2009-09-30

مذكرات طموحة الصغيرة !!!!


في بعض الأحيان أجلس وسط زحمة الأطفال في منزلنا شاردة الذهن حتى أفيق من خيالاتي على حركات الأطفال وأقول (( الحمدلله والشكر مو صاحيين والله )) ثم اتوقف فجأة لأقول لنفسي (( شدعوة انا كنت مقصرة يوم كنت صغيرة )) .



نعم تصدر منا حركات غبية ونحن صغار لأن الصغار يتصرفوا بدون تفكير مسبق لازال عقلهم في مراحل نموه .



أتذكر بعض تصرفاتي الممتعة عندما كنت صغيرة كيف أقوم بخلق كلمات لها معاني مضحكة وأدرجها في حديثي مع العامة ليرسم على رؤوسهم علامات استفهام كبيرة وبعض الكلمات تشرح نفسها ، على سبيل المثال في احد الأيام عندما كنت في الصف الأول الابتدائي ذهبت للمدرسة وقلت لها : أبلة بروح أشرب ماي فيني ( هِئــــة ) !! وضحكت المعلمة وقتها لتقول للمدرسات عن كلمتي هذه والتي اقصد فيها (( بُفاق )) .



أعترف في موضوعي هذا أني كنت أكبر كاذبة عندما كنت صغيرة ، كانت السلبية الكريهة التي لا تعجب الصغار وهي الكذب ، أحيانا أكذب وأصدق كذبتي وأعيش وسط خيالاتي وعالمي الخيالي فيما بعد انقل للجميع ماتخيلته على انني رأيته على أرض الواقع حقا ، حتى اصبحوا يكرهون سماع تلك القصص مني أو بعضهم من يرغب بالاستمتاع بتعابير وجهي وانا اشرح وكأن الاحداث قد وقعت حقا وماهي الا خيالات اعيشها في داخلي فقط .

أتذكر عندما كنت في المرحلة الابتدائية اتفقت مع مجموعة من البنات على ان نخيف الطالبات بأننا قد رأينا اشباحا في قاعات مادة الرسم ، ولأن تلك القاعات كانت في الحقيقة (( جبرات )) وتحيطها الأشجار كنا نختلق وجود امرأة عجوز خلف المراسم وقد قتلت طالبة ورأينا الجثة بأعيننا ( هههههههههه ) وطبعا هنالك من الطالبات من جلسن يصرخن ومن تبكي ومن تشعر بالخوف .



الآن كان موقفي من الأمر اني كنت اعلم بأن هذه مجرد قصص اختلقناها لإخافة الطالبات ولكني صدقت كذبتي وبدأت اسرد القصة على عائلتي واحلف أمامهم أني رأيت الأشباح وهم يصرخون بوجهي (( لا تجذبين )).


أتذكر هذه السلبية في طفولتي وأحيانا أفكر كثيرا كيف كنت اتحمل نفسي هكذا ؟ ابنة اخي والتي هي تتشابهني كثيرا تتصف بنفس صفاتي في صغري ، لذا فأنا دائما ما أوبخهها وأقول (( شلون كنت اتحمل نفسي شلون ؟؟؟ )).


ربما كانت ذكريات سيئة ولكن تلك السلبية قد تغيرت ولله الحمد عندما نضجت ، أحيانا تشعر الفتيات بالخجل من ذكر صفات الطفولة التي كانت تدعوهن للحرج ولكني هنا اعترف بأني في صغري كنت أكبر كاذبة في التاريخ :q .



لاتخافوا هذه ظاهرة صحية :)




اشعر بارتياح وانا أعترف بالحقيقة :)




ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ


.



.


.



باجــــــــــــــــــــــــــــــي 9 أيام :)





ــــــــــــــــــــــــــــــــــــــــــــــــــــــــــــ



مو حسد والله الله لا يغير عليهم يارب بس ياليت الي عندنا يعرفون شلون يخططون لجامعة تليق بمستوى دولة مو كل شوي طالعين لنا مادري منو سرق ليتات السور مال جامعة الشدادية لوووول اللهم لا شماتة


22 comments:

well_serviceman يقول...

مرحلة الطفوله من اجمل المراحل ، وحتى الكذب فيها يتصف بالبراءه والكذب الأبيض :)

بس طبعا مو بكل وقت فيه أوقات الشطانه تلعب لعب هههه

بالنسبه للجامعه ، لا تعليق...

تحياتي

..pen seldom يقول...

هههههه

ضحكتيني بذكريات الطفولة ..

أنا مثلكِ ..

أحياناً أختي الصغيرة تتصرف تصرفات

تنرفزني وأعصب عليها , وفجأة أتذكر

أني كنت أسوي مثل هذه التصرفات

= = وأقول شلون كنت كذا ياربي ..

:p

يلا أهم شيء أستمتعنا بطفولتنا ..

