2009-07-18

الرحمة ياكويت !!!





بينما كنت اتفقد البريد الالكتروني لدي وجدت رسالة عنوانها ((ياعيني ياعيني من قدكم )) ، بقلب عامي ممكن ؟؟ الي داز لي الرسالة احد متابعي مدونتي قلت ها شعندك يافلان ؟؟








شفت هالصور





















أعلنت شركة التمدين لمراكز التسوق عن بدأ تنفيذ مشروع سوق الكويت Mall Of Kuwait والواقع في منطقة الصباحية، وسيتم الإفتتاح عام 2010 وراح يحتوي على أسواق وراح يكون أكبرمن الأفنيوز خمس مرات وراح يكون فيه كارفور (( هايبر ماركت )) وفيه 25 صاله عرض سينما سينسكيب وحدايق ونوافير وكافيهات ومطاعم عالمية وغيره الكثير من وسائل الترفيه.هذي المعلومات المتوفرة بالموقع الأجنبي اللي لقيته، ولقيتله صور تفضلوا شوفوهم معاي




ـــــــــــــــــــــــــــــــــــــــــــــــ


حاط منطقة الصباحية بخط كبير يعني يالي تتحلطمين شوفي شوفي لوووول



أحب أرد عليه بموضوعي هذا وبحاول أخفف من التحلطم لأن ديرتنا صارت ديرة التحلطم





وزارة الصحة .................................. تحلطم


تربية .........................................تحلطم


مجلس الأمة ................................. تحلطم


الميزاينة ....................................تحلطم


جامعة الكويت ............................. تحلطم


الاقتصاد ................................. تحلطم


جمعية الصباحية .........................تحلطم


اسكان .............................. تحلطم


نفط ............................... تحلطم


وزير الداخلية ................................. تحلطم



7

7

7

7

7

7

7

7

7

7

7




الدويسان ...................... ؟؟؟؟؟؟؟؟ غير معرف لووووول






ما ابي اتحلطم كفاية علي والله حتى البيبي ببطن امه يتحلطم بالكويت استغفر الله ، يقول عبدالمجيد عبدالله حفظه الله وحفظ خشمه (( لازاد فيني الحزن ... اكتم دموعي وأون ... ))


ماراح اون ..




شوفي يا كــــــــــــــــــــــــــــــــــويت ..



بييبها لج من الآخر ..




موكافي مولات ..؟؟؟؟؟ كل منطقة بالكويت فيها مولات وسوقة ... يقول لك كل شعب معروف بشغلة وشعبها معروف بالتسوق .. حتى الشباب يحبون السوقة الحين شفتي شلون ياكويت ؟؟؟


بالله عسى مالقوا ارض فاضية فرشوها أسواق ويالله ياشباب فاضي؟ ؟ تعال قز افا عليك .


ترا السوق مو كل شي بالدنيا على فكرة . لا وكاشخين اكبر مجمع في الشرق الأوسط ... وبعدين ؟؟؟


ولا قبلين طبعا .


اليوم رحت السوق ... باجر وين بروح ؟؟ السوق ... عقبه ؟؟ السوق



ها وكاشخين بمنتزه الشعب والمدينة الترفيهية ... يبا بدل هالاسواق حطوا مدينة العاب يديدة . شدعوة الناس ماتبي تلعب ؟؟؟



الله يرحم ايامج يالجزيرة الخضرا ... أتذكر لمن كنت صغيرة أقول لأمي : كاهي الجزيرة الخضرا تكفين ودينا الحين الجزيرة الحمرا . >>>> الاخت تحب الاحمر .




قلنا مشروع مخ وعلمي وفكرة حلوة سووا لنا المركز العلمي خوش نبي مشروع هم نفس المركز العلمي ؟؟


لا يبا سوق سوق



نبي مشاريع حلوة تفيد الناس وبنفس الوقت مربحة اذا وايد همكم الربح .


وبسكم سوقة ترا لوعتوا خشمي والله ..



.







