2009-01-21

رسالة للي شكك بوطنيتي ...

خوش اهداء حقه مو ؟؟ لووووول شفت هالصورة العبيطة قلت أحطها وأخليكم تضحكون عليها شوي قبل ما نبدي بالجد :p
بكتب بالعامي عادي ؟؟
اكيد عادي مدونتي شتبون؟؟
ادري مليقة ..
نبدي ..
..
..
..
ـــــــــــــــــــــــــــــــــــــــــــــــــــــــــــــــــــــــــــــ
ســــــــــــــــــــــــــلام
اخوي الوطني المتوطن الي شايف حالك محد يحب الكويت كثرك ..
.
.
منو أنت علشان تيي تتكلم عني وعن وطنيتي ؟؟
.
.
منو أنت علشان تقول عن وطنيتي زائفة ؟؟
.
.
منو أنت علشان تدور على مواضيعي وردودي علشان ترد عليهم بردود تشبع النقص عندك ؟؟
اذا ميت قهر ليش ما أواطن الفالي !!! كيفي !!
أنا بالمواضيع الي تكلم فيها الطبطبائي وغيرهم من أصحاب الأقنعة الدينية انتقدتهم ..
تبيني أتكلم عن الفالي بأنه عظيم واهو أحد الذين استهزؤوا بالكويت ؟؟
وطنيتي زائفة ..؟؟؟
يمكن لو شايفني أسجد له صرت بنظرك وطنية درجة اولى >>>>> (( لا زين )) ويـــــع مو وقته
اخوي روح أخذ لك جم درس من دروس الابتدائي والمتوسط والثانوي الي توهم حاطينهم تربية وطنية
روح ادرس لك جم سطر بعدين تعال تحجى ..
ترى مو ميتة على المكان الي إنت فيه وألف مكان أحسن منه يبوني ماوقفت عليك ولا على منتداك ..!!!
والكبار الي اكبر منك وأعقل منك ماهزوا شعرة من راسي
علشان تيي انت وتستشرف على راسي ، وتقيّم وطنيتي من كيفك ..
حبي للكويت أكبر من حبك للكويت على فكرة وأفعالي تشهد على ذلك
اذا كان حبك للكويت تمجيد الفالي والدفاع عنه روح له هناك خل يعيشك من خيره ..
ولا لا صح نسيت الي مثل هالاشكال تاكل من خير الكويت
وتعيش بأرض الكويت .. وبعدين تتنكر لها ..
مو قصدي بهالشي فقط هالفئة حتى عندنا أشخاص يمجدون اسامة بن لادن والبذالي بعد ..
تعلم حب الوطن ..
وتعلم شلون تكون بسيط
وتعلم شلون تحترم مكانتك
بعدين تعال هايط فوق راسي ..
وآخر كلام أقوله :
(( ياشيــــــــن من خذا منصب كبر خشمه وشاف نفسه على الناس ))
مع شكري واحتراماتي :)
طموحة مملوحة

48 comments:

Hashimoto يقول...

ما عاش من اغضبج .. ما عاش !!
اووله يخرب بيته هذا .. انشالله ما يطب بالناس جذي
الحين خلصوا من سنة وشيعة راحوا عالسالفة الاعم ((الوطنية )) .. والله ناس فاظية
======
وعلى طاري الصورة .. لوول هذا طلع مرة ببرنامج believe it or not

طموحة مملوحة يقول...

تصدق أول مرة اشوفه لوووووول


لا أقول لك هذا واحد محتر عسى ما يشوف ردودي يقعد يتطنز دم ضروسه انا لووول والله وطلعت ابط الجبد كاااك

منطلقة بطموحي يقول...

عرفت منو تقصدين ..
و الصراحة ما تنلامين ..
الله يعينه على نفسه :/

منطلقة بطموحي يقول...

اليوم حلو :P
بداية اليوم جيكت على مدونتج ..
والحين قبل لا اصك الكمبيوتر جيكت على مدونتج ..
:P

طموحة مملوحة يقول...

منطلقة بطموحي


يابعد راسي انتي والله .. انتي ماقمتي تشاركين هناك :) عدل عدل زين عرفتي قصدي :D

منطلقة بطموحي يقول...

اي ما قمت اشارك هناك .. من زمان ..

بس عرفت سالفة موضوع الفالي :)

و ما تنلامين .. و عطيهم طـــاف :) ..

طموحة مملوحة تستحق مكان اكبر من هناك :) ..

طموحة مملوحة يقول...

فديتج يالغالية والله فديتج .. وعلى فكرة هذا مو أول موضوع والحمدلله الراس العودة قالت لي مايكتبون هناك الا الصغار :P

لوووول علشان جذي شوفي شلون مشاركاتي قلت وأتوقع بنت العلمية قالت لج قصتي :)

سلم عليها وايد

ابوالوليد يقول...

