2008-11-21

رحلة حقلـــــية


يوم السبت الي فات كان لنا رحلة للخيران مع جامعة الكويت قسمي بالذات ، لمادة أحافير لا فقارية ، كانت الرحلةعجيبة بالبداية كنت متضايقة لأن اليوم الي وراه عندي امتحانين بس الحمدلله حليت الامتحانين عدل ولله الحمد ...



كانت الرحلة جدا خفيفة ورائعة ، درسنا المرتفع الي بالخيران وتسلقناه لووول وانا قاعدة هني بمكان في المرتفع وعلى قولة الدكتور يقول لهم (( الاسبوع الي فات سارة زارت المكان )) أنا بققت عيني والكل طالعني ، جان يكمل (( وكتبت اسمها ذكرى بعد )) لوووول كلنا ضحكنا انا حدي انصدمت اول شي وبعدين بطيتها ضحك .... مش كده يا دكتور :) والمكان هذا سألنا الدكتور اذا كان بحر ولا بر ... دورنا على أشياء تدل انه بحر ماكو .. لقينا آثار في المرتفع لنباتات قديمة تدل على انه ماكان في بحر حزتها و كان هالمرتفع فوق سطح البحر يعني جزء منه فقط وهو الجزء السفلي ...













عطانا الدكتور عدة مواقع علشان ندرسها ، واختار لي هالموقع حطيت مطرقتي وخذيت عينة من التربة علشان ادرسها :) وكتبت الملاحظات الي تضحك مثل ويهي .. المهم لمن قلنا الملاحظات الدكتور يا صوبي جان يقول لي يالي قولي ملاحظاتج .. كانت ملاحظاتي معقولة وكلها صح ماعدا وحدة .. .أول ماقلتها لف ويهه لووول قلت (( لاحظت بهالمنطقة مافيها حشرات )) ... لووول وانا صاجة والله لووول ... المهم كانت التربة هناك مليانة بالقواقع انواع واشكال وشكلهم حدهم عجيب والله ... على فكرة زمن الصحراء هناك 23 ألف سنة وقبلها كان كله بحر طبعا علشان جذي نشوف القواقع متروسة هناك :) ... وتختلف المناطق هناك منطقة نلقى مافيها الا عدد قليل من القواقع نعرف ان هذي المنطقة كانت شاطئ ...







طبعا هني كان يمي جزء من البحر حاطة صورة تحت تلقونها ... وقلت اصور البالطو من ورا وشوفوا شنو راسمه وشنو كاتبه عليه الدكتور وايد استانس عليه ... لازم احسس نفسي اني جيولوجية حتى النخاع على قولتهم لووول ...



هني ندرس المرتفع الي مليان بالمعلومات الجيولوجية الممتعة ... ودكتورنا الله يخليه لنا جدا جدا طريقته تشوق بالشرح ولمن يشرح لنا مكان وشنو كان وشلون صار اغمض عيوني واتخيل هالمكان .... وااااو والله شي حلو ... صج صج الجيولوجيا ابداع .. ودراستها روعة وممتعة وايد ... :)




هني لقينا كلب ( عزكم الله ) نافق .... وكلنا التفينا حوله ومسكين كان مربوط من ريله مادري كانوا معذبينه قبل ما يموت ولا جارينه ؟؟ الله أعلم بس الدكتور قال لنا شغلة حلوة ... تخيلوا قراء مدونتي .... سنة بعد سنة ... وبعد عمليات التجوية (( مطر ، رياح .. الخ )) راح يندفن هالكلب وبعد سنين طويلة جدا راح تتكون طبقات ترسبت على مر سنين طويلة ... اييون العلماء الي بعدنا بقرون لووول ويلقون هالكلب هني يحددون شنو نوع هالحيوان وبأي زمن كان يعيش ويعتبر شي قيم صراحة .... شغلة حلوة ... لقينا حمامة بعد بس ماصورتها للأسف ..

