2009-02-10

أنا من انا ؟؟





كويتي 1: سلام عليكم أخوي !!
كويتي 2: وعليكم السلام ورحمة الله يا هلا والله ..
كويتي 1 : اخوي انت من ولده ؟؟
كويتي 2 : ولد فلان ولد فلان ..
كويتي 1: عيم ولا عرب؟؟
كويتي 2: عرب عرب أخوي ..
كويتي 1: كويتي ولا بدون ؟؟
كويتي 2 : كويتي
كويتي 1: بدوي ولا حضري ؟؟
كويتي 2: اصلي بدوي بس متحضرين
كويتي 1 : شيعي ولا سني ؟؟؟
كويتي 2 : لا سني الوالدة شيعية وفي من اهلنا شيعة ، آمرني ؟
كويتي 1 : انت حدسي ولا وطني ....؟؟؟؟ ولا حموسة :p
ترا لاعت جبدي من الأحزاب الي قاعدة تنتشر ..
اليهال من متى يقولون انا شيعي انا سني انتي شيعي انت سني ؟؟؟
ولاعت جبدي ونقول الوحدة وطنية أي وحدة وطنية استريحوا زين ..
استغفر الله .. عسى ماتقول كلنا اخوان وكلنا نحب بعض يطلع لك الي يطب بمذهبك يكرهك بعيشتك ..
ولا الي يثيرون المشاكل ... الحمدلله اني تعلمت من ناس وايد اني اطالع الجانب الايجابي ..
بس مليت من الموجودين الحين ..
اليوم حدس متصدرة الصفحات الأولى ماشاء الله !!! صارت موضة .
أنا حدسي !! انت حدسي ؟؟
حدسي شيعي لا مو لايق ..!!
سني داش حسينية ..؟؟ غلطان أخوي ..!!>>> وانت شكو كيفه يبا ..
مدونات سنة ومدونات شيعة ...
يبا حتى التدوين صار فيه جذي؟؟؟
بسكم خلاص ... قولوا احنا كويتيين وبس ..
مليت من الكلام الي اقراه كل يوم ..!!!
كلنا تحت راية الكويت ماكو احد احسن من احد خلاص لوعتوا خشمي !!!

ـــــــــــــــــــــــــــــــــــــــــــــــــــــــــــــــــــــــــ

موقف مقرف :

مشكلة ايميلي الرئيسي مادري ليش لمن اشبك مسنجر وناس تضيفني مايطلع المربع الي احط له اكسبت ولا لا .. ويضيف من كيف امه ، فطلعت لي وحدة تسلم ... سلمت عليها جان تقول لي منو انتي ؟ قلت والله انتي الي ضايفتني جان تقول لي انا اسمي فلانة قلت هلا والله اختي انا سارة .. جان تقول لي شلونج شخبارج ، كل هذا وانا للحين ماعرف منو الي وياي !!

المهم ، جان اقول لها انتي بجامعة الكويت ؟؟ لأن الجامعة معلقين ايميلي هذا بالقسم حق الي يبي يستفسر عن الجمعية الي اشتغل فيها .. قالت لي لا ، قلت لها زين تدشين منتديات شي؟؟ قالت لا ، بس الهاي 5 وتاقد .. قلت لا عيل ماعرفها الظاهر ضايفتني بالغلط الأخت ... المهم وانا اسولف معاها ... ولا عيوني تصير @@

البنت قاعدة تحط صور وسخة امبي .. انا حطيت بلوك ديليت وعيوني للحين ((@@)) دشت اختي قالت لي : شفيج متنحة ؟؟

لمن قلت لها انصدمت ...

اوكي خبري في بنات يحطون هالصور حق شباب يبون يضبطون اعمارهم بس تحط هالصور حق بنت شتبي هذي؟؟


34 comments:

قانونى كويتي يقول...

اسعد الله مساج

كلامج عدل المسميات اللى نسمعها صارت بشكل غير طبيعي

والايميل مشكلة هم صارت معاى

بس المشكلة فى اللى يستخدم الايميل استخدام سيئ


شكرا على الموضوع

تحياتى

SHAHAD يقول...

