2009-01-11

مــــاذا يريدون ؟؟


لا زلت أستمع كل يوم لقصص جديدة من بطولاتي التي يؤلفها أولئك الحاقدون ..
صديقة مقربة جدا مني ، قالت لي أن أناس نصحوها بعدم الجلوس معي ...!!
لماذا ؟؟
لأني متحررة ولا أعطي للأمور أهمية !!!
أنا لم أؤذي أي أحد ..
وأعطي للجميع تقديره واحترامه ..
ولا أتعدى حدودي مع الغير ..
فما الذي يريدونه ؟؟
أرى أن مجتمعنا يحب أولئك الذين يستشرفون على الخلق ..
لتأتي فلانة بكامل أخلاقها وتقول حرام وحلال وعيب ولا يجب والمفترض
وجزاك الله خيرا وأعوذ بالله من غضب الله ، وسمعة فلانة وعرض فلانة ..
وبعدها نجد أن مافي باطنها يختلف تماما عما نراه ..
هنا تكون ردة فعلي عادية ..
فهي مسؤولة عن تصرفاتها وهي حرة بماتقوم به ..
ولكني لا أسكت ..
ان اساءت لي أو استغلت قناعها هذا بطعني ..
مجتمعنا يحترم من يقف ويقول أنا أخاف على أختي وأخاف على سمعتي وشرفي
وبعد ذلك يطعن بشرف فلانة ويشوه سمعتها ويتحدث عنها أمام الجميع ..
ويعتبر نفسه بعد ذلك كله ...... (( رجــــــــــــل ))!!!!
.................
يحب مجتمعنا الناس المتلونين .. تجلس فلانة مع اثنتين من صديقاتها ويتحدثن بفلانة وفلان و النميمة تأخذ مجراها وبعد ذلك تستأذن احدى الفتيات الثلاث لتظل الاثنتين يكملن نميمتهن اضافة الى ذلك التحدث عن صديقتهن التي غادرت قبل دقائق ...
قابلت فتيات كثيرات أنواعا وأشكال .. أتعلم منهن .. حتى الخبيثة تعلمني ...
وجدت فتيات في كامل الأخلاق والأدب لو مهما حدث لا تتكلم بالسوء حتى عن عدوتها ..
وجدت قتيات متدينات في المظهر ولكن مابداخلها فالله من يحاسبها ولست انا ..
وجدت فتيات في نظرة المجتمع هن فاجرات من ملابسهن ولكن لم أجد أفضل منهن بالأدب والأخلاق
ووجدت فتيات كل واحدة فيهن تستغل جسدها وشكلها فقط في اغراء الرجال وكأنها رخيصة ..
النوع الأخير أتألم منه بصراحة لأني أعرف فتيات رائعات جدا ولكنهن مقتنعات بهذه التصرفات على الرغم من نصائحي فلا فائدة ..
................................
أنا لست كاملة ..
ولكني مللت من الوجوه التي تؤذي ..
مللت من الأقنعة الزائفة ..
مللت من الأحاديث التي ينقلها الآخرين ومن دون أدلة مجرد قصص خيالية غريبة جدا ...
ـــــــــــــــــــــــــــــــــــــــــــــــــــــــــــــــــــــــــــ
.
.
بالأخير ضحكت مع صديقتي فقلت لها : تذكرين لمن كنت مستجدة .. وكنت قاعدة معاج بكلاس فدقت فلانة وقالت لنا انتوا مواعدين على البحر الحين ؟؟؟ اشاعة فرش :D
ونحن في أماكننا نستقبل القصص التافهة..
فأعاننا الله على هؤلاء المرضى ..
في السابق كنت اعتقد أن الحركات هذه لا تصدر الا من الفتيات
ولكن البعض في مجتمعنا قد فسر المساواة بشكل خاطئ
فأصبح الرجال كالنساء .. يجلسون للنميمة والقذف والسب
..................................................................
مـــــــــــــــوقف :
وحدة من البنات الي كانت ترتدي قناع الحرام والحلال وقال الله وقال الرسول ... كانت تكلمني عن بنت عمتها فقالت لي ان واحد تقدم لها وأهله سألوني عنها فقلت لهم أن البنت مو زينة وتكلم ، انصدمت من قلب ،قلت لها : حرام عليج توقفين نصيب البنت ، عسى الله يهديها يمكن هذا نصيبها وقفتيه ؟؟ ماتدرين يمكن بعد ماتتزوج تصير زينة . فردت علي : لا يبا تكلم واحد شكو زينة !!! أنا قلت الصج علشان ما ينغشون فيها .
وأخيرا طلعت هذي الاستاذة الي قالت لي هالحجي .. تكلم واااااااااااااااااايد وعلى بالها اني مسبهة مادري شالسالفة .. بس وخرت عنها
قلت بيني وبين نفسي : هذي الي منها وفيها قالت عنها جذي شراح تقول عني من وراي ؟؟
مايشرفني بصراحة أماشيها .. الي مافيه بأهله مافيه خير بالناس ...
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

