2008-11-08

تعال علمني الدين !!!










للأسف لمن أشارك بعدة منتديات ويدشون بعض الأخوة الأفاضل ويقولون طموحة انتي بس مواضيعج تستهزئين بالي يتكلمون بالدين .. أرد وأقول لهم وجهة نظري ويظلون على رايهم ودهم يقولون كافرة بس مايقدرون لأن كلامي عقلاني ولا يخالف الدين بشيء ..


أنا لمن أقول أنا مسلمة فإني أشهد بأن لا إله إلا الله وأن محمدا رسول الله ... أظل على صلاتي وصيامي وفروضي الثلاث الباقية ولله الحمد مجرد أن أنتقد شغلة صارت أو كلام ناس يحبون يخلون الدين تجارتهم خلاص صرت كافرة ... لازم رضا هالفئة قبل رضا الرب _ استغفر الله العلي العظيم _ يعني لمن اشوف ردودهم اقول ياربي ليش عندنا ناس تفكر بهالطريقة ؟؟؟ الشيخ الفلاني قال حط القنابل وروح فجر نفسك خلاص أنفذ أوامره أهو ويتناسى أوامر الرب ورسوله ...


يقول لا الجهاد حلال ، يكون حلال أخوي لمن اييون الكفار ويغزون بلاد المسلمين الي اهم الحين اسرائيل مو تروح العراق تقتل العراقيين الأبرياء من أطفال وشيوخ ونساء وتثير الفتنة بين الشيعة والسنة ... هذا الاسلام بنظرك ؟؟














كثير من الي يدشون مواقع الليبراليين والعلمانيين ويصكونهم هكرز وكلام قوي وبذيء قرأت منه الكثير ، ماعتقد الدين يرضى بهالشي .. يعني يخافون من اليهود ومايخافون من المسلمين الي مثلهم (( انت كافر ... انت ملحد ... انت ... انت ... )) ومنو انت علشان تتكلم ؟؟ هل الجنة والنار تحت أمرك ؟؟ ليش ما كل واحد يشوف نفسه قبل ما يطب بالبقية ؟؟؟ يقول لك نبي نخلي مجلس الامة كلهم رجال دين ومتدينيين ... معقولة هذول معصومين من الخطأ .. على فكرة بعضهم عندهم شركات خارج الدولة في بلاد غربية ... يعني اهم الي راح يخافون بأمور الدولة ؟؟ اوكي من حقهم يدشون المجلس بس مو من حقهم أنهم يرفضون العلمانيين والليبراليين... لازم يكون في أطراف وأحزاب .. اوكي الأحزاب موجودة سواء رضينا أم لا .. عاجبكم مو عاجبكم مشوا المواضيع وخلكم ايد وحدة علشان الكويت وأهلها ....


لوكان كل واحد يتكلم بالدين بالحكمة والموعظة الحسنة كما أمر الرسول ، كنا ما لقينا الي يتكلمون ويستهزئوون بالدين ...


ومثل الممثلين الي كل واحد يتفلسف بالدين ويتصل أحد الممثلين يستهزئ بالمحجبات ... وواحد يسب الدين .. محد تكلم بهالناس يتكلمون فينا احنا الي ننتقد (( تصرفات )) أشخاص ربت اللحية علشان الناس تحترمها فقط وتسمع لها .




أحد الليبرالييين الي أتمنى له كل الخيروالتوفيق دائما كلمته بهالموضوع مرة ، فدخلني بطريقة ذكية لبعض الشخصيات الاسلامية القديمة وبصراحة من كلامه الشيق حبيت الدين الاسلامي أكثر ، وحببني للقراءة اكثر عن هذه الشخصيات الي أود وبكل فخر أن أضع منهم في مدونتي مستقبلا بإذن الله ، في حين أدخل المنتديات لأجد من يتدخل بشخصي انتي وانتي والدين الاسلامي ... ويتفلسف على راسي وبعدين اسمع عنه يدز رسايل خاصة للبنات ويتحرش بفلانة وعلانة ... يا الله اذا هذول يتكلمون بالدين ... فالله يعين الدين على امثالهم ..