واااي عااد اليوم بالنادي
يت لي وحده وأول سؤال إنتي شنو أصلج لووووول
وعقب ما خلصت أسئلتها وتحقيقها بأصلي وفصلي جان تقول انا سألتج عن كل شي إلا اسمج :/

والله بغيت أذبحها :/

ومشكلة هالإضافات انا لايعة جبدي بعد
ومادري ليش كل الإضافات اللي تييني من المغرب .. يمكن ايميلي محطوط بإعلان أو شي لووووووووووووووول

طموحة مملوحة يقول...

قانوني كويتي

صدمة حياتي والله هالصور لووول

اي بطوا جبودنا هالناس يبون يناسبونهم ولا شنو ؟؟ والمشكلة الي ماعنده سالفة اليوم قعد يتكلم عن الاصل والفصل لوعة جبد والله

طموحة مملوحة يقول...

shahad


تدرين شكنت اسوي اذا كنت بمكان محد يعرفني ؟؟ اسوي نفسي مصرية ;p

خو تلوع جبدي والله ، تييج وحدة تبي تخطبني حق اخوها .. بعدين عقب السؤالات تقول لا احنا القبيلة الفلانية ناخذ كيت وكيت بس شدعوة شايفتني قاطة نفسي عليها ؟؟ سألتني وجاوبت .. لا وقاحة والله ماحب هالاسئلة .. والي تقول لي شكلج مطيري شكلك عنزي شكلج مصري شكلج ايراني شكلج شكلج بس بس بس خلاص يبا خل ندور على اسئلة مثمرة لووول ..

أحمد الحيدر يقول...

والله فعلا لاعت جبودنا ..

والمفروض ما نشجع على هالأمور .. يعني ننقد ونستنكر وما نجامل ونبتسم ..

حتى بعالم التدوين المفروض ما نجامل ونعلق على المدونين الطائفيين ..

أما بالنسبة للإيميل فلا تستغربين أختي ..

يمكن أصلا يكون واحد مو وحدة ..

أو وحدة خربانة ..

الدنيا كلها خربانة مو رادة عليها ..

موفقة وإلى الأمام دائما :)

طموحة مملوحة يقول...

أخوي أحمد ..

أنا بعدين لمن ركزت على التوبك .. نوعيتها شفت الي يدشون النت يكتبون كلمات ايائية علشان يكسبون الشباب والي يحبون السوالف الخايسة .. شالي حادني لووول ... يمكن سحاقية :p ياكثرهم لوول

مواطن مصري يقول...

بوست رائع و مدونة جميلة بس انا لفت انتبهاي في البوست السؤال بتاع سني ولا شيعي
مع ان الاديان دي حرية شخصية انا يهمني الانسان ولا يهمني دينة ولا لونة



مرة واح بردو من الاخوة المتطرفين كنت بتكلم عن حزب الله و تحرير لبنان افتكرني شيعي و سالني قالي انت شيعي ولا سني انا كنت هقولة و انت امك بديني


بس مشتمتهوش و قولتو سني كاثوليك

ههههههههه


فية بجد ناس حشرية و تدخل في معتقدات الناس و تميز على اساس الدين هو دة الي مرجع الامة العربية لعصور الجاهلية

طموحة مملوحة يقول...

أخوي مواطن مصري

مشكور على تعليقك للمدونة بس تصدق هالشي موجود بكل مكان بس بالكويت اكثر .

انا لمن مصريين يدرون ان امي مصرية يسألوني مصرية من اي حتة ؟ اقول لهم سيدة زينب بيفرحوا كتير (( أجدع ناس )) حتى هناك هههههههه :p

مشكلة هالناس والله :)

bof-10 يقول...

ولمن اقولهم انا انسا عادي ..]قولولي لأ انت شايب ....حتى صار اللي مايدش الهاي فايف ..ولا يحط اصوره بالأمسأن شايب و امغبر ومايعرف التطور ... والله عيالنا فاهمين التطور غلط اب غلط .... الله يعين على الأجيال القادمه ...

Enter-Q8 يقول...

شنو الغريب وايد مرضى

على ماظن سالفة المدونات شيعية و سنية في منها جذي
بس مدفونه و عساها مدفونه
اعرف شنو السبب اللي خلاك تكتبين هالجمله
:)

طموحة مملوحة يقول...

