2009-03-03

اينشتاين مو أحسن مني ..!!!



أدري بتقولون مو صاحية لأني فعلا مو صاحية على أول ثلاث أيام دوام جامعة رحت فيها والله ، يخرب بيت الي يحط نفسه بهالمواقف
فوق ما علي ضغط الدراسة ، يدق التلفون رئيس تحرير المجلة ، التلفون الثاني يدق مسؤول المطبوعة علشان الرسمات الي قدمتها لهم ، وأتذكر أمي لمن تكم على ويهي وتقول (( جاتك خيبة ، تتعبي وترسمي وتآبليين ناس على الفاضي مايدوكيش فلس واحد )) لوووول بعد شسوي طموحي أكبر من اني اكون مادية ،المهم كلهم يبوني اخلص الشغل وانا شوي والطم والله ، شوي ولا تدق الدكتورة : سارة وينج ؟؟
أنا : موجودة !!! خير ؟!!
الدكتورة : شنو نسيتي الاجتماع ؟؟

وانا أطقها ركض والمشلكة وزني يزيد اسكر حلجي واتحرك بسرعة وهم يزيد وزني ، خلصت رحت حق المختبر ، وخلصت الساعة 5 ويدق التلفون مابي ارد ، شوي ولا اصرخ خلاص خلاص لاعت جبدي مافيني خلاص مليت ...

لا وهذا غير المؤتمر الي بيصير الاسبوع الياي وانا من الحين اطق اصبع !!!!! :(

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

حلو يكن للانسان طموح انه يقدم شي للناس ولديرته بس تعب ، خاصة لمن يكون التعب نفسي وحسي وجسدي ، لأني بصراحة تعبانة خلقة ، مهمومة ولايعة خشمي واييون هذول يكملون علي ، ولا كنت افكر اصير عضوة بالمجلس لا يابا ماريد اصير عضوة بالمجلس !!

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ

كنت بكتب مقالة حق المدونة بس تذكرت مقالة كان لازم اسلمها من زمان وللحين ما كتبتها ...

وابي اعلق على وحدة كانت تتابع مدونتي مادري وينها هل للحين تتابعها ولا ملّت ؟

هالانسانة شغلها الشاغل تتطنز علي وين ما اروح ، مرة تطنزت على رموشي ليش ساعات اركب رموش :D

وعسى ماتدور سالفة تقعد تتطنز علي فيها ..

ماخلت شي فيني ، ولله الحمد فأنا انسانة متواضعة ما أقعد اهايط نفس البنات واقول انا البس الماركة الفلانية وجنطتي وملفعي و.. و... و... الخ

والله اغلب لبسي من عند بو5 دنانير وعادي اقول خو ما استحي ، تيي الأخت تتطنز علي وعلى طموحي !!!

ساعات اقعد اضحك من كلامها لين اخر شي كسرت خاطري .. تدرون ليش ؟

لأن هالبنت تدري ان محد بالجامعة ما تطنز عليها حتى رفيجاتها الي يمشون معاها تطنزوا عليها ..!!

وتدري انها مهايطة وتصروخ وايد وتدري اني اكبر من اني احط راسي براسها مع انها اكبر مني :D

بس حبيت اقول لها ان في محل بالمنشر يبيع الرموش رخيصة والله خذيت لي خمطة وبحطهم وان شاء الله يعجبونها :P

سوالف التطنز وفيها ومافيها ماحبها كلش لأني ما أضيع وقتي واتطنز على البنات والناس فتلوع جبدي من نوعيتها والله .

والمشكلة ... (( مايعيب الا المعيوب ))

في بدليات بموضوعي ؟؟؟ ;)

ماعليه ادري بوست مليق بس لأني وايد مشغولة .. اشوفكم على خير

طموحة مملوحة


25 comments:

{~المباركية~} يقول...

الله يعينج
الانسان في البدايه يتعب يتعب وبالنهايه يرتااح و يشوف كل شي جدامه مفتوح ومتااح

يعطيج العافيه

حياتي هدف مو عبث يقول...

