2008-12-02

لخبطة بتخاريفـــــي 3

كثرت الانتقادات على مدونتي بأن أكتب بالعربية الفصحى .. وبصراحة بعض المواضيع تحدني للكتابة بالعامية فأنا أشعر بالإثارة عند الكتابة بالعامية ..
على العموم سأحاول أن أكون جدّية وأكتب بالفصحى




إعادة التدوير مع سارة ..




تذكرت شيئا كنت أتميز به منذ صغري ألا وهو تجميع الأوراق ، وأتذكر عندما كنا نذهب الى ارض المعارض كنت أجمع أوراق الدعايات ، حتى الأوراق التي كانت توضع على السيارات كنت آخذها من السيارات ، لا تسألوني لماذا فقد كنت أجد الاستمتاع في التجميع ، واليوم أكره أن أرى ورقة واحدة على الأرض ، بصراحة أنزعج من الاعلانات التي توضع في أرواق فأكثر الناس يرمونها على الأرض .





هواية البحوث العلمية


لدي هواية رائعة أحبها كثيرا ألا وهي عمل البحوث العلمية ، فبعمل البحوث أتجه لقراءة مجموعة من الكتب وأستمتع عند وجود معلومة أول مرة اسمع بها لذا أضعها في البحث وأنتظر إطراء الدكتور لي لعثورني على هذه الملعومة ، واليوم ينتظرني بحثين مع 5 تقارير للجامعة ، أنا سعيدة وحزينة بنفس الوقت والسبب هو ( الوقت ) .. يال الأسف الشديد ..







تخصــــــــص مســــــاند _ مامصير الحشرات بعد 10 سنوات ؟؟






قررت اليوم بأن أحول تخصصي المساند من إدارة أعمال إلى بترول للايجابيات التالية : في وقت التوظيف تنقبل أسماء المتخصصين بالمجالات البترولية في شركة نفط الكويت قبل التخصصات الأخرى ، ثاني ميزة ، تضاف 150 دينار زيادة على المعاش الأصلي ، تخصص يفيد الكويت كثيرا ويساعدنا على التميز ، رابعا بامكاني متابعة طموحي عبر الشركات النفطية التي ترعانا ، وبإذن الله تعالى نكمل مسيرة الماجستير والدكتوراة كي تفتخر بنا الكويت، حادثت أخواتي اليوم عن الموضوع فقالت لي احداهن : وهل ستكون حياتك كلها وظيفة ؟؟ متى ستري نفسك وتتزوجين ؟؟ فقلت لها جملة واحدة جعلت وجه أخواتي عبوسات : تعيش الوظيفة ويسقط الزواج .. . هل أنا عالة على أسرتي المسكينة ؟؟ :D








عندما أمل في أي محاضرة أحضر ورقة وقلم وأسجل ما يمر في عقلي ، فرسمت فراشة وحادثت نفسي ، عندما كنت صغيرة كنت ألعب كثيرا في حديقة المنزل بينما والدي يسقي على النخيل والشجر ، فكنت أبحث كثيرا عن الحشرات وكنت أجد أنواعا كثيرة جدا من الحشرات ، ولكن اليوم لا اجد الحشرات موجودة في الحديقة لازلت أبحث عنهم ، ظننت أنهم قد انقرضوا فقط في حديقة منزلنا بحثت في حديقة الجامعة لم أجد .. ذهبت الى المشاتل مع صديقتي نبحث عن الحلزون ولاحظت اختفاء الحشرات هناك .. فما المشكلة ؟؟ وهل ستنقرض الحشرات فيما بعد ؟؟؟ شيء مؤسف حقا ..





قتـــــــــــل الأقـــــــــــــلام






نعم ، فقد قتل لأنه يرسم دفاعا عن فلسطين وهانحن نهان من أجل الكتابة لأجل الكويت ، فأقلامنا لا تسبب الفتنة ولا تزرع الحروب ولكنها تٌذكر بالسلبيات كي لا تكون دولتنا من الدول المتخلفة ولكن الأقلام التي تكتب للكويت مرفوضة وتُقبل الأقلام التي تمجد بنانسي عجرم وتحيي سنوات الضياع .











