2009-04-15

كل ماسمعوا تحلطم قالوا هذي سارة :p



المفروض يكون البوست معصب شوي بس حطيت صورة ام علي علشان تمتص الغضب عندي :p

في يوم من الأيام رحت حق شركة من شركات الاتصالات في الكويت ولأن الشركات كلش كلش ما تبوق وتخاف الله بالناس وكلش ما تستغفل عزيزها العميل ... فكان لي حق من هالشركة نقعوني 4 شهور بدون اي رد ، وأخيرا داقين اختي دفعي فواتيرج الحين ، كان عندي خط فواتير باسم الوالدة وهم رفيجتي خطها بإسم أمي ، فرحت معاها حق الفرع الرئيسي علشان ندفع الفلوس ومرة وحدة نشوف هل راح يردون حقي من غلطة الموظف ام راح يقطوني على صخر ؟؟

دشيت مع صديقتي المبنى ولا في الاستقبال 3 موظفين يستعبطون على بعضهم الحمدلله والشكر قلت لواحد منهم :
انا : لو سمحت أخوي أنا ياية أدفع فواتيري وعندي موضوع مقدمة شكوى من قبل 4 شهور محد رد علي .
الموظف الخبل : الخط باسم منو ؟؟
انا : اهو خطين باسم الوالدة وهذي بطاقتها المدنية .
خذا البطاقة وقعد يقرا اسم الوالدة بصوت عالي ، أنا حدي تنرفزت ... جان يقول : هذي اختج ؟ ( عن رفيجتي )
أنا بعصبية : اي لو سمحت لا تضيع وقتي .
الموظف الخبل : هذي أمج وأمها ؟؟ حدكم ماتشابهون بعض وبعدين اسم الاب بالبطايق يختلف ؟
أنا : والله يختلف ما يختلف مو شغلك بتخلصنا ولا لأ ؟؟

اهو : أمج موجودة بالكويت ؟؟
أنا حدي عصبت شوي واطقه : شلون يعني ؟؟؟ بتفتح تحقيق ولا شنو ؟؟؟ شهالاسلوب الزبالة انتو منو حطكم هني ؟
صج ماتستحي على ويهك هات البطاقة خلصني انا الغلطانة ييت هني .
واحد من الموجودين : لو سمحتي هدي اعصابج رفيجنا هذا يحب يتغشمر .
أنا : نعم ؟؟!!! لفيش يعرفني ؟؟ أعرفه ؟؟ يتغشمر موعلي أنا زين؟؟ وبطاقة امي ماراح اخليها بايده !!
اهو :ماعليه البطاقة بتصير عندي مو عنده حاضرين انتي تامرين .
والموظف الخبل قاعد يتحلطم مالت على الي حطهم بس حسيت مسويين كاميرا خفية والله ، المهم رحت فوق علشان اشوف شسالفة الشكوى الي ماراح تخلص وأخيرا ، حقي ماراح يرد وحقهم بياخذونه كامل فقر ان شاء الله يصكهم وحدي خنقتني العبرة مسكت البجية يعني مو انا الغلطانة واهم يدرون وفوق هذا خلوني ادفع فلوس اهم الي حطوها براسي انا مالي دخل فيها .
وقلت لرفيجتي والله ان طلعت والمهرج الي بالرسبشن قال شي والله ابط راسه اطلع حرتي كلها فيه .
رفيجتي : سارووو شفيج خل يولون واهو خل يولي انا باخذ البطاقة منه ماعليج .
واحنا طالعين خذت البطاقة وانا مشيت يقول مشكورين ويعطيكم العافية وانا حقرت لأني ان رديت راح امسح فيه الأرض .





شهالبوقات ؟؟؟ المشكلة بالجرايد فاضحينهم وفوق هذا للحين يبوقون ..!!! بعرف شنو يعني هواية البوق صارت عند اغلب الشركات ولا شنو ؟؟؟



عزيزنا العميل ، شركة البوق ترحب بك .. فان كنت راغب في الاكمال معنا فأهلا وسهلا وان لم ترغب فالباب يوسع

جمل لن تؤثر على ميزانية الشركة ، مع ألف سلامة .. طووووط طوووووط طوووووط طووووووووووط





ـــــــــــــــــــــــــــــــــــــــــــــــــــــــــــــــــــــــــــــــــــــ

تصبحون على خير









43 comments:

طموحة مملوحة يقول...

هالبوست برعاية بلوق عمتي :)

Enter-Q8 يقول...

انا بس ودي اقوله ترضى اختك اسوي انا فيها جذي
اخ بس اخ

طموحة مملوحة يقول...

خالد


حرمت اروح مع بنت والله دايم اخواني معاي الحين لأن اذا ماوقفوهم رياييل انا اعرف شلون اوقفهم مو علشان بنت علبالهم هبلة وخوافة ... صج صج بط جبدي ولمن قلت حق موظفة اعرفها بالجامعة عن الموضوع قال لي غلطانة شكو رايحة هذاك المبنى معروفين يغازلون بالبنات .... امحق شركة امحق

فريج سعود يقول...