ــــــــــــــــــــــــــــــــــــــــــــــــــــــــــــــــــ

هذا الفيديو تلخيص حلو حق مادة الجيولوجيا البنائية للي يهتم بالجيولوجيا شرح بسيط حلو :) ومفيد









48 comments:

بانوراما يقول...

الناس قام يموتون من الأمراض

والجهل قاعد ينتشر من التعليم ..

واهم لي الحين سوق

بنتطور مجمع

بنوصل لي مستوى الدول المتقدمة

بنينا ناطحة سحاب ..

اول شي حلوا مشاكل الشعب

بعدين رفهوا عنهم

..

والتحلطم اهو الهوا الي تنفسه الكويتيين

ما يعيشون بدونه

{~المباركية~} يقول...

اي والله ذبحونا سوق و سوق قريبا يفتحون بازار وسوق لي متى كله سوق الحياة كلها سوق
ليش مايستغلون جبال كاظمه يسون فيها مشاريع حلوه ليش مايسون جبال صغيره صناعيه
ليش مايسون هايد بارك كبير صوب بر مشرف

mantovani يقول...

مرحبا

:)


مانتوفاني

MiSs.Me يقول...

على قولة بو خشم راشد الماجد :
ويلااااااااااااه ! ضاق الجدر ! :q

ما صارت ! الكويت كلها اسوقة !
شحلاتنا أيام أول شرق ومارينا وبس !
الحين شتتونا ! أفنيوز و360 ومادري شنو ومادري شني !
فروا راسنا !

ما نبي سوق ! ترى الناس تسافر بره مو عشان تتسوق ! تسافر نحشة من الجو !
لا يكون عبالهم إذا حطوا أسوقة الدنيا بنقعد ونلازم الديرة ! :/

سوولنا أماكن عليها القيمة !
مو أماكن هياتة وصياعة وبعدين يقولون
شبابنا شباب فاسد !

كلها أسواق نفس الشي شعارها ( اسرح وامرح ) !

يمكن خشومهم فيها شي طموحة ..
سؤال بريء :

شسالفتج ويا خشوم العالم ؟! ;q~

أبو الدســتور يقول...

مسكين مجمع المهلب

جده غير يقول...

الله يعطيج العافية

طموحه مملوحه

على هالموضوع وفكرته الحلوه

فعلا هبلوا بالعالم بالاسواق وصاروا الاغلبية ما عندهم وقت بسبب فرفرتهم بالاسواق وياليت مستفيدين شئ الا فتحت فم وخيبة تعب :)
والمستفيدالوحيد اللى بنا هالصرح العالمى (( التاجر ))!

وسمعت ان السوق مجلس ابليس يعنى الاغلبية تروح صاحية وترجع مختل توازنها

والتحلطم ماركة مسجله عند الاكثرية

والحديث بهالموضوع طويل وانشاء الله لى عوده

الفيديو ما طلع بدور جهاز ثانى واشوفه


دمتى بخير

Jako يقول...

طموحة لا تنسين أن الي سوه المجمع تجار تهمهم مصالحهم...يعني إذا أنا تاجر شنو يربحني أكثر مول؟ وله مركز علمي؟
فاهمة قصدي...هذا ما يعني إني موافق لكن هذا الواقع

ثلجيّة القلبْ والأقراطْ .، يقول...

طبعاً كالعاده يسبق الشُكر رايي الشخصي ،
على الرغم من ان هاذي المجمعات نوعاً ما متميزه و متوافر فيها كل شي تقريباً و كبيره عشان تخفف و تحد من الزحمه داخل المجمعات ، إلا ان في مرافق وايد أهم من المجمعات تحتاج إلى تصليح و تحسين و إعادة بناء !
على سبيل المثال لا الحصر ،
الصحه : المستشفيات الحكوميه و الصيدليات و غيرها من المرافق الصحيه وايد أهم و نحتاجها أكثر من المجمعات ،
التعليم: المدارس و الجامعات و المعاهد و غيرها من المرافق التعليميه اعتقد بالسنه كلها نداوم فيها أكثر من المجمعات ، إذاً وايد مرافق و أماكن بالكويت نحتاجها و نروحلها أكثر من المجمعات فـ بالتالي تحتاج إلى اهتمام و تحسين أكثر ،

شكراً لكِ غاليتي ،

اجتماعي يقول...