واييلك الي يقول لك المصحف في الموقع الفلاني لا تحملونه ترا كله اخطاء املائية ... استغفر الله ليش حاطينه زين شيلوه ؟؟ أو لا تنقلون المعلومات غلط للناس ياخذون إثم . ماكو في ناس تصدق كل شي بالانترنت يتكلم عن الدين .. مع العلم أن في معلومات خاطئة جدا عن الدين تعرض في الانترنت فأتمنى هاللي يدافعون عن الدين وحاطين الدين لهم بروحهم انهم يبتعدون عن هالمواقع ويبطلون لهم الكتب أفضل من القذف والسب عبر المنتديات .


واذا كانت الدول الغربية تدخل وتستهزئ بالدين الاسلامي فمحد حط الدين بالواجهة الا الي موجودين حوالينا أهم الي يابوا هالشي للدين .. كل ماصار شي قالوا الدين الاسلامي اهو السبب ... دين الارهاب ... دين القتل .. دين البدع .. لا والله ديننا يسير ورائع ولكن للأسف استغل هذا الدين لأغراض معينة .. حملت الدين كل المسؤولية .


ما استطاعوا ان يخلون عقل أكثرية المسلمين متخلفة الا لمن دشوا بأمور الدين وتوهوهم .. وخلوهم يؤمنون بمعتقدات كثيرة لها دخل بالدين الاسلامي واهي بعيدة كل البعد عن الدين ...




الحين القنوات الي تحط واحد مربي لحية وقايل أنا شيخ وجدامه قلاص ماي .... وكل كلامه الله ورسوله ، والحمدلله والشكر لله .. يخلون الناس تدق عليه يقرا مستقبلهم ولا يشوف فلانة راح تتزوج منو وعلانة متى تموت ..


شلون كل هالملايييين آمنوا بهالساحر؟؟؟ لأنه تسلح بقناع الدين ، شفتوا شلون يستغلون الدين .؟؟؟


















شغلات غريبة شفتهـــــــا ...







علم المملكة العربية السعودية مكتوب عليه (( لا إله إلا الله محمد رسول الله )) استغفر الله أشوفه بيد الكل . هذا شكل وحدة ماسكة علم عليه اسم الله جل تعالى .؟؟؟


ثاني شي اشوف وايد يكتبون أسماء الله بكل مكان ، والاوراق المطبوعة بالملاييين الي مكتوب عليها اسم الله ورسوله استغفر الله مقطوطة بكل مكان ولا أحد يشيلها ... ؟؟ ترا في شي اسمه الاقتصاد بالشيء وفي شي اسمه كمبيوتر كل الناس الحين تتطلع على المواضيع بالانترنت حرام اوراق تنقط عليها اسم الله ورسوله .. وآيات قرآنية ...




ويضحكوني بسالفة ( فله ) باربي متحجبة .. خبري يقولون الباربي حرام ، صارت حلال بالحجاب يعني ؟؟؟




مرة كنت حاضرة أحد الأعراس واستغربت من شغلة .. الحين العرس كله رقص وأغاني وازعاج وبالاخير المكان راح يتوسخ .. شفت شي غريب ... فوق مكان الكوشة على الطوفة آية قرآنية بخط كبير ... طالعت الآية القرآنية ... قلت استغفر الله يحطون آيات قرآنية بمكان كله أغاني ومحرمات على ما يقولون ؟؟؟ ليش يحطون الآيات القرآنية بمكان مثل هذا ؟؟ صرت أجيك بالصالات بكل عرس لقيت أغلب الصالات جذي استغفر الله ...






شغلة ثالثة مادري رابعة المهم ، كثرت الأقاويل عن المطاوعة الي يروحون السوق يغازلون استغفر الله أنا ما أشكك فيهم ولا بأخلاقهم ولكن علشان يشوفون البعض لمن يربي لحية مو لله ... والي يحدها مطوع بسيارته تصرخ تقول اي هالسوالف ما تيي الا من المطاوعة ...


