2008-11-29

سحقا للتفاهات ...



بينما كنت جالسة في الجامعة أقوم لفحص العينات التي أمامي كي أكمل فروضي الدراسية ، أتتني احدى زميلاتي :


..


زميلتي : سارة باجر بنروح كلنا بنات تيين معانا ؟؟


سارة : حلو .. وين رايحين ؟؟؟


زميلتي : الأفينيوز ..!!!


سارة : :(





في يوم آخر ، وقد خرجت أخواتي للتسوق في الأفينيوز ، اتصلت على احدى صديقاتي فقالت لي بأنها في الأفينيوز @@ .. بعدها بقليل تصلني رسالة من صديقة أخرى تقول فيه ...
(( أمبي سارة ماتصدقين أنا الحين بالافينيوز ، فلانة وفلانة وعلانة وفلنتانة وحتى شباب كليتنا كلهم هناك ))










تتسابق دول الخليج اليوم على التطور بينما نحن نبحث عن اسقاط القروض وحل لعقدة أعضاء المجلس ، وحكومتنا المتخبطة ... يقول فلان من الدولة الفلانية ...



(( لقد تطورت دولتنا واصبحت مهتمة بالعلوم والتكنولوجيا وتحاول ان تكون سباقة بكل شيء ، تتبنى مستقبلنا من الآن حتى نكون رجالا يٌعتمد عليهم بالمستقبل ، فما انجازاتكم بالكويت ؟؟ ))



سارة : الأفينيوز :D











لا تسأل الشعب الكويتي عن العلم والمعرفة ..





لا تسألهم عن التطور و الرضي بالبساطة ...



إسألهم عن الأفينيوز وآخر عروض التنزيلات ... بعد أن كانوا يتفاخرون بسوق شرق ... اتجهوا للمارينا .. وبعدها الأفينيوز وهم بانتظار مجمع تجاري آخر حتى يتفاخروا به ...















هل أصبح التطور في التسوق ؟؟



هل السوق هو أهم شيء عندنا بالكويت ؟؟؟



لماذا كلما أسأل شخص أين ذهبت .. يجيبني بالأفينيوز ... ؟؟؟





بصراحة مرة واحدة فقط ذهبت لهذا المجمع وكان في بدايته ولكني شعرت بالانزعاج ، فكل الكويتيين هناك ... وكأن المكان مهم جدا جدا ..

ليتهم يكونون بهذه الكثرة وقت خسوف القمر أم كسوف الشمس عند المجاهر يتطلعون بتشوق للمعرفة ..



ليتهم بهذه الكثرة عندما تكون هناك محاضرة علمية أو أدبية .. ليتهم بهذه الكثرة ليقفوا صفا واحدا ليقولوا لا لقتل الكويت ..

ليتهم بهذه الكثرة ليرفضوا الظلم وسحق الحرية في الكويت ...





إذا كان الأفينــــــــــــــــــيوز الهم الأكبر للكويتييين وكأنه مكانا مقدساً ...



فعلـــــــى الكويت ألـــــف ســــــلام ...































أحــــــــــــلا أغنــــية أُهديت لـــــي ..

........................................................................

خارج الموضوع :

أخيس موقف اليوم رحت الصالون ، واهي تسوي لي بديكير ريلي وانتو بكرامة ولا يطيح الظفر كله .. أنا من خرعتي طحت غشيانة لووول قعدوني جان تقول لي ماما انتي حامل ؟؟؟ @@

شهالسؤال ؟؟؟ محد يفقد الوعي الا الحمل يعني ؟؟

مافيني اطل على صبعي :( يكسر الخاطر والله

50 comments:

Fashionista يقول...

لوووول

سارونة مو صج طحتي غشيانة :P

دلوووعة هالبنية



حبي شوي شوي عالأوادم, ترى صج ماكو بالكويت غير الافنيوز, وين تبينهم يروحون؟ :)

جربي القعدة بكافيه بلان و لا اب نابكيت في هالأجواء المو صج و ادعيلي

alsaronah يقول...

