2008-11-29

سحقا للتفاهات ...



بينما كنت جالسة في الجامعة أقوم لفحص العينات التي أمامي كي أكمل فروضي الدراسية ، أتتني احدى زميلاتي :


..


زميلتي : سارة باجر بنروح كلنا بنات تيين معانا ؟؟


سارة : حلو .. وين رايحين ؟؟؟


زميلتي : الأفينيوز ..!!!


سارة : :(





في يوم آخر ، وقد خرجت أخواتي للتسوق في الأفينيوز ، اتصلت على احدى صديقاتي فقالت لي بأنها في الأفينيوز @@ .. بعدها بقليل تصلني رسالة من صديقة أخرى تقول فيه ...
(( أمبي سارة ماتصدقين أنا الحين بالافينيوز ، فلانة وفلانة وعلانة وفلنتانة وحتى شباب كليتنا كلهم هناك ))










تتسابق دول الخليج اليوم على التطور بينما نحن نبحث عن اسقاط القروض وحل لعقدة أعضاء المجلس ، وحكومتنا المتخبطة ... يقول فلان من الدولة الفلانية ...



(( لقد تطورت دولتنا واصبحت مهتمة بالعلوم والتكنولوجيا وتحاول ان تكون سباقة بكل شيء ، تتبنى مستقبلنا من الآن حتى نكون رجالا يٌعتمد عليهم بالمستقبل ، فما انجازاتكم بالكويت ؟؟ ))



سارة : الأفينيوز :D











لا تسأل الشعب الكويتي عن العلم والمعرفة ..





لا تسألهم عن التطور و الرضي بالبساطة ...



إسألهم عن الأفينيوز وآخر عروض التنزيلات ... بعد أن كانوا يتفاخرون بسوق شرق ... اتجهوا للمارينا .. وبعدها الأفينيوز وهم بانتظار مجمع تجاري آخر حتى يتفاخروا به ...















هل أصبح التطور في التسوق ؟؟



هل السوق هو أهم شيء عندنا بالكويت ؟؟؟



لماذا كلما أسأل شخص أين ذهبت .. يجيبني بالأفينيوز ... ؟؟؟





بصراحة مرة واحدة فقط ذهبت لهذا المجمع وكان في بدايته ولكني شعرت بالانزعاج ، فكل الكويتيين هناك ... وكأن المكان مهم جدا جدا ..

ليتهم يكونون بهذه الكثرة وقت خسوف القمر أم كسوف الشمس عند المجاهر يتطلعون بتشوق للمعرفة ..



ليتهم بهذه الكثرة عندما تكون هناك محاضرة علمية أو أدبية .. ليتهم بهذه الكثرة ليقفوا صفا واحدا ليقولوا لا لقتل الكويت ..

ليتهم بهذه الكثرة ليرفضوا الظلم وسحق الحرية في الكويت ...





إذا كان الأفينــــــــــــــــــيوز الهم الأكبر للكويتييين وكأنه مكانا مقدساً ...



فعلـــــــى الكويت ألـــــف ســــــلام ...































أحــــــــــــلا أغنــــية أُهديت لـــــي ..

........................................................................

خارج الموضوع :

أخيس موقف اليوم رحت الصالون ، واهي تسوي لي بديكير ريلي وانتو بكرامة ولا يطيح الظفر كله .. أنا من خرعتي طحت غشيانة لووول قعدوني جان تقول لي ماما انتي حامل ؟؟؟ @@

شهالسؤال ؟؟؟ محد يفقد الوعي الا الحمل يعني ؟؟

مافيني اطل على صبعي :( يكسر الخاطر والله

شكوى ضد بلوق عمتي

العنوان مجرد لفت انتباه لا شأن له بموضوعي :p

من أكثر المدونات الي شدتني وحببتني أكثر بالتدوين ... مدونة (( بلــــــــوق عمتـــي))
أنتظر مواضيع هذه المدونة بفارغ الصبر ، لعدة أسباب :
1_ أحب أن أضحك على الصور التي يضعها المدون في مواضيعه فدائما ماتجلب لي الاستمتاع قبل قراءة البوست .
2_ مواضيعه جريئة ومضحكة وبنفس الوقت فهي معبرة .
3_ لهذه المدونة أهداف واضحة وبارزة تهم المجتمع لذا فأنا من أشد الحريصين على متابعتها .
من مواضيعه التي أعجبتني جدا ..
..
..
..
..
..
..
هذا الموضوع عبارة عن دعاية بسيطة لمدونة (( بلوق عمتي )) كما فعل أخي بدر بن غيث سابقا بعمل دعاية لمدونتي وأعجبتني فكرته .. فيما بعد سأذكر عدة مدونات أخرى ....

..
..
..


















أترككم مع الأغنية التي تمدوني بالأمل والطموح دائما

i'm alive




2008-11-27

مجنــــــــوني








وقفَ أمامَ الجميع ... ليقرأ قصة إنســـنْ

قدْ عاشَ في شخصيتينِ مختلفتينِ ...

وكيفَ كان طموحهُ كبير ..
وكيفَ كانتْ حياته عادية ..

ماهو الكيف بعد تغير مجريات الأحداث ؟؟


بعد أن التقـــى بهـــــا

بعد أن أحبـــــــها

أعلن عن حبها أمام الملأ

ليعود الى قلبها المنتظر

فيقول
..
..
..

أنــــــــــــــا إنســــــــن ..

بسببكِ أنا إنســــــن

أتسمحينَ لي أن أكون مجنونكِ ؟؟

لم تجب على سؤالهِ ..