وصلت لهالشي يعني ؟؟؟ أنا أدري أن مو كلهم جذي بس وايد من الي يقصرون الدشداشة ويربون اللحية علشان الناس تقول هالانسان ما يغلط وعلشان الي عيونهم عمت عن الحق يقولون (( حتى لو كان على خطأ فنحن معه )) ..
تطلع وحدة شبه عارية ( مفصخة ) وترقص وترقص وتغني وتهز .. وتقول أنا مسلمة وتنتقد المسلمين ، انا أقول حريتها واهي الي بتتحاسب احنا شكو فيها ، بس الي برا يضحكون علينا ، شوفوا يقولون اسلام واسلام وطاع اهم شلون ..!!!!!
لجنة التعريف بالاسلام خوش لجنة والله أول كله اسمع اخبارها الحين مادري بصراحة وايد اقرا عن ناس تستغل الدين بكل ذكاء بعيدا عن سب فلان وقذف علان .. لأن الدين أمانة ما تنحط بإيد أي واحد ...










بالنهاية أقول ... لو أحد يبي يوصل لغرض معين ، لا يحط الدين حجته .. والي يبي يلتزم خل يلتزم بنية صافية مو علشان الناس تحترمه وبس ..




والي يقول أنا مسلم خل يصفي النية مع الكل لأن الطاعة والعبادة لله وحدة مو للشيخ الفلاني ولا السيد الفلاني ...





















سبحان الله عجبتني صورة المسجد وحبيت اعرضه لكم ... ماشاء الله ودي اروح هناك واشوفه على الطبيعة ...







راح ابتعد عن المدونة فترة اسبوعين بسبب الامتحانات وعرس أخوي :D
ادعوا لي بالتوفيق

بــــــــــــــــــــــــــرب











مع تقديري وشكري






طموحة مملوحة

























28 comments:

Ducati يقول...

انا اشهد ان قلبج متروسه :)

عمتي كل من حط الدين درع يتكلم من وراه بالباطل هذا انسان ضعيف واقدر اسميه مريض نفسي بعد

وعلى البركه حق اخوج ولا تنسين تعطيني اسم الصاله خل اروح ابارك له :)

والله يوفقج بالإمتحانات

حياتي هدف مو عبث يقول...

أتفق مع أغلب ما كتبتي
لكن أحب أقولج شي أعرفه
مو كل واحد حط لحية يعني ملتزم
في منهم بس اقتداء بالرسول صلى الله عليه وسلم
كسنه كباقي السنن
وفي منهم جذي بس كل مره يغيير
وذكرتيني في موقف لصديقتي واهيا مو متحجبه فشافت وايد لاحقها وعنده لحية
واشوي طويله فقالت الحين راح ينصح الحجاب والحجاب .. اخر شي يبي يكلمها :/
قالت له استح على ويهك على اللحية ومطوع وتقول هالحجي
قالها شنو المطوع مو ريال!
تقولي انصدمت وخل يشيل لحيته احسن
عشان لا يعطي صورة لكل واحد عنده لحية انه سيء .. قلت نظرتج هذه تكفي ومالج شغل فيه
واما من ياخذ الدين ستر لأفعاله الشينه
صدقيني هذا ينافق نفسه قبل اي شخص ثاني والله ماراح يوفقة وراح ينكشف مع الايام


على البركة والله يوفقهم ..

وبالتوفيقفي الامتحانات :)

حياتي هدف مو عبث يقول...

بدايات

وايد = واحد

وبالتوفيقفي = بالتوفيق

حياتي هدف مو عبث يقول...

سووري

بدليات :/

Enter-Q8 يقول...

سالفة الدين عويصة
هناك من يريده عباءه
و هناك من يفهمه عادة و ليست عبادة


انزين امتحانات امنا بالله
عرس اخوك شكو اسبوعين
يا حبكم للسوالف يالحريم

Salah يقول...

طلعتي من اعداء الاسلام!

:)

THE BOSS يقول...

المشكلة كل واحد حط لحية و قصر الدشداشة صار فقيه وعالم
ولا تحوشه تبتلش

وصار يكفر و يدخل النار على كيفه
وعطني ولعه

ZooZ "3grbgr" يقول...

