2009-01-28

تصدقون توني أتعلم حب الكويت .. !!!


اليوم وبعد ماخلصت دوامي الجامعي المتعب .. وطرارة الدرجات من الدكاترة ، رديت البيت اريح شوي من التعب ..
ولا اسمع ابوي يناديني : سارة ؟؟!!! يا سارة
أنا : هلا يبا ..
أبوي : تعالي تعالي شوفي هالبرنامج ..
القيت نظرة :) واذا بقناة سكوب .. برنامج يتكلمون فيه عن حملة التبرعات لصالح الشعب الكويتي ..
جان أقول لأبوي : والله فكرة حلوة .. بس طاع منو الي يتكلم عن هالحملة .
أبوي : حرام واحد اسمع بوخالد فيه وكان وكيت وكيت وكيت ... الخ .. دزي مسج ابي اتبرع لهم واذا دقوا تكلمي انتي متحدثة وتعرفين تتكلمين !!
أنا : يبا شي طيب ان نفكر باخوانا الي بالكويت واهم اولى اكيد .. بس الي يبي يتبرع ماله داعي يطلع جدام الكل ويقول انا تبرعت مثل ما سووا دعاية وحفلة حق حموووسة .. ويورون الناس مننو تبرع وبجم .. بهرجة استغفر الله وبعدين قناة فجر السعيد مليقة يبا شكو حاط عليها ؟؟
أبوي : يابوج حرام والله قاعدين يناقشون مواضيع مهمة قعدي معاي طالعي وعلقي ..
فديته أبوي يبي يسمع تعليقاتي .. واهو يتابع الي قاعدين يتحجون استغفر الله وانا اطالع التعليقات والمسجات السخيفة الي تنكتب ويدزونها المشاهدين السخيفين .. مع احترامي لهم .
شوفوا من أهم الردود الي صعقتني وخلتني أقول لأبوي : يبا خل يولون عما بعينهم !!!!
الي انكتب اهو :
..
..
(( اشكرج يافجر السعيد لأنج علمتي الناس حب الكويت ))
..
..
..
عـــــــــــــــــــــــــــفوًا .....!!!!!!!!!!!
عيد مرة ثانية شنو ؟؟ منو ؟؟؟ وعلمتنا شنو ؟؟
أقول ..
حب الوطن مو بجمع التبرعات .. هذا أولا
ثانيا محنا ناطرين فجر التعيس ولا دلال ولا مزنة يعلمونا حب الوطن ..
ثالثا : طاع منو يتحجى بالكويت والمجتمع الكويتي ؟؟
أقول نسيتوا مسلسلاتها الفاضحة ..؟؟
نسيتوا تصويرها لبنات الكويت بالعاهرات ورايحات فيها و24 ساعة برا البيت ..
والأخ الديوث الي ماعنده غاريه على خواته ..
والأبو الي مدلع بنته على الآخر لو تقول له بروح مع رفيجي يقول روحي فديتج ..
والأم المتسكعة الي 24 ساعة برا البيت مالها والي وتصور ريلها مثل الخروف وراها ..
هذا المجتمع الكويتي !!! بنظر فجر السعيد
شهالتناقض ؟؟ الحين قلبج على الوطن والمواطنين ..؟؟
جان حطيتي هالمشاكل بمسلسلاتج بدل البهدلة وتشويه السمعة ...
هذا واقعنا !!! مو هذاك واقعنا شهالمرض؟؟
ضحكت العالم علينا الحين تبي تسوي قصة هندية ..
يبا كلنا نحب الكويت وشعب الكويت معروف بالكرم حق الي برا مايقصرون تبون الي منهم وفيهم مايساعدونهم ..
والله احتجيت ولمن قلت لأبوي ضحك على ويهي ..
حدي كنت معصبة والله
يبا خل تسوي حملة تنظيف القناة أول شي ..
وخل تسوي شي لله ماتخلي الناس تحط لها رسايل ..
(( إخت رجال ))
والي بط جبدي (( الفزعة)) ياناس هالكلمة كانت تمشي بدمي والله .. بس لمن قالوها لاعت جبدي منها بصراحة ..
آخر عمري اتعلم حب الوطن منها
ماعندنا مشاعر وزعزعت الي بداخلنا تصدقون ..
كنت اعيش بالكويت مادري شالسالفة واقول ياربي شكو احب الكويت ؟؟
لين طلعت فجر التعيس وطلعت قناتها وعلمتني حب الكويت ..
سوري ياكويت بعد 21 سنة توني الحين اتعلم حبج ..
افـــــــا والله كبيرة بحقنا ...
حدي معصبة والله ..

27 comments:

طموحة مملوحة يقول...

حقيقي لسة تعلمت حب الكويت والكويتا ..

Hashimoto يقول...

اي والله اخر زمن .. فجر السعيد هذي ام المسلسلات المعوقة صارت "معلمة حب الوطن " لوول
والله ناس اي كلام الي دزوا هالمسجات التافهة
ترى ممكن يكونون من الاستديو الي يكتبون هال"مسجات" .. يسوونها مرات
كل شي يصير ..لول
واحلى تبرعات بالعلن لا ويحطون كل واحد وجم دفع .. ماصارت لوجه الله ..
والله حالة

==================

بعدين شسالفة الكل هاب بقناة سكووب .. انا عمري ما شفتها حتى بالستلايت ماعندناياها .. كل يوم اشوف واحد كاتب بوست بسبة هالقناة المعوقة
بلا عوار راس بلا بطيخ

ماقول الا ..
الله يهدي الجميع انشالله

حسام بن ضرار يقول...

