2009-01-03

عفسة بمخي ..



فكرت وايد شنو اكتب بوست اليوم ما مر على بالي شي بس تذكرت تصرفات تطلع من وايد بنات مابي اقول كلهم بس الأغلب ...
تيي البنت تارسة ويهها ماكياج وتوقف على المنظرة تعدل نفسها ، البنت الله يهداها شكلها والله خريطة ، المهم تسولف مع زميلاتها وطبعا الصوت عالي ماقدر امنع نفسي من السمع .. الحديث شنو ؟

_ واي فلانة حلاتي والله أنا أينن ليش محد ينتبه لي؟؟
_ لأنهم مايحبون البنت الجميلة !!
_ يعني أنا جميلة صح ؟
_ اي والله انتي جميلة
..


ويطلعون البنتين .. وأطالع رفيجتي ورفيجتي تطالعني نظرات تعجب ، وأقول لرفيجتي :

طالعي نقاشاتهم مو أنا وإنتي كليتي ؟؟ ماكليتي ؟؟ أنا جوعانة حديييي امشي نروح الكفتيريا لا نروح ماكدونالدز أحسن ؟؟ يالله مشينا ..


مروا علي وايد من هالبنات واستغرب من بنات عندنا بالجامعة ، نظامهم قروب من 3 او 4 بنات ولازم وحدة مميزة
بينهم غالبا ما أسميها (( الزعيمة )) لأن الي وياها يكونون مثل الخرفان تزفهم يسكتون تحركهم على كيفها .
وأغلب هالقروبات يشوفون نفسهم احنا أحلا بنات الكلية .. والله مو عن بس الله يخليهم لأهلهم مامن حلا .


والله أشوف بنات حلوات وجميلات ما يتحجون ، وتقول لي رفيجتي ان دشت وحدة الحمام عزكم الله تعدل ماكياجها جان تقول لرفيجتها : شفتي شلون زفيته ؟؟ شفتي شلون كان متنح بويهي ؟؟!! حطمت الشباب بجمالي .

رفيجتي بلمت وطاح قلم الكحل من ايدها ، تقول والله البنت سحت سحت .

فمادري شنو هذي ظاهرة ؟؟

هل هي ثقة زايدة بالنفس ؟؟

ولا حول عند معظم البنات ؟؟

ولا نقص ويحبون يكملون نفسهم ويقنعون نفسهم انهم جميلات ؟؟


والله مابي اتطنز بس ساعات يسولفون معاي بعض البنات تقول : بالعرس كنت اينن اينن أهبل أهبل حدي جميلة انهبلوا علي ..
حتى لو صج طريقتهم وهم يقولونها ..... مادري شلون والله ...


مادري والله اضحك ولا شقول بس يكسرون خاطري والله :) ..

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ




سؤال :

الحجاب فرض صح ؟؟

والدين الاسلامي ما هدد المرأة بلبس الحجاب ،ولا إكراه بالدين !!

كنت أتناقش بموضوع مع أختي

قلت لها أن مثل ما البنت الي مومتحجبة تقول حرية شخصية ، هم أنا لابسة حجاب بحريتي الشخصية علشان لحد يتكلم ويقول الدين اجبرها لأني ماندمت على لبس الحجاب أبدا ...

جان تقول كلامج غلط والدين فرض ومافي شي اسمه حرية شخصية ، الكلام الي انتي تقولينه غلط ..

للأمانة ما اقتنعت بكلام اختي وأرد وأقول لبست الحجاب بقناعتي وبحريتي الشخصية وحتى سبقت اختي الي اكبر مني بلبس الحجاب مو متحسفة والله ...




ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ


مهمة الصحافة أصبحت بالنسبة لي اليوم أكبر من ذي قبل ، أحاول أن أكون حيادية بالصحافة ولكن الاغلب قال لي ان اتجه لصحيفة أو مجلة تمثل توجهي أو أن تكون مستقلة ...
وهذا ما يدور في مخي الآن لا أعرف ماذا أفعل ..؟؟


ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ



سؤال :

.

