2008-10-31

تكسرين خاطري ياكويت !!




هلو عليكم ...

تصفحت اليوم جريدة الشاهد وجذبتني فقرة حلوة ... وكان عنوانها

ندوة العمالة الوطنية والتحديات المستقبلية ، توجه انتقادات حادة لسياسة الحكومة

الغانم : الكويت دولة موظفين لا منتجين .. والأجيال المقبلة ستلعننا !!!

كلام قوي يالغانم بس عجبني والله ، اخواني وخواتي القراء

لي متى مجلس الأمة يدور راحة المواطن المثلى الي تخليه مرتاح البال والواسطة اهي الي تشغله ؟؟

قال لي واحد مرة ان وحدة تشتغل مع امه بالدوام ، وعندها واسطة قوية هالواسطة تخليها تشتغل بمكانين مجرد اسم موجود اوكي ومعاشها فوق ال2000 دينار ، أنا قلت لا مو معقولة جان يقول لي والله ياسارة هذا الي حاصل ، عندج واسطة قوية تمشي أمورج كلها . وخاصة اذا كانت هالواسطة من اعضاء مجلس الأمة المخزييين .

ساعات لمن اشوف حالنا جذي اقول ياربي شعب تعود على الهندي اهو الي ينظف زبالتي ، الأجانب اهم الي يبنون بيوتنا ، يطقون لي كرت وانا نايم ببيتي ، اخلي الشغل على فلان وانا نايم امس كنت سهران بالديوانية .

أتزوج مدرسة علشان تساعدني في البيت وتمول عيالنا بالمستقبل .

لس متى بيفكرون بالمادية ؟؟ لي متى الفلوس تروح وتروح وتروح وللحين ماكو مشاريع يديدة بالكويت؟؟

بنقول الحكومة .. أوكي الحكومة للأسف ماحطت خطة للمواطن علشان هالمواطنين يمشي على عجين ما يلخبط ، ليش مانخلي الشعب منتج مثل ما قال الغانم ؟؟

تصفحت مجلة ذاك اليوم ولقيت استطلاع او تحقيق صغير يتكلم عن امنية حياتك ... وياربي على الناس الفاضية ..

واحد يقول : استلم معاشي وانا قاعد بالبيت بطالي .

والي يقول : اني آخذ معاش قوي .

والي يقول : ماداوم كلش ..

بس عجبني واحد يقول : ان بنتي تصير احسن دكتورة . لا ومو كويتي بعد لوووول

ياناس والله حرام ... شكثر اشوف كويتيين يروحون برا يلقون الي يقدر طموحهم ... والكويت اولى ان نكون موجودين فيها بس ليش علموا الشعب الربادة ؟؟

قالت لي مرة مرت اخوي أن في شركات يديدة اجنبية تبي موظفين كويتيين بشرط توظفهم بالساعة وتعلمهم شلون ينتجون مو بس حضور وذهاب بلا عمل كحال الوزارات الي موجودة عندنا ، بصراحة هالخطوة جدا رائعة . بس للأسف انها ياية من جهة برة .

يعني ننطر الأجنبي ايي يقول ياكويتي تعلم شلون تنفع ديرتك ؟؟

أمس كنت حاضرة محاضرة عن النفط في الشرق الاوسط ، والمحاضر قاعد يناقش الاوضاع ولا يحط على مخطط عبر السنوات البحث عن النفط قام يقل حيييل .. الناس صارت تدور على مصادر طاقة ثانية ..

واهني يقولون لا النفط قاعد لي بعد 100 سنة .. الموضوع مو موضوع مدة وسنوات الموضوع موضوع الطاقة ، مثل الستكر شلون اول ماحطوه كان غالي الحين بمحلات بو100 فلس نشتري درازن :p هم النفط جذي باجر يطييح سعره وناكلها احنا ..

ياكويتييين ... حاولوا تنتجون للديرة

ياكويتيين ... والله ديرتنا تستاهل والله

خلونا نفكر بكل تواضع وبساطة .. مافيها شي ان الواحد يأدي اشغاله بنفسه ... حتى الدين ما حرم هالشي لو ناخذها من الناحية الدينية .

كل الدول قام تتقدم الحين ..كثير من الدول تبنت طموحا كويتيين والكويت للأسف فضلت أصحاب شهادات الابتدائي والمتوسط على هالناس الطموحة المتميزة ...

قدمت هالدول عروضات هائلة عليهم .. علشان ترتقي ديرتهم ويرتقي هالكويتي بعمله ..

بس عندنا هني قمع للطموحات ... وتشجيع على الكسل

كل واحد يقول متى المعاش يالله ... شلون الواحد يحس بلذة فلوسه واهو ماقدم شي

متى راح نتعلم العطاء مثل ما قاعد ناخذ ؟؟؟

بعد 20 سنة الكويت شلون راح تصير ؟؟

اذا احباط من الحين باجر شنو ؟ ؟

اذا كل طالب اول السنة يفكر متى العطلة شراح نستفيد ؟؟

اذا الدولة تشجع وتعطي زيادة عن اللزوم والشعب مستانس على باله هدية .. وياخذها وينكر دور الدولة شراح نستفيد ؟؟

لازم يصيبنا الفقر علشان نحس بالنعمة الي كانت عندنا ؟؟

النعمة زوالة

والكويت تستاهل

فخلونا نتشارك وننتج للكويت علشان تظل معطاء ...