بل اكتفت بالدمع ..
يضحك قائلا :
تمنيت أمور كثيرة تحدث بيننا .. أتعلمين ماهي ؟
تمنيت أن نعود أطفال نلعب بالشاطئ وانتي تضعين المساحيق على وجهك
لأرش ماء البحر على وجهك كل تمتزج الوان المساحيق مع بعضها ..
وتغضبي مني لتبادلي رش الماء في وجهي ..
..
..
..
تمنيت أن نجلس ونتناقش بأمور المجتمع والمشاكل الاقتصادية والسياسية التي تعاني منها الدولة ..
..
..
..

ما أروع هذا الإنســـن

إنه لا يسطّر كلام الحب والعشق لمسمعها ..

إنه لم يرها إلا مرة واحدة ...

إنه لا يسمعها إلا قليلا

وآلاف الكيلومترات بينهم ...

ولا زال قلبه المجنون يخفق بحبها

ظنوا بأن الحب للضعفاء ..

ظنوا بأن العشق كٌفر ..

ولكن حبه لها لم يخش

دين

أو

مذهب

أو

قبيلة

أو

عائلة

أو

خوف
..
..
..
الفلسفة بالحديث قربتهم

والتعطش للنقاش المثمر قربهم

والاحترام المبالغ فيه قربهم
..
..
..
في أي كتاب تكلم عن هذا الحب ..؟؟

وأي رجل يتحمل كلام الكارهين له بسببها ؟؟

وأي رجل يشتري حبها بقلبه المعطاء..!!

وعقله المفكر المناقش .. !!

إنه يحبها بجنون

أبعدَ هذا كله ترفضٌ حبكَ يا مجنونْ ؟؟؟

.......................................

طمــــــوحة مملوحــــــة










الحب الطموحي ... أفضل حب بالنسبة لي

فما أفضل حب بالنسبة لكم ؟؟

2008-11-26

أنا و الموت مخرفين


سلام عليهم ..!!!!
ساعات الواحد يقعد يتذكر أشياء خبلة بحياته يقعد يضحك ويضحك الي حواليه فيه ...
في شغلة أهلي الله يهداهم كل ماسولفوا مع احد عني قالوا هالشغلة ، فأبي أفضح نفسي وأقول شنو هالشغلة .. وبدت هالسالفة عندي لمن كان عمري 10 سنوات طحت ونيموني بالمستشقى ..
وثاني يوم من نومتي بالمستشفى زارني أبوي وخواتي واخواني ... فأول مابطلت عيوني جان ابجي وحضنت ابوي كان قاعد يمي .. جان اقول له :
(( يبا والله أنا صج ملسونة وشيطانة وأذيتكم وايد وماحترمت خواتي الكبار، وأتهاوش مع حمود أخوي بس سامحوني مابي اموت وانتوا زعلانين مني ))..
كنت حاطة ببالي حزتها أن يوم يومين وراح أموت الله يرحمني لوووول
ضحكوا علي وقام يقلدون صوتي وأنا أبجي ... لا وكنت اكتب بورقة وصيتي كل شي خاص فيني أعطيه اختي سمووور ...
وكنت أطلب منهم اييبون لي رسماتي وارسم علشان يتذكرون رسوماتي لمن أموت لووووول والله خبلة ..
كبرنا وقلنا خلاص سوالف يهالووو ماكو ....
لي يومكم هذا وأنا حتى لو نشلة .. أنزل عند أهلي أبجي ... (( أنا شريرة ... أنا كله اتهاوش ... أنا دلالة ونجرية .. خلاص سامحوني )) ....
وبعد يومين أصير زينة وترد حياتي الشيطونية كما كانت :p
صاروا يعايروني على هالسالفة .. متى تموتين ؟؟ ماراح تكتبين وصية يديدة ؟
بصراحة ما استعبط بس والله صج شمعنى ما أموت وأنا مافيني شي ؟؟ ليش لازم الواحد يموت واهو مريض ؟؟ طبعا هذي تساؤلاتي حق نفسي علشان أبطل هالسوالف ..
وأذكر طحت في الجامعة مسكت بيد رفيجتي وأهم ناطرين الاسعاف اقول لها (( والله أحبكم سامحوني )) >>>>> لوووول لا لحظة سارة خل نتفاهم بالأول ..
عسى ماتييني نشلة ادق على الأمة الي بتلفوني أتعذر منهم ... شالسالفة ؟
تتوقعون هالشي خوف ولا عقدة ولا خبال ؟؟؟
بصراحة أنا موفاهمة نفسي ... :(




شكلي بسوي مثل هالقطوة وأصير ريلاكــس وايد أحسن :)






2008-11-21

رحلة حقلـــــية


يوم السبت الي فات كان لنا رحلة للخيران مع جامعة الكويت قسمي بالذات ، لمادة أحافير لا فقارية ، كانت الرحلةعجيبة بالبداية كنت متضايقة لأن اليوم الي وراه عندي امتحانين بس الحمدلله حليت الامتحانين عدل ولله الحمد ...



كانت الرحلة جدا خفيفة ورائعة ، درسنا المرتفع الي بالخيران وتسلقناه لووول وانا قاعدة هني بمكان في المرتفع وعلى قولة الدكتور يقول لهم (( الاسبوع الي فات سارة زارت المكان )) أنا بققت عيني والكل طالعني ، جان يكمل (( وكتبت اسمها ذكرى بعد )) لوووول كلنا ضحكنا انا حدي انصدمت اول شي وبعدين بطيتها ضحك .... مش كده يا دكتور :) والمكان هذا سألنا الدكتور اذا كان بحر ولا بر ... دورنا على أشياء تدل انه بحر ماكو .. لقينا آثار في المرتفع لنباتات قديمة تدل على انه ماكان في بحر حزتها و كان هالمرتفع فوق سطح البحر يعني جزء منه فقط وهو الجزء السفلي ...