الكويت متروسة مطاعم ومجمعات ..

بين المطعم والمطعم .. مطعم

مادري ليش مانسوي معالم سياحية يديدة ..

خل نسوي أبراج الكويت 2 ..
صالة التزلج 2 ..
أكوا بارك 2 ..

إن شاء الله بحلول عام 2100 بتصير هالأشياء ..

نمووول يقول...

خلج ايجابية ولا تتلحطمين ..
كل يوم طالعين لنا بمول وفيه 225345 مطعم عالمي و 455354 صالة عرض 369386747615 خروف و929673784 قزيزة عاد اخاف فيها شي يديد المحلات الي فيها نفسها بغيرها يعني ......فوسطا
تتوقعين الغرب شيقولون عنا ؟
ما همهم الى السلع والبلعة

زين يا بقر وين المراكز الترفيهية السنعة وين المراكز التعلمية وين المراكز الثقافية والتثقيفية وين
المسارح المحترمة وين صالات الاوبرا وفنون الرقص.. شفيه بو اوبرا.. وين
المهرجانات العدلة حتى هلا فبراير اخترب

وعلى كثرة صالات العرض كلها مصدية وصغيرة وشاشات قديمة ليلحين ما وصلهم الــ3D والــ4D كافي الي بالمركز العلمي المهم وتعرض نفس الافلام ومقطعين نصها وسعر التذكرة تأجر فيه 4افلام من iTunes كامله وصافية


بالنهاية بنصير مثل ما صاروا غيرنا ..... مباني وعمران يسكنها غنم

BoGhaith يقول...

الي يشوفهم يقول الحين الكويت مو ناقصها شي ومن كثر الفلوس الي شبعنا منها قمنا نبني مولات أشكال وانواع

جنه ما عندنا مشاكل بالصحة
مشاكل بالإسكان
مشاكل بالعمالة الوافدة الي صاروا دبل دبل عددنا الله يستر
ومشاكل ومشاكل ومشاكل يا كثرها

الكويت ديرة مؤقتة ولها يوم نقول كان في ديرة اسمها كويت وفيها نفط وفيها وفيها

والسلام عليكم

Eve's Heart يقول...

كنت ولا أزال أقول خل يسنعون المستشفيات، المكتبات العامة، المستوصفات، المدارس الله أكبر على المدارس ما راح أتحجى، الجـــــــــــــــــــــــــامعة، فكرة حلوة مو ؟ وين إللّي يسمع ؟؟ الكل ساد أذنه وعينه وقاعد !! بس يخلون حلوجهم تشتغل جنها ماكين طراريد !! بس أقتراحات و وعود وحجي بطالي ياأخي لي متى !!؟ تعبنا بس تعبنا واحنا نحجي ؟؟ لي متى ؟

الله يا كويت :'( جذي صرتي ؟

كاريكاتير يقول...

يا بخت سوق المباركية عمره ما شبع من الناس والغني والفقير القصير والطويل والذكي والعبيط والجيكر والحلو الرياييل والحريم هالسوق قلبه للجميع..

انا اقترح على البلدية لما يوافقون على مجتمع يشترطون تخصيص مسرح وقاعة معارض، ومراكز خدمة مواطن بالمجمعات

reemas يقول...

مدونة طريفة و خفيفة
و تخاريف عقلانية :)
هذي اول زياره لي و انا سعيد فيها و ان شالله ما تكون الاخيرة
اتمنى تشرفيني في مدونتي المتواضعه
و راح تلقين بعض المواضيع العلميه اللي انا احبها مثل الفلك
انا احب كل شي علمي و خصوصا الفيزياء و الفلك
اتمنى نتواصل في عالم التدوين
تحياتي

غير معرف يقول...

Excellent point to make; we have too many malls and not nearly enough entertainment/educational areas

We nee theaters, learning facilities, bookstore, museums, sports centers, music and arts schools most importantly

Since there is an immense need for those places, anyone who establishes a business in those areas would succeed, make a fortune actually

اجار الدين كشمش يقول...