وأيام الدراسة ..


.....

على فكرة , يعني جامعة الملك عبدالله صحيح رائعة وتقنياتها خيالية ..

لكن في جامعات وكليات عندنا

..............!

ما أقدر أتكلم عنها ..

:) يمكن مثل جامعة الشدادية اللي تقولين عنها .. أو أزود ..


.. تحياتي ..

Q8EL5AIR يقول...

اووووه سوالف الطفولة ماتخلص ,, عيل اكو واحد عقله براسه يقول حق امه من كثر ما كان شيطان ومتولينه طق " يمه يصير الواحد يذبح امه " !!
مجرم هذا ولا طفل !!




وتحياتي ..
ويسلمواااااااااااااااااااااااا :)

Hashimoto يقول...

مادري ليش يوم كنت بأولى ابتدائي
كنت اشوف واحد اكبر مني بسنة او سنتين
ماعرفه ولا يعرفني ..
كنت اروح اطقه بنهاية الفرصة على راسه
وانحااش
اروح الصف .. وما نخليه يدخل
وهو يموت قهر

لوووول والله مادري ليش كنت اسوي فيه جذي
مع اني مسالم
xD

------

كل واحد وهو صغير عليه حركات "أرعه"
لول

==========

على طاري الجامعة
ماقول الا ..
الحمدلله اني ماراح ادخل الشدادية
احسها بتكون سجن تبع برزن بريك @@"

سلة ميوّه يقول...

ضحكتيني ياطمووحه:)
أثاري انت مروجة الاشاعات ايام الابتدائي:)
اذكر وايد كانو بنات يخرعونه عن الحمامات (عزج الله والي يقرون )
انه في ينانوه وخرابيط:)
المهم لاتحاتين مو اكبر جذابه في اللي يصك عليج:P
بعدين القصص الطفوليه وفي وقت صغير من العمر ..هي خيال اكثر من انها كذبه....

انا خيالاتي عجيبه وانا صغيره :) راح احكيها بالبوست ان شالله في وقت ثاني....


ضحكتيني يا ام (هنه ) عجبتني



حافظج ربي لشبابج
حبي

رورو الشخبوطه يقول...

السلام..

ماذكر طفلتي عدل بس اللي اذكره انه كنت اشويه انانيه بس لما درست علم نفس عرفت انه هالشي طبيعي بالطفولة..

اما بالنسبه للجامعه اهي مكانها غلط بعز الزحمه ومدام ماحطوا الا سورها اللي بيطيح خخ صارله قرن موجود خل يغيرون مكانه لمكان استراتيجي مو بمنطة سكنيه وبالفروانيه الزحمة ..

ومشكوره..

Heart To Heart يقول...

آآآخخخخخخخخ من الطفولة .... يا حلوها من أيام كلها براءة ^_^

أنا يوم كنت صغير كنت أطبق عبارة الطاغية المعدوم صدام حسين وكنت أقول :

جذب جذب لين تصدق جذبتك :)

كنت أجذب على الي نفس عمري وأقولهم ترا عندي عصا موسى وإلى مو عاجبني فيكم راح أقلبه ضبع :))

صوت الكويت يقول...

بعد 9 أيام عيد ميلادك ؟
قولي لنا كم عمرك بس مو على طريقة طفولتك

3ash Wagef يقول...

الاخت طموحه لا تحاتين مو بس انتي
اذكر و احنا بهال ننطر الوالدة تطلع السوق و لا اي شغل ناخذ صابون الماعين و نرشه بالحوش و طيحه تزحلق و اذا ردت امي قلنا لها غسلنا الحوش لانه وصخ طبعا

تحباتي للطفوله

عاش واقف

طموحة مملوحة يقول...

well_serviceman



لا علق تكفة على الجامعة لووول اليوم اقول لأمي لو هناك في تخصص جيولوجيا اروح اكمل والله :)


يقولون هناك ماكو عقليات يبا عقلياتهم فذة مو طبيعية والله ويستحقون مو بس جامعة يستحقون جامعات ومراكز تعليمية اكثر والله

طموحة مملوحة يقول...

..pen seldom


أول شي فديت طلعتج بمدونتي يالغالية ثاني شي لو تعرفين ان الشدادية هي جامعة كان يحلم بها الكثيرين لسبب واحد الا وهو فصل الاختلاط في عز القوانين العبيطة الي تصدرها جامعة الكويت وندرة الدكاترة فماندري هالناس شلون تفكر صرفت البلايييين لجامعة لم تنتهي حتى الآن وكل يوم مبيوق شي منها ولا المسؤوليين بايقين ججم الف وجم مليون وحاطينه بجيبهم بحجة يسوون جامعة ملينا ننطرها ، وتصاميمها تعطيج انها خوش جامعة وانا ادري آخر شي بتصير اهي وجامعتنا الحالية وحدة يعني مو ويه تطور ، الواحد لمن يخطط لجامعة يحط ابعاد مستقبلية تخيلي ما يحطون دكاترة كويتييين الا الي دارسين دكتوراة بعثة من جامعة الكويت نفسها ، ودكاترة احفورييين قدم تخيلي ، عندنا دكتور مو طبعيي شرحه ولا شرح 60 دكتور مخلينه استاذ بالكلية ما يخلونه يدرس كدكتور لأنه دارس على حسابه @@