خيانة ... خائنة وخائـــــن

للأسف كثير من الفتيات أسمع عنهن ويمرون علي من هن يحاربن من اجل الحصول على رجل وبعد الزواج بفترة قصيرة تنزعج منه وتتمنى فراقه ، ومنهن من تتحدث مع كثيرين من الرجال وهي متزوجة ليس الحديث كاحترام بل كأصدقاء لا يزعجني ذلك ولكن اذا لم يوافق زوجك على أن تخونيه فهل تقبلين بخيانته لكِ ؟؟ مرت علي واحدة من البنات وهي متزوجة وتكلم كثيرين من الرجال ،فأتت لي في يوم تبكي قالت لي بأن زوجها يكلم فتيات كثيرات ، فضحكت وقلت لها ، اذا انت لم تحترميه وكلمتي رجال فكيف تتوقعين ان يكون موقفه ؟؟ أعلم بأنها غضبت مني ورفضت محادثتي بعد جملتي هذه ولكن يكفي بأن كنت صريحة معها ، من هي لا تتحمل مسؤولية الزواج ولا تتحمل قدسية الزواج فتظل في بيت ذويها أفضل بكثير .










....................................................





هل لك شبيه في هذا الزمان ؟؟


عينة أخرى للكوارتز ، فسبحان من خلق ..!!!










عيدكم مبارك وكل عام وأنتم بألف خير ...







































....................................................................................................................
خارج الموضوع :
اليوم قمت متصرقعة على صراخ أختي قومي قومي قومي .... وابتسمت ابتسامة كبيرة وقلت (( الحمدلله كان حلم )) لووول سلمكم الله كنت حلمانة أن أمي نادتني علشان اسلم على الحريم ، فوحدة من الحريم حطت بيدي ظرف قلت لها شنو هذا ؟؟ جان تقول هدية مني لج 250 دينار علشان وافقتي على الزواج من فلان ... جان أصرخ لا أنا ماقلت بتزوج واقط الظرف من ايدي وطلعت برا البيت بنحاش لوووول يعني كلش قاعدين بأمريكا ماراح يصيدوني لووووول .








كلمات صخـــــــر وربــــــــــــــــي


30 comments:

Fashionista يقول...

منو معقدج من الزواج؟

حياتي هدف مو عبث يقول...

أنا إذا أبي أوصل شي ما أعرف إلا بالفصحى .. بالعامية حق السوالف العادية :p

أحب الأوراق بس ما أيمعهم بس أحب أقرأ شنو فيهم .. أنا أدرس جم مادة إدارة
ملاقة ملاقة :/ والله يسخر لج الزين والخير ياارب :)) وعلى سالفة الزواج
اتصدقين أحس يكبرونه غصب أنا قلت حق أمي وأخواني موضوع الزواج ماراح أفكر فيه إلا لما أستمتع بحياتي الدراسية والوظيفية يعني على 27 او 28 ممكن أفكررر لأن عندي قناعة إن شهادتي ووظفيتي أهم من الريال والزواج :))
واللي تخون زوجها او اللي يخون زوجته
لازم يعرف إن كما تدين تدان :))
والحشرات بعد 10 سنوات أكيد بتصير في مرحلة الكهوولة :pP
هاهاها ترى مادري بس يمكن لهم موسم جذي مادري مابي اخووره :)))

:** ويا حلات الطموحات والله

alsaronah يقول...

Fashionista

الي شفته والله ... وعندي قناعة اني حاليا ما أصلح حق زواج وبيت ومسؤولية لوووول
أصلح حق دراسة وطموح بس :p
عدلت اللخبطة الي بالموضوع سوري

alsaronah يقول...

حياتي هدف مو عبث

ياحظ الأجانب تلقينها صكت الأربعين وتوها تتزوج وتلقى عريس لؤطة لووول
لا والله انا مثلج والله شكثر بنات كانوا ميتين على الزواج تحسفوا .. لووول الريال يبط الجبد يقعد بالبلعوم عندي ابوي يقعد ببلعومي ولاريلي لووول ...
وبعدين اهلنا مادري على شنو خايفين .. أمي تقول تزوجي وفكيني من المسؤولية وابوي يقول لي اذا ماتبين انا عندج قعدي ببيتج معززة مكرمة ..

