2009-01-15

يالهوي على تخاريفي !!!

أدري موضوعي ماله هدف بس مجرد سوالف علشان جذي حطيتهم ببوست واحد :p




رديت من الجامعة اليوم وكنت حدي مغَلقة ومالي خلق ، دشيت غرفتي ولا اشوف اختي الي اكبر مني بسنة تفتر حوالين نفسها وتبجي قلت لها شفيج بعد ؟؟
ولا تقول لي : سارووو في ناس بتيي بعد شوي وامي تقول لي لبسي ملابس حلوة ولاتحطين وايد ماكياج .
أنا : وناسة بيخطبونج ؟؟ روحي كشخي !!
اهي : مالت عليج مابي اتزوج ويييع !!!
أنا : شنو هذا بيتنا بيت العوانس يالله تزوجي فكينا بس .
أمي تدش علينا بالغرفة معصبة : إنتي لسة مالبستيش؟؟
اهي : يما مالي خلق مابي مابي !!!
أمي : اسم الله اسم الله الي يشوف يؤول الرجالة مسطرين ادام الباب يختي اومي البسي .
أنا : مو لازم تلبسين وتسلمين يعني بتعجبينهم .
جان تبطل عيونها : شلون ؟
أنا : روحي نزلي وسلمي واستانسي و قزريها عليهم .
جان يضحكون ولا تقول امي : ايوة يختي تعمل زيك يالهبلة؟؟ .. لووول
أنا : والله صج ، ياية من الجامعة وبدرس عندي امتحان ويدقون علي لبسي ونزلي سلمي ، من كثر ما بجيت وقلت مابي مابي صرت عادي بعدين كنت لابسة تريننق وكنت توني مغسلة ويهي من ماكياج الجامعة لوووول ونزلت تحت الابتسامة العريضة وكنت وقتها حدي جوعانة مو ماكلة شي دبيت على الفطاير والحلو والجاي ... اهم مستحيين وانا نازلة سوالف وضحك وامي تقرص فيني (( اتكني اتكني )) ناسية نفسي حدي .... الأم وبنتها يكلموني مستحيين وأنا عادي لا وأقط نكت واضحكهم وبالأخير .. والله مو مستعدة للزواج لوووول حده مو وقته .. تقول لي ولدي خجول وحياوي ... اقول لها : لا والله عاد تصدقين أنا جريئة وما استحي ..!!!
وامي تخزني ودها تلطم ودها تقوم تطقني ...
عدا الموضوع على خير رحت غرفتي اكمل دراستي وانا اضحك وخذيت بريك وناسي وكليت فيه مرة وحدة وخلصت ..
وبالأخير دقوا اهل المعرس قالوا حق امي بييون يوم ثاني واختي المسكينة كشخت حق نفسها لووووول .







اهدي صورتي هذي لمنتخب كاظمة وأقول لهم أنا كظماوية من صغري شفتوا؟؟؟ سبحان الله







هذي خنفسانة ، وحدة من مجموعاتي الحشراتية وصار لها سنيتن عندي الحين ، اذكر كنت شايفتها بحديقة بيتنا وكانت دايخة مسكينة سويت لها بيت صغير بس شكلها كانت تحتضر وماتت لوووول فاحتفظت فيها لووول












وهي نايمة على بطنها لوووووول يبا لمعتها تجذبني والله كااااااااااك






هذا دبور هدية من رفيجتي كانت صاديته وتدق علي وانا بالمحاضرة ومارديت اول ماطلعت من المحاضرة ولا اشوف جيش بنات جدامي ولا تعطيني الدبور والله حسستها جنه ذهب عيوني غورقت من الوناسة لوووول واهم منصدمين حدهم ..



ـــــــــــــــــــــــــــــــــــــــــــــــــــــــــــــــــــــــــــــــــــــــــــــ





هذي مجموعة أم علي الي عندي ... اوووف نسيت أحد فايل ام علي وياهم والله .. ادري بتقولون شهالصور ؟؟ توه واصلتلي هدية كاميرا ديجيتال وقلت اجربها لووول ماعرف اصور ادري :p
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
..
..