خوووش بوووست

لكن ما يخفاج ان احنا بالكويت

اهل الحسسد ؟ من التحرير الي الان ونحن نبني العمارات ذات 70 دووور

ونحن ليس لنا اي دراسسه لهذا الارتفاع ؟ مجرد تقليييد ...امارة دبي !!!1

والاسسواق والمووولات ...هم نفسس الشئ !!!1

فقط للعلم ان دبي مسسساحتها
اكبر من جزيرة بوبيان ثلاث مرات

فهي محتاجه للارتفاعات مثل سنغفوره

لكن احنا وييين رايحين معااااهم

فمالله

ابو عبدالملك يقول...

ياخي الدنيا ماتسوى
لو الدنيا تسوى عند الله سبحانه وتعالى جناح بعوضه جان ماشرب الكافر شربة ماء
ومصير الدنيا راح ترد مثل مانشاة يعني مهما ماراح نسوي مجمعات وحدايق ومتاحف ونطور البلد راح يرد البلد مثل ماكان الا شغله وحده ماتغيرة ولا راح تتغير اللي اهو شرع ربي
ف دام انج كويتي وساكنه في الكويت فانا انصحج انج تزهدين في الحياه
اختاري يالعيشه هذي او انج تزهدين في الحياه
مافي اليد حيله
ماعندي غير الرد هذا

elsha3er يقول...

السلام عليكم

اولا المفروض انى ما ادخلش فى حاجة زى دى

بس انا بتكلم بواقع العروبة دة لو لسة ليها مكان الحكومات عامة مصرية و كويتية او اى حكومة عربية تصرف مليارات على مشاريع هايفة ونيجى نقول عندنا مشكلة بطالة وقلة زواج طيب ما توفر الفلوس دى ولا يا سلام لما عندنا بيقولو ما فيش مصادر للثروة واحنا كل يوم بنخسر مليارات بتصدير الغاز لأعدائنا ويقولو عجز ميزانية

مش عارف فعلا امتى حيكون التغير وهل تغير بلد واحد هو دة الحل ولا محتاجين ثورة عربية عامة للحكومات كلها والله بحلم بيوم ما فيش مصرى وعراقى وكويتى فى بس عربى عربى عربى

تحياتى

احمد الشاعر

elsha3er يقول...

انا عمرى بصراحة ما حبيت الجولوجيا متعقد منها من ايام الثانوية العامة

مع انى جبت 45 من 50 بس مش بحبها ربنا يكون فى عونك

ادينى تاريخ وانا اطلعلك درر من بدايته للنهاردة

تحياتى

احمد الشاعر

malak يقول...

عجبني الموضوع:)


اي والله خاصه الحين بهالحر الناس اللي مسافر و اللي قاعد مايروحون غير الاسوقه



يعطيج العافيه :)

العدالة الكويتية يقول...

لتدهور أحوالنا
أصبح الكثيرون كبارًا وصغارًا
يعتبرون "المولات" عنوان التحضر!

الحمد لله الذي عافانا
التحضر والتقدم بالأخلاق والعلم

والتخلف كل التخلف
في تراجعهما في أي مجتمع إنساني.

غير معرف يقول...

خلو الناس تبني مول ماكو مشكله بس مو كل سنه يفتح عندنا مجمع جديد وبمكان جديد وبشكل جديد بس من داخل نفس محلات نفس مطاعم نفس الاشكال نفس كل شي :)
ولكن شي مقابل شي .. بنيتو مجمع جديد ابنو لنا منطقه جديده وانتو للحين يالاسكان توزعوون طلب 1994 يعني قبل 15 سنه .. وبعض الناس تطلب ارض ويبنون مجمع بيوم وليله :)

طموحة مملوحة يقول...

بانوراما

شفتي شلون ؟ اي والله عسى مانروح مكان في سوق نوخر شوي الا سوق ثاني ياعمي سووا لنا مدرسة بفلوس بس تكون حلوة جذي مثل السوقة مو مشكلة لوول

طموحة مملوحة يقول...