المعادلة ماراح تكون موزونة الا اذا تساوت الحقوق والواجبات ..

وللأسف عندنا كل واحد يبي حقه ويحارب الكل علشان حقه ، بس لمن تقول له سويت واجبك ؟ يقول لك فلان ما سواه ليش انا أأدي واجبي ؟؟ وقفت علي؟؟

دام وقفت على هذا وذاك وذاك عمرنا ما راح نتقدم ....

شي ثاني ..

الدول الغربية تتكلم شوي وتنفذ الكثير ، أما عندنا بالكويت يتكلمون وايد وياخذون بهالكلام وقت طويل وبالاخير ، الأجانب هم اهم الي ينفذون ..

متى سنتقدم ؟؟؟

مواطنة غيورة على ديرتها

طموحة مملوحة

2008-10-28

اضافة لسيرتي الذاتية ..

بسم الله الرحمن الرحيم
أعزائي القراء
اليومين هذول ... وللأسف وأنا دائما أمشي وأطالع جدام ، لفيت ورا مع الأسف .. وسئمت من كثرة الأقاويل وفلان قال عنج وفلانة قالت عنج وبعدين قلت لنفسي ياربي ليش ارد عليهم ؟؟؟ ليش أضيق خلقي ؟ ؟
طبيعتي حلوة والكل يرتاح مني بس أنا ما أرتاح من البعض ، طبيعتي يا جماعة اذا شفت الشي ما أتحجى عادي .. ما أحط ببالي او اقول شفت فلانة وشفت علانة وهذول سواا وهذول ما سواا لأني أشوف نفسي أول وعندي أنا أهم شي .. فمالي دخل بالبقية
بس لمن اشوف ناس تحب وايد تحطني بطلة مسلسلات هندية وأنا سويت وسويت ...وخاصة بفترة الانتخابات لاعت جبدي حدي ...
فوايد منهم يقرون مدونتي ويتطنزون علي وعلى مدونتي .. ووايد منهم يحاول يشوه صورة سارة جدام الكل ..
فأقول لهم :
الحمدلله ان في وايد ناس تقدرني وتهتم لي ، وعمري ما حطيت اعتبار لكلامكم ، واذا كنت انسانة متناقضة ، أكون متناقضة ولا أكون راعية كلام ونفاق وقيل وقال ، أنا انسانة عملية ما أفكر بالحجي الزايد كثر ما أفكر بمجهودي ومستقبلي فاذا هالناس ماعندها شي وفاضية تتحجى فعمري ما راح احط لها اعتبار أبدا ... ونقدكم الزايد عن اللزوم على مدونتي دليل نجاحها :)
هذا أولا وثانيا
ولله الحمد فكل ما طلعت عني اشاعة او كلام ، كل ما ربي وفقني ولله الحمد ..
شلوون ؟؟
الحمدلله فقد عينت سكرتيرة في شركة AAPG لجيولوجيا البترول ، وهالشركة راح تكون بإذن الله طريقي للمستقبل الرائع يارب ..
بس المشكلة الحين أن يبوني ما أحجي الا انجليزي لوووول وعاد أنا زينة بالانجليزي بس تعرفون مدارس الحكومة 12 سنة دراسة انجليزي هبل بس نكتب ما نتحجى مثل الاوادم ... الله يخلي الاغاني الي اتابعها مع الافلام ...
أتمنى من الله ان يعينني على هذي المسؤولية وأكون قدها يارب
وأمثل ديرتي أحسن تمثيل لأن هالشركة بكل أنحاء العالم ومقرها في الولايات المتحدة الأمريكية ..
فأتمنى أنا وزملائي وزميلاتي الي في الشركة ان نكون قدها ونشرفكم يارب
وهذا موقع الشركة للي يحب يطلع عليها ويتعرف على الشركة :)
ونصيحتي للعذال : خلكم بنفسكم ترا الكلام عن سارة ماراح ينفعكم بشي ، سارة ماراح تفيدكم بشي فشوفوا حياتكم .. و
Get a job:)
مع تحياتي
طموحة مملوحة

2008-10-27

وبعديـــــــــــن؟؟!!!!!