لايضر السحاب نبح الكلاب

خليه يولي مع إني ماعرفته ولاعرفت سالفته :)

طموحة مملوحة يقول...

احم احم احم انا اقول لك السالفة بس مو هني لوووول

منطلقة بطموحي يقول...

لووول :p

اقوول .. احم .. جيكي على الرسايل الخاصة في ملتقى الائتلافية .. دزيت لج الحين رسالة :)

منطلقة بطموحي يقول...

عاد هالموقف اللي صار لج مع ذاك المنتدى ، مو يخليج تكرهين المنتديات :P

ملتقانا ماله شغل .. حياج الله و نبي نشوف ابداعاتج :)

لا تقطعين ..

طموحة مملوحة يقول...

هلا يالغالية الحين اجيك عليه ..

عاد ملتقاكم يحطون كل المقالات الصحفية عن الجامعة بس ما يحطون مقالاتي وتحقيقاتي ليش :p ؟؟؟؟

ان شاء الله راح اتابعه وماراح اقصر وتعرفيييين خيتج ماتنسى شي افا عليج بس:)

منطلقة بطموحي يقول...

بعد قلبي :) ..

يمكن لأن اغلب المواضيع من موقع جريدة الوطن ..

انتي بجريدة الرأي العام عدل ؟ و الا الدار ؟

منطلقة بطموحي يقول...

مو الرأي العام .. قصدي عالم اليوم ..

طموحة مملوحة يقول...

اي

وكنت بالدار : P طلعت لأنها مو توجهي لووول

منطلقة بطموحي يقول...

شفتي .. عشان تعرفين انني مراقبتج ;p

طموحة مملوحة يقول...

لوووووووووول فديتج والله بتصكين على ابو العيال انتي لوول

3bady يقول...

لا تنزلين عقلج لمستواه حقريه لين يزهق لما تردين عليه ما راح يسكت

bof-10 يقول...

ee walla 9ida8tay ...ana m3ach 200%


allah yikather men amthalij walla

حرف يقول...

الحكمة الصينية تقول

الحقران يقطع المصران

***

على العموم لا تلتفتين للهامشيين لأن وقتج راح يضيع هباءا منثورا .

وعلى العموم لا تلومينه لأن الوطنية صارت دشداشه مخصرة تفصال .. كل واحد يفصلها على مقاسه .

حياتي هدف مو عبث يقول...

قوليله اي انا ما احب الكويت وانا مو وطنية اشتبي :p واحب الفالي واهوا خوش ريال جذي زين هههههههههههههه
راح يحس انه سخييييف وتافهه

يصير نشووف ؟؟ بلاااغة شف ما اقددر

Eng_Q8 يقول...

شالسالفه !!

Enter-Q8 يقول...

هم شسالفه
التشكيك بالوطنية ما ادري على اي اساس اطلقه ، هل فقط علشان الفالي
انزين الفالي رجل دين غير كويتي
كنتي تقدرين تفندين كلامه و تعورينه اكثر حسب وجهة نظري
اكثر منكلمة منو انتلكن بالاخير مدام ان ربط الفالي بالوطنية
اظن هذا كافي عليه

بس عن نفسي سالفة منو انت ما استسيغها بالردود و خصوصا اللي تتكلم عن الوطنية
لن في ناس من عمق الكويت و ابائهم و اجداد اجدادهم و عمايلهم مطينه بطين


طموحة تعرفين اني صريح
مو تطنقرين

روحي كملي دراستك قاصة علينا تقولين ما تدشين البلوج و انتي طايحه بالمنتديات

Kuwait يقول...

وانا بعد اقول شسالفه وشصاير ؟؟
منو هذا وحطيلنا الكلام ;q

Engineera يقول...

مع الخيل يا شقره .. شسالفه ؟ :q

بلاغة شف مو ؟

Manal يقول...

ما عاش الي مزعل الامورة الطموحة

:)

هدي بالج
وارضاء الناس غاية لا تدرك

غير معرف يقول...

مالت عليج عاد انتي وين والوطنية وين :)

Alikingkw يقول...

بسج هواش حقريهم :)

طموحة مملوحة يقول...

Enter-Q8


اي خير جذوره من الكويت :) ولا مازعل والله

طموحة مملوحة يقول...

غير معرف


اي وطنية واكثر منج او منك ، ولو فيج او فيك خير جان حطيت نكك :p

بخلي ردك علشان يضحكون عليك شوي :)

طموحة مملوحة يقول...

حرف

اي والله الحمدلله الرسالة وصلت الأخ او الأخت غير معرف بيوصلون الرسالة واشكرهم على متابعة مدونتي :)

طموحة مملوحة يقول...