47 comments:

violeta يقول...

من يتكلم في اعراض الناس بالسوءسواء من رجال او نساء يكونون بالاصل ناقصين نفسيا او هم اللي فيهم كل العلل !!
وياكثر هالمواقف اللي تصير لو يسمعوت كلمه يسونها جمله لي موضوع كامل بس عنج وهوو كله تأليفات !!

<< فيها حرره !!

ما نقول غير ربي يشغلهم فيه نفسهم
:)

طموحة مملوحة يقول...

اي والله لو نتكلم من هني لباجر والله مانخلص وياكثرهم والله بمجتمعنا ...

والله مرة ارتحت لمن وحدة قالت لي مرة : سارة انا ارتاح لج لأن لو شنو تشوفين بأحد ماتتحجين عليج من نفسج ... الحمدلله اني مو مثل هالناس والله الحمدلله الله يثبتني لووول ..

Kuwait يقول...

انا اقولج
"دعي الـ... تنبح والقـافله تسير"
:*

SHAHAD يقول...

تدرين ليش يطلعون كلام وقصص !!
لأنهم محترين وحاقديين
هذا السبب بكل بساطة !

إذا أتتك مذمتي من ناقص فهي الشهادة لي باني كامل : )

وما كامل غير الله سبحانه .. بس تظلين أحسن منهم بواااايد بعد

مالج شغل فيهم ولا تحرين أعصابج ولا شي
انا هالنوعيات كانوا يبطون جبدي وأعصب
أما الحين أعطيهم أكبر طاااف : ))

Enter-Q8 يقول...

العالم كله جذي مو مجتمعنا بس

mo3ath يقول...

اعتقد انج وصلتي مرحله من العقله تعرفين ان الاغلبية هذا همها وشغلها الشاغل ويوم عن يوم قاعده تكتشفينهم ، ليش تحرين نفسج وتحرقين اعصابج وانتي عارفه ان ذيل الجلب ( وانتوا بكرامه ) عمره ماراح يتعدل :)

طولي بالج وريحي نفسج والباب الي ايي منه ريح سده واستريح ، هذا اسلوبي بالفتره الاخيره ، تعبت وانا احاول اعدل في ناس ماتبي تتعدل والله عاد انت كيفك وعقلك براسك وتعرفك خلاصك :)

try it

طموحة مملوحة يقول...

Kuwait


صح لسانج :D

طموحة مملوحة يقول...

SHAHAD

انا مو محترة بس كل يوم اشوف اشكال يديدة ..


حتى الكبار الحمدلله والشكر

طموحة مملوحة يقول...

Enter-Q8


يمكن.. بس المجتمع الشرقي اكثر

طموحة مملوحة يقول...

mo3ath


انا صرت عادي اسمع كلام قوي واضحك

حياتي هدف مو عبث يقول...

خل يولون
باختصااار جداً جداً :**

Fskra يقول...

ma 3lich mn a7d el deniya t5L9 o 7chy el nas ma y5l9 !


eli entay mqtn3a feeh saweeh o

la y2throon 3lich enty 3glch fe rasch o t3rfen eli tsawena

mewafga fe 7yatch ya rb :* o 5osh blog ;)

ARTFUL يقول...

