2009-03-18

مبروك الحل ...


احم احم ... أصرح من خلال مدونتي أني .. في قمة السعادة الغير طبيعية جراء حل مجلس الأمة .. أخيرا حلوه صج كان امتحان صعب .. لا معاناة بعد اليوم ياشعب الكويت .. صوتوا لطموحة وعينوا من الله خير :p
هذي وحدة من الحريم الي وعدتهم أني لفزت راح اسوي لها عمليات ترميم من أمه .. بس تعطيني صوتها اهم شي ..
وأطالب من خلال مدونتي ، أن يحطون قرار صوتين للمرأة الحامل ، صوتها وصوت ولدها يالله يستاهل نعلمه الديمقراطية واهو ببطن امه يحليله .
والله خوش قرار صراحة ، وأدري ان المأساة راح تتكرر مثل كل مرة ، أقول لأبوي راح اصوت حق مرأة اذا شفت بدائرتنا مرأة تستاهل .. جان يقول والله كلهم مافيهم خير ، الي فيهم خير راحوا .
وأنا أقول الي فيه خير خل ينزل المجلس ويرشح نفسه ، مو كل من هب ودب نزل وعفس الديرة فوق حدر ، يالله لا انزل المجلس وألهط الي وراكم والي جدامكم ...
واذا صرت عضوة اول عمل خير راح اسويه اعدل جمعية الصباحية الي قصوا علينا يعني غيروا شكلها .. وعلى قولة المثل (( هالله هالله من برا يعلم الله من جوا )) ، أقول روحوا شوفوا الكاشير هناك، أي مصري يشوفونه حطوه كاشير ماكو لباس محدد لهم وحدة توها طالعة من مدرستها راحت على الجمعية والله مصخرة اروح هناك اضحك شوي على المهزلة الي اشوفها بالجمعية ... ولا يقصون علينا يحطون سيارات طول السنة منو يربح ؟؟ تصدقون محد يفوز بالسيارات .. فتتوزع على الربع تعرفون بعد .
المهم أخلص من جمعية الصباحية ، نشوف شسالفة أم ريل خال المشاريع الي بالكويت .. والله الكويت مو سياحية .. عسى ما ايي احد من برا اهي نفسها الاماكن ماتغيرت ، يبا زيدوا من المشاريع السياحية فشلتونا والله . وأجبر الشركات انها تساهم غصبن عليها من على كيفها ، مثل ما تبلع من جيب المواطن خل تحط شي للمواطن يرضيه .. ولك شووو ؟؟
ونخلص من هالسالفة نروح حق السوقة .. يبا بدل ما تحطون هيئة الامر بالمعروف مادري لجنة ظواهر الفضائيين .. حطوا مكان خاص حق الشباب فيه سينما وسوق ووناسة ... وحطوا لهم العاب بنات يعني يتمشون ول يغازلون من هني لباجر بدل ما كل الشباب والشابات بالسوقة لوعوا جبدنا جن كلش ماكو مكان بالكويت الا السوقة ..
نخلص من السوق نروح للتربية .. شنو التربية ؟؟؟ مليون طالب يتخرج من مدارس الكويت وكل همهم متى أفتك من الدراسة ؟؟ شدعوة عليهم عاد؟؟؟مابي اتكلم وايد عن التعليم مالي خلق والله العوي طول عمره عوي مايتعدل :)
والله ماراح أخلص حجي وعندي واجبات اليهال الي هني جني مخلفتهم وانا مادري الحمدلله والشكر قلنا رسامة كركتير كل وحدة تبي تكشخ عند ابلتها عمتي رسامة عمتي رسامة الحمدلله والشكر ..
وأنا قاعدة بالمختبر اييني هالمسج من وحدةمن رفيجاتي (( بس ليكن انتي طايحة ساروه ياية سيارة اسعاف )) !!
طبعا أنا !!!!!!!!! جان ارد عليها .. لاللحين بطاريتي ماخلصت ... جان ترد اشوة لووووووول ...
مسكينة سويرة ... كل كورس لازم اسعاف ومستشفى لووول مرة طايحة من الدري ومرة زالقة ومرة ماقدر اوقف من كليتي شهالامراض الي ماتييني الا بالجامعة ... ؟؟؟
..
..
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
..
..
بنقول لكم سالفة للقارئين كـــــــــــــــــــافة ..
يا محفوظين السلامة ، اليوم يتني وحدة من الزميلات الي وايد اعزها وتعزني جان تقول لي : سارة بسج مشاكل مع البنات ترا عندج عداوات وايد بالجامعة !!
سارة : اي عداوات أنا أقول لج الي معاهم مشاكل وحدة ثنتين ثلاث والرابعة انجلعت للاجتماعية فرقاها عيد وسعيد ..!!
_ تعرفين فلانة الفلاني ؟
سارة : شتطلع هذي ماعرفها ..
_ هذي تقول أنأ أكثر وحدة بالجامعة اكره سارة ..!!
_ خل تكرهني مولازم تحبني أصلا اذا كل الناس حبتني راح يخت التوازن البيئي فالكره ساعات مفيد .
_ لا صج سارة تقول ان سارة وايد open mind وجليلة حيا وماتستحي على ويهها .. وجريئة !!