يعجبني اهتمام الناس بالبيئة هناك ... !!!!!! شلون ؟؟ بموضوع خاص وتشوفون الصور الابداعية ومحافظة الكويتيين على بيئتهم الصحراوية ... أحب الحضارة والله :)





هني الدكتور يشرح لنا المكان وهذا جزء من البحر وشفنا هناك القبقب الصغير ومسكته يدلدغ وايد وناسة ... دكتورنا الي لابس بوت طويل علشان يدش الماي لأن الأرض طينية حدها وصعب الحركة فيها ... كان اهتمامنا موطبيعي هناك ، كل واحد فينا يحاول يلقى شي يلاحظه علشان نشرحه مع الدكتور ... يوم رائع بمعنى الكلمة والله ..






وهذا هو المكان بدون وجود كائنات حية ظاهرة لووووول صورته قبل ما ننتشر في ارجائه وشوفوا شلون المنظر حلو حق واحد يطلع جزء من همومه للبحير ....


بصراحة كانت رحلة رائعة جدا وباجر هم عندي رحلة مشابهة لها .. بكمل تصوير النظافة الي هناك مع الأسف ..
حلوا الواحد يروح مكان ويحترمه ولا يقط زبالته هناك والله شي يفشل الاهمال هناك ....

شوفوا الجيولوجيا شلون تنتج ناس محافظة على البيئة :p .....

أتمنى تعجبكم الرحلة ماحطيت كل الصور لأن في منهم بحطهم بمجلتي ... :)

شكرا لكم


طموحة مملوحة







41 comments:

المباركية يقول...

اعتقد هذي يسمونها قطعة بنية

alsaronah يقول...

اي وحدة بالضبط؟؟

Fashionista يقول...

خوش رحلة يا سارونة

نبي بعد :)

alsaronah يقول...

أفا عليج ...

في بعد وايد بجعبتي لووول

Manal يقول...

الله يوفقج بالامتحان

شكلها رحلة حلوة

واهم شي
اكتشفتي وجود الحشرات
:)

موفقة

alsaronah يقول...

منال

مشكورة وايد حبيبتي الله يوفج الجميع .

اي والله الحشرات كانت مختفية :)

غير معرف يقول...

سـاره

أخــت الحـرف

وصـديقـة الكلـمة

أمـتعنـتنـي مدونتـك الراقيـة بـك ِ قبل ان ترقـا بـ كلمـاتك الـتي لو خلـطت بالـذهب لطغـت علـيه . . .

هكــذا أنـتي يـا أخـيتي سـاره بسيـطه وجميـله بعيـدهعن زخرفـت الالفـاظ المقيـت والتصـنع الواهـي وإسـتعراض العـضلات الثقافيـة . . .

بـل هكــذا سـاره راقيـه وجمـيله وبسـيطه. . .

أخـيتي تمتعت برجلـتكم وأسـتفدت معلومات جديده أضيـفها إلى خزيـنة المعلـومـات لدي . . .

قـيل ان سـاره كالـ (الكوارتز ) وأنـا أقـول سـاره كقطعـة السُـكر لا تضـر إلا المـريض


إسـتمري يا فنـاة فأنـتي مبدعه

أخـوك
ابودوسـه

Alikingkw يقول...

شكرا على الرحلة الممتعة يا سارة انا رحت معاكم وانا قاعد في الدوام.

صج المكان حلو ومع هالجو يصير شي عجيب ... الله يعطيه العافية دكتوركم على طريقة تدريسه الصحيحة.

الجيولوجيين لازم ما يقعدون في قاعة المحاضرة لاز على طول تراب وقواقع وصخر وماي ... في الطبيعة.

شكرا على المعلومات وشكرا على الموضوع فعلا ممتع.

عندي سؤالين
1- في اي منطقة بالضبط كانت الرحلة الخور العمي والا الخور المفتح ؟ أي صوب؟
2- في أي مجلة تكتبين ؟

وشكرا

Alikingkw يقول...

موفقة في الامتحانات :)

kuwaitawy يقول...

بصراحة


انا اللي استفدت من هالبوست


يعطيج الف عافيه وبالتوفيق انشاءلله

كويت الخير يقول...

يا كبييييييييييييييييييييييييرة :)

تحسسيني بايام " ابن بطوطة - و ماجلان " ..!!

الصراحة خوش رحلة .. جدا ممتعة :)

بس المشكلة ديرتنا ماتساعد على هالشغلات !!

وين هذا ؟

ادعوكم لزيارة مدونتكم q8el5air.blogspot.com

ولنا الفخر بهالزيارة :)

نشوفكم على خير ... ولا تحرمينا من هالزيارات و الرحلات ترى متحمسين لها :)

تحياتي طموحه مملوحه :)

JiBLa CiTY يقول...