والله اني مودلوعة بس احساس الانوثة ساعات يصيبني ... بعدين استوعب انه مولايق لووووول





لا المهم الهدوووووء :p

لووووول ماكو احلا من البحر ..:p

q8_el5air يقول...

اصلا يقوبج اذا واحد من الربع من زمان موشايفه أو تدق عليه ومايرد روح بالويك اند الافنيوز وراح تطيح عليه وتشوفه !!!

q8_el5air يقول...

اتوقع المشكلة بعدم فهم حقيقة الحياة والغاية منها .. والعيش بدون هدف او خطة مستقبلية .. سوى النوم + الاكل + الشراب !!!


والتربية على سفاسف الامور وادناها !!

alsaronah يقول...

عدل كلامك أخوي :)

حياتي هدف مو عبث يقول...

ما أحب الأفنيوز :)
أحس ملااااقة
واللي يبي يروح لازم يروح الصبح
لأنه أفضل وقت

وشلون انشال ظفرج :/
يعوور صح :(
سلامات سلامات :p

alsaronah يقول...

حياتي هدف مو عبث

والله هذي امي تروح له الصبح تقول لي ماكو زحمة والله تعالي .. بروحي ماحب السوقة افينيوز بعد؟؟

لا والله ماحسيت بعوار بس منظره دوخني لووووول ماتوقعت راح يصير فيني جذي :)

Enter-Q8 يقول...

ما ادري ليش ما في احد يبي يكسب فيني اجر و يوديني الافنيوز غصبا عني
تصدقين هالشي
مواطن كويتي و متزوج و ما طب الافنيوز
و ما بي اروح له
و المره لما تحن اقولها انا حالف اني ما اروح الافنيوز بسيارتي او من كيفي
انا حتى المنطقة الحرة ما رحت الا لما الربع ازعجوني لا علشان شي ضروري بعد

Manal يقول...

ما تشوفين شر

:(

alsaronah يقول...

Enter-Q8

نصيحة لا تروح >>> مرته بتزنطني لووول

والله صج لوعة جبد وقز وازعاج وزحمة على الفاضي ...

ياشين من تجمع على ولاشي لووول

alsaronah يقول...
أزال المؤلف هذا التعليق.
alsaronah يقول...

Manal

مايجيييج يالغاليه :)

كاريكاتير يقول...

مرحبا

اول مرة اختلف معاج اختي سارة

بالنسبة لحب الكويتيين للتسوق فهذا موروث قديم جدا يعود إلى بدايات نشأة الكويت وانتشار الأسواق مثل سوق المباركية وسوق السلاح وسوق الصفافير وسوق واجف(الحريم) وساحة الصفاة وغيرها من الأسواق المشهورة في الكويت.

نعم الزمن تغير وأسلوب التسوق والتسويق وشكل المنتج تغير لكن تبقى الرغبة للتسوق وإمضاء الوقت في الفرجة أمر اعتاد عليه الكويتيين أينما كانوا.

اما عن مجمع الافنيوز فبتصوري الشخصي أنك وضعتي حلا سهلا لمشكلة تراجع الاهتمام بلثقافة والعلم.

نستطيع استغلال هذه المجمعات وتنظيم ندوات وملتقيات نعرف فيها الجمهور بما يحصل في مؤسساتنا الثقافية والعلمية.

ليس المطوب من الجمهور التوجه لمركز الأبحاث مثلا للتعرف عل تطوير الطاقة الشمسية مثلا ولا التعني لدخول كلية العلوم لاكتشاف قسم البيولوجيا "تخصصي القديم" نستطيع ان ندهش من حولنا وهم في اماكنهم ونسوق لما نريد مثلما تسوق الشركات والمحلات التجارية لمنتجاتها.

