2009-03-17

بدش المجلس غصب عن خشمي !!!




هلو عليكم ...
شلونكم ؟؟ شخباركم ؟ تصدقون صار لي جم يوم اقرا بالسياسة بس مالي خلق أكتب شي ، وتعبت نفسيتي من اعانة الجامعة الي ماتكفي ولا تسوي شي ،وللحين مانزلت وتعبت من كرف بالصحافة ومانحصل منها شي يفرح الخشم !!!
تعبت من الانجاز ، شنو الي مرتاحين بالديرة ياخذون كل شي واحنا الي نتعب مانلقى احد يعطينا ويه ؟ ليش نخاف على ديرتنا ؟ موشغلي ألزم ما علي مصلحتي ، كيفكم انتو عاد ..
لــــــــــــــــــــــذا قررت .. اني اخوض معركة مجلس الأمة ، وكنت ناطرة الحل من زمان خلاص نفسيتي تعبت ، وراح تكون بداية حملتي الانتخابية من مدونتي الدايخة هذي ، بدايتي كانت لمن تصافيت مع كل الي تهاوشت معاهم ، وقصيت عليهم بجم كلمة حلوة وانا آسفة ومن هالحجي علشان اكسر خاطرهم ويصوتون لي بعدين .
دقيت على كل الي اعرفهم اجاملهم شلونكم شخباركم شمسوييين ؟؟ والله انتو على بالي من زمان والطيبيين ماننساهم كلش ملش ، حجزت خيمتي الانتخابية راح تكون في الصبية ، اي صوب ؟ مادري انتوا دبروا حالكم شنو اشتغل دلالة بعد ؟ حمدوا ربكم بحط بوفيه بعد . صرت اقرا مقالات سياسية وايد واخذ من كل كاتب فكرة والخبطهم مع بعض واقول من رأيي الشخصي ان كيت وكيت وكيت .. واقعد يا سوير بلبل بالسياسة اسم الله علي ، وبعد هذا طرت على احدى الدول العربية الشقيقة ، وحذفت عليهم جم الف دينار وشريت لي شهادة شحلوها ، وكشخت بنفسي حطيت حرف الدال قبل اسمي ، وصرت د.سارة تا حرف الدال يعني دكتورة مو دودة @@ واي احد بيي يتفلسف على راسي ترا مالي خلق كل الي حفظته اهو : من خلال دراستي للدكتوراة لاحظت ....... ورقعي بالحجي .
ضبطت لي ربعي الصحافييين ووصيتهم يلمعون فيني بالجرايد وكل واحد راح اعطيه حلاوته ، شنو الف دينار الفين ؟؟ ما يوكلون عيش يبا 5000 يالله يستاهلون :) ...
دقيت على واحد واحد اهدده ياويلك ان ما صوت لي والله ان صرت وزير لأستجوبك واوقف بزمارة رأبتك ... ، وبعدين وصيت القبيلة والقبائل المجاورة ونخيتهم ما ينسوني ، اهم ما يدرون انا زينة ولا لأ المهم انا منهم وفيهم ، يعني يصوتوون حق البعيد وانا ما يصوتون لي ؟؟ حرام أصلا .... مادري شلون حرمتها بس قريبا راح تنزل فتوى بالاسواق تحرم هالشي .. ترقبوا بس :p
حطيت لي جم صوة بالجريدة يعني قاعدة انظف الشاطئ ، ولا ازور لي جم جهة حكومية ومصوريني وانا ويهي حده متأثر يعني والي يشوف ملامحي يقولون ماشاء الله عليها شكلها خوش وحدة ... من الشكل بس اوكي !!!
ضبطت لي بنات حلوين وشباب كووول علشان يوقفون بحملتي الانتخابية وبيصير بعدين دق ورقص ان شاء الله الي حاب يتفرج ايي ويصوت لي مو ينسى .... وبسوي حركة اوقف بالنص وكلهم حولي يغنون فتاحي ياوردة .. سكري يا وردة .
بطلع بالتلفزيون واهاجم فلان وعلان ، واطب بفلانة وعلانة ، وأفكر أدش أي حزب ؟؟ يعني اذا شفت الشعب مقبل على حدس أكثر شي دشيت معاهم ، صاروا شوي يفكون بالوطنيين يالله لزقنا فيهم ، اذا شفت ان الشعب وعى وعرف ان هالاحزاب مامنها فايدة اقول أنا مستقلة :) .