ليش المكان اللي رايحينله أجلح ؟

alsaronah يقول...

أخوي بودوسة

بصراحة اسعدني مرورك بمعنى الكلمة ويشرفني انك علقت على احدى مواضيعي .. راح اكون بانتظار تعليقاتك دائما أخي العزيز ..

شكرا لك

alsaronah يقول...

Alikingkw


خور المفتح ... رحنا من طريج الملك فهد لحد وعبرنا طريج 290 هناك تلقاه ... اذا متشوق تروح باجر لنا رحلة ثانية تعال كلم دكتورنا حده يحب الناس المهتمة لووول ...
عاد والله هناك معالم مو طبيعية راح تحبها غير الجو النقي مو جو داخل الديرة كله تلوث ..

الساعة 7:30 الصبح راح نحرك ونروح هناك لحق علينا لووول

انا اكتب بمجلة يونيك :)

alsaronah يقول...

kuwaitawy


الله يعافيك اخوي كويتياوي ...

ان شاء الله دايم مستفيد :)

alsaronah يقول...

كويت الخير



شكرا لك على المرور اكيد بكون متابعة لمدونتك ..
وللأسف بالخيران التجار يحاولون يطمسون على المظاهر الجيولوجية هناك .. يعني كافي ماعندنا شي ندرسه وين نروح يعني ؟؟ للأسف الشديد :(

alsaronah يقول...

JiBLa CiTY


لا بالعكس اينن والهوا هناك مو طبيعي والله ... جرب روح هناك وتعرف الفرق لا ضوضاء ولا هم ولا نيلة لووول

صبا يقول...

الله ......رحله دراسيه موفقه يارب

وانشالله كلكم استفدتو منها

والكلب عزكم الله كسر خاطري :(

ورحلتج هذي راح تصير من احلي ذكرياتج الجامعيه :)))

وخوش صور يا اموره

:***

alsaronah يقول...

صبا

مشكورة يالغالية ... الجامعة والله ماقصرت معانا وفي رحلات ثانية غيرها جال الزور والمحجر و ... وو.. غير رحلة عمان هالصيف ان شاء الله ندرس شهر كامل بعمان .. لأن ماشاء الله الكويت مافيها جبال ولا هضاب فمانقدر ندرس الا بعمان .. اول كانوا يروحون الأردن بس ماشاء الله الأردن تحب الكويت وايد :p
والمغرب بعد بس والله جان زين هالسنة نروح المغرب :)

حياتي هدف مو عبث يقول...

وناااسة :))

البالطو شكله حلوو ما شاء الله

موفقة يااارب

سؤال يقول...

رحلة استكشافية رائعة ما شاء الله،،

عجبني اهتمامج ب(جمع الحشرات) جميل :)


ربي يوفقج لما يحب ويرضى

كاريكاتير يقول...

مرحبا

رحلة ممتعة للأمانة لما كنت ادرس بكلية العلوم وقبل لا أحول حالي حال مئات الطلبة من كلية الهموم كان ودي اكون طالب جيولوجيا عشان هالرحلات الممتعة مرة المغرب مرة عمان مرة الاردن فعلا ممتعة الجيولوجيا

والممتع اكثر هذه التلقائية اللي اشوفها بسطور اختنا المخرفة الطموحة سارة

تحياتي

3BeeDo ;) يقول...

عاد انا كرهت الجيولوجيا بسبه ماده بالثنويه لانه كنت بسحبها وطافوني باسبوع اخر شي طلعت فيها على الحفه من كثر ما انا مو ملحق
انتي بكليه العلوم شكلج صح :>
والله يوفقج يارب
واتوقع لمن تصير الدراسه بالصج يعني تطبيق تكون احلى عدل؟

Alikingkw يقول...

طافني الباااااااااااص لووول

شكرا على الدعوة
ما قدرت افتح الانترنت هاليومين وهالاسبوع عندي دورة جديدة أتمنى ان تكون مفيدة :) فالصبح راح يكون دوامي الجديد حتى انتهاء الدورة وبعد ذلك اعود الي نظام الخفافيش :)

دراستج ممتعة ودكتوركم أصلي

عموما ايام الجامعة روعة حاولي تتأخرين لا تتخرجين حسافه P:

alsaronah يقول...