الناس ما تخلي احد شلج فيهم

بس قوليلي وين الصوره اللي فوق؟؟

كاريكاتير يقول...

مرحبا


في مثل هذه المواضيع والمواقف السخيفة استخدم الحكمة القائلة

طنش والواثق من نفسه لو يقعد مع ابليس ابليس يبتلش فيه ويخاف يتوب..

الناس المريضة اللي تطعن بالناجحين اللي ترى لا حياة من غير نميمة ولا تنفس من غير طعن بسيرة فلان وفلانة

الحاقدين بالنهاية يحرقون نفسهماذا عرفوا ان فلان طنشهم وما عطاهم ادنى انتباه!!

محمد سعد القويري يقول...

الأخت طموحة مملوحة

الأقنعة

لا أحد ينكر وجود الأقنعة

بل نضطر حتى في بعض الأحيان ارتدائها

أنا شخصيا لدي بعض الأقنعة

ومع هذا يجب أن يكون لكل منا شخصيته الخاصة والواضحة

تحياتي

طموحة مملوحة يقول...

حياتي هدف مو عبث


حد أمه :p

طموحة مملوحة يقول...

Fskra


شكرا جزيلا :D

ويعطيك العافية على النصيحة

طموحة مملوحة يقول...

ARTFUL


اي صورة بالضبط :) ؟

طموحة مملوحة يقول...

كاريكاتير


عدل كلامك اكيد انت مار بهالشي... :)

طموحة مملوحة يقول...

محمد سعد القويري


أخي العزيز هناك أناس ترتدي الاقنعة لخدمة الآخرين وعدم التعرض لأي شخص كان ويلقيي به الضرر هذه الأقنعة لا بأس بها ..
شكرا لك نورت البلوق:)

Free_Moi يقول...

مساء الخير

زياره جديده لمدونتج بعد وقت طويل

مريت مرور طويل على اغلب المواضيع وانتبهت لشي واحد انج وايد معطه اهميه للي يتكلمون
او بشكل عام وايد تذكرين فلان تكلم وفلان قال عني


نصيحتي لج خلي اللي يتكلم يتكلم مجرد ذكرج للموضوع يعطيه اهميه

اتوقع عندج مواهب اكثر من جذي

خلينا نشوف مواهبج احسن من فلان قال عني وفلان اذاني
لانه لو فيه خير جن نفس مايقوله من وراج يقوله بويهج

وشكرا
اختج فاطمه نعمتي :)

ابوالوليد يقول...

الغيرة أساس كل المشاكل

أول جريمة في التاريخ سببها غيرة قابيل من أخيه هابيل

الله يبعد عنا مرض الغيرة

أخبار الاتحاد يقول...

التلون/ النفاق/ الازدواجية
مشكلة قديمة قدم الإنسانية

ليس الحل طبعًا أن "نخربها" تماما :)
بحجة أننا لا نريد أن نكون منافقين!

الحل أن "نحاول" أن نجعل باطننا جميلاً
كما أن ظاهرنا جميل أيضًا بفضل الله

شكرًا للصراحة الكبيرة
وفعلاً هي أمراض اجتماعية تتطلب حلاً

وصدقتن فكثير من رجال اليوم
مجرد ذكور ولا حول ولا قوة إلا بالله!

Alikingkw يقول...

كلام الناس عن الناس مو مهم
الظاهر انج مستاءة من الملفقين لأن هذي مو اول رسالة تكتبينها عنهم.

حقريهم وامشي بدربج

انتي نشيطة وتشتغلين واجتماعية ... وهذا النموذج المطلوب في اي مجتمع ناجح.

طموحة مملوحة يقول...

Free_Moi

أختي الغالية فطوم ..

أول شي يسعدني مرورج وتعليقج على المدونة ماتدرين شكثر ردج فرحني يالغالية ..