عطانا الدكتور عدة مواقع علشان ندرسها ، واختار لي هالموقع حطيت مطرقتي وخذيت عينة من التربة علشان ادرسها :) وكتبت الملاحظات الي تضحك مثل ويهي .. المهم لمن قلنا الملاحظات الدكتور يا صوبي جان يقول لي يالي قولي ملاحظاتج .. كانت ملاحظاتي معقولة وكلها صح ماعدا وحدة .. .أول ماقلتها لف ويهه لووول قلت (( لاحظت بهالمنطقة مافيها حشرات )) ... لووول وانا صاجة والله لووول ... المهم كانت التربة هناك مليانة بالقواقع انواع واشكال وشكلهم حدهم عجيب والله ... على فكرة زمن الصحراء هناك 23 ألف سنة وقبلها كان كله بحر طبعا علشان جذي نشوف القواقع متروسة هناك :) ... وتختلف المناطق هناك منطقة نلقى مافيها الا عدد قليل من القواقع نعرف ان هذي المنطقة كانت شاطئ ...







طبعا هني كان يمي جزء من البحر حاطة صورة تحت تلقونها ... وقلت اصور البالطو من ورا وشوفوا شنو راسمه وشنو كاتبه عليه الدكتور وايد استانس عليه ... لازم احسس نفسي اني جيولوجية حتى النخاع على قولتهم لووول ...



هني ندرس المرتفع الي مليان بالمعلومات الجيولوجية الممتعة ... ودكتورنا الله يخليه لنا جدا جدا طريقته تشوق بالشرح ولمن يشرح لنا مكان وشنو كان وشلون صار اغمض عيوني واتخيل هالمكان .... وااااو والله شي حلو ... صج صج الجيولوجيا ابداع .. ودراستها روعة وممتعة وايد ... :)




هني لقينا كلب ( عزكم الله ) نافق .... وكلنا التفينا حوله ومسكين كان مربوط من ريله مادري كانوا معذبينه قبل ما يموت ولا جارينه ؟؟ الله أعلم بس الدكتور قال لنا شغلة حلوة ... تخيلوا قراء مدونتي .... سنة بعد سنة ... وبعد عمليات التجوية (( مطر ، رياح .. الخ )) راح يندفن هالكلب وبعد سنين طويلة جدا راح تتكون طبقات ترسبت على مر سنين طويلة ... اييون العلماء الي بعدنا بقرون لووول ويلقون هالكلب هني يحددون شنو نوع هالحيوان وبأي زمن كان يعيش ويعتبر شي قيم صراحة .... شغلة حلوة ... لقينا حمامة بعد بس ماصورتها للأسف ..

يعجبني اهتمام الناس بالبيئة هناك ... !!!!!! شلون ؟؟ بموضوع خاص وتشوفون الصور الابداعية ومحافظة الكويتيين على بيئتهم الصحراوية ... أحب الحضارة والله :)





هني الدكتور يشرح لنا المكان وهذا جزء من البحر وشفنا هناك القبقب الصغير ومسكته يدلدغ وايد وناسة ... دكتورنا الي لابس بوت طويل علشان يدش الماي لأن الأرض طينية حدها وصعب الحركة فيها ... كان اهتمامنا موطبيعي هناك ، كل واحد فينا يحاول يلقى شي يلاحظه علشان نشرحه مع الدكتور ... يوم رائع بمعنى الكلمة والله ..






وهذا هو المكان بدون وجود كائنات حية ظاهرة لووووول صورته قبل ما ننتشر في ارجائه وشوفوا شلون المنظر حلو حق واحد يطلع جزء من همومه للبحير ....


بصراحة كانت رحلة رائعة جدا وباجر هم عندي رحلة مشابهة لها .. بكمل تصوير النظافة الي هناك مع الأسف ..
حلوا الواحد يروح مكان ويحترمه ولا يقط زبالته هناك والله شي يفشل الاهمال هناك ....

شوفوا الجيولوجيا شلون تنتج ناس محافظة على البيئة :p .....

أتمنى تعجبكم الرحلة ماحطيت كل الصور لأن في منهم بحطهم بمجلتي ... :)

شكرا لكم


طموحة مملوحة







2008-11-15

بريك موسيقي

كلمات الأغنية تعور القلب والله :)



ترقبوا مواضيع جديدة في مدونة تخاريف طموحة

* رحلة حقلية

* غباء طموحة

* التلوث ... الى متى ؟؟

* رسمة كركتيرية ..

مشتاقة للمدونة وايد بس الدراسة لوعت جبدي والله :(

2008-11-08

تعال علمني الدين !!!










للأسف لمن أشارك بعدة منتديات ويدشون بعض الأخوة الأفاضل ويقولون طموحة انتي بس مواضيعج تستهزئين بالي يتكلمون بالدين .. أرد وأقول لهم وجهة نظري ويظلون على رايهم ودهم يقولون كافرة بس مايقدرون لأن كلامي عقلاني ولا يخالف الدين بشيء ..


أنا لمن أقول أنا مسلمة فإني أشهد بأن لا إله إلا الله وأن محمدا رسول الله ... أظل على صلاتي وصيامي وفروضي الثلاث الباقية ولله الحمد مجرد أن أنتقد شغلة صارت أو كلام ناس يحبون يخلون الدين تجارتهم خلاص صرت كافرة ... لازم رضا هالفئة قبل رضا الرب _ استغفر الله العلي العظيم _ يعني لمن اشوف ردودهم اقول ياربي ليش عندنا ناس تفكر بهالطريقة ؟؟؟ الشيخ الفلاني قال حط القنابل وروح فجر نفسك خلاص أنفذ أوامره أهو ويتناسى أوامر الرب ورسوله ...