حياتي هدف مو عبث

اي ناوية ارسم بعد اكمل عليه:p

الله يوفقنا كلنا يارب :) مشكورة يالغالية

alsaronah يقول...

سؤال


الحشرات من انجح المخلوقات على الأرض حلو ان نتعلم منها ، وكل ما حسيت بالفشل تذكرت الحشرات لأنها تعطيني أمل بالاستمرار

alsaronah يقول...

كاريكاتير

والله أخوي بدر أن كلش مادشيت الكلية علشان الجيولوجيا لكن الحمدلله تحت ضغط اهلي علشان ادش هالعلم فلهم الفضل بعد الله في حبي للجيولوجيا فعلا دراستها ممتعة جدا ..

alsaronah يقول...

3BeeDo


والله أنا أيام الثانوي ماكنت أحب هالمادة على الرغم من اني اييب فيها معدل رائع .. بس كنت اقول شنو ندرس صخر شنو ندرس معادن الحين اقول الجيولوجيا اهي الحياة الجيولوجيا داخلك وحولك مستحيل نستغنى عن هالعلم الرائع :) ..اي انا بكلية العلوم:)

alsaronah يقول...

Alikingkw

في رحلات راح تصير بعد على شهر 12 .. أتوقع لو تيي تكلم أحد الدكاترة هناك علشان بكل رحلة تحضر معاهم لأن مو بس مادتي في مواد ثانية يروحون رحلات في قسم الجيو.. كذلك البيو .. بس الجيولوجيا احسن :p لوووول حياك الله بأي وقت واذا وايد متحمس لهالمواضيع أقدر ادز لك ايميلات علشان اذا صار عندنا محاضرة لأحد الجمعيات الجيولوجيا او مهرجانات يقيمونها علشان تشرفنا بحضورك أخوي وتستفيد :)

Salah يقول...

موفقة ان شاء الله..

أحلى شي ان الواحد يكون حاب تخصصه ودراسته..

خوش تغطية..

alsaronah يقول...

Salah

عاد سبحان الله ماكنت أواطن الجيولوجيا بالثانوي ... شكرا لك اخوي صلاح :)

Fankooshy يقول...

صور حلوة وموضع دمة خفيف
من اللي ذبح الكلب لول
بالتوفيق :)

alsaronah يقول...

Fankooshy


علمي علمك بس من البحث العلمي السريع المتهور الي أملكه شكله الظاهران معذبينه ... ومشكوك أنهم اطفال لأن معلقين ريله بسلك كهربا وليس حبل لووول ... استغفر الله

شكرا لك اخوي على المرور

Alikingkw يقول...

تسلمين يا اخت سارة ما تقصرين ودي برحلة من هالرحلات بس المحاظرات عندي شك في قدرتي على فهم مواضيعها ... تدرين تخصصي ادبي وما لي شغل في العلوم
بس اذا كان الكلام يشبه رسالتج هذي راح تكون المحاضرات ممتعة :)

alsaronah يقول...

وأحلا بعد:)

صدقني ماحسيت بروعة الجيولوجيا الا من هالرحلات :)

Ducati يقول...

والله وناسه الرحلات الميدانيه

يعني طالعين كشته لووووووووووول

بس هم حلو تغيرون جو الدراسه بطريقه حلوه

alsaronah يقول...

Ducati


اي والله طريقة جدا رائعة:)

Alikingkw يقول...

انا الحين مو مستقر في الدوام
قاعد اخذ دورات تدريبية واحاول اطور نفسي قدر المستطاع بعدين احتمال كبير اروح قطاع المنوعات

والبيئة من أهم المواضيع الي افكر اسوي عنها تقارير أو برنامج ... لي انتقلت حق المنوعات راح تكون الرحلات الجيولوجية مفيدة لي شخصيا ولعملي ولبيئة الكويت انشاء الله

alsaronah يقول...

عاد البيئة ومواضيعها عشقي والله...

لا الرحلات موجودة علطول وقت كاتبي احنا حاضرين :)

Alikingkw يقول...

مشكورة الله يعطيج العافية

alsaronah يقول...

الله يعافيك أخوي الغالي