كلش ما اشتري اصوات ، بس مو مشكلة احط الاصوت اسهم بالبورصة عل وعسى يرتفع سعرهم واهم المستفيدين صراحة .
بجمع لي شوي كويتيين (( الي يسمونهم بدون هني )) واتكلم عن قضيتهم واقول راح اطالب بحقوقكم والله واخلي الناس تقول واااااو حدها قوية ، وآخذ اصواتهم ، وبعدين اقول اس اس السلام عليكوووو ..
بروح وزارة الشؤون واصور شوي وياهم ، واكتب عنهم وعن مشاكلهم واني راح اهتم فيهم وبعدين بسحب عليهم سيفوووووووووون
واروح حق مدرسة الوفرة واقول شنو هذا ؟؟ هذي مدرسة في دولة راقية ؟؟ واخلي الصحافة جك جك جك جك تصوير وبعدين اقول وانا شكو فيهم ؟؟ واسحب سيفون ثاني .
اتكلم عن المال العام وأقول ماهذا ؟؟ ولا يعقل ؟؟ وكيف ومتى ونحو إن .. واخلي الناس تقول اي والله اي والله ..
اروح حق قناة سكوب وابجي وانزل جم دمعة واقول : الكويت والله الكويت حرام عليكم ... الكويت الكويت . وابجي المشاهدين معاي ، واخلي رفيجاتي يكتبون مسجات تحت (( ينصر دينج يا سويرة ... صج علمتي الناس الخوف على الوطن )) ..
أسوي مطبوعات شكثرهم عن حملتي الانتخابية ، واسوي برنامجي الانتخابي واحذف هالمطبوعات جدام كل بيت واعلقهم على البيبان كلش ما يعطي منظر غير حضاري لا تخافون ، المهم ، أقول بحملتي أني مع وجود لجنة الظواهر السلبية ، لأني لا أثق بشعب ديرتي وهم بحاجة لمن يوجههم ، فدور الأم والأب والعائلة غير كافي :) ، وبعدين اقول ان الكويت دولة ديمقراطية وشعبها محافظ وينوثق فيه وقادر على تخطي اي مشكلة وكلنا ثقة بعيال الكويت . شفتوا شلون ارضيت الطرفين ؟؟ أمانة في أحد سوى مثلي ؟؟ طبعا لا ..
أدش الجامعة وادور على التجمعات الطلابية أقصد القوائم الطلابية الي تمثلني واقول لهم اوقفوا معاي انتو شباب الوطن وأنتم أساس الوطن بكم نحيا وبكم نموت ولتحيا الكويت ، وآخذهم يتحجون ويعدلون اخطائي شوي ، ويجمعون لي اصوات ، ويسوون لي حملة اعلامية حلوة علشان بعدين لفزت اضبطهم بسوالف الانتخابات .
وبعد الفوز ... أطق لي تذكرة اسافر برا الديرة راحة واستجمام واسكر ديوانيتي جم شهر وايي الديرة اصرخ واقول ديرتنا وحرام عليكم وشلون واسقطوا القروض أو ترسوا جيبي كيفكم ...
المهم اسفر ولدي عبود برا الديرة يدرس مو هني ، وافتح لبنتي سيارة آخر موديل وأخليها تحر رفيجاتها وما اقصر كلش وياها .. واييب كل اسبوع هدية حق ريلي علشان اسكر حلجه وماخليه يدور على مرا غيري ، خو المرة تشتغل وتصرف على البيت والريال يغازل من وراها ، انا مابيه يغازل وانا حاضرة جلسة ، ياويله فاسكر حلجه بجم هدية ... ادري مايترس عين الريال شي :p، الهم بيتي من كثر ما أنا مو مصدغة برممه ومن الوناسة باخذ الشارع كله لي واسويه احلا قصر اكشخه اكشخه اصير احسن من بيوت الي جبالنا والي ورانا ، اخليه يلعلع واخلص كهربة الديرة كلها على بيتي بس . :)