_ كيفها خل تقول الي تقوله عني اروح ابوس راسها يعني واقول تكفين لا تفهميني غلط ؟؟
_سارة احنا نعرفج وندري شنو الي بنيتج !! بس هالناس مايشوفون الا الظاهر ..
_ ويعني ماكو ظاهر الا سارة ؟؟ بعدين كن يرى الناس بعين طبعه انا ما أضيع وقتي مع هالناس .
طبعا مو هذا كله الحديث ولكن في كلام قوي ماينقال .. مشكلة مجتمعنا يحب يسوي الغلط من ورا الناس ، عسى ما يشوفون أحد معروف بالجامعة ومحبوب من الجميع يحبون يطيحون من قدره . وللحين اذكر كلام الدكاترة لي : ديربالج الشجرة المثمرة دائما ما تُقذف .. وهذول ماخلوا فيها سمعة وشرف ، بس يا ترى هالبنات الي يتكلمون جذي واهم ما يعرفوني ... مايخافون على نفسهم ؟؟ وشي ثاني ، أنا ما أسلم على دكتور ولا اساعد زميل من ورا اهلي ولو اني اخاف من هالشي كنت ماشاركت بهالجمعيات والمؤتمرات والمحاضرات الي اييون فيها وايد من خارج الدولة ... وعلشان افسر أكثر ... اقول لهالبنات للأسف انتو مو مثل سارة الي تشوف الناس كلها بنظرة ايجابية وماتحط ببالها شي قذر من الي انتو تحطونه ، لأني ولله الحمد أثق بنفسي وما أقذف بالأوادم لأني ماعرف باطنهم .. وآخر شي ، أنا ما أسوي نفسي شريفة روما ومن ورا الناس اخش فضايحي .. يعني كل وحدة تحجت فيني وعرفتها للأسف ماكانوا من البنات الي ملفهم ابيض ، فالي بيته من زجاج لا يرمي الناس بحجر .
وخل أقول لكم عن قصة صارت قبل فترة مو طويلة ، مادري اذا كنت ذكرتها بالمدونة ولا لأ .. عن وحدة كنت احترمها وايد لأنها تخاف الله على قولتها لووول ، المهم هالبنت كانت تغار مني بطريقة مو طبيعية .. لدرجة انها بفترة من الفترات كانت تموت وتعرف هل انا مرتبطة ؟؟ وبمنو ولمن انخطبت سألت عن أصل وفصل الي تقدم لي ، وراحت للناس تقول لهم تقدم لي ولد الفلاني الي اهو بالأصل متقدم لي ، انا اسمع هالشي اقول لا فلانة مو خبلة لهالدرجة ، وفوق شينها قوة عينها تروح حق بنت عمي تقول لها سوالف عبيطة ماصارت عني ، حسستني جن بفلم هندي يعني أشياء ماتصير بالكويت لووووول ، كل هذا يطلع مني ؟ طلعت مو هينة والله ، المهم تقدمت بشكوى ضدها في الجامعة ، ووصلت لي تهديدات عديدة ، وبصراحة انا خبلة لأني خفت على نفسي والمفروض اكون انا صاحبة الحق ما أسحب الشكوى ورحت سحبتها وذكر السبب اني تعرضت للتهديدات وقال لي الي هناك لا تسحبينها ومن هالحجي ، المهم اهي مادرت اني سحبتها فحطت اهلها بموقف حرج ان يو لي بيتنا علشان يعتذرون لي ، لهالدرجة الغيرة تسوي جذي؟ ؟ وبعد هذا كله ماقلت السالفة حق احد علشان سمعتها ، بس الحبيبة وبعد ما خلت امها تنحط بهالموقف المحرج ، داومت بالجامعة وكملت مسلسل الاطاحة بصدام ( الي اهي سارة ) ، وأخيرا لمن ماشافت مني فود كله مطنشتها ومطنشة عيشتها وساحبة عليها سيفون قلبت سالفة الشكوى .. وصارت سارة اهي الي متقدم عليها شكاوي الدنيا ..
وصاروا يقولون : سارة للحين مافصلوها من الجامعة ؟؟؟ لووووووووووووول
طلعت مجرمة خطيرة بالجامعة تصدقون ... للأسف وايد بنات راح يوقفون معاها ، ليش ؟؟ لأنها قاصة عليهم بسالفة أنا بريئة وما أكلم وعيب وحلال وحرام ، ولأني وايد تلقائية مع الكل وعدهم معدة الأخوة والأخوات صرت أنا الي اسوي هالسوالف ، بس تدرون الي تقعد تتحجى بأهلها بالشين جدام الناس ماعندها مانع تلعب بشرف بنات العالم .
وأكيد ألف بالمية انها تتابع مدونتي لأنها معقدة المسكينة تييب سيرتي بعدين لمن يدافعون عني تقول سكروا الموضوع . أقول لها
تحلمين ، تحلمين ، تحلمين .... إنج توصلين لربع سارة ، وان وصلتي لربع ربعها بوسي ايدج بطن وظهر ..
عسى الله يشافيج يارب :)
..
قولوا آميـــــــــــــــــــــــــــــن
ـــــــــــــــــــــــــــــــــــــــــــــــــــــــــــــــــــــــــ
..
..
في عشة عصافير بدريشتي وودي أبط راسهم مزعجن حتى بالليل يصفرون لوعوا خشمي ماقدر اركز لوووووول
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ





28 comments:

Don Juan يقول...

عسى ما تردلنا الويوه " الوردة "
:)

Engineera يقول...

مبروووووووووووووك الحل .. تصدقين كتبت بوست فيهم وانحلوو .. تهقين شورت فيهم ؟

طموووووح لحقي حجزي اقرب براحه لا يخلصون براريح الكويت من المقرات .. انا بسوي المقر مالي بالسطح اشرح

ويااااااما لج من كلام بنات الكليه .. سئليني انا عانيت وايد والمشكله انا طبعي مو اجتماعيه وكلا فاهمين اني شايفه روحي وما اعطي احد ويه .. بس المثل يقولج "" اذن من طين واذن من عييين "" ..

موفقه واذا تبين احول بطاقتي عندكم واصير مفتاحج الانتخابي ;)

طموحة مملوحة يقول...

Don Juan


وردة @@

لوووووول لا تنسى ان الورود بجو الكويت ماتعيش اكثر من اسبوع لووول يختنقون ..

حياتي هدف مو عبث يقول...

من صجج خل يولون
ودايما تذكري كل كلمة يقولونها اترد عليهم في يوم من الأيام
:***

في لقاء مع ركاز بكون في الكوت
تعالي
:p

طموحة مملوحة يقول...

Engineera


ولج اي سطح انتي بتيمعين قطاوة وحمام ؟؟ لا يبا تعالي معاي حياج في دائرة عز القبائل لووول ...

فديتج والله لا البنات ماشاء الله عليهم غصب يعني نعجبهم ؟؟

طموحة مملوحة يقول...

حياتي هدف مو عبث


يابعد خشمي والله انتي ، متى راح يكون ؟؟؟ اي يوم ؟؟؟

أحب اروح صراحة وكها 5 دقايق واكون هناك :) مشكورة يالغالية

حياتي هدف مو عبث يقول...

يوم اليمعة
10/4

أذكررج أنا :)

5 دقايق ! أنا 50 دقيقة :p

طموحة مملوحة يقول...

حياتي هدف مو عبث


اي ادري لوووووول وانا نفس الحال لبغيت اروح الجامعة لوووول ...