السلام عليكم ورحمة الله وبركاته ...
(( اشكرة موضوع مناجر)) :P
أعزائي القراء
قبل فترة اندزت لنا مسجات تبارك لنا والجرايد عشمتنا بال200 دينار حق كل طالب جامعي ، واحنا حدنا كنا مستانسين ، بتقولون شدعوة!! بقول لكم اي والله صج حتى ال100 فلس تونس هاليومين بصراحة ...
من شاف بورصة الكويت ... اللهم لا شماتة
من شاف غلاء الاسعار ...!!!! بيي لهالنقطة لأنها باطة جبدي شوي ..
نرد على سالفة الاعانة ، أهلنا على بالهم ان الاعانة تكفينا ، اوكي كل مادة آخذها بالجيو يبيلها كتاب كتابين غير نوت المختبر شكبره متين ..
مصرف صراحة .
الجامعة وغلاء الأسعار
اخواني واخواتي :)
بصراحة وشي يبط الجبد ، لمن يحطون الشركات ماكينة حلاو وكاكاو وبعد ماكان الكاكاو ب200 و150 فلس ، صار بربع دينار .. شنو كاكاو بربع دينار ؟؟ مو مفروض الطالب الجامعي له معاملة خاصة ؟؟
فقر ان شاء الله يصكهم ..... شدعوة عليها من ادارة جامعة ماتعرف توقف ببلعومهم يعني ؟؟؟
الكافتيريا ، شوفوا شنو خذيت ... صحن سلطة صغير مع صحن في 4 قطع لحم صغيرة بعد مع واحد بيبسي بس ... بجم ؟؟
ب3 دنانير وشي ...!!!! لا ويقولون لا تشترون من ستار بكس وغيره يهودي مادري كفار يبا ارخص من اكلنا والله ....
شدعوة عليهم ....
وبالأخير رفضوا ال200 دينار لكل طالب جامعي ...
شنو الطالب الجامعي ما يستاهل ؟؟؟
بتقولون أهلنا ؟!!!
بنقول لكم اهلنا فلسوا من بورصة الكويت ... أهلنا وراهم مسؤوليات ومجابلين يهال وطلبة غيرنا شدعوة عليكم ...
جم يعطونا اهلنا مصرف اذا كانت جذي اسعار الجامعة ؟؟
ترا ما يصير والله ...!!!!
نكتب عنهم بالجرايد يعني ؟؟
المشكلة اخواني وخواتي ...
في الدول الغربية اذا جريدة كتبت عن شخص أو عن جهة معينة ، نلقى من ثاني يوم هالجهة متعدلة ومعدلة خطأها ، هني عندنا بالكويت كتبنا عن فلان ولا كتبنا عن هالجهة ..حاربوا الجريدة !!! اذا الغرب الي اهم احسن منا بالتقدم ، والعلم وحتى الدين وبكافة المجالات، ياخذون هالمواضيع بروح رياضية وتصلح غلطها وتكبر بعين الناس..
يبـــــــــــــا ليش هني يحبون المجاملات ؟؟؟
شركات الاتصالات أقول لهم وصلة الانترنت خربانة مو مني منهم يقولون تعالي لنا شرق مادري وين؟
زين مو أنا الي اخدمهم المفروض اهم الي اييون مو مشكلتي اذا عطوني وصلة خربانة ..
شركة اتصالات ثانية ماخذين من خطي 40 دينار زيادة والغلط من الموظف وبعد شهور وروح تعال قالوا ما نقدر نسوي لج شي ...؟؟ احنا الي نتدلع مو ندلعهم ... ان شاء الله تاكلهم فيفا وتطيح حظهم يارب ..
والله مافيهم خير .. والله مافيهم خير ...
لا من بورصة سنعة ...
ولا من رياضة سنعة ..
ولا من مجلس أمة سنع ..
ولا من جامعة سنعة ..
ولا من وزارات سنعة ...
ولا من شركات سنعة ...
ناطرين النفط يخلص يعني علشان يحســــــــون ؟؟؟
قاعدة اكتب الموضوع وقلبي محترق والله .. ليش جذي ؟؟ الكويت تستاهل والله تستاهل .. بس للأسف شكثر بالكويت ما يستاهلون .. ويروحون برا يشترون شهايدهم علشان اييون ينفخون ريشهم على الاوادم واهم مايعرفون ال أ من ال ي .
للأسف وايد كويتيين أكفاء يسافرون برا يشتغلون ، وماخذين حقهم واحنا بديرتنا الأمي ماكل الدنيا والدنايا ..
شخلوا لنا أكثر من جذي احباط ؟؟؟
شخلوا ..؟؟؟؟
أترك لكم التعليق ..

2008-10-24

لخبطـــــة بتخاريفي 2



مـــــن يستــــــــاهل قلبــــج يــــــا ســــــــارة ؟؟؟






بصراحة ساعات أغني مع نفسي وايد وأذكر أيام الدراسة وشلون كنت اشارك وايد مع الموسيقى وحبي الجم للمايكروفون .. أقول ليش مادشيت معهد الموسيقى ؟ وأرد أقول لا العلم أفضل بكثير ... بس هم هالهواية ماكلة عقلي .. أحب أغني وايد لووول
كل عام و زوزو بألـــــــــف خيــــر


