2009-09-26

Me No English :D

كنت راح بكتب موضوع وطني شوي بس لقيت الكلام حامي قلت بسج ياسارة صوتج ماوصل للحين من الازدحام وكثرة الاصوات ماراح يوصل الا ليمن الاوضاع تصير سودا ومتنيلة بستين نيلة علشان يردون عليج ويقولون (( لي فات الفوت ماينفع الصوت )) .. .








وانا قاعدة اسولف بالمسنجر وصلني هاللنك مع شوية شماتة قلت خل اقرا اشوف شنو فيه هاللنك ..
























بصراحة ياتوني علشان لا تقول أهل الكويت مطنشين بح صوتنا من كثر ما نتحجى ولا احد يسمع ...




شي طبيعي ياتوني يصير تردي بالتعليم وتصدع وتخبط وتعفس ..






الي يقول لك يصرفون المليارات علشان منع الاختلاط ، حطوا ثقتهم بالديمقراطية وطلبة الجامعة وخلوهم يمارسوون حريتهم تعنطزوا على راسنا وقالوا عيب واختلاط ومسخرة ومن الكلام الي يحبه قلبك ، طبعا انا ما أقول الا الله يعين دولة فيها مخوخ جذي وبصراحة كرهت سالفة الانتخابات بالجامعة لأن القرارات الي تطلع (( بطييييخ )) حدها والله .






ياتوني أنا لمن اقعد اتناقش مع دكاترتي ولمن يقعدون يقارنون بين جامعة الكويت اول والحين وجامعة الكويت مع ابيخ جامعة في العالم تقول الله يعيينا بس شنسوي ياتوني يدخلون القرارات الدينية حتى في العلم .






الله يحفظك ياشيخ السعودية لمن قلت (( لا خلاف بين الدين والعلم )) يعني الواحد شوي يثقل مخه على سوالف الاختلاط دامنا داشيين نتعلم شكو تفتحون مخهم على سالفة اختلاط ، وانقهر ياتوني اكثر لمن تقول لهم الاماكن الثانية فيها اختلاط شكو احنا الجامعيين يقولون هذول كبار انتو مخكم للحين صغير @@






واحسرتي اذا كان مخ الجامعي الكويتي (( مزنخ )) ويفكر بشهوته بس على قولة بعض الناس .








الطالب في المرحلة الابتدائية :




مدلع ، مولع ، ممسخر ام المدرس وياويل المدرس اذا عطاه درجات مو شي ، ينطق على يد ولي أمر الطالب ، والمدرسين مايقصرون ياتوني تدري شيسوون ؟؟ من كثر ما اهم ميتنيين على سالفة التدريس مو لله طبعا يمشون الطالب وينجحونه واهو بلييد موفاهم ولا شي ووالله العظيم والله العظيم واحلف بالله العظيم ان مرت علي طالبة توها متخرجة من الثانوي والله العظيم ماتعرف تقرا شي وتكتب كلام كله (( بدليات )) @@.






الطالب في المرحلة المتوسطة :




كبر وصار شي وقوت شخصيته ، ويقعد جدام زملائه يوريهم شلون راح يمسخر المدرس جدامهم ، الطالبات كل وحدة تقرر مصيرها ، أدرس واشد حيلي ؟ ولا اصير بوية والبنات يحبوني ؟


والمدرسات والمدرسين يطبقون مقولة (( دعه يعمل دعه يمر )) بس على طريقتهم (( دعه يرقع دعه يمر )) ويتخرج الطالب مخه طاسة 4 سنين ما استفاد منها شي .






الطالب في المرحلة الثانوية :






يعد الدقايق علشان يتخرج بسرعة ، وتلقى مدرسين الانجليزي يمشوني حفظوا القواعد مو فهموا (( حفظوا )) وحفظوا ال setbook الي تخرجت من الثانوي وللحين أسأل شنو استفدت من الset book ناخذ درجات على حفظ مو فهم ودشينا الجامعة الي تخرجوا من المدارس الانجليزية ماشاء الله عليهم مشوا واحنا متعومسين مع القواميس والترجمة ولوعة الخشم .








