2009-10-02

اتحادهم .... الله بالخير !!!


تعمدت بالعنوان أقول اتحادهم لأني دائما ما أردد ان الاتحاد الوطني لجامعة الكويت يمثل بعض او خل نقول الاكثرية من طلبة جامعة الكويت وليس شرطا ان يكون كلهم .








في يوم من الأيام ذكر لي شخص من الطلبة الذين يعملون في الاتحاد الوطني أنهم يفتخرون بالوقوف ضد الادارة الجامعية في كل قرار .






ووضعت في بالي ان القرارات ان كانت في صالح الطلبة او مو لصالحهم المهم الاتحاد يوقف ضد القرارات هذي .








قريت أمس في احدى الصحف المحلية عن عزم الادارة الجامعية انها تأجل الانتخابات لتاريخ 25 -10 اعتقد المهم ان يأجلون لأسباب صحية ومشكلة انفلونزا الخنازير وغيرها الله يعطيكم الصحة والعافية .

ولو اني اشوف ان المرض هذا مو خطير جدا مثل ما اهم مصرقعينا فيه ، بس تأجيل الانتخابات اشوفها لصالح الطلبة وعلى قولتهم الوقاية خير من العلاج .

بكتب وجهة نظري بالموضوع ولو انها مشابهة لوجهة نظر بعض القيادات الي وقفت مع الادارة الجامعية .

للأسف توقعت الوسط الديمقراطي راح يأيد هالشغلة وأصلا لصالح الوسط انه يأجل لأن مثل ما نعرف المهم ان الطالب يتعرف على القوائم الطلابية أكثر عدل؟

بعض الطلبة المستجدين أول أيامهم يكونون مخترعين من اندفاع أعضاء القوائم لهم ، فتلقاه يتخذ قراره بسرعة وبدون دراسة مسبقة أو شي يشوفه جدام عينه .

اذا حقا يا الاتحاد تشوفون مصلحة الطلبة قبل كل شي فالتأجيل لصالح الطلبة ، وقضية ان الطالب يكون عنده وقت يدرس ، على فكرة سالفة الانتخابات ماتستحق نعطيها كل وقتنا او نطلع من محاضراتنا علشان الانتخابات ، يقدر عضو القائمة انه يساعد الطلبة ويساعد نفسه بنفس الوقت مو شرط يساعدهم اول العام بعدين يصير خير طول السنة ننطر على ما يفضى من محاضراته وامتحاناته ، فموضوع ان الطالب اول السنة يكون ما عنده ضغط دراسي اشوف هالعذر ضعيف جدا خاصة الدراسة بالجامعة ضغط من أول يوم وتعودنا هالضغوط بصراحة مو شي يديد .

وماداموا في خدمة الطلبة يا اتحاد اخدمهم علشان يشوفون المستجدين ، مو من أول السنة يصوتون واهم مايدرون شالسالفة !!!

المستجدين بحاجة لوقت علشان يعرفون القوائم عدل وعلشان يشوفون منو الي ينافق ومنو الي يخدمهم (( لله )) !!!

اليوم الواحد في الحياة الجامعية يتعلم منها المستجد كثير من الأمور ، فأتوقع لو تتركون لهم المجال انهم يتعرفون على جميع القوائم يكون أفضل ، وبنفس الوقت ماتكثر التجمعات وتساعد على انتشار المرض مثل ما قالت الادارة الجامعية .

نصيحة للقوائم الطلابية كلها :

اذا تبون تنشرون فكر قائمتكم فابتعدوا عن القذف و تشويه السمعة والاشاعات والحجي المأخوذ خيره ، واشتغلوا لله اذا كان فعلا (مصلحة الطلبة) أهم شي عندكم :)

































23 comments:

اجتماعي يقول...

إنتي حرام تكونين من هالجيل ..

ياليتج دفعة 1995 ..
لان ذيج الأيام كانت الانتخابات وايد أحلى وأرقى ..

وعلى الأقل ..
ما كانوا مسوين مسلسل دروب الشك والدعاية القوية للمستقلة :d

وفكر البيت الكويتي الأصيل ما كان طالع بذاك الوقت ..

لأنه طلع سنة 1998 أو 1999 ..

فأعتقد المنافسة حلوة بذاك الوقت ..

عموما ..
مستحيل الاتحاد يأجل الانتخابات لأن هالشي راح يغير حساباته بوايد شغلات ..

فـ خلينا على هالوضع أحسن :)

طموحة مملوحة يقول...

اجتماعي


يالله نكمل دراستنا برا :q

اهي على سالفة مسلسلات بس ؟ لووول

حتى الوسط طلع بأم البنات


بس الي باط جبدي ان الوسط المفروض مايعارض لأن كل ما تأخر هالشي لصالحه

ابو عبدالملك يقول...

