2009-09-28

ستار إخــــس !!






صباح الأمس ، أو أمس صباحاً استيقظت مع الهواء العليل كما يسمونه ، هواء الله الرائع وأردت شرب الموكا في الشعب ( ليش) ؟ لا تسألين


أول مرة بصراحة أروح لستار بكس الشعب المكان جدا رائعه موقع عجيب جدا ولكن !!!!!














في البداية عندما تحدثت عن فرض الضرائب على الشركات الي تبوق وتنهب من أموال الشعب وفوق شينهم قوات عينهم ما يهتمون بالبيئة الكويتية ، هني اقول نفرض قانون الضرائب ونحط اصابعنا بعينهم علشان نعلمهم شلون يحترمون شعب الكويت .


بتقولون شلون ؟





كان الجو أمس وايد حلو وقلت اقعد برا بالطاولات أحط مفكرتي جدامي وادون ملاحظاتي على المكان الي انا قاعدة فيه مثل كل مرة ، بجانب ستار بكس الشعب في براحة كبيرة شوي وقفت اطل على المكان ، وكانت صدمتي عنيفة جدا ..... جدا جدا ... أوي أوي والله





الصور راح تشرح

























الحييين قايمين على الشعب واهتمام واهتمام والافراد والحالة لمن الشعب يشوف شركات زبالة ماتعرف شي اسمه حاويات ولا سلة مهملات وتقط زبالتها بالبراحة اشكرة عيني عينك تبون الشعب يهتم ؟؟؟



شركات تتلقى الملايين يوميا نفرض عليهم قانون وفي أمهم خير يعفسون الديرة مثل ما قاعد يسوون !!



أتمنى أن تأخذ الدولة الأمر بكل جدية وتفرض عليهم الضرائب البيئية الي راح تخدم بيئة الكويت هذا أولا ..



وثانيا قوانين تجبرهم على وضع القمامة في مكانها المخصص وليس في الشوارع والاماكن الفارغة !!!




أتمنى اتخاذ هذه الاجراءات لأني انئرفت وبكل صراحة من المنظر المزعج ولأني مواطنة صالحة يهمني رؤية ديرتي بمنظر يليق بها


مو آخر العمر يتحجون عن الشعب وانه يتصرف بتصرفات غير حضارية ونجد الشركات تصرفات شبه بدائية .





أدري اني راح احجي واحجي واحجي ولا احد يهتم ، والله لو بديرة مثل ديار الأجانب جان حطوني ملكة البيئة :q




ترا لاعت خشمي والله :q






من الحين أقول ترا الموضوع بيئي يعني لحد يدش لنا بسالفة سياسة ودين وفتاوي والحجي لج ياجارة :q




ــــــــــــــــــــــــــــــــــــــــــــــــــــــــــــــــــــــــــــــــــــــــ


صار لي فترة متنحة على فلم NoteBook حده عجيب والله ويكسر الخاطر :(
............................................
.
.
.






بــــــــــــــــــــــــاجي 11 يوم :) جهزوا الهدايا من الحين بلييييز

23 comments:

well_serviceman يقول...

أهو بس الشعب؟ هذا ولا شي جدام المهزله البيئيه اللي في الجليب والشويخ والجهراء وأمغره و و و و و و... واللائحه تطول :)

سلة ميوّه يقول...

مساءج سُكر


أمر دايما وماعلق
تسمحين اقول شي...


والله ..اخس واخسيييين وثلاث....

بس لانه مو لاقين حد يردعهم
بيني وبينج روحي على البحر وشوفيه بحرنا خلف الله عليه نفس الحاله هالاوادم فاهمين غلط!!!! يمهم حاويات ويقطون على اليال والا داخل البحر

مادري الواحد جم حملة نظافه يسوي !!! بس ماكو فايده ....


ماقول إلا ..إخخخخخخخخخخخخخخس


ولج ...حبي وزياده

حبي

{~المباركية~} يقول...