البيضة هذي سلمكم الله أنا اقول لكم قصتها
في يوم من أيام الجمعة المباركة .. قعدتني امي وكنت حدي متضايقة ومالي خلق جان تقول يالله ماتبين تطلعين معاي ؟
أنا : لا مالي خلق يما .
أمي : مكان فيه عفسة راح تحبينه والله .
أنا وخرت الفراش عن ويهي : وين ؟؟
أمي : سوأ الجمعة
.
أنا : صج ؟ الحين بلبس خلاص نطريني
رحت معاهم سوق الجمعة لأني أحب الأماكن الي فيها عفيسة وايد .. فأمي راحت تتمشى مادري كانت تبي سجادة حق غرفة قعدة اليهال وأنا قعدت احوس بين العفسة والخرابيط ، فشفت محل باكستاني كان حاط سوالف جيولوجية عجيبة فسألته : هذا ماربل ؟؟ قال لي ايه
الي اهي البيضة وكان فيه اشكال ضفادع خذيتهم عاد والله رخيص بربع دينار . المهم ولا اشوف اثنين واحد كبير في السن والثاني شاب مبين عليه بأواخر الثلاثينات قاعدين يحوسون ويدورون مثلي ، جان يقول واحد منهم : شكلج تحبين هالسوالف .
أنا : ايي والله حق الجامعة تخصصي .
اهو : شنو تخصصج ؟؟.
أنا وبكل فخر : جيولوجيا
اهو : اها ماودوكم فيلجا ؟؟
أنا : لا والله يودونا الخيران وجال الزور .. وعمان
اهو : وييييه الله يرحم ايام الجامعة والله كانوا يودونا فيجا .. والله خوش جزيرة .
طالعني الشايب جان يقول لي : ليش مهتمة بهالسوالف؟
أنا : والله ياعمي اي شي يفيد ديرتنا طبعا يسرني اني اتعلمه .
اهو : اييييه ، والله يا شباب هاليومين ( يعوي حلجه ) ابي هارديز ابي ماكدونالدز ماتعلموا الصلابة الي تعلمناها ايام أول .
أنا : والله ياعمي مو كلهم عندي زميلات وزملاء ماشاء الله عليهم بقمة الطموح وقد المسؤولية .
اهو : شفتي فيلجا الحين ؟؟ يبا الواحد يحتفظ بالآثار القديمة هذول يهدمونها ؟ خل يحمدون ربهم ان عندنا شي اثري والأجانب الي برا مهتمين بهالسوالف ، يهدمونهم علشان يحطون مطاعم .
الثاني يقول لي : شكلج تبي قواقع عينج على القوقعة .؟؟
أنا : اي والله حلوة بس مكتوب عليها كلام انا ابي قواقع مو مكتوب عليها شي .
جان يلف ويهه ويتحجى باكستاني مافهمت ، جان يقول لي تعالي آخر الشهر اهو بيييب لج .
المهم شكرتهم على المحادثة البسيطة وعيوني دمعت لمن الشايب قعد يدعي لي ، رحت لأمي اسولف لها جان تقول لي : يخرب بيتك الشياب الحين يغازلون .
أنا : يما حرام عليج والله كان محترم والله من صجج أنتي بعدين أنا زلـــم لا تخافين علي !!! احم احم
ـــــــــــــــــــــــــــــــــــــــــــــــــــــــــــــــــــــــــــــــــــــــــ
شخباري أدري ...
شوفوا الدقيقة 3:34 ، أول وأنا صغيرة كنت احاول اقلدها كنت بسرعة بسرعة البس واعيد وازيد على بالي انها لبست بسرعة ماكنت ادري انهم يقطعون المقاطع لوووووووووووووول حدج صيدة ياسارة لووول








ــــــــــــــــــــــــــــــــــــــــــــــــــــــــــــــــــــــــــــــــــ
هــــــــذي الأغنية اهداء من والدتي الغالية لـــــي















45 comments:

Manal يقول...

