2008-06-11

يما منكم يالحريم .... تخرعون




















بقول لكم شي عن (( بعض )) الحريم :)
قمنا على الحريم الحين ...
الحريم الحين طايحين بسالفة التضبط .... وحدة مو متزوجة آمنا بالله ... من متى
صارت المتزوجة تضبط لها ريال وبعد ماخلاص تطلب الطلاق من ريلها ؟؟ أي شي والله العظيم .... وين الي ينادون بالعادات والتقاليد تعالوا شوفوا الحريم :) !!!!



تقعد تفرخ من كل واحد تييب خمسة ستة وتتزوج ثاني .. ويقولون شفيج على الزواج ؟؟ من المصايب الي قاعدة أشوفها لا حول ولا قوة الا بالله ...

والله على بالي سالفة وحدة بس صارت ... لا الحريم قاموا يضبطون يحليلهم وأمهاتهم يشجعونهم ... مايحمدون ربهم على الي عندهم يبون اكثر بعد ...


زين شذنب هاليهال الفقارة .؟؟؟؟ الي كل واحد يدور على الأم والأب ... تلقون الأب راح بسبيله وقطهم عليها والأم تقول ((بشوف نفسي))

ماتبط جبدي الا هالكلمة .. شنو الريال اهو الي بوريج نفسج ؟؟؟
شهالخبال ؟؟؟ صج ناقصات عقل ودين .... قاعدتلي ماكينة تفريخ بس تحجمل كل سنة وتولد جنها قطو ... وتدور لها على فريسة ثانية ؟؟ الزواج صار موضة الحين .... والي يبط جبدي لمن نلقا هالحريم يتفلسفون على راسي عيب وماعندي هالحجي والكلام ....
خل يعلمون نفسهم أول قبل ما ايووون يتفلسفون على راسي.... ماحب اكتب عنهم وايد أخاف أسب ولا أغلط ....
حتى الي يكون عندها ظروف ... المفروض ماتقط عيالها ... محد قال لها تيييب هالدرازن .. وعلى قولة المثل (( طبخ طبختيه يالرفلة اكليه ))

2008-06-08

شكرا للوسط الديمقراطي









لماذا الوسط الديمقراطي؟؟؟



مستحيل البلوق هذا كله وماحط موضوع حلو عن الوسط الديمقراطي وقصتي مع قائمة الوسط الديمقراطي .
لمن دشيت جامعة الكويت وكنت حاطة ببالي ان جامعة الكويت جداجدا جدا راقية نفس الجامعات الي برا نقرا عنهم ... وأن كل مكان عندهم اووووف راقي وقوانين وماكو حتى قرطاسة طايحة بالأرض من كثر ما اهي مكان راقي وفعلا مكان دراسة نفس الي برا ... المهم مابي أكمل لأني تعبت من كثر ماشوف وأتضايق ، المهم وصراحة أنا ياية من المدرسة حدي نشيطة وقلت راح ألقى المجال الي أقدر فيه أتكلم وأتناقش مثل ماكنت أسوي بأيام المدرسة ...

المهم ، أن من دشيت صالة القبول والتسجيل شفت وحدة من البنات طيبة يحليلها وتنصح وانتي شنو تبين تدرسين ومن هالحجي وراح ندق عليج ... اووووف أنا استانست حدي شهالخدمات الي قاعدة اشوفها ماشاء الله مايبوننا نتعب يحليلهم وكل يوم يدقون عندنا ندوة عندنا حفلة عندنا جمعة ...ويسألون شخبارج سارة ، أنا حدي مستانسة أقول لأمي شفتي يما يسألون عني وعلى بالي ان هالي يسألون عني جهات من الجامعة نفسها مادري أنهم طلبة لين شفت وحدة من رفيجاتي وياهم ، المهم كانت تقول لي أختي ترا نفاق مالج شغل فيهم تبين تصوتين صوتي حق القائمة الي تشتغل فيها هالبنت ...

دشيت أول يوم بالجامعة ... وشفت هالمقرات السنعة ... والبنات الي يونسون يحليلهم .. وقعدت ألملم بالأوراق الي جدامي خو أنا ماخلي شي ما أقراه ... وبيان من القائمة الفلانية والقائمة الفلانية فيها وفيها ...قائميتن ماشاء الله مو هادين بعض ضغاط ...