انتي الله يهداج شمقعدج بره ماتدرين انه حر و منظر كئيب ووصخ
محد قالج انج قاعده بالسوليدير ولا بجنيف لووول

يامعوده جذي والديره غاليه نار بعد يفرضون ضرايب عشان ناكلها

طموحة مملوحة يقول...

well_serviceman



اي والله بس المنطقة الي رحت لها كشخة شوي يعني مو مال هالمنظر لوول

طموحة مملوحة يقول...

سلة ميوّه


اي والله يالغالية فديتج يعني الناس لي شافت هذول مايهتمون تبينهم اهم يهتمون ؟ بعدين الناس تمشي على مقولة يعني وقفت على قرطاستي ؟ كل الناس تقط القراطيس على الارض

طموحة مملوحة يقول...

{~المباركية~}


ياكلون هوا يغلون الاسعار علينا .

شوف الدول الاجنبية اسعارها نار ويحطون ضرايب وديارهم ماشية فللي عندنا لو يمشون القوانين صح وما يفضلون ناس على الثانية تلقى الكل يخاف ربه !!


بس التجارة دايم فوق الجميع والفلوس تستاهل راس الشعب كله اهم شي الفلوس بعدين الشعب وصحته

غير معرف يقول...

وانتي شنو ممكن تسوين غير التحلطم مثل العجايز ؟

كلمتي احد بالقهوة واشتكيتي ؟؟

دقيتي علي البلديه وعلمتيهم ؟؟؟

ولا بس تتحلطمين ؟؟؟؟

طز بالرجالة يقول...

سمعي يا حبي
تبين تسوين شي عن هالموضوع بالذات و ما تتحلطمين بس؟
رفعي سماعة تيلفونج الحين..دقي على هيثم الشايع..تذكرينه؟ الي سويتي معاه مقابلة من فترة.ما ادري متى بس كانت بداية تعرفي على مدونتج
و كلوج بقشورج لما مدحتيه. المهم دقي و قولي له..ترى فيه هالموضوع و يهمني تعرف عنه. خلنشوف الطنطنة مالته ايام الانتخابات..بيطلع منها زبدة ولا بس عالهبني

الشركة امريكية و تهتم نوعا ما في البيئة و بعض منتجاتها مصنعة من مواد اعيد تدويرها
بس تدرين ان حتى في امريكا الزباين ما يتم تشجيعهم على ادارة التدوير عن طريق تخصيص حاوية لتجميع الاكواب مثلا و كل شي يروح في القمامة

و اذا ما سوى شي..اكتبي ايميل مرفق فيه الصور هذي و دزيها الي الهيدكوارترز في سياتل. اكاد اجزم انك بتحصلين رد.
اما في اسوأ الحالات و اذا طناش من الكل
سوي التالي: ترجمي هالبوست و سميه بلاوي ستاربكس الكويت على البيئة المحلية
علشان كل واحد يسوي قوقل له في العالم يوصل خير هني

تحياتي لج

طموحة مملوحة يقول...

غير معرف


اي بس اتحلطم بعد شفت شلون ؟ ماعندي سلطة

طموحة مملوحة يقول...

طز بالرجالة

تدرين والله انا قلت بدق على الشايع بس تعرفين الكويتييين خير خير خير وطناش فيما بعد ففكرتج حلوة اني ادز ايميل حق شركتهم بأمريكا لووول الاجانب يهتموون نوعا ما و احنا تعلمنا منهم كل شي مليق ماتعلمنا حبهم للبيئة وتعاملهم معاها بكل جدية ...

هذا الي راح اسويه انا قلت انشره بمدونتي وراح اتصرف ماراح اعدي هالموضوع على خير بالله عليكم منو الي يتحجى بالكويت ؟؟؟؟ مجلس الامة والوزراء شفتي مواطن مشا كلمته ؟؟ لووول يعني تقعدون تقولين لي تتحلطمين تتحلطمين اي اتحلطم بعد شسوي الشكوى لغير الله مذلة

خااالف تعرف يقول...

راح
ينبح صوتج
ويجف قلمج
ويتكسر كيبوردج

اذا تبين الالكويتيين حكومةَ وشعباَ
يهتمون بالبيئة


البيئة يااختي اخر اخر اهتمامات هالديرة!!

طز بالرجالة يقول...