لا صج والله حلات المرأة الي تنجز مو الي تتزوج وتخلف وتصرف على ريلها والبيت وعلى نفسها هذا اذا شافت نفسها .. أغلب المتزوجات تلقين عمرها 22 سنة وشكلها ام 30 سنة ... والله حرام ..
الزواج دمار لوووول

q8_el5air يقول...

باقة ورد :

بالعكس اهنيج على الفصحى .. اسلوبج بالفصحى وايد ممتع وشيق .. استمري وخلي العذال وره ظهرج :)

باقة عتب :

ليش كل هالمواضيع ببوست واحد .. والله اني انطر مقالاتج ومدوناتج .. واستانست لمن شف كاتبه .. بس ضاق خلقي لمن شفت كل هذولي !!

بس لاتخافين انتي مليئه بالمدونات !!


امنية :

الله يوفقج ويسعدج .. ويرزقج الي يستاهلج :)

ويسلمواااااااااااااا :)

alsaronah يقول...

q8_el5air

يعطيك الف عافية ... اخييي تصدق خليتني أتحسف والله :(

عاد أمانة ابي تعقيبك عليهم لووول

مشكور وايد ويعطيك العافية

Mok يقول...

كتبي بلغه العربية ومحد له شغل

يلا نفرح فيج وافقي :) حتى لو حلم

THE BOSS يقول...

كل بوست تخاريفج تزيد تألقاً

خرفي على راحتج و بكل اللغات

وليش نرتكم دائماً يا الزواج يا الدراسة شنو ما يصير الاثنين معاً
صدقيني يصير

وعطني ولعه

Ducati يقول...

والله ابدعتي يا طموحه

بس الكوارتز شكله فضيع

لووول وسالفة البنات الي يكلمون رياييل قوليلهم كما تدين تدان

elq87obi يقول...

ما شاء الله عليج بدعتي

و خرفتي على كيفج بس تخاريف حلوة أمتعتينا

كل عام و انتي بخير و عيدج مبارك

و يلا وافقي خلينا نفرح فيج :)

سلامي لج :)

q8_el5air يقول...

هواية التجميع حلوة .. والأحلى ان تسويلج ارشيف خاص بالهواية وتقسيم يسهل عليج ترتيبها .. عشان تورينهم احفادج باجر ان شاء الله :)


البحوث والتقارير استمتااااااااااااع .. انا استانس على هالشغلات .. لان بالنهاية انا الي مستفيد مو الدكتور ( شخباري دكتور :)

واذا تبين اي مساعدة .. ترى مايردج الا لسانج :)


اهم شي بالتخصص انج تحبينه وراغبه فيه .. برأيي مو مهم انه يكون فيه وظايف اكثر .. لان بالرغبة راح تتمتعين بالوظيفة وراح تبدعين اكثر من التخصص الي انتي خذيتيه لانه مرغوب !!

جميل هدفج انج تخدمين الكويت وترفعين راسها .. وانها تفتخر فيج ..وفعلا تعيش الوظيفة ويسقط الزواج .. تقدمي ونحن من ورائج :):):)

كثر الله من امثالج :)


بالنسبة للحشرات .. انا مو ميانه معاهم !!! .. اسف ما اواطنهم !!


يبتيها بالصميم .. اقلام المخلصة جفت بهالاوقات .. وزاد حبر الاقلام الي بس همها تشهر وتازم !!

الاقلام التافهه اهي الي ماشي سوقها هالايام .. واقلام الفكر طمست ووأدت !!


كما تدين تدان .. !! ولو زدت لزاد السقه !!

والصديقة الي تخسرج بسبب صراحتج ونصيحتج لها .. فهذه ماتستاهل انها تكون صديقة !!


على فكرة واايد حلوة صورة المدونة الي فوق :)

3BeeDo ;) يقول...