أمس ، ولمن خلصت من الجامعة طلعت رحت سيدة على المركز العلمي لأن أختي مسوية حفلة عيدميلاد بنتها هناك ، زوزو كملت سنة .. المهم انا كنت رايحة مبجر وأهلي كانوا للحين ماطلعوا من البيت فقلت اقعد بالكوفي شوي اشرب لي شي يعدل مزاجي السيء لوول.
وأنا رايحة صوب كراسي كوستا شفت ثلاث حريم قاعدين طالعتهم بنظرة غريبة ... ياربي مارين علي بس من كثر التعب موقادرة اركز ولا يوقفون ويأشرون لي .. طلعوا بنات عمي شهالصدف الحلوة ؟؟ سلمت عليهم وقعدت معاهم نسولف ووالله خنقتني العبرة .. شكثر أحب أهلي وشكثر ودي أكون معاهم بس الظروف تمنعني اني ازورهم علطول ... وقلت لهم هالشي وبصراحة بادلوني نفس الشعور ... مابي اقطع رحمي ولابيهم يحطون ببالهم اني مابي ازورهم او ما أسأل عنهم ..
بصراحة قعدوا يسألوني عن الدراسة وشجعوني وايد على الجيولوجيا والعمل الصحافي ، أحب عائلتي لأنها تهتم وايد بالعلم والدراسة . على الرغم من أن أبوي ماكمل دراسته الا انه كان يحرص على اني اقرا واطلع وابحث بالعلم ..
وبعدين غيرنا الموضوع وسولفنا على ايام اول لوووول ، وضحكوا علي لمن قلت (( أبي بــــر أبي أتلذذ ببداوتي )) لأن لمن كنا نروح معاهم البر والتخييم هناك كانوا يضحكون علي وانا الحق الحشرات ..
بصراحة اكثر شي ونسني بالحفلة وجودهم ..!!! العائلة مهمة جدا بالنسبة لي ورضاهم أكبر همي .. الله يخليهم لي ويخليني لهم لوول ..
واحتفلت زيونة بعيدميلادها وسط الازعاج الي كان موجود لوووول وصوت اليهال وملاقتهم لووول ..
صــــــديقتي دانـــــــــــــة
قبل أمس يتني رفيجتي وكان ويهها متغير حيييييل وفجأة بجت وايد ... أنا اخترعت فرحت اسألها بسرعة شفيها ؟؟ قالت لي ان اختها الكبيرة فيها سرطان .. بصراحة حز بخاطري شكلها .... بس موشرط كل واحد فيه سرطان يعني بيموت، أبوي الغالي وبعد ما شالوا منه الخلايا السرطانية طلعت مرة ثانية ومايقدرون يسوون له عملية لأنه كبير وما يتحمل .
حاولت اهديها بصراحة ، فقلت أروح حق دكتوري وأخوي الغالي الدكتور محفوظ لأنه دايم يدق على الوالد ويطمنه ، فلمن تكلم ويانا بصراحة ماقدرت امسك نفسي وبجيت ... الارادة مهمة والله مهمة ...
والواحد لمن يشوف أحد من أهله مريض لازم يكون وياه بكل لحظة ... مع اني اتغدى واتعشى بروحي في البيت الا اني الحين ما آكل الا مع ابوي ... حتى الأكل أبي أشاركه فيه ،لأنه بحاجة لي وهذا الي حبيت اوصله للجميع ... لا تخلون المريض بروحه ، أمسك نفسي ساعات لمن اشوف شكل ابوي ، دايم أنا الي أدلك له ريله ، ومرة ناداني علشان ادلك ريله ، فطالعته وتنحت أبوي تغير ، أبوي ضعف وايد أبوي شكله مريض حييييل ، أبوي بحاجة لي الحين اكثر من حاجتي له .
لا تخلون المريض يعاني ، ووجود الي حواليه اهو احلا دوا صدقوني ...
هنا تجدونني :

2008-10-21

نظفوا ديرتكم ولا تضحكون العالم علينا ..


اليوم أنا ورفيجتي حبينا نمر جمعية الخالدية نييب كشري نتغدى ونكمل دراستنا ... المهم وتوهم فاتحين الجمعية اليديدة ... وللأسف المتخلفيين للحين عايشين ... مامداهم والله ولا كاتبين على الجمعية خرابيط كالعادة وفلان وفلان .. كلهم بيصنعون التاريخ هالفشلة .. قلت لرفيجتي توها توها فاتحينها ... شدعوة لهالدرجة تخلف ووساخة بهالناس ؟؟؟ شدعوة يكتبون على الطوف ماقول الا الله يعينهم على نفسهم ...







الكــــــــــــــــويـــــــــــــــــــــــــت

ياكثر من تغنى بحبج ياكويت .. وياكثر من تناجر وقال أنا أحب الكويت أكثر ... تلقى بيده علبة بيبسي ركب السيارة وبطل الدريشة وحذف العلبة بالشارع ... شدعوة عليك ؟؟؟ وين الي يحب الكويت ؟؟ الي يحب يوسخ حبيبته ؟؟

صج شي يضيق الخلق تلقى الناس تاكل وتملا بطنها ويحذفون اكلهم أو يخلونه ..

ولا تيي وحدة رقيقة ماعبر وكاشخة الاخت وتخاف تلف ويهها لا يخترب شعرها ولا ماكياجها تاكل وتخلص وتقط اهي ورفيجاتها قراطيسها بالقاع ولا تخليه بالطاولة وتروح .. شدعوة عليج والي يبط الجبد رقيقة وتنعم صوتها روحي قحصي احسن لج .. والله صج كل شي الا لمن يقطون قراطيسهم ويروحون ...

