2009-04-21

غازلني وأغازلك !!!






هذا موقف صار أمس بس لا تضحكون وابي تعليقكم اوكي على موقف هالبنت وهالشاب :)



قامت ثلاثة من الصديقات بالذهاب لشراء الغداء قبل المختبر وكانوا حدهم (( جوعانيين )) المهم طلبوا اكلهم واهم رايحين الجامعة قاعدين ياكلون اكلهم بالسيارة من كثر الجوع ( أهم شي شلون قلبت من الفصيح للعامي ... ورووووح ) فماكان في وقت وقاعدين ياكلون ، المهم واحد من الشباب طبعا قاعد يغازل وغصب يبيهم يردون عليه ، فالي قاعدة جدام قاعدة تاكل بشراهة ولاعت خشمها من الصبي فقالت لرفيجتها : هشييييه هذا لوع جبودنا مانقدر ناكل !!!


2 _ شسوي له يعني خل اهو يروح .
والي قاعدة ورا رقم 3 _ تقول له لالا مانبي روح .

المهم يا جدام وقعد يحدهم ، فوقفوا عند الاشارة ولا يصرخ بحاجييج شوي ، جان تفتح الدريشة الي جدام ...

1_ مانبي نكلم اخوي خلنا نكمل غدانا لوعت جبدنا .

اهو : شوفي بعطيكم الرقم واي وحدة تدق بكلمها .

1_ اسمح لي اخوي بس لا تقزرها على نفسك .

اهني الصبي عصب : شهالاسلوب ؟؟؟ شهالاسلوب ؟؟

اهي : شنو قلت شي غلط اخوي ؟؟ سبيتك ؟؟ قلت لك لا تقزرها على نفسك انت ولد ناس ومحترم عيب تحط نفسك بهالموقف ، أنا ما أرضى أخواني يغازلون بنات بالشارع وجدام خلق الله هم ما أرضاها عليك .

اهو : أقول حطي على المارينا اف ام حاطين موضوع عن المغازل يالله باي .



وراح



.....................................

@@

انا الي باط جبدي ان البنت تكلمت باحترام ورد عليها جذي عيل لو سابته شسوى ؟؟ الحمدلله والشكر ومن هالمنطلق بتكلم عن موضوع المغازل ..


الشباب تلقاهم تارسين السوق ووقت الاذان مايروحون المسجد .

شنو المفيد بالسوق غير المغازل والترقيم ؟؟؟

متى يجتمع الكويتيين من بدو وحضر وشيعة وسنة ؟؟؟؟


في السوق !!!! @@

شدعوة !!!! شنو ماكو شي مهم يا جماعة الخير ؟؟ لهالدرجة المغازل والسوق و24 ساعة بالافينيوز والمارينا على المغازل بس ؟؟؟


بتكلم من ناحية الشباب لأن البنات شي طبيعي حبهم للسوقة ... والهبات لووول

ضيع وقته بالتكشخ والتعطر ..

دق على واحد من ربعه مرني البيت خل نروح السوق الفلاني ...

رفيجه ضيع بنزين على روحته لبيته ..

والثاني هم كاشخ ...

ركبوا السيارة وطقوا طريج ومسرعين وسب بسيارات خلق الله ولا تحدني ولا احدك !!!! ونطرة فوق الساعة بالمصافط خو زحمة شفيكم اول مرة يروحون سوق !!!

ويلقون مصفط بالغصب وينزلون السوق وابتدي المغازل وآخر اليوم يشوفون حصيلتهم من الارقام !!!

شهالحياة الصعبة ؟؟؟؟:(










كيفهم بس مو ملل ؟؟؟






ـــــــــــــــــــــــــــــــــــــــــــــــــــــــــــــــــ



سؤال من العزيزة bunch of thoughts

تقول بسؤالها والي يبي يجاوب خل يجاوب :)


سؤال للشباب ... شنو تسوون لمن صج تعجبون ببنت ؟؟
@@
هذا اللنك حق الي يبي يجاوب
http://just-a-bunch-of-thoughts.blogspot.com/2009/04/how-does-kuwaiti-guy-show-he-likes-you.html


بجاوب لو كنت شاب لوووول : بصارحها باعجابي واقول حق كل اهلي لووول واسأل عنها واذا كانت خوش وحدة اتزوجها اذا كانت طموحة وابعد الشياطين لووووول اووووف والله لو كنت ريال جان كل البنات حبوني لوووووول




ـــــــــــــــــــــــــــــــــــــــــــــــــــــــــــــــــــــــــ



اليوم يت لي وحدة من رفيجاتي وقالت لي : سارو ابيج ترسمين لي رفيجتي واعطيج حقج ..