أنا اقرا وأقول شدعوة ... والله على بالي أن كل طلبة الجامعة على قلب واحد ... (( حدي مثالية)) ...
وبعدين بوقت التصويت للاتحاد صوت حق القائمة الي تشتغل فيها هالبنت الي ساعدتني ومع اني كنت ابي اتعرف على قائمتها حتى مبادئها ماعرفها ولا وحدة تكلمت عن القائمة اللهم ... يتكلمون عن الدين واستغفر الله والبقية الحمدلله والشكر والله يستر علينا وعليهم .... قلت خل نشوف القائمة الثانية ..

يتني وحدة من البنات من القائمة الثانية تقول لي سارة والله احنا نشتغل ونتعب وشوفي ونسوي ونسوي ... وسألتها أنا عدة أسئلة وجاوبتني عليها يحليلها ماقصرت والله ... قلت ابشري بالخير بصوت لكم بس اذا خلصنا أبي تعرفيني على قائمتكم أكثر ... قالت لي من عيوني الثنتين .. بانتخابات الجمعية صوت حق هالقائمة ..


المهم بعد الانتخابات يتني بنت من الوسط الديمقراطي وقالت لي انتي ودج تتعرفين على القوائم في جامعة الكويت ؟؟ قلت لها اي والله محد قال لي شي عن قائمته .... قالت اوكي الحين عندنا اجتماع وسط شرايج تيين وتتعرفين على القائمة ؟؟؟ قلت لها اوكي ... انا انسانة ودي أتعلم كل شي .. وطبعا قبل مادش كنت حاطة ببالي كل الحجي الي قريته بأوراق القوائم الثانية عن القوائم الطلابية وغيرها ...

كان الاجتماع جدا جدا راقي حسيت جني قاعدة باجتماع شركة .... الكل يحترم الآخر وكل رأي نبديه يحطونه باعتبارهم ... عرفوني على القائمة ومتى بدت ... ولا يابوا سيرة صوتي لنا أو شي قالوا لي تعرفي على القائمة عدل وعطينا كل أسئلتج ... تعرفت على مبادئهم الي لقيتها قريبة جدا جدا جدا من فكري .. وصرت أمسك فايلهم كانوا يشوفوني بنات القوائم الثانية يقولون لي سارة انتي مينونة ؟؟؟؟ تدرين ان الوسط فيه وفيه وفيه وفيه ؟؟
كنت اضحك بويههم وقلبي يشب من داخل ... اوح البيت ابجي شوي . اليوم الي وراه اقعد مع بنات الوسط انتو جذي وجذي وجذي .... والقى منهم الرد المقنع الي يبرد حرتي ، وكل يوم على هالحال لحد ماتعلمت ... الي يبي يناقشني خل يناقشني بقائمته مايطب بالوسط بدون (( دليل )) وماحب سالفة ان كل الناس تتحجى ... كلمة (( كل )) ماتعبر عن هالشخص .. او ماقدر أنا أيي أتكلم بلسان (( كل الناس )) ، لمن اندمجت مع الوسط لقيت أن أغلب الشخصيات المعروفة سواء كانت سياسية أو اقتصادية أو غيره وغيره وهالناس أثرت بشكل كبير على الكويت ، لقيت انهم في يوم كانوا بقائمة الوسط الديمقراطي .

أنا مادشيت الجامعة علشان أتعلم الدين ، الحمدلله 12 سنة بمدارس الحكومة مادة الدين أساسية وتعلمنا الكثير احنا كبار عندنا أهل بالبيت يعلمونا ، عندنا بديرتنا ندوات يعلمونا ... مادش الجامعة علشان يقولون لنا حرام وحلال ..
وعلى قولة أخونا ناصر دشتي ، أنت ماتيي تنشر الدين الاسلامي في دولة دينها هو الدين الاسلامي .. وأول كنت أقول شلون يستغلون الدين ....؟؟؟ وبدون ما ألقى الجواب من الي قاعدة أشوفه بمجلس الأمة وبانتخابات الجامعة فعلا الدين قاعديم يستغلونه بصورة مو طبيعية .
نيي حق سالفة القبلية والطائفية ، على الطائفية وايد ناس تربوا ان مذهبنا اهو الصح والمذهب الثاني غلط .. وتعصب لا يحب الثاني ... شخلينا حق الي غير مسلمين .؟؟ اذا شاف ان المسلمين من داخلهم نزاعات طائفية ؟؟
القبلية ... والي أشوفها وايد استغفر الله منتشرة .. أنا ولد عمك صوت لي .. وولد العم مايدري ان هالانسان زين ولا لأ ... أصلا حتى لو درا انه مو خوش واحد المهم من قبيلته يالله اصوت له ... واقرا بينات تضحك والله بالجامعة .. بيان من أناء قبيلة كذا أن راح نصوت للقائمة كذا ... يتكلمون باسم ابناء قبيلتهم على كيفهم ... وبعدين تيي هالقوائم وتقول احنا مو طائفيين ولا قبيليين ...


