2009-06-14

للشباب فقط :)



الكويت في شهر يونيو 2005


انتهت من حصتها الدراسية ، فجلست في الكافتيريا مع الفتيات ، شاردة الذهن تنتظر ساعة انتهاء الدوام ويأتي والدها لأخذها من المدرسة .
أتت زميلتها وجلست بجانبها ، فابتسمت لها ،

قالت زميلتها : سارة ، ليش سرحانة تفكرين بالحب ؟

سارة : لا أنا وين والحب وين ، افكر متى اتخرج من الثانوي وافتك لاعت جبدي على آخر مادة علوم واحس بثقلها مع انها سهلة بس الدوام غثيث من قلب.

زميلتها : لا !!!! يعني تبين ترقعينها ، ماتبين تقولين انج تحبين ؟؟

سارة : غصب اهي السالفة ، يبا كل واحد ونصيبه اذا ماحبيت ماراح اموت .

زميلتها : اوكي والي يقول لج تقدرين تحصلين الي تبينه ، انتي اشري على الي تبينه وايييلج مثل الخروف .

سارة : @@ نعم ..!!!!!

زميلتها : اي شاب يعجبج حتى ولو في الشارع اشري عليه واييلج مثل الخروف ،ويصير مجنونج!!

سارة : شلون؟ بالعصاة السحرية هههههههه .

زميلتها : ب20 دينار بس ، حسبالج ان الي يحبون الايام هذي حبهم عذري وشريف ؟ وحسبالج أنج بتأسرين أي شاب بجمالج فقط ؟؟ راح يستانس على جمالج وشكلج وبعدين ينساج ويهدج ، نعم شباب اليوم جذي ليش ما نخرفنهم ؟؟ ؟ أم ( ..... ) توها يت من سوريا وهي متخصصة في هذي المواضيع بس ب20 وايييلج الي تبينه مثل الخروف .

سارة : جربتي هالشي بنفسج انتي ؟


زميلتها : اي من زمان !!

سارة : عيل ليش ماظليتي على شاب واحد وتزوجج مادام صج هومثل الخروف عندج ؟

زميلتها : بصراحة كل ما حبني واحد وتعلق فيني وتقدم لي اشوف واحد احسن منه فاغير اتجاهي .


سارة : مو معقولة .. لا تخرعيني !!!! .

زميلتها : من صجج ؟ شتخافين منه ؟؟ عندها زباين شباب بعد يخرفنون البنات علبالج السحر بس الحريم الي يسوونه ؟




سارة : مابي ، ولا احب الخرفان ولا احب السحر ..!!


زميلتها : الكل يتعامل بالسحر اليوم ، ولا تنطرين بيوم من الايام ايييلج شاب ويحبج علشان نفسج ويقدرج ويحطج بعينه ، ماكو حب اليوم ياتلعبين او ب20 دينار خلي واحد يحبج مثل الخروف متى مابغيتيه يتزوجج اييي لج مع اهله وينفذ كل الي تبينه بالحرف الواحد .


سارة : استغفر الله صدمتيني بهالموضوع حسستيني قاعدين بباباي ، انا بطلع ابوي ناطرني برا مع السلامة .

زميلتها : كنت دارية الموضوع راح يزعجج، بس اذا بغيتي قولي لي قبل ماترد ديرتها .








نعم ربما زمننا هذا ينعدم فيه الحب الصادق

ربما أخطأت وربما لم تخطئ

ربما حتى بعد زواج الفتاة لا تستطيع حب زوجهها

ولا يستطيع هو ان يحبها

ربما كثر الفراق اليوم

وزادت قصص الحب والبحث عن البديل

كلها قصص متكررة في مجتمعنا


ولـــــــــــــــكن




أسفي على زمن جعل السحر يتحكم حتى في الحب

والضحك على عقول الشباب


لن أرضى بأن أوضع في كرسي من نار


بسبب 20 دينارا

وبسبب حب مسحور

مرحبا بِك يا وحدتي

ان كان الحب يولد بهذا الشكل ..











ـــــــــــــــــــــــــــــــــــــــــــــــــــــــــــــــــــــــــــــ


اهـــــــــــــــــداء


48 comments:

TrueClue يقول...

الحب موجود نعم .. و للحين فيه شباب اذا حبوا اخلصوا ..
لكن مرات الظروف تتدخل و تمنع الحبيب من حبيبته ..
او مرات الشخص قبل لا يحب ظروفه تمنعه من انه يحب الشخص الي جدامه فيذبل هالحب و يتحول حق حلم مستحيل يتحقق ..