اي خير تحبون الكويت ... خير تحبون الكويت ...

تحترمون قوانين الدول الي برا وماتقطون قرطاسة وحدة ...

وبالكويت الماي سايب ... والكهربا مولية ...

والوساخة تارسة الشارع

كل واحد يقول الشارع وسخ من غير شي وقفت على قرطاستي ...

تلقى الشارع حده مقرف ...


شـــــــواطــــــئ الكـــــــويـــــــت

أحلا مكان أحب أروح أقط همي كله هناك .. بس

شلون الواحد يقط همه بهالوساخة ؟ ؟

والله أطالع الي حولي من أرف وأقول شلون اتغزل فيك يابحر ؟؟؟

الشواطئ غثة حدها .. والواحد على الناس المتخلفة الي يشوفهم ماوده يقعد ويكتب خاطرة

ماوده يشم هوا سنع حلو

كافي الريحة اللهم كافــــــــي ...


شــــــــلون أعبــــــر عن حبي لـــــــج ياكــــــويت .؟؟؟

كويتنا الغالية ..

أدري أن وايد ناس يحبونج بس من زود الحب يقطون الزبالة بشوارعج وشواطئج ... ترا هذا زود الغلا والله ..

كويتنا الحبيبة تدرين ان في طلبة معاي بالجامعة يضحكون علي ...!!!! ليش ؟؟؟ لأني أشيل الزبالة من أرضج

لأني ما أرضى تكونين هالمنظر ....

تدرين إني أغار عليج ؟؟ !!!

تدرين إني أموت بترابج ياكويت ...

علشان جذي خليت الناس كلها تضحك وتستعبط ويقطون علي حجي ... بس والله مارضى بورقة صغيرة طايحة على أرضج ياكويت

لأنج غالية .... وغالية ... وغالية ...

ولأني متربية أحلا تربية على ايدج ... وتعلمت أخليج نظيفة مثل ما أحب أني أكون نظيفة ..

ومثل ما الناس تطالعني نظيفة ... أبيهم يطالعونج نظيفة ..

دعوة للمدونين

حافظوا على الكويت ... ولا تقطون شي من دريشة السيارة ...!!! وعلموا ابناءكم النظافة بكل شي

دعوة من كل قلبي وبدون مصلحة لي سوى مصلحة الكويت فوق كل شي

مع تحياتي

طموحة مملوحة

2008-10-20

أنـــــا وراشـــــد الماجد




اليوم حيييل متضايقة ومادري شسوي قلت خل اقعد مع نفسي .... وأتذكر أيام طفولتي العبيطة وتذكرت شغلة كان كل اهلنا يدرون عنها وهو أول حب لي .. لووووول

كان أول حب لي وأنا عمري 7 سنوات ... كان راشد الماجد ... مادري ليش وشلون كنت احبه بس أذكر إني كنت أحط صوره بكل مكان بغرفتي ... وكانوا يدشون علي الدار وإلا حاطين بالتلفزيون اغنية لراشد الماجد وأطالع الاغنية وأبجي ..

أذكر بيوم كانوا يايين بنات عمتي وكنت قاعدة معاهم جان تقول لي وحدة من بنات عمتي .... سارة تدرين أن راشد الماجد تزوج ؟؟ أنا انصدمت ... لا لا

وأفكر حزتها اني كنت حاطة ببالي اني لمن اكبر اتزوجه >>>> هييييي بكيفج انتي ؟؟

وبجيت وايد وأذكر ما نمت الحمدلله والشكر كل هذا علشان راشد الماجد ...

وأقول حق أمي : يما لايق علي صح نفس الخدود لوووول

مادري والله كنت صغيرة وصايعة أفكر فيه بجنون مو لهدرجة عاد :D

المهم الحين اكرهه كره مو طبيعي صج أحب أغانيه بس اكرهه اهو نفسه واقول لنفسي شلون كنت احبه ؟؟

سبحان الله ...

أكيد كل واحد فيكم مر بتجربة حب فنان فترة المراهقة او الصغر ... الي يحب يفضفض خل يقول لنا ونشوف عبط الصغر ..

بس والله صج كل ماشوف راشد الماجد أكم بويهي مالت على ذوقي لوووول

أحلا أغنية لراشد الماجد (( المسافر )) لمن اسمعها لحد يحاجيني لوووول

أدري موضوع ماله داعي بس حبيت أفضفض لأن الدمعة واصلة حدها حدها لووول

سي يو ...

