2009-04-02

رحلة حقلية 2









السلام عليكم ورحمة الله :)
شلونكم شخباركم ؟؟ باك بعد انقطاع بسيط شوي وزارة الفصلة عندي صار فيها مشاكل وواسطات وحالتنا حالة ومن بعد الحل ساحة الفصلة عندنا انحجزت لمرشح دون اخذ اذن منا ورحنا فتنا عليه عند البلدية وماقصرت والله يزاهم الله الف خير يارب .
اقول حق صبا ، والله يابنت محد قدر يوقفني عن الكتابة بالمدونة لا حب ولا كره لوووول بس شركة زين قدرت لمن قطعت اشتراكي ودقيت عليهم اتحلطم انا طالبة جامعة قدروا هالشي يحليله الموظف شوي ويبجي على كلامي الي يقطع القلب لووول .
طبعا مرت هالخمس ايام فيها فصلات حلوة مع المطر وفصلات عبيطة وفصلات مع منورتي رفجيتي الي دزت لي مسج وانا بعز نومتي (( سارة خلاص بتحجب باجر بيي الجامعة بحجاب امانة اذا ييت تعالي لسياارتي )) رديت عليها مبروك يالغالية وحدي مستانسة علشانج حالتي حالة ، أتخيل شكلها لوووول بعدين تدز لي (( happy April's fool))
أنا شفت المسج جان ادق عليها ماخليت كلمة قوية ماقطيتها لو يحطوني بفلم ويحطون طوووط على كلامي جان صار الفلم بس للمشاهدة مو لسماعه ، ماحب احد يقص علي بشي كلش كلش والله اكره كره اليهود ..
المهم صارت لي مشاكل بسيطة شوي من جامعة ومجلة وجريدة ولوعة خشم بس مانسيتكم والله وخذيت الصور الي عند رفيجاتي مالت رحلة فيلجا ، كانت على اساس جزيرة كبر بس قال الدكتور أن الجو غم وغيروا خلوها فيلجا مع اني كنت اتمنى اشوف أول شي الشعاب المرجانية وثانيا بعد جم بطل واقسمه على عدد الايام وأشوف جم واحد يلكه بهالجزيرة لووول ... المهم الصور تحكي عن اللحظات ، وطبعا كلنا اجتمعنا في الجامعة على الساعة 7:30 صباحا ورحت مع رفيجتي الجمعية نييب لن بلعة ونتناقش موضوع الحمام عزكم الله ، مشكلتي وياها الحمام ، لو نقعد ساعتين بدون حمام ندور حولين نفسنا ، جان يقول لنا الاستاذ ان اليخت فيه حمام وارتحنا لمن قال لنا فيلجا لأن فيها مباني لوول ، المهم ماكان في باصات لأن يوم الجمعة ، فرحنا بسياراتنا ورا الدكتور لين وصلنا المرينا ، وركبنا اليخت الكبير .
الشباب راحوا فوق والدكتور والاساتذة قعدوا داخل اليخت وسارة تتوقعون وين راحت ؟؟؟ راحت بمقدمة البخت مع منور شوي ولا اختي ورفيجاتي يايين ورانا ونزلنا سوالف وبلع وضحك ووناسة ، والدكتور يطل علينا ويضحك ، كان الجو حده غيم وحلو ووناسة حده بصراحة ، أكمل سوالفي مع الصور احسن لووول ...
















صورة مقدمة اليخت وبأول طريجنا لفيلجا




هذي الكويت هذي الكويت ، صل على النبي ، هي ديرتنا وفيها الي نبيه ... فديتها والله الحب
دكتورنا العزيز محمد الصرعاوي ، قاعد يشرح لنا شنو راح نسوي وناخذ العينات الي بالبحر لأن كان البحر طيني جدا صوب الجزيرة ، Mud لا تشوفون دكتور مايك واهو يقول Muuuuuuuuuuuuuud لووووول جنه زومبي لووول المهم كنت حدي عايشة دور الجيولوجية الجنطة الجيولوجية وعدتي معاي ، وللأسف كنت شارية سكينة من السعودية حدها شي بس ضيعوها :( كنت ناوية اخذها معاي تعرفون لازم الواحد يدافع عن نفسيته ، وكانوا رفيجاتي يضحكون علي وانا امشي والجنطة بظهري مع اني كنت احس وناسة ، احس اني طفلة كبيرة لووول .