من صجك انت ؟ لوووول

انا فصلت على البوست الأخير مالك عطني لنك مدونتها اذا ممكن :)

طموحة مملوحة يقول...

Enter-Q8

اشوة انك لاحظت والله لأن ماتوقعت وجودهم بصراحة بس انصدمت والله :)

كبرياء وردة يقول...

صج صج الله يعينكم

والله يتني فترة كرهت المدونات ولا قمت اقرا واعلق بسبة موضوع الطائفية

المفروض محد يعلق على هالمواضيع

حياتي هدف مو عبث يقول...

واللي يقولون اني اخونجية ولا سلفية
ولا في اقسام وخطط بعد
الصراحة انا عندي اكون من السلف واتشرف بهذا الشي ولا اكون اخونجية متلونة
احلل الموسيقى والرقص والتلاعب بالايات والاحاديث
الموضوع كبير يا سارة
والعاهات واايد
وانتي لاحظتي في مدونات ما اتحط لنكات الا حق اللي نفس مذهبهم
ههههههههههههههههههههه

اهنيييي الضحك
والمخ العووي

ابوالوليد يقول...

صارت فيني بالابتدائية هالسالفة

وسألني واحد انت شيعي ولاسني؟
قلت بسأل أبوي واقولك باجر

وغيره سألني انت بدوي ولا حضري؟
وجاوبت عليه بنفس الجواب الأول

منو اللي يخلي الصغير يفكر بهالاشياء ويهتم فيها من صغره؟؟

أتوقع مستقبلا بتصيير مادة التربية الاسلامية عندنا صفين للسنة والشيعة

طموحة مملوحة يقول...

كبرياء وردة


لا مريت على مدونة صج صج ماتوقعت يكون مدونين موجودين من هذول بصراحة .. من كلا المذهبين

طموحة مملوحة يقول...

حياتي هدف مو عبث


انا اقول لو نبتعد عن هالمواضيع بالمدونات وايد احسن ... شلون ننتقد النواب ومجلس الأمة والامور الطائفية ونتكلم عنها في مدوناتنا ؟

طموحة مملوحة يقول...

ابوالوليد

انا بصراحة ماصارت لي بالابتدائي والمتوسط مع ان وايد من رفيجاتي كانوا شيعيات ويشرحون لي بس ماكنت فاهمة واهلي ماكانوا من النوع الي لا تمشين الا مع السنيات ولا شي من هالكلام نهائيا ماكانوا يذكرون هالموضوع

تجمّع الحقوق يقول...

أنا أول مره إنسألت هالسؤال ؟

في مرحلة الإبتدائيه

أذكر إني جاوبت : أنا مسلم

و ليلحين هذي إجابتي

طموحة مملوحة يقول...

تجمع الحقوق


كفو والله !! اعجبتني اجابتك .. ماشاء الله عليك ذكي من كنت صغير :)

هالاجابة تجعمهم والله ..

فريج سعود يقول...

هالاسئلة مالت الزواج

حزتها تطلع الصجية

ReLaaaX يقول...

حبيبتي انتي طموحة لاتحرقين أعصابج .. بس ذكريتني بمقولة كل ماقريتها أبجي



دعوت الله أن يحفظ على أبناء الكويت نعمة الوحدة فلا يمزقها الاختلاف،
ونعمة الحب فلا تدمره الخصومات


هذي من اقوال أبونا جابر الله يرحمه :/



--

عموماً الفرقة والاحزاب موجوده من سنين الطواعين على قولتهم :)


لا جد رجعي قري جم قرن !

أيام الجاهليه جم حرب صارت على غير سنع !!!!

لا وقبلها بعد ؟

بني اسرائيل مالا داعي اقولج شكثر افترقو

وهكذا :))

علي إسماعيل الشطي يقول...

أختي الكريمة

فعلا يجب أن نحارب الطائفية المنتشرة ولكن يجب قبلها أن نعرف مفهوم الطائفية حتى لا نتهم كل شخص يطالب بحقوقه بأنه طائفي

المطالبة بالحقوق ليست طائفية بل هي نضال

الطائفية عندما تكون هناك زمرة لديها كل الامكانات و تقوم بتوزيعها على مزاجها لطرف دون الآخر

اما من يطالب بحقوقه وفقا لدستورنا فهذا نضال و ليست طائفية

وشكرا

طموحة مملوحة يقول...