يقول لا الجهاد حلال ، يكون حلال أخوي لمن اييون الكفار ويغزون بلاد المسلمين الي اهم الحين اسرائيل مو تروح العراق تقتل العراقيين الأبرياء من أطفال وشيوخ ونساء وتثير الفتنة بين الشيعة والسنة ... هذا الاسلام بنظرك ؟؟














كثير من الي يدشون مواقع الليبراليين والعلمانيين ويصكونهم هكرز وكلام قوي وبذيء قرأت منه الكثير ، ماعتقد الدين يرضى بهالشي .. يعني يخافون من اليهود ومايخافون من المسلمين الي مثلهم (( انت كافر ... انت ملحد ... انت ... انت ... )) ومنو انت علشان تتكلم ؟؟ هل الجنة والنار تحت أمرك ؟؟ ليش ما كل واحد يشوف نفسه قبل ما يطب بالبقية ؟؟؟ يقول لك نبي نخلي مجلس الامة كلهم رجال دين ومتدينيين ... معقولة هذول معصومين من الخطأ .. على فكرة بعضهم عندهم شركات خارج الدولة في بلاد غربية ... يعني اهم الي راح يخافون بأمور الدولة ؟؟ اوكي من حقهم يدشون المجلس بس مو من حقهم أنهم يرفضون العلمانيين والليبراليين... لازم يكون في أطراف وأحزاب .. اوكي الأحزاب موجودة سواء رضينا أم لا .. عاجبكم مو عاجبكم مشوا المواضيع وخلكم ايد وحدة علشان الكويت وأهلها ....


لوكان كل واحد يتكلم بالدين بالحكمة والموعظة الحسنة كما أمر الرسول ، كنا ما لقينا الي يتكلمون ويستهزئوون بالدين ...


ومثل الممثلين الي كل واحد يتفلسف بالدين ويتصل أحد الممثلين يستهزئ بالمحجبات ... وواحد يسب الدين .. محد تكلم بهالناس يتكلمون فينا احنا الي ننتقد (( تصرفات )) أشخاص ربت اللحية علشان الناس تحترمها فقط وتسمع لها .




أحد الليبرالييين الي أتمنى له كل الخيروالتوفيق دائما كلمته بهالموضوع مرة ، فدخلني بطريقة ذكية لبعض الشخصيات الاسلامية القديمة وبصراحة من كلامه الشيق حبيت الدين الاسلامي أكثر ، وحببني للقراءة اكثر عن هذه الشخصيات الي أود وبكل فخر أن أضع منهم في مدونتي مستقبلا بإذن الله ، في حين أدخل المنتديات لأجد من يتدخل بشخصي انتي وانتي والدين الاسلامي ... ويتفلسف على راسي وبعدين اسمع عنه يدز رسايل خاصة للبنات ويتحرش بفلانة وعلانة ... يا الله اذا هذول يتكلمون بالدين ... فالله يعين الدين على امثالهم ..




واييلك الي يقول لك المصحف في الموقع الفلاني لا تحملونه ترا كله اخطاء املائية ... استغفر الله ليش حاطينه زين شيلوه ؟؟ أو لا تنقلون المعلومات غلط للناس ياخذون إثم . ماكو في ناس تصدق كل شي بالانترنت يتكلم عن الدين .. مع العلم أن في معلومات خاطئة جدا عن الدين تعرض في الانترنت فأتمنى هاللي يدافعون عن الدين وحاطين الدين لهم بروحهم انهم يبتعدون عن هالمواقع ويبطلون لهم الكتب أفضل من القذف والسب عبر المنتديات .


واذا كانت الدول الغربية تدخل وتستهزئ بالدين الاسلامي فمحد حط الدين بالواجهة الا الي موجودين حوالينا أهم الي يابوا هالشي للدين .. كل ماصار شي قالوا الدين الاسلامي اهو السبب ... دين الارهاب ... دين القتل .. دين البدع .. لا والله ديننا يسير ورائع ولكن للأسف استغل هذا الدين لأغراض معينة .. حملت الدين كل المسؤولية .


ما استطاعوا ان يخلون عقل أكثرية المسلمين متخلفة الا لمن دشوا بأمور الدين وتوهوهم .. وخلوهم يؤمنون بمعتقدات كثيرة لها دخل بالدين الاسلامي واهي بعيدة كل البعد عن الدين ...




الحين القنوات الي تحط واحد مربي لحية وقايل أنا شيخ وجدامه قلاص ماي .... وكل كلامه الله ورسوله ، والحمدلله والشكر لله .. يخلون الناس تدق عليه يقرا مستقبلهم ولا يشوف فلانة راح تتزوج منو وعلانة متى تموت ..


شلون كل هالملايييين آمنوا بهالساحر؟؟؟ لأنه تسلح بقناع الدين ، شفتوا شلون يستغلون الدين .؟؟؟


















شغلات غريبة شفتهـــــــا ...







علم المملكة العربية السعودية مكتوب عليه (( لا إله إلا الله محمد رسول الله )) استغفر الله أشوفه بيد الكل . هذا شكل وحدة ماسكة علم عليه اسم الله جل تعالى .؟؟؟


ثاني شي اشوف وايد يكتبون أسماء الله بكل مكان ، والاوراق المطبوعة بالملاييين الي مكتوب عليها اسم الله ورسوله استغفر الله مقطوطة بكل مكان ولا أحد يشيلها ... ؟؟ ترا في شي اسمه الاقتصاد بالشيء وفي شي اسمه كمبيوتر كل الناس الحين تتطلع على المواضيع بالانترنت حرام اوراق تنقط عليها اسم الله ورسوله .. وآيات قرآنية ...