نعم تلك المجمعات أصبحت المكان المفضل للعديد من الشباب ويعتبروا امضاء جولات"القز" هي الطريقة المثالية للتسلية وامضاء وقت الفراغ، وفي تصوري لا استطيع ان ألومهم فالأسر الكويتية لا تعتني كثيرا بالشاب.

مثال
أسرة كوتية توجهت للطماشة على مجوعة من الشباب يقومون بالرسم المباشر في احدى المجمعات، سألت احد الشباب المنظمين عن نشاط المجموعة واذا كان هناك دورات او مكان مخصص للأطفال..

كانت الاجابة ان هذا النشاط غير ربحي ومهمته تعريف المجتمع بموهبة الشباب، ولا يوجد مكان يجمعهم في لوقت الحالي.

قالت الأم لأحد المشاركين "هل يستطيع ابني أن يرسم معكم؟" بكل سرور رحب الشاب بانضمام الطفل واوصت الأم بالاعتناء فيه لحين عودتها..الخادمة كانت برفقة الطفل

بعض أولياء الامور يعتبرون الرسم وبقية الاهتمامات هي لإمضاء الوقت ليس أكثر..

الطفل لا يجد التشجيع من اهله على الاقل "صفقة" فينسحب ويلحق بأسرته التي ستوفر له الألعاب والمشتريات وتحوله من منتج إلى مستهلك ..

الكلام وايد لكن اعتقد بأن المجمعات بإمكاننا أن نحولها إلى مراكز تسويق للإبداع الشبابي..

ولا شرايكم!!

Blog 3amty يقول...

هل أصبح التطور في التسوق ؟؟







نعم لأننا شعب إستهلاكي 100% ومقياس الرقي لدينا بكم الأفناق الإستهلاكي ..


ما يشوف شر ضفرج :P

Bavaud يقول...

قوة إختي
في مجال حق بلوجر يديد! :o)

عاد أشوه إني لي هاليوم ما رحت مجمع الأفنيوز بسبب عملي خارج الكويت

بس أشوف له صور وايد، و مواضيع أكثر بين البلوجرز
للأسف صج... عندنا تقدمنا بالمجمعات
و أذكر لما رئيس الوزراء العراقي وقتها إياد علاوي زار الكويت، أول شي ودوه مارينا مول! شنو ماعندنا شي تفتخر فيه غير مارينا مول؟ كلش كلش بيت الشهداء، بيت الكويت للإعمال الوطنية، برج التحرير، اللي اهو عاد

ولا رئيس وزراء مودينه مارينا مول؟ لا وثاني يوم حاطين صورته قاعد بستاربكس يشرب قهوة! إنهبلنا إحنا؟

تحياتي لج

إذا تسمحين لي بشغله و أتمنى إني ما أسبب الإزعاج، بس شعار الكويت اللي حاطته بأول البلوج فوق عاليسار خلط... علم الكويت تحت الوانه معكوسة (الاخضر المفروض على اليمين) و العلم اللي عالمركب مو ملون
يكون أفضل لو تغيرنه بواحد صحيح و ترا موجودين على جوجل ايميج


شكرا
و آسف على الإزعاج

7amee elDyar يقول...

دام رحتي الافينوز

يا ريت تفيدنا اذا كان في نازله تنزيلات يديده وحلوه


...

خارج الموضوع ايضا :


انا البارحة سويت بدي كير حق ريلي

مسكت مقص الاظافر وطحت بريلي تقصقص


تعبني اصبع قصيت الاظفر


جان يظل حتى بسيطه من الاظفر صغير وايد لكن مبوزه وتتهزز

حاولت اقصها

مقص الاظافر عووود


جان اطلع سجينه مقص الاظافر

احفر بصبعي بطلع جذور الظفر

قعدت احفر

احفر

طلع دم


وللحين ما بين جذور الظفر


قلت شهالعبالة


المشكلة عوار

قلت مطلعك مطلعك


يا انا يا انت


جان اقز فك مقص الاظافر

حشرت حشر

بين الظفر والجلد



جان اقصصصصصص


واشلع

الظفر مع طرف الاصبع


تغيرت ملامح صبعي بالكامل


طبع دم يسيح


لما نظفته شوي


لقيت للحين الظفر الصغير موجود


جان اسحبه بمنقاش


والحين صبعي شحالته

مضمد

دروازة يقول...