المباركية


اي والله سوق ومطاعم لووول

لا ولاحظ كل سوق لازم فيه طابق خاص للمطاعم والالعاب :s


شدراني حاجهم انت ورد لي خبر لووول

طموحة مملوحة يقول...

mantovani

مرحبتين :)







طموحة

طموحة مملوحة يقول...

MiSs.Me


آآآآآآخ يابنت الكنادرة يالي عذبتوني لووول


خشمي وخشمج اتفرقوا اتفرقوا الخشمين لوووول


يبا لوعة جبد والله عسى مايا وفد من برا ودوهم المركز العلمي بس هذا الشي الحضاري والمهم بالديرةلوووول وحدة امارتية تقول لي ماسويتي مشروع يديد حلو غير المركز العلمي ؟؟
قلت لها لا استانسوا ليش امدحوا المركز العلمي قالوا خلاص قعدوا عليه لين تموتون لووول

طموحة مملوحة يقول...

أبو الدســتور


اي والله ، الا قول لي شلونه ؟

طموحة مملوحة يقول...

جده غير


لوووووول السوق امبي استغفر الله كل شي وحش يصير فيه لووول كافي التحرشات والمغازل هذي بروحها قضية شائكة لووول

حياك الله لازم تشوف الفيديو مفيد والله

طموحة مملوحة يقول...

Jako


التجار أغبي ناس بالديرة تدري ليش؟

لأن وايد اشياء يقدرون يحطونها احسن من السوقة تربحهم بس لأن مخهم صديد فخلاص يعلقون على الشغلة لين نرجع من لوعة الجبد منها

طموحة مملوحة يقول...

ثلجيّة القلبْ والأقراطْ .،


مادري ليش اتفاءل لمن اشوف ردج والله

صاجة يالغالية :(

الحين الناس سوت القوارب الي تشوفين البحر وانتي داخل القارب وتطالعين الشعاب المرجانية وتستانسين واحنا للحين يفكرون فيلجا يخلونها سكنية ولا سياحية ..

للحين بس يفكرون خليهم يفكرون عاد ليمن يفكرون ويخلصون الا صارت القيامة وماتت الناس كلها

طموحة مملوحة يقول...

اجتماعي


شخباري هالاماكن الي قلتها لووول للحين موجودة ؟

طموحة مملوحة يقول...

نمووول

امبي ردك شنو فطسني من الضحك لووول

شوف والله العظيم قعدة المخيمات مع الاهل تسوى ستين الف سوق والله بس لمن تروح هناك هم تلقى مشاكل خو الكويت مو خالية من المشاكل بكل مكان لا حول ولا قوة الا بالله

متى ايي الشتاء :( ؟؟

طموحة مملوحة يقول...

Eve's Heart

حمدي ربج عندكم مكتبة عامة الي عندنا احترقت ومارضوا يعدلونها :(

طموحة مملوحة يقول...

BoGhaith



منو قال عندنا مشاكل بالصحة والتعليم ؟؟

احسن دكاترة عندنا والتعليم ؟؟ عباقرة وفلاسفة كلها طلعت من الكويت لووول



اخييييييي ياقلبي

طموحة مملوحة يقول...

كاريكاتير

ياحلو سوق المباركية حتى ريحة الزفرة هناك حدها كوووول

مشتهية الكباب الي يسوونه هناك ..

طموحة مملوحة يقول...

reemas


اهلا وسهلا فيك أخوي يشرفني والله كلامك يالغالي

ان شاء الله راح ازور مدونتك وراح اكون من المتابعين لك

طموحة مملوحة يقول...

غير معرف 1


صاج والله العظيم

سوالف مسارح وفنون ماكو المسارح عندنا اي كلام وتضحك .. :(


ماكو الا المولات ياولد الحجية :(

طموحة مملوحة يقول...

اجار الدين كشمش


صدقت والله

شوف حلات الواحد اذا قارن بينه وبين الآخر يقارن بتوازن يعني اوكي نقلدهم بس ما نتحلطم وشوفوهم شوفوهم والله اعرف كويتين هناك عايشين والامارات تحتضن العقليات المبتكرة ماشاء الله المفروض ديرتنا الي تشوف وتتعلم مو احنا الي نقول لها شوفي وتعلمي :)

طموحة مملوحة يقول...