ويضحكوني بسالفة ( فله ) باربي متحجبة .. خبري يقولون الباربي حرام ، صارت حلال بالحجاب يعني ؟؟؟




مرة كنت حاضرة أحد الأعراس واستغربت من شغلة .. الحين العرس كله رقص وأغاني وازعاج وبالاخير المكان راح يتوسخ .. شفت شي غريب ... فوق مكان الكوشة على الطوفة آية قرآنية بخط كبير ... طالعت الآية القرآنية ... قلت استغفر الله يحطون آيات قرآنية بمكان كله أغاني ومحرمات على ما يقولون ؟؟؟ ليش يحطون الآيات القرآنية بمكان مثل هذا ؟؟ صرت أجيك بالصالات بكل عرس لقيت أغلب الصالات جذي استغفر الله ...






شغلة ثالثة مادري رابعة المهم ، كثرت الأقاويل عن المطاوعة الي يروحون السوق يغازلون استغفر الله أنا ما أشكك فيهم ولا بأخلاقهم ولكن علشان يشوفون البعض لمن يربي لحية مو لله ... والي يحدها مطوع بسيارته تصرخ تقول اي هالسوالف ما تيي الا من المطاوعة ...


وصلت لهالشي يعني ؟؟؟ أنا أدري أن مو كلهم جذي بس وايد من الي يقصرون الدشداشة ويربون اللحية علشان الناس تقول هالانسان ما يغلط وعلشان الي عيونهم عمت عن الحق يقولون (( حتى لو كان على خطأ فنحن معه )) ..
تطلع وحدة شبه عارية ( مفصخة ) وترقص وترقص وتغني وتهز .. وتقول أنا مسلمة وتنتقد المسلمين ، انا أقول حريتها واهي الي بتتحاسب احنا شكو فيها ، بس الي برا يضحكون علينا ، شوفوا يقولون اسلام واسلام وطاع اهم شلون ..!!!!!
لجنة التعريف بالاسلام خوش لجنة والله أول كله اسمع اخبارها الحين مادري بصراحة وايد اقرا عن ناس تستغل الدين بكل ذكاء بعيدا عن سب فلان وقذف علان .. لأن الدين أمانة ما تنحط بإيد أي واحد ...










بالنهاية أقول ... لو أحد يبي يوصل لغرض معين ، لا يحط الدين حجته .. والي يبي يلتزم خل يلتزم بنية صافية مو علشان الناس تحترمه وبس ..




والي يقول أنا مسلم خل يصفي النية مع الكل لأن الطاعة والعبادة لله وحدة مو للشيخ الفلاني ولا السيد الفلاني ...





















سبحان الله عجبتني صورة المسجد وحبيت اعرضه لكم ... ماشاء الله ودي اروح هناك واشوفه على الطبيعة ...







راح ابتعد عن المدونة فترة اسبوعين بسبب الامتحانات وعرس أخوي :D
ادعوا لي بالتوفيق

بــــــــــــــــــــــــــرب











مع تقديري وشكري






طموحة مملوحة

























شوفوا هالفئة المنحطة في المجتمع





أعتــــــــــــــــــــــــــرف

اني صعب أكون على وفاق مع والدتي ... يعني احنا بالبيت 6 بنات كلهم علاقتهم زينة مع الوالدة ماعدا انا والأسباب دائما العصبية الي فيني .. اهي عصبية وانا عصبية حتى السوالف العادية تكون بنجرة لوول

المهم على الرغم من هذا كله وعلى الرغم من نرفزتي الزايدة ، بس عمري ما غلطت عليها سواء بروحي ولا جدام رفيجاتي ...

أنصدم ببنات اقعد معاهم وأدري هالبنات مو قاصرهم شي والتقيت كذا مرة بأمهاتهم وشلون يضحكون معاهم وما يردون لهم طلب وتيي وحدة منهم وتقول (( أمي ......... )) والله العظيم كلام قوي وكبير ...

طبعا انا مبطلة حلجي ... شكو ؟؟

وتيي وحدة تقول أبوي الي فيه وفيه وفيه مالت عليه هالحمار الي فيه وفيه وفيه .... الخ ، والله العظيم يحز بخاطري ليش كل هذا ؟؟

وبقلبي اقول : هذول على أمهم وأبوهم يقولون لهم هالكلام القوي شيقولون عن رفيجاتهم ؟؟؟؟

أنا بعرف شغلة وحدة ... ليش هالسب هذا كله ؟

كل الي اتمناه بدنيتي اني اقدر شلوون اتعامل مع أمي بس خذيت منها العصبية والنرفزة فصعب عليها تتقبلني ... للأسف وأشوف هذول أهلهم يبون يتقربون منهم ، ويقعدون جدامنا يسبون بأهلهم ..

والله ولا وحدة منهم ياية تبي تنادي تقول لي (( يا بنت ال .... )) وقفتها عند حدها ، قلت لها :(( اذا ابوج رخيص عندج عادي تسبينه أنا أبوي غالي علي ولا أسمح لج ولا لغيرج يتجرأ يلعنه أو يقول عنه شي )) ... طبعا قلتها باسلوبي الوسخ لوووول اخترعت البنت ....

لمن يقومون وطبعا نتناقش أنا ورفيجاتي على الكلام الي انقال ، فقالت وحدة (( بنات ما تربوا )) ...

حرام ... ليش كل شي يصير نقول هالبنت مو متربية هالبنت ماتربيت هالبنت اهلها مو مربينها ؟؟ بالعكس يمكن أهلها ربوها احسن تربية بس لمن الواحد يكبر تتغير عنده شغلات (( وايدات )) ، ويتأثرون بالي حواليهم ...

هالفئة زادت والله أكيد مروا عليكم هالاشكال ...

عطوني رايكم بالموضوع

وان شاء الله تتعدل أوضاعي مع أمي .. للأسف من صغري جذي :(




2008-11-07

شخصياتهم بحياتي ..