طمووحه
سؤال الله يجزاج خير؟؟
الحين بالجامعه اذا ماخاب ظني ان تصير مناظرات فكريه ؟؟
زين المناظرات هذي اذا بعرف متى تكون وين اروح؟؟


اما سالفت القوائم
ف انا اقول مالها داعي
يعني تسبب تفرقه بين الطلبه
وتسبب مشاكل وتوصل الى الطق
وتلاقي دكتور حدسي يسقط طالب لان من الوسط والعكس صحيح

ف انا لو يلغون سالفة الانتخابات افضل

طموحة مملوحة يقول...

بوعبدالملك

صح كلامك والله الانتخابات ضرت اكثر من كونها افادت
ان شاء الله راح اسوي تغطية واشوف متى وقت المناظرات واعطيك خبر :)

ابو عبدالملك يقول...

طموحه
اي ضبطينا قبل المناظره بجم يوم عطيني خبر

وقومي صلي

اي نسيت
انتي عقلانيه

طموحة مملوحة يقول...

اذا مالي خلق ارد على احد اقول whatever



فراح اقول لك whatever :)

تقبل الله طاعتك :) يالعقلاني

هالحـــــزة يقول...

من زمان ,, والله بالنور ..

رورو الشخبوطه يقول...

السلام..

انا احس طبيعي هالشي المفروض الانتخابات عقب عساس نعرفهم عدل انا تخرجت من الجامعه ولا شفت شي يذكر..

يارب يتم التاجيل ويارب تتغير الموازين ملينا من نفس الناس لا وكل يوم نصدم فيهم اكثر..

الله يوفق اللي فيه الخير لكم يارب..

أحمد الحيدر يقول...

مساء الخير ..

أول عبارة ودي أعلق عليها اهي " اتحادهم لأن يمثل بعض أو يمكن معظم الطلبة " ..

وتعليقي إن يمثل " بعض " الطلبة فقط لأن باجي الناس اللي صوتو للقوائم الثانية واللي نسبتهم أصلا فوق 50 % مالهم ممثلين .. وطبعا شخصيا اعتقد لازم يكون فيه تمثيل نسبي لكن بوجود قوائم ( مع احترامي ) دايخة فكريا مثل منافسي الائتلافية ( الكبار تخطيطا وتنظيما ) فلا أرى هالشي وارد ..

وثاني شي الوسط مع الاسف وايد مواقف يصف مع الائتلافية لسبب ما أو لآخر من عمر مو من اليوم .. تلاقينهم متفقين على صفقة تبادل أصوات معينة فما يبون يخربون العلاقة .. والائتلافية اهي الطرف الأقوى ودايما يحقلها تفرض شروطها ..

وإذا تلاحظين استخدم كلمة الائتلافية مو اتحاد الطلبة ولا الاتحاد الاسلامي والائتلافية فهي مقصودة .. لأن الاتحاد اهو الائتلافية فقط لا غير .. مع احترامي للاتحاد الاسلامي اللي طلعو مالهم كلمة ومجرد تكملة عدد في الائتلافية ورجعوهم بضغوط من الكبار غصبا عن اللي ما يرضى :)

أتفق معاج ويتفق كل منطقي ومتابع للانتخابات خلال السنوات الأخيرة إن التأجيل لصالح القوائم ضد الائتلافية بسبب لعبة الضحك على المستجدين اللي تتمارس بالاتفاق مع الادارة الجامعية كل سنة .. لكن يبدو قيادات الوسط لهم رأي آخر نتمنى نعرفه ..

تحياتي :)

mo3ath يقول...

لووووول اهم شي المنشورات ان القائمه الفلانيه سنه الف وتسعميه وحطبه قالت جذي وبعدها بسنتين ماطبقوا الي قالوه XD

انا اقول الله بالخير ، اذا هالسنه محد تهاوش راح يصير انجاز P:

reemas يقول...

شاخبااااري انتخابات جامعه
الحين انتخابات مجلس امه و مو مترقعين

ديمقراطيتنا فاشله دام انها تعتمد على المذاهب و القبائل
و اللي قاعد يصير الحين جريمه في حق البلد

هذي مسرحيه هزليه و تضرنا اكثر مما تنفعنا

بلاها

الـسـنـبـلـة يقول...

طموحة بعد إذنج أنا بفصل بالموضوع

توصية مجلس العمدا بتأجيل الانتخابات و تجميد الانشطة الطلابية في كل المواقع الجامعية بسبب انفلونزا الخنازير لمدة 3 أسابيع من بداية الدوام !!

أي احد يتأمل هذه التوصية يكتشف إنها توصية - عذرا - بس غبية !