ابو عبدالملك


اكيد الدنيا ماتسوى بس خل ناخذها على سبيل المثال انت تبي مشروع اكبر مكتبة في الشرق الاوسط فيها جميع الكتب الثقافية والدينية ، اوكي هالشي راح يفيد الجميع واعتقد القراءة مو حرام عدل ؟؟

فشنو تختار هالفكرة هذي ولا المولات ؟

طموحة مملوحة يقول...

elsha3er

ازاي ما تتدخلش المشكلة دي عند اغلب الدول العربية مع شديد الأسف:(

بص انا كنت زيك بالثانوي مابحبش الجيولوجيا بس خيرة اني سمعت كلام اهلي ودخلت في الجامعة جيولوجيا لأني حبيتها اوي

طموحة مملوحة يقول...

malak

والله صج امس كنت رايحة الكوت ابي ادش سينما الناس فاضية قلت اكيد رايحين حق 360 لوووووول

طموحة مملوحة يقول...

العدالة الكويتية


صاج والله

معاك بكل كلمة قلتها

طموحة مملوحة يقول...

غير معرف 2


في مصر سوت مشاريع اسكانية في قمة الروعة تلقى المنطقة سكنية وسياحية بنفس الوقت احنا الي عندنا مناطق اتيييب الهم والغم والتلوث وحالتها حالة وكل شارع فيه اعلان منو يبدلني ببيته لوووول


استغفر الله والله شر البلية مايضحك

ابو عبدالملك يقول...

طموحه
اول شي ترى مو كل القراءه حلال يعني مايجوز تقرين كتب ملاحده او زنادقه او كتب شيعه او كتب فلاسفه السفسطائيون او كتب فيها شبهات بالعقيده
الا اذا انتي عقيدتج قويه وسليمه هذا للعلم فقط

اما سالفة المكتبه الاسلاميه فهو شي جميل بس مافي مقارنه بين مجمع ومكتبه اسلاميه
اكيد راح اختار مكتبه اسلاميه
ماذا نستفيد من المجمعات؟؟
يعني انا عندي اقتراح حلو يعني لو يسوون مثل السعوديه هيئه كبار العلماء للافتاء احسن مايطلع اي شخص ويفتي ويطلعون الناس ويعلقون فتوت مطعم ويسون كاريكاتيرات طبعا توافقيني الراي بهذي

Alikingkw يقول...

الله يبشرج بالخير
شعندنا غير المولات بهالحر؟..هذي البشارة والله
حلو حق الي يبي يتمشى ويتعشى :)

جده غير يقول...

هلا فيج طموحه مملوحه

بعد جهد جهيد ومن جهاز لجهاز ومن مكان لمكان ومن غرفة لصالة لمحل يالله فتح معاى الفيديو
قوليلى شكرا على هالجهد :)


والجيولوجيا الله يذكرها بالخير خذيتها بثانية ثانوى مادة حلوه ونجحت فيها وانا مرتاح دون تعقيدات مو الكيمياء والانجليزى اللى حصص تقوية ودور ثانى ويالله نجحت

الجيولوجياعن الارض وأشيائها
وحنا كلنا على الارض
والارض يمشى بها المجنون والصاحى :)


ودمتى بود

aya Z يقول...

موضوع رائع :)
لكن مع الاسف مو بس الكوت حتى السعودية وبالخص جدة كل مكان مولات مولات ...
اعتقد بعد كم سن ممكن ما تقري تمشي في البلد من كثر ما الشوارع سارت ضيقة من الاسواق لان الناس ما همها غير تجميع الفلوس
ل يبنو مدارس او مستشفيات، جمعيات خيرية اعتقد انه افضل :)

aya Z يقول...

اختي طموحة
شكرا لكي لهذا الموضوع لانك الهمتيني بكتابه موضوع وا تمنى منكي ان تزويريني بمدونتي
الموضوع :
http://aya-z.blogspot.com/2009/07/blog-post_23.html

مع الشكر والتقدير