2009-10-03

اطلبوا لهم الشفاء يارب .. !!!


من فترة مو طويلة حييل شفنا موضوع ببلوق عمتي حاط موضوع عن الي يسفطون بمكان ذوي الاحتياجات الخاصة وبعدها بفترة مدونة المدينة الفاضلة والمصيبة الاكبر ان السيارة الي كانت سافطة دورية .
اليوم ومو بس اليوم كل يوم ، بجمعية الصباحية يسفطون بمصافط ذوي الاحتياجات الخاصة ، رحت الجمعية اليوم آخذ لي غرض ولا اشوف الكل سافط حدي عصبت والله جان امسك تلفوني وادق على 777 .
سارة : السلام عليكم اختي
الموظفة : وعليكم السلام ...... >>>>> ماذكر شقالت الكلام الي يقولونه مالوت الطوارئ مادري المهم
سارة : اختي صح وزارة الداخلية حاطة قانون يمنع الناس تسفط بمسافط ذوي الاحتياجات الخاصة ؟
اهي : اي عدل
سارة : زين ليش ماتعاقبونهم ؟؟ انا بجمعية الصباحية الحين وفوق ال10 مصافط مالوت ذوي الاحتياجات الخاصة ناس مافيها الا العافية صافطة مكانهم ، وفي مصافط شكثرها حق الناس ليش ما تخالفونهم ترا المخفر ورا الجمعية معقولة ماكو شرطي يخالف ؟؟؟ مو لازم كل سيارات ذوي الاحتياجات الخاصة يحطون ستيكر ؟؟ هذول ماكو بسياراتهم .
اهي : بس يا اختي متأكدة ان كلهم مافيهم شي ؟ وبعدين مو شرط في ناس من ذوي الاحتياجات الخاصة ومايحطون ستيكر .
سارة : اختي شباب يسفطون هنود يسفطون وينزل ايييب غرض معزبين ، حريم يسفطون مافيهم الا العافية والله من القهر دقيت شدعوة مخفر وراهم كل شوي مارة دورية بالجمعية ما يخالفونهم ؟
اهي : اختي زين ماكلمتي ادارة الجمعية مو حاطيين سكيورتي شي ؟
سارة : والله مادري اختي بس المفروض تكون في دورية علشان يراقبون المكان مايصير .
اهي : صح كلامج
سارة : يعطيج العافية اختي ويليت تبلغينهم الموضوع لازم ينوخذ بكل جدية ماتحطون قوانين والناس تستهر بهالقوانين والله شي يقهر .
اهي : يعطيج العافية اختي ان شاء الله .
وخلصت مكالمتي ومن الحرة الزايدة الي فيني دشيت ادارة الجمعية ولا واقف واحد مصري قال لي : ايوة انتي الي جيتي مرة كنتي عايزة تصوري الجمعية .
سارة : ههههه اي انا وييت ابي استفسر على شغلة !!
اهو : أأمري ..
سارة : الحين مصافط ذوي الاحتياجات الخاصة الي برا مسؤوليتكم انتو ولا الشرطة ؟
اهو : والله انتي مش اول وحدة تيجي تتكلم بس نعمل ايه الناس هنا مابتحترمش القوانين وان عملوا حاجة نتصل على الشرطة ما بييجوش الا بعد ساعة وساعات ييجوش خالص .
سارة : زين وين السكيوريتي مايصير .
اهو : والله الناس هنا ما بيتبعوش حد حطينا كتير وبيسفطوا بالمكان وما بيردوش على حد ، هي وقفت على المسافط بس اصلهم حتى جوا الجمعية مدهولين الدنيا ، بيشربوا البيبسي ويسيبوه بمكان ماخده ولا بدفع فلوسه وان كلمناه بيصرخ في وشنا ويقول انا مش حرامي .
سارة : لا حول ولا قوة الا بالله والله مايصير جذي لازم احد يتكلم .
هو : الادارة بلغت المخفر كذا مرة وتكلمت كتير بس محدش رد عليها ، هو يعني حيحطوا دورية توأف تشوف مين الي يسفط بمكانهم ولا لأ .؟؟؟
سارة : اي ليش لأ ؟؟ مو الشرطة في خدمة الشعب ؟؟ بدل ما يوقفون 5 دوريات بكل مجمع يخالفون الناس خل يوقفون دورية وحدة بكل جمعية مايصير ..
هو : والله حتى الناس هنا بيقصروا كتير وما بيتبعوش القوانين شوفي كم علامة حطيناها ومافيش فايدة .
الحين جمعية الخالدية على قلة مصافطها ماشوف احد يوقف مكان ذوي الاحتياجات الخاصة دوريات توقف تراقب ينطرون لين يلقون مسفط عندنا يالله اول ما يا سفط بهالمسفط مو حرام ؟؟ وماكو رقيب ولا حسيب
على شنو حاطين قوانين عيل ؟؟ مو الشرطة يحبون يخالفون والله شكثر راح يخالفون اذا يوا جعيتنا بيحصلون كنز من كثر المخالفات . والله بطة جبد حدي انقهرت ودي اكسر كل سيارة توقف مكانهم .
دودة ذابحتهم ما يقدرون ينطرون ولا يسفطون بمكان عام ؟؟ لازم بهالمكان ؟؟
ماقول الا عسى الله يشافيك يالي مافيك شي وتوقف بمصفطهم والله محد معاق الا انت .
سامحوني والله من حرتي على الي قاعدة اشوفه خبري سيارة سيارتين تخالف بس الكل ؟؟ مصيبة شهالمنطقة الي أغلب اهلها معاقين ...؟؟؟
ما اقول الكل لأن وايد من اهل منطقتي فيهم الخير ومثلهم ماشفت بس عيب الي شفته .. يعني لا كبار يحترمون ولا شباب ولا هنود ؟؟؟ مصيبة هذي والله
والشرطة ساكتة وعاجبها الوضع ؟؟؟ عيل وين أمن الوطن والمواطن ؟؟؟
قلبي متروسة ولاعت جبدي من التحلطم والله
استغفر الله العلي العظيم من كل ذنب عظيم
ـــــــــــــــــــــــــــــــــــــــــــــــــــــــــــــــ
بـــــاجي 5 أيـــــــام :)