فريج سعود

من صجك والله الحين يسألون هبل بس .. السؤال ببلاش :D
لا تشوف المدرسات شلون يسألون طالباتهم .. صج ماكو شغل .. انتي من بنته ؟ وشسم امج ؟ وشنو عايلتج ؟ وابوج وين يشتغل .. تحقيق وحياتك . .:)

طموحة مملوحة يقول...

Relax

امبي تدرين والله صج قريت الجملة اقشعر جسمي والله ، جنه حاس الغالي الله يرحمه .. لا حول ولا قوة الا بالله :(

شي يحز بالخاطر والله ..

طموحة مملوحة يقول...

أخوي علي

ماقص عليك ساعات اشوف وايد ناس تحد على لنقاش بالمذاهب وغيرها بعدين لمن افكر اول شراح نستفيد من هالنقاشات الي تسبب المشاكل فأحاول ابتعد قدر الامكان عنها لأننا اولا وآخرا نتفق على عبادة الله وحده ونشهد ان محمد رسوله ، الاختلافات الي تكون موجودة هذي كلها معطتها طاف الفئة التي تكفر الشيعة والفئة الي تكفر السنة كلها ضاربتها بعرض الحائط محد اعلم مثل رب العالمين . لذا اتضايق من الي يحطون المذاهب والقبايل والعوايل وغيرها اساسيات في الكلام والتعامل كلش ماحب هالنوعية .

Alikingkw يقول...

لا اكو فئة يديدة الحين يسمونهم المدونين
P:

طموحة مملوحة يقول...

اي باجر يسألوني اي مدونة ؟ وشنو فخذها :P ؟؟ فخذها قوقل لوول

Alikingkw يقول...

لووول

TruTh يقول...

امبيه والله ما تستحي عاد صور وصخة استغفرالله !

شوفي هذي دشت عرض عليج لأن انتي الظاهر مغيرة شي في الاعدادات مالت المسنجر

تبعي هذي الخطوات و عدلي اعداداتج عشان لحد يدرعم عليج:

شبكي المسنجر و عقب روحي على أدوات و عقب خيارات و عقبها من القائمة اليمين اختاري الخصوصية و عقبها راح يطلع لج البوكس اللي فيه سماح و منع،
في نفس هذي الصفحة تحت آخر شي اكو مربع صغير حطي عليه علامة صح عشان ينبهج اذا احد ضافج و بجذي راح اييج طلب اضافة و ما راح ينضافون الا بموافقتج و سلامتج

طموحة مملوحة يقول...

مشكورة يالغالية على التعليمات ماقصرتي والله

Ahmad يقول...

بالنسبه لموضوع السنة و الشيعه .. هالموضوع ما راح نخلص منه .. لو شنو يصير ما راح نخلص منه .. لأنه تفكير الناس محدود للأسف ..
ياليت كل واحد بدال لا يقول انا ولد فلان الفلاني .. يكتفي و يقول انا كويتي

ياليت يمر وقت يصير فيه هالشي..
و لي الفخر اني اكون كويتي

و بالنسبة لموضوع الأيميل اعتقد فيه ميزة بالأوبشن لازم تشيلينها ...
و بالنسبة للبنت فالله يهديها يارب ..
و كل واحد له استخدامه بالأنترنت .. وياليت يكون زين ..

شكرا على الموضوع

طموحة مملوحة يقول...

أحمد

شلت المشكلة بس قالوا لي ساعات يصير فايرس يحط صور مو زينة لأن كلام البنت زين لوول اخترعت والله

اي والله يليت اي هاليوم احسن من اقعد سنة اعرف عن نفسي ... ولي متى يعني ؟ مدري لوول

بنـ بني كندر ـت يقول...

اللي يبط الجبذ ويرفع الضغط يهال بالابتدائي يسألون بعض انت سني ولا شيعي ؟ بدوي ولا حضري ؟؟

ليششششش ؟؟ طفل لهالعمر من وين يايب هالحجي ؟

وعلى طاري هالايميلات لااتعورين راسج معاهم في اختراع اسمه بلوك ودليت وفكي عمرج من هالاشكال ... اللي ماتخاف من ربها ...