اهم شي الحلم :>
بس لي متى بتشتغلين يعني وماراح تتزوجين ؟
بس ترى الزواج شي حلو صج انه فييي ساعات يصير زعل وجذي بس شي طبيعي يعني
بس الشخصين اهم يحددون انه يكون زعل وله لا
وعلى رفيجتج الييي تكلم وايد رياييل ولمن درت انه ريلها يكلم هذي اهيه غلطانه لو انه ماتكلم ومداريته عدل جان حتى لو طالع بروحه مايطالع لا يمين ولا يسار لانه راح يقول عندي وحده قايمه فيني ليش اطالع غيرها
وعلى جمع الاوراق انا بس اشوف اعلان اتنرفز يبطون الجبد انزين واحد ميخالف بس ساعات تشوفين 5 6 اوراق نفس الاعلان شنو اليي يوزع يبي يخلص بسرعه وله شسالفه

Alikingkw يقول...

لا أجد عيب في العامية
اهم شي المضمون

كتبي الموضوع في العامية عشان ما تفقدين الاثارة والخيال بعدين عيدي كتابته في الفصحى مع اختيار التعبيرات المشابه... أو امزجي بين اللهجتين

اي صح اوراق الاعلانات مزعجة..انا عادة اخذها واقطها داخل سيارتي

موفقة في بحوثج انشاء الله

قرار التخصص سليم وكلامج مع زميلاتج سليم ايضا ... اعملي ما ترغبين بعمله وحققي ما تودين تحقيقه والأمور الشخصية تأتي لوحدها عاجلا ام اجلا وإن لم تأتي فليس ذلك نهاية للعالم.

الله يرحم الحشرات برحمته ... وعسى ما نواجه نفس المصير في المستقبل القريب

وبما ان المدونات موجودة فلا خوف على الأقلام من القتل :)

عينة الكوارتز خارقة!!



عفوا ما فهمت موضوع الخيانة ... ما المشكلة من ان فلان يكلم بنات ؟ أو فلانه تكلم شباب؟ يمكن مسطلح ((يكلم) أو (تكلم) انا مو فاهمة .. له معاني اخرى تتعدى الكلام؟ لأن كل الشباب يكلمون بنات وكل البنات يكلمون شباب بغض النظر عن كونهم متزوجين او غزب .

والرجل المتزوج لا يجب أن يكون لديه أصدقاء من الجنس الآخر ؟ والمرأة لا يحق لها أن تكون صديقة لرجل ؟

الموضوع معقد بالنسبة لي فأرجو التوضيح يا أخت سارة :)

فيما يخص الحلم ... جنه تسوى الميتين وخمسين الف لووووول P:


عيدج مبارك وكل عام وانتي بخير وصحة وسلامة

Q8_Q8 يقول...

بوستاتج متعوب عليها يعني
...............
ما يدري الواحد وين يعلق ستعش موضوع في بوست واحد بس شي حلو الواحد يعيش الجو مع البوست
...............
نوعيتج قرقه موديل مو صـــج :)
قرقه حتى الموت
...............
بس حلوه القرقه اذا كانت بثقافه عاليه ، ومفيده
..............
انا مؤد للمقوله :
تعيش الوظيفة ويسقط الزواج
تعيش تعيش
فلتكن صرخه مدويه بوجه كل ام وخاله وأخت وعمه
.............

alsaronah يقول...

Mok


لوووول مو كل زواج يعني فرح :p

alsaronah يقول...

THE BOSS

لأن وخاصة بدول الخليج الزوج يقتل طموح المرأة ولا يرضى أن زوجته تتفوق عليه :)

alsaronah يقول...

Ducati

اي الكوارتز له مجموعة ألوان بحاول بكل موضوع احط صورة له :)

alsaronah يقول...

elq87obi

وانت بخير وبصحة وسلامة .. تزوج انت بالأول وبعدين اتزوج بعدك :p

alsaronah يقول...

elq87obi

وانت بخير وبصحة وسلامة .. تزوج انت بالأول وبعدين اتزوج بعدك :p

alsaronah يقول...

q8_el5air

سويت لي ارشيفين .. واحد منهم ضاع وبقول قصته ببوست بروحه لأن تعبي راح هدر :(

اخيييييي والله عاد عندي بحوث وتقارير شكثرهم تساعدني ؟؟؟ والله صج محتاجة مساعدة >>>> الحين ينحاش لوول

والصورة عجيبة صح .. أفا عليك أنا حركات :p

alsaronah يقول...