السحر موجود و مذكور بالقرأن بس للأسف اذا استغلوه الناس بسبيل *الحب*

بو سعد يقول...

و الله غباء .. اخلي احد يحبني بسحر ؟

ليش ماكو شخصية ؟ ماكو مؤهلات بشرية ؟

والمصيبة الاكبر .. قال الله تعالى : ( و اتبعوا ما تتلو الشياطين على ملك سليمان و ما كفر سليمان ولكن الشياطين كفروا .. يعلمون الناس السحر و ما أنزل على الملكين ببابل هاروت و ماروت ، و ما يعلمان من أحد حتى يقولا إنما نحن فتنة فلا تكفر ) .. سورة البقرة آية 102

السحر كفر يا جماعة ..

ShaymoOona يقول...

الله يبعد عنا السحر ويحفظ اهلنا ورياييلنا
هذا اكبر شرك بالله
ديروا بالكم من هالسوالف ترا الي ايي بسهوله اروح ابسهوله

غير معرف يقول...

الحب سلاح فتاك :) مو اي شخص يقدر يستخدمه واستخدامه الخاطئ يمكن يسبب الوفاء للشخص الاخر ..
والحب بنسبه لي قنبله موقوته ممكن بأي لحظه تنفجر وتدمر حواليها..
ومن زمان واحنا نسمع قصص العشاق والحبيبه من عنتر وعبله ورميو وجوليت ومجنون ليلى .. منهم من نجح بحبه ومنهم من فشل ومات على حبه.
وانواع الحب كثيره بس في نوع واحد ناجح بينهم وهو حب لوجه الله فقط :) لا مصلح ولا فائده وهذا الحب اللي يعيش للابد ويستفيد منه الطرفين..
اما حب "صديقتج بالهده" فهذي لعبه وراح تنعكس عليها والله يعينها على بلواهاا

>وان لله وانه اليه راجعون<

فالانسان قبل الحب يكون شيء وبالحب يكون كل شيء وبعد الحب يكون ولا شيء


ونقطه اخيره .. القلب باب مقفول ومفتاحه حب صادق.. بس ساعات يتهيأ لنا انه الباب انفتح بس بالاخير يطلع حمل كاذب :(

أبو الدســتور يقول...

تخرفن ها

بشوف منو اللي تسحرني والله لشتري قناع محمد هايف و بعلمكم

قال تسحرون قال

:))

رزنامـــــة يقول...

استغرب على حجم العلم الموجود وارتفاع نسبه الثقافه بين الناس فان
الواعز الديني عندهم صفر على الشمال

معقولة في ناس ما تفكر باخرتها
وما تخاف من عقاب رب العالمين

لقد عد رسول الله صلى الله عليه وسلم الســحر على انه من المهلكات، فعن أبى هريرة، رضي الله عنه، عن النبي صلى الله عليه وسلم قال:
«اجتنبوا السبع الموبقات»، قالوا: يا رسول الله وما هن؟ قال:« الشرك بالله، والسحــر، وقتل النفس التي حرم الله إلا بالحق، وأكل الربا، وأكل مال اليتيم، والتولي يوم الزحف، وقذف المحصنات المؤمنات الغافلات»

اجتماعي يقول...

الحب اللي اهي قاعده تدوره رفيجتج ..
مامنه فايدة .. ولا إييب نتيجة

غير عوار القلب .. وعذاب النار !!

أقول .. يا حلو حب الزوجة ..
بس خل نتزوج أول :)

violeta يقول...

ليش توصل بالبنيه او الصبي انهم يلجئون حق السحر علشان ينحبوون !!؟؟

ماعندهم هدف بحياتهم غير اني اخلي واحد خاتم بصبعي واللي ابيه ايلي !! ترا هالشي عمره مايخلي الواحد مرتاح بحياته !!

شفايده عندي زوج لا يسمع ولا يتكلم الا باللي انا ابيه !!
استغفر الله

ترا والله لي الحين في ناس لي حبوا حبوا صح بس تلقين ظروفهم ماتسمحلهم او اهلهم او اي سبب اهم يوقفون عنده

3bady يقول...

و الي يجرح اكثر من جذي انه فيه بنات وصلت فيهم المواصيل اذا يبون واحد مو معطينهم ويه يستخدمون هالسوالف

للاسف سمعت سوالف عن هالشغلات و انصدمت من التخلف الي وصلنا له...

Jako يقول...