حبي انت يا الحلوه
مو تفكرين اني صاحبة تعليق غير المعرف

انا انتقد و اعطي حل على طول..تعرفيني و من معزتج قلت هالكلام. و الا انت من انشط البنات الي شفتهم في الكويت و كم مره اقول لج بيصكونج عين ترا...خففي من نشر نشاطاتج

وايد تذكريني بعمري لما كنت بسنج
الله يحفظج

جبريت(عنيف سابقاً) يقول...

عادي انا ما استغرب من هالسوالف


لانه الشعب بالاساس ما تعلم عن النظافه ولا حتى شلون يعيد تدوير المهملات ولا حتى اي فكره عنده عنها همنا ودائما البلديات تفصل المهملات تشوف شنو يعااد تدويره وشنو يحرقونه بأفران عالية الحراره ويكون بنفس الوقت تستخدم الحراره لانتاج طاقه او اغراض ثانيه

ايي الاجنبي يشوف الشعب يقطط الزباله بكل مكان يسوي مثله وين المشكله والاستغراب؟؟؟

NOAH يقول...

The NoteBook

حدّه عجيب، بس ما يصلح للبنات:)

طموحة مملوحة يقول...

خااالف تعرف


ماراح افقد الامل :)

متفاءلة حدي بالشعب بس محبطة حدي من الجهات والحكومة لوول

طموحة مملوحة يقول...

طز بالرجالة


يالغالية ادري انه مو انتي والله بس عادي انا صج اتحلطم وايد لووول

شوفي كلامج احبه حييل والله فديتج لأنج صريحة وايد واحب الناس السيدة معاي

لووول شكلج كبيرة والله توقعت كبري بصراحة فديتج

طموحة مملوحة يقول...

جبريت(عنيف سابقاً)


على سالفة التدوير والبيئة صح كلامج والله من اهتمامنا صرنا نعرف هالاشياء ولو ماكنا مهتميين ونقرا ماكنا عرفنا شي فالمسؤولية مو مسؤولية الشعب

طموحة مملوحة يقول...

NOAH


لوووول لا عجبني وايد وشفته وايد بعد

يبا انتو تبون كل شي حقكم يالشباب خلوا البنات يشوفون حلال عليكم وحرام عليهم ؟؟

على جذي لازم اقلب واصير صبي لووول قصته عجيبة والله اووووف يقولون حبها صج من هالفلم يعني الحين يحبون بعض ...

Heart To Heart يقول...

(( في البداية عندما تحدثت عن فرض الضرائب على الشركات الي تبوق وتنهب من أموال الشعب وفوق شينهم قوات عينهم ما يهتمون بالبيئة الكويتية ، هني اقول نفرض قانون الضرائب ونحط اصابعنا بعينهم علشان نعلمهم شلون يحترمون شعب الكويت ))

بصراحة يا آنستي :

بعد قراءتي لمقالتج فإنه لا يسعني إلا أن أقولج ( جوكيوزال ) على الإسترسال الدفاعي للبيئة الوطنية والمحاولة للحفاظ عليها :)

وما أقولج إلا تعظيم سلاااااااااام لج :)


والسلام ،،

طموحة مملوحة يقول...

بوعبدالملك


لا تتعب نفسك ديليت علطول بس حبيت اقول لك الي مخه وصخ يفهم الامور بوصاخة والي مخه نظيف يفهم بنظافة مو العيب بالكلام الي اكتبه العيب بمخك


تت للمرة الألف

طموحة مملوحة يقول...

Heart To Heart

ترجم لي الكلمة الي بين القوسين ممكن ؟ لا تفهمني غلط مافهمتها غلط نفس بعض الناس :)

تشكر يالغالي :)

Heart To Heart يقول...

حشا والله أفهمج غلط

الي بين القوسين كلمة تركية ومعناتها شي رائع شي ممتاز هذا طبعا على مقالتج الفذة :))



والسلام ،،

طموحة مملوحة يقول...

بعد خشمي والله لا ادري ان قصدك زين بس في ردود موجودة قصدها ماكان زين فعلشان جذي قلت كل واحد ومخه ماكان الحجي موجه لك يالغالي :)

مشكور وايد