هذي اهي فيلجا الغالية ، اقول لكم شي؟؟ قبل ما نوصل فيلجا وقفنا شوي علشان ناخذ عينة الطين الي تحتنا ، المهم شافونا الشرطة على بالهم وقف اليخت مالنا ولا وقفوا يمنا مادري شيقولون حق الدكتور كلهم كانوا بآخر اليخت الا انا ومنور كنا بأول اليخت نسولف عن اشعة الشمس وشلون فحمتنا لووول ، المهم ولا تيي اختي تركض : شفتوا الشرطة شفتوهم ؟؟ ولا مالقينا الا الي زلقت من بعيد صوبنا لوووووول انا ومنور كاااااااااااااااااااااااااااااااااااااااااااااااك ضحكنا من قلب والله جان تقول رفيجتي : اختج العصقولة طاحت برشاقة لو انا ولا انتي جان غرقنا اليخت لوووول .



صفط اليخت ، لووووول ذكرتني الصفطة بأختي الكبيرة لووول كان ودها تيي معاي ، بس خايفة من هاللحظة ، لحظة الي يطلعوون فيه من اليخت لبرا لوووول ، صج مسكينة لووول وانا خو لقافة مابي انطر نقزت بسرعة لفوق ، ونطرناهم وخليت عيوني تاخذ جولة تفقدية على مايطلعون كلهم .






قارب سبقنا والناس الي فيه كانوا يسووون لنا باي ، لوووول الشي الي استغربت منه ان لمن نزلنا الناس هذي كلها كانت مختفية مادري وينهم لووول ، وانا لعب فيني الخيال اتخيل ان الناس اختفت وانزل معه شوي شوي يقل عددنا واظل انا بروحي ، وتطلع لي اشباح .. اخييييي والله خيالي خبل شوي .



البوليس ، يلهوي ، أول شي شفناه ويالله خذينا لهم صورة تذكارية للزمن . :)








بدأت الرحلة هع هع هع هع ... خذيت معاي أم عليوي علشان تييب لي الحظ السعيد :)
قلت لكم أحب مولان والله . بس مالقيت صرصور ، صرصورة تاخذ صرصور ؟؟ ماينفع لوول







رايحين صوب الشاطئ ، كلهم يمشون بروحهم الا انا لازقة بالدكتور والدكتور المصري الي يمه وازعجتهم بأسئلتي حدي.








موتر آخر شياكة ، رجاء ما ابيعها ، بصراحة عاجبتني وبلييييز ذكروا الله مو ناقصة تعطوني عين وادعم فيها بلييييز عاد .








المستمعون والمستمعات ينصتون لشرح الدكتور وانا والاستاذ قاعدين نحش فيهم ونصور لووول لا تعلمونهم بس اوكي ، بعدين يسقطوني .











الشاطئ، اخييييييي ياعساه دووم نظيف وسعيد يارب ، حبيته والله واعلنت زواجي منه ، بصراحة جان زين كل شواطئنا جذي ياخي الواحد يقدر يشكي للبحر على راحته ماتيي قرطاسة حاذفها الهوا علينا تخرب علينا المود ولا ايي ياهل صوبك وسنسونة بخشمه يلوع جبد خشمك .