ليش ؟
لأن الفايروس مو واقف على تجمعات الانتخابات و لا عى الأنشطة الطلابية عشان ينتشر ، و انا استغرب شلون الجامعة نست إن الكلاسات 5أمتار ب4 أمتار و يقعد فيها 50 طالب لمدة ساعة البعد بينهم لا يزيد عن 10 سم !!

و النقطة الثانية

إن الإدارة الجامعية مالها علاقة بانتخابات الاتحاد .. لأن انتخابات الاتحاد تحددها الهيئة التنفيذية !!
و بما انج وسطية أكيد تعرفين لوائح الاتحاد الوطني لطلبة الكويت كون الوسط جزء من تاريخ الحركة الطلابية لقيادته للاتحاد في السنوات السابقة .

و النقطة الثالثة و اللي انا فعلا استغرب منها اجتماع مجلس العمدا يحضره عمداء كل الكليات بما فيهم الكليات الطبية ، فكيف يوافق عمداء الكليات الطبية على مثل هذه التوصية دون توضيح حقيقة الفايروس ؟!

العالم كله متخوف من تحور فايروس انفلونزا الخنازير نتيجة اتحاده مع فايروس الانفلونزا الموسمية الذي ينتشر شهر 11 نتيجة التغيرات المناخية ، و إذا لا سمح الله تحور فسيصبح الفايروس أشد خطورة و فتكا و راح يتحول إلى وباء .. و إذا انتشرت الحالات راح يتطلب تأجيل الدراسة !!

و انا من تجربتي الحمدلله احنا بكلياتنا صار لنا اسبوع مداومين و لا بعد 50% من الطلبة مداومين بالمستشفيات يعني بيئتنا موبؤة و أخطر من كل الكليات الثانية ، لكن والله الوضع طبيعي و الحمدلله و الله يحفظنا ما سمعنا بولا مصاب أو اشتباه .

فيعني الجامعة قراراتها خواااااااااارة و اتمنى انها تطلع قراااااراااات تسوى و تفيد الطالب أكثر !!

و أعتذر عالاطالة

well_serviceman يقول...

طموحه ، تقبلي مني اجمل التحايا وتحمليني شوي بالرد:

أولا، إتحاد طلبة الجامعه يمثل "جميع" الطلبه، لسبب واحد ، بما أن القائمه تلك تم إختيارها من قبل "الأغلبيه" المنتخبه بذلك تصبح "فعلا" تمثل طلبة الجامعه ككل ، مع إختلاف المبادء والآاراء في بعض الأحيان ، ولكن هذا لا يعطي صفه لكائن من كان ان يحترم العمليه الديمقراطيه واختيار الطلبه ، والحال متساوي مع حال مجلس الأمه ، فمن يصتطيع القول بأن المجلس لا يمثل الشعب ككل؟

ثانيا: تأجيل الإنتخابات هذا ، المقترح من قبل الجامعه ، ليس إلا أمر مشين تقوم به حتى "تعاند" القوى الطلابيه ككل وليس الإتحاد فقط ، وهي ليست خطه احترازيه ولا حتى خوفا على صحة الطلبه ، فقد كان الأولى منهم تأجيل الدراسه ، فبعض القاعات تكون مكتظه بشكل "أخس" من قاعات التصويت ، فأين خوفهم هذا على الطلبه في مسألة الدوام الجامعي؟ ولماذا فقط يوقفون الأنشطه الطلابيه وأي عمل تقوم به منظمه طلابيه ولكنها تغض البصر عن أعمال الهيئة التدريسيه وأيضا الدوام ككل؟

لقد سئمنا من إقحام حجة هذا الفايرس في كل قرار يصدر من جهه مشينه ، وهذا صحك على العقول ولم أعتقد بيوم بأن ينجح هذا التكتيك مع كائن من كان

note: صدمتيني لمن كتبتي انه الإتحاد لا يمثل كل الطلبه ، حسب علمي أنتي ناشطه بالعمليه النقابيه وهذا أمر غريب جدا لا يجب أن يصدر من شخص يعمل في منظمات كهذه ويحترم رأي الأغلبيه الطلابيه في حق اختيار من يمثل الجامعه "ككل" او لا.

وتقبلي مني فائق الاحترام والتقدير :)

السواء يقول...

المفروض و بوجهة نظري يجب التأجيل الكورس الثاني .

أولا يتفادى الطالب الالتهاء بالانتخابات
ثانيا نتفادى انتشار المرض الحالي و مع الكورس الثاني يكون خف انتشاره ان شاء الله

لكن اتحادنا همه الفوز و همه المقاعد و همه تطبيق اجنده تياره قبل كلشي .

سارة نزلت الفايرفوكس بس علشان اعلق بالمدونة مالتج !

طموحة مملوحة يقول...

هالحـــــزة

كيف الحال ؟ :)

طموحة مملوحة يقول...

