2009-02-17

كلية العلوم ... الله بالخير






بسم الله الرحمن الرحيم ..






عزيزتي : كلية العلوم









كيف حالك ؟؟ أعلم أنك في شوق لرؤيتي ،فالشعور متبادل ، لقد اشتقت اليك كثيرا ..... هل نقلب الموجة للعامية ؟؟؟ نعم هيا بنا ..












شوفي ياكلية العلوم برا الكويت ان قلت لهم أنا ادرس بكلية العلوم تدرين شنو ردة فعلهم ؟ : WaaaaaaaaaaaaaaaaaaaaW



وهني بالكويت اقول لهم انا بكلية العلوم تدرين شنو ردة فعلهم ؟ : ويييييه مالقيتي غير هالكلية الفاشلة ؟؟






اي صح نسيت الكويتيين كلهم يا دكاترة ولا علماء وباحثين ومهندسين كلش مافيها ناس فاشلة كلش كلش ...






أنا هني ياكلية العلوم تنبط جبدي والله ، دشيت القوقل ادور على صور لج مالقيت كل الصور علوم اجتماعية علوم طبية وبقية الكليات ليش مو حاطين العلوم ؟؟؟






أنا أقول لج ليش :






_ مبانيج ياكلية العلوم قديمة جدا للأسف مبنى يديد الي مسمينه (( المارينا )) وممنوعين من دخوله بعد والاستراحة فيه .



_ ترقيعه المباني يحطون صبغ فوق صبغ دون تعديل الأساس للأسف.



_بوابة الكلية صار لها سنة وفو توها تخلص شدعوة .



_ الأشخاص الي يداومون بالجامعة هم (( الطلبة _ الدكاترة _الأساتذة والمدرسين_ الفراشين _ ستيف والتصوير _ الصعيدي مال الأدوت الصحية _ العمال الي يطقطقون طول اليوم _الهندي ما الليتات _ الهنود الي يبلعون الزرع ماي مرة ومرتين وثلاث ولخلصوا يغسلون الكراسي مادري شالحكمة ...الخ ))






_ عيب بكلية العلوم ما نلقى ازعاج العمال الا وقت الامتحان ، حركة متعمدة والله .. طول السنة يمرون حوالينا مادري شيسوون والله بوقت الامتحان نسمع ازعاج مو طبيعي وبعدين يقولون الطالب مايركزبالامتحان .. والله عيب انا بنت أروح اتسأذن من العامل لو سمحت الساعة الفلانية لا تسوون ازعاج لأن عندنا امتحان ، حرام يقولوون لي ماشي وتحت أمرك مساكين مو بيدهم .. والله اشوف العمال بالسعودية والامارات ماشاء الله يشتغلون ليل ونهار علشان يخلصون بسرعة والله العظيم كلية العلوم عمرها مافضت من العمال ويليت تتسنع .. يليت بس ..






انا آسفة ياعلوم قلت لج احبج لا يضيق خلقج والله أحبج بس الواحد لازم يقول الصج .






سالفة جمعية وقائمة تمثل الكلية هذا كلام لاعت جبدنا منه ، محد فيهم يقدر يوقف يتحجى بصراحة ، وان اعترضوا طلبة وعلقوا ورقة دقيقة الا شايلينها ممنوع الطلبة يوزعون اوراق .. فرق بينهم وبين الجامعات الثانية الي تعطي الطالب كامل الحرية في انه يبدي رأيه وبكل صراحة ... شدعوة احنا مو ملائكة.









_ يقولون ياعلوم ان احنا معقدين ، مادروا اننا (( شربات )) ودمنا خفيف ونضحك والحياه سعيدة ... عسى مانقول لهم علوم (( مصيبة مخ )) يصكونا وحدة نصير أغبياء مرة وحدة ..






_ماكو مكان نقعد فيه براحتنا ياعلوم ،عسى ماقلنا نبي مكان ندرس فيه ، الكلية مافيها مكان .






_ كافتيريا زيادة اسعار ولاكو حسيب ولارقيب وكله على افا طالب العلوم المسكين الي مايدري شيسوي بال100 الي ياخذها يصرفها على نفسه ولا على مستلزمات الدراسة ولا على اكله .