تدين سياسي يسيس الدين

على كيفهم طبعاً

موفقه يارب

والف مبروك انشاالله

الفال لج سويره

نفرح فيج

دلة يقول...

اهلا سارة
مبروكيييييييييييين انشالله:))))) وعساج موفقة دايم بالدراسة وغيره

الناس اليوم غالبيتها تاخذ القشور وتنبش فيها (والله الباربي حرام، والله الباربي حلال والله ماعرف ايش!!!) وتخلي الجوهر

الدين معاملة وصفاء النفس وتهذيبها والتزام وامانة واخلاق
ليه انصلحت النفس وتفكر وتمعن العقل بالروحانيات، نتيجته انسان مستقر منتج اهل للثقة
بالله عليج كم من افرادنا المسلمين لهم هذه الصفاة؟ عطبانين وحاسبين روحهم ملتزمين
يالللللله ترفع من مستوى هالامة!!!ـ

وشنو هالمسجد اللي بالصورة ماعرفته:))

kuwaitawy يقول...

بالتوفيق بالامتحانات يارب


ومبروك على عرس اخوج والله يوفقه


---------

صورة المسجد بأي دولة

alsaronah يقول...

Ducati

حد أمه متروسة :p

الله يبارك فيك اخوي العزيز ..

الله يوفج الجميع خذيت لي بريك ارد عليكم وارجع ادرش :D

alsaronah يقول...

حياتي هدف مو عبث


قاعدة اقرا ردج بصوت عالي جدام امي وخواتي ضحكوا على سالفة المطوع :)

alsaronah يقول...

Enter-Q8

انا مو حريم :( أنا بنت والله لا تساويني بالحريم بعد شسوي يعني كل شوي وموديني السوق شا جني انا العروس شهالمعمعة ؟؟

احس زمن الجاهلية الي راح يصير بيصير منهم والله من كثر ماكل واحد يحلل ويحرم على كيفه

alsaronah يقول...

Salah

نهي نهي قصدك المتأسلمين :)

بصراحة ابوي ملتزم وملتحي بس تفكيره وايد حلو ، وما يناشبني على فكري دامني جدامه اصلي واحترم ديني ولا اتعدى السب او الشك ... فهالشي وايد مريحني بس يبطون جبدي الي يشككون باسلام ناس ويقولون انت مرتد وانت وانت

alsaronah يقول...

THE BOSS


ترى يحرمون ولعتك الحين بعد :P

ساعات يحز بخاطري لمن اشوف ناس تسب الي يدعون الاسلام لهم بروحهم وبعدين اقول اهم الي يابواالحجي لنفسهم ...

alsaronah يقول...

ZooZ "3grbgr"

الله يسلمج يالغالية نورتي البوست :)

alsaronah يقول...

دلة

لا تسأليني ليش استانس اذا شفت رد لج في مواضيعي والله صح كلامج يالغالية .. المهم الواحد يحس برضا عن نفسه حتى لو كان خطأ اهو يتحمل الخطأ ماله داعي يعيش على كلام الناس الي تطب فيه ليل ونهار...

هذا المسجد ياني ايميل وايد حلو وهذا الكلام منسوخ من الايميل :



المسجد الكرستالي في ترينغانو



يقع هذا المسجد
في الحديقه التراثيه في منطقة ون مان ايلاند في ولاية ترينغانو

و20082006 تم بنائه بين عامي
و قد امر ببنائه سلطان ترينقانو ميزان زين العابدين
تم افتتاحه رسميا في 8 فبراير من عام 2008



يبيله نزوره صح :D

alsaronah يقول...

kuwaitawy


الله يسلمك أخوي كويتياوي

المسجد في ترينغانو

التعليق الي قبله حاطة معلومات عنه ..

غير معرف يقول...

المنتدى الليبرالي الكويتي

www.liberal-kuwait.com

الآن

بادر بتسجيل معرفك (النيك نيم) وعبر عن رأيك بكل حرية

وإلى حياة بلا ظلام

alsaronah يقول...

مسجلة بالمنتدى شكرا لك

Alikingkw يقول...

