحسان لهم مهما كان و مهما صار

رايي بهالفئه إنهم ناس ما يستحون على ويهم كلش و ما فيهم خير و اللي ما فيه خير لأهله ما فيه خير للناس فما بالج إذا كانوا أمه و أبوه ؟

و حتى في الشرك و الكفر الله ما أمرنا نخليهم و نآخذ كفرهم سبب لعقوقهم بل قال

و إن جاهداك لتشرك بما ليس لك به علم فلا تطعهما و صاحبهما في الدنيا معروفا

حتى لو أمروك بالشرك لا تطيعهما و مع هذا أحسن معاملتهم و خلها تكون مثل المعروف بحقهم

و بعدين المفروض الناس ما عليها من اللي بينك و بين أهلك يعني هالكثر خلصت المواضيع ؟

و شنو الواحد أول ما يكبر يكبر على أمه و أبوه ؟ اللي وقفوا معاه و ربوه و ما قصروا عليه

بس إذا لم تستحي فاصنع ما شئت

ما أدري شفيني فيني حرة ناس صج ما تستحي و مو كفو الواحد يقعد معاهم

يعطيج العافية أدري طولت بس طلعتي اللي فيني بهالبوست

ما قصرتي

و بعدين العصبية مو حل خليج ريلاكس و طولي بالج و بالنهاية موضوعج بسيط إن شاء الله و الله يخليلج أمج

سلامي لج :)

alsaronah يقول...

Enter-Q8

والله اليوم قعدت الصبح مستانسة .. جان تدش علي زف زف زف زف زف زف زف زف

وأنا ساكتة قاعدة اسمعها وقمت غسلت ويهي ورحت صوب التسريحة امشط شعري واهي تزف وتزف .. وحطيت كريم وحطيت كحلة واهي للحين تصرخ .. ( وانتي هذا الي شاطرة فيه قعدة جبال التسريحة ) جان اقول لها ( يما خلاص ترا الصبح حلو والله ) سكتت وطلعت .. شسوي يعني ؟؟ والله احبها بس طالعة عليها عنيدة ..

alsaronah يقول...

elq87obi

مادري مو شرط يعني اختي الي اكبر مني امي مدلعتها حييل ومستحيل تزعلها وجدام الناس تفتخر فيها ... أنا شوف الحين عمري 21 سنة للحين آكل زف منها حتى لو جدام الناس ... لوووول ساعات اضحك يعني شسوي ...؟

alsaronah يقول...

elq87obi


رفيجك كسر خاطري والله أنا لولا ابوي جان الحين منتحرة لوووول الله يخليه لي يارب

سليمان القصار يقول...

البدون ... أول كلمه أقولها هي بدون .. وأقصد فيها إن اللي يحمل في داخلة المعاني السخيفه .. واللي تاخذه العزه بالغلط على أي انسان أي انسان فما بالك لو كان احد افراد اسرته ومن ياترى الوالدين .. ومن فقد الاحترام لذاته لشخصه .. ومن انكر حق الوالدين بعدم الاحترام الخ ...

هذا اهو البدون لأنه بدون ..

واخيرا .. بقول عسى الله لايوفقها إن قالت وعساهم للعله هديه من قالوا وحجوا سواء بحلوة اللبن أمه ... والا ذاك اللي كد عليه وعلمه ..

alsaronah يقول...

شكرا على تعليقك اخوي سليمان ..

Alikingkw يقول...

ما اعتقد ان أوضاعج مع امج سيئة ..احس انها طبيعية عادي ميانة ولا تحاتين اتوقع امج تعرفج اكثر مما تعرفين نفسج ... ما في حواجز بينكم عشان جذي تتنرفزين وتعصبين بكل حرية
بس اهم شي ما في مشاكل

هذا رايي ... انا أشوف الموضوع من هالزاوية مع أمي الي ما تعطيني مجال اعصب لأن طبيعتها هادية وانا هادي فالجو نايم ما فيه اكشن لووول بس ما أحس ان في حاجز ((احترام)) بيني وبينها ممكن اتحرش فيها ((طبعا بدون سب)) وعموما انا ما اسب ...لو اسب ممكن اسب خواني وربعي بس ما اسب ...الحمدلله ما أحس اني بحاجة للسب لووول

والناس الي يتلفظون في الفاظ نابية على الكل تعودوا على استخدامها ومو بالضرورة يعنون الي يقولونه وفيه ناس وايد يتقبلون هالألفاظ أهم شي الواحد يوضح الي يتقبله والي ما يتقبله عشان تكون الصورة واضحة.

المشكلة ان ((ابن ال.... واخواتها) تصير جزء من قاموس وايد ناس ولا يعنونها اذا قالوها حق احد وهذا شي موزين لأن مو كل الناس يتقبلون هالتعبيرات والمسبات.

الواحد كل ما نظف قاموسه قدر يكون على طبيعته من غير مشاكل مع كل الناس في كل مكان

alsaronah يقول...

والله ساعات نكون اوكي وساعات لا ...

صعب اتأقلم مع امي والله يعني اهي عصبية وانا عصبية فاهي تكلمني بصراخ وانا ما اتقبل طريقتها :(

أتمنى تكون علاقتي وياها زينة والله لأنها طيبة وبعرس اخوي اثبتت انها طيبة وانا عصبية على ملسونة ... ماكو فايدة فيني لووول

Alikingkw يقول...

ما جربتي تهدئينها قبل لا تناقشينها ؟ أو تقلبين الموضوع ضحك مثلا أو أي شيء من هذا القبيل

يعني أقصد قبل لا تعصبين فكري شوي بأي وسيلة تتحاشين فيها الغضب
ما جربتي ؟

alsaronah يقول...

ماعتقد جربت لأن سوالف الضحك اسولفها مع امي بروحنا مو جدام خواتي ... لأن ساعات خواتي يفهموني غلط وتكبر السالفة لووول عاد هني ما اسكت ..

بس على موضوع اقبلها ضحك سوالفي وايد جدية معاها فما يحتمل اقلبها ضحك وماعرف والله شلون :p