2008-10-17

كيف الوصول إليك ؟؟؟





ربما شعور الأرق والنعاس يؤرقني ...
لكن التفكير بملامحك يطيل السهر
تلك العيون الحزينة تقتلني ...
ليتني أمحي ظروفك ويأسك والمرر
قربك لي وابتسامتك تسعدني ..
والتفكير برجوعها يذيقني الأمر
إنسانة أنا ذات مشاعر ولحنانك تجوعني..
سأنتظر حبك الكبير لي طول العمر
طيبتك ومشاعرك للبرد تدفئني ...
وتكون لي ظلا تحميني من المطر
ياصاحب القلب المجروح لا تتركني ..
حاجتي لك في كل دقيقة تستمر
أغني حبا وجنونا أرجوك ان تسمعني ..
نقشت اسمك في قلبي ، باق طول الدهر
لأرى طموحك لي فهو يشجعني ..
ونداعب طفلنا فرحين تحت الشجر
تلك حياتي معك فلا تحرمني ..
وتبقى كلماتك كلها في حياتي كالدرر
طموحة مملوحة
17-12-2007
9:20 صباحا

2008-10-16

لخبطـــــة بتخاريفي ... !!!!!




لا يوجد شخص في العالم كله لا يحادث نفسه ، حتى الأطرم يحادث نفسه ولكني اليوم وبعد عودتي من الجامعة بكيت كثيرا لأني حادثت نفسي بمواضيع كثيرة … فتشاجرت مع نفسي وقلت كفى كفى كفى ولكن الصوت لا يسكت أبدا في داخلي … حتى جلست اغني مع نفسي واغمض عيني عل الأحاديث التي تدور في رأسي تصمت ولكن دون جدوى لذا سأرتب هذه الأحاديث هنا في مدونتي … وتحت عناوين عديدة ..



الوحــــدة الوطنـــــية ..




شخص عزيز علي ويتابع مدونتي باستمرار حادثني مرة عن القوائم الطلابية ، فهو لا يؤيد القوائم الطلابية ولكن يؤمن بالديمقراطية ولكن وعندما فكرت بكلامه كثيرا ، نعم يستطيع كل طالب أن يحدث فرقا كبيرا من دون أن يتوجه لقائمة طلابية تمثله ، ولكني أحب مبادئ قائمتي وأؤمن بها كثيرا ، ولكني أعود وأقول لو كنا حقا نعتبر خدمة الطالب أول هدف لنا لأتحدت جميع القوائم الطلابية ….
ولو أفكر في دولتي العزيزة … أقول

الكويت … بدو وحضر ... ينقسمون لشيعة وسنة ، الشيعة ينقسمون لكذا وكذا .. والسنة ينقسمون لكذا وكذا .. والبدو ينقسمون لقبائل كثيرة والقبائل تنقسم لــ .... و.... و.... . جامعة الكويت .. تنقسم لطلاب وطالبات ، ينقسمون لقائمة كذا وكذا وكذا وكذا ...و محايدون . الى أين ستأخذنا هذه الانقسامات والتعامل على أن أنت بدوي وانت حضري وانت كيت وكيت ؟؟؟؟ ستأدي لتفكك المجتمع الكويتي ..
اذا أنا راح أوقف وأقول راح أصوت لفلان علشان من قبيلتي وفلان أكفأ منه ولكنه مو من قبيلتي فماراح اصوت له ... فهل مستقبل الكويت يتوقف على قبيلتي فقط ؟؟ هل مستقبل الكويت يتوقف على الشيعة فقط ؟؟ أم السنة فقط ؟؟ الى متى التحرشات في مجلس الأمة ... موضوع صغير تحول لكواثر ... للأسف نحن في الكويت نعاني من فقر الوحدة الوطنية التي جميعنا نتمنى أن تحدث ولكن نعلم أن هناك أخطاء تصدر منا ولكن عنادنا لن ينفعنا بل يضر دولتنا الغالية .


تقصيــــــر منــــــــــــــــــــي



لا أنكر فضل مجلة Unique بتشجيعي على العمل الصحافي ، وحثي على بذل المزيد ولكن كثرة الضغط الذي اعاني منه من بقية المجلات التي اشارك فيها قد جعلتني اهملها قليلا ... سأعود لك يا مجلتي الرائعة مع مواضيع جديدة ، فأنا لا أنكر تشجيع الدكتور الرائع رشيد العميري ، عندما حثني وشجعني كثيرا على مواصلة العمل والبحث عن مواهبي وها أنا ذا أحاول أن أكون من أبرز الموهوبين في دولة الكويت .

فوز القائمة العلميـــــة



اليوم كانت انتخابات كلية العلوم وفازت القائمة العلمية (ائتلافية ) ألف مبروك لهم وكنت سعيدة علشانهم وهم زعلت منهم .. الواحد حلو انه يعبر عن فرحته ويتمادى بفرحته ولكن ليس على حساب قتل النباتات الموجودة والتي قام بزرعها أناس تعبوا وبذلوا الجهد حتى تكون كلية العلوم رائعة ، أو نظيفة بمعنى أصح ... فكيف نعلم الصغار على عدم قطف الزهور وهؤلاء يدوسون على النباتات حتى ماتت ؟؟ بصراحة المنظر جدا ازعجني بطريقة لا توصف ..

ارهــــــــــــــــــــــــــــــــــــــــــــــــاق



يرن هاتفي كثيرا ، لا أريد أن أجيب ، أصبحت لا أحب الكلام كثيرا وجدت نفسي لا أجيب على المكالمات والرسائل .. أحب البقاء وحدي كثيرا حتى أفكر كثيرا وأتحادث مع نفسي كثيرا .

