2009-09-06

ملاحظات رمضانية ..((1 ))

فكرة عندي بعض الملاحظات السريعة على البرامج الموجودة في الشاشة الرمضانية :)











استغرب وجود مسلسلات فاشلة بأجزاء 2 و3 مادري على اي اساس يحطون اجزاء والمسلسل تافه جدا وماله اي هدف ، يعتمد مسلسل (عقاب ) على التطنز الماصخ على البدو ، كلنا فيها اخطاء وعيوب وكلنا نملك زاوية مضحكة من عيوبنا بس السالفة تمصخ حيييييل ويمصخرون البدو بهالطريقة جدا لا أرضاها ، على ماذا تعتمد الكوميديا اليوم ؟ على التجريح والاستهزاء الزايد عن اللزوم ؟
حتى اللهجة فيها الكثير من المبالغة
ما اٌقول إلا طاخ حظك يا عقاب ويا كاتب المسلسل وياقناة عرضت مسلسل تافه جدا وماصخ .




برنامج شجون (( شوجو )) أطالعه لمن اليهال يحطون عليه ، ممتع بعض الشيء بس ملاحظتي اهي :

ماحكاية الكركرة والقهقة الزايدة عن اللزوم عند شجون عندما يفوز المتصل؟؟؟ تضحك بطريقة غريبة والله ماشوف شي يضحك صراحة فودي اعرف شنو سر هالقهقهة المبالغ فيها .

فوق ال3 مرات اكون متنحة ويحطون دعاية حليمة ، أفز من الخرعة لمن تشهق حليمة بطريقة مو طبيعية ، بسم الله الرحمن الرحيم ، ليش هالشهقة القوية هذي ؟؟؟ مذيعة جميلة لبقة جدا بس صوتها جدا مزعج ولو انها خفت من حده صوتها بس قمت انتبه اذا حطوا الدعاية ما اخترع مثل كل مرة . :)

دعاية بنك الوطني غريب شوي ، أدري بتقولون ياسارة كلها دعاية بس مايخالف ، في عمال كويتيين ؟ حاطين عمال كويتيين يبنون والله جان زين ، بس يليت يكونون شوي واقعيين لأن ماكو عمال كويتيين :p

ــــــــــــــــــــــــــــــــــــــــــــــــــــ

أول كانوا يشوهون صورة طلبة الجامعة بالمسلسلات الحين حتى الدكاترة ما سلموا :) انا عرفت تفاصيل مسلسل أم البنات مو متابعة المسلسل ، طفلة في بيتنا عمرها 7 سنوات قالت لي القصة كاملة وطبعا آخر شي حصلت زفة محترمة مني وطالبت البيت بابعاد التلفزيون عن الأطفال ، استغرب بدراستهم ما يحفظوون كثر حفظ تفاصيل هالمسلسلات .

22 comments:

Jako يقول...

تصدقين هاذي أول سنة لي أقاطع التلفزيون وما أتابع شي...جربيها ماراح تخسرين راح تلقين أن عندج وقت حق وايد أشياء تسوينها.

طموحة مملوحة يقول...

لا انا ما اتابع تلفزيون بس كل يوم بعد الفطور اقعد مع الاهل نتقهوى ويحطون التلفزيون واتابع اليهال لووول ذكرتني امس وحدة دقت تقول لي شنو تتابعين برمضان قلت لها انتي منو قالت اسمها تقول نبي نعرف الناس شنو تتابع قلت لها ماطالع تلفزيون جان تقول ناديلي وحدة من اليهال ، الحمدلله اني مسكت نفسي قلت لها اليهال مو موجودين اختفوا ..

أبو الدســتور يقول...

ملاحظاتج حلوة
بس يبيلج اجزاء على ماتتكلمين على الباجي

عموما برنامج حليمة من الاحسن نقصر على الصوت و نشوفها بس

بانوراما يقول...

