2009-03-24

شكوى من طالبة


اقروها أول وبعدين بقول لكم القصة :)
لمن يهمه الأمر....!!!!
صحتنا في خطر
أجل صحتنا في خطر والسبب هو ما يُقدم لنا في كفتيريا العلوم التي تشهد تدني في المستوى الصحي والنظافة حيث يشاركنا الذباب الغداء ويلتقط ما وقع أرضا ليقدم لا أو ماقارب درجة التجمد أو ماتعفن من طعام فقد شهدت هذه الكفتيريا العريقة عدة حالات تسمم لم تسجل والسبب هو ثقة المصاب بعدم الاستجابة .. الىمتى يا جماعة ياترى ؟؟
ألسنا في الكويت التي تقدم الغذاء والمعونات لكل الدول المحتاجة ونحن هنا نعاني من نقص وتردي في الخدمة وسرعة تلبية الطلبات فأغلبنا ليس لديه الكثير من الوقت وفي المقابل العاملين هنا يعاملونا وكأنه ( المنة عليكم أن نخدمكم ) وذلكلعدم وجود رقابة حقيقية وصارمة في الكفتيريا الرائحة قاتلة ربما الشفاطات لم تعد تعمل لووووول أو انه لا يوجد بالاسا أو انه عفا عليها الدهر ..وكذلك الأسعار مرتفعة على الرغم من تدني مستوى الجودة من حيث الطعم والماركة ان صح التعبير نرجو وضع مينيو ( قائمة اسعار ) حتى لا يتم خداع المستهلك لأن الأسعار تختلف بين ليلة وضحاها .
كلنا مسئولين عن هذا الوضع لأننا لم نتكلم ولأننا دوما نقبل بكل ما يضر صحتنا يجب أن نتحرك فصحتنا في خطر وحالتنا النفسيةنتيجة التغذية السيئة في خطر أيضا لقد وضعت عدة اوراق في صندوق الشكاوي ولكن بما أن الصندوق وجدت عليه بعض الأحافير وتكونت عليه صخوررسوبية اووووف شكلها وحدة ن ربعنا بالجيولوجيا فديتها والله :) فلا اعلم هل سيجد من يلمحه أصلا ؟؟
ربما يستهزأ البعض من المقال ولن في الدول المتقدمة توضع هيئات استشارية وتقام دراسات عميقة ومكلفة من أجل هذه القضية ألا وهي التغذية .
نتمنى من كل الطلبة المشاركة بارسال شكاويهم لع هذه المحاولة القبل الأخيرة تجد نفعا ولعل أحدهم يستفيق ويتذكر أن
( كلكم راع وكلكم مسئول عن رعيته )
وخاص شكري وامتناني
( طالب/ة)
ــــــــــــــــــــــــــــــــــــــــــــــــــــــــ
كنت رايحة آخذ أغراضي من اللوكر ولقيت هالورقة داخل لوكري قريتها وبصراحة أشكر صاحبة الرسالة الي متأكدة أنهابنت لأن لو طالب راح يكتب علطول طالب ، ولكن الخوف منتشر بين طلبة الجامعة لأن تعودنا احنا نداوم علشان ندرس وبس ماتعلمنا ان كل واحد يقدريتكلم ويتحجى ولا قائمة تمثله ولاهم يحزنون يقدر يوصل رسالته بستين الف طريقة ، هذا أولا ، وثانيا اعتقد مشكلة الكافتيريا مو طبيعية عندنا بالعلوم ، وللأسف لمن نناشد الموجودين كأننا نناشد طوف ، جنهم يقولون ان شاء الله تموتون ما همنا ، مافكرت أحط كلام البنت علشان يقراها اي احد موجود بالجامعة ابي الناس الموجودة تقراها ويشوفون حال جامعة الكويت ، حتى كافتيريا سنعة ماعندنا ، الواحد يحط مطاعم كشخة ومعروفة الطالب الجامعي يستاهل ، حاطين لنا شركة حي الله ، عندهم البيبسي ب150 فلس لا والطالب الجامعي له خصم ، تدرون شقمت اسوي ؟؟ تذكرون ايام اهلنا لمن يحطون لنا الصمون بجيس مع عصير؟ ؟؟ والله قمت اسوي جذي ، أو آكل من برا، اذكر موقف اهبل صار لي بالكافتيريا يبين النصب والاحتيال الي الجامعة نايمةعلى ودانها ولا قاعد تحاسب هالاشخاص الي يلعبون بحسبة اعانة الجامعة الي مافيها بركة ، خذيت لي صحن سلطة وصحن فيه قطع دياي وعلبة بيبسي ... جك جك جك دينار ونص .. حلو كليت وعلي بالعافية ، اليوم الي وراه خذي نفس الطلب والله العظيم ، تتوقعون جم الحساب ؟؟ يالله يبون يبوقو زيدوا 100 فلس 200 فلس يالله ربع دينار ، والله العظيم الحساب 3دنانير ونص والله العظيم انا بققت عيوني ، نعم ؟؟خير ؟ ليش أكل فرنسي .. ولا مطعم كشخة محد ياكل منه الا الراهيين ؟؟
حتى كاريبو احسن منهم وارخض بصراحة ..
شهالبوق ؟؟؟
للي يحبون يقصون على الناس ويقولون لم جامعةالكويت من أحسن الجامعات ، لا ...محد يعرف للجامعة الا الي يدرسون فيها ، واكثر من الذل الي شفناه كافي ... كــــــــــــــــــــافي
محنا ناطرين من الجمعية تتحرك ، من متى اصلا تتحرك ، يقصون علينا بجم كلمة وخلاص ولا احنا راح نطق درب علشان نشتكي ...
من مدونتي...الى كل الصحف الكويتية ... راح انشر شكاوي طلبة كلية العلوم الي مادري ليش ذالينهم ويعاملونهم جنهم عيال البطة السودا ..
طلبة العلوم ماراح يسكتون ولا راح نرضى بالقوانين الي تمنعنا حتى من وضع اعلانات في الكلية ، تبون ننفذ قوانينكم احترموا وجودنا ... تبونا ننفذ قوانينكم ... خلنا نحط لكم قوانينا :
_ نبي كفتريا سنعة بنت خير رجاء .
_ نبي مختبرات نظيفة مو من سنة 66 ولحد الحين غبرتها موجودة والله عيب أحط الصور يعني ؟؟
_ نبي احترام وتقدير لطلبة العلوم مو ذالينا حتى يوم السبت نداوم رحمونا .
_ نبي شركات تيي تعلن عندنا تتبنى طلبة العلوم مو كلهم مطيحين بالادارية شنو اهم احسن منا ؟
_ نبي استراحات سنعة نقدر نقعد فيها ندرس ، كل ما دشيت لاب جيو . القى طلبة مو معانا داشين يبون ياكلون ولا يسولفون صارت الابات متعددة الاستخدامات .
_ نبي الكلية لطلبتها فقط مو يقولون ماندخل الغير جامعيين ويدخلون ربعهم ياخذون نص اماكن الكلية ومخلين طلبة الكلية يفترون .
_ نبي اماكن نظيفة كثر عاملين النظافة على شنو ؟؟؟ على سلام عليكم بابا ؟؟
_ نبي ممرات سنعة محترمة ، لوووول ضحكوا على ممرات العلوم كله كركبة وتحولت لمخازن .احط الصور؟
_نبي ماكينات ماتبوق ، حتى الماكينات الي ماعندها مخ تبوق منا ؟؟؟ شنوووو شنووو؟؟
_نبي اماكن نظيفة كله دخان وتلوث شنو هذا؟؟
اكمل ؟؟؟ موناطرة من البوست الا التشمت علينا بس :)

