2009-04-24

زين بس فكونا من نفاقكم ...







الدائرة الخامسة وما أدراك ما الدائرة الخامسة :)



امتلأت الشوارع ببنرات المنافقين :) سبحان الله مايشكرون فلان الا قبل الانتخابات :) اوكي فلان خدمك اشكره أو اذكر خدمته بين الناس ماله داعي تسوي بنر شكبره شعرضه تقول (( من لا يشكر الناس لا يشكر الله )) كلنا ندري ان اشخاص كثر يساعدونا مو علشان سواد عينا علشان صوتنا وبس ..


انترست الشوارع ببنرات عزايم على عشا وغدا ، والناس الي تنافق بعضها شكر لفلان وشكر لعلان ، ليش مانشكر فلان لأنه قدم خدمة للكويت ؟؟؟ ليش نشكره لأنه ساعدنا احنا بس؟ ؟؟

شنو سووا فلان وعلان للمشاكل الي بالكويت ؟؟؟

اكثر مشاكل يهايط فيها المرشحين هي :

المال العام

اسقاط القروض

الجناسي المزدوجة

تجنيس البدون


وغيرها من هالمشاكل الي ما انحلت ، على شنو يقولون احنا وقفنا وتكلمنا ترى أقدر أوقف وأقول المال العام وفلان يقدر وفلانة تقدر شنو يعني ؟؟ هذا مو انجاز يا حضرات المرشحين ..
لمن يطلع لي كل واحد بعناوين حملاتهم الانتخابية الي اضحك عليها ، يحسسوني ان الكويت كلها خراب ودمار واهم بيبنونها من يد ويديد .


ولا البرامج التلفزيونية الي كل واحد يطلع يتناجر مع الثاني وانت شسويت وانت شعملت ؟؟ احنا شكو فيكم تهاوشوا بعيد عنا رجاء بس خلونا بالهدف الي شايلونه من مخوخ الناس ...


ليش التشتيت ؟؟؟


يقول لك القبيلة الفلانية اتحدت مع 3 قبائل أخرى ... يا سلام زين ليش ماتسوون خير وتتحد كل القبائل علشان الكويت ؟؟؟

ليش أحط مصلحتي فوق مصلحة الديرة ؟؟؟ اذا خدمني فلان اليوم باجر بيعطيني بيقولون لي انا داش بس علشانك انت ؟؟ مطالبنا ماراح تخلص .


تعلمنا بديرتنا أن مثل ما فلان وراه واسطة وعلان ممشي اموره لازم احنا بعد نضبط لنا جم شخص مثل فلان وذلك عن طريق اعضاء مجلس الأمة ، كيف يا طموحة ؟؟؟


عضو مجلس الأمة :

_ يحقق لك امنياتك ويوفر عليك قيمة الغداء والعشاء بالأكل في بوفيهاته .

_ عضو مجلس الأمة يفكك من القوانين الي وضعتها الدولة ويوقف في وجه القانون كي يحقق مطالبك .

_ عضو مجلس الأمة يجعل من الحكومة كرة في يده فيقول لك لا تخاف حكومتنا ضعيفة احنا نمشيها مو اهي تمشينا .

عضو مجلس الأمة يحاول قدر الامكان من تحقيق مطالب قبيلته أو عائلته قبل اهل ديرته .

_ عضو مجلس الأمة يحافظ على المال العام بأن يهدد فلان وعلان كي يسكتوه بجم بيزة .

_ عضو مجلس الأمة يفرض وضع القوانين الدينية في بلد دينها الاسلام .

_ عضو مجلس الأمة يصارخ في وجه فلان وعلان ، ولا يطبق المثل الي يقول (( لو كان بيتك من زجاج لا ترمي الناس بحجر )).

شنو بعد ؟؟؟؟ مامليتوا ؟؟؟


أعضاء مجلس الأمة الي كانوا في الدائرة الخامسة اهم اهم ماراح يتغيرون علشان جذي بحرق صوتي الي ماراح يأثر بالنتيجة لوووول ...



وحدة من الناس كانت عندها واسطة توظفها بس حل مجلس الأمة قعدها في البيت فملت من حياتها .
وين الكفاءة ؟؟؟ وين الحكومة الالكترونية في التوظيف ؟؟ وين واسطة الشهادة ؟؟؟ ولا ديرتنا تعتمد على واسطة مجلس الأمة بس ؟؟؟

والله كرهت شي اسمه انتخابات ... شنو هالحياة الصعبة ؟؟
ديرة توقف كل دوائرها ومؤسساتها علشان جم عضو تهاوش مع الثاني وهددوا الحكومة وكل شوي طالعين لنا بتهديد باستجواب !!!!!



الله يرحم حالج ياكويت !!!!


كل واحد يردد حبج ياكويت .. ويقول ماراح انجز الا لمن امسك منصب .... الي فيه خير لديرته ينجز بدون انتخابات ولا عمات عين ..



بطوا خشمي والله












26 comments:

Yin مدام يقول...

آاااااااه

الله المستعان


بوستج محبط بس واقع

بس أرد وأقول ما أشارك في جريمة حرق الصوت ولا بالورقا البيضا على الأقل أتمسك بمبادئي وأقوم بدوري وأرضي ضميري وربي وأعمل بواجبي تجاه هالبلد الطيب
ولو كل واحد مثلج يا طموحة يملك فكر ويحب هالأرض وطموح وناشط .. ينحبط ويرفض يرشح عز الله ضاعت الديرة من قلب

الله كريم
الله يصلح أهلنا وأحبابنا ويصلح أمور بلدنا يا رب
:))

طموحة مملوحة يقول...

يالغالية اذا كانت دائرتج كلها قائمة على الفرعيات والمصلحة الخاصة ليش تشجعينهم على هالشي ؟؟

بالعكس لو كنت بدائرة ثانية وشفت فيها احد يستاهل اصوت له ماعندي مانع ..


ما أقدر تكون عندي مبادئ واصوت للي يخالف مبادئي بصراحة :)

Yin مدام يقول...

في هالحالة يا عزيزتي ما أقول إلا الله يعينكم

وأنتوا الجيل الشاب إن شاءالله بييدكم التغيير وعسى صوتكم يوصل بس لا توقفون ولا تنحبطون

قواج الله يا طموحة :))

just a bunch of thoughts يقول...

اي و الله لوعوا جبودنا ...

اي و الله اذا ما كو احد يستاهل ما يحتاي نصوت حق اي واحد و السلا م ... لا يبا ، ما صوّت احسن.

علي إسماعيل الشطي يقول...

أختي سارة

نعم متفق معكي أن الوضع سيء جدا و أن بعض النوعيات تحاول جر الساحة الكويتية لتصبح شبيهة بالساحات العراقية و اللبنانية وهذا أمر لا نقبله جملة و تفصيلا


لذلك أختي الكريمة لا أتفق معكي في حرق صوتج الانتخابي بل يجب عليكي الذهاب أولا لممارسة حقكي الذي كفله الدستور الكويتي و الأمر الآخر و المهم جدا أن نذهب جميعا لنزيل تلك القاذورات من قاعة عبدالله السالم و ننتخب القوي الأمين

تحياتي لكي

صبا يقول...

يقول لك القبيلة الفلانية اتحدت مع 3 قبائل أخرى ... يا سلام زين ليش ماتسوون خير وتتحد كل القبائل علشان الكويت ؟؟؟



اقتباس

الله عليج يا سويره تستاهلين صفقه على هالبوست ..
بالصميم..
لوعووووو اجبووودنا !!!





الا تعالي قوليلي ؛؛
شخبارج ...ما لج بينه
لا يكون مسويه صفقه اسلحه مع بوراشد عقب ما ضاع الكشكوووول \
لا تخونييييين



:***

ريــــــانــه الـعـــــود يقول...

لووول العنوان حده معبر

الكويت تستاهل كل خير

وبالعكس صوتج وايد راح يأثر

بليز صوتي للي يستاهل لا تقولين جذي مرة ثانية :)

الله المستعان

بوفهد يقول...

انا اقول عالبركة احنا عايشين !

واحلى منها ماكو ... والله شغل عدل مرات السبهلله!

على قولة السارونا ... عاشو عاشو والله:)

Enter-Q8 يقول...

تدرين الدائرة الخامسه و انتخاباتها

و مرشحينها اهون
من هالمقابله الخايسة مالت الجويهل
اللي على قناة افلاس عفوا فلاش

شوفيها خل ينرفع ضغطك اشوي معاي

http://fai9al.me/wp/?p=20

mo3ath يقول...

لما الحين مالقيت احد يستاهل اعطيه صوتي بالخامسه :|

انا اقول سمعتي الرمي والتقحص عقب نتايج الفرعيه بس P:

TrueClue يقول...

الوعود الزائفه مو شي يديد على اعضاء المجلس ..
كلهم يقولون بنسوي و نسوي و نسوي .. و لمن يوصلون ما يذكرون الا مصالحهم ..
انا اشره على الي يصوت .. شلون توصل واحد المجلس و اهوه مو كفو المجلس ..
ولله الشرهة مو على الأعضاء .. الشرهة على الي يوصلهم ..

من جذي انا ما اصوت ولا راح اصوت .. لأنه محد وصل المجلس و كان كفو ( من وجهة نظري هالشي) الا عضوين ولا ثلاث ما راح اذكر اساميهم و الكويت تشهدلهم مو بس انا .

سارة نزلي نفسج بالأنتخابات .. راح تنجحين ترا :)

موفقه انشالله

elsha3er يقول...

السلام عليكم

انا جاى بس اسلم وزعلان كدة بقالى فترة ما بجيش عندك ما تسأليش عليا خالص ماشى

يالا مش مهم انا ممكن الفترة الجاية ما اقدرش ادخل على النت عشان الامتحانات فا قلت اجى اسلم على الناس اللى بينسونا بسرعة


تحياتى


احمد الشاعر

Makintosh يقول...

من لا يشكر النّاس لا يشكر الله
تتقدم الانسة ماكنتوش
بجزيل الشكر والعرفان الى الانسه تخاريف طموحة لجهودها العظيمة ومواقفا الجليله معنا

العشاء مقابل بنزين مادري وين والدعوه عامه


ممنوع قبول العانية
وله جنه ماكو عانية بالشكر ؟؟

طموحة مملوحة يقول...

Yin مدام


بعد خشمي تسلمين ... ان شاء الله السي يتغير يارب

طموحة مملوحة يقول...

just a bunch of thoughts

نطالعهم ويا معمهتهم ونضحك وايد ابرك مو ؟؟

طموحة مملوحة يقول...

أخي علي إسماعيل الشطي


ساعات حرق الصوت يصبح افضل طريقة لوقف المهزلة الي تصير ... يعني كلهم معقولة نازلين علشان الكويت؟؟

وينهم عن الكويت لمن كانوا مواطنين عاديين ؟؟؟ القلم بروحه يعبر عن حب الوطن وينهم ؟

طموحة مملوحة يقول...

صبا


يابعد خشمي شلونج ؟؟ والله موجودة بس امتحانات كلتني والله

صج شخبار بوراشد؟؟؟ حده قديم مو ؟

طموحة مملوحة يقول...

بوفهد



لوووووووووول عاشوا والله عاشوا ..

طموحة مملوحة يقول...

ريــــــانــه الـعـــــود


شسوي اذا محد يستاهل ؟؟ يبا كل الكويتيين اغلبهم يتطنزون على مناطقنا ولا احد من هالاعضاء عدلهم ... كلهم يبون اسم ومناصب بس تقولين لي ؟؟؟ صوتي فديته والله صوتي ما يسمح لي اخليه لهم والله ....

طموحة مملوحة يقول...

Enter-Q8


ياليل الليل @@

طموحة مملوحة يقول...

mo3ath

موبس تحرقه الا تشويه بعد :D

طموحة مملوحة يقول...

TrueClue


لا ماودي انزل لوووول بتصير حرب

طموحة مملوحة يقول...

elsha3er


والله امتحانات معلش الايام جاية ... انا آسفة على التقصير

طموحة مملوحة يقول...

Makintosh



فيه اكل؟؟؟ انا جاية الحين :d

أتيت متاخرة يقول...

انتم السابقون ونحن اللاحقون
الفرق اني الحين اتجهز للياي من خلالكم
يا ربي

أكره فترةالانتخابات

امقتها

طموحة مملوحة يقول...

حتى انا ... :s