أحب هالاغنية والله عسى الله يحفظها لنا يارب

40 comments:

BeeDoO يقول...

ناس ما تستحي

اليوم نفس الموضوع منشور بالوطن بس هالمرة اللي نتعدي .. نائب

منشور في مدونة الدائري الرابع
www.4thringroad.com

بـنـت بـطنـهـا يقول...

سارونه اول شي صباحج ورد

ثانيا الموضوع هذا عيزنا واحنا نتكلم فيه ولا في فايدة بس في ناس والله فيهم البركة يقدرون ويحترمون وهذا ان دل على شي دل على رقي الشخص

وفي بعض الشرطة هم واعين وقايمين بواجبهم اول امس انا طالعة اتغدى بالكوت وقاعده اتحلطم على اللي سافطين بمواقف المعاقين ما وعيت إلا شرطي ياي يخالف حدي فرحت

لكن الطامة الاكبر مو جذيه .. قبل جم يوم بقناة سكوب معاق داق يتحلطم يقول سفطت ونزلت من السيارة بعد ما رجعت لقيت اني الوحيد من بد السيايير اللي سافطة بمسافط المعاقين متخالف من بدهم مع اني حاط الستكرز .. يعني هذا الشرطي شنقول له بالله ؟؟

جيكي على الفيديو

http://bintba6enha.blogspot.com/2008/06/blog-post.html

Sn3a يقول...

امبيه اهم شي يشربون بيبسي ويهدونه
والمخفر وراكم قلتي

الله يعينكم

يبا في ناس همج مايهتمون بقانون ولا شرع
عندهم الديره ارض ياكلون خيرها ويروحون لين نشف الخير الله لا يقوله

امي مسكينه فيها دسك ولها ملف باللجنه
ماتسفط بهالمسافط الا ننااااادرا
وهالناس عيزانين يمشون خطوتين وربي معطيهم صحه وعافيه

Dark angel يقول...

أحيكي على شجاعتك وتحملك للمسئولية بالاتصال بالجهات المعنية. ولو كل واحد فينا سيفعل نفس الشيء لما تجرأ أحد أن يستولي على مصافط المعاقين , فمن أمّن العقوبة أساء الأدب.

وحتى لو لم تكن هناك عقوبة, فالشعور بالانسانية تجاه المعاقين وعدم سلبهم حقوقهم أو أي شخص بشكل عام إنما يدل على رُقي ونبل الأخلاق أولا و أخيرا.

كاتب الأنثى يقول...

اسعدك ربي بيومك

بصراحة شي غريب اذا شفت مثل هاي المواقف ، والادهى اذا انه سوى فيها نظامي و جاء يطبق عليك النظام

بسس مو مشكلتهم هم المشكلة في القائد حقهم او من يتابعهم

اشكرك على التدوينة التي أتمنى ان تصل لتغير

كوني بخير
:
عبدالله

نون النساء يقول...

والله يا قلبي مو بس عندكم
امس كنت رايحه فندق المنشر وهم نفس الحاله :)
الشغله مو مقتصرة على جمعيتكم ..



يقول المثل :
من أمن العقوبة أساء الأدب




على طاري اللي يشربون بيبسي
السنة اللي طافت كنت رايحه عزا أبو وحده من الصديقات تعرفت عليها قبل 5 سنوات واهيه من ساكني الصباحيه ،، بعد العزا مريت انا والوالده بس بنشتري ماي ،، شفنا العجب العجاب


امبيه يهال بس مو يهال هههههههههههههههههه المفروض يقلبون الجمعيه مكان مغلق ومكيف حق لعبة صيدة ماصيده ..

mo3ath يقول...