14 comments:

TrueClue يقول...

وييي ساره .. صج تبين تنفصلين :P

عندنا و عندج خير يا سارة .. تعالي عندنا بالكلية ( التكنلوجيا) و شوفي .. مباني قديمه و صفوف خايسه و كراسي رايحه فيها ..
و تعالي شوفي الممرات و لا *الحدائق* ولا الأستراحات .. ولله لو اتكلم شكثر ما راح اكفي المأساة الي عايشينها ..
بس شنسوي هذا نصيبنا

و على طاري الكافتيريا ؟
مرة طلبت طلب .. طلع علي دينار و مية .. ثاني رة طلبت نفس الطلب .. صار 1 و ربع .. انا صرت جذي *_* ..
الخير وايد الحمدلله .. بس انا ماحب الواحد يقص علي .. و خل نشوف منو ياكل من عندهم .. انا اشره على الي ياكلون منهم .. لو نسوي اضراب شوفي يتسنعون ولا لأ
لا و حاطين مينو و اسعار .. بطيخ الأسعار كلها غلط بغلط .. بيبسي ب100 فلس حاطينه ينباع ب150 .. ولله حاله ..

عندنا و عندج خير يا سارة .. على الأقل انتوا يسمونكم جامعه فرق بالمسمى:P

كاريكاتير يقول...

مرحبا


ذكرتيني بسالفة ايام الجامعة لما كنت بالآداب...

كان المطعم لحظة لحظة من قال مطعم هذا حده محل سمبوسة مدعوس بين كراجات الشويخ!!

كان يقدم فلافل متحجرة يمكن لو يسوون عليها تحليل جيولوجي تطلع الفلافل ايام عنتر!!

اما عدد الكراسي فكان 50 كرسي بينما الغرفة (المطعم) ما تشيل والناس واقفة اكثر من 10 اشخاص!!

وطبعا هذه السالفة بمباركة جميع من فاز برابطة الاداب سواء الوسط او المستقلة او الائتلافية..وحتى لو تفوز الاسلامية يمكن تزيد على قائمة الطعام مهياوه او حتى مرق شبزي!!

نصيحة الافضل ان الطالب يطالب بحقوقه كاملة والا استخدم حقه في الاعتراض وضغط على الجمعية او الرابطة ولا يستهين بمثل هذه المطالب الاساسية في اي حرم جامعي محترم!!

فريج سعود يقول...

عميدكم وينه نايم ؟

علي إسماعيل الشطي يقول...

أختي

المشكلة ليست فقط في كلية العلوم أو في جامعة الكويت

المشكلة في الديرة ككل

المشكلة أن البلد ماشيه عالبركه

اهي راده على الكافتيريا بالعلوم !!

الله يستر من الجاي

Nasser99 يقول...

الله يعين الكويت على هالبلاوي

طموحة مملوحة يقول...

true clue

والله طالب الجامعة الحين مايفرق عن طالب الثانوية من كثر ما اهم مطيحين من حظنا :(

طموحة مملوحة يقول...

كاريكاتير


القوائم الطلابية ؟؟!!!! كثرتهم على قلة بركتهم ... وجودهم صار شكلبس للأسف .. وكلن يبي النجرة والهواش ..


ايجابية حلوة وجود الصحف بهالمواقف صراحة:)

طموحة مملوحة يقول...

فريج سعود

مكتبه بمبنى 1خ ومدير الجامعة موجود بعد بالخالدية ترا :D

طموحة مملوحة يقول...

أخوي علي اسماعيل

لا كافتيريا الاجتماعية احسن من كفتيريتنا صراحة اهم خل يحطون الكافيهات والمطاعم السنعة والله اهم الربحانين مو المطاعم .. جم يدفعون حق الجامعة ؟

طموحة مملوحة يقول...

ناصر 99

مسكينة الكويت والله

Free_Moi يقول...

اااااااااايه امبيه شفت شكوى البنت


سارونه حتى انا صار فيني نفسج

كل يوم نطلب من الكفتيريا نفس الاكل بالضبط بس كل يوم يطلع حسابنا غير
والله الاكل لا زايد ولا ناقص نفسه بالضبط بس الحساب غير ويفرق وايد

انا عبالي انا مضيعه او يتهيظالي

**

وعلى العلوم تكفى مانبي ناسترقص عرضه مانبي طاولات زرق وتوجيه وارشاد يعرضون
نبي معارض سنعه
نبي شركات توظف
نبي اهتمام اكثر بالانشطه
جمعيتنا الله بالخير لا مهتمه بالانشطه ولا مهتمه بالدراسه مادري ليش ماسكين


خنسوي حمله ضدهم :p

طموحة مملوحة يقول...

اي والله يبيله حق التحلطم جاهزين احنا لوووووووووووول


بس صج صج صج موعايشين وناستنا بالكلية

غير معرف يقول...

قوه



الله الله من قدنا وصلنا للعالميه

طال عمرج

صديقتي اهي اللي كتبت هالمقال
و اختي اهي الي وزعت و وراحت قدمت شكوى
وانا تهاوشت مه الي شالوا الاوراق

مع تحيات قروب الابطال

طموحة مملوحة يقول...

مادري شفيهم السكيوريتي عسى ماوزعنا شي كلونا ، بجامعات برا طلبة يسوون حفل غنائي يوزعون دعوات ونشرات محد يحاجيهم هذول على نشرات توعوية ماكلينا ؟؟؟؟

صج جهل ... سلمي على رفيجتج وايد وايد