2009-03-08

بوست موصاحي مادري شفيه ..

هــــلـــــــــــــو عيكم ..
أدري بتقولون شفي البوست مينون ؟؟ بس ماعليه بداية المرض ، وانا كل ماصار في يوم مهم بحياتي لازم امرض استغفر الله ، اهم شي اني مانمت للحين .. خل اقول لكم ماذا يدور في بالي الآن ...


اول لمن يقولون لي حبتج ال Grada على بالي القرادة الي اهي الجرادة بس يقولونها مثل المصريين طلعت الكلمة يعني القرادةمن قرادة الحظ ، وقول ياربي اكيد في سر بهالحشرة عيل ليش مايقولون حبتج الخنفسانة ؟؟؟
لا وعلى بالي بس انا الي افكر بهالشي فاستحيت لا اقول لأحد طلع شكثر كانوا يفكرون مثلي لووول علشان جذي اعترف ...
>>> حاسة براحة بعد ماعترفت .. لووووول








مليت من القعدة بالغرفة فقلت خل اتسكع شوي بالبيت ، وطبعا لمن اتسكع ماخلي مكان حتى السطح واي مكان عندي اقتناع يمكن مرة اطيح على جريمةولا شي لوووول .. المهم اليهال طبعا بس يدرون ان سارة بتمر ينحاشون لوووول ..
المهم وانا نازلة من الدري ولا اسمع ..
أبوي : يحليلها !! لا ولا نادتني يبـــــــــــــــــــا يبــــــــــــــا !!
أمي :والله مافيهاش ريحة الأنوثة !! يالهوي عليها ..
أبوي : من اول ما جبناها واهي دفاشة وحركاتها حركات صبيان .. قلت لج لايغرج شكلها . .
أختي : اي سارة .. الحمدلله والشكر .
جان اسوي مثل محمد العجيمي بلولاكي : طحت عليــــــــــــــــــــــــــكم شقاعد تحشون فيه ..
ولا ابوي يضحك ضحكة شكبره لوووول شكلهم كانوا قايلين وايد اشياء وطافتني لووول .. جان اقول لهم هين والبس العباية بروح الصالون ... أبوي يضحك : والله ما ينفعج الصالون الصالون حق الحريم .. مو لج انتي >> اح قوية لووول
جان اسوي حركتي المعتادة والزق بأبوي مثل القطوة فديتـــــــــــــــــــــــــــــك !!! جان يقول : تبين فلوس صح ؟؟ لوووووووول









باجر ان شاء الله قصدي اليوم في مؤتمر الجيولوجيا ومشاركة معاهم حضرتي والله يستر شكلي بروح مواصلة .. المهم طلعت بدلتي الي بلبسها وحطيت المبخر ببخرها ... وانا ابخر التنورة جان اسرح ... خذيت نفس عميق ولا يطيح المبخر ... طاح الفحم على السجادة . شسوت سارة ؟؟

بلمت مرة وحدة جان اصرخ .. زين يالهبلة طفيها ... وقفت ولا تخيلت على طول .. اوووف غرفتي تحترق وبعدين كل كتبي تحترق واغراضي ورسوماتي ، وبدلتي وماروح باجر الجامعة يقولون حرقت بيتها لأنها ماطفت الفحم .

كل هذا اتخيل وللحين الفحمة على السجادة .. جان تدش اختي وشافتني متنحة جان تقول لي : صوري معاها بعد !!!





الأسبوع هذا حصلت 3 هدايا وناسة :) والمفاجأة تدرون شنو ؟؟
انهم من عيايز لوووول ... والله خوش هدايا أحب الهدايا .. وحدة منهم لأني سافرت ومن رديت صار لي مدة ما شفتها فحدها اشتاقت لي ... خوش مناسبة والله لووووووووووول وأهم شي تقول لي انا راح ادرس حالتج النفسية لووووول
والثانية معجبة فيني وكله تتابع رسوماتي ومقابلاتي بالمجلات لوووول ساعات لمن احاجيها تقول لي شنو جدول اعمالج ؟؟ وشنو اخر رسوماتج ؟ لووووول فديتها والله
والثانية نو مناسبة بس قالت لي : انتي جم عمرج ؟؟ اشكرة بتخطب لوووووووووول
..
..
_______________________
قررت خلاص ان شاء الله : اني راح اخش كل فلوسي ... واكثر من شغلي لأني نويت ان شا الله اسوي اول كتاب لي ، وان شاء الله بإذن الله اول ما ابدي فيه راح اعطيكم خبر ... ونسوي حفلة لكل صفحة لووووول
..
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
آخر شي .... حق الي عنده مقابلات او وده ينضم لصفحة المقابلات في مجلة يونيك ، ويشوف نفسه زين باجراء المقابلات وحاب يشتغل معانا يدزلي ايميل ويعطيني خبر :)






17 comments:

TrueClue يقول...

