2009-07-08

موقف جنتل !!

حكت لي احدى الزميلات عن موقف صادفها وأريد منكم التعليق :)
قالت لي أنها في يوم من الأيام أوقفت سيارتها مع والدتها لتسحب من البنك في مجمع في منطقة الفحيحيل ، كان الازدحام شديد والآلة الخاصة للنساء معطلة .
قالت لي بأن الموجودين جميعهم رجال وقفت معهم في الطابور على امل أن يترجل أحدهم ويعطيها الدور مادامت هي الوحيدة الفتاة بينهم ، وبدلا من ذلك وقعت جميع الأنظار عليها ، أحست بالخجل فأنزلت رأسها من الاحراج وظلوا ينظرون اليها بنظرات غريبة بدلا من احترام الطابور .
وقالت لي : يؤسفني يا سارة أن أبناء ديرتي وقفوا ينظرون لي من غير حياء ، فقام رجل فلبيني كان ثاني شخص وسمح لي بالوقوف مكانه .
وذهب هو الى آخر الصف .
نعم ، مجتمعنا الذي تحكمه العادات والتقاليد لم يقم أحدهم بالسماح لي بأخذ مكانه مادام المكان يعج بالرجال ، ويأتي الأجني ليحترم وجودي .
ــــــــــــــــــــــــــــــ
هالموقف يذكرني لمن كنت بمركز سلطان وقفت عند الكاشير ولا يقول لي الكاشير تعالي الصوب الثاني ما مداني بمشي ولا اثنين بكل لقافة يوقفون جدامي بحركة سخيفة ، قلت : صج وقاحة .
احد فيهم استحى على ويهه ؟؟
أذكر على كلام ابوي أول الشباب مايرضون على بنات ديرتهم ، ومايرضون يصير لها شي ، ليش تغيروا الحين ؟؟
الحين كل واحد مهزأ الثاني !! ماكو غيرة على بعض ؟؟


25 comments:

أبو الدســتور يقول...

شوفي
باللحظة الاولة أنصدمت لما قلتي
مكينة سحب آلي للنساء

وين قاعدين
؟؟؟؟

ثانيا
قلة أدب هاليومين للاسف صارت منتشرة حتى من الجيران


للاسف والله اختربوا ربعنا

Sn3a يقول...

انا لاحظت ان وايد شباب مو متعمدين يسوون هالسوالف
وايد يقولون نخاف مثلا نوقف حق بنت مبنجره سيارتها تقول بيتحرش
نخاف نقول لوحده تفضلي جدام تقول معجب

اهو صحيح مو عذر
بس اللي صار لهالبنت مو ظاهره

وحتى انتي ترا جايز الشباب مالاحظو الريال يأشرلج ترا مرات حتى انا اسرح والدور يمشي لين احد ينبهني بمكان مثل Atm او محاسب جمعيه او غيره

ترا شبابنا ورياييلنا الكويتيين فيهم خير
وانا احسهم احسن رياييل بالعالم

لاتعقدون امهاتنا ربو رياييل ماكو مثلهم , موقف او موقفين غلط مايخلولنا نبني راينا بهالطريقه



طمنيني شلون صحتج الحين؟

طموحة مملوحة يقول...

ابو الدستور


العادة تكون في ماكينتين وحدة حريم والثانية ريايييل



شفيهم الجيران ؟؟ لووووول قول قصة خل نسمع :p

طموحة مملوحة يقول...

سنعة


تكفة حتى بالجامعة نشوف تصرفات جذي ماوقفت على الموقفين هذول ..

وبعدين الي بمركز سلطان كانوا متعمدين حتى الكاشير عطاهم خزة يعني شهالحركات ؟؟؟

اوكي سالفة لمن توقف سيارة وايي واحد يساعد اخته هالشغلة عادية ووايد فيهم الخير والله وادري في وايد بنات يفهمون كل شي غلط ومغازل .. اعرف هالشي

بس هم الواحد المفروض يعطي بنات الناس مجال علشان باجر خواته مايطيحون بنفس المشكلة .

غير معرف يقول...

You bring up a valid point; I hope that chivalry is not dead in Kuwait, because the end of chivalry is the end of manhood

SHAHAD يقول...

ايييي يا كثر هالمواقف
ما تشوفيني احب الهنود لوول
والله مرة بودي رفيجتي مستشفى الأميري حدها تعباانه وتبجي بجي
عاد المواقف زحمممه
وفي كويتي سافط ينطر اهله يمكن
أأشرله ابي اسفط ضروري مطنشني

وفيه هندي شاف الموقف قبلي وبيسفط
أشرت له ابي الموقف وإلا يخليني أسفط بداله وهو مبتسم

صج موقفه جنتل : )

Enter-Q8 يقول...

ذكر على كلام ابوي أول الشباب مايرضون على بنات ديرتهم ، ومايرضون يصير لها شي ، ليش تغيروا الحين ؟؟

والدك الله يطول بعمره قصده بنات قبل بعد مو اللحين

اجتماعي يقول...

فشلة .. لما الفلبيني يساعدج
وولد ديرتج واقف يطالع ..

مو قصورا بالفلبيني .. بس يبقى هذاك ولد ديرتج وأولى إنه يساعدج

(( أو يساعد رفيجتج ))

بس على قولة السوريين ..
" اللي إختشوا ماتوا "

شكرا على الاختصار :)

Edrak يقول...

يعني وحده حاطه قوطي روب براسها أطوفها ؟ ولا معصي .. ولا وحده دفشه أو وحده تتمييع أكيد بلبسها و اخليها تنثبر ورا .. اما وحدة ساترة نفسها محترمة أكيد بخليها جدام خاصة اذا كانت وحدة حلوة انا اذا جيكرة بعد ربي خلقها جذي مما يعني راح نخليها ورا الطابور و تنطر حالها حالنا ...