_ دكاترة العلوم مايساعدون >>>>> غيري الموضوع وللي يسلمج روحي سوي لج ملخية وايد احسن آل دكاترة العلوم .






_ طلبة يدشون من برا الكلية ويأذونا بالمعاكسات وافتعال المشاكل ، وأغلبهم من ربع الجمعية ولاحياه لمن تنادي بالكلية .












ماكو مكان ..................... الحل بالشدادية


..



..







دكاترتنا شوي ................. الحل بالشدادية



..



..


..








تطبيق خاطئ لقانون منع الاختلاط ........ الحل بالشدادية


..



..


..






عمال وايد ..................... الحل بالشدادية


..



..



..






فيني كحة ..................... الحل بالشدادية


..



..




..









ترا وايد شادين حيلكم بالشدادية شدعوة بنقعد للشدادية ؟؟ كرمونا الحين شدعوة جن الي يقولون انتوا خلصونا بس وفكونا من رقعة ويوهكم






ويصير خير .. شدعوة ياجامعة الكويت ترا احنا عيالج .. والكويت دولة غنية ولله الحمد ... شدعوة عليكم تبخلون علينا كل ماقلنا بنسوي






شي قلتوا دفعوا انتوا الميزانية مخلينها للشدادية ... الله يالشدادية .. خل نشوفها باجر









سؤال : معلومة وصلت لي من مصدر اكيد أن مبنى (( الطالبات )) لكلية الطب قيمته بروحه 80 مليون دينار كويتي ، ممم حسبوا مع مبنى الطلبة ، وكلية العلوم قسموها على 2 وزيدوا السعر شوي ... اوووووف الشدادية كلها جم تكلفتها ؟؟؟؟ ماشاء الله












نرد لج ياكلية العلوم ...









والله ماتستاهلين يالغالية يخربون سمعتج بكلام ماله داعي .. يبا انا برا اتفلسف على كيفي وناسة معطيني على جوي ، وانتي عالمة المستقبل .. وتخصصج زين وشدي حيلج ، وبالكويت .. ويييه وين تلقين وظيفة ، مصدقة روحج يعني على بالج جامعية خلاص كل من هب ودب دش الجامعة ... اصلا حتى الي نسبته اي شي واسطته تدخله الجامعة غصبن عن خشمي ...












كلية العلوم












الشكوى لغير الله مذلة والله ماعليه انتي غالية وتستاهلين الخير كله والله ماعليج من كلام الناس ، وانتي الخير والبركة ، خلينا لمن باجر نفيد ديرتنا بيعرفون قيمة طالب العلوم ، اذا ماكان لنا مسمى وظيفي بالكويت ترا برا يسمونا علماء ، وهذا بروحه كافي شهادة نفتخر فيها ، طول عمرنا مُحبطين بديرتنا مو شي يديد يا علوم .









المهم اني افتخر بأني طالبة في كلية العلوم ، وعلى الرغم من الشوائب الكثيرة الا انها عسل ... وربنا يعسل الجميع يارب .

































ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ






وأخيرا أقدم شكري لقسم الجيولوجيا (( علوم الأرض والبيئة )) في كلية العلوم ، من سكرتارية وموظفين ، ودكاترة وأساتذة وحتى الهنود الي يشتغلون هناك .. اقدم لهم كل الشكر والعرفان ..






وكلمة الحق تنقال .. احس اني مع اهلي مو غريبة بينهم .. كلهم يعاملونا مثل أبنائهم واخوانهم .. وماقصروا بحقنا والشاهد الله على كلامي هذا ... فلهم مني كل الشكر والعرفان .






































بعض من صور العام الدراسي الأول ، واحتفال قسم الجيولوجيا بالعام الدراسي الجديد .. : )

46 comments:

فريج سعود يقول...

والاجمل اسماء المباني



عثماني يقول...

سارونة

ذكرتيني بايام الجامعة

صح اني كنت بكلية الهندسة

بس كنا ناخذ مواد بالعلوم

اعتقد ان ما تغير شي فيها كليتكم

اللهم الا اعمال الترقيع

و عاشت السارونة ام الثوب الاصفر

;)

طموحة مملوحة يقول...