هلو عليكم جميعا
اليوم ولمن يت لنا ضيفة شحلاتها كانت قطيوة تهبل يوا اليهال يصارخون (( عمة سارة عمة سارة قطوة تهبل تعالي تعالي )) ورحت خذيت القطوة وطبعا استقبلتها استقبال حار حبتني مثل اي قطوة تحبني من أول نظرة لوووول واليهال يضحكون ويصرخون (( تحبج تحبج تحبج )) قعدت والقطوة بحضني اسولف مع نفسي واشوف هالشياطين جدامي وفسرت شخصية كل واحد منهم وماشاء الله بيتنا اليهال أكثر من عددنا لوووول لا إله إلا الله ... فقعدت أحلل شخصية شخصية وإليكم التفاصيل :



.......
.......



أبدي من أكبر واحد فيهم لحد الأصغر :)
عبـــــــــــــــــــــــــــــــــــــــــــود :
شخصية غريبة ، يحب البلاي ستيشن من صغره خلوق جدا أعتمد عليه وايد خاصة اذا محد له خلق يروح معاي مكان آخذه وياي باله طويل فديته ويظل معاي ما يزهق ...وطبعا لازم بالمقابل اغديه أو أعشيه ، مسكين فيه مرض السكري من كان عمره سنة والحين صار عمره 12 سنة ولازم آكل مثل أكله علشان أكون متساوية معاه فما يقول لي ابي شي فيه شكر ... وعلى الرغم من أنه فاشل بالدراسة إلا انه يحب قراءة الكتب ودايم ما يخليني أقرا الكتب العلمية الي يقراهم يشتريهم من برا ، ويقرأ قصص الاجنبية وايد أحب تفكيره وخياله ، بس وايد يصروخ يقول أشياء ماصارت كلش لوووول ابوي يقول في واحد كلامه صواريخ جذاب ، يطالعنا ويضحك يدري عنه اهو لوووول ...
......
.......
.......
فــــــــــاطمـــــــــــــــــــــــــــــــــة :
شخصية سارة الثانية ومن انولدت واهي تحت ايدي واشرافي لووووول نومتها عندي اغسلها وابدل ملابسها وحفاظتها بعد لووول أأكلها واسبحها جنها بنتي حتى كانت تناديني ماما ... المهم كبرت فطوم والحين عمرها 8 سنوات لسان طويل مبلتعة نجرية دلالة ، يقول أخوي ( هذي سارة الثانية ، مابيها تطلع مثلها ) ، بس ماشاء الله خذت من ذكائي بعد لووووول شاطرة بدراستها وتاكل وايد مثلي ، وكل ما قالوا لها خففي أكل تقول (( بصير مثل حبيبتي عمة سارة ))
أحب أقول لها كل أفكاري ، تشاركني الأفكار وايد وتاخذ رايي بكل شي ، بس الشغلة الي تبط جبدي منها انها بدل ما تستغل وقت فراغها بشي سنع تلقونها 24 ساعة مجابلة المسلسلات ، دليل تلفزيون تقول لنا شنو اسم المسلسل ومنو يمثل فيه واي حزة يعرضونه ومتى الإعادة وحتى اغنية المسلسل حافظته، صج صج تبط الجبد .. وأحلا شي فيها أنها تاكل الي جدامها وتاخذ حقها ، تاخذ حقها بيدها ، حتى مرة راحوا السوق جان يقول لها راعي المحل (( شو اسمك يا حلوة .؟؟ )) جان تصرخ (( وانت شكو باسمي بتخطبني ..؟؟ )) صدمة حياته لوووول فديتها والله تربيتي ماتروح علفاضي لووول .
......
.......
......
مــــــــريــــــــــــــــــــوم
بنت اختي العزيزة ، انولدت بدون ما تشوف ابوها والحين عمرها 8 سنوات ما شافته الا 3 مرات فقط وتكلمه بالتلفون مريوم شخصية موهوبة جدا ، متفوقة دراسيا ، في بداية مشوارها الدراسي كانت تيي معاي الكلية وتسلم على رفيجاتي وحبتهم وايد ، وصارت بالبيت تقول للكل أنا بصير مثل عمتي سارة ، بدرس فيزيا واتعقد مثلها لووول وبصير في قائمة الوسط الديمقراطي وأصير صحفية واكون مشهورة مثلها ، أختي تقول لها (( لا نصيحة لا تصيرين مثل سارة دوري لج على شخصية ثانية لوووول )) ، المهم مريوم رسامة ماشاء الله عليها ، وتحب تكتب مذكرات مثلي وتكتب أدق الفاصيل ماشاء الله عليها ،حتى مرة نادتني اختي تضحك ولا أختي قاعدة تقرا مذكرتها ولا كاتبة أول ورقة (( لقد وضعت كاميرات تصوير لكل من يفتح هذه المذكرة فأنا أراقبكم لووووول )) بطيناها ضحك والله أنا وأختي جان اقول لها (( عيب تقرين مذكراتها )) ولا كاتبه حديثي معاها بعد هالفضيحة جان أقول حق مريوم ماتكتب الأحاديث الي تدور بيني وبينها ، انصدمت المسكينة لأني ما أخش شي عن مريوم ، حتى اذا ضايق خلقي فمحد بالبيت يحس فيني كثر هاليهال وخاصة مريم ..
للأسف مريم صارت شخصية عنادية وعصبية مسكينة ماتمسك اعصابها ودايم بالبيت اهي الي تنزف ماتقدر تدافع عن نفسها الا بالصراخ مثلي لوووول
.....
.....
......
غــــــــــــــديـــــــــــــــــــــر
ما حتكيت بهالبنت حيييل بس مع الأسف هالبنت من الحين تفكيرها انها ودها تهد دراستها وتتزوج وتعيش حياتها بدون دراسة ،وللأسف يعود السبب لأهمال الأب والأم مع شديد الأسف بس لمن يوا بيتنا الحين مخرعينها بسارة .. كل ماقالوا سارة ارجفوا من الخوف لوووول أصرخ عليهم (( ماعندنا فشلة هني ... هني دراسة وبس )) لوووول وكلهم يسمعوني سيدة ...
غدير تبي كل شي بيد مريم ، يمكن نسميها الغيرة بس انا بصراحة ما أتحمل شخصيتها ، حتى امي تقول عامليها بليين لا تزفينها ، بصراحة خزتها تخرع لمن ازفها تخرني بنظرة شبه حقيرة لووول
المهم أن صراخي نفع وخوفها مني نفع درجاتها صارت أفضل من أول ، وصارت تفكر بمستقبلها اكثر من اول ..
الي يبط جبدي اكثر فيها انها شايفة نفسها اهي الكبيرة فماتبي اخوانها ياخذون حقهم تبي كل شي لها .. حتى بالنوم تبي كلهم ينامون وحلال عليها تسهر انا عناد اروح انومها غصب ولازم اتهاوش مع خواتي علشانها ... انيمها عصب لوول
.....
......
.....
حمنـــــــــــــــــــــــي
شخصية عبيطة لووول نوعيته الطفل الوسيم ، يخاف لا الهوا يخرب شعره ، يخاف لا شي يخدش ويهه .. اذا صارت في عزيمة أو يوا ضيوف فلازم يكشخ بدشداشته البيضا والجل الي بشعره وعطر لميس الي يفوح منه لووول لا ويكشخ علينا بالانجليزي ، وبرا محطم قلوب البنات يقول لنا (( رفيجتي فلانة زفت وحدة معانا بالصف لأن الثانية كانت تبيني اوقف معاها )) احنا ضحكنا ... ساعات أروح باخذه من مدرسته اشوف هالبنتين كل وحدة ماسكته من صوب ويتهاوشون لوووول ، بس حمني طيب حييييل والله واذا قلت له شي يسمع كلامي وما يخالفني واذا قلت له لا تعلم أحد ما يعلم كلش لو شنو ، شخصيته وايد عاجبتني والله بس شغلة باطة جبدي فيه انه قال لنا مرة (( اذا بتزوج راح آخذ وحدة نظيفة )) احنا انصدمنا يعني شنو نظيفة ؟؟ جان يقول (( يعني بيضة )) @@ اي شي ياهل ياهل طوفوا لوووول ، تغريه البنت الجميلة وطويلة الشعر لوووول حط مواصفات الزوجة من الحين ... صج الحلوين مامنهم فايدة لووول
....
....
.....
شهـــــــــــــــــد