ياتوني فيك الخير تدرس حالة التعقيد الي احنا نعيشها ، ترا ما وقفت على التربية ههههه ، شوف الصحة تطق راسك ، شوف المجاري تقعد تلطم ، شوف الحالة المأساوية ياراجل انت وقفت على التربية بس ؟؟؟
















سامحيني ياكويت ، أشوف الدول الي حولنا تمشي وتتطور وتبحث عن العقول المتعلمة وتنمي دولتها فيهم وتعتمد عليهم واشوفج ياكويت تمشين امور عيالج بدون تخطيط ولا تطوير حتى الي توه طالع من بطن امه ماسك بلاك بيري ؟؟ من زود الشطارة يعني ولا من زود الفهامية بالتكنولوجيا ؟








شي يقهر والله ونصيحتي للكل اخذوها مني بكل عصبية بسكم تدليع بعيالكم وخلهم يدرسون ولا تقولون المدرس غلطان وانت الصح !! ادري بعض المدرسين يبطون الراس ولاهم كفوا يكونون مدرسين بس مو تقوون شوكة عيالكم ترا كله لمصلحتهم ، ومرة وحدة دخلوهم مدارس اجنبية ولا درسوهم برا والله التعليم بالكويت بطيييييييييييييخ .








واحر قلبي حــــــــــــــــــّرا :(

















25 comments:

ابو عبدالملك يقول...

طبعا انتي تروحين وتلفين على سالفة الاختلاط وتقولين ان الناس يقولون عيب ومصخره
وفي ناس قالت الاختلاط حرام
ليش ماذكرتي حرام؟؟
مع ان الاولى انج تقولين ان في ناس قالت ان الاختلاط حرام

انا اقولج ليش ماقلتي حرام لان ان قلتي حرام راح تعارضين مبادئج الليبراليه
وان قلتي حلال يعني حللتي ماحرمه الله
والتحليل ذنب كبير ويمكن يوصل للكفر والعياذ بالله

فانتي توهقتي فقلتي ماله داعي اجيبها من ناحية الشرع الاساس
ف انتي ذكيه شوي مو واجد

ثانيا
اما على سالفة الفلوس التي دفعت لاجل منع الاختلاط فهي دفعت مو لاجل الاختلاط بل لاجل عرضج واعراض المسلمين
فهمتي الموضوع
ف لاتقولين والله زماله وصداقه وتعاون مافيها شي
لالا فيها شي
وانتي عندج صديقاتج شوفيهم كل وحده جم تكلم شخص من الجامعه تبين تقولين رفيجاتج مايكلمون بقول لج كذب المنافقون ولوصدقوا


اما على سالفة ادخال العلم بالدين
ف مااعتقد انج ماتعرفين جابر بن حيان
والخوارزمي وابن سينا وابن النفيس وابو اسود الدؤلي ومن معاصريهم خالد الجبير واسامه بن لادن
هؤلاء جميعهم علماء مسلمين وطبقوا الدين مع العلم ولم يحصل شي
لماذا انتي ومن على من شالكتج يريدون فصل الدين عن العلم والملك خادم الحرمين الشريفين قال لايوجد تعارض بين العلم والدين

اما على سالفة تردي التعليم
ف انا اللي بقوله ان من هم على شاكلتج هم الذين مسكوا وزارة التربيه امثال ظلم الصبيح وفوضى الحمود
هداهم الله الى مايحبه ويرضاه

ف انا انصحج انج تقرين كتب البخاري ومسلم لان افضل لج
واتمنى عرض الرد من منطق حرية الراي والراي الاخر التي انتي ومن على شاكلتج تدندنين عليها


وتم الكلام وربنا محمودو وله المكارم والعلى والجودو ثم الصلاة على محمد بن عبدالله الهاشمي وصحبه مناحه قمريا واورقه العودو
والسلام ختام



ملاحظه:تم مساعدتي بكتابة هذا الرد بو صهيب حفظه الله ورعاه من كل مكروه

خالد احمد محمود يقول...

صباح الخير
طموحه ومملوحه
وكل عام وانت بخير

وأنا عاتب عليك كثيرا كثيرا جدا

هموما

أحترامى وتقديرى

elsha3er يقول...

السلام عليكم

ازيك ايةالاخبار يارب تكونى بخير

حاسك محبطة وبتقولى صوتنا ما بيسمعش واية يعنى صوتكمهما اتنبح فى يوم حيوصل فى المهم انك تكونى مصممة انك توصلى وفعلا عندك هدف وخطة للتغير ما يكنش كلام وبس واحنا والله كله الحال من بعضه تعليمنا كذالك صعب جدا وما بنشتغلش بى بس ادينا بنعافر

يالا مستنين موضوعك

تحياتى اختى الغالية

احمدالشاعر

لا تـــشـــتــــاق يقول...

باشا
لتانى مره اقول انك دايما مميزه
ودايما بستفيد منك

Ducati يقول...

والله قلوبنا متروسه يا وخيتي

شنقول شنتكلم

الله كريم

وانشالله نشوفج بورشة المدونين ترا حدي متفائل فيها

well_serviceman يقول...