لالالالالالا

كل شي كوم
ومسكتج للخنفسانة شي ثاني

رحم الله امج وابوج
مرة ثانية حطي تحذيييييير
واي
ما ادري شصار فيني

--------------
والحين ارجع للموضوع
والخطبة
ووصلي لاختج الامورة اني ادعيلها من كل قلبي انها تتوفق بحياتها
ويرزقها زوج يستاهلها

يا رب
والفال لج

وتكمل فرحتنا

ولا تنسين تعزميني على العرس

علشان تكون حجتي على صلاح انزل الكويت
:)

باقصى سرعة

دمتي بخير حبيبتي
:)

طموحة مملوحة يقول...

يابعد قلبي والله


عرسي قريب ان شاء الله وانتي اول وحدة بعزمها افا عليج ... صج صج صج ماراح انساج والله ...

يبا كل الحشرات امسكهم الا الصرصور بيني وبينه عداوة ...

ومشكورة على دعواتج يالغالية

Kuwait يقول...

@@
ويــح قلبـــي ..
سويره مو جذييييييييييي يمسكون الحشرات مو هيييييييييك ألبــته :\
انتي يبيلج صابون ديتوووووووووول حسبي الله على عدووووج انتي الي ماسكتهم انا المخترعه شكو مادري !!
الله يخليلج امج يارب ويخليكم لها وتفرح فيكم D;

طموحة مملوحة يقول...

شفيكم انا امسك الحشرات من صغري

mo3ath يقول...

لوووول اهم شي تبنيتي الخنفسانه ، سالفه الدبور هذي موضوع ثاني D:

يحليلها امج تونس الله يحفظها ويطول بعمرها ، ديري بالج عليها لاتزعلينها ترى ماارضى D:

ابوالوليد يقول...

ياليت كل البوستات يكون مالها هدف
عشان يطلع مثل هالبوست العجيب

وكل الفقرات عجيبة بدون استثناء

الوالدة لوتدري إنج ضاغطتها بهالبوست ماأهدت لج هالأغنية

استغربت من هواية تجميع الخنافس
وفوق هذا ميتة بعد!!!!!!!

Fashionista يقول...

nice nails ;P

TruTh يقول...

غريبة شلون ما تخافين من الحشرات!

ماشاء الله عليج الظاهر اعصابج حديدية

:)

انزين انتي قوية بس من صوب الحشرات وللا ممكن كائنات ثانية
أقصد لو بريعصي ميت ممكن تسوينها و تمسكينه؟

3bady يقول...

بوستج حلو ماني عارف من وين ابتدي اعلق فيه

على طاري العبط شي حلو الواحد يكون على طبيعته يم الناس

على طاري الحشرات لووول انا يريتني عندي جرأة مثلج امسكها بايدي لازم كلنكس اتشمئزز منهم :P

على طاري الشايب ايي زمان اول دايم طعمة غير

و سامحينا على القصور و يعطيج العافية ^_^

طموحة مملوحة يقول...

mo3ath

فديتها أمي والله كل يوم تقول متى تتزوجين وتفكيني .. !! يقولون لها الحريم عاد سارة اكثر وحدة راح تفتقدينها بالبيت لأنها كانت مأذيتكم لووول ..

طموحة مملوحة يقول...
أزال المؤلف هذا التعليق.
طموحة مملوحة يقول...
أزال المؤلف هذا التعليق.
طموحة مملوحة يقول...

ابوالوليد

الوالدة تدري اني ضاغطتها من زمان لووول شكثر احصل طراقات ماكو فايدة فيني لوول

مو تجميع خنافس بس كل الحشرات الا الصرصور ريحته مقرفة

منطلقة بطموحي يقول...