.



لو كنت عضو في مجلس الأمة ، شنو راح تسوي علشان تغير للكويت ؟؟ جاوب
بصراحة !!



هل تعتقد أن المدونات أثرت على الشارع الكويتي ؟؟ وبنسبة جم ؟



......................................................................





تدفوا عدل الجو برد حده ....... وكل برد وأنتم بألف خير يارب


25 comments:

حياتي هدف مو عبث يقول...

اول شي ماكو بنت مو حلوه
لكن في بنت اتشوه جمالها
وعاد ما شاء الله تشوية الجمال عندنا عال العال



طالعي نقاشاتهم مو أنا وإنتي كليتي ؟؟ ماكليتي ؟؟ أنا جوعانة حديييي امشي نروح الكفتيريا لا نروح ماكدونالدز أحسن ؟؟ يالله مشينا
ـــــ
هههههههههههههههههههه
انا كله بنااام وصديقتي تبي تسوولف
وانا من اسمع سوالف واايد تيلي الدوووخة :p فتخيلي الووضع
واليوووع اخ من اليووع
:***


اما قروب الزعيمة والخرفان
هاهاها موجود في كل مكان
وما يكسرون خاطري الا هالللي يمشون وراء بنت لأي سبب كان
مساكيين



موضوع الحجاب .. الحجاب فرض ما من اختلالااف فيه
لكن في ناس يقولون انتي مجبوورة على لبس الحجاب لأن الله فرض هالشي ولانه من الاسلام
وأنا أقوولهم .. الله عطاني حرية الإختييار
فأنا اختررت الحجاب وأستطيع أن انزعة
بسهولة لكن لا أنزعة لأني مقتنعة فيه
إذا هو من اختياري بالغض ان كان فرض ولا لأ
ومثل ما الاخر لدية الحرية في عم لبسه
انا حريتي في لبسي للحجاب
:))
عرفتي
:p


تبين تكونين محايدة .. سمعي للطرفيين
حكمي عقلج وضميرج واولا واخيرا الله سبحانه
ودايماً حطي نفسج في مكان من تريدين الكتابة او البحث عنه


سؤال : . .

لو كنت عضو في مجلس الأمة ، شنو راح تسوي علشان تغير للكويت ؟؟ جاوب بصراحة !!
ـــــ
أطبّق الحكومة الالكترونية :)
هذا أولاً
وثانياً مادري شنو بس هذا في بالي حالياً



اززين عندج حل حق الصداع مع وقت الدرااااسة راسي عاوز ينفقررررررر
:((((

صبا يقول...

البنات ينو واستخفو

اتصدقين انا استحي اذا احد مدحني ولو اموت ما امدح نفسي ...

ومداح نفسه اشيبيله .....؟؟

والبنات قاعدين يعفسون ويوهم بهالاصباغ الي مالها داعي

اذا كنت بالحكومه اغير التعليم الداثر
واعدل المناهج ,,,واهتم بالصحه اكثر
واكثر


وسلامة قلبج وتعيشين يا قلبو
:)

صبا يقول...

حياتي هدف


روووووحي درسي ولا تقعدين اجنال اللابتوب

ووخري عن المراكز الاولي

عطيني فجه شوي
:***

Kuwait يقول...