رورو الشخبوطه


خلاص راح يتأجل 3 اسابيع :)

طموحة مملوحة يقول...

أحمد الحيدر

ودي اناقشك على النقاط الي ذكرتها بس لمن اشوفك بالجريدة ان شاء الله ما انسى

طموحة مملوحة يقول...

mo3ath


اي خو عادي احنا الي نشتغل بالقوائم وايد متناقضين على فكرة لوول

طموحة مملوحة يقول...

reemas


كل شوي عوي عندنا لوول

طموحة مملوحة يقول...

الـسـنـبـلـة


يعطيج العافية يالغالية شوفي انا مع هالقرار بس مو علشان انفلونزا الخنازير علشان النقاط الي ذكرتها

مشكورة يالغالية

طموحة مملوحة يقول...

well_serviceman

ليش اصدمك بالعكس انت الي صدمتني لووول اقص عليك

من ناحية (( الكل )) أرد وأقول بعض لأن بصراحة مع احترامي الشديد لهم ما اعتبرهم يمثلوني لأنهم حجي حجي حجي مأخوذ خيره ماشفنا منهم شي كله نشاطات ونوادي ماشفنا منهم انجازات عدلة بصراحة شنو انجازاتهم بالله ؟؟؟



شوف ياخوك قلنا تطبق الديمقراطية بانتخابات مجلس الامة وللحين الناس قبليين وطائفيين ومتعصبين لأشخاص والعوايل و ... و.. الخ


الجامعة جذي :) ، الحين لمن يقولون قانون منع الاختلاط والله لأن يشكون باخلاقيات الطلبة و يتوقعون حدوث الزنا والاأخلاقيات و ... و... الخ
أنا ما أتوقع منهم قرارات عدلة حق جامعة مثل جامعتنا بالله عليك الي يفكر هالتفكير تتوقع منه يسوي شي ؟؟

ها كل سنة نشارك معاهم باعتصامات حق فلسطين و اعتصامات على الشعب المغلقة يحسسوني قاعدين بثورة مو جامعة ، لا ياخوك اتحاد المفروض يكون جهة قوية مثل ما وقفوا بويه الادارة الجامعية وفرضوا منع الاختلاط بالقوة يقدرون يطلعون البلاوي الزرقة الي تعدل جامعتنا بدل اعذارهم الي ماتخلص ، نقابية بس افكر بالمنطق اول قبل العمل النقابي الي ماشفت منه الا شعارات وحجي مأخوذ خيره ، يبا الي يبي يسوي شي الصحافة موجودة تصريحات قوائم ماتخلص القوائم حجيها اكثر من افعالها نستنكر ونستنكر وبعدين زين خلصونا سووا شي ؟؟؟ اي عندنا رحلة للمركز العلمي ، عندنا رحلة حق الشعب عندنا يوم غدا بمطعم ؟؟؟ زين والجامعة ؟؟ زين والمصلحة الطلابية ؟؟ حجي حجي حجي واتحادنا حجي اذا ماكان بعض الطلبة خل يصير الاتحاد الوطني لكل طلبة جامعة الكويت ماعدا سارة وجذي نصير حلوين :) مابي هالاتحاد يمثلني بصراحة :)

طموحة مملوحة يقول...

السواء

يعطيك العافية اول شي ليش الاكسبلورر ما يشتغل معاه ؟ غريبة

وثاني شي انا أأيد التأجيل بس مو لمدة معينة

الاتحاد يشتغل قبل بداية الداومات على المستجدين لأنهم اهم الي مبينين بالصورة المستجد راح يقول اي الائتلافية بس الي تشتغل عيل وين الوسط والمستقلة وغيرهم وغيرهم ؟؟؟ فيدش الجامعة حاط بباله ائتلافية خلاص ،،، اسبوع واحد علشان يتعرف على بقية القوائم مدة قصيرة جدا محتاج انه يتعرف ويسمع من بقية القوائم ويناقش نفسه ويعرف منو الي يستحق ومنو لا ... بالنسبة لي مع اني وسط بس اتمنى كل القوائم تجرب حظها مع الاتحاد خل نشوف يمكن اهم يسوون انجازات 30 سنة الائتلافية ماسوته ومو قصده بهذا بس الوسط حتى الباجي فيهم الخير كلهم .

بس سالفة الانانية الي كل سنة ياخذونها وما شفنا منهم شي كله ندوات ندوات اعتصامات نشاطات شراح تفيدنا يعني ؟؟ زين نبي نشاطات موسيقية مايصير؟؟؟ لا اهم ملتزمين لازم كل جامعة الكويت تلتزم وياهم @@


شهالملاقة ؟؟

ابو عبدالملك يقول...

ماشاء الله
الظاهر ان القوائم تبي تحل قضايا الامه الاسلاميه