المخرجين الكويتيين

إذا ما سوو شي سخييف ما تقر لهم عين

ولا يهنى لهم بال

malak يقول...

looooooool

صج مسلسل عقاب فاشل وكلا طنازه


وانا اللي يبط جبدي بعد برنامج جد ولعب على فنون :S


يعطيج العافيه حبيبتي

جبريت(عنيف سابقاً) يقول...

والله ولا ادري عن اهل التلفزيون انا متابع اوربت وشوتايم وايد ابرك

{~المباركية~} يقول...

والله هذي مسلسلاتنا لو بنقعد 1000 سنه بننقد فيهم و بنتكلم تضل مسلسلات ماصخه ولا لها هدف معين و ولابينحرك ساكن
التمثيل بهذا العصر مجرد للشهره لا اكثر و لا اقل

نمووول يقول...

تستغربين وجود جزء ثاني وثالث وعاشر لمسلسل فاشل .. هذا لانك لا تتابعين مثل هذه المسلسلات بس غيرك يتابعها ..

اما بخصوص برنامج القهمقه بما تابعته لكن من الدعايات الي يعيدونها الف مرة اتوقع مصابه بانفلونزا ...

استغربت انك لم تذكري برنامج باط جبدي
توقعته يكون اول برنامج .. كنت بتكلم عنه بتدوينه بعدين قلت ما يستاهل اتكلم عنه بس بما انك فتحتي الموضوع

فهو برنامج (مصخرة ولعب) اقصد جد ولعب شتفي الفيديوات الي يحطونها بعد ما يجاوب اي مشارك ؟
عنصرية واستهبال واستهزاء وليس ضحك ..
ناس ما تستحي ولا تنتخي
انا بعرف المخرج ليش جذي ما يحترم احد ..
اضحك بس مو بهالطريقة سب وشتم وعنصرية ..

الله كريم
يمهل ولا يهمل

شكراً ...

ابو عبدالملك يقول...

السلام عليكم ورحمة الله وبركاته
هذا موضوع طيب
عقاب 1 2 3 انتي تحسين سخيف لكن غيرج يحس ان عجيب ومسلسل هادف مثل الجويهل في ناس تقول انه وطني وفي ناس تقول مشتت الوحده الوطنيه فهمتي
المسلسل هذا يبين ان البدو متخلفين وان الشياب مايركضون الا ورا البنات بالزواج خاصتا بنات الشام وكان الحضر شعب الله المختار وانا لا اقصد الاساءه للحضر بس هذا واقع المسلسل وواقع المجتمع الكويتي عامتا
البدوي متخلف راعي غنم وان الحضري متطور دكتور
وبالعلم ان الرسول صلوات ربي وسلم عليه كان راعي غنم




اما على سالفة شجون ف انا ماتابع البرامج والا المسلسلات
بس انا عندي نظره للمثلين عامتا انهم سلع ترويجيه ماديه تباع وتشترى
حتى لدرجة ان انوثة المراه سقطت بالتمثيل والعياذ بالله


اما سالفة الدكاتره في بعض الدكاتره يبيلهم الطق مو بس الاستهزاء



اما على سالفة المسلسل ام البنات
فهذا المسلسل الله لايوفق المخرج عندي ولدعمتي يتابع المسلسل هذا المهم عمتي عندها اربع بنات ماتزوجوا بس مو عوانس الاخ ولد عمتي اللي عمره 10 رايح لعمتي ويقول لها بيتج بيت العوانس
وانا وصلني خبر استفسرت منه من وين جايب الكلمه هذي قالي المسلسل
وحصل ماحصل



وراي بالمممثلين والتمثيل بدون استثناء
انهم (دعاة فساد) مو مثل مايقول الاعلام ( يعالجون قضايا )

ملاحظه: باب الحاره ومشاهد وبيني بينكم انصح فيهم

وتم الكلام وربنا محمودو وله المكارم والعلا والجودو ثم الصلاة على محمد ماراق القمري واورقه العودو

well_serviceman يقول...

أنصحج بالإبتعاد عن اجهزة التلفزه برمضان وبعد ارمضان بفترة اسبوع ، لنه كل البرامج والمسلسلات والحركات اللي موجوده إما مبالغ فيها جدا أو سخيفه حتى الموت

بالنسبه لدعاية الوطني ، يازين البعير لي هز راسه هههههههه

تحياتي

ENG.Sara يقول...