كل حرف كتبتيه عن الشعب صح في صح

بس مو كلهم

وخير مثال على ذلك حضرتج :)

عثماني يقول...

انا مؤيد جدا لمقولة ان اغلبية الشعب الكويتي .. عايش في التفهان

و شلون يطيح الظفر كله ؟؟

SHAHAD يقول...

حبيبتي الكويت مافيها حتى تظور بالمجمعات !
الدول الباجي سبقتنا بالتطور بكل نواحي الحياة !
واحنا قاعدين بنفس مكانا ما حركنا ساكن !
والله مرة وحدة وقفتني بسوق شرق سألتني عن أماكن السياحة بالكويت
والله توهقت مادري شقول !
قلت لها مجمعاتنا كلها .. قالت مابي مجمعات ماعندكم شي ثاني ؟
والله ضحكت لأن صج ماعندنا غير المجمعات والمطاعم !
بالأخير تذكرت المركز العلمي وقلت لها لووول
والله فشلة !
ما اقول إلا حسافة عليج يا كويت

alsaronah يقول...

كاريكاتير

كلامك عدل ونفعت الندوات الدينية الي يقيمونها بالمجمعات .. والحضور دايم يكون مكثف .. بس تظل الكويت معروفة بالمجمعات .. يعني لا يقولون بعدين ليش عيالنا خربانين ..

alsaronah يقول...

Blog 3amty

مايجيك ياولد عمتي .. :)

alsaronah يقول...

Bavaud

هلا والله فيك أخوي

ان شاء الله راح أغير الصورة وشكرا على التنبيه شفت له كذا واحد مختلف فتوهقت منو الصح لوول

alsaronah يقول...

7amee elDyar


على فكرة ترا مالاعت جبدي :P

alsaronah يقول...

دروازة



تشكرات جزيلات ... :D

alsaronah يقول...

عثماني

والله انا من زمان تييني فترات ينشلع الظفر كله من نفسه وعادي ماحس بشي .. بس مادري ليش هالمرة دخت .. لووول

alsaronah يقول...

SHAHAD


لوووول كسرتي خاطري .. تدرين بمصر كنت اقعد مع عيال خالتي كل واحد يحر الثاني اقول لهم احنا عندنا ابراج الكويت انتو ماعندكم... عددوا لي اشياء شكثرها لوول انجعمت .. ولا ذابحينا بالشعب والمدينة الترفيهية .. ماكو غيرهم ؟ نهي .. لوول والله مشكلة .. المشكلة الكبرى ان المشاريع جاهزة والافكار حلوة بس محد يطبق .. ميتين على السوقة ..

Alikingkw يقول...

اخت سارة روحي الافينيوز في ظهر يوم من أيام الأسبوع ... تجنبي الليل وخصوصا نهاية الأسبوع ... راح تستمتعين .. وتقدرين تمارسين رياضة المشي (بالصيف) في الأفينيوس ... شيئ ممتع والله.

فهمت من رسالتك اختي انك متضايقة من تقهقر الاحساس بالمسؤولية المعرفية والبيئية والوطنية ولكن الوجوه التي ترينها في التجمعات الوطنية والتي ترينها معك في الجامعة والتي ترينها تكافح من أجل البيئة ترينها أيضا في الأفينيوز :)

مهمة زرع الاحساس بالمسؤولية تقبع على عاتق المؤسسات الرسمية للدوله.

لا أعتقد ان الأفينيوز مقدس ولكنه ممتع وطبيعة السياحة في الكويت هكذا (مطاعم مقاهي سينما مجمعات بر بحر)

أمثالج يا اخت سارة موجودين والله يكثر منهم والكويت بخير انشاء الله.