3BeeDo ;)

أهم شي أرسم مستقبلي بعدين اتزوج .. علشان ما اييني واحد مليق يهدم سنين طموحي ..

وعلى سالفة الاعلانات مايغثوني الا الي يحطون كروت اعلانات على بيبان البيوت .. ياربي والله غثة انا ساعات انقهر الناس بالفريج يطالعوني شهالهبلة .. .!!! أرد البيت واشوف الكروت والاوراق اسحبها بعصبية واقطها وادوس عليها لوول وبعدين آخذهم واقطهم بالزبالة لووول

alsaronah يقول...

Alikingkw

أخي العزيز أنا وحدة من الناس ماعندي مانع من الزمالة دامت في إطار الاحترام ...

عندنا مجتمع لايفقه لأمور الزمالة والصداقة .. كلمة عيب خلت كل الناس تسوي بلاوي بالخشاشي وبعيد عن الأنظار .. لو هالانسانة كانت تسوي شي صح تقول حق ريلها عندي صديق .. هذا اذا ما عطاها طراق لووول .. او اهو يقول لها ان والله عندي صديقة واكلمها بانصاف الليالي .. مهما كان لابد من احترام الطرفين لبعضهم ..
يليت بس صداقة الي قاعد تصير ، لا مواعد وطلعات و .. و .. الخ الله يستر عليهم ..

يقول لك واحد خطب وحدة وشافها بيوم مع صديقها الساعة 12 بالليل معاه بالسيارة طلعها من السيارة جان تقول له هذا صديقي القديم كنت ياية أودعه ... اي الساعة 12 تودعه .. وداعا :D

مجتمعنا مو مال هالسوالف والله ...
التعامل لمن يكون باحترام وبحسن نية هني مانقدر نقول شي بس صداقة ومواعد وسوالف تالي الليل واهم متزوجين ... وايد قوية والله

alsaronah يقول...

Q8_Q8

لووووول نوعيتك ؟؟

لا صج قرقة بس مفيدة لوول ..

الـبـيـرق يقول...

تـتـحـجـيـن بـالـعـامـيـة أحـسـن مـن الـحـجـي الـمـكـسـر نـفـس بـعـض الـنـاس :d

أخـيـيـيـه تـواضـع عـلـى عـبـدالله الـسـالـم :)

q8_el5air يقول...

افه والله !!

انا " كويت الخير .. فتى الجبل والبراري والبحار " ...

و " كويت الخير " .. ان قال شي .. قول وفعل !!

والله من صجي .. بس قولي الي تبينها ومايردج الا لسانج :)

alsaronah يقول...

البيرق

منو قصدك بعض الناس ؟؟ لا يكون الي كاتب مادري كاتبة بالجات عندي .. اووف في ناس عليهم لسان زفر .. ليش حاقدين علي ؟؟ أنا مسالمة :p

alsaronah يقول...

q8_el5air

بعد خشمي والله :)

خلاص بس بقول لك عن شنو المواضيع الي أبيها .. أو موضوع >>>> صج طماعة لووول

alsaronah يقول...

كويت الخير مدونتك موراضية تطلع عندي صار لها جم يوم وينها؟

q8_el5air يقول...

خلاص ابشري بسعدج :)

بس قولي الموضوع وماهي الا ايام وليالي والبحث اييلج على طبق من ذهب .. ومرصع بالزبرجد :)

ما ادري ياوخيتي !!

مافيها شي .. شحلاتها بالتمام والكمال !!

alsaronah يقول...

اوكي وين اقول لك الموضوع الي ابيه هني ؟؟

اوكي ابي موضوع عن ويليام سميث الي مطلع ال principle of super position
فالمطلوب ان بعد المقدمة نطلع شنو استخدم علشان يطلع هالنظرية .. ؟