ترى اسهل شي ستاف القناة نفسهم يدزون مسجات تمجد بصاحبتها

اما عن تعليم حب الكويت ... فما بقى إلا اهي تعلمنا حب الكويت!

ابوالوليد يقول...

سكوب بالنسبة لي قناة كوميدية
أحطها وأضحك بس مرات يرفعون ضغطي

وشي طبيعي يكون لفجر وقناتها محبين
مادام وحدة داقة على بوعيدة وتقوله (بابا بوعيدة)

طموحة مملوحة انتي كويتية؟ .. رفعي راسج ... :)

تجمّع الحقوق يقول...

أول ما تتكملمين عن سكوب

يطري على بالي إن عندهم برنامج سياسي يومي !

و بالكويت !

كنت أراهن على إستمراره بشكل يومي

لكن طلعت غلطان و إكتشفت إن الكويت فيها أحداث عن عشر دول

و مسألة التبرع العلني , ترى يحمّس الآخرين على التبرع و أنا أشوفه شي إيجابي

حياتي هدف مو عبث يقول...

ملاقة وسخافة :)

الله يحفظ لج ابوج يارب

Eng_Q8 يقول...

بما اني من الي يكرهون هالقناة

الا ان حركة غترة الشهيد اعجبتني وترى اخت الشهيد اهي الي قالت الفكره مو القناة لذا تستاهل الدعم

Enter-Q8 يقول...

سكوب تدور اي شي تطلع فيه
من عقب كل طراق تاخذه ما تتعلم لقت لها وتر جديد تلعب عليه

طموحة مملوحة يقول...

Hashimoto

ولا انا اتابعها بس ابوي نااداني بالغلط لووول وكل ما دق تلفوني تشوش القناة القنوات الثانية عادي بس شكله تلفوني مو طايقها نهائيا لووول

طموحة مملوحة يقول...

حسام بن ضرار

اقول ياربي ليش كل الي يدقون من ربعهم لووول

طموحة مملوحة يقول...

ابوالوليد

اكيد برفع راسي عالي ... :)


اشكرك اي انا كويتي مهجنة :p فرعونية كويتية :D

طموحة مملوحة يقول...

تجمّع الحقوق

الفكرة حلوة ياخوك .. بس اوكي طول البرنامج واهم ترضون الفلسطن ياخذون والكويتيين لا ؟؟ اوكي انا معاهم بهالنقطة بس مو كل مادق واحد عادوا السؤال .. ماعندهم سالفة والله :P

الفكرة كما قال احد المعلقين فكرة امرأة والقناة قامت بتنفيذها بس لازم يزيدونها بهارات شوي :P

طموحة مملوحة يقول...

حياتي هدف مو عبث


موبس ملاقة هلاقة :P

طموحة مملوحة يقول...

Eng_Q8

الفكرة حلوة انا معاك ... بس والله ادق انا انا سارة النومس ابي اتبرع بقيمة كذا كذا ... علشان الناس تقول شوفوا سارة تبرعت بقيمة كذا كذا .. واستانس يعني محد قدي لا يبا .. الي يبي يتصدق بالسر ولا بمكان ثاني ماله داعي هالحركات ..

طموحة مملوحة يقول...

Enter-Q8

باجر بيدشوون بالدين بعد علشان نقول ماشاء الله كاملين بكل شي :P

غير معرف يقول...

"جان حطيتي هالمشاكل بمسلسلاتج بدل البهدلة وتشويه السمعة ...
هذا واقعنا !!! مو هذاك واقعنا"

هالسطرين في الصميم.. عجيبة انتي هههههههههههههههه

Enter-Q8 يقول...

طموحة و منو ما قالك انهم ما دشوا بالدين
عندهم برنامج و ما اعرف منو الشيخ اللي حاطينه بس اللي يضحك انه يفسر احلام بعد

طموحة مملوحة يقول...

غير معرف


يابعد خشمي والله يشرفني ان الموضوع عجبك\ج

طموحة مملوحة يقول...

Enter-Q8


اي على اساس بتاع كولووو :D

والله نكتة هالقناة .. شخبار فلاش صج :)؟؟؟

bof-10 يقول...

هاااااااااااااا @@ !!!!


والله انا من زمان ادري انهم يخلون رعهم يدقدقون ويدزون مسجات ...هذولا خلاص اغسلو مخ الكبار والصغار ....

الله يرحم اللي اب بالي والله !

أحمد الحيدر يقول...

شفيج معصبة ؟

عادي عادي :)

طموحة مملوحة يقول...

بوفتين ..

ولك هذول بدع والله بدع ... باجر بسوي قناة واخلي ربعي يضخمون من حجمي اكثر لوووووول واقول انا علمتهم حب الوطن .. استغفر الله من كلمة أنا ياكثر من حريم مروا علي كل وحدة تقول انا الي سويت وانا وانا ..
واهما طوووووووووووط لوووول استغفر الله ياحلو البساطة والله ...

طموحة مملوحة يقول...

احمد


يالهوي يالهوي على البدع والخزعبلات الي يمارسونها هالرسوم المتحركة .. يسوون اشياء ماتطري على البال .. لاحول ولا قوة الا بالله الي يخاف ربه بديرته ماله وجود الحين ؟ صاروا نادرين وياخوفي ينقرضون :(

Alikingkw يقول...

انشاء الله النتايج زينة؟

خاليتشيحطون سكوب وغيرهم إذا كانت نتيجة الشحاطة فعل الخير...:)

طموحة مملوحة يقول...

Alikingkw


اي والله يتشيحطون على الفاضي الحمدلله والشكر ..

Kaadi يقول...

حتى المقابر تشتهي المحمر !

طموحة مملوحة يقول...

يعني وشووو ؟؟