مو أول مره تخرج بريطانيا تقريرا "يفشل" عن الكويت ، هذي يمكن ثالث مره وفي كل مره تزيد نسب الفساد وتقل نسبة الحاصلين على درجة البكالريوس... ماعليه يا توني ، نحن شعبا يستغل القوانين "الدايخه" للتعليم العالي ونتحايل على التحصيل العلمي، امسحها بويهي!!

طموحة مملوحة يقول...

بوعبدالملك

ماشاء الله صارت في مساعدات على الكتابة اقعد منو قدك :)

شوف انا ما قريت كل كلامك لأنه معيود مية مرة وحفظته بدون ما تقول رايك ادري شنو راح تقول لووول .

روح حق الديرة الي كله تروح لها الدولة الاسلامية الي ولائك لها الحين سووا جامعة عريقة مختلطة ماشوف احد قال شي :q

بعدين الاختلاط شي والخلوة شي اذا انت مو واثق من نفسك لمن تكون بمكان مختلط فانحاش لأن في ناس عادي تعودت وما اتوقع يشكل لها هالشي قضية كبيرة انها تمشي وتفكر بالاختلاط فقط من الناحية الجنسية ترا لاعت جبدي تحسسوني ان الانسان انخلف يطالع الطرف الآخر للجنس فقط :S

طموحة مملوحة يقول...

خالد احمد محمود


وانت بخير وبصحة وسلامة

ليش ياخوي ؟؟ أخاف انا مسوية شي غلط ومو حاسة بنفسي ولا تزعل قول لي ليش زعلان ومستعدة اعتذر لك افا عليك

طموحة مملوحة يقول...

elsha3er


أقول لك ايه يابن خالتي . من ناحية الاحباط اي والله تصدق بالله كتير عندنا بيدرسوا في مصر والأردن وبيشتروا شهادات دكتوراة وماعرفش ايه ولمن تسأله مش فاهم حاجة @@

مش معقول كل الشعب عندو شهادات بس قليل من حملة الشهادات الي بيفكروا بطرق علمية ..

بجد انا محبطة اوي :(

طموحة مملوحة يقول...

لا تـــشـــتــــاق


ربنا يخليك يارب متشكرة اوي اوي

طموحة مملوحة يقول...

Ducati


لوووول اي ورشة اي بطيخ انا شكلي بيييب لي مايكروفون واحطه بكل مدرسة وانزل زف بالمدرسات والناظرات والطالبات والطلبة .. اوووووف لي متى نشوف شوي الي يراعون ربهم وضميرهم ؟

طموحة مملوحة يقول...

Ducati


لوووول اي ورشة اي بطيخ انا شكلي بيييب لي مايكروفون واحطه بكل مدرسة وانزل زف بالمدرسات والناظرات والطالبات والطلبة .. اوووووف لي متى نشوف شوي الي يراعون ربهم وضميرهم ؟

طموحة مملوحة يقول...

well_serviceman



تصدق !!! بديت افكر اروح اشتغل بالامارات ولا السعودية ولا قطر ، تعبت من وضعنا هني والله الشر يعم والخير يخص على قولتهم وتعبنا والله تعبنا استغفر الله

mo3ath يقول...

بوعبدالملك وحش بروحه ، طلعنا كفار قريش الله يسامحه ونسى ان وقت الغزوات كانوا الصحابيات الناس يطلعون مع الجيش للتطبيب والمداواه ، شنو رايك الشرعي بهالموضوع ؟ ولا انت احسن من الرسول عليه الصلاه والسلام ؟ كلنا مسلمين وفيني من الاخلاق والتربيه مثل الي عندك وزود بس مشكلتك انك تاخذ الناس بالشينه ونسيت اهلنا اشلون ربونا !!

انا معاك في بعض النقاط الي قلتها بس حضرتك نسيت ان الزمن تغير والناس تغيرت واكبر دليل لبسك وطريقه عيشك اليوم ، حتى لوخذينا الامور المباحه وبعض المسائل الشرعيه بالتعامل ... الفكره ان الدين يسر مو لازم تقفل كل شي انه مايجوز وماله مخرجي شرعي ، اكبر دليل البنوك الاسلاميه والمفروض تعاملها اسلامي عندها قسم الافتاء وقادربن يطلعون حلول شرعيه حق الاحكام المستجده بالتعاملات البنكيه ، الله يثبتك على الطاعه ويفتح عليك بالعلم والمعرفه

سوري ساره دشيت مع الريال بموضوعج بس من زمان ودي اكلمه ;)

موضوع التعليم عندنا قصته قصه والحال مايسر الي يشوفه وان شالله نلقى حل بأقرب وقت ;)

إمـرأة لا تُنسـى يقول...