3bady


صج لي قالوا الوطنية افعال مو اقوال واهم يحبون يهايطون وايد والي يهايط بهالزمن مرغوب فيه

طموحة مملوحة يقول...

bof-10

يعطيك العافية خييو :)

طموحة مملوحة يقول...

حياتي هدف مو عبث


بقول له افا عليج :p

طموحة مملوحة يقول...

Kuwait

الكلام حجي وايد عن موضوع والكل قاعد يمجد فيه فانتقدت هالشغلة ولاءهم له مو للكويت .. وقاعدين لج يشككون بفلان يبا ابطها .. ؟؟

هذول ناس على قولة المنافسين يخلون الوطنية لنفسهم يبا المكان الي احنا فيه وايد زين بس الي معانا يخربون على سمعة هالمكان ..

طموحة مملوحة يقول...

Eng_Q8

راح اقول لك السالفة كاملة ..

طموحة مملوحة يقول...

Engineera

ياويلي كاااااك اهي بس السالفة على الي يحطون الوطنية لهم اهم بس ..

طموحة مملوحة يقول...

Manal

فديتج والله يالغالية

طموحة مملوحة يقول...

Alikingkw



انا غلطت بكلامي ؟؟ الحق لازم ينقال :)

طلال يقول...

كلام جميل جدا..وبصراحه اهنيك على الكلام المرتب..وماعليك من اللي يشكك بوطنيتك..والله ماعنده سالفه..

واكيد حب الوطن فوق كل شي..

همسه في اذن رد (غير معرف)..:
مادري ليه متعب حالك وكاتب هالرد..يعني انت جاي ومسوي زحمه بس علشان تقول هالكلمتين..؟ خلاص طيب علمنا عن الوطنيه..؟ اصلا ردك هذا على يدل ان ماعندك لا اخلاق ولا وطنيه..!!

سمحي لي اخت طموحه على الرد بس قهرني..!

طموحة مملوحة يقول...

طلال

لا عادي انا توقعت ان بيكونون موجودين علشان جذي كتبت الرسالة ادري انها راح توصل :p

ولو فيه ذرة شجاعة جان حط نكه ولا مايقدرون يواجهون مثل ما اواجههم واوقف بالبلعوم :) يبون الي يطبل لهم بس :)

غير معرف يقول...

لا تطلعين فيها اذا تبين تواجهين روحي المنتدى وكتبي اللي تبين :) مادري شنو الحكمه كاتبه بوست محد فاهم شسالفته؟ اذا تبين تتفلسفين دشي المنتدى وشوفي الموضوع اللي انكتب وشوفي الناس اللي فاهمه الموضوع وقاريه رد الاخ اللي كاتبه عنه وحكمت على الموضوع، هذيل ناس اقدر اقول احكمو بعقلانيه لان سمعو طرف (انتي وبلوقج) وسمعو طرف ثاني (رده) مو نفس وايد خرفان ما يدرون شسالفه بس معاهم معاهم عليهم عليهم :)

طموحة مملوحة يقول...

غير معروف

الله يخليك انت والمنتدى .. اصلا نص الموجودين دشوا المنتدى وشافوا .. قلبتوا المنتدى تطنز على شيوخ السنة وقاعدين له بس الي يصير شيعي اهو وطني والبقية لا .. علشان الي ماسكين المنتدى شيعة يبا الحمدلله انه مو منتدى رسمي للقائمة ولا كانت راحت فيها القائمة .. وعلى فكرة نص الموجودين يبون يدشون المنتدى بس لازم يسجلون ومالهم خلق يسجلون شيلوا الخاصية هذي علشان الناس تقرا وتشوف وبحط اللنك الحين والي يدش خل يقرا ويحكم على قولتك :)
الي وقفوا مشرفة سنية علشاوضوع طائفين انتقدت موضوع طائفي .. منتدى فاشل ..

حدك ثقة يا أخ مادري شسمك :p


وهذا اللنك :)

http://www.wasa6.org/vb/showthread.php?t=18817

طموحة مملوحة يقول...

عطني لنك الموضوع خو الي يوقف بصفكم عقلاء والبقية مو صاحييين ...

طموحة مملوحة يقول...

ووياليت تحترم قراء مدونتي اهم مو خرفان ... من كلمتك هذي عرفت انت منو .. ويع عاد تصدق ماكان ودي مدونتي يدشها ناس امثالك :)

Alikingkw يقول...

لا اقصد لا تعطين الصغير أكبر من حجمة وتتأثرين بكلام ينقال بحقج ما له قيمة...الا اذا كان الرد على هؤلاء بالتدوين يشعرج بالراحة..فلا بأس ...:)

طموحة مملوحة يقول...

وناسة حطوا موضوع كامل عن الموضوع كبرت السالفة

sticker يقول...

louis vuitton handbag
louis vuitton handbags
vuitton
louis vuitton bags
louis vuitton bag