أنا : أي حق ؟؟!!!!

اهي : يعني اعطيج سعر الرسمة @@

أنا : شكو ؟؟ أول شي أنا ما أبيع رسوماتي ، ثانيا انتي رفيجتي عادي وثالث شي انا مو محتاجة فلوس .

اهي : سارووو انتي خبلة ؟؟؟ كلهم يبيعون رسوماتهم لا تصيرين هبلة .


هذي ثاني وحدة تقول لي جذي بعد أمي ...


مادري احب ارسم علشان الناس تشوف مو علشان ابيع فمادري انتو شرايكم ؟؟؟




ــــــــــــــــــــــــــــــــــــــــــــــــــــــ


همسة :

حق فزاع الهندسة : مو جذي تفشلني جدام خصمي ...بس هين والله أوريك وياويلك ان علقت على موضوعي هذا لووووول بس خل يوصل لك هالتهديد من مدونتي لووول

لزميلة في كلية العلوم

اهلها خذوا لاب توبها علشان تدرس وتقول لي كل يوم شنو نزلتي بمدونتج لوول أقول لها ، مدونة تخاريف موجودة لووول ودرسي ابرك من هالمدونة وعندج سويرة تخرع على راسج كل يوم بالكلية شتبين بعد ؟ لوووول






حدي مستانسة هالايام الحمدلله ادعوا لي عندي امتحانات لوووووول



ـــــــــــــــــــــــــــــــــــــــــــــــ



أحبكم وايد يا بعد خشمي والله

i love you all , after my nose wala












37 comments:

Yin مدام يقول...

لووول
طموحة إسم الله عليج طايرة حتى بالبوست

فريتي راسي
بس هم حلو

لو كل شاب يفكر بمقولة كما تدين تدان ويعرف إنها حقيقة ما فكر إنه يسوي نص السوالف اللي يسويها
ومو شرط بس الشباب الكل والله

وفي نقطة إحترام النفس
ليش يحط نفسه بموقف بايخ ويخلي أحد يغلط عليه ولا يهزأه شتسوى عليه
وشتسوى على أهله اللي إتعبوا عليه "هذا إذا كانوا خوش أهل"

والله يا سارونة إذا رسمج مثل ما يقولون خوش مصدر رزق جانبي :))))

بس ترى تفقدين الإبداع إذا كان بس للربح
:))


الله يوفقج في إمتحاناتج وكل شؤونج روحي يا سارة يا بنت أم سارة الله معاج


حبتج العافية
:))

a7mad Nabeel يقول...

نطالب بشطبج من عالم البلوجزززز
لتحيزج الصارخ لجهة بنات حواء
شدعوة ؟!
يعني كلنا صرنا مغالجية بالمارينا و مجمع الجادة (الافنيوز!) ؟؟؟
على الاقل احنا ما نقعد مع أذان الفجر عشان نحط مكياج !
و السبب للذي لا يعرف السبب هو ان ما يمديكم اذا بتحطون مكياج يبيلكم ساعتين قبل الدوام على ما تخلص العملية...

you opened the gates of helllll
it's war
p:

علي إسماعيل الشطي يقول...

مشكلتنا أختي العزيزة

هي التربية !!!

لا أكثر و لا أقل

تحياتي

غير معرف يقول...

والله شوفي طموحه
ولايهونو قراء تخاريفك الكرام

اولا قلتي جمله تنطبق على كل العرب سياسيا واجتماعيا وتخاريفيا وكركتاريا هههه
ما تطلع الا من عقلية انسان مو طموح وبس الا حكيم ومتبصر جدا
ما اقول الا الصدق
الجمله
متى اجتمع بدوي وحضري سني وشيعي وكلهم مستانسين وناسين مشاكلهم الا بالسوق

ثانيا المغازل وحشر الخلايق بالسوق مرض نفسي اولا واخيرا
بس المشكله
النمل مايجي الا على الدسم

والشباب لو يشوف عنز تكرمون حاطه ميك اب ولافه الطرحه تسدحو حولها من الاعجاب والمغازل مو كلهم طبعا

بيع الرسومات بيعيهم وعطيني حقهم ههههه

لاتبيعي خليها تعتك ويرتفع سعرها هههه
صدق امشي على مبادئك ماعليك من احد اذا ماتبي تبيعي لاتبيعي
لان اذا تعودتي على البيع حتى قيمتها الخاصة بك تقل بنظرك


وعلى البال ياساره
ومبروك مره ثاني
وبالتوفيق
خ د

TrueClue يقول...

مادري ليه متى المغازل منتشر بالكويت .. مشكله يهال عمرهم 14 و 15 قاموا يغازلون بإسم الحب ..
ولله الحب صار مهزله اذا واحد عمره 14 سنة و يسوي شعره سبايكي و يلبسلي لو ويست و يقولي انا احب .. ولله حاله ..

وبالنسبه للشخص الي غازل رفيجاتج هذا مو متربي لأنه مو كافي انه قعد يأذي بنات الناس .. حتى اسلوبه خايس مثل ويه . .

و انا اقولج بيعي رسماتج احسن .. راح تطلعين مبلغ زين :)

بالتوفيق ..

حياتي هدف مو عبث يقول...

لو أنا مكانهم ما أرد عليه وأحقره مهما سوه لأنه مرده بمل ويروح ..

سويرة رسميني وأعطيج حقج
:p

mo3ath يقول...

شنو القصد بالاعجاب ؟ شكل ؟ اسلوب ؟ بعدين على حسب الزمان والمكان والشخص :)

وهذا الي داش باخلاق البنات واهم ياكلون شكله يوعان ومعاه يطلب P:

بوفهد يقول...

هههههههههههه

سارونا ياحلو سوالفج :)

هالصبي المغازلجي مسكين !!!
ياحليله اخاف يوعان جان قطوا عليه نتفت صمونه خطية عابر سبيل !

او يمكن الاعانه خلصت ومستحي يقول ماعندي ربع دينار والا اشحقه اخذ دربه ومشه ؟

متفرغ هذا حده احد يغازل ناس يواعه لا وماقدرين مساكين يتحملون اجرام اليوع !!! لو انا منهم انزل واعضه :)

يوووووووااااعه من يلومهم !

Blog 3amty يقول...

المغازل أحد أهم الروابط اللي تجمع كل أطياف الشعب الكويتي على قلب واحد !!



@@

إمـرأة لا تُنسـى يقول...

بلوج عمتي، تعليقك موتني من الضحك!


اتفق مع اللي قال ان الدنيا "دين" كما تدين تدان، المصيبة انهم يدرون إبهالشي، يعني معقولة كلهم مخوخهم قفل؟

فـ اللي صاير إن هالمغازلجية تاخذهم العزة بالإثــم.. انا اغازل إذاً انا موجود، انا محبوب، انا.. أنا..

مو شرط نقول السبب هو التربية ونسكت..
لا.. بعد فيه شي اسمه ماكو وازع ديني، في شي اسمه تأثير الربع وخرابيطهم

أتوقع، لو كان الشاب "سنع" وتعجبه وحده ويقرر ان يبيها كزوجة، بكل تأكيد بيحاول يوصل لها بأكثر من طريقة بدون لا يتعرض لها.. يمكن يلحقها الى بيتهم، ياخذ رقم سيارتها ويطلع بياناتها عند اقرب رفيج يشتغل بالمرور.. وبعدين يكلم اهله.

وإذا تعذر عليه الطرق اللي فاتت، اكيد بيفاتحها بالموضوع بكل ادب واحترام بدون مغازل.

أذكر قصة وحدة مراهقة، تاخذ رفيجتها ويروحون السوق، تخصصهم التحرش بالرياييل المتزوجين اللي يكونون مع حريمهم. ولو نشوف تاريخ هالبنت بتلقين ان عندها فراغ عاطفي وأبوها مايدري عنها واخوانها بكوكب ثاني وكلن بصوب
.. بس هالبنت أخذت جزاها وأكثر لما وحدة من الحريم ارقعتها بالفازة على راسها وخلتها تخر دم في السوق!

Hussain.M يقول...

السلام عليكم ،
طموحة، أعتقد لو لم تجيب البنات على الولد لكان الوضع أفضل بكثير من إجابته على كلماته، فلو كانت الشابات الكريمات أكثر صبراً على بلوى هذا الإنسان المتعجرف لكانت إجابتهم أكثر حدة من أن يكلموه :)

إحترام الذات قضية كبيرة جداً، يُهان من لا يحترم نفسه.

violeta يقول...

لو انامنهم احقره وعطيه نظره خاايسه يكره فيها نفسه!

ومره انا وبنت خالتي قاعدين ناكل بالسياره ويه واحد اي شي يتحرش عاد اهي ما بقت حؤكه تلوع الجبد واهي تاكل ما سوتها !! فا صج ترا اهم يقزرونها على نفسهم لووول


وااااااااااي بوستج فيه وايد حجي مشالله مشالله ابي اثبت على شي واحد عفيه !!

:q

Ducati يقول...

لو انعجبت بوحده اسكت وما اسوي شي لما يجمعني موقف معاها واذا ما صار طاف

:) عايش هالحالة هالجم يوم


وتعالي انا توني ادري انج رسامه خو والله متعددة الهوايات ماشالله عليج

:)

والي يلق بنت بالشارع ما يعرف الأصول وما يستحي

fatto يقول...

اول شي مساء الخير :)

وثاني شي الله يوفقج ابدراستج :)شدي حيلج :)


وثالث شي موضوع المغازل ماراح يخلص .. بس انا من رايي ان الوحده اذا تحرش فيها واحد ماتكلمه لوشصير .. اذا بدت اترادده يعني اهي قاعده تعطي مجال حق السوالف .. وهو ماراح يحترمها وقط عليها حجي .

هذا كلام الشباب الي يصيرولي يعني هالكلام مومن عندي :) اهم يقولون مانحب الوحده تعطينه مجال ان انسولف معاها ( اتطيح من عينه )

وشكرا :)

طموحة مملوحة يقول...

Yin مدام


لووووول اسم الله على راسج من الفر ... اوووف ذكرتيني مكر مفر مقبل مدبر .. لووول

والله رسماتي للحين اشوفها عادية بس اهم شافوا رسمة الدكتور الي رسمتها يشابهه فيبوني ارسمهم لووول

طموحة مملوحة يقول...

a7mad Nabeel


لووووووووووول شفيك علي ؟؟


والله خل نكون صريحيين اغلب الشباب وين تلقاهم ؟

طموحة مملوحة يقول...

اخوي علي إسماعيل الشطي


انا اخالفك مو شرط التربية تلقى ناس كلها متدينييين وعندهم ولد مو نفسهم مو شرط

طموحة مملوحة يقول...

غير معرف


بعد خشمي والله

طموحة مملوحة يقول...

TrueClue


14 مو ياهل :p

لوووووووول الله يستر

طموحة مملوحة يقول...

حياتي هدف مو عبث


ساعات عند الشباب السكوت علامة الرضا

طموحة مملوحة يقول...

mo3ath


لوووول لا مثل الباباي شم الريحة ولحقهم لووول

طموحة مملوحة يقول...

بوفهد



خلصت الاعانة ؟؟ حتى انا خلصت اعانتي ...


بعد خشمي بوفهد والله كل ما احد غازل بقول له روح حق بوفهد

طموحة مملوحة يقول...

Blog 3amty



@@


يالهوي

طموحة مملوحة يقول...

إمـرأة لا تُنسـى




لافض فوهك :)

طموحة مملوحة يقول...

Hussain.M



على حسب في شباب لزقة والله ان سكتت البنت مسخوها ... ومشكلة اذا كان في فرق يعني في بنات اييون يغازلون يبين عليهم اهم الي يتحرشون في الشباب فليش يحطون ببالهم ان كل البنات يغازلون @@؟؟؟

طموحة مملوحة يقول...

violeta


ذكرتيني بموقف بس بيني وبينج :)

طموحة مملوحة يقول...

Ducati


كسرت خاطري والله :)

طموحة مملوحة يقول...

fatto



صح كلامج يالغالية :)

just a bunch of thoughts يقول...

الله ذاكرتني في بوست!!

thnx!

بس ليش ما حطيتي اللينك؟؟؟؟؟


اللي يبي يجاوب على سؤالي "شنو تسوي لمن صج تنعجب في بنية؟" بليييز يجاوب عليه في البوست المخصص له عقب ما يقراه، و لا تخترعون من البلوج لأنه بالانجليزي! كتبوا باللغة اللي تريحكم ..

هذا اللينك:

http://just-a-bunch-of-thoughts.blogspot.com/2009/04/how-does-kuwaiti-guy-show-he-likes-you.html

BrHoOoM يقول...

امممممم ..

الغلط من البنت لآنها حاجته لو ماعطته ويه بيذلف من نفسه ..

بس اهي اللي فتحت على نفسها الباب


سالفة لو اعجب في بنت امممممم ..

مابي اجاوب p:

just a bunch of thoughts يقول...

ويييه نسيت اعلق عالموضوع الاصلي ...

انا لا يمكن ارد على اشكال من هالنوع ... اذا حدة بطوا جبدي و ما ذلفوا من نفسهم انا احرك من مكاني ... و لا اطل بوييهم .. لأنهم مو كفو ينرد عليهم ..

اكره شي عندي المغازل )=<

بالنسبة للبنات، كان احسن لهم لو انهم حركوا ...


***

برهوم:

تقدر تدز لي ايميل اذا ما تبي تعلق جدام الكل ...
ان شاء الله ، اذا نشرت المقال ، راح استخدم اراءكم و تعليقاتكم الشخصية بدون أسماءكم ... مجرد الي تقولونه اهو اللي راح انشره بدون اسماء ... فما له داعي الاحراج لأن محد راح يدري منو اللي قال شنو ...
و بعدين الموضوع حده جدي ..

يهمني راي جميع المدونين الكويتيين و اتمنى التفاعل من الكل .. و انا متأكدة ان كل البنات الكويتيات مهتمات انهم يعرفون الاعجاب الحقيقي و ليس المزيف (المغازل) ..

BrHoOoM يقول...
أزال المؤلف هذا التعليق.
BrHoOoM يقول...

just a bunch of thoughts

اذا شفت بنت بمجمع راح يكون الاعجاب بالشكل "مع انه يفضل غض البصر :) " اما الاخلاق ومادري شنو يبيلهم وقت وللأسـف هالايام سهالات تصنع الاخلاق :) ..

الله يجعلنا من اللي يغضون البصر ويهدينا ويحسن اخلاقنا :) ..

دعاء ع السريع : " اللهم كما حسنت خـَلقي حسـن خـُلقي "

المهم :

اذا كانت متستره ومحترمه حالها اتمنى لها ان الله يوفقها بالزوج الصالح اللي يعوضـهـا بالايام اللي كانوا اللي بسنها يكلمون شباب وحب ويطلعون مع المدعو حبيبهم ويروحون ويتمشون ومكالمات صبح وليل ..

اذا كانت مو محترمه حالها
الله يهديها .. وراح يحوشها نصيبها من الطنازه والتحرش من الشباب والشياب اللي للأسـف هالايام مادري شفيهم ..


وبـس :) ..

طموحة مملوحة يقول...

ياجماعة الخير مشكورين على التجاوب

الحين احط اللنك بالموضوع من عيوني الثنتين ..

ابراهيم اشكرك على تفاعلك بس في شباب اذا سكتوا عنهم تمردوا وانا ماعندي مشكلة لو البنت ترد عليه باسلوب لبق يحترم نفسه ويمشي احسن من ما تزفه مثلا :p

just a bunch of thoughts يقول...

اول شي مشكورة طموحة على اضافة اللينك :)
(مشكورة وايد و سامحينا اذيناج P: )

ثانيا، مشكور اخوي برهوم على مشاركتك لكن اسمحلي اقول لك و لغيرك انكم ما فهمتوا السؤال عدل ... يمكن ضيعتوا شوي مع موضوع طموحة ... عالعموم، انتوا اقروا الموضوع اللي انا حطيته ببلوجي و راح تفهمون السؤال عدل ان شاء الله ...

***

معاذ: "شنو القصد بالاعجاب ؟ شكل ؟ اسلوب ؟ بعدين على حسب الزمان والمكان والشخص :)"

سوري نسيت ارد على تعليقك .. ارد و اكرر ما راح تفهمون المقصود من الاعجاب الا اذا قريتوا الموضوع ...

ناطرة تفاعل الجميع ...

طموحة مملوحة يقول...

زين حطي سؤال حق البنات خو :)


بعد خشمي سوري ولو انها متأخرة ولا اذية ولاحاجة شدعوة

just a bunch of thoughts يقول...

لوول احنا ما نقدر نعبر!
مجتمعنا يا حياتي يعتبر الحب عيب على الحريم!

بس ميخالف نحط سؤال ليش لأ؟ :)
يمكن يتشجعون الشباب ...