فريج سعود


لا 3خ الي كل الكويت فيه لووول .. اذكر كانوا يقولون لي قبل مادش الجامعة لا تقعدين بهالمبنى وانا الا اعرف ليش ... لوووول

بس صدقني مو كلهم علوم الي يتحرشون هناك مثل ما قلت في اييون من برا الكليات وفي من التطبيقي ... اييي;D والمشكلة الجامعة تدري ومخليتهم يسرحون ويمرحون على كيفهم وماخذين الاماكن الي المفروض اهي حق الطالب الي بالكلية ..

طموحة مملوحة يقول...

عثماني

لزوم الديكور لووول

لووول انا اختي كل ما سألتني ها العلوم مثل ما اهي ؟؟ اقول لها على حطة خشمج ماتغيرت لووول

والله صج وحاطين كل آمالهم بالشويخ كشخة وعلى كيف كيفك وكل الاشياء الفنتك عندهم شنو احنا عيال البطة السودا ؟؟ ترا دراستنا اصعب من دراستهم لا يقعدون يهايطون على راسنا :p

Hashimoto يقول...

لوووول
والله معاناة كلية العلوم
هالعمال اي والله بطوا راسنا كل يوم يكسرون على بو ان تصليح
مرة واحد عالسطح يكسر ويطيح على رووس الاوادم
زين محد تعور
x)

======

3 خ ==> مارينا مو مبنى
هذا الي مرة وحدة دخلته بعدها حرمت
اشكال الناس الي هناك .... x:

لا واسمع ربعي يقولون "بعد ما يحتاي نروح مارينا كل ش موجود اهني "

والله حالة

Enter-Q8 يقول...

اولا شي شنو الهابي فيس هذا
تقول داش حضانة ولدي والله
ثانياً وين اتحادكم عن سالفة اعمال الصيانة خلال الفترة الدراسية

ثالثاً
ترى الشدادية مو بعيده و البلد صغير
لكن ازمة المرور اهي العلة
انا مع التوسع العمراني و نقل المركزية من العاصمة الى المحافظات

و رابعا
قبل هذا ترى النقد هذا يحسب عليكم كاطلبة بهذه الكلية ان كنتم لم تقدموا البدائل و توصلوا رسالتكم

اتبعي سياسة وزير الخارجية
ولعها و لعها شعللها شعللها
صحافة تلفزون الى اخره

ENG.Sara يقول...

اذكر قبل جم يوم بنت خالتي سألتني وين ودج تدخلين بعد التخرج ؟
قلت لها اكيد ان شالله اذا يبت نسبة راح ادخل الهندسة
قالت لي اذا ما يبتي نسبة تدخلج الهندسة نصيحة روحي اي مكان ثاني ان شالله لو التطبيقي والتجاري بس لا تفكرين بشي اسمه كلية العلوم
قلت لها شدعوة ليش ؟!
ردت علي مو لازم تعرفين ليش بالضبط بس هالكلية كلش مو زينة بولا شي وحتى خريجينها مالهم مستقبل
بس هم ليلحين ما لقيت سبب مقنع يخلي الكل يحرص علي اني انسى شي اسمه كلية العلوم ؟!!

قانونى كويتي يقول...

يعطيج العافية على النقل الحي للكلية

بس المشكلة الكلية ما تتكلم علشان اترد عليج

بس انا ادرى اننتى تخاطبين المسؤولين عليها

نتمنى يسمعونج ويعدلون من الكلية


وتحياتى لج

Kuwait يقول...

@@
لوووووووووول لا تحسبين ان الشويخ جنة الله بالأرض ..
ترى كلها فيران يدابجون بينـا :)

أحمد الحيدر يقول...

ذكرتينا بأيام الهموم ..

بس البوست حدددده من قلب هههههههه

لي الحين قسم الجيولوجيا في 3 خ ؟

M.AlQallaf يقول...

^_^ فديت الكلية والله !!!

TruTh يقول...

الله يفرجها عليكم ان شاء الله

شنوا معنى كلمة شدادية؟ ترى اول مرة اسمعها بحياتي

المهم أحلى شي بالموضوع صورج

طلعتي ملح يتكتكت يعني نكج اسم على مسمى
:)

و الغمازة تينن ماشاء الله

عسى الله يحفظج و يوفقج يااااااا رب
^_^

عفره يقول...