البوست هذا حده ممتع و يونس :)

يزاج الله خير سارووونة :)

و يالله نبي نشوفج عروس ;)

صج انني ما اعرفج وايد بس مبين عليج خوش بنية و تستاهلين كل خير :)

طموحة مملوحة يقول...

Fashionista


شكرا لج :)

طموحة مملوحة يقول...

TruTh



احم احم ..

احنا نمسك قطاوة ضفادع سمج قباقب براعصة ضبان كل الي يخطر على بالج مسكته حتى العقرب ... لا تسإليني شلون بس صدت اخطر عقرب سام .. وكليت زف من أمي وولد خالتي حزتها لووول

طموحة مملوحة يقول...

3bady

مشكور على وجودج وما من تقصير .. بس دايم قوي قلبك .. الشي تحسه يخرع بس لمن تمسكهم تحس عادي ويروح هذا الشعور صدقني .. أول كنت احذف الخنافس على اختي الكبيرة لمن اتهاوش معاها :p

طموحة مملوحة يقول...

منطلقة بطموحي


يابعد عمري والله لا أنا أعرفج مع اني ماقابلتج يالغالية :)

وشكرا لج على كلامج الطيب أشكرج من كل قلبي :) ويسعدني مرورج على المدونة

SHAHAD يقول...

سوويييره شلون تمسكين الخنفسانة !
والله قعدت سااعة اطالع الصورة مو مقتنعة إنج ماسكتها ! لوووول
انا لو المح ركزي على المح خنفسانة من بعيد تلقيني اناقز لووول
أكره الحيوانات كلها ما عدا الخيل :/

ويللا عاد تزوجي وتوكلي على الله
ولما تنزلين عندهم ركدي وسوي نفسج مستحية لوول لازم شغل التمثيل ترى لووول
ويااارب يوفق إختج وتاخذ اللي يستاهلها والفاال لج : )

وهالبوست على خرابيطه والخنفسانة والدبور :/ يهبببل وايد استمتعت فيه وضحكت

وربي يخلي الماما لكم ويخليكم للماما وتفرح فيكم وتشووف عيال عيالكم قولي آمين : )

طموحة مملوحة يقول...

SHAHAD


آميييم يارب العالمين .
بعد خشمي انتي والله

شوفي سالفة الزواج مأجلتها شوي ...

تبين اعلمج الشجاعة ؟؟ والله الحشرات مسالمة وطيبة والله لو تعرفين شكثر قلبهم ابيض ماراح تقسين عليهم ...

على فكرة الدبور ريحته مقرفة من قلب لوووول

ZooZ "3grbgr" يقول...

فيني فوبيا حشرات

بوستج لعب بحسبتي

:/

طموحة مملوحة يقول...

ZooZ "3grbgr"


قوي قلبج يابنت .. :p

-mate يقول...

عندي عقرب يايبه من شرق آسيا، طووله يمكن 20 سم. تمسكينه؟
:q

كاااااك

عاد تصدقين، ألعب ساعات سكواش إبنادي كاظمة ياخذوون علي دينار بالساعة. عطينا واسطة إببلاش
:)

أما البضة ماربل عندي وحدة نفسها، بس أعتقد أكشخ من مالتكم. ما أعتقد شاريها من سوق اليمعة
:q

هههههه

درسي بسج إمجابل البلوقينق

طموحة مملوحة يقول...

-mate

عند الواسطات جاهزة

وعادي امسكه جم تعطيني ؟؟:D


عاد توني حاطة بوست يديد..

صبا يقول...

يا زينج يا سويره :)))


وخوش تخاريف يا ليت كلنا تيينه عره مثلج ونكتب تخاريفنا

تخاريفج تلقائيه حلوه مهضومه وتدش القلب ,مثلج

وماشالله عليج قلبج قوي تمسكين حشرااات

انا بس احب القطاوه الشيرازيه الي بالبيت

امسكهم ما خاف منهم يونسوووون


وانشالله نفرح فيج قريب
وعسى الله يخلي لج اميمتج يارب

الله يوفقج بدراستج
وشدي حيلج

:****

TruTh يقول...

