2009-03-13

6 فــــــــــــــــــــــــــــــــي 1


شلونكم جميعا ؟ مريت بيوم بجي وفرح بوقت واحد ، سكرتيرة القسم شافتني الصبح بوضع تعيس وبالليل قالت لي : ربنا يخليكي كدا دايما فرحانة وشك مش حلو وانتي بتعيطي .
أختي علطول : تعيطي ؟؟ شفيج ؟
يوم الاحتفالية كان جدا رائع ولله الحمد استانسنا وايد مع الدكاترة وحسيت اني وحدة منهم لووول عشت الدور ان شاء الله راح آخذ الصور يوم الأحد واحط لكم اجزاء المؤتمر والحفل ان شاء الله .
أمس قررت مع امي وخالتي الي لسة جاية من مصر اننا نتمشى ثلاثتنا . وكانوا مرتاحين لأن ثنتينهم خوافات وليش مرتاحين لأني وياهم لأني محرمهم طبعا ،مايغركوش شكلي بآآاا .. المهم وديناها فين ؟؟ سوق المباركية .
وانا عاد لا تقطوني بالمباركية ، ولك حتى ريحة زفرة سوق السمج الي هناك تهبل اتبخر هناك لووول .
تمشينا شوي وتعشينا وانا طبعا قاعدة واسجل معلوماتي براسي ، من المواقف الي تصير، من ناس تاكل وتقط بالارض زين حطوا جيس زبالة يمكم ؟؟ والي يسوون ازعاج والي تبي تضحك الناس تلعب بالجراخي وعطيتها خزة حقيرة خرعتها .. والي قاعد متنح بويهي شايب ويرفع تلفونه يعني فهمي ، وانا لايعة جبدي والله شايب ويع .
وقاعدة امي تقص حق خالتي قصة حياة سارة تقول لها : البت دي بالعافيةعايزة تبآى مهمة بالمجتمع .
خالتي : ومالو حاجة حلوة بدل ما تضيع وأتها في حاجات تانية .
أمي : عارفة فكل حاجة حاشرة نفسيها :p دي كمان بترسم كركتير .!!
خالتي : واللهِ ماشاء الله كويسة يا سارة خلكي كدا دايما يارب متوفقة .
أمي : شوفتي الي بيؤول (( سبع صنايع والبخت ضايع )) ؟ هي دي سارة !!
خالتي : يالهوي ماتؤوليش كدا لا يارب بختها يبآى كويس .
لا تشوفون ويهي واهم يسولفون عني ، جان اقول حق امي تبيني اهد هالسوالف واسوي مثل بعض البنات قز 24 ساعة بالسوقة ؟؟
أمي : لا ياختي خليكي كدا كافية خيرك شرك ..
خلصنا من المباركية رحنا على الكوت تمشينا وفضفضت الي بقلبي لأمي وخالتي وكسرت خاطرهم شوي ..لووول
ـــــــــــــــــــــــــــــــــــــــــــــــــــــــــــــــــــــــــــــــــــــــــــ
..
..
..
سؤال : الحين لمن الوحدة ترفض واحد ، ليش اهله واهو يحقد على البنت ؟؟
ليش يقطعون علاقتهم ولا حتى سلام بينهم ؟؟
يعني يازواج يا مانعرفكم ولا تعرفونا ؟؟
..
..
..
ــــــــــــــــــــــــــــــــــــــــــــــــــــــــــــــــــــــــــــــــــــ







أقدم شكري الجزيل لكل من :

الدكتور : عرفات الشعيبي ، على ثقته التامة فينا وعلى مجهوده الرائع بالمؤتمر .

للدكتور ورئيس القسم : جاسم العوضي على كل ماقام به ، وأقدم له اعتذاري لأني ماقدمت عدل بمادته وأوعده اني راح اشد حيلي مثل ما قال لي ..

للأستاذة الهام والاستاذة عهود اللوغاني من قسم العلاقات العامة على ترتيبهم للمؤتمر وحرصهم على كل شيء في المؤتمر وثقتهم التامة بنا ... كل الشكر الجزيل لهم .