كلامج ياي بالصميم يا طموحة !



.. فعلا مأساة شعب

طموحة مملوحة يقول...

معاذ

اخذ راحتك افا عليك لوووول

يبا لو ايييب لي ستين واحد يفسر معاه مخهم مقفل حده فمعطتهم اكبر طناش ومريحة اعصابي من حواراتهم المعوقة :)

طموحة مملوحة يقول...

إمـرأة لا تُنسـى



فديتج :)

Heart To Heart يقول...

(( كنت راح بكتب موضوع وطني شوي بس لقيت الكلام حامي قلت بسج ياسارة صوتج ماوصل للحين ))

أنصحج نصيحة :

ريحي ملايكتج :))

كلن راضي بعقله حتى المجنون !!!

خليه على ربج يفك هالعوقه :))



والسلام ،،

طموحة مملوحة يقول...

ملايكتي ماتبي ترتاح بس مشكوك بأمرها راح نراجع لجنة الفتاوي الي يترأسها بوعبدالملك علشان يحدد ما اذا كانت ملائكة حقا او شياطين والعياذ بالله لوول

ابو عبدالملك يقول...

شباب
الرسول صلى الله عليه وسلم يقول(اتق الله حيثما كنت واتبع السيئه الحسنه تمحوها وخالق الناس بخلق حسن )

والله مليت
ياشباب يبا شرايكم اعطيكم رقمي علشان نروح لاي شيخ معروف بالكويت ونحل القضيه ونفتك

طموحة مملوحة يقول...

بوعبدالملك

فكنا من قرقتك لا تتعنطز على راسنا آل شيوخ آل اكثر الشيوخ بالسعودية والحين ماتحجوا على سالفة الجامعة الي بالسعودية ومختلطة يبا انت مايعجبك العجب ولا الصيام برجب ... مو عاجبك وجهة نظرنا عنها ماعجبتك بس لا تتفلسف على راسنا وتحسسنا ان احنا بدولة كفر ..... الحمدلله والشكر

ابو عبدالملك يقول...

اتعب مع الليبراليين اللي كل واحد يعبد الهه اللي اهو هواه

ياحجيه ياستاذه يارسامه يا مهندسه يادكتوره
علماء السعوديه افتوا من زمان بعدم جواز الاختلاط يعني تبينهم على كل جامعه تفتتح يفتون

يابنت الناس انت تقرين كتب عن شنو تقرين ابي افهم

يبا العلماء مو ماسكين السلطه
اللي ماسكها الخائن فهمي ياطموحه

يابنت الناس نبيلكم الخير

يااخي الاختلاط جا من ارادة الشعب يعني الله يجزاج خير احترمي الاراده
لاتكفرين بمبادئج اذا ساعدت الدين

ابو عبدالملك يقول...

معاذ
الله يرحم والديك
انا فصلت بسالفة الاختلاط وقلت ان في اختلاط مؤقت وفي اختلاط دائم
والغزوات مؤقت
لكن الاخت طمووحه ماتنشر كل الردود اللي اكتبها لانها بنت تتبع هواها تحط اللي يمشي وياها واللي ضدها ماتحطه

طموحة مملوحة يقول...

بوعبدالملك

والله ساعات اشك انك عبيط وساعات تستعبط وساعات تطبق مبدأ خالف تعرف علشان الناس كلها تتحجى عنك وعن ردودك المعوقة :)

الحين تقول إله مادري شايفني حاطة صورة بوذا واقول هذا ربي ؟؟؟ طبعا هذا دليل على خبالك الزايد والي ماتعرف تفرق بين بين الفكر واعتناق دين آخر او الاشراك بالله :) لا تلخبط الامور وهي سهلة ياخوي .

وثانيا ماشوف الشيوخ تحجوا ولا تقول لي الاختلاط بالسعودية حلال وبالكويت حرام اذا مو عاجبك مو مجبور تقعد بالكويت على فكرة :)وايد من شاكلتك راحوا لجبال افغانستان وعاشوا هناك مريحيين بالهم :)


وثالث شي ردودك ساعات هبلة بصراحة ووايد امسحها لأني مالي خلق اتجرجر معاك بأمن الدولة خو انت ماخليك احد حتى امير الدولة ماسلم منك تبي سارة تسلم من كلامك العبيط هذا ؟؟؟

روح اكتب موضوع بمدونتك واشرح لهم واعزمهم على الموضوع موضوعي محدد عجبك كان بها ماعجبك بستين طقاق يطقك

طموحة مملوحة يقول...
أزال المؤلف هذا التعليق.