من قبل كنت اسمع ثنتين يسولفون
وحده تسأل الثانيه شلون كلية الهموم
عاااد انا لعب الفاار في عبي ألا اعرف شهالكليه الي اسمها هموم صج عااد في كليه جذي ؟؟؟
واقوم استخبر واطقس واسأل
واخرتها طلعت كلية العلووم

وكنت استغرب هووو ليش هموووم الله يفرج همهم يارب
كنت ادعيلكم يومها لوووول << مصدقه انها هموم

SHAHAD يقول...

ساارون لو تتحلطمين مني لي باااجر لا حياااة لمن تنااادي
أذكر بكلية التربية كنا ندااوم بـ جبرااات

متخيلة إنتي .. جامعة الكويت وكلية التربية وقاعاتنا جبرااات !!

والله نفشششل !

على ما تطلع الشدادية إلا احنا صرنا يدات لوووول

خليها على الله

Miss-Q8 يقول...

هونيها سارونة
صرنا ما نحب العلوم إلا بأزماتها ;p

بوفهد يقول...

تخاريف حلوة

استاذة وايد عجبني حوارك مع الكلية.

وتسلمين ويارب يصير الي بخاطرك....

elsha3er يقول...

اسعدنى زيارة مدونتك كلية العلوم كلية جميلة جدا احنا عندنا فى مصر دى احدى الكليات القمة اوعى تحسى انك اقل من الكليات الاخرى احنا عندنا من مصر احمد زويل كان متخرج من كلية العلوم
وكان ساقط اول سنة


تحياتى لكى ولكل اهل الكويت


احمد الشاعر

Salah يقول...

الحين يمكن في أمل يسمونكم علماء بس اذا رحتوا الشدادية ما أعتقد!

:)

الله يعين

Manal يقول...

استمتعت بالحوار
:)

بسوي واحد مع جامعتنا
:)

كويتي يقول...

هذا المبنى كان اول مبنى لي ايام الدراسة (التسعينات) وهم اهو اخر مبنى خذيت فية دورة طبعا قسم (خدمة المجتمع و التعليم المستمر) سنة 2007

لا تتململين الحين باجر الله بيوفقج و بتتخرجين و بتشوفين شلون بتشتاقين حق هالايام الحلوة

طموحة مملوحة يقول...

Hashimoto

أنا والله حذروني من المكان بس بصراحة انا عندي مقولة ان الي يقعد باحترامه يفرض هالاحترام على الي جدامه غصبن عليه ساعات ننجبر نقعد في على ماتخلص المحاضرات الي قبلنا .. واغلب الي يقعدون فيه اما بتخصصات ثانية او من كليات ثانية او حتى مو معانا بالجامعة يعني عيب هالحركات الي قاعدين يسوونها..

وعلى سالفة العمال تخيل مرة باختبار فيزيا والله قاعدة افكر واستانست يتني فكرة حل ولا اسمع صوت الطق والله طير كل الي براسي قلت حق الدكتورة جان تدق على مادري منو قالت لهم عندهم امتحانات يوقفون شغل العمال ..

طموحة مملوحة يقول...

Enter-Q8

أخوي هذا بداية العام حبينا نحتفل ونسوي شي يجذبهم لوووول كان وناسة والله .. المرة الياية زورنا :p

أخوي الشدادية ماسووها علشان المكان والزحمة . الشدادية سووها علشان منع الاختلاط الي ذابحينا فيه عاد شوف فلوس الدولة الحين بتضيع عدل بهالمشروع الفاشل الي راح يفتتحونه لى قولتهم 2025 :)

ونشرت بالجرايد عن الكلية حطيتهم باسمي بعد غيروا شوي يعني بيسكتونا حطوا جم كرسي وغيروا سقف المحاضرات وصبغوهم :p

طموحة مملوحة يقول...

ENG.Sara

حبيبتي مالج شغل بكلام الناس ترى حتى الهندسة متعقدين انا وايد ناس اعرفهم بكليتنا تخرجوا وماشاء الله يشتغلون باحسن اماكن وعندي زميل خذته امريكا يشتغل هناك متخرج علوم كمبيوتر ومعاشه دبل معاش الي هني .. لا العلوم يقدرونهم والله بس المشكلة بالكلية نفسها المكان ولا الكلية حبيتها بصراحة ومن صغري كنت احب العلوم يعني ماتحسفت .. بس اتحسف على اهمال الدولة لها واهمال الي فيها .. جن كل من هب ودب دش العلوم .. فعلا ان ياخذون درجات اقل بس صدقيني الشاطر الي يمشي فيها ..