أكلي صمون و انا أخوج

مَـــــعْــــمَــــعَـــــه يقول...

ما اعتقد فيه مكينه خاصة بالنساء حتى بالبنوك الاسلاميه ... ولكن ذوقيا وادبيا واخلاقيا تقدم البنت حتى ما تنطر بالدور وما يتطمش عليها اللي يسوى واللي ما يسوى وعشان ما توقف بمكان متروس رياييل .

alfaisalm يقول...

أختي العزيزه أنا صارلي موقف سابق حاولت قلت حق وحده تفضلي جدامي قالت ليش عشان تتمقل فيني
قلت أسف وحقج علي فالواحد يخاف من ردة الفعل يمكن تكون سيءه ا

Mohamed Hamdy يقول...

وبصراحه انا اصلا مش موافق على موضوع مكنه للرجال واخرى للنساء .. الحل اننا نعلم الرجال عدم التحرش مش نفصل بين الجنسين

طموحة مملوحة يقول...

غير معرف

لا والله في رياييل فيهم الخير والله بس صاروا شوي بالديرة :( اغلبهم صاروا جل وتعليق شعر ويسولف سوالف حريم @@

طموحة مملوحة يقول...

SHAHAD


ببجي :( لووووول

ذكرتيني لمن كنت بالمستشفى ، واحد حرام واقف وامه عيوز جبيرة حيييل وتعبانة مقعدينها بكرسي متحرك يطر من الناس تكفة امي مريضة خل ندش وكلهم لالا ومن هالحجي جان يصرخ شنو ماكو بقلبكم رحمة ؟؟ امي كبيرة حسوا شوي .. انا طبعا سويت دور البطل اخوي اخذ دوري وبطلت له الباب طبعا الكل قعد يخزني خزة حقيرة لوووول دشيت وياهم لووووول خلص اهو وانا خلصت دوري وراه لوووول

طموحة مملوحة يقول...

Enter-Q8


@@ خالد كلهم تغيروا وانت الصاج والله :)

طموحة مملوحة يقول...

اجتماعي

جنها مقولة مصرية لوووول

افا عليك باجر بحط كلمات وانت افهمها عاد لوووول

طموحة مملوحة يقول...

Edrak


لوووول لا والله شوف لوانا ريال :p وشفت نوع القوطي روب افك الناس منها واخليها تخلص لوووول ..

بس البنت مو نوعها جذي والله بالعكس حجاب عادي وعباية واسعة بعد .. اهي استحت المسكينة :)


اكل صمون بس صمون شنو بالضبط ؟؟

طموحة مملوحة يقول...

مَـــــعْــــمَــــعَـــــه


اي بس الناس تعودت تلقائيا واحد حريم والثاني رياييل وخاصة اذا كان زحمة عليه :)

طموحة مملوحة يقول...

alfaisalm


امبي @@


في حريم جليلات حيا مو كفو الواحد يسوي فيهم خير .. بس يبين من شكلهم هالنوعية والله

لا صدقني اذا شفت وحدة منزلة راسها مستحية او متوهقة هذي مسكينة ماتقول شي بس اذا شفت وحدة جن عاجبها الوضع خل تنطر :p

طموحة مملوحة يقول...

Mohamed Hamdy


هي ماوقفتش على الرجالة النسوان كمان دلوقتي ربنا يهديهم مش كلهم

بس الشر يعم زي مابيؤولوا :)

mo3ath يقول...

ساروووه شلونج ، لج وحشه والله D:

انا عن نفسي الحمدلله لما الحين جينات الجنتل موجوده فيني وجدمت جم وحده في كذا موقف ، بس الحسافه ان الناس كلهم نفسي نفسي هالايام :)

موفقه ;)

طموحة مملوحة يقول...

معاذ @@؟؟؟

شلونك ؟ انت وينك ماتبين ؟؟


وبعدين مافهمت شقصدك ؟؟ لوووول الناس نفسك ولا مو نفسك ؟ لوووول

يابعد خشمي حتى انت لك وحشة والله :)

طموح مملوح يقول...

والله قلت ادب مو طبيعيه واكبر عيب من هالاوادم والله اني انغثيت اكثر من اللي قالت الموقف ضاق صدري والله على قلة الادب شنو قلة التربيه هذي ومر علي موقف يوم الجمعه في واحد بالافنيوز باق تلفون بنيه ومع كل وقاحه لما شفتها كسرت خاطري جان اروح اكلمه انه يرد التلفون لها فقالي كلام ما ينقال بصراحه عن البنات ولما قلتلها انا ادبه لج عمي عميد واخليه يربي لج بس قلتلها عطيني الكرتون وخذت رقمي ما اشوف الا اليوم اللي بعده دق علي الولد يترجاني وياني البيت باس ريلي عشان بس اسكت عنه وكسر خاطري وخذيت التلفون وخليته يروح...المهم دقت علي البنيه وقلتلها يبت الجهاز وخليت الحرامي يروح فقالتلي اوكي ييبلي جهاز يديد وخل هذاك يولي وتعال الافنيوز عطني الياه اليوم ؟؟؟
شرايكم.....

طموح مملوح يقول...

اخت طموحه قلتي انه في مواقف للشباب وقلة ادبهم ويانا بالجامعه ... اذكري مواقف؟؟؟ نبي نتعلم لايكون انا صايرلي موقف ولاشي ونا ما ادري .. لووووول

طموحة مملوحة يقول...

طموح مملوح


والله وايد مواقف اتوقع ذكرتها بكذا مكان بس مو الشباب حتى البنات مايقصرون :)

اذا تبيني اذكر لك مواقف احط بوست بروحه لووول