نسختي هالبنت تشبهني حيييييل ونفس تفكيري ومشيتي حتى مرة يت الجامعة اخترعوا من كثر ما تشابهني ، مسكينة طلع لها بهاق بويهها فتعقدت أول أيامها تبجي متعقدة ماتبي احد يطالعها .. بس الحين الحمدلله تأقلمت على الوضع واوديها ساعات لعلاجها ، بنت شطورة وأحب سوالفها حتى ثرمة مثلي لووووول تنطق السين (ث) نفس مشيتي حتى مرة أبوي راح ياخذها من الروضة جان يقول للمدرسة وين سارة ؟؟ اخترعت المدرسة قالت ماعندنا سارة ... وكان قصده عنها ، بالبيت ما يناديها الا سارة وترد عليه نعم ... لووووول
تقول لي (( أنا بالمدرسة كله اسولف عنج واقول لرفيجاتي أبي اصير مثل عمة سارة )) بصراحة لمن اسمعها تقول جذي تحز بخاطري فأدرسها ، وأغلب وقتي أدرسهم واهملت دراستي والله بس المهم ترد هالبنت وتصير متفوقة ،لأن طموحها كبير ... وحرام يروح طموحها ..
......
.......
.......
منــــــــــــــــــــــــى
كلمة هبلة شوية عليها والله ، هالبنت تبي تضحك الناس بأي طريقة ، وعن طريق عرض خبالها امام الجمهور ، ازفها بصوت عالي (( يالله انجلعي )) تضحك .. أنا أعصب أكثر (( شنو الي يضحك ؟؟)) ترد تضحك .. استغفر الله مو صاحية والله ، حتى مرة حطيت اغاني حق اليهال كل وحدة ترقص رقص حلو وتكانة اهي تستهبل ... غريبة هالبنت ماتبيني ادرسها علشان لا اصرخ عليها ، مع انها عصلة إلا انها تقعد اول وحدة على الاكل وتخلص آخر وحدة وتاكل بشراهة مو طبيعية ... تتغدا مرتين وتعشى ثلاث مرات ... ساعات احسها متعقدة من شي بس مو جذي ... لازم نقومها غصب من الأكل ... وصوتها لا تسمعونه يضحك والله ... شكلها يكسر الخاطر بس شنو عبيطة وشيطانة .. ودايم لعبها طق مطاقق ويا اخوانها ...
بس والله اهي الوحيدة من اليهال كلهم الي مو قادرة اتقبلها بس مرة وحدة لميتها بحضني .. ولا بصراحة ما تشجع ولا تكسر خاطري لوووول
....
...
....
خـــــــالـــــــد
تشوفون ويهه ويه ريال وجسمه صغير لوووول ، استغفر الله شكله مافيه براءة الأطفال .. واسم الله عليه ياكل وايد ضعيفون وبس الي فيه كرشة لوووول ...
يبجي على الفاضي وبس حق تنقل الأخبار شكثر أزفه ... اييلنا .. يما شفتي شهد شسوت ؟؟؟ شفتي غدير شحطت ؟؟ شفتي سعد شمسوي؟؟ مايخاف من أحد ولمن ارد من الجامعة ايي يساحلني اهو والبقية علشان ما أزفهم ... ماخذن راحتهم هالكورس ما أرد الا متأخر من الجامعة فعافسين الدنيا بالبيت لووول ...
.....
.....
.....
عبــــــــدالوهــــــــــاب
دايم نغني له ( آه يا الاسمر يا زين ) مدلعينه لأن لونه يحطم لووووول مسكين وفقير وعلى نياته ... ينطق بس ما يطق ... حبوب وصافي النية ، مع انه توه ماكمل ال3 سنوات ، بس كافي صوته يخلي الواحد شوي ويبجي لووول ودايم الصبح وانا اجهز اغراضي وملابسي حق الجامعة يكونون اليهال سابقيني لمدارسهم فاهو الوحيد بالبيت يطق علي الباب (( عمة سالة .. بقعد مآآج )) ويبجي ...ماقدر أرده هالاسمر والله أقعده معاي نضحك ونرقص شوي وبعدين اطلع للجامعة ... أحلا شخصية والله لوووول
....
....
.....