اشتفدت الكثير من ثائمة الوسط الديمقراطي ، وأدري انها ماراح تفوز حتى بعد 20 سنة .. بس يكفي أني تعلمت منها شلون أكون مواطنة أخدم بلدي صح ... شلون أن أأثر على جامعة الكويت حتى بدون ما أمسك منصب .. شلون أن لي كلمتي وعلى الكثير أن يحترمها ... شلون أستمتع بحرية الرأي المكفولة واحترام آراء الآخرين .. اشلون أثبت وجودي كامرأة لها كيانها في المجتمع الكويتي ، شلون أمارس حقي الانتحابي والسياسي في جامعة الكويت . في الوسط الديمقراطي تعلمت من ثقافياتها الكثير ... تعلمت النقاش كنت أول أبتعد كثيرا عن النقاشات أما الحين ما أتكلم ألا بالنقاش والأهم أن يكون الدليل بيدي علشان اتسلح فيه ..

تعلمت من قائمة الوسط الديمقراطي ، أن كل التوجهات والطوائف والقبائل لازم تكون ايد وحدة مو علشان فلان ولا علان.... علشان خاطر الكويت ، لأن مصلحة الكويت فوق مصلحة الجميع .
تعلمت شلون أرد الاساءة بالاحسان وهالشي اهو الي ينادي فيه الدين الاسلامي قبل ما ينادي فيه الوسط الديمقراطي لمن ايي واحد يقول يالكفرة ، يالي فيك وفيك .. وتلقى هالشخص من قائمة تتكلم بالدين .. حتى أيام الرسل ماكانوا يغلطون على اليهودي أو الكافر ...

أنا أدري اني وايد قصرت بحق قائمتي في الفترة الأخيرة .. وأدري أن الوسط تغير جدا وماراح يرد مث وسط 74 لو شنو ... بس يكفي اني أتلقى رسالة الوسط وألقيها للغير ... علشان نتعلم شلون نكون بجامعة راقية صح ..

لأني ماشوف شي صح بجامعة الكويت للأسف ... ولا اتحاد قوي مثل اتحادات الدول الأخرى ... لا من مرافق سنعة ولا من قرارات جيدة ... ولا من عدالة .... حتى القبول صار فيها واسطة .. حتى النجاح صار فيها واسطة.
القائمة الفلانية اعتدت على الصحفي الفلاني لأنه تكلم عن تقصير في جامعة الكويت ... مايبون يبينون للناس شلون اهم ظلموا جامعة الكويت فترة بيصكون فيها ال30 سنة السنة الياية .. ولا شفنا منهم شي يبيض الويه ..
طق وخناق ونجرة .... ماشوف فيها أحد يتكلم ويبين لنا انه فعلا طالب جامعة .
أهم مستغلين نقطة ضعف فينا وفي الجميع الي اهو الدين ... فعلا منو يقدر يرد على الدين ؟؟ محد فخذوا هالشي سلاح يسكتونا فيه ... بس مايصير جذي والله .. لي متى بنعاني من جامعة الكويت ؟؟؟
القضايا الي قاعد يناقشها الوسط الديمقراطي قضايا تهم مصلحة الجميع ... بس منو يرد عليه ؟؟ اذا القوائم الأخرى ماترد بالعقل ... يردون يأنت فيك وفيك وفيك ... يالي فيك ويالي فيك ...
مايدرون أن وايد ناس منهم قاعد تتلقى تعليمها من الوسط الديمقراطي ... لأن الوسط بروحه مدرسة .. شفت فيه السلفي والعلماني والليبرالي والمستقل والشيعي والسني والبدوي والحضري ... كلهم خلوا فكرهم على صوب وصاروا على قلب واحد علشان الكويت ... مابي أحد يتكلم بشخصي أو فكري ... الي يبي يناقش يناقش بالعقل
لأن الدين عمرنا ماحطيناه أداة صيد نصيد فيه ضحايا ... الدين أكبر من جذي فحرام نقذف ونذم باسم الدين .