طموحة مملوحة يقول...

قانوني كويتي

انا ماكتبت هالكلام علشان يسمعوني .. انا كتبته علشان يعرفون ان في طلبة مايسكتون ولا يرضون بهالمهزلة .. اذا اهم موظفين ومايحبون يكونون قاعدين بمكان مايليق بمستواهم فأنا طالبة جامعية ولا اقبل ان ادرس في مباني بهالمستوى :)

طموحة مملوحة يقول...

Kuwait

بس عندكم وايد اشياء احسن منا كافي كلاساتكم تشرح السدر .. وعندكم استراحات تييب العافية والشركات ماتقصر وياكم احنا محد معطينا ويه كلش

طموحة مملوحة يقول...

أحمد الحيدر


لا العلوم اتينن والله ، اي للحين بس اخوي تخيل شفت دعسة القسم ؟؟ عسى ماطلبناهم مكان .. مايعطونا والي باط جبدي .. احنا ماعندنا مكان حق استراحة ودراسة بنفس المبنى حاطين غرفة حق النادي البيولوجي يعني البيولوجي بمبنى 1خ شكو حاطينهم عندنا ؟؟ حدها صارت عفسة الكلية

طموحة مملوحة يقول...

M.AlQallaf


وفديتج انتي بعد يالغالية :)

طموحة مملوحة يقول...

TruTh

الشدادشة معناها شدة وتزول لوووول مادري بصراحة .

تسلمين يالغالية اخجلتيني بكلامج :")

طموحة مملوحة يقول...

عفرة :

ذكرتيني مرة بدق على مطعم جان يقول لي فين اي كلية ؟؟ قلت له كلية العموم قصد الهموم أووووف العلوم تدرين شنو بطها ضحك ورفيجاتي مسكوا بطنهم من الضحك فديتها والله كليتي ماكان قصدي والله لووول

طموحة مملوحة يقول...

SHAHAD


ترا حتى احنا عندنا جبرات اكشخ منكم مكانها استراتيجي يم مبنى راقي وكشخة لوووول ... يبا عندي يدرسونا بالسطح وايد اهون لووول

طموحة مملوحة يقول...

Miss-Q8

هلا والله بصديقتي الغالية ولكم باك :) الكلية مشتاقة لج والله يالغالية .. لا تصدقين على المشاكل الي فيها احبها حييل وساعات اقعد افكر اذا سووا الشدادية شلون راح يصير شكلج ياعلوم ؟.؟ والله احبها ..

طموحة مملوحة يقول...

بوفهد


تسلم يالغالي :)

طموحة مملوحة يقول...

elsha3er

اخي العزيز أولا يشرفني زيارتك للمدونة :)

أحيانا اذا سافرت مصر أو قلت لأبناء خالتي هناك اني بالعلوم ، فهم يفرحوا كثيرا لأن فعلا العلوم في مصر من الكليات العريقة وكذلك في الدول الأخرى ولكن للأسف لم نشعر بذلك في الكويت .

يشرفني تعليقك على موضوعي أخي العزيز

طموحة مملوحة يقول...

Salah


امل ضعيف جدا جدا :)

طموحة مملوحة يقول...

Manal

اي طلعي الي بقلبج لووول

طموحة مملوحة يقول...

كويتي

هالبنى المفروض يذكرونه بالتاريخ لوووول .. لا والله بس حلوة العلوم بكل مافيها .. والله احسن شي فيها ان الهنود والسكيوريتي قلبهم طيب والله اذا احتجنا هم مايقصرون والله ويسلمون علينا جنا خواتهم والله يهبلون ..

كبرياء وردة يقول...

هذا حال جامعة البحرين :)

عذااااااب

تعرفين شيقولون عنها

الداخل فيها مفقود والخارج منها مولود :)

بس مثل ما قلتي تبقى عزيزة وغالية

وتبقى شهادتها فخر

كلن يغني لشقى ليله

والله يعينكم

وعاشت ام الأصفر المملوحة :D

طموحة مملوحة يقول...