صااااجة .. مسلسل سخيف وفاشل بمعنى الكلمة !
اصلا ما يضحكون ! شاللي يضحك بالموضوع
الكوميديا صايرة بس طنازة وشواذي الحمدلله والشكر ..

حدها شجون مووو صج !
تضحك اكثر من الفايز :P

حليمة .. خلي الشهقة .. اللبس والتصنع والملاقة الزايدة ليش !
شنو هاللبس ! ما جنها كويتية والبرنامج يعرض برمضان =\

لووووووول .. تصدقين ما لاحظت سالفة العمال الكويتيين :P

مسلسل ام البنات اول الحلقات كان حلو بعدين مصخت السالفة ..
صكو على المصاروة

لحد الحين ما شفت ولا مسلسل حلو !
حتى حياة الفهد مبالغة وايد هالسنة

انا اقوووول التلفزيون نعطيه احلى سكب ونجابل مصحفنا و مدونتج وباجي المدونات ابرك :P

يعطييج العافية :D

طموحة مملوحة يقول...

أبو الدستور


افا عليك انا مو متابعة بصراحة بس القط السوالف العبيطة من الدعايات ومن فترات القهوة لمن اقعد مع الاهل واشوف المسخرة الي على التلفزيون صراحة اذا بشوف احط على ام بي سي اكشن واشوف مسلسلات الجرايم ولا سلسلة اجاثا كرستي ولا المواقف المضحكة بصراحة وشوي بعد اول ما اقعد من النوم اطالعهم بس مو متابعة صراحة مسلسلات

طموحة مملوحة يقول...

بانوراما


المخرجيين الكويتيين مساكين والله حتى الافلام الهندية يعرفون يخرجون فلم عدل بس مسلسلات آخر عبط انا اقول لو فلوسهم يقطونها على هيئات خيرية يستفيدون الفقارة وايد احسن وناخذ فيهم اجر بعد .. بس الحرام ياحلوه عندهم

طموحة مملوحة يقول...

malak


ملوكتي جد ولعب خليها اتكلم عنه بالجزء الثاني لووول لأن عندي ملاحظة قوية لووول

طموحة مملوحة يقول...

جبريت(عنيف سابقاً)


ولا اوربيت وبابايات ديزني شحلاتهم لووول

طموحة مملوحة يقول...

{~المباركية~}


صاج والله شوف احنا ماراح ننتقد احنا راح نتطنز عليهم وعلى خبالهم لوول

طموحة مملوحة يقول...

نمووول



راح احطه ان شاء الله ماراح اخليها لأن شفت عليها حركات هبلة وفعلا مثل ما قلت تذكر ايام برنامج كان بتلفزيون الكويت والله نسيت اسمه بس كانوا يحطون جذي مقاطع تضحك بس كانوا محترمين وايد بصراحة

طموحة مملوحة يقول...

ابو عبدالملك


كلامك جدا منطقي اتفق معاك بالنقاط الي ذكرتها

طموحة مملوحة يقول...

well_serviceman


الله يخلي الفيس بوك لوووووول

طموحة مملوحة يقول...

ENG.Sara


لووول فديت عمرج سارونة اي الزين عندنا والشين حوالينا لوووول


صج مسخرة شجون اطالع مبققة عيوني شفيها هذي تضحك جذي ؟؟ شنو الي يضحك ؟ احس ان المعدين لاعت جبودهم من الضحك لوول

ابو عبدالملك يقول...

طموحه
الله اول مره تتفقين معاي
ولا بعد هيئات خيريه وتبرعات
الله يثبتج
والله رد جميل
الله يكثر من الردود هذي
بس انصحج بجمعية الاصلاح

طموحة مملوحة يقول...

هههههههه


مولازم نختلف في كل شي يابوعبدالملك
وانا ما اتبع احد اتبع نفسي واسوي الي اقتنع فيه والحمدلله :)