مستحيل ألقى تعليم قوي مثل تعليم الوسط الديمقراطي الي نفعنا وراح ينفعني لي مابعد التخرج ...
مستحيل أنسى جميل قائمة الوسط الديمقراطي الي علمتني شلون أفكر وأقرر ، مو أخدم قرارات ناس أعلى مني بدون ما أكون مقتنعة وراضية ..

شكرا يا أم القوائم ... شكرا يا أحلا قائمة .. شكرا للوسط الديمقراطي ..

طموحة مملوحة

2008-06-04

ليش أحبج يا حشرة ؟؟؟









لمن أسمع واحد يقول للثاني ياحشرة ... ويزعل الثاني أقول شدعوة لهالدرجة الحشرة صارت مسبة ؟؟؟ الحشرة الي يستهزءون فيها مخلوق عجيب ... الله ماخلق شي بدون هدف ، تعملنا من الحشرة (( الطموح)) والاصرار وعدم قبول الهزيمة .

راح أذكر كل شي بعدين المهم بدايتي مع الحشرات الحلوة ، لمن كنت صغيرونة وكنت ألعب مع أختي مع عيال الجيران بحديقتنا ، قال لنا ولد جيراننا راح نلعب مسابقة كل واحد ياخذ بطل ويحط فيها حشرات والي يجمع اكثر اهو الي يفوز ، وطبعا كنا كل يوم نلعب هاللعبة .. وأذكر شلون كنت أحط الجرادة بيدي واسكر عليها وأضحك لمن تدلدغ ايدي ، وشلون كنت أقلد الفراشات الي توقف على الوردة آخذ الوردة أطلع نقطة الماي الي فيها واشربه .. يعني أنا فراشة .. وأم علي الحبوبة .. أذكر أول كان وايد في أم علي الحين نادر مانشوفهم للأسف .. وكان في حشرة سودة صغيرة كنا مانعرف اسمه فقلنا ان نناديه باسم (( خالد)) ولحد هاليوم كل ما أشوف هالحشرة أسميه خالد .. حتى بنت عمي قالت لي مرة مو زين تتزوجين واحد اسمه خالد ... بتذلينه بهالحشرة .. وأنا أقول من قده أصلا ...

المهم كنا ولدانين وكبرنا على مر السنين .... أختي صارت تكانة وعقلت وبطلت سوالف عبط .. وعيال الجيران كبروا وصاروا خوش رياييل .. وظلت سارة على عبطها حتى اليوم ... مو مصدقة اني كبرت ودي أقعد بالحديقة أجمع بهالحشرات الي يتسكعون فيها ، أبوي كيش حديقتنا علشان ما أدور في باطن الأرض على الدود ..

مواقف عبيطة صارت لي مع الحشرات ... أدري بتضحكون علي بس يالله مواقف مستحيل أنساها ..

_ مرة شفت دودة لازقة بعلبة حلاو ومسكينة شكلها كانت تتشهد وتنتظر الموت .. كسرت خاطري قلت باخذها لي المهم وفرت الرعاية الي عمرها ما حصلتها نفتها عدل ، وحطيتها بعلبة حقها ، مادري ليش كنت كل يوم أجيك عليها ، لحد ما مر أسبوع وبعد هالاسبوع لمن بطلت العلبة ... لقيت حشرتين اخترعت .. لقيت انها بدلت ملابسها .. قصدي جلدها وصارت حشرة يديدة تركض والله شكلها مستانسة حدها ... طلعتها وأنا حدي مستانسة ورحت لأهلي واهم يتغدون شوفوا الحشرة تغيرت واهم يصارخون الله يلوع جبدج قطيها ... وحطيتها برا وانا حدي مستانسة قلت لها بليييز أبيج تدعين بالخير وتذكرين .

_ الموقف الثاني كنت كل يوم ألعب بالحوش وأول كانت البواليع صوب الحوش ... فكنت احط فليت على الفتحة يطلعون الصراصير بسرعة ووايد ... فكنت أييب البودرة مالت النمل وأرش عليهم وأيييب صبغ رش أرش ألقى صرصور أخضر يركض ... وواحد ذهبي حركات والله ... وأبطل دريشة أختي علشان يدشون غرفتها طبعا حالة استنفار الصراصير ماتدري وين تروح .. المهم أنطر بس صراخها علشان أستانس لأن كانوا مدلعينها حيل ، فكانت تركض صرصور ذهبي بغرفتي .... طبعا علطول يعرفون ان سارة لها يد بالقضية >

_ وتكملة كنت أرش الفليييت بالليل ... وأقوم الصبح بسرعة معاي المخمة أخم الصراصير النافقة في الحوش .. وأعدهم كل يوم وأشوف محاصيلي زادت ولا قلت ..