عفستي مخي وياج لوول ;q
تب على الراس وتب ميك اب بالويه هذا نظام بنات الكويت هالأيام الحمدلله والشكر لووووووووول :\
انا ورفيجتي من الثنويه لليوم نقاشاتنا بروح بيت يدتي اليوم وبنمر على فلانه وعندنا عزيمه وانتي الي رايحه لوووووول ..
سالفة الصحافه أعتقد قناعاتج إهيا الي تحدد شنو تبين وشنو توجهج ووين تبين تكتبين بالضبط وعن شنو وليش :)
بالنسبه حق سؤالج ..
لو كنت عضوه بمجلس الأمه ما راح أقدر أغير شي نهائيا لاني أبي الإصلاح بروحي بينما اكو 49 عضو غيري يمشون ورى مصالحهم بالاضافه إلى أعضاء الحكومه الي حول ال 16 وعليك الحساب :)
أما سالفة ان المدونات تأثر على الشارع ..
فأنا أقولج اي نعم تأثر وأكبر دليل إهتمام النواب بالاطلاع عليها بالاضافه إلى الصحافه الي إلتفتت بدرجه كبيره للمدونات هذا بعد غير عن بعض البوقات الفكريه الي يبوقونها الكتاب وغيرهم :)

alsaronah يقول...

حياتي هدف مو عبث

والله أنا قناعتي مثل قناعتج بالحجاب ..
وصح كلامج ترا شكثر بنات يقطون حجاباتهم من ورا اهلهم وليش لأن في بالهم شي ان احنا لابسينه غصب لو كانت هالشغلة على اقتناع وبشرح الأهل للبنت أهميته ماعتقد سوت هالشي . .

وعلى الحكومة الالكترونية طبقوها ببعض الوزارات بس ماكو فايدة .. يعني طبقوها بالجامعة بس بعدين يقولون سجلوا باي فورس والباي فورس يعني تسجيل أوراق بس مكشخين اسمه ترقيع يعني لووول ..


انا أقول لج والله حطي لج كباية شاي والله ينعنش ويخليج تدرسين ياقلبي .. :)

alsaronah يقول...

صبا

اوكي مو مشكلة كلنا نحط ماكياج ببساطة ونحب نظهر نفسنا بشكل حلو ..

بس مو جذي لوووول

تصدقين والله اذا احد مدحني ويهي يصير طماطة شوي وادوخ لووول ماحب ماحب نهائيا فما بالج أمدح نفسي؟؟ لوووول حد أمه طراق لووول


والتعليم عبئ كبير
انا قالوا لي يصلح لي اكون وزيرة في وزارة الشؤون الاجتماعية والعمل ... بس ماعتقد أصلح لهالموضوع لأن أي نائب بيقول لي انتي وانتي ... بطخه بالرصاص لووول

alsaronah يقول...

Kuwait

البوقات الفكرية والله مساكين هالمدونين يفكرون ويتعبون وبالأخير مبيوق تعبهم لوووول ...


أقول لج انا كنت اشتغل بجريدة تختلف نهائيا عن فكري فساعات اشوف اشياء ماتعجبني ودي انتقد الجريدة وكل ما اتكلم يقولون لي شلون تنتقدين الجريدة الي انتي تشتغلين فيها فطلعت منها وقلت عني ما اشتغلت ابي اتكلم بصراحة ماحب اشوف الغلط واسكت ...

swan.beach يقول...

صباح الورد

اسئلتج واايد عفست مخي صرااحه

الصراحه مافي احد مو حلو الحين

سواء جميله بشكلها او اخلاقها

البنات كلهم حلوين

بس وين الي تقتنع

الحين اسم الله عليهم اشوفهم مايفكرون بشي الا انا حلوه شافوني شقالو عني

عسى الله يهديهم ان شاءالله

اما على الزعامه هذي الله يسلمج منتشره واايد مو بس مع بنات الجامعه حتى الابتدائي
اشووف وايد من التلميذات جذي حلوه وكوول تصير ليدر عليهم

.........
على الحجاب اله يبارك لج فيه ويثبتج

والحجاب صح فرض على كل مسلمه
بس الاغلبيه اختاروه ويقدرون ما يلبسونه
الاقتناع بالاول هذا بنظر الكل الحين
لكن الصح اهو فرض على البنت منذ البلوغ

لانه ستر لها وما يجكرها الا يجملها ويحليها بعد

بس الي نشووفه هالايام اتحسف على المتحجبات لانه شووهووه

.................