ما تشوفين شر وانشاء الله ينبت لج ظفر جديد بأسرع وقت ... الظفر مو مشكلة خل يروح بس الطموح لا يروح :)

THE BOSS يقول...

انا مو من هوات الفره و القز
بس وين يرحون ما فيه الا هل اماكن

شكلي بروح هناك

وسلامات وكل بدي كير و مني كير و انتي بخير

وعطني ولعه

alsaronah يقول...

Alikingkw

مادري المجمعات الي تطل على البحر احبها .. كلهم يروحون يتسوقون وانا اقعد اطالع البحر واتخيل واكلم نفسي وايد لوووول ...

مشكور وايد ان شاء الله يظل الطموح ... شكرا لك :)

alsaronah يقول...

THE BOSS

حد أمه استانست لمن شفت تعليقك على موضوعي .. :)

وانت بخير وبصحة وسلامة :)

شلونك ؟ لوول

فريج سعود يقول...

لا ولي بغينا نمدح الامارات تكلمنا عن مجمعاتهم هذا معيار التطور والتقدم عندنا

-------------

لا صج طحتي غشيانة ؟

صج صج ؟

swan.beach يقول...

فيه عقب الافنيو
الله يسلمج راح يفتحون 360 في جنوب السره بيحولون ان شاءالله عليه

تخاريف اتمنى ان تحقق عزيزتي
اتمنى ان تقول لي تلميذتي ابلة شنو راح ناخذ
مو ابلة يا حلاتج وشنو ماركه هدومج
والعلم عندها بس درجات حفظ ونسيان بعد ما تخلص امتحان
اتكلم عن الابتدائي والله يستر من الباجي

خووش اهداااء جد جد عيشتينا ايام P:

alsaronah يقول...

فريج سعود

اي صج صج صوووج صج :D

اي والله جن السوقة شي شي شي لووول ... والله حلات سوقة الاجانب على الشارع ويشترون الي يبونه وبعدين يطقون لهم فرة على الشارع يلعبون رياضة عندنا يخصلون يروحون فوق وزم كل مجمع الدور الثاني مطاعم لوووول

alsaronah يقول...

swan.beach

اي هالاغنية مادري ليش مع انها مو حزينة بس يهل الدمع من اسمعها :D

على طاري المدرسات لووول أختي أبلة ودايم تكشخ أقول لها ليش تكشخين تقول أول كنا نقول المدرسات ينقدون على بعض الحين الطالبات لووول لا وياويل الابلة اذا كررت لبسها لوووول يعدون جم مرة لبسته لوووول الله يعينج والله ابتلشتي حدج لوول

vancouver يقول...

آآآآوش

انشلع كله
?
شلووووووون
بس طحتي غشيانه
لو انا يمكن اطيح اللي بالصالون غشياننننين
من صراااخي

!
سلامات

---

تبين نصيحتي

روحي الافنيوز الصصصصصصبح مبجر وسط الاسبوع

شيء ثااااااني
بس مبجر
ومن ياذن الظهر انسحبي

مره وحده طبيته بالليل وندددددددمت

يا حلو الكويت والله

تبين الصج عاد

الكويتيين من الفضاوه يسووون جذيه
بالنسبه للعلم
ما عندنا دوله تشجع
وتهتم بالعلم
!!
شلون تبين الناس تهتم
انا ساعات ما الومهم
الوضع كله غلط عندنا

منال العنزي يقول...

مساؤكم ود

سارون ، صحيح أن هناك اللاهث خلف اللاشيء ولكن في نفس الوقت هناك من يبحث عن وقت يقضي فيه ولو القليل حتى يشعر أنه يتنفس ، أصبحت المجمعات هي المتنفس الوحيد ، طبعا بعد البحر ,,

وأنا أتفق مع الأخ بدر لأن وجود تجمعات فنية \ علمية \ اعلامية في المجمعات ووجود تلك الندوات وما شابه الطريق الأمثل لنتعرف على كل ما يجول في داخل ذلك الشخص الذي هدفه كان فقط الذهاب للمكان لا غير ..