_ موقف حده عبيط للحين مانسيته ... كنت أشوف فلم رعب وحدي متصرقعة للأحداث ومنسدحة ومبطلة حلجي على الآخر ... ولا يمر صرصور شكبره صوب ويهي ويدش بحلجي .... طبعا حسيت بحركة بحلجي ولمن طلع جان اخمطه .... خواتي صرخوا وانا أطالعه أقول (( انت من صجك ؟ مالت عليك زين ...!!!)) حذفته وأطالع أهلي منصدمين وأقول لهم (( ويع طعمه خايس ...!!!)) انا بس قلت جذي جان يصرخون .. ليش مكبرين السالفة.؟؟ رحت فرشت أسناني وتمضمضت ورديت كملت الفلم وكأن شيء لمن يحدث ... الحياه حلوه ترا
للحين أذكر طعمه والله راح أذوق كل الحشرات الا الصرصور صراحة .. دريت عن معلومة تقول ان مادة ظفر الانسان نفسها المادة الي تغطي الصرصور (( جناحه)) من دريت وقفت عادة أن أظافري 24 ساعة بأسناني ..

_ مرة أختي كانت قاعدة تستعبط علي فقالت لي تدرين اذا حطيتي جرادة بماي بالفريزر وبعدين صارت ثلج ... ورديتيها بالشمس تطلع حية ماتموت ... ؟؟؟ أنا صدقتها وسويت الحركة ... وبعدين لمن شفت الجرادة ميتة جان اقعد ابجي ... كان شكلي حدي عبيط :p


_ هذا موقف صار بأختي المسكينة ... المفروض الواحد بهالمواقف يصير ذكي بس سبحان الله على ذكاءها .. كانت قاعدة على طاولة الكمبيوتر تكتب ... تقول يم الفارة مر صرصور ... مادري ليش على بالها تمرة .. شياب التمرة صوب الفارة؟؟؟ مادري والله ، المهم الأخت مسكت الصرصور لمن حست بحركة قطته ولحد الحين أذكر بجت يوم كامل ولا قدرت تنام ... وساعة واهي تتسبح .. مسكينة لازم الواحد يقوي قلبه شوي .

_ موقف صار لي بجامعة الكويت ... كان أول كورس لي بالجامعة ، خذيت مادة بالهندسة .. والمبنى الي فيه محاضرتي كل بيبانه خشب مادري شلون صاير .. المهم يم الباب لقيت نملة كبيرة محشورة موقادرة تطلع وترا نمل الجامعة مو اي نمل ... صرصور مو نملة شكبره ماشاء الله .. المهم حاولت أطلعها ماقدرت والله قلت ما باليد حيلة .. خليتها ووالله مرت أسابيع والمسكينة صابرة .. ناس ماتصبر تقعد بالبيت يومين وهذي محشورة وصبرت ماشاء الله ... وأقول لرفيجتي صج أنا وايد أعز أقلامي وأحافظ عليهم بس بخاطر بواحد منهم وكسرت الغطا مال القلم ..حاولت أطلع فيها والله أسمع صوت تفقيسة عدلة .. حسيت قلبي انشلع وياها .. المهم طلعت وأنا بققت عيوني مو مصدقة .. مرت وحدة والله بغت تدوس عليها .. جان اصرخ وخري ... اخترعت قلت لها اسابيع احاول اطلعها ولمن طلعت بكل سهولة بتدوسين عليها ؟؟؟ جان تقول لي شدراني ماشفتها ... مسكينة تمشي وتترنح جنها سكرانة .. خذيتها وحطيتها بحديقة الهندسة .. وتمنيت لها كل الخير والله ...



عاد والله كل معلومة أقراها عن الحشرات أحس اني ربحت المليون حتى لو معلومة تافهة واعرفها ... أقرا كتاب ولد أخوي .. أقول له الحشرة فيها 6 ريول ... واااااو ... يطالعني يعني(( انتي صاحية ؟؟؟ )) أقرا وأستانس وأحب الي يتفلسفون عن الحشرات ... فلمن أسمع أحد يقول لي يا حشرة ما أزعل استانس .... هذا خلقة ربي والحشرة شجاعة جدا وتتحمل ...واذا فشلت ما تيأس ... هذا الي لازم نتعلمه منهم ...

اذا في مواقف لكم مع الحشرات كتبوها وخلوني استمتع ...