ساره يا سارة
يبيلج ورقة كتبي شنو بتسوين وكل ما خلصتي شطبي الكلام ونظمي وقتج وراح اتحسين عندج وقت زياادة
واذا تبين مساعدة حاااضر P;
بس لوسمحتي شيك قبل أي كلمة :*

وخلي عنج هالنظام من البنات
ما ينفعون بس عوار راس عالفاضي
واتصدقين تمر أيام أكلي خفيف وأتحرك
يزيد وزني هههههههههههههههه
لالا اتذكريني

ولهت عليكي بئالي كمن يوم ماكنتش عندك
:****

M.AlQallaf يقول...

لوول أي عاد ما شاء الله عندنا بالكية وايد من هالأشكال

keep up the good work

بوفهد يقول...

مايحسد المال الا اصحابه ....

مو تصكين نفسك عين !!!

اسم الله عليك آتوا اعمالكم بالكتمان .. اكو ناس من الفراغ تدوده

اشلون تكش الذبان ...ويع :)

حطي بالك على عمرك وخلي عندك برنامج

لإدارة الوقت .. وانا اخوك.

يالطموحة المملوحة السارونا النومسيه.

مركبنا يقول...

النفوس الكبار ياساره
النفوس الكبار ياسارة

تتعب الاجساد
وتتعبها الراحة

ذكرتيني بنفسي لويتي نفس لويتج
مليون الف شغله

ودائما وابدا بالمجان
اذكر بوقت الانتخابات الماضية عرض علي ادرير حملة بمبلغ ....
قلت هذا وقت الكويت
وما ابي وبدخل مع مرشح
واشتغل له لا وبعد من فلوسي

اهل العقل لا يهمه المال
مثر مايمه تحقيق اهدافه

عفيه عليج
كملي وشدي حيلج
الكويت تحتاج شباب معطاء

علي إسماعيل الشطي يقول...

أختي طموحة

كل إنسان لديه هدف في الحياة يسعى للحصول عليه أو بلوغه

وللحصول عليه لابد قليلا من التعب و المجهود بالتالي يحصل على هدفه

و إنشاء الله بعد كل هذا التعب تحصلين على ما تصبين اليه

موفقه أختي و يعطيج العافية

elsha3er يقول...

السلام عليكم

اية الاخبار بس انا عندى عتاب صغير لية ماكبرتى الخط شوى انا قرأت بالعافية الخط صغير جدا بس مو مشكلة

الله يعينج على اللى انتى فيه بس دة العمر اللى تقدرى تعملى بيه كل حاجة

انا طول عمرى بحلم انى اكون رئيس جمهورية مصر بس هو حلم صعب شوية بس ممكن

بس شدى حيلك عشان ان شاء الله لما نفتح مدونة الجريدة بتاعتنا عايزك تبدعى لان انا واثق من قدراتك واية اللى ممكن تقدميهولنا

انا اهه ابتديت اكلم حبة مصرى وحبة كويتى هههههههههههههه

البركة فيكى


تحياتى


احمد الشاعر

Enter-Q8 يقول...

اينشتاين
ما ادري ليش اتفائل فيه
حاط صورته على مكتبي
و كاتب عليها
عيش حياتك عكس

قانونى كويتي يقول...

صباح الخير واسعد الله صباحج

واول شى كلام الوالدة والله يخليها لج صحيح

ونصيحة منى لج لازم تتخذين موقف ولازم يكون لج مقابل خاصة للمجلات اللى تعطينهم

لانهم يشتغلون من ورى شغلج وجهدج وعلشان جذيه لازم تاخذين مقابل

واتمنى انج تتخذين موقف صارم معاهم


واذا انتى طموحة عندج المدونة

حطى كل جهدج فيها ومجانية هههههههه


تحياتى لج على العموم

وبعدين الناس قامت ما تستحى شنو اتسوين لهم

3BeeDo ;) يقول...

والله الناس هالايام مادري شلون صايره يمشون ويتطنزون على الناس واهم العيب بكبره اصلا بس الواحد يقول الحمدلله والشكر :>

طموحة مملوحة يقول...

المباركية

انا من صغري وانا اتعب وبعض النجاح يطير جدام عيني تعودت اني اسكت .. خبيلة أختك بعد :)

طموحة مملوحة يقول...