والله زين تسوين انا ذاك اليوم نفس الموقف بالمطار واحد اصحى مني ومنج شاف المكان فاضي صفط ونزل انا قعدت اتلفت ماكو شرطي على مارحت اكلم الي واقف لا اشوف واحد منهم ياي طاير ويعطيه احلى مخالفه لوووول انا واقف جان اصوره والله وسلمت عليه حتى استغرب ليش سلمت بس قلت له يعطيك العافيه ومثل هالناس الي ماتستحي يبيلها سحب سياره مو بس مخالفه

تبين تنقهرين زياده ، شوفي الصوره للنائب الفاضل الي ماحطوا اسمه والمفروض يشهرون فيه بعد !!

http://www.4thringroad.com/wp-content/uploads/2009/10/watan.bmp

غير معرف يقول...

مادري بس اعتقد السبب واضح ويتلخص بكلمتين "واسطة ونائب". لنفرض ان الشرطة كانت موجودة و خالفتم راح يكون ردة فعل الي سافط كالآتي: يسفل بالشرطي (ما تسوى على الشرطي) لأن يدري ان القانون تشيله الواسطة عن طريق النائب (لان السافط صوت لازم النائب ما يضيعه ويرضيه حتى لو كان ضد القانون)

بس على الاقل زين سويتي، المهم سجلتي موقف

ألطاف

{~المباركية~} يقول...

اسألوهم بالشفاء العاجل

المسأله راجعه على التربية والاخلاق

أسيرة اللوحة يقول...

حسبي الله عليهم ,,
ما يعرفون حق المعاق الا ان صارو مثله ,,
بس من غير دعاء عليهم ربي كفيلهم ,,

لا تتعبين اعصابك اكثري من الاستغفار و ان مررره زاد الحال تحسبي عليهم ,,

حفظكم المولى ^^

ابو عبدالملك يقول...

يعني لو تلاحظين ان حتى موظفة الاستقبال المكالمات ماتبي تسوي بلاغ

الحين الشرطه اهي تحمي الامن ولاتقعد تراقب المسافط

وثانيا شئ شوي شوي على الصباحيه

وثالث
ليش ماتتكلمني بقضايا الامه الاسلاميه؟؟
يعني ليش مخج حده منفذ السالمي والنويصيب والعبدلي
ماتقدرين تطوفين

Heart To Heart يقول...

ما في أبلى من المربوط إلا المفتلت !!!!

اللهم لا تآخذنا بما فعل السفهاء منا :((

اللهم آآآميييييييييين

قولوا آآآميييييييييين

جده غير يقول...

شنو اللى باقى عليه 5 ايام طبعا اكيد من عيد ميلادج


مو يم الكلام يم ال 5 ايام :)

طموحة مملوحة يقول...

بوعبدالملك

بصراحة استغرب من كلامك شنو قضايا الامة والمعاقيين مو مسلمين يعني ولا بس احنا ؟؟ قضايا الامة ذي تخصص مدونتك ليش ماتكتب انت انا القضايا الي اكتبها وطنية مالي شغل وشنو العبدلي وغيرها اقول ليش ماتفجرون الامريكان الي بالكويت مثلا ؟؟

تحجى بمنطق شوي ولي يسلمك

فريج سعود يقول...

انزين ما قلتي لنا انتي ،ين صفطتي ؟

:)

ابو عبدالملك يقول...

قضايا وطنيه؟؟
في بالاسلام شي اسمه وطن وطنيه؟؟
بس الله يجزاج خير
وابشرج قبل جم يوم عالم سعودي افتى عن الجامعه المختلطه اللي بالسعوديه وقدم استقالته اليوم
للعلم فقط

غير معرف يقول...

اكيد دقيتي على 777 من تلفون الجمعيه :)

Jevons يقول...

انزين و 777 وينها ؟
الموظفة ما دزت الدوريه ؟

Jevons يقول...

ههههههه ابو عبدالملك هذا funny

طموحة انتي ليش ما تكتبين عن اهميه الحجاب ؟ ها ؟ ولا مو عاجبتج الفكره ؟ اعترفي

وعلى فكره , يعني شوفي الـ Irony
اهو الحين يكره الإمريكان ويتكلم في سيرفر وموقع امريكي بحت .

لوووول

ابو عبدالملك يقول...

سؤال:
المدونه مالتي لو ابي اعطيها دليلت شلون؟؟

طموحة مملوحة يقول...

BeeDoO



قريته حسبي الله ونعم الوكيل


آل عضو مجلس أمة ما اقول له الا طز فيك

طموحة مملوحة يقول...

بنت بطنها

اي صارت نفس سالفته قبل هالمرة والله عسى الله يعينهم والله شوفي لو يحطون سيكيوريتي ويحط ممنوع الوقوف ليمن تمر سيارة ذوي احتياجات خاصة فعلا يشيل السور ويصفطهم احسن حل صراحة

طموحة مملوحة يقول...

Sn3a


فديتها والله ماتشوف شر يارب سلمي عليها وايد بعد قلبي

اي والله انا اختي تشتغل بوزارة الشؤون والله تقول لي عن معاناتهم خليني ساكتة بس

طموحة مملوحة يقول...

Dark angel



ماكو انسