2009-06-10

KISR

أكثر المتخصصين في المجالات العلمية وفي المرحلة الجامعية يعرفون عن الدورات الي يقيمها معهد الكويت للأبحاث العلمية KISR
Kuwait Institute For Scientific Research



أذكر لمن كنت بالمدرسة وشفت بوستر الاعلان حق الدورات ، قعدت أسجل الشروط وحدي متشققة من الوناسة اخييي معهد الأبحاث أحلا مكان رحت له لمن كنت اسوي أبحاثي حق مسابقات المواد العلمية في المدارس ، رحت البيت وطلعت لي ورقة كشخة جني سيلانية بتكتب رسالة حب حق ريلها ، وقعدت اكتب ليش أبي أدش الدورات وطموحاتي العلمية كتبت قصة حياتي كلها لوووول ، وبالمقابلة ضحكوا علي ليش متعبة حالج على هالورقة معدلج اهو الي راح يسمح لج تدشين الدورات .





وأذكر بنت خالتي كانت معاي بعد ، وانقبلت في تخصص التمريض ، وحدي كنت مأيسة شنو تمريض؟ شبي بالتمريض أنا لوووول ، لا وكان مدير الدورة الله يذكره بالخير الدكتور : هاني الزلزلة ، كان يجاملني ماعليه تمريض تصيرين ملاك الرحمة ، فتخيلت نفسي كلش مو لايق ملاك ، انا عطوني مشرط اشر اطلع دم وأنا اضحك بهستيريا ، أما ملاك رحمة ؟؟ كلش مولايق .





المهم ، كانت الدورة هذي تعتمد على محاضرات من جميع النواحي ، أحياء ، تمريض ، طيران ، هندسة كمبيوتر ،ما أذكر شنو كان في بعد بس كانوا يعطونا دورات انجليزي مع كل محاضرات ، يعني اذكر والله اعلم كان 4 محاضرات باليوم ، بعدين نطلع من المعهد كل واحد يروح التخصص الي اهو فيه واذكر كنا نروح معهد التمريض وخلوا معهد التمريض على صوب كنت اروح هناك لايعة خشمي من قلب يعني ماشاء الله شكل المعهد يفتح النفس :) بس بصراحة استفدت وايد صج صج والله ، نسيت أقول ان كان كل اثنين نروح رحلة ميدانية .



المحاضرات الي كانوا يعطونا اياها والي أذكر منها فقط : الدفاع المدني ، الخريطة الذهنية والقراءة السريعة ، أحياء ، اسعافات اولية ، هندسة طيران ، مرض الايدز ، التغذية ،بيئة الكويت البحرية ،السمنة :q ، الزراعة في المناطق القاحلة ..... الخ


الموضوع الي عجبني أكثر وهو موضوع الزراعة وشلون استغلوا تربة الكويت الي كانت متلوثة من الغزو العراقي وخلوها صالحة للزراعة ..... راح أذكر هالموضوع مستقبلاً.






أتوقع الي كانوا بنفس دورتي 26 راح يعرفوني من جملة (( شعبان رمضان شوال )) لووووول ولحسن الحظ ولأني سارة أم الفال كانت دفعتنا الوحيدة الي صارت حفلها الختامي بفندق مريديان ، لأننا على قولتهم دفعة متميزة :)
















أشكر جميع القائمين على هذي الدورات الي مهدت لي المجال للحياة الجامعية بصراحة وأدعو كل طلبة الثانوية والجامعة بالمشاركة في الدورات اذا كانت عندهم فرصة لأن راح يستفيدون منها في حياتهم الدراسية وحياتهم العملية :) .








السنة الي وراها علطول دشيت الدورة الثانية لمعهد الأبحاث بس هالمرة مع شقيقاتي :) ، كانت هذي الدورة مختلفة لأنها تضم جميع الاعمار حتى ربات المنزل وتعرفت على حريم شكثر وناسة لووووول ، كانت الدورة متخصصة للماء فقط ، بس كانت في محاضرات مختلفة تتكلم عن غير الماء ، وكان مدير الدورة : الدكتور عدنان أكبر ، والمهندس محمد صفر ، والمهندسة ليلى العوضي .

أعتذر لهم بدل المرة ألف لأني كنت وايد شيطانة وقتها ، وكان يسميني الدكتور سارة تسكع ، لأن كنت لمن امل من المحاضرات اطلع اتسكع بالمعهد وأرد ، فاذا راحوا وراي الطلبة يتسكعون يقول الدكتور : كله من سارة . لوووووووووووول


كانت في رحلات بالدورة رحنا متحف الكويت ، والمركز العلمي ، وصالة التزلج ، ومتحف سيد رجب (( مو طبيعي )) رحنا مصانع وناسة لوووول مصنع الروضتين اعتقد مادري ابراح ماذكر المهم الي اذكره ان شكل بطل الماي قبل ما يتفخونه بالهوا لوووول جذي صاير



خذيت واحد للذكرى لووووول ، ورحنا مصنع المعلبات .

أشكرهم جزيل الشكر على هالدورات الي استفدنا منها بكل صراحة . والمواقف الي تضحك الي ماملينا منها بكل صراحة .
أذكر حتى بآخر يوم كانت في مواقف تضحك ، أذكر وحدة منهم أن كانوا حاطين صور المشاركين والمشاركات بالدورة واهم صغار ، فكانت لي عدة صور وانا صغيرة والدكتور اهو الي يختارهم ، طبعا الصور امي الي منقيتهم لووول ، طلعت بيوم الحفل ابي الي كلمتي كلمة الحفل ، ولا اشوف الناس تضحك ، ياربي يسكتون شوي بعدين يضحكون ، لمن لفيت ويهي ولا صورتي شكبرها وانا قاعدة على الارض بالحوش وأبجي ومسوية قرنين بشعري ، ويهي قلب ألوان وعيوني صارت @@ ولا حاطين اسمي شكبره على الصورة ... وافضيحتاه لووووووول


كنا نسوي قروبات نسميها وكل يوم الدكتور يسألنا عدة اسئلة والي يجاوب صح تزيد في حصالته لووووول أذكر قروبنا فزنا ب30 دينار لووول وكان المنافس لنا الزميل الله يذكره بالخير (( يوسف بوحمد )) يدرس الحين طب أسنان بأمريكا ، أتمنى له كل التوفيق يارب ، وأحيي والدته الي طقيتها صحبة وياها من النساء الي اقدر أقول عنها مبدعة بمعنى الكلمة ، تلقائية وحضور ، و نقاش كانت رائعة جدا والله ، وأشكر كذلك صديقتي سارة الكندري تدرس الحين هندسة :)، وأشكر صديقتي ايمان العوضي ، سمعت أنها بتتزوج ولا قالت لي لووووول هذا واهي معاي بالوسط بس مايخالف الناس وظروفها ، اشكر أمول العوضي وهم هنيتها الرقيب أول ، اقعد بقحص جدامها بعدين ، اشكر كل صديقاتي العزيزات وزملائي ، الي في منهم سافر برا الكويت يكمل دراسته والي موجودين وللحين على اتصال معاي ، اوووف نسيت تهاني الغريب ان شاء الله ماتطقني هالبنت وصولية والله وانا مافيني خير كله اهي الي تدق وتسأل ، شوفي بعد جدام كل القراء اعترفت انج احسن مني لوووووول ، واقدم شكري لأم ايمان رفيجتي ياحلوها كانت تقول لرفيجتي : خليج تكانة مثل سارة !!!
فتضحك رفيجتي . آل تكانة آل لوووووول
واشكر زميلي محمد المطوع الحين يدرس معاي بالعلوم ، كنا مسويين محاضرة عن اسماك الكويت والشعاب المرجانية ، وكان يشرح اسامي الأسماك ووقف على سمكة اسمها (( مطوع )) كنت حاطتها مفاجأة لوووووول .
وعلشان ناسية اغلب الاسامي (( ان شاء الله ماتمسك علينا يابوسعد لوووول )) اعذروني .