حياتي هدف مو عبث

والله سويت هالشي ماكو فايدة كل شغلة آخذ عليها وقت طويل :(


ويالله يبيله نشوفج على يوم عطيني محاضرة سنعة حليوة :)

طموحة مملوحة يقول...

M.AlQallaf


والله اليوم وحدة تطالعني وتضحك جان تقول لي مادري ليش كل ماشوفج احش فيج !!! قلت لها وقفت عليج حشي يابعد قلبي ، جان تضحك لالا والله احش بالخير لووول :)

اذا جذي اوكي لوول

طموحة مملوحة يقول...

بوفهد

لوووول بتسوي من اسمي اغنية؟؟

لاياخوك والله موعن حسد بس ضغط مو طبيعي والله يعي مادري الحق على شنو ولا شنو :(

وصج احس حاطة لمدونتي الاولوية صراحة لووول

طموحة مملوحة يقول...

مركبنا ..

والله انا افكر جذي بس الكل يقول لي لازم يكون لج دخل مادي وبيني وبينج الفلوس الي آخذهم ساعات من التحقيقات الي اسويها بالجريدة اخشها حق شغلة تفيد الرسم الكركتيري أو اخشها حق الزمن .. وتصدقين اعزهم حيييل اكثر من الفلوس الي آخذهم من الجامعة ولا من اهلي ..

طموحة مملوحة يقول...

علي اسماعيل الشطي


أشكرك أخي العزيز على كلماتك الرائعة والي شجعتني وايد والله

طموحة مملوحة يقول...

elsha3er

معلش اصل كتبت الموضوع بجهاز الاب توب الجديد ومش عارفة ازاي السهم بيعمل حاجات على كيفه مش زي اللاب توب الأديم :)


شكرا ليك يابن خالتي ان شاء الله حكون عند حسن ظنكم ... خليك على تواصل معاي :)

طموحة مملوحة يقول...

Enter-Q8


انا دافنشي الي أحبه صج واحس يعطيني أمل مو طبيعي ... احب كشته :D

طموحة مملوحة يقول...

قانوني كويتي

ذاك اليوم المجلة يقولون لي اشتري الي تبينه وعطيني الفواتير ندفعها لج حسيت فشلة مابي اطلب منه شي بصراحة :( ... استحي والله ولا اقدر اقول ابي فلوس على الشغل الي اسويه ..

طموحة مملوحة يقول...

3BeeDo ;)


المشكلة يليت شفت بنت تتطنز ملكة جمال ... كلهم سحوت ويتطنزون على قولة رفيجتي ... تبي تشبع نقصها بالحش والتطنز فيج ... موصاحيين والله

kuwaitawy يقول...

الله يكون بعونج انشاءلله



حاولي انج تنظمين وقتج عشان ما تملين من طموحج

طموحة مملوحة يقول...

kuwaitiawy

احاول :( مع انه صعب علي والله

Manal يقول...

مساء الخيرات حبوبة
:)

عساج على القوة

وقدها وقدود

وانتي البنت المناسبة في المكان المناسب

نصيحتي

ان شوية تنظيم

وتمشين على طريقةان لبدنك عليك حق

يعني تحاولين توفقين ما بين راحتج والعمل الملقاة على عاتقك

وان شاء الله ربنا ما يضيع تعب احد

:)

وانا اقول
خلي جمالج الطبيعي احسن من الرموش الصناعية

ترا اذا انشال الطرف
تظل متعلقة
:)

يا حلوج ويا بساطتج

طموحة مملوحة يقول...

منول

بعد قلبي مشكورة وايد يالغالية :)

فديتج والله

TrueClue يقول...

نصيحة اخو .. لمن تواجهين ضغط بحياتج من اشغالج و ماكو وقت حقج
نظمي وقتج .. سوي ورقه كتبي فيها اولوياتج و نظميها ..
ترا جذي ما تخلصين

و دايما تذكري انج تسوين وقت حق * سارة * .. بس حق سارة بروحها
علشان ما تنهارين تحت الضغط .. ترا مو زين الشغل وايد

و بالنسبة للبنت .. ياليتها تقرا كلامي هذا .. ترا الحساد وايد و الي ما يطول العنب اعتقد تعرفين تكملة المثل ..