كبرياء


لوووول

انتي بجامعة البحرين :) ؟؟ انا قصدي عن جامعتنا لووول .. والمقولة رائعة والله مساكين والله مشكلة عندنا الكويت تبني حق الي برا احسن بنايات من مستشفيات مدراس كل شي وبديرتنا مادري جن قاعدين بديرة فقيرة لا حول ولا قوة الا بالله

المتهـافت يقول...

انا لما ييت اتخرج قالولي روح سلم بطاقتك الجامعية في مبنى الامن والسلامة فالخالدية.. ومابغيت الا روحي
ساعة لين اسفط
وساعة لين دليت المبنى وساعة لين دليت مكان مكينة الطوابع شدعوة بتخرج لهالدرجة هاين عليكم افارقكم يعني؟

تخصصج حلو وانا صغير كان اخوي يدرس هالتخصص ايام "الاختلاط" كنت اروح معاه للقسم وكان متعة بالنسبة لي لما ياخذني معاه واذكر بغينا نسافر المغرب نزوره كان عنده ميداني هناك مسفرينهم على حساب الجامعة

الله ايام :)

اتمنالج كل التوفيق يا فتاة

كبرياء وردة يقول...

لا بجامعة خاصة :)

طموحة مملوحة يقول...

المتهافت


لا الحين يودونا عمان الشباب بطيارة والبنات بطيارة تعرف خايفين علينا وجود هيئة اعضاء التدريس كها ماتمنع من دخول الشيطان بينا لووول .. المهم اخوي اي الحمدلله والشكر الله يالبطاقة مادري شبيسووون فيها يعني .. شدعوة البطاقة نفعتنا بس على حطتها اول سنة ماسوت شي والله :p

اي وناسة اول يروحون المغرب احنا الحين عمان كنت ناوية اروح هالسنة بس بخليها السنة الياية علشان رفيجاتي حبيباتي :p تعرف العمل الجماعي افضل والي بيروحون هالسنة الدفعات الي قبلي انا مو وايد معاهم ....

بس وناسة الجيولوجيا تدري الحين ماكو اختلاط بكل القاعات بس ماكلين حجي خايس من الناس ... عسى ماوحدة وقفت تكلم زميلها طلعت قليلة ادب وماتستحي على ويهها والله حرام عليهم ماكو نظرة ايجابية ولاكون حسن نية .. خلني ساكتة ماله داعي احجي وايد لووول بس قسمنا ولله الحمد يتلقى الدعم من الدول الي برا الحمدلله واحنا على اتصال دائم معاهم يشجعونا وايد وبديرتنا يضحكون علينا :(

طموحة مملوحة يقول...

كبرياء


عسى الله يوفجج يالغالية :)
يعني تعانون مثلنا ؟

كبرياء وردة يقول...

اجمعين حبيبتي

والله بالدراسة ما في احد مرتاح

(تذكرت اغنية ابو بكر سالم:p)

بس اللي يشوف مصايب جامعة البحرين تهون عليه مصيبته

وا عليه رفيجاتي متأذين أذية

دشي منتدى uob وشوفي :)

طموحة مملوحة يقول...

يبيله ادش المنتدى اتسكع فيه شوي

بس شوفي اذا شافوا جامعتنا مايقولون هذي بالكويت والله عيب ...

عندج فلوس وايد بدل ما تبذريتها على جم دولة مو كفو خليها لديرتج وايد احسن :)

qesat_5ayal يقول...

إيـــه

قلتي جامعة الكويت ؟
ولا الشدادية ؟

الشدادية حلم لن يتحقق إلا على أحفادنا ربما


والمعاناة أعتقد بجميع كلياتنا المرموقة
الحال من بعضو ياختي

غزرت،، جم كورس على جم مادة ونتخرج إن شاء الله



:)

طموحة مملوحة يقول...

أخوي متأكد ؟؟؟

احنا قاعدين نعاني من قانون منع الاختلاط ... يعني الي المفروض يتخرج هالسنة بيتخرج بعد سنتين من هالقانون التعيس ... اوووخ نسيت ان الي يدافعون عن التعليم المشترك يبون الفساد ... هذا تفكيرهم:)