وأحاول قدر الأمكان أني أبلع وألهط بالفلوس وأسوي مشاكل علشان يسدون حلجي بجم فلس خو ماشاء الله اليوم دشينا المجلس باجر ينحل الواحد ما يضمن فاحط بحسابي حق الايام السودا .. خو الشعب مايدري وين الله قاطه ، المهم انا أأمن على عيالي لي كبروا والباجي كيفهم يتصرفون .. انا شكو فيهم ...
بس لا تنسون اني دشيت المجلس علشان الكويت لا اقل ولا اكثر ولا تييبون لي مصحف احلف عيب ..
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
اعتذار
احم احم ، تأجلت الثقافية الى يوم الاثنين القادم ان شاء الله لأن وايد يتني رسايل ما تبي الخميس ووايد بالجامعة عندهم محاضرات في الوقت الي حددته فان شاء الله راح تصير الاثنين ومنها مرة وحدة اقرا اكثر علشان اذا احد سأل ما يعتفس ويهي لووووول ..
لأي استفسار
sarahalnomas@gmail.com
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
يوم الفصلة ...
تدرون شلون اذا الواحد كان فيه هم بقلبه وشلون هالهم ينزاح شلون يحس بوناسة وتروح الضيجة من صدره ؟؟ انا اليوم كنت بقمة وناستي ... صج رايحة الجامعة موحاطة ماكياج وعلى بالهم متضايحة لا حول ولا قوة الا بالله لوووول ، مايدرون اني فزيت من فراشي من صراخ امي ، نسيت محاضراتي ونايمة لووول ، فكنت في قمة عبط اليوم من بدليات قطيتها ، من حركات عبيطة طلعت ووحدة من هالحركات كانت بالمختبر الدكتور قاعد يشرح ويمي رفيجتي متنحة على السبورة وانا اطالعها واهي ماتدري اني اطالعها لأنها متنحة على الآخر ، جان اقول لرفيجتي الي يمي : شوفي شبسوي فيها .. جان امد ايدي فجأة عليها سويت مثل حركة (( ميشو شو )) لووول المهم البنت فزت وشهقت من الخرعة ... انا ماتوقعت ردة الفعل هذي ... ولا الي يمي طق راسها بالطاولة من كثر ما اهي مو قادرة تمسك نفسها انا ويهي صار احمر حسيت ان الضحكة علقت .. والي ورا بطوها ضحك ... وانا هيء هيء هيء مايندرا قاعدة ابجي ولا اضحك لووووول ... والي يمي خلاص بغت تموت جان تقول للدكتور بروح الحمام مامداها طلعت من الباب ولا نسمع ضحكة قوية جنها وحش لووووووول ، بعدين اعترفت للدكتور جان يقول : أنا تعبان وماحسيت كلش لوووول الله يشافيه بس والله لقافتي مو حلوة كلش ...
ــــــــــــــــــــــــــــــــــــــــــــــــــــــــــــــــــــــــــــــــــــــــــــــ
نصيحة :
الي مايقدر على الحب لا يحب ، وخل يحب أهله واصحابه والي حواليه وايد احسن له .@@
ــــــــــــــــــــــــــــــــــــــــــــــــــــــــــــــــــــــــــــــــــــــــــــ
رسالة شكر ...
لكل المعجبين بتخاريفي وكل الي يحبون مدونتي .. أقول لهم : ماكنت حاطة ببالي ان هالمدونة راح تعجب احد اصلا حتى انا ما كانت تعجبني بس والله استمريت علشان خاطركم والله ..
تشكرات كثيرات .. وايدات ..
أهم شي كنت بسجل بشغلة وطلبوا بطاقتي المدنية فقلت بطاقتي الصجية ولا الجذبية ؟؟ @@ وقصدي ان بطاقتي الاصلية ولا صورة منها ؟؟
أشوفكم على خير بروح ادرس :D




ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
اوريـــــــــــــــــــــــــكم فيه :p
احب هالاغنية تدرون ؟ :D لا صج والله تدرون؟






22 comments:

حياتي هدف مو عبث يقول...

هههههههههههههههه
الظاهر هالفيلم يتكرر عند الكل
وخططج الإنتخابية لا يعلى عليها
بس جنها مرّت علي من قبل
:p

أحمد الحيدر يقول...

وناسة 5000 دينار ..

لا تنسيني عاد ها ؟ ;p

أحسن من اللي ببالي والله :)))

علي إسماعيل الشطي يقول...

كلام طيب يدل على حب الوطن و حماية ماله العام :)))


أقووول متي ينحل

قاعد أمخمخها جنها تسوى النزله

دعم منكم
دعاية على بوكوثر :)

صراخ مني

بس نجحت

.................

والله يا أختي كلام مضحك مبكي
فعلا هذا هو الحال عندنا بالكويت

الله يستر على الديره من الياي

منطلقة بطموحي يقول...

لوووول خوش تدوينة ;)

عفره يقول...

ايام المراهقه كنت اقول لبابا انا بدخل المجلس بدخله
واليوم كنت اقول لبنت خالتي لااااعت جبدي من السياسه افتح الجريده سياسه افتح النت سياسه حتى بالاكل احس طعم سياسه

Enter-Q8 يقول...

و الله انك ابرك من كم شارب بالمجلس

إمـرأة لا تُنسـى يقول...

يالله خل نسوي تجمع بنات وسيدات ومو مشكلة ندخل الشباب اللي ودهم يغيرون ويوه المجلس ويدعمونا

وكلنا نتفق ان صوتنا بس للحريم!
خل نغيّر
خل نسوي انقلاب انثوي في مجلس الأمة

ReLaaaX يقول...

يااااااااربي ياحلااااااااتج وحلاة قرقتج ياربي والله استاااااااااانس لما اقرالج شي

مستفسط يقول...

سترون ما لم ترونه في الانتخابات القادمه

كاريكاتير يقول...

عطيني موقفج وكيفية تصديج لمجمل قضايا الساعة واقسمي انج ما تتخاذلين في الدفاع عن الدستور..ولا اشوف صورتج بالجرايد على اساس انج تعتذرين عن استقبال ناخبينج في خيمتج اللي بالصبية او في كراع المرو ولا اشوف صورتج تصرحين بأنج سألتي سؤال برلماني ولا بتصريحعن اي شي ابي فقط شغل...

بعد كل هذا افكر اصوت لج؟!

طموحة مملوحة يقول...

حياتي هدف مو عبث ...


اكيد راح اخطط لنفسي :D

عشلوووون ؟ ؟

طموحة مملوحة يقول...

أحمد الحيدر

انت بأول اللستة لووول ..

طموحة مملوحة يقول...

علي اسماعيل

لووووول حلوا المجلس بعد شتبي؟ ؟

اكيد انا اخاف على الدولة وامنها ومالها واهلها .. افا عليك بس :)

طموحة مملوحة يقول...

منطلقة بطموحي

علشان مدحتي مدونتي لج مني هدية بعدمافوز :P

طموحة مملوحة يقول...

عفرة

كيفج انتي أنا ماغيرت رايي بدش المجلس وبعدل الوضع المادي الي عندي فقرانة حدي لووول

طموحة مملوحة يقول...

Enter-Q8


يابعد خشمي والله ..

طموحة مملوحة يقول...

امرأة لا تنسى


من صجج ؟؟ ونصير حريم لا يُنسون أبدا لووول

طموحة مملوحة يقول...

ReLaaaX


يابعد قلبي وانا استانس لمن أشوفج رادة على مواضيعي لج مني خلاص بس ادش المجلس بتصيرين مساعدتي لووول

Engineera يقول...

انا متفائله فيج وايد وصوتي من الحين لج بس عساج من الدائره الثالثه لوول

اذا وصلتي عندي لج وايد طلبات :$

طموحة مملوحة يقول...

مستفسط


رجاء مانبي أحد يقلد :P

طموحة مملوحة يقول...

كاريكاتير


موفاهمة شي بدور احد يترجم لي ..

طموحة مملوحة يقول...

مهندستنا

لوووووول انا الخامسة ... ماكو امل كلش ..