وحصل معي موقف مشابه في الرسم الحر ، وكان النتيجة تفكير البعض لماذا لا نقوم بالشيء ذاته وبذلك اكتسبناهم بعيدا عن شعارات الأسواق ^^


تحياتي وعذرا للاطالة

صبا يقول...

اول شي سلامة صبعج
,,كسرتي خاطري حاسه فيج
موقف بايخ
:))

والافنيوز آآآخ ؟؟؟ رحت له 3 مرات وتلوع جبدي من المصافط لين اطلع

خرابيط وكلام فاضي

مشكلة الكويتيين هبه بكل شي

احب الاماكن الهاديه واذا بتسوق احب الصبح او الظهر

malak يقول...

لوووول

الناس الصراحه اكثر شي رايحين حق التمشي و القز مو التسوق

انا اروح بس مو وايد يعني يمكن ماطبيته الا ست او سبع مرات بس


وما تشوفين شر

يماي شلون كل ظفرج كله يعني كله ؟؟!!

Salah يقول...

الافينيوز خوش مكان الصراحة... الواحد يشوف ناس مو متوقع يشوفهم قبل يوم القيامة!

Alikingkw يقول...

العفو

روحي بيت لوذان امسوين معرض اعادة تدوير النفايات بطريقة فنية

لحقي اليوم اخر يوم انا ما دريت الا امس الليل :)

alsaronah يقول...

vancouver

والله أنا زين القى الي يشجعني اروح السوق ساعات اقول لهم خلاص بروح نخلص ونلبس .. افكر شوي جذي بعدين اقول لا خلاص روحوا انتوا انا بقعد .. وييع صج محد يستانس معاي بوقت الطلعات اتملل بسرعة الا البحر ...

يعطيج العافية

alsaronah يقول...

منال العنزي


لاتسألوني ليش استانس اذا شفت رد من منال ...

صاجة والله بس في ناس تتطنز علي :(

alsaronah يقول...

صبا

اي والله هبه على الفاضي :)

مشكورة قلبوو

alsaronah يقول...

malak

مايجييييج يالغالية ..

شوفي انا سوالف قز ماعندي :p تسكع اي ... بتقولين تسكع مثل قز ؟؟ أقول لج لا .. التسكع يعني احوم حوالين المكان المعني بحركة الارجل يعني رياضة وحق الطماشة بس عكس القز :p
فإذا كنتي طالعة طلعة بريئة قولي أنا رايحة أتسكع لوول

alsaronah يقول...

Salah

اي والله صح كلامك كل الناس نشوفهم هناك .. لا واستغفر الله لي راحوا بيت الله قالوا تعبنا من المشي وهناك حوسة حوسة حوسة موطبيعية .. اي صح حق السوق غير :D

alsaronah يقول...

Alikingkw

تدري اني توني رادة من الجامعة :( ؟؟

متى يمديني الله يهداك توني اشوف ردك :(

Alikingkw يقول...

لووول

اعذريني انا هم ما ادري عن المعرض وعطيتج خبر عنه في اسرع وقت ممكن

على العموم انا قايل لج مري على بيت لوذان لووول

في لجنة بيئيسة وعندهم انشطة مختلفة مري عليهم وانشاء الله تلقين الي يرضيج

alsaronah يقول...

ان شاء الله يمر عليهم وبعطيك خبر على مواضيع مشابهة لها اذا صارت بالجامعة او بمكان ثاني اوكي :)

مشكور وايدات

alsaronah يقول...

ان شاء الله يمر عليهم وبعطيك خبر على مواضيع مشابهة لها اذا صارت بالجامعة او بمكان ثاني اوكي :)

مشكور وايدات

Alikingkw يقول...

حياج الله ومشكورة :)