ما فهمت سالفتهم وياج واشلون ماخذين حقج

ممكن توضحين اكثر

بس بدون لا تعصبين

طموحة مملوحة يقول...

فريج سعود

اي تامر أمر ... طال عمرك انا حاطة خدمة ب8 دنانير والموظف قال لي اوكي وبندز لج مسج اذا خلصت ال8 دنانير المهم مادزوا مسج ولمن دقيت الا 40 دينار فوق فواتيري ، لوول لمن دقيت قالوا لي غلطة موظف واهو حاط لي ابو 20 دينار ولأني طولت صار 40 ولا مسج ولا هم يحزنون ... لووول ترا لي يومك هذا فواتيري اذا خلص اشتراكي مايدزون لي مسج يقولون ترا تعديتي الاشتراك .. .مادري شيبون يوصلون له .. وفوق هذا قالت لي الموظفة اسفة اختي الغلط غلطنا بس مانقدر نسوي لج اي شي لازم تدفعين الفلوس كاملة ...

إمـرأة لا تُنسـى يقول...

صباح العسل..،
مرة من المرات كنت رايحة البنك، وكان توه فرع جديد، رحت اسحب فلوس من داخل لأن مكاينهم ماتسمح انج تسحبين وايد.

دخلت وإلا لقيت موظف يستهبل بكلامه معاي، عاملته بنفسية شينة عشان يحس باللي قاعد يسويه، وما نفع..
آخر شي قال لي بعد تامرين على شي؟ قلت له سوالفك هذي ماراح تمر مرور الكرام، و لي زيارة ثانية اسحب فلوسي من البنك وأصك حساباتي. مشيت لأني كنت مستعيلة ووراي شغل... وهو اختى لو سمحتي تعالي نتفاهم!!! طنشته

دقيت على اخوي اللي يشتغل في نفس البنك وقلت له السالفة، إن أول مرة يمر علي موظف بنك مو محترم!

قام واتصل على مديرة الفرع وكلمها كلمتين صغار، خلاها تستدعي الموظف وتغسل شراعه عدل وهو يسمعها بالتليفون. قال لها يبه اتغشمر وإذا ازعلت اعتذر لها!! مادري ان كان الأخ ياي يشتغل في وظيفة وإلا ياي الفرع يقز؟!

SHAHAD يقول...

هدي اعصاابج ساارونة
انتي حااره عمرج وهو ما درى عن هوا داارج
تلقينه متعود على هالمواقف :/

وبعدين منو ما يشتكي من هالشركات :@
بس لا حيااة لمن تناادي
وحقج عند رب العالمين ما يضيع .. يشوفون يووم إن شااء الله

abu eldestor يقول...

مبين عليج مو زينه

طموحة مملوحة يقول...

إمـرأة لا تُنسـى

مالت زين تسوين فيه:)

طموحة مملوحة يقول...

SHAHAD



لا مو عن يعني مايبون يردون حقنا اوكي بس لا يعاملونا معاملة البهايم !!
ماكو شغل يوظفون مهرجين ؟

طموحة مملوحة يقول...

abu eldestor



الله يسامحك يعني تتوقع لو عطيته ويه وضحكت معاه بكون زينة ؟؟؟

أحمد الحيدر يقول...

والله صاجة ..

الله يعينج .. :)

{~المباركية~} يقول...

الله يعينج على ملاقتهم

بانوراما يقول...

ما ادري ليش حسيت

ان هالشركة اهي زين

elsha3er يقول...

والله العظيم انا لو مكانك لاكنت رزعته الم كنت فوقته من الغيبوبة اللى هو فيها

مشكلتنا ان مافيش حد بيراعى ربنا فى شغله


تحياتى بنت الكويت


احمد الشاعر

بوفهد يقول...

السارونا

قوه اشلونج ... عيل ام 4 دنانير الوحده؟ الدرزن اكيد عليه خصم :)

الله يزيد النعمه وياهالكشكول !!

هذه بدايتها وانا اقول لا الطموحة ثقة ... افا بس :) .

فصخي النظارة الناس ليل خرمس!

والي معاك بالوانيت الاحمر منهم الي بالكشكول؟؟؟؟؟؟

كبرياء انثى يقول...

هذيل تلقيت شعارهم بوق لا تخاف
والموظف دائما على حق والعميل كيفه

ما عليلج منه انتي اكبر من جذي

-mate يقول...

عيل طلعتي عصبية أكثر مني ياسارووونة

لا يحووووشج
:)

وإنتي من أهله،، فمالله

Barrak يقول...

هدي اعصابك


وانتي من اهله

صبا يقول...

بعد قلبي قلبج متروسه
:**

الله يقطعه عديم الذوق صج ما يستحي على ويهه ...لا تحرين نفسج ..هالاشكال ترا بكل مكان مو بس في زين ...اتشوفين الاملق ...عبيط يستخف دمه


لا تعورين قلبج ...