اي ولله مو بس انتي عبالج القراده جراده لوووول
انا ما كنت ادري بعد .. بس حلوة حبتج الخنفسانه لوووول

و شدي حيلج بالمؤتمر .. ابهريهم كالعاده طبعا .. يالمبهمر :P
بس سالفة الفحم عجيبه .. خو شيلي الفحمه تصارخين لييييش لووول

اخيرا راح يخطبونج و راح تصيرين ام عيال لوووول بس ما اوصيج بالطلبات .. ابي فيلا على طلبي قسم شرقي و قسم عربي

بوست عبيط حده و انا وراي دوام مادري شمقعدني للحين .. الله يستر اول يوم دوام بالكلية

elsha3er يقول...

اشمعنة الجرادة يعنى واوعى تكون دى الحاجة الوحيدة اللى بتفكرك بمصر

والله انا كنت بحسبك زعلتى لما قلتلك الكلمة بالبلدى بس الحمد لله ربنا يوفقك بالمؤتمر وفى كتابة كتابك

تحياتى

احمد الشاعر

منطلقة بطموحي يقول...

لووول ضحكني تعليق اختج على الفحم :)

و الله يعينج على المؤتمر و يوفقج :)

Enter-Q8 يقول...

لوووويه
خلاص بسميك سارة لويه
كانك ولدي العود
مأدري احس أثنيناتكم ما تقعدون راحه
ما شاء الله عليكم

just a bunch of thoughts يقول...

البوست وايد يونّس!

و حتى انا من زمان علبالي القرادة جرادة! ههههه

اقتباس:
"باجر ان شاء الله قصدي اليوم في مؤتمر الجيولوجيا ومشاركة معاهم حضرتي والله يستر شكلي بروح مواصلة .. المهم طلعت بدلتي الي بلبسها وحطيت المبخر ببخرها ... وانا ابخر التنورة جان اسرح ... خذيت نفس عميق ولا يطيح المبخر ... طاح الفحم على السجادة . شسوت سارة ؟؟ بلمت مرة وحدة جان اصرخ .. زين يالهبلة طفيها ... وقفت ولا تخيلت على طول .. اوووف غرفتي تحترق وبعدين كل كتبي تحترق واغراضي ورسوماتي ، وبدلتي وماروح باجر الجامعة يقولون حرقت بيتها لأنها ماطفت الفحم .كل هذا اتخيل وللحين الفحمة على السجادة .. جان تدش اختي وشافتني متنحة جان تقول لي : صوري معاها بعد !!!"

لوووووووووووول هذي الفقرة موتتني! قاعدة اتخيلج و انتي سرحانة تخيلين نفسج!!! ههههههه! و تعليق اختج تحفة!

بالتوفيق بالنسبة للمؤتمر و الكتاب ان شاء الله :)

كبرياء وردة يقول...

هااااا

بشري شصار بالمؤتمر؟

طموحة مملوحة يقول...

true clue

اووووف اليوم بالمؤتمر لا تشوف شصار ... بدايتها سارة بدعت لووول بحط شسوت ببوست يديد لووول :)

وحبتك الخنفسانة قول آميين

طموحة مملوحة يقول...

الشاعر


لا اختك سارة ما بتزعلش ابدا :) ارتاح من الناحية دي :)

طموحة مملوحة يقول...

منطلقة بطموحي


الله يعافيج يالغالية .

طموحة مملوحة يقول...

Enter-Q8

اصلا ولدك العود دامه مثلي عيل اكيد مسوي طعم بالبيت :p

الله يخليه لك .. يالله اسميك يبا لا انت بعدك شباب ؟

طموحة مملوحة يقول...

just a bunch of thoughts


شلونج شخبارج ؟.؟ وانتي ماتبينين الا مرة بالسنة ؟ لوووول

بعد خشمي انتي والله

طموحة مملوحة يقول...

كبرياء وردة ..

راح اكتب التقرير ببوست بروحه .... ناطرة الصور تييني الحين :D

just a bunch of thoughts يقول...

حلوة هذي بعد خشمي!

انا بخير الحمدالله و دايما متابعتج لا تحاتين P: بس شسوي مو دايما الوقت يسعفني حق التعليقات ... سامحينا :)

طموحة مملوحة يقول...

يابعد جبدي اي ترا دايم احاتي اقول قرت المواضيع ولا لا .. اشوة طمتيني :)

غير معرف يقول...

تصحيح بسيط:)
القراده عبارة عن القمل أو الصيبان
وحده منهم

just a bunch of thoughts يقول...

الى غير معرف:

صج؟؟؟

من وين سمعت/ي المعلومة؟

طموحة مملوحة يقول...

غير معروف



من صجك @@@@@@@


كااااااااااااااااااااااااك توني ادري والله على بالي م قرادة الحظ ... يعني صج حشرة .. لووووووووووووول