مبروك زواج اخوج ونتمنى له التوفيق في حياته الجديدة ونتمنى لك التوفيق في الامتحانات

درسنا الدين وتربينا عليه 25 سنه ليلحين لازم نسمع احد ينصحنا ؟!

كلامج صحيح والواحد لازم يبدأ بنفسة وينتهي منها ولا شأن له بالآخرين ... في مدارس وأسر تعلم وتربي الناس لي متى يربون ويهذبون فينا بس شيبنا لووول

ضـاد يقول...

الخلاف راح يستمر طول ما هناك اختلاف
و هالشي طبيعي

انا انصحج - من واقع علم خبره - ان ما تناقشين وايد لانج بتتعبين تفهمين و اهما ما راح يتعبون يأذونج

قناعاتج بعقلج وانت اعلم بعمرج... لا ياخذون وايد من وقتج

و الناس لها بالشكليات اكثر من المضامين




----

فيما عدا ذلك
بالمبارك ان شا الله و الله يجمعهم بطاعته

و موفقه كل خير
:)

alsaronah يقول...

Alikingkw


الله يبارك فيك الفال لعيالك يارب :p

alsaronah يقول...

ضـاد

حاولت الابتعاد عن امور الدين في مدونتي بس سوالف المنتديات غثتني فحبيت اكتب هالشي بالمدونة ..

شكرا لك أخي العزيز

ابو عبدالملك يقول...

طبعا الكلام يستفز
بس انا ببين لج ان انتي ماعندج سالفه
اولا تقولين ان تلاقي واحد يتكلم عن الدين واهو يكلم بنات

وانا لقيت بنت تتكلم عن الدين ويسوون وياها مقابلات ويمكن تطلع بالتلفزيون وللعلم انها اهي متبرجه والاسلام حرم التبرج وله نصوص صريحه بالقران وله احاديث صحيحه وفوق تروح وتنتقد المطاوعه وتقول انهم يتحرشون بالبنات والبنت اهي بنفسها متبرجه يعني تتمشى وتفتن الشباب
تعرفين شنو متبرجه ياطموحه !!
اعتقد انتي عرفتي منو البنت هذي
طموحه اللي يبي يتكلم بالدين قبل لايتكلم يطبقه على نفسه يعني ماتجيني انتي ليبراليه فكرج مو اسلامي متبرجه تنتقدين شخص ملتزم بالدين ليش انتقده شفتي سوه شي غلط ياخوج انتي قلتيها اهو مو معصوم عن الغلط
وثاني شي ترى القدوه الرسول مو المطاوعه

بس قبل لاتنتقدين المطاوعه انتقدي حبايبج اهل قوانين الخمور اهل الاختلاط
انتقدي صالح الملا انتقدي نسيبج الصقر
انتقدي علي الراشد لالا هذيل معصومين
اللي ابي اوصله ان لاطبقتي الدين على نفسج بعدها انتقدي اهل الدين
انا لو بحلف ان بحياتج ماقريتي كتب عن بن تيميه او الالباني رحمهم الله
او تفسير بن كثير او كتب عبدالله بن جبرين


انا ماارد على اللي كتبتيه انا انتقدج انتي لان الدين مو مطبق بحياتج بس مطبق الاركان الخمس
وزين سوو انهم طردوج من المنتدى

تبين تردين ردي على اللي كتبته تبين تقولين انت مو ولي علي ترى حافظها ف مايحتاج تردين اذا هذا ردج ولي وما ولي

واعذريني على الاسلوب


وجزاج الله خير

ابو عبدالملك يقول...

ب

طموحة مملوحة يقول...

ابوعبدالملك


شفيك حاط حيلك بهالبنت يبا لا تطالعها وغض البصر

ماراح اكمل وارد عليك لأنه طاف من قلب :p

ابو عبدالملك يقول...

شفتي شلون تستهزئين باحد شرائع الله
الله يجزاج خير ويهديني ويهديج
مو شرط تردين انا حبيت اوصل لج معلومه ان مايصير هيفاء وهبي تتكلم بالدين فهمتي !!