النّسيـــــــــــــــــــــــــــان ..

بصراحة لم أتوقع اني في يوم من الايام سأصل لهذه المرحلة .... أحيانا أتحدث مع أحد أمامي .. وفجأة أقول ( أنا شنو قلت ؟؟؟ ) المشكلة بالموضوع اني لم اغير الحديث او اذهب لمكان كي أنسى ماذا قلت ..!!! حتى أن البعض حسبني مجنونة أو أمثل ... بصراحة لا اعلم كيف يحدث هذا النسيان السريع المفاجئ .

تم حذف غيرة شديدة بطلب من قارئ :)


الديمــــقراطيــــــــــــــــة ...



للأسف أصبحت الديمقراطية بلسان الجميع وكأنها موضة .. لم تعد الديمقراطية موجودة في البلاد ، فهنا من يهدد زوجته ان لم تصوت لفلان . وتذكرت أحد المرشحين في مجلس الأمة وعندما عثرت على برنامجه الانتخابي محذوف أمام باب المنزل ولازلنا في عصر الجهل كل الاوراق مرمية أمام الأبواب لتشوه منظر المنزل ... ليس هذا موضوعي لوول المهم وهذا الانسان وكبقية من يريد الكرسي يجب عليه التحدث بالدين فالدين هو المفتاح لدخول مجلس الأمة ، المهم قرأت عنوان برنامجه الانتخابي ( الديمقراطية الاسلامية ) فقلت لنفسي خوش ديمقراطية واسلامية شلون ؟ المهم نقرا ... بحثت عن امور مهمة واهداف يسعى لها هذا الانسان ولكن ماذا وجدت ؟؟؟ الدين الاسلامي حلل وحرم ، لحظة هذا ليس كتيب ديني كي تتحدث به عن الدين الاسلامي .. أين البرنامج ؟؟ فوجدت صفحة بصراحة صعقت من كلامه ... فقد ذكر ان الديمقراطية محرمة شرعا وأن الدين الاسلامي لا يعترف بالديمقراطية وانما الشورى ... مادام الدين الاسلامي لا يعترف بالديمقراطية فلماذا وضعتها عنوانا لبرنامجك مع السلام . ؟؟ لماذا لا يعطي الناس دروسا دينية بدلا من دخول المجلس ؟؟ شي عجيب صراحة..

يتبع (1)



2008-10-14

صحافة آخر زمن ..

اليوم رحت حق مقر الجريدة الفلانية لاجراء مقابلة لي علشان اشتغل معاهم بعد ماتركت الجريدة الي كنت اعمل فيها سابقا ..
والسبب في ذلك بسيط ... مروا علي صحفيين كبار لهم اسمهم ومكانتهم وتعلمت منهم الكثير ، بس لمن اييك واحد ويكبر وايد من نفسه وانا اسوي مقالة اطير فلان السما ... اووووف أقول ببالي والله مع اني ماسمعت عن هالصحفي بس من كلامه حسيت انه صاروخ لوووول
المهم ، أن الأخ العزيز قال لي انا راح ادربج على المقابلات والتحقيقات والخ ... مع اني مو بحاجة لهالاشياء لأني مارست الصحافة من كان عمري 15 سنة ولله الحمد ما احتاج لأحد يدربني .
المهم قلت اوكي ، الأخ العزيز كل ما كتبت مقالة قال لي بعدل فيها حجي واضيف اسمي وياج ... ولمن تنزل المقالة واشوف راز اسمه معاي .. واقرا الكلام مافيه تعديلات ولا شي الكلام نفسه نفسه ماتغير ... بعرف ليش هالانانية ؟؟؟
بيسوي تحقيقات واخلص شغله كامل وارتب له الحجي وبالاخير يحطه باسمه ؟؟؟
شنو أنا اشتغل عنده ؟؟؟ المهم بيوم دق علي قال لي سارة عندي الموضوع الفلاني قلت عن شنو؟؟ قال كيت وكيت وكيت وابيج تخلصينهم لي ضروري ضروري ...
قلت له فلان قبل كل هذا وين مكافآتي ؟؟
رئيس التحرير وصاه انه يوصل المكافآت الي آخذها ... هذا حقي وتعبي قال اكيد اول ما اشوفج راح اعطيج اياه ... ولي يومكم مادق ولا شفت رقعة ويهه بالجامعة ...
أنا بعرف ليش هالأنانية ببعض الصحفييين ؟؟
سألني واحد الله يذكره بالخير ، قال لي انتي عرفتي شلون تبرزين نفسج بطريقة ذكية بس ماتقدرين تستغفلين الكل لأن الناس تطالع ظاهرج ما تطالع باطنج ...
قلت له شنو قصدك ؟ ؟ جان يقول لي اشكرة كل مقالاتج تلقين ماخذتها من واحد يعرف يكتب وحاطته باسمج ...
قلت له مو سارة الي تبوق انجازات الناس ولا تنام مرتاحة الا اذا اعتمدت على نفسها وكل مقالاتي أنا اكتبها ، وعمري ماعتمدت على غيري وأهم شي راحتي ورضا نفسي حتى لو مقالتي او رسمتي ماعجبت الناس ...
عالم الصحافة مليييء بالناس الخبيثين الي يحاولون ينسبون أغلب الاعمال لنفسهم ...
لذا أوجه كلمتي للجميع بأن جميع مقالاتي ورسوماتي هي من جهدي وتعبي ..
ال50 دينار الي آخذها على التحقيقات أحبها أكثر من ال100 دينار مالت الاعانة ... وأصرفها وأنا مستانسة ... لأنها من تعبي ..
علشان جذي ماحب ايي واحد مقالاته ضعيفة ورديئة ويسوي لي من نفسه سوبر مان ويرز اسمه معاي على شي ما سواه ...
فرصتي جيدة في هذه الجريدة الجديدة ... ومجلة جديدة أعمل بها حاليا أتمنى من الله ان يعينني على تحمل عبء الصحافة ولكن بالأخير تكون اضافة جيدة لسيرتي الذاتية ..
ادعوا لي التوفيق:)