افا عليج نخلص وخل تمشى شوي شرايج ؟؟ ييبي امج خل اعرفها على امي وناسة ... عاد بخاطري اشوفج والله

صبا يقول...

هلا وغلا ...
من زمان عنج

:**

شوفي من الحين صوتي لج
والصوت ب1000
يعني 4000

ههههههههاي

ومبروك الجل حلهم بطنهم

والف شكر للامير
بابا صباح الحكيم

وانتي يا حلوه ..ما عليج من كلام الناس
والعمر يخلص والاوادم ما يخلصون حجي
ولا يتعبون

الله يعينج
وطاااااف
:***

Hashimoto يقول...

مع ان انحل المجلس بس اعتقد ان نفس الناس راح يردون ولا كأن صار شي
عالعمووم . تفاءلوا بالخير تجدوه

======

وع .. كلام الناس !!

لو شنوا تسويين .. ما راح ترضين الناس كلهم

والله زين تسوين فيهم وباشاعاتهم الفاشلة

والله هذيلي لو تراكضين ورى كلامهم ما تخلصين

يطلعون مثل الفقع

الغيرة وعمايلها ==> متأثر من الدراما الخليجية

P=

حياتي هدف مو عبث يقول...

هههههههههههههه
على الأقل بين فترة وفترة مو كل يوم :p

اي عادي بس أمي ما تييي هالسوالف
ما تحب
:p

غير معرف يقول...

اسطر من سيرتي الذاتية ...
* محررة في مجلة ماجد 2000 -2005 .

* مسؤولة صفحة المقابلات في مجلة Unique .

* محررة في مجلة أنهار الأدبية الالكترونية .

* محررة في جريدة عالم اليوم .

* أمينة السر في شركة AAPG .

*عضو في Shell Oil Company

* نائب رئيس النادي الجيولوجي في جامعة الكويت .

* مسؤول اللجنة المالية في النادي الجيولوجي .

* عضو في الجمعية الجيولوجية .

*عضو في قائمة الوسط الديمقراطي منذ 2005 ...

*رئيسة اللجنة الثقافية في قائمة الوسط الديمقراطي كلية العلوم 2008_2009

*عضو في ((صوت الكويت )) .

* عضو في المشروع الوطني (( رسالة )).




لااله الا الله
كل هذا وليلحين تقولين هذى تغار منى وهذيج تحفرلى

المفروض شخصيتج تكون اقوى من جذى بوااايد
وتكون ثقتج بنفس عاليه , وما يهمج اى احد , وتترفعين عن صغائر الامور

حبيبتى فى مدرسه واحده بسويسرا , هذى الوحيده اللى تعلم الاتيكيت والبروتوكول وضبط النفس حق الملوك والامراء وبنات العوايل

ياريت تدخلينها شهرين , راح تتغير شخصيتج وايد

الله يوفقج ويسعدج ...

طموحة مملوحة يقول...

صبا ياصبا ...


شلونج يا صبا ؟؟؟

صبا شدعوة من الحين تذليني بصوتج ..؟؟؟ يبا اييب لج افلام سعاد حسني وأحط لج اغنية ياواد يا تإيل لوووول ...

فديتج والله

طموحة مملوحة يقول...

Hashimoto


يالي متأثر بالمسلسلات أنا أقول لك ربع حدس كلهم بيردون ... وبعض من النواب راح يتغيرون ... وبتصير مثل سالفة عسكر وسعدون ... والحريم يصيرون ملاقة اكثر وما يصوتون للحريم ... يارب تدش مرة تعدلهم لووول

طموحة مملوحة يقول...

حياتي هدف مو عبث


حسافة عاد وناسة والله لا تشوفيني انا اتنح لوووول وحلو المكان صراحة .. خلاص دزيلي ايميل أو ادز لج رقمي علشان اقابلج هناك وناسة :D

مواعد اشكرة لووول

طموحة مملوحة يقول...

غير معرف


شكرا لك على كلامك الطيب واخلاقك الرائعة ، واذا قلت لأمي عن هالمدرسة مو بتوديني بتزخني كلي تقطني هناك لوووول ... لأن صج يبيلي اتعلم ... مشكلتي حساسة وايد وزيادة عن اللزوم ..

علي إسماعيل الشطي يقول...