طموحة مملوحة يقول...

أحمد الحيدر


الله يعين كل من مر عند هالاثول لووووول

طموحة مملوحة يقول...

{~المباركية~}


والله زين ماقلبتها مصارعة :p

طموحة مملوحة يقول...

بانوراما



يا حلو ياوين مرني ولا تخليني ...

كسر الخواطر (شييييييييييييييييين )

لوووول

طموحة مملوحة يقول...

elsha3er


العلقة شوية بحقه واللهِ

مافيش فايدة فيهم والله :)

طموحة مملوحة يقول...

بوفهد


لا كل من على الوانيت عزابية بس مرت استاذنا قعدناها ويانا هذا وانيت العوانس لووووول ماكو احد فينا يبي يتزوج لوووول مو علشان لونه احمر لووول

طموحة مملوحة يقول...

كبرياء انثى


يوظفون الي مايستحون والناس العدلة مايبونهم ...

طموحة مملوحة يقول...

-mate

هذا عيبي :( عصبية ولسان طويل :)


مشكلتي مشكلة بس على حق يعني يغلط واسكت عنه :)

طموحة مملوحة يقول...

Barrak


أنا ليراكس الحين :)

طموحة مملوحة يقول...

صبا


ماعور قلبي كثر الفلوس الي راحت على الفاضي خو تعرفيني قاعدة على بنك لوووووول


مايراعون حتى المادية الي حايشة طلبة الجامعة

mo3ath يقول...

الله يعينج شي ينرفز

انا لو مالي خلقه اقدم فيه شكوى خل يتأدب شوي D:

طموحة مملوحة يقول...

معاذ


من صجك @@

هذول يقدسون موظفينهم مادري على شنو ؟؟؟ ماقول الا مالت احنا نقدم السي في مالنا ندور وظايف وهذول يوظفون مهرجين مالت ...

ولد الديرة يقول...

مشكلة بعض المؤسسات مثل شركات الإتصالات او البنوك انهم يعتقدون ان البشر لا يستطيعون الإستغناء عنهم ولهذا تجدين خدمة العملاء تسير من سيء إلى أسوء

يبه اشتكي عليهم عند وزارة التجارة والصناعة / حماية المستهلك

انصح بأن يكون معك رجل لأن المكان ذكوري بحت

يعني كلش كلش راح يستدعون شخص من الشركة ويطلعونه من دوامه وفي هذا على الأقل عزاء بسيط

تالي يفتحون محضر وإذا ثبت عليهم الحق راح يروح المحضر لجنة في وزارة التجارة ومن ثم إذا اجازته اللجنة راح يروح النيابة التجارية

ادري يبيلها مقاقة

لكن مو معقولة الكل يسكت

لازم يكون فيه شغل منظم

شغل مجاميع في كل منطقة :q

TrueClue يقول...

اي هذوله شركات الأتصالات ملوتنا .. و برا الكويت مرخصين اسعارهم و يعاملون العملاء عدل .. ليش ؟ لأنه الشعب الكويتي معطيهم ويه ..

و اذا بغينا احنا الناس العاديين نبطل شركة اتصال ما نقدر ليش ؟ لأنه راح يطقونا على راسنا و يقولونلنا عيب عليكم تنافسون الي اكبر منكم ..

يلله كل شي بالبركه ولله .. كل شي بالبركه :)
جان زين انا كنت موجود وقتها يا سارة .. جان عرفت شلون ابرد جبدج فيه :)

عثماني يقول...

و الله يا اخيتي هذول هيلق

و الهيلق ما عليهم شرهه

لا تعصبين

:)

طموحة مملوحة يقول...

ولد الديرة


عندي اخوان حدهم مالهم خلق ..

حدهم يالله دفعي وخلاص @@


منو له خلق يطالب ؟؟؟

طموحة مملوحة يقول...

TrueClue


بعد خشمي ماقصرت والله :)

طموحة مملوحة يقول...

عثماني


الهيلق مايقصون على الاوادم...:)

Engineera يقول...

يما حدج معصبه @!@

اخاف اعلق تكفخيني لوول ;q

هدي هدي .. وايد اشكال أرف تمر علينا يوميا لازم نستحمل ولا بننفجر :)

طموحة مملوحة يقول...

Engineera



لقيتي الي تمسك اعصابها توه ياني ايميل يبط جبدي بخليها هوشة والله الاسبوع الياي ... ماحب لمن اتعب واسوي شي وبالاخير والله سارة ماتسوي شي وماتشتغل انا اعلمهم ... اووووف ماقدر امسك نفسي والله شهالعصبية علقي قولي قولي لووووول

شوربة خضار يقول...

الله يعينك

طموحة مملوحة يقول...

ربنا يكون في عون الجميع :)


شكرا

المشوط يقول...

والله ناس ما تستحي الله يعينج

طموحة مملوحة يقول...

هلا والله بالمشوط شلونك؟؟؟


اي والله يبطون الخشم والله