أول شي الصورة عجيبببببببببة

ثاني شي الحب موجود موجود موجود

من غير هل راح يكون في إبداع؟؟؟
لا الشاعر يبدع والفنان يبدع ولا ولا...إلخ

الموضوع وايد عجبني :)

ReLaaaX يقول...

looooooooooooo


امبيه مادري ليش يتني الضحكه!الموضوع يخرع بس والله مادري شاللي ياني


@@؟


هذي ام 20 الحين متزوجه ؟ ومعاها خروفها اللي نقته ؟


لا جد يعني شلون تعيش مع انسان موطبيعي !
لأن السحر يخلي الانسان مثل المينون مو على طبيعته !
شغلات يسويها بسبب السحر خلته جذي !


فشلون عندها عادي ؟



هالسحورة منتشرة بشكل يخرع :/ وبس انقمت قلبي والله

طموحة مملوحة يقول...

TrueClue


اشكرك على تعليقك أحمد :)

طموحة مملوحة يقول...

بو سعد


القرآن والسنة النوية أجمعت على ان السحر حرام حرام حرام ... بس وايد ناس يحللون من كيف أمهم .. والي يقول لك السحر الي يجمع الناس بين بعضها زين

استغفر الله العظيم واتوب اليه

طموحة مملوحة يقول...

ShaymoOona


من صجج؟ من قلب بسهولة وصدفة بعد لوووول :)

طموحة مملوحة يقول...

غير معرف

لا موصديقتي هذيي ، هذي ماخذة معاي نفس المادة بس :)

وصح لسانك بالي قلته والله

طموحة مملوحة يقول...

أبو الدســتور


لووووول على ردك هذا تحسسني جن وايد بنات متحلفين فيك وانت واقف ناطر لوووووول

طموحة مملوحة يقول...

رزنامـــــة



هذا اهو ضعف الوازع الديني بالفعل .. فوين الناس عنهم ؟ انت شفت الي بالتلفزيون ؟ للحين يطلعون ؟ والي يقول لك شسم امك وشسم امها ومادري شنو ؟؟ استغفر الله

طموحة مملوحة يقول...

اجتماعي



ماعتقد على كلامها هذا انها تبي حب اهي الظاهر جربت مرة وياز لها فقامت تلعب ....


لووووول يالله الله يوفجك يارب وتعزم جميع المدونين على عرسك ، عسى االله يكتب لك الزوجة الصالحة يارب .

طموحة مملوحة يقول...

violeta


اي والله صح ترا ملل اذا الوحدة تزوجت واحد مثل الخروف عندها ، تذكرت وحدة م رفيجاتي تقول لي زوجي ولا مرة قال لي لا بعد فترة قمت اقول له تكفة زفني قول لي لا تطلعين لوووووول

طموحة مملوحة يقول...

3bady



اشوة يعني مو بس انا الي مرت علي هالسالفة

طموحة مملوحة يقول...

Jako



صحيح صحيح صحيح لووووول


اكيد بس تبي تقولل لي كل شاعر يكتب في الحب يعني يحب لووووول؟

طموحة مملوحة يقول...

ReLaaaX


حسيت بردج انج تضحكين ومخترعة بنفس الوقت لووووول



والله مادري عنها من هاليومبن ماشفتها الحمدلله لوووول شوفي التاريخ شخباري كنت بالثانوية لوول

غير معرف يقول...

اعووووذ بالله واااي تخرع هذي من صجها معقوله في ناس جذي ؟
و بعدين شلون تعيش و الله مو موفقها بايعه دينها و اخرتها عشان هالسوالف
استغفر الله الله يهديهم هالاشكال
و بعدين شسالفه الخروف هذي اتزوج واحد يصير تابع لي ؟ ويع ما راح احترمه اصلن اذا ماكان عنده شخصيه حلاته نتناجر بين الفينه و الاخرى لوول
خووش موضوع من زمان ما طليت على المدونه و موفقه بالامتحانات خيتو
بنت جبله

iCoNzZz يقول...

آنا الصراحة عجبتني صورة الساحرة p;
حلو تصلح مشروع تخريع عيايز ..

موضوعج والله الحين صار أزود من جذيه الله يستر على بناتنا وخواتنا وشبابنا بعد لا يطيحون بمثل هالفخ .

virgin يقول...

زميلتج تخرع :s

شدعوه لي هل درجه وصلت حالة البنات , ناس ما دري شلون صايره , واله حاله أدور الحب بالسحر ..!!

بوستج يخرع !

Q8EL5AIR يقول...

الله يكافينه الشر ..

وانا اشوف الشباب مطقوقين على راسهم باسم الحب ..