حبيبتي على الكتابه اختاري مجالج لانج بتبدعين فيه
اكثر من اي مجال ثاني

وعلى مجلس الامه والمدونات ماعرف لهم صراحه


تسااؤلات واايد حلوه وان شاءالله نشوف اجابات عليها

اشووفج على خير حبووبه :))

alsaronah يقول...

swan.beach

احلا ولكم للي نورت مدونتي اليوم والله و1000000 ولكم لج ..

والله الصراحة أنا أذكر الزعيمة هذي شفتها بالابتدائي لمن يماشون بنت الأبلة علشان تكون واسطتهم لووول .. وبالأفلام الاجنبية دايم اشوف جذي ...

فديتج على ردج الجميل لموضوعي يالغالية وراح أرد آخر شي وسوري على عفستي والله آسفة ..

Um il sa3af wil leef يقول...

حلوه صورة البوست ..وفي وايد يشابهونها:)وإختيار موفق للأغنيه ..أما بالنسبه للسؤال فلا تعليق

{~المباركية~} يقول...

او شي
غيري اللون الاحمر لانه ماقمت اشوف شي
ثاني شغله لانه البنت موحلوه وقاصه على نفسها اتقول انا اينن

Q8EL5AIR يقول...

اختي العزيزة سارونه :)



بالنسبة لموضوع الجمال الانثوي الكويتي !!


صج والله في بنات جذي سوالفهم !!

حمدلله والشكر !!


للاسف هذا يدل على تدني مستوى التفكير . والعقل !!


وهذولي ناس اذا كلمتيهم باي موضوع تلقينهم ناس فارغين من الداخل .. ماكو شي !!

عايشين بهالدنيا وبس .. اكل - طلعات - نوم - كشخة - ...!!!




بالنسبة لموضوع الحجاب :)


الحرية الشخصية بالدين مقيدة بقيدين .. عدم الاعتداء على الغير - وامور الدين !!

والحجاب مثل ماتفضلتي اختي ان فرض وهذا شي متفقين عليه .. اما الحرية في لبسه فهذا اخالفج عليه .. بما انه فرض فيجب عمله .. كأي فرض اخر من امور الدين .. ولكن الاجمل هو اقتران هذا الفرض بالقناعة والاختيار ..

فالبنت الي تلبس الحجاب لانه فرض فقط !! .. من دون قناعة .. فهذا فيه قصور بالاختيار .. !!

وكون اي بنت لها الاختيار بالبس او فسخه فهذا صحيح وماعليه خلاف .. ولكن تكون آثمه اذا مالبسته !!


اما الي تلبس الحجاب لانها تدري انه فرض وهي مقتنعه فيه .. فهذا الاجمل والاحسن ..

وهذا المطلوب في امور الدين ..وهو القناعة بالعمل ومعرفى الحكمة منه .. بالاضافة الى الطاعة لامور الدين ..

فهي عملية حسابية ( طاعة + قناعة = هو الافضل .. وهذا الي ينشده الدين.





بالنسبة للصحافة :)

رايي المتواضع هو ان تكون المجلة مستقلة افضل !!




بالنسبة للسؤال !!


العمل هو تغيير القياديين والمسؤليين .. تجريم الواسطة .. عمل خطة لمدة 20 سنة !!


اثرت .. بس ما اقدر اقيسها .. لانها مو وسيلو عامة .. مقتصرة بس على المدونيين !!




وتحياتي ..


دايما مواضيعج الاجمل :)

ويسلمواااااااااااااااا :)

Enter-Q8 يقول...

لو كنت عضو في مجلس الأمة ، شنو راح تسوي علشان تغير للكويت ؟؟ جاوب
بصراحة !!


قبل ما اكون عضو احاول ان ابحث عن البدائل الممكن تحقيقها فعليا و من ثم اسعى لوضع تشريعها
و كذلك سن تشريع خاص بحق لجوء المواطن الى المحكمة الدستورية
و ايضا الغاء مكمة الوزراء


تأثير المدونات اهو مو تأثير لكن نقول انها صوتها اصبح مسموع خصوصا لدى السلطة التشريعية

alsaronah يقول...