زيونـــــــــــــــــــة


آخر انتاج للعايلة .... كتكوتة وتضحك، شخصيتها مزعجة جدا توها كملت السنة الشهر الي طاف ... بس شنو تضحك عليها حركات ، اليوم تولتني صراخ ماتبي الا تلفوني ، ماتبي الا القلم الي بيدي ، ماتبي الا القلاص الي اشرب منه .. عبيطة والله
لا تشوفون اذا قلنا لها خشمج تعفس ويهها فوق حدر لوووول ، تحب تنطلق للحياه نحطها بالحوش ثواني ولا مختفية تركض ، واليوم بجت لمن شافت القطوة بحضني تبيني اقط القطوة علشان اهي تيي وتقعد بحضني لوووول ....
ولحد يغني جدامها حتى لو اغنية هيلقية ترقص عليها ... احلا شي بعيالنا الفصلات :D
.....
.....
.....
ســــــــــــعد


أكثر واحد قليل أدب وما يحترم نفسه بالبيت ، لسانه طويل وما يحترم الي وراه والي جدامه وعلى كثر ما أطقه ما يستحي يرد يسب .. ومسكين كل ما دخلوه حضانة يطردونه لأنه يعض اليهال لووووول ، المهم الحين صاير وايد محترم وياي كل ما شافني قال بصوت عالي (( ســــــــــــــــــــــــــــــــــــــــــــــــــــــــــــــــــــــــــارة )) يضحكون عليه ... ويساحلني وايد علشان ما أزفه ... ويخليني اعصب من كلامه بعدين يقول خلاص خلاص خلاص خلاص ... ولا اذا يبي يرقع السالفة (( بحبج بحبج ... والله بحبج خلوني احبها )) لوووول
لا واذا يبي يسولف لازم يقول قبل سالفته (( بقول لج شي )) ... المهم اذا بنص السالفة لهيت ورديت اطالعه يرد مرة ثانية ويقول (( بقول لج شي )) لوووووول سميته بقول شي .. من كثر ما يقولها والله ولا يوم مر ماقال هالكلمة ....
الله يخليهم لنا يارب بس من كثر ما تأثرت فيهم قلت مابي اييب عيال لأن لاعت جبدي لووووول ، في شخصية مو موجودة وهي أول حفيد لنا بس ماعرف شخصيتها لأنها مو عايشة معانا مشان هيك ماقدر اقول عنها اي شي واتوقع عمرها الحين 14 سنة ...
ادري كتبت وايد بس لازم اعطيهم حقهم بمدونتي ... بتقولون ليش تزفينهم وايد اقول لكم ماشييين معاي على عجيبن ما يلخبطش لوووول

من الأسباب الرئيسية لطموحي ..


لكل انسان هواية تميزه أو يتميز بها .. ومنذ الطفولة وحب القراءة يملكني فكانت احدى اخواتي تأتي لي بالكتب والقصص كي أقرأ وأستفيد من وقتي بالقراءة ...وذات يوم وجدت مجلة عندها تصفحتها وقد جذبتني بمواضيعها ... فقرأت الغلاف مجلة(( ماجد)) من منا لا يعرف هذه المجلة ؟؟ للصغار والكبار ..تابعت القصص والمعلومات وحتى المسابقات ...كنت أتنافس مع صديقاتي في حل المسابقات وانتظار نشر اسامينا مع الهدية وقد كانت الهدية وقتها بالنسبة لي مشجعة جدا ... من 10 الى 20 درهم تأتيني عبر البريد ... وفي كل عدد ينزل ... كنت أكتشف مافي باطني .. لم أتوقع أن أرسم الكركتير وأتميز به لم أعتقد أن أستطيع أن أجمع العديد من الأفكار وتنميتها عبر مواهبي التي أملكها ... لم أتعلم الوقوف أمام الحشود والتحدث بكل جرأة الا عن طريقها ... لم أتفوق في دراستي الا عبر الأخذ بنصحها .. ليست مجلة ... بل صديق حقيقي لنا .. اتابع الرسوم وممارسة الهوايات من تبادل الطوابع والعملات .. وهواية المراسلة والرسم وحفظ القرآن والكتابة ... والجميع يشارك بها .. ملتقى الدول العربية في هذه المجلة الثقافية الممتعة ... من شخصيات أحببناها جدا ..كبرت ولازلت أذكر أفضال هذه المجلة علي ... لازلت أذكر تشجيعهم لي وممارستي الصحافة معهم .. كانت بدايتي معهم رائعة جدا ... وقد وعدت أن اتذكرها دائما ... وأشجع الجميع على قراءتها ...شكرا لك يا أحلا مجلة ...
طموحة مملوحة