مساكين لا حالة صحية زينة ولا حالة مالية يعول عليه :)

شرايج بيعول .. لووووووووووول :)





وتحياتي ..
ويسلمواااااااااااااا :)

thespanian يقول...

زين سؤال .. الحين الصورتين اللي حاطتهم بالبوست ملوت العجائز الشمطاء .. يعني اللي فوق تسحر واللي تحت تفك السحر ولا شنو موضوعهم!!!!

عاد والله وايد سمعت عن هالسوالف .. وعند الشباب يقولج خواتم من عمان .. وعلى خمسه مو عشرين .. واللي يبي حوليه على بلوقي وانا انصحه انه مايجوز يشتري هالسوالف بس بعد ما ابيعله خاتمين :p

طموحة مملوحة يقول...

بنت جبلة


اي والله حلاته فناقر وطق مطاقق مو يصير اهو الخروف عند المرة ولا اهي تصير خروفة عنده ....

حلات كل شي بطبيعة الخالق ...

فديتج يالغالية مشكورة

طموحة مملوحة يقول...

iCoNzZz



الله يستر على الجميع والله

والله مادري دورت على صورةساحرة حلوة مزيونة ماكو لووول


صج دام السحرة ياخذون فلوس وبلاوي من ورا الناس ليش ما يسووون عمليات تجميل ولا يصيرون مزايين من السحر ؟؟ لووووول يعني شيفة ويع يقصون علينا بالافلام الاجنبية يحطون ساحرة مزيونة آل يعلمون الناس السحر استغفر الله

طموحة مملوحة يقول...

virgin



صج يخرع ؟؟ شوفي أنا وحدة من الناس صج عمري 21 سنة بس والله شفت هوايل لو اكتب لج شنو صادفت بعد ترا هذا ولا شي والله وهذي ضريبة الانسان الاجتماعي لووول

طموحة مملوحة يقول...

Q8EL5AIR



يعول .... غرد يا عزيزي غرد

يعول من الهوايل مالم يعول لوووول


والله بعد تركيبي للمواضيع الي تصير بالمجتمع لوووول وسوي نفس بوخرشد انا مزجت لوووول مزجت بين الموضوعين شفت حتى الشياب موصاحييين صايرين جنهم شباب غصب يضبطون لووول

شهالمجتمع الفاضي؟

طموحة مملوحة يقول...

thespanian


لووووول السؤالين جدا وجيزين لووول


اجابة السؤال الأول .. مادري والله الصورة الثانية كانت صغيرة فقلت ياربي اخليها اهي اول شي ولا لا ... واهي صورة باباي حلو والله والصورة الاولى مادري قلت خل احطها شوي اسوي حركة لوووول




وعلى طاري الخواتم أعرف وحدة كانت قريبة جدا جدا جدا مني والله وحبت شخص كلش ماكنت مرتاحة منه ففي يوم من الايام قالت لي سارة عطاني خاتم وقال لي خليه معاج هذا يسوي لج الي تبينه ؟؟ قلت لها الله يعني يطلع منه المارد اييب لي الماس وكل شي اطلبه ؟ المهم على بالي خاتم عادي شفته الخاتم يخرع عليه كلام مادري شلون صاير أنا اخترعت والله بس ماقلت لها شي ، ورحت سألت قالوا لي ان شعوذة ومن هالكلام فخذيته بدون ماتدري على اساس اوديه حق شيخ ، المهم البنت لمن مالقت الخاتم قعدت تصرخ علي انتي ماخذته وانتي .... سب ..سب ...سب ... سب لدرجة وصلت انها مدت ايدها علي والله .. البنت لا قامت تصلي ولا تقرأ قرآن وطول الليل تبجي انا من قلب اخترعت فوديت الخاتم حق شيخ والحمدلله البنت ردت لعافيتها وردت تصلي وردت طبيعية ، عاد الحقير قعد يزفها وين الخاتم وطلعيه .. بس كلمتين مني خلته يولي ...


يلعبون بعقول الشباب حسبي الله ونعم والوكيل فيهم

SHAHAD يقول...

اقوول الله يحفظنااا بس
اخاف باجر واحد ينعجب فيني وما اعطيه ويه يروح يخرفني بالسحر لوووول

طموحة مملوحة يقول...

شهود


كلش ما اتخيلج خروفة لوووول ماااااااااااااااااااااااع ههههههه

thespanian يقول...

اي خوش بباي اذكره .. جنه كان عنابه !!