أشكرهم جزيل الشكر وعمري ماراح انسى هالايام الحلوة والله .
اذكر قبل جم كورس كان عندي موضوع ورحت مع زميلاتي وزملائي لمعهد الأبحاث علشان ندور على مصادر معلومات وشافني دكتور عدنان جان يقول : سارة تسكع ؟؟!!!!! شتسوييين هني ؟؟ لووووووول ضحكوا علي يومها .

مايخالف ان طحت على مدونتي يا دكتور عدنان فأقدم لك شكري وتحياتي لك واعتذر لك على شطانتي كنت بفترة مراهقة مايخالف عديها لوووول كل الشكر الجزيل لك .












ـــــــــــــــــــــــــــــــــــــــــــــــــــــــــــــــــــــــــــ



فصلة البوست :

دايم مدونة فريج سعود ومدونة خالد العتيبي يتطنزون على الفصلات الي بمواضيعي فأكتب موضوع وبالأخير احط شغلة كلش مالها دخل بالموضوع ، معلشِ أصل دي الطريئة بتعتي علشان أغير الموضوع علشان مايملوش لووووول



فصلتي اليوم

في يوم من الأيام بجامعة الكويت ، كنت رايحة اخذ اغراضي من اللوكر بتاعي ، واللوكر بتاعي من كثر ما أنا (( قزمة )) لازم اقعد بالارض وابطله ، المهم بطلت اللوكر ولا صرصور جدامي طق لي تحية ، جان اقول :
شنو يعني علبالك بقول وااااي سرسور وأخاف وانحاش مثل البنات يعني ؟؟ يالله تت يالله .



المهم أنا كنت حدي متنرفزة يومها فمروا بنات وكلهم يطالعوني علامات تعجب ، جان اقول لهم : صرصور عبيط داخل لوكري تصدقوون !! ضحكوا ومشوا اكيد قالوا شهالمخرفة ماعليه .


المهم رحت شفت لي لوكر خربان مكانه فوق يناسب طولي لوووول يبت المادري شيسمونه المهم الي يسوي الخشب وعدل لي اياه ويبت قفل وقعدت احط القفل ودرنفيس ومعرفش ايه .. ورفيجاتي يصوروني وانا قاعدة اطق واشيل واحط وبالاخير زينته وبصوره لكم فيما بعد وعطوني رايكم فيه لووووول .



فتكوا بعافية :)

24 comments:

thespanian يقول...

مممممم .. والله توني ادري عن دورات معهد الكويت .. شكلها وناسه!!

عاد في حق شياب ولا بس ثانويه وشباب؟!

طموحة مملوحة يقول...

thespanian



الدورات حق الكل ... طلاب وطالبات

ثانوية سنة ثانية وثالثة وجامعة بعد سنة ثانية وثالثة

violeta يقول...

شكلها حلووه الدورات

ماكنت ادري !!

وعلى طاري ال"سرسوور" :q احلا شي لما اسوي روحي بطله عليه جدام اللي يخافون منه لوووووووول

طموحة مملوحة يقول...

violeta


لوووووول اي وخاصة مع حشرة هبلة مثل ال (( سرسووووور )) شقد غبي .. انا لو اقول لج مواقفي معاهم تضحكين بس آخذه على قد عقله والله لوووول

بو سعد يقول...

الله يسامحج .. ليش ناسية "الاسلامي" ؟

P:

طموحة مملوحة يقول...

بوسعد


لووووول والله انا مسلمة لوووول


مايخالف ساعات تيينا عرات زمان الجاهلية لووووول

Sn3a يقول...

انا من الثانويه للحين محتره ليش مادشيت الدوره:(
وايد من رفيجاتي دشوها واستانسو واستفادو
الا انا
ومن اشوف طلبه الدوره بالكليه انقهر ;p
واتحلطم لما ياخذون اللاب
مع ان لابتوبي معاي بس كيفي


بطل الماي يشوق
لووول
زين سويتي خذيتي واحد


ترا انا وايد احب بوستاتج
بس من صج من صج انسى اكتب كومنت
مو لعانه

وفصلاتج تونس
يسلمو عالبوست الحلو

Jako يقول...

لمن قريت ( ملاك الرحمة) تذكرت المرحومة حبابة الكويت (مريم الغضبان) الي بدت حياتها ممرضة، للأسف مرت ذكرى وفاتها هالأسبوع من غير أي إهتمام :(

طموحة مملوحة يقول...

Sn3a

سنعة فديتج دوري لج واسطة واشتغلي بمعهد الابحاث والله مكان راقي والناس الي فيها يحترمون شغلهم وايد مو نفس الجهات الحكومية يطقون لج كرت وانتي مكبرة المخدة .


فديتنج والله يالغالية على كلامج الطيب ... كتكوتي انتي شوفي كل ماشفنا طلبة ثانوية يايين الجامعة نطقهم ليش سنعة مادشت الدورة افا عليج بس

طموحة مملوحة يقول...

Jako


عسى الله يرحمها ... والله انا اقول نترحم على الميت بكل وقت مو بتاريخ وفاته عدل؟

SHAHAD يقول...

احم احم
ادري اني غباار
بس ولهااانه علييج كثر الدنيااا
وقلت اسلم عليييج يالغالية :)))

حلم جميل بوطن أفضل يقول...

بوستك هذا ينفع حق برنامج حياكم الله

4 يقول...

سارون من الثنوية هذا انتي ماتغيرتي

اذكرج ايام الثنوية بوقت المعهد كنتي حيل مشتطه وحابته ...

عقبال ما انتي تديرينه

طموحة مملوحة يقول...

SHAHAD



@@ شهود ؟؟؟


شلونج ؟؟؟ امبي والله العظيم ومابي احلف وايد اني دايم أسأل نفسي عنج لأني ماعرف أحد يعرفج لوووول اقول وينها ؟؟؟ من طول الغيبات شياب ؟؟

شخبارج ..؟؟ لا انتي مو غبار انتي دايم متجددة يالغالية :)

طموحة مملوحة يقول...

حلم جميل بوطن أفضل



ماعرف هالبرنامج والله بس مو مشكلة اعرضه افا عليك لووول

طموحة مملوحة يقول...

4




اخييييي شوقتيني ودي اعرف منو انتي ؟ لوووول

Jako يقول...

تظل للتاريخ رمزيته

على هالمعيار عيل مافي داعي نحتفل بيوم التحرير لأن كل أيامنا من 26فبراير91 تحرير بتحرير :)

الرمزية تترك بصمة

Q80 Blogger يقول...

انا كنت بال25

واخوي وريثي هالسنه


والله ايام تضحك

4 يقول...

كنت الوحيده الي من دفعة 2003 بالاذاعه

وشفتج العام بالرازي تزورين وحده

اذكرج انا متحفظة شوي

لو احصل ايميلج اقولج انا منو

طموحة مملوحة يقول...

jako



العيد الوطني يختلف عن ذكرى وفاة شخص ما ...


وجهة نظرك وعلى عيني وراسي والله

اشكرك

طموحة مملوحة يقول...

Q80 Blogger



وناسة شنو كان تخصصك ؟

طموحة مملوحة يقول...

4




اووووووف تدرين والله العظيم مادري ليش طريتي على بالي وايد لووووووول


بعد خشمي عرفتج شلونج ؟

شخبارج ؟ ؟


فديتج والله ... على طاري الي زرناها عرسها شعر 7 بتييين واشوفج ؟؟

Mr_CHoCoLaTe يقول...

طموحه ليش ما تسوين لج صحيفه يوميه ؟

والله جد انا ما اقرى الجرايد اليوميه بس اتوقع لو سويتي انتي و توصلي البيت كل يوم راح اقراها

اتمنى تفكرين بالموضوع

يعطيج العافيه ^_^

طموحة مملوحة يقول...

Mr_CHoCoLaTe


لوووووووووول شاايفني قاعدة ببنك وين اطبع هالصحيفة لووووول


كاهي مدونتي اهي صحيفتي :)