هذا كان قاعد يتغشمر مع ربعه وصاحبه وسوا نفسه ميت ، فخلوه ونطرهم على هالحال لحد ما كلاهالدود وبقت اسنانه وصوفه ، وقعدت اختي تلعب فيه وبويهه وقلت لها حرام ، تراه ميت احترمي الموتى يخرب بيت الشغلة ، مسكين والله للحين ناطرهم تصدقون ؟؟؟ اهو قال لي مو والله ، استغفر الله بسي بسي بسي














بدأت المرحلة الثقافية وبدأت سارة باخراج مفكرتها وقلمها ، وعلجة مادري ليش المهم قعدت اكتب المعلومات .










وقفنا يمكن ربع ساعة ننطر لأن كانوا يصلون صلاة الجمعة تقبل الله طاعتهم يارب .














شوفوا الآثار والحين أقول لكم قصتها بس مو كاملة باختصار لأني في قيد البحث عن القصص الكاملة لها لأن لها قعدة بصراحة ووهدني الدكتور بكتاب يضم هالقصص راح انقلها لكم قريبا ام شاء الله .


















جزء آخر من الآثار .















شي طبيعي أن هالصخرة تكون موجودة هني بس الي حبيت اوضحه جمال الصخرة مع الأصداف ، ودائما ما تشوفون الصور الجيولوجية فيها قلم أو نقود معدنية ، أو سكين أو مطرقة ....الخ هذي الأشياء تدل على كبر العينة الي يبون يصورونها مثلا اذا كان جزء من جبل يحطون سيارة ، اذا كانت صخرة صغيرة يحطون قلم أو أو ... الخ المهم وصلت الفكرة ونقول عنها Scale .















اهم متعمدين يجيسون بعض الآثار بسبب ترسبات الرمل عليه بس بعد فترة راح يشيلونه .




















قال لنا الأستاذ الي نسيت اسمه أن الباحثين وعلماء الآثار درسوا المنطقة على شكل مربعات علشان يسهل عليهم الدراسة ، خلف الله علينا وكلهم اجانب وين الكويتييين ؟؟؟

















هني الدكتور الصرعاوي في بداية شرحه لنا المكان باختصار على حسب معلوماته قبل ما ايي الاستاذ الي مهتم بالمنطقة .












































بدأ الأستاذ بالشرح ، فقال لنا عن الحضارات الي كانت موجودة هالمنطقة ، وكانت بالترتيب كالتالي : الحضارة الدلمانية ، الحضارة اليونانية ، الحضارة العربية ماقبل الاسلام ، صدر الاسلام ، الأموية (( المبكر _ المتوسط _ المؤخر )) حضارة بني العباس ، حضارة بني عثمان _ الكويت أخيرا .
وعمر هذه الحضارات من 2400 سنة الى 2500 سنة .
























وكان في معبدين في الجزيرة يأشر على مكانهم الاستاذ ، وكان يقول ان حضارتهم كانت من الحضارات الرائعة والمليئة بالمفاجآت حيث ان الجزيرة كانت تضم جميع انواع الحيوانات من غزلان واسود وغيرهم وغيرهم وشق الأنهار كل هذا شلون عرفوه تتوقعون ؟؟ من العملات المعدنية الي كانت على ايامهم شوفوا الابداع الانساني ، واحنا شسوينا ياحظي ؟؟؟ بسنا نعتمد على الغرب وخل نشوف وندرس ونبحث بسنا ناكل ونحسد بفلان وعلان هذا شاطر مخ وهذا عنده فلوس .وبسي تحلطم مو؟؟




















هذا مكان المعبد الي حوله ابن الشيخ مبارك الكبير والله نسيت اسمه سوري والله حوله الى مجلس للراحة للزوار.





هذا مشهد من الابداع الي كانت فيه الحضارات القديمة ، عطاني الاستاذ معلومة جدا رائعة كانت الاولى بالنسبة لي ويمكن بالنسبة لبعضكم ، قال أن اقدم حضارة بالتاريخ كله هي الحضارة العربية والي قدر عمرها ملونين سنة بالضبط ومكانها في المملكة العربية السعودية في منطقة اسمها الشويحطية ، وقال ان احد علماء الآثار الغربيين قال : تبا للعرب ، ما أن نجد حضارة قديمة حتى تظهر حضارة عربية تسبقها )) يعني خل يفتخرون العرب ، بس مو وايد لوووول لأن مشكلتنا الدول العربية مكبرين كرشهم ويقولون تعلموا منا الغرب وتعلموا منا ومنا ، وبالاصح تعلموا من فلان العربي وفلان العربي ، يعني مو علشان احنا عرب نلزق فيهم اهم ناس درست واجتهدت واجبنا ان نقتدي فيه لأنفسنا مو نهايط جدام العالم وانتو تعلمتوا منا ، والمشكلة الحين البعض منهم يتعلم من الغرب ماهو سلبي وليس ايجابي ، يعني اهم تعلموا منا وتطوروا ، والي هني كاشخيت باريخ قديم وغرقانين بجهلهم .









سألت الاستاذ سؤال ، واستغربت من رده ، كان سؤالي : هل هناك مقابر بالجزيرة ؟ وكانت المفاجأة بأنه ليست هناك مقبرة في الجزيرة لتلك الحضارات، حيث أنهم كانوا يؤمنونبأن الجزيرة هي ملك للآلهة فما كانوا يخلون اي جثة موجودة بالجزيرة ، كانوا يدفنون الجثث في الكويت ، ووجدت الهياكل العظمية في الكويت ، ولك معلومات ماكنت ادري عنها .
وبصراحة الاستاذ قاعد يتكلم وانا غارقة بخيالاتي ، قاعدة اطالع المكان والآثار وأتخيل قبل قبل لمن كانت هالآثار موجودة في ذاك الزمن ، وأنا الأميرة سارة ولابسة لبس اليونانييين والناس تمشي حولي يضحكون لي وأشوف المعابد جدامي ، والنهر الي كان موجود والخضرة والتجار والأطفال والناس عايشة حياتها ، شفت فيلم كامل جدامي والله لا تسألوني شلون بس حاولوا تشوفون اي شي قديم وتخيلوه بفترة كان يديد راح تحسون بشي يخرع داخلكم صدقوني مثل ما صار لمن دشيت بيت القرين وتخيلت كل شهيد شلون استشهد جدام عيني .




الأستاذ يشرح لنا ، وكان في مكان ماحطيت صورته اعذروني لأن وايد صور بصراحة وسنة على ما صغرت حجمهم وحملتهم ، المهم سألوه عن المكان ، فكان هذ المكان هو المذبح الي يقومون فيه بذبح الأضاحي للآلهة ،والله نسيت اسم الالـــهين ، بس أعتقد كانوا يقولون عنه اله الشمس بعد وعلى طاري إله الشمس ذكر لنا احد الزملاء عن سبب تسمية الجزيرة Ikarus كان بسبب شخص اعتقد كان يدور على اعلى نقطة للوصول الى الشمس والله مافهمت من هالموضوع عدل بس الي فهمته انه كان يبي يوصل للشمس قرادة حظه ومات .






خلصنا من المتحف :)







مشينا وايد وايد وايد وايد وايد وايد وايد وايد وايد وايد وايد لوووووول لفينا الفريجز سوري بس ماعرف جمع فريج اعتقد احنا بحاجة لفريج سعود ، المهم والشباب كانوا يمشون ويلعبون كرة والبنات يمشون ويا بعض ويصورون البيوت ويسولفون واختي ورفيجتي مادري شعندهم يدشون بيت بيت يدورون كنز وانا للحين لازقة بالدكتور والدكتور المصري اسألهم ، عن البيوت وعن فيلجا وعن الغز شصار ماخليت شي جني اليهال الي اذا سألوا مايسكرون حلجهم .





نفس الحال كنت امشي اطالع البيوت وشلون مكسرة واتخيلها لمن كانت زينة بفترتها والناس تطلع تسلم على بعضها واشوف كل واحد رايح شغله الصبح والامهات عند باب البيت ينادون عيالهم ، اخييييييييييييييي كان ودي اشوف المشهد الصجي والله .








أحد البيوت الي تأثروا بهجوم الغزو العراقي ، ولك ماخلوا شي بالديرة ؟؟ واختي الخبلة مع رفيجتي راحوا يجمعون من الرصاصات ورفيجتي خايفة تقول لأختي : سمور اذا طاحت الرصاصة تنفجر صح ؟؟؟ ماعليه ادري طالبة جامعةوعلوم بس مايخالف ساعات تصير فينا لحظات غباء شوي لووول



هذي البقالة الي رحت لها ركض كنت حدي عطشانة من صجكم المشي هناك مع الشمس بخرني والله ، يبت لي بطل 2 لتر لوووول ، الشي الي يضحك ان كان في وانيت احمر واقف فقال له الدكتور مايخالف تركب البنات تعبوا من كثر المشي بنروح لبحيرة فيلجا ، وقال اوكي مو مشكلة ، ركبت أول وحدة بالبدي علشان اقعد بمكان حلو ، لأن عددنا وايد وصرنا مثل الخرفان السيارة تمشي بالحيل لووول ذكرني شكلنا ببساط الفقر واهم يغنون عنتر يا حاميها لوووووووول وريحة السمج ما أأولكومش ... ياخرابييييييي!!!!!!




فديت الي كتبها والي ألفها والي قراها والله .... فديتج ياكويت امبي الجملة دشت قلبي والله .. وانتو بعد صح ؟؟





وصلنا !!


وبدا التقحيص وملاحقة الوز ، والوز يصرخ وانا اقلدهم وااااك واااااك واااااك ، اقول لكم شي ، كان في بيض وايد هناك ، قلت لوحدة من الوزز مادري الوزات شفييني بالجمع خايرتها ؟ المهم قلت لها باخذ بيضج ممكن ، جان تطلع صوت من حلجها جنها صوت حية ، جان اقول لرفيجتي متأكدين هذول وز مو حيايا ؟؟



تسبح وتمرح وتشوف السعادة :D












الخريطة العجيبة






الدكتور يستفسر عن الفنادق هناك والاسعار وانا للحين لاحقتهم ... بسي بسي بسييي





لووووووووووووووووول ياييين البنات يضحكون روحي روحي حق الخطابة مكية كلنا رحنا لها ، انا استغربت منو الخطابة مكية سوينا لها دعاية والله ، كلنا قعدنا نضحكلا وطبعا لازم الخيال يلعب ، اقول لهم تخيلوا اروح اقدم طلب هناك حقها لوووول ، ولا تيييب لي واحد من روماني على ايام الرومان القديمة بالجزيرة ، لووووول طويل واسمرومملوح وطموح لووووول وكلهم يضحكون علي .












انتهت الرحلة هيا بنا نذهب جميعا ..




هني الدكتور يطالعنا ويضحك : ها شرايكم بالرحلة ؟؟؟
واحنا وناسة دكتور والله نبي رحلة ثانية بعد ، وانا للحين اقول كبر كبر كبر كبر لووول







هذاا البيسب الي يسوق اليخت قلت له يبي صورة علشان فكر فكر هذا يوم لووووول المهم ضحك ادري مافهم مني شي بس استانس وصورته يحليله هالبيسب ..





وأخيرا هذا تصوير جزي من جيس شكبره مليان عفستنا الأكلية ماخلينا شي ماكليناه يومها الله ، وعسى ما تطلع وحدة : سارة ذوقي هالكاكاو ، اخمط ، سارة ذوقي هالبطاط ، أخمط .... عند معدتي عند بطني لحد يحاجيني رجاء اوكي ؟؟
كانت رحلة مو طبيعية والله ، يمكن وايد راحوا فيلجا وماحسوا باحساسي هذا ب فعلا وبكل صراحة اقوها احس اني انولدت من يديد ، بصراحة نسيت كل جرح يحياتي ونسيت كل الي أذوني ورديت ما اذكر الا الاشياء الحلوة وللحين اذكر كل شي حلو والاشياء الي بجتني حسيتها قصة من القصص الخيالية الي اعيشها .. اذا رحتوا هناك لا توسخون الشاطئ رجاء :p





لووووول بآخر الرحلة لمن وصلنا الكويتولا تتصل أمي : ها وينكم للحين بالجزيرة ؟
أنا: يما .. توج تدقين ؟؟ من الصبح لحد الحين توج تتصلين ماقلتي بنتاتي شصار فيهم ، سارونة غرقت ولا لأ ؟؟
أمي : دنتي تغرئيهم كلهم وما تغرئيش @@
أنا : يالهوي يما أنا جذي؟؟ وحدي ضحكت ولا الاستاذ يطالعني ويضحك لم قلت له امي شقالت جان يقول : حتى ممتك تعرفك والله صادئة @@







































Solft waied ambe tra mn alsa3a 8:30 w ana a7thr hl.post ya weleeeeee
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
صعـــــــــــــــــــــــبة والله








30 comments:

حسام بن ضرار يقول...

والله انكم مقزرينها بكلية العلوم رحلات و تمشي مره الخيران و مره فيلكا و مره مادري وين.

D:

احنا بالهندسه قزرناها من الكافتريا لي الكلاس و من الكلاس لي الكافتريا، ماكو شي!

خابر تخصص الجيولوجيا يسوون رحله سنوية للمملكه المغربيه ... للحين يسوونها؟ ولا حولوها الخيران؟

:)

الحمدلله عالسلامه و يعطيج العافيه عالتغطيه الطيبه .

طموحة مملوحة يقول...

حسام بن ضرار ..



لووووول شنسوي ياخوك ماكو شي بالكويت نروح ندرس الأرض هناك الجيولوجيا مو بس كتاب وقراءة مانتعلم الا اذا شفنا الشغلة جدامنا ... وحسافة اول كان المغرب الحين عمان :@

بصراحة ودي المغرب لأن عندهم سوالف عفسة حلوة بخاطري فيها والله لوول وبشتري الكوارتز من هناك ارخص

والله احمد ربي مادشيت هندسة الحمدلله اني سمعت كلام اهلي لووول

Nasser99 يقول...

الحمدلله على السلامه رحله موفقه

{~المباركية~} يقول...

لووول السيارة الي تتطنزون عليها مره شفتها قاعده تمشي جداام عيني لوول سبحان الله امدى تختربت وسوا فيها حااادث ياحلو فيلجا حلواااه هالفترره مو شي حق بحر و جزر لانه فترة السرايات

Bloggerista يقول...

خوش رحلة

سوالف الاثار وناسة

و جميع فريج فرجان ترى :)

ReLaaaX يقول...

ياسلااااااااااام استمتعنا صراحه جنه احنا معاكم :)

Q8EL5AIR يقول...

اللللللللللللله عبق الماضي التليد :)

حسستيني اني بالاندلس !!

:):):)


خوش رحلة لا فض كاميرتج :)


ماشفتوا ارانب ؟

لاني كلما اروح ألاحقهم بكل مكان :)



يعطيج العافية اختي :)




وتحياتي ..
ويسلمواااااااااااااااااا :)

طموحة مملوحة يقول...

Nasser99


الله يسلمك يالغالي :)

طموحة مملوحة يقول...

المباركية


@@

متىكان لمن شفتها تمشي وهل كان في داخلها احد ؟؟؟ وشنو الاشياء الغريبة الي شفتها هناك؟؟

طموحة مملوحة يقول...

Bloggerista

بعد خشمي والله فديتج على المعلومة ، مشكور عزيزتي .

طموحة مملوحة يقول...

ReLaaaX


والله جان زين كنتي معانا في سوالف تضحك صارت والله بس ماحيت اطولها لوول

طموحة مملوحة يقول...

Q8EL5AIR


لووووول لا ماشفت وين تشوفهم صوب حديقة الحيوان ؟؟ ماشفت حتى القطاوة غريبة .... والوز شكثر يونسون هناك كان ود ابوق وحدة كاااااااااااااك

Enter-Q8 يقول...

اقول كم وصل سعر الصرف

الله يا فيلكاايام لا تنسى
ترى ما طبيتها من سنة 1986 عليك الحسبة

علي إسماعيل الشطي يقول...

الحمد لله على السلامة

أختي سارة

شاكر لك هذه الرحلة الجميلة بالصور طبعا :)

حسستني إني بفيلكا صج

و ذكرتني بأيام فيلكا مع الأهل أسبوعيا كنا نروووح و نغير جو

رحلة جميلة عليكم بالعافية

و عقبالنا إنشاله :)

تحياتي

طموحة مملوحة يقول...

حاكي عقالي


يعني قبل لاانولد بسنة ؟؟؟ جم عمرك :D

طموحة مملوحة يقول...

علي اسماعيل الشطي ...

والله وناسة هناك والحمدلله لاكو شباب رايحين فيها ولا قز كلها عوايل يعني الي يروح هناك يتطمن على اهله ، رد مرة ثانية وروح مع اهلك والله وناسة .. :)

Hashemy يقول...

يا سلاااااااااااااااام خوش رحله وامانة خوش تقرير سويتي عنها يعطيج العافيه

بيييييييييييييييييييييييييييييييه ذكرتينا باياااااااااااااااام العلوم

انا زميل سابق لكم بس ماكملت مسيرتي فيها ;p

وترى جمع الفريج فرجان مو فريجز انتي ومايك قاص عليج بهالحجي ;p

وشوفي اانتي شمسويه اللي الوالده ماتبي تدري ولا تسأل عنج جذي ;p

طموحة مملوحة يقول...

فديت ماماتي والله لووووول


لا والله ماسويت لهم شي الا شوية ازعج بالبيت ، وليش طلعت من العلوم ؟؟ قول لي قصتك لووول ودي اسمعها :)

SHAHAD يقول...

ساروونة .. اشتقتلج والله

خووش رحلة والله
عاد ولا مرة رحت فيلجا
شوقتيني والله

M.AlQallaf يقول...

الله وناسة !! أبي أروح فيلجا !!

Kuwait يقول...

@@
حسيت ان الجنطه مو قدج :q

طموحة مملوحة يقول...

شهودة


يابعد قلبي والله انتي فديتج تشتاق لج العافية :)

مشكورة يالغالية يبيلهتروحين لها ..

طموحة مملوحة يقول...

M.AlQallaf


المرة الياية نعزمج..

طموحة مملوحة يقول...

kuwait

الجنطة ملتي من ايام ثالثة ثانوي :)

M.AlQallaf يقول...

owee ^_^ thank you a looot !!

طموحة مملوحة يقول...

ولو يالغالية بس خل اشوفج اذا شفتيني بالكلية قولي لي منو انتي علشان اذا في رحلة اخمطج معانا لوووول عاد شكثر احب اعزم ..

Manal يقول...

وناسة

عليج بالعافية

:)

Salah يقول...

خوش تغطية

يعطيج العافية

طموحة مملوحة يقول...

منال

حبيبتي مشكورة لمرورج :)

طموحة مملوحة يقول...

salah


الله يعافيك يالغالي ، أتوقع عجبك الموضوع لأن فيه معلومات ... اذا كنت حاب تعرف أكثر عن الموضوع أو تعلمني اذا كانت لك معلومات اكثر يليت تزودني وانا بانتظار الكتاب الي وعدني فيه الباحث هناك ..