والله الله عداها الشر رفيجتج .. وحمدالله على سلامتها .. شسمه اللي معطيها الخاتم اخاف شاريه مني :p

اخاف شاريه من الدفعه الاولى اللي وصلتني كانت مغشوشه .. تخرفن الاوادم و تخليهم يبنبعون !!

زين متى تعطينا رقم وحده من هالعيايز؟! .. خنشوف حالنا :p

عاد اقولج سالفه .. مره ياني واحد من ربعي بالدوام وعطاني خاتم .. قالي طلبتك .. لبسه اسبوع ورده لي !!

بس على شرط .. لا تدخل في الحمام وانتي بكرامه .. ويوم الخميس حطه تحت مخدتك ونام .. واذا حلمت .. قولي شنو حلمك !!

انا قتله الخاتم هذا مال شنو بالضبط؟!! .. لان ادري الشباب عندهم حق كل شي خاتم .. قالي ماعليك .. لبسه ومالك شغل !!

عاد لبسته وبعدين .... كملي القصه لما انزلها ببلوقي :p <- نحيس صح؟؟ .. محد قالج ليش ما حطيتي ارقام العيايز !!

طز بالرجالة يقول...

الخرفان يفيدون في العيد الكبير

و اسعععععا ...خد لك صورة ستة بتسعة

Hashimoto يقول...

اخر اساليب التخرفن

لول

اهم شي يوبابا باخر الموضوع

طموحة مملوحة يقول...

thespanian


لا موعنابة هذا باباي يديد اجنبي ماذكر اسمه بس كان حلو ...


ورفيجتي انا انصدمت لأنها كنت ملتزمة وماعندها سوالف فماتوقعت هالشي بيصير لها بس الحمدلله ..

لووووول ردك ضحكني والله ماعندي رقمها ولا ريدها ولاريد جيتها لووووول


عاد كمل السالفة تقولي بلوق ويمكن تحطه بعد سنة اكون ناسية الموضوع

طموحة مملوحة يقول...

طز بالرجالة



شكلج رحتي سوق الخرفان والله خوش سوق يونس لووووول .... تعرفني شلون يعرفون عمر الخروف ؟؟؟


يابنتي ماحب سيرة المتخرفنين لووول

طموحة مملوحة يقول...

Hashimoto

تعرف هالباباي ؟؟ شسمه ؟؟ لأن ودي اييبه بشوفه حلو ...

آخر اساليبا التخرفن ؟؟ والله مادري اذا كان آخر الاساليب لأن كان ب2005 لوووول مادري الحين شلون بس وايد اسمع عن المتخرفنين من شباب وبنات اليوم لووول

Mind Call يقول...

بكل مجتمع فيه المتعلم وفيه المتخلف نعليميا وعقليا ودينيا بعد

والشغلات هذي مو جديدة من زمان معروفه وانا بنفسي قاعد بقهوة واحد يحوس بالقهوة يبيع خواتم حظ والشباب يشترون منه

بالكويت ترى

الله يبعدنا عن هالمصيبة وبلا حب بلا خرابيط

تسلمين على البوست المميز

طموحة مملوحة يقول...

Mind Call


يالهوي عيل قصة علاء الدين صجية لووووووول والله علاء الدين طلع مو شي ههههههههههه تزوج حبيبته الأميرة بالسحر لووووووووووووووول

حدس + سلف = الاصلاح وتطبيق الشريعه الاسلاميه يقول...

مشكله اللي على الزواج بالحب
او يجي بالسحر

Hashimoto يقول...

اسمه
Spirited Away

وفي واحد ايدد منه اسمه
Howl's Moving Castle

هم لااااازم تشوفينه
=)

حَافِـيَةُ الَقَدمَيّـنْ ولِبَاسِي المَطـرْ يقول...

عسانا ما حبينا ولا تزوجنا
مدام هالسالفه مبنيه عالسحر !!
كنت معتقده إن هالشي نادر بالكويت
بس ياخوفي هالندره ! تتحول حق إكتفاء ذاتي , ولو إنها تحولت وخلصت
الله يكفينا شر هالأوادم

طموحة مملوحة يقول...

اخوي حدسي


اي والله مشكلة

طموحة مملوحة يقول...

Hashimoto


يعطيك العافية اخلص امتحاناتي واشوفه ان شاء الله مشكور وايد

طموحة مملوحة يقول...

حَافِـيَةُ الَقَدمَيّـنْ ولِبَاسِي المَطـرْ


شوفي اهم وايد والله بس هم بنفس الوقت الناس الي تخاف ربها وايد بعد

الله يحفطنا