لأخواني الأعزاء وأخواتي العزيزات :

جاسم عباس ، لولوة ، حمد الحمد ، حوراء ، محمد بوعباس ، نور ، عذبي السلطان ، سعد الرشدان ، عبدالعزيز الهولي

وتمنياتي لهم بكل التوفيق يارب ، فقد بذلوا الجهد الكبير وكانوا يشتغلون اكثر مني لأني كنت آكل وايد بصراحة لووول

ــــــــــــــــــــــــــــــــــــــــــــــــــــــــــــــــــــــــــــــــــــــــــــــ

نصيحة لكل بنت : اذا شفتي والدتج انسانة متفهمة قولي لها اسرارج وصدقيني ماراح تخسرين شي ، من تجربتي الشخصية شفت زميلات مو كفو على بالهم ان الجم كلمة الي اقولها لهم امي ماتدري عنها فكانوا يدقون عليها ويقولون لها وطبعا امي ردها : اي وبعدين يعني ؟ فنصيحة من كل قلبي ترا اغلب البنات مو كفو تقولون لهم اسرارج والله فخلي امج دايما صديقة لج ، وأعترف اني بالغصب وبالحيل صرت قريبة من امي لأن كنت دايما بروحي واحتفظ باسراري لنفسي بس خلاص لي متى ؟

نصيحة وصدقوني انتو الربحانين ..

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

...

..

..

..

..

لازال يحبـــــــــها

لازال يفكر بهــــــا

رغم أنه بنى حياة جديدة ..

وأصبحت في قلبه امرأة أخرى ..

إلا أنه يراها في منامه وأمامه ..

أصبح يلعنها كثيرا ..

ويتمنى زوال خيالها بقربه بسرعة ..

يتمنى أن يعود الزمن للوراء..

لا لكي لا يحبها ..

بل كي يزيد من كمية حبه لها ..

علها تشعر بهذا الحب ..

أنه يمقتها .. ولا يريد رؤيتها ..

ولكنه يراها ..

يريد أطفاله منها ..

وينتظر لحظة وقوع عينه بعينها ..

تحاول الابتعاد عنه ..

ويحاول انتهاز الفرص ليراها ..

هدمت عرش غروره وكبريائه ..

بنت اساطير الحب في قلبه ..

رأى بها الفتاة الضاحكة المفرحة ..

رأى بها زوجة تعيش العبط معه ..

بنى قصة زواج كبيرة في مخيلته ..

وأصبح يضحي من أجلها ..

فكيف تحب شخص لا يحبك ؟؟

إنها تبتعد ... وتبتعد .. وتبتعد ..

حتى أصبحت في يده امرأة أخرى ..

ينظر اليها في ليلة زفافه وكأنه ينظر حبيبته ..

عابس الوجه لا يضحك في وجه الحضور ..

أرادت أن ترقص في زفافه وتلبس ثوبها المفضل ..

ولكنها اجبرت على المكوث حتى لا يراها ..

انه ينتظرها ... ولازال ينتظرها ..

تلك الفتاة ..

ينتظرها ..

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

.
.
.




21 comments:

Enter-Q8 يقول...

الله يخليلك والدتك و لا يغيير عليكم
بس للحين ما عرفنا سالفة البجي
مع اني اتعودت اني دايما اقرى ببوستاتك انك بجيتي ؟؟

طموحة مملوحة يقول...

هذي عقدة نفسية لووووول


اذا مابجيت مايصير توازن بشخصيتي عرفت ؟؟
:)

ومشكور خالد ويخليك لأهلك يارب

SHAHAD يقول...

صح كلامج
الأم أحسن صديقة .. وهي اللي صج على قلبج .. يعني تقولين لها السر وانتي متطمنه : )

الله يخلي لج أمج يااارب
ويخلييج لهااا
ويطول بعمرها وتشووف بختج وبخت عياالج بعد : ))

كبرياء وردة يقول...

الله يسلمج يالغالية

هذا مرض ببعض الناس ما يتقبلون الرفض ولا النقد

وبالعكس حلو انج تثبتين وجودج
keep going:)

وعدل كلامج
ماكو مثل الأم تحفظ أسرار بنتها
انا وامي نقول لبعض كل شي

الله يحفظكم ولا يغير عليكم

Engineera يقول...

الله يخلي لج امج وخالتج
وااااااا حلات سوالفهم وبدلياتهم .. احس انتي قاعده وتضحكين عليهم بلابل بلابل ..

جان عطيتي الشايب فرصه حرام عليج لووول


الخاطره شي مو طبيعي .. اقدر اقول لامستي احساسي بدرجه كبيره ( سويت كوبي بيست و خشيتها عندي ) ..
يعطيج العافيه على البوست

السواء يقول...

عسى الله يوفجج طموح :) !

Kuwait يقول...

شنو شريتوا من المباركيه ؟ ;q

طموحة مملوحة يقول...

SHAHAD


يابعد قلبي يا شهد ، والله من مواقف وايد صارت لي وتعرفين البنات لمن يغارون يحبون يخربون على رفيجاتهم ، وعلى بالهم ان امي معقدة عرفتي .. بس الحمدلله الله فوقهم ورد لي حقي كله الحمدلله ... علشان جذي اقول الام قبل كل شي حتى اختي الصغيرة قاعدة احاول اكون معاها لأن مابيها تقول شي حق رفيجاتها ..

طموحة مملوحة يقول...

كبرياء وردة

الله يخلي لج امج يارب .. وفعلا ماكو مثلهم والله :)

فديتج وفديت ردج الحلو .. والله انا لوحاصل لي اقول حق ابوي عادي بعد لوووول ماعندي فيها

طموحة مملوحة يقول...

Engineera

لووووول على بدلياتهم ؟؟؟ تقول لي امي خلينا نودي خالتك الكورانيوم .. لوووول يعني الاكواريوم .. قعدت سنة على ماعدلتها لها لووول ...

يابعد خشمي انتي والله الحمدلله عجبتج الخاطرة :)

طموحة مملوحة يقول...

السواء


اجمعين يارب مشكور ياخوي العزيز

طموحة مملوحة يقول...

kuwait


لووووول ولا شي مريت محل تلفونات طلعت لي بدل فاقد حق خط الاي قو وتمشينا هضمنا الاكل لووووول ...

elsha3er يقول...

السلام عليكم

ربنا يخليلك مامتك ياسارة وما يحرمكوش من بعض

اما عن البكاء دة مش عقدة نفسية ومش لازم تبكى عشان يبقى عندك توازن بصى ياسارة انتى بتمرى بظروف ما بس عشان ما اتدخل اكتر من حدودى ما فى شى فى الدنيا يستاهل البكاء ممكن نزعل شوية لكن بدون تأثير على طموحتنا وبعدين زى ما قالت والدتك انتى عايزة تكونى حاجة مهمة يبقى حبى نفسك شوية ياسارة حبى هدفك حبى طموحك على الاقل حاليا حتى تحصلى على ما تريدى

انا يمكن اتدخلت شوية فى اللى ماليش فيه بس والله دة من خوفى عليكى لانى حاسس انك متغيرة كدة بقالك كام بوست


تحياتى

احمد الشاعر

قانونى كويتي يقول...

العزيزة الطموحة

تحياتى لج

والحمد الله على سلامة الخالة

وزين سويتوا وديتوها المباركية

يعنى شى جريب من خان الخليلى


علشاتن لا يقولون ما عندنا شى حلووو


ويعطيج العافية وعساكم على القوة


تحياتى لج

عفره يقول...

على طاري سؤال الخطبه
خطبني واحد ورفضته خواته ما خلوا شي ماحطوه فيني
بعد الرفض صرت جيكره وما انبلع وحاااااااااااالتي كسيفه خلوني من كثر الجكر طايحه بجبد امي
وكل من يقولهم عفره تهبل اسم الله عليها يقولون ويييع
نظراتهم لي مادري شلون صارت
بس اختج تعجبج
كسرت كلامهم بالطيب خليتهم يستحون على دمهم
والله يوفقج

طموحة مملوحة يقول...

ابن خالتي أحمد


لا تدخلت بخصوصيات ولا حاجة ..

عادي والله ومشكور على كلامك الرائع ..

طموحة مملوحة يقول...

قانون كويتي
ا

اي اهي بعد قالت زي خان الخليلي :p

اي والله عجبها المكان الحمدلله :)

طموحة مملوحة يقول...

عفرة

تصدقي شكثر تصير هالمواقف المشكلة الخوات هذول هم رادين خطاب يعني يرضون على نفسهم وميرضون على الناس ..

مركبنا يقول...

طموحه

نصيحة ذهبيه

نعم نكره محبينا يوما

فتتحول لحظات الصفاء الماضية
الي سموم تقذفنا للهاويه

ولكن الام هي بنك لمعلوماتنا
وسبئر عميق

احسنتي الاختيار

طموحة مملوحة يقول...

مركبنا

اشكرك يالغالية على نصيحتك الذهبية الرائعة :) بالتأكيد ستكون في ذهني هذه النصيحة :D

شكرا لك

TrueClue يقول...

خوش مكان طلعتي فيه خالتج .. سوق المباركيه من التراث الكويتي .. و لو تودينها سوق الجمعه بعد زين ..

و انا مو بنت بس اعرف انه الأم اهيه احسن صديقه حق البنت ..
بس احنا منو احسن صديق لنا :( احنا مساكين يالشباب ولله :( نكسر الخاطر :(

الله يبعد الحزن عنج يارب ..