2008-10-12

مبروك مبروك

وبعد طول انتظار وعناء .....
الوسط الديمقراطي
المركز الثالث في انتخابات الاتحاد.... ألف ألف مبــــــــــــــــروك

2008-10-10

البقاء لأصحاب المبادئ:)





الوســــــط سوف يعود من جديد .... عاجلا أم آجلا :)



أملها أنتـــــــم



أمس وأنا رادة من كيفان كانت العلوم مليئة بالطلاب وزحمة وحالتهم حالة على مهرجان القائة المستقلة الي اصيد عليهم المط بالحجي علشان اقلدهم :p
المهم وتفاجأت برفيجاتي حاطين كيكة عيدميلاد وغنوا لي ، كانت مفاجأة حلوة ... قصينا الكيكة ووزعناها على الجميع :p حتى ستيف عطيته لووول
اهم شي أم علي حدي استانست عليها ورفيجاتي كلهم لابسين أحمر على أم علي ..وحضرتي مداومة ببدلة رسمية وكرفته صفرا .. مرشحة شعلي لووول :p






ببداية العام الدراسي عملت مع قسم الجلوجيا حفل ترحيب للمستجدين وطلبة القسم للعام الدراسي الجديد .. وكان بأول يومين دوام شنو وناسة كان صج صج حتى الدكاترة والموظفين شاركونا فرحتنا :) بالكيك والجاي والقهوة والحلويات وتوزيع هدايا صج صج صج نور القسم بأول اسبوع صراحة :)


بتكلم عن قائمة الوسط الديمقراطي ، وسابقا كنت مقررة اني ما اشتغل بالانتخابات بس لمن شفت الاجواء والبنات الي يسألون ويستفسرون مني قلت حرام ما اساعد الوسط ... الوسط عطاني الكثير ليش ابخل عليه وخاصة في الانتخابات ، أشياء غلط قاعدة اشوفها جدامي لازم اعدلها ... منها المعلومات الغلط الي يقولونها أمس دزت لي رفيجتي مسج تقول لي سارة مو الوسط الي طالب بكلية البنات ؟؟ قلت لها اي قالت لي القائمة الفلانية تقول احنا الي طالبنا فيها ، قلت لها الدليل التاريخ جدامج والوسط اهو الي طالب بكلية البنات ... ولمن تم بناءها كانت على فترة تولي القائمة الفلانية الاتحاد فدام بنوها على زمنهم صار انجاز لهم لووول ...

مثل سالفة الغاء رسوم التسجيل على بالنا اهم الي طالبوا فيها واكتشفنا ان هالشي من الجامعة نفسها مو من الاتحاد:)

أتمنى أن يكف الطائفيون من الصعود على ظهر الوسط ... فطول السنة الوسط واضح وحتى بدون ما ياخذ جمعية او اتحاد وبعد التعب تاخذ الاسلامية المركز الثالث بسبب الطائفية ... الوسط أولى بهالمركز مستحيل الاسلامية تحس بطعم الفوز لأنها ما تبين الا حزة الانتخابات وعاشوراء :) ...

قائمة الكل ..

فلا سني ولا شيعي ... ولا بدوي ولا حضري ..الوحدة الوطنية أولا وآخرا ...

والوطن والجامعة مو واقفين على هذا وذاك .. بل على نحن ...

لذا أتمنى أن يعود الوسط الديمقراطي كالسابق وأكثر .... أتمنى ذلك من كل قلبي ...

من الشعارات الوسطية الي أحبها :

(( سأبدأ حيث ما أبدأ ... لأني صاحب مبدأ))

((شعب واحد حر لا للطائفية لا سني ولا شيعي فوحدة وطنية ))

((قد علمنا الآباء درسا لن يزولا من عاش بحكم الظلم قد عاش ذليلا ))

((إنما الشيعة والسنة جسم واحد ، جسدت وحدتهم رائعة عند المحن لا لتفريق الكويتييين بدو وحضر كلنا يجمعنا يربطنا حب الوطن))

(( نور لا يموت))

((فإسمـــــــــي بالوسط يكفي ))

تمنياتي للوسط بكل النجاح والتوفيق يارب