متخلفييين والله لووول

والي يقول الاختلاط وعيب ومن هالحجي محد خلانا نتعلم من الدنيا الا هالشي كاهي كليات شكثر مفصولة مو مختلطة ومواعد اشكرة جبال الباب وفساد مو طبيعي بالكلية على الاقل الاختلاط يخلي الواحد يحسب الف حساب لتصرفاته خاصة اذا كانت او كان عنده اهل معاه يدرسون بالكلية :)


الله يعينا ويعينكم انا لازم ازور السعودية واسلم على شيخكم واقول له عسى الله يحفظك وتطور المملكة من الاحسن للأحسن يارب :)

طموحة مملوحة يقول...

Q8EL5AIR

لووووووووووووووول امبي انت مو طبيعي لوووول


وايد اشياء بطفولتي تفشل محتاجة شوية شجاعة علشان اعترف فيها لووول

طموحة مملوحة يقول...

Hashimoto

مساكيين الي بيدشون الشدادية بنقول لهم ( شدوا ) حيلكم بالشدادية لوووول يبا والله ادفع الاف وادرس برا دراسة محترمة معترف فيها احسن من الدراسة بجامعة عاهة ماتدري وين الله حاطها وما يغثني اكثر الا كثرة الاجازات ولا الشعب يبا اجازات بعد الحمدلله والشكر احس ان دراستي كلها عبط ما ياخذونها بجدية اكثر :(

SHOOSH يقول...

آنا أتذكر من طفولتي شي واحد بس اللي اضحك عليه ألحين

لما كنت صغيره و أنام عند أمي و أبوي

و لما يتأخر الوقت و آنا للحين أحوس بفراشي و أتقلب ما نمت

كان أبوي يطق بيده الخشب مال السرير

طق طق طق

لووووول و كنت أتصروع

و كالعاده كان كلامه ما يتغير .. يا حرامي سمع صوتج يا نامي بتييج القطوه

لوووووووول

طموحة مملوحة يقول...

سلة ميوّه



لووووول فديتج والله اي والله هالقصة للحين يقولونها لي لوووول انتي لا تشوفين وانا صغيرة كنت ارقص واسوي حركة خايسة باصبعي لووووول فشلة كانوا مصوريني فيديو وحطوا الشريط ذاك اليوم من كثر ما انا منحرجة قعدت ابحي لوووووول

طموحة مملوحة يقول...

رورو الشخبوطه


اهي بس المكان ؟؟؟ ياخراشي على طاري المكان شكله بيسون الجامعة ويخلونها فترة طويلة تصير مسكونة مثل ستاد الشيخ جابر بعدين يقولون صبروا شوي علينا تونا نستوعب لوول

طموحة مملوحة يقول...

Heart To Heart



لووووول انت مثلي والله كاااااااااااك

طموحة مملوحة يقول...

صوت الكويت



بصير 22 لووووووووول

طموحة مملوحة يقول...

3ash Wagef


لوووول ذكرتني كنت احب اغسل الحوش علشان اقحص بالماي واطيح لووول واذكر ببيت ناس اول مادشينا ولا كانوا يغسلون الحوش خذيت معاهم المخة وقعدت اقحص فيها واطيح لووول

لا حلوة الحركة بس ساعات تطلع الصعرورات لوول

طموحة مملوحة يقول...

SHOOSH



لوووول حدج كسرتي خاطري ذكرتيني بزوزو بنت اختي فديتها هم جذي بس اهي ماتسمع الكلام وتزف امها وابوها بعد لووول

والله الطفولة تونس :)

mo3ath يقول...

لووول زين يت على اشباح ، ايام الروضه انا داز صاروخ ارض جو قلت بوش يانا الروضه على دبابه ولا وركبني بحضنه وخلاني اسوق ، على ايامها طبعا بوش الاب لووووول

لي يومج اخوي ماسكها علي XD
يلعن خيري كنت مصروخجي حزتها P:

طموحة مملوحة يقول...

امبي امبي امبي امبي معاذ كاااااااااااااااااك


ماقدرت اتنفس والله من كثر ما ضحكت يالصاروخي انت من صجك لوووووووووووووووووووووووووووووووووووووووووووووووووووووووووول

ودي اشوف هالخيال الي كان براسك شكلك كنت حدك كاشخ آل انا الي قعدت بحضن بوش لووووول