Um il sa3af wil leef

ليش لا تعليق قولي رايج :)

alsaronah يقول...

{~المباركية~}


من عيوني راح اغير اللون الحين

alsaronah يقول...

Q8EL5AIR


اختلفت معك بوجهة نظر ولكن لاحظ ان الهدف واحد .... يليت المجلس يكون جذي بعد :(

alsaronah يقول...

Enter-Q8

اذ الغوا محكمة الوزارات في سلبيات راح تحدث ؟؟

ZooZ "3grbgr" يقول...

موتيني خرعه من اول صورة

اففففففففف


وبعدين اموت بالبرد

ابي بعد

عسى الله يديمه يارب

مابي صيف مااابي

أما الحجاب

اذا انتي واختج عندكم بنات

وصاروا بسن تكليف

تتوقعين شلون راح توجهونهم بالحجاب

:*

Q8EL5AIR يقول...

وان شاء الله دوم الهدف واحد :)


اما مجلسنا فان شاء الله .. بس المشكلة في شرط .. وهي انه اتعدل العقول .. وهذي شوي صعبة !!


نشيت لا اهنيج على " الدزاين " اليديد للمدونة :)


ذوق جميل :)


وتحياتي ..


ويسلموااااااااااااا :)

Alikingkw يقول...

زكية شي عجيب :)

لووووول بيييييه
تحررج على روحها ؟!

الصراحة نقاشكم وايد احسن

والله سوالف البنات فيها مصاخة ها ؟

والله تساؤلاتج صعبة عليي ما عرفلهم

مدحيهم خليستانسون .. وناستهم سهلة

وفيما يخص الحجاب اذا فرض والا لا مادري

شي اكيد لا اكراه في الدين

كل واحد وكيفه والأجر على الله

إذا تلقين شي يمثل توجهج أحسن ...بس بشكل عام الصحفي ممثل بدرجة معينة
يعني مو بالضرورة الكلام الي يقوله يمثله اهوا.

اختاري الي يريحج

لو كنت عضو من اعضاء مجلس الأمة جان سويت مركز ثقافي فني رياضي في كل منطقة من مناطق الكويت حتى لو مجرد اماكن فارغة بس اوفرها عشان الناس يبدعون فيها ... أي اهتمام

والله مادري اذا المدونات مؤثرة والا لا بس انا شخصيا تأثرت فيها
عموما انا جديد في هذا العالم

وانت بخير وصحة وسلامة :)

alsaronah يقول...

ZooZ "3grbgr"


البرد حلو بس مو الصقيع يخرع والله ...

بصراحة ماراح افرض الحجاب على بنتي نهائيا وراح اخليها اهي تيي من نفسها وتطلب لبس الحجاب مثل ماسويت .. الحمدلله ابوي علمني هالشغلة اتخذ قراري بنفسي وبقناعتي افضل :)

alsaronah يقول...

Q8EL5AIR


شكرا لك والحمدلله عجيبك الديزاين لأن الي قبله حسيته شوي ملخبط ومو مرتب صراحة

alsaronah يقول...

Alikingkw


زكية اتينن والله .. ساعات يكون الصحفي مقيد بتوجهات الصحيفة أو المجلة فما يقدر يبدع ويكون محكور في نطاق معين عكس الصحفي الحر .

كبرياء وردة يقول...

هذا مرض وانا خويتج، قولي الحمد لله يكافينا الله الشر
يوعتيني
اهو الحجاب فرض على كل بنت بالغة عاقلة
بس الله سبحانه وتعالى قال لا اكراه في الدين
الله يتمم عليج بتمام الدين والعقل

طموحة مملوحة يقول...

كبرياء وردة

اشكرج يالغالية على كلامج الطيب ..

بس في ناس تحب تمسك على الدين .. فالمفترض ان تكون هالنقطة في بالهم ..