أختي الكريمة

حل المجلس كان متوقعا بعد الأحداث الأخيرة التي شهدتها قاعة عبدالله السالم

و هذا قرار إنتظرناه بفارق الصبر

و كما قلت في تعليق سابق

يجب أن يكون هناك إنقلاب أبيض على رموز التأزيم يقوده أبناء الوطن المخلصين حتى نطهر قاعة عبدالله السالم منهم

يجب أن نوصل القوي الأمين الذي يستطيع إيصال سفينة البلاد إلى بر الأمان

آسف عالإطاله

تحياتي

mo3ath يقول...

الله يبارك فيج ، انا قعدت على المسج الي يخبرني انهم حلوا المجلس ماراح تتصورين اشلون كملت نومتي وحلمت اني طاق محمد هايف لوووول

ثقتج بنفسج وشخصيتج تفرض على الكل انهم يحترمونج ، كلام الناس عمره ماراح يغيرج ..

فريج سعود يقول...

اتوقع بعد البوست على طول رحتي نمتي من التعب


مو ؟

Enter-Q8 يقول...

سارة شوفي اهو صحيح اللي ما يعرفك من اول شي بيقول هالكلام
و خصوصا انك تنتمين الى قبيله فالصورة لازم تكون عكس فتظهر عند الاخرين بهالشكل وهذا سبب البلا
يعني لو اللحين انتي من العايلة الفلانية اللي تسكن احد ضواحي العاصمة كان الامر عادي و هذا سبب البلا مره اخرى المقياس
انا واحد اشوفك على سجيتك و طيبه و مرات ودي اتلاشط وياك على كتاباتك او تحليلك لأمر ما لكن عارف قصد النوايا
يا بنت الناس خليك على ما انتي عليه و لا تتصنعين لأجلهم بل كوني نفسك

Q8EL5AIR يقول...

روووحي الله يوفقج وتفوزين بالمجلس ..

عاشت نصيرت المدونين .. عاشت :)


و تحياتي ..
ويسلمواااااااااااااا :)

طموحة مملوحة يقول...

أخي علي


اهم شي ما يدش هايف ، لوووول اليوم يقولون لي يدش وبيفوز بالثلاث لووول ... للأسف :)

طموحة مملوحة يقول...

معاذ

الثقة موجودة ولله الحمد بس لاعت جبدي من كثرة الحجي .... ناس فاضية والله

طموحة مملوحة يقول...

enter q8

وايد ناس واجهوني وقالوا لي نفس كلامك ... كنا نشوفج اي شي شفيها هذي جريئة ولمن عرفناج وشفنا ان هالشي تلقائيا منج وبدون قصد مو زين عرفنا شنو سارة ، والاكثر من جذي ان وحدة بالجامعة كانت تمشي وتقول سارة فيها وفيها واهي ماتعرفني ، ولمن كلمتها مرة وحدة بس صارت زينة وقالت لي للأسف توني اعرف انتي شنو ... لووول
عقب شنو ؟
هذا اهو وللأسف عسى ماطلعت وحدة بدوية قالوا شفيها ؟؟ جن البدوية محكوم تكون بالبيت تتزوج وتخلف وتخدم ريلها .. مو هذي القصة شكثر بدويات ناجحات ، اخوي خالد اهم شي اني لمن اتكلم مع احد يكون قصدي شريف واعتبرهم اخواني ماسوي مثل الي يبون يضبطون وبس لأن تفكيري اكبر من جذي والله .

طموحة مملوحة يقول...

كويت الخير ...

مشكور يالغالي ..

أتيت متاخرة يقول...

سارونة بعد روحي انتي
تركيها عنج
كل واحد يرده اصله وتربيته
خلج في دراستج ابرك
وبعدين اهم شي انتي راضية عن نفسج

طموحة مملوحة يقول...

أتيت متأخرة


يابعد راسي انتي والله :)

صح كلامج الحمدلله انا راضية والله ولو موراضية ماكنت كملت والله

TrueClue يقول...

ولله انا مادري شقول .. اأيد حل المجلس ولا ما اأيد .. جذي ولا جذي ما راح يصير شي .. و راح يخدمون مصالحهم الخاصه . .

و على فكره .. لمن يطلعون ناس يكرهونج من غير سبب عرفي انهم يغارون منج و عرفي انه انتي مسوية شغل محترم
مالت عليهم ..