وااااااااي لأ صدمتيني!

شلون ماسكة كل هالكائنات؟!!

بدعتي لوول
P:

مبين واااااايد اعصابج قوية ماشاء الله لا اله الا الله

بس امانة قوليلي هذولة الكائنات اللي تخرع مسكتيهم اموات طبعا عدل؟

طموحة مملوحة يقول...

صبا


فديتج يالغالية تخاريفي مايت مني والطريج :p

طموحة مملوحة يقول...

TruTh

نمسك الأحياء منهم والأموات :)

طموحة مملوحة يقول...

أقول لكم شغلة خبلة ؟؟

أدري ما أستحي على ويهي .. بس ساعات اراقب الخنافس فترة التزاوج أروح أخرب عليهم .. أمسك واحد وأحذفه بصوب والثاني بصوب ثاني ..

شريرة والله :D

TruTh يقول...

طموحة ما تتصورين شلون انصعقت و انا اقرا ردج علي

باختصار انتي تحفة و مافيه منج ثنتين بالديرة

و امبيه غشييييت ضحك على الخنافس اللي فرقتيهم عن بعض
لوووووووووووووووووووول حدج شيطانة

D:

طموحة مملوحة يقول...

هششششششششششششش



بيني وبينج لحد يدري ;)

Manal يقول...

اختج باي كلية؟

Alikingkw يقول...

الله يوفقكم في حياتكم ان شاء الله


والله يرحمج يا خنفسانتها :)

شلون صادت الدبور ؟! والله منتو سهلين لوول


ام علي اسم شائع لهالخنفسانة شسمها في اللغة العربية الفصحى لأن احنا اهلنا يسمونها ام سليمان ليش مادري لووول

انتي ما لقيتي قواقع عسى الوالدة لقت شي من السوق ؟ :)

طموحة مملوحة يقول...

Manal


اختي ناطرة الوظيفة لووول متخرجة من دورات خاصة :)

طموحة مملوحة يقول...

Alikingkw


اسمها (( الدعسوقة ))

اي رفيجاتي يحبون شي يونسني مثل اليهال بالبيت يصيدون حشرات ويغلفونهم هدية لي شفت شلون يحبوني ؟؟ :)

اي امي ماتروح مكان بدون هدف لووول

اشكرك على دعواتك يالغالي

Alikingkw يقول...

الله يسلمج :)

زين الحمد الله

والله خوش ربع

الله يتمم عليكم صداقتكم واهتماماتكم الرائعة

:)

Alikingkw يقول...

وشكرا على تعريفي بالدعسوقة :)

الدعاسيق من أحب الخنافس الي ومن الخنافس الي يحرص الأطفال على جمعها ((أطفال جيلي)) ما ألاحظ ياهالنا يلقطون شي لووول


مرة في المتوسط كنت خاش وحده عندي امخليها تتمشى على ايدي في الحصة ... راويت استاذ العربي بحسن نية كانت عاجبتني والحصة كانت خالصة ... ما وعيت الا ياخذ العصاية ويطق الدقسوقة على ايدي ذبحها الله لا يبارج فيه وصلخ اييدي حقدت عليه بوكتها ... ما كنت متوقع ردة الفعل المجنونة منه لووول

بس صج هالحشرة دمها عسل :)

طموحة مملوحة يقول...

اخ يخرب بيته لازم نقاضيه ليش يذبحها تدري عندي يطقون ياهال ولا يذبحون حشرة جدامي ... والله بالجامعة مرة رفيجتي بجتني ذبحت نحلة وماحضرت محاضرتي من البجي وسبيتها سب على بالها اتغشمر لووول ..

لا عندي حساسية عليهم والله يعني مثل ما احنا يحق لنا نعيش هم اهم يحق لهم .. شنو بس احنا الي نبي نعيش؟

just a bunch of thoughts يقول...