لكن احنا مثل ماتعرفين نظام الجامعة يحبون القيل والقال .. وبصراحة شفت وايد وكل يوم اشوف واذا شفتج بأقرب فرصة راح اقول لج شغلة ماراح تتوقعينها لووول وصارت اليوم مادري اذا وصلج خبر ... بس صج الله مايضرب بعصا ... يعطيج العافية على ردج وأتمنى ما تطولين علينا :)

طموحة مملوحة يقول...

ابوالوليد

الطيبيين قلوا بهالدنيا والله ..

يسعدني مرورك بووليد

طموحة مملوحة يقول...

أخبار الاتحاد


أشكر ردك العطر للموضوع ويسعدني مرورك

طموحة مملوحة يقول...

Alikingkw


للأسف أخوي وايد ناس تعرف أنا شنو فما يردون ووايد يمشون على كلام الناس ...


للأسف أغلب الموجودين اليوم فوق ماهم يكرهوني يحاولون يكرهون الناس فيني .. طبعا هالشي صعب عليهم بس يحز بخاطري لأني ما أذيت هالناس وفي منهم الي ماعرفهم نهائيا بس مادري شعندهم .. مو بايقة حلالهم والله :p

أحمد الحيدر يقول...

يعطيج العافية أختي ..

بالنسبة للي يستنكرون شي ويسوونه فهم واااايد بكل أسف بمجتمعنا ..

كلنا فينا عيوب .. لكن الكل عند عيبه عمي ..

ومع الأسف بدال لا نداري عيوب بعض ونستر مثل ما الدين أمر تلاقينا أول من يفضح وينتقد لا ويتشمت بعد !!

وكذلك النميمة وانتشارها بشكل فاحش في مجتمعنا ..

قبل كنت أسمع كلمة لا تحشون عيب .. يمكن أكثر شي من الوالدة .. الحين لما كبرت وصرت الله يحفظها مقصر بحقها وما اقعد وياها كثر اول ما قمت اسمع احد تقريبا يقولها .. بالعكس اذا صار حش الكل يحب يشارك !!

عندنا بالكويت كلمة تقول الرجال مخابر مو مظاهر ..

بس حبيت أختم فيها تعليقا على فقرتج المتعلقة بالرجولة :)

بوست جميل .. إلى الأمام دائما ..

منطلقة بطموحي يقول...

الله يهديهم ويهدي الجميع
كما تدين تدان .. الكلام اللي يقولون عن الناس مرده راح يرجع عليهم و بيشوفونه بعينهم .. والله يهمل ولا يهمل ..
قولي " حسبي الله و نعم الوكيل " .. ربج قوي و بتشوفين شنو يسوي فيهم ..

الله يحفظج اختي طموحة مملوحة و يبعدج عن هالأشكال ..

بس عندي نصيحة و اتمنى انها ما تضايقج و تتقبلينها بصدر رحب و مملوح مثلج ..

يا ليت ما تحطين اغاني ورى كل بوست .. خصوصا هذا البوست اغنية لذكرى و لبسها عاري و المرا متوفية ، اخاف تتعذب على هالشي .. بدل لا ندعيلها بالرحمة و الله يغفر لها ..

اذا انتي حابة تختمين البوست بفيديو ، يو تيوب مليان فيديووات حلوة و مفيدة .. ليش نزيد آثامنا و آثام اللي غناها ..

كان ودي هالنصيحة تكون بيني وبينج و مو جدام الناس و التعليقات ، بس ما اعرف اوصل لج .. فأنا اسفة حدي و اتمنى انني ما سببت لج ازعاج.

صدقيني قصدي انني افيدج و اعطيج نصيحة من قلبي ..

اسفة مرة ثانية .. اذا ضايقتج ..

منطلقة بطموحي يقول...

اسفة بدلية في ردي السابق ..

" الله يمهل و لا يهمل "

Alikingkw يقول...

ما تعتقدين انهم يغارون منج مثلا ؟

طموحة مملوحة يقول...

أحمد الحيدر


والله أذكر كنا نقعد شلة بنات قبل فترة وكان شعارنا تبي تسولف سولف وافصل بس لا تحش ولكن مع الأسف صارت مشاكل وصارت كل وحدة بروحها ... استغفر الله ساعات اشوف بنات يحشون احب اسمع لهم استغفر الله بس ما اشارك ... حتى لو شاركت بشي بسيط استغفر الله صج الشيطان شاطر :(

شكرا لك على التعليقات الي تزيد من روعة المدونة

طموحة مملوحة يقول...

منطلقة بطموحي ...

ماطلبتي شي يالغالية .. ومافيها احراج ومن عيوني الثنتين ..

اشكرج على ردج والله العالم شلون كنت اعامل هالبنات بكل ادب واحترام ولا اقلل من شأنهم بس للأسف كان الرد العكس مو كلهم طبعا ...

طموحة مملوحة يقول...

منطلقة

سبحان الله مامر على موضوعي يوم شوفي بوستي اليديد شصار استغفر الله ..

طموحة مملوحة يقول...

Alikingkw

والله أغلبهم جذي ... أول كنت اقول لا شنو غيرة أنا الحمدلله متميزة بس مو لهدرجة لين شفت وحدة جدامي أشكرة تقول لي انتي مو احسن مني ... ولا تحطين ببالج كل الناس تحبج ... وجمالج ماكياج اشكرة لووووول يعني اشياء تضحكني تحسسني جني حليمة مو سارة لووول .. الغيرة وصلتها لمشاكل ندمت لي يومك عليها لأن الي يتعدى حدودي ماخليه والله ... ومتضايقة لأنها كانت رفيجتي بس شيء متوقع من وحدة تذم أهلها ...

منطلقة بطموحي يقول...

هلا اختي طموحة مملوحة :)

يزاااج الله خير على تقبلج للنصيحة بصدر رحب :) مشكورة وايد على اسلوبج الحلو .. الله يحفظج :)

اي عقبها قريت البوست اليديد سبحان الله ربج يمهل و لا يهمل :)

عشان جذي الواحد لازم يكون واثق من نفسه، و ربج ما راح يخليهم :)

لا تضيقين خلقج .. عيشي حياتج .. و عطيهم طااااف :)

طموحة مملوحة يقول...

الله كريم


والله ارتاح وايد لمن اشوف ناس طيبة مثلج ومثل وايد غيرج مروا علي ... الحمدلله

منطلقة بطموحي يقول...

بعد عمري ، و الله هذا من طيبج و طيب اخلاقج :)

اسعدتيني بكلامج :*

طموحة مملوحة يقول...

فديتج والله يالغالية انا الي سعيدة بوجودج بالمدونة :)

Alikingkw يقول...

اذا كانت تغار منج معناته تحبج ...الغيرة ما تنبع من الحب؟

انتي قلتي ان الغيرة شعور بالاهتمام الزائد أكثر مما هو انزعاج..أم أن كل غيرة لها حالتها الخاصة ؟

طموحة مملوحة يقول...

Alikingkw


في فرق بين اغار عليك واغار منك .. اغار عليك يعني احبك واخاف عليك

اغار منك يعني انقهر منك وأتمنى لك الشر ...

لمن تغار وتأذي الشخص الي انت تغار منه مو معناه الحب

Alikingkw يقول...

يعني الغيرة ممكن تكون احساس حلو وممكن تكون احساس بغيض ؟

لأن حسب ما ذكرتي في حالتين شعور الغيرة موجود ولكنه تارة يعني الحب وتارة يعني البغض أو الحقد ... فما الغيرة بذاتها ؟

طموحة مملوحة يقول...

اسئلتك دقيقة اوعدك احط موضوع اكتب فيه الغيرة بنظري بكل الحالات

Alikingkw يقول...

:)

الي تشوفينه ... على العموم الموضوع مطروح للنقاش سواء كان في هالرسالة أو في مدونتي أوفي رسالة مستقبلية في مدونتج.

شكرا :)

طموحة مملوحة يقول...

اي برد على مدونتك ترا والله مانسيت صج صج صج


بس والله خل اخلص امتحاناتي واقعد لك قعدة اتفلسف فيها على راحتي لووول

Alikingkw يقول...

تيك يور تايم :)

والله يوفقج في امتحاناتج