اذا انت شريرة لمن تفرقين بين زوجين عيل انا شنو؟؟؟ رشة بالفليت و لا انا مسدحتهم جذي!!! لووول اكره شي اسمه حشرات!! يلوعون جبدي! خصوصا لمن يقربون زووم عليهم وييع استغفر الله!
بس الفراش، النحل، ام زويد (الدعسوقة - مادري الظاهر كل بيت يسمونها شكل! لوول) و النمل احبهم. خصوصا النمل و ام زويد اموت عليهم!!! اهم الوحيدين اللي اخليهم يمشون على ايدي :) بس لازم غسال وراها (بليز قوليلي انج تغسلين عقب ما تمسكين الحشرات ولا ما قرب صوبج ابد! لووول!)

بس واااي هذا المدرس اللي ذبح ام زويد!!! حرام عليييييه! مو مضرة اهي!! تهبل بريييئة! (بس اخاف لمن تطير! لوول)

و النمل عاد شي ثاني! توني ذاك اليوم باجية على وحدة لأني لقيتها ريلها مكسورة و تبي تموت فانا سرعت عليها العملية و ذبحتها بسرعة عشان ما تتألم أكثر بس عقبها غرقت بالدموع! أصلا كتبت فيها مقال!!!

---

بالنسبة حق الخطبة: انا شوي ما ركزت ... اهما يايين حقج ولا حق اختج و انتي رحتي بدالها؟؟؟؟

عالعموم الله يوفقكم اجمعين ان شاء الله :)

مادري اذا هذي اول اعلق بس انا صار لي فترة اقرأ "تخاريفج" على قولتج و من متابعينج :) بس شنسوي مو دايما نقدر نعلق مع زحمة الوقت!

سوري عالاطالة :)

سلام!

Engineera يقول...

بدعتـــــــــــــي على مسكة الخنفسانه .. من صجج !!

لو انا يوقف قلبي والله..
بس تدرين انتي ما تخسرين يعني اذا بهديج هديه اطرش الخدامه الحديقه تترس لي جيس نمل لوووول
---------------------

اما سالفة الخطبه جريـــئه حدج مدج
صج ما مريت بهالموقف لي الحين بس اتوقع لو حتى حاطه فبالي ارفض بكون خايفه وما اعرف ابطل حلجي ...

والله يخلي لج الوالده حجيها يونس

تقبلي مروري :)

طموحة مملوحة يقول...

just a bunch of thoughts

يابعد خشمي انتي والله لا الخطاب حق اختي بس ذكرت حركاتي لمن ايي احد يخطبني .. عبط عبط لازم ...


تبين اغسل ايدي؟؟ لوووول مابي :p
يبا كل الحشرات عسل الا الصرصور يخرب بيته ماواطنه احسه حقير من امه

طموحة مملوحة يقول...

Engineera

عيال اخوي يترسون القواطي صراصير وحياتج حقي :D

لا شوفي اول كنت اتردد ومابي ومن هالسوالف وكنت احصل زف وطراقات ... فاهم يبون يطقوني علشان الزواج انا اعرف شلون اطيرهم لوووول

طلال يقول...

هههههههههههههههههههههههههههههههههههههههههههههههههههههههههههههههههههههه

من جد كلامك ضحكني

وخاصه هارديز وماكدونالدز وعوجة اللسان..

ههههههههههههههههههههههههههههه الله يرجك

وانا ماكسر خاطري الا الخنفسانه مسكينه شكلها ماتت من الجوع..!

بس من جد عليها لمعه غير طبيعيه..

واحلى شي لاصارت تقرمش..

وعععععععععععععععععععععععععععععععععععع

طموحة مملوحة يقول...

بوطلال


لووووول كل ما احد قال لي الله يرجج احس نفسي مرجوجة صج كاااااك

لا الخنفسانة ماحبيت اذوق طعمها .. لأن شكلها مال يشوفها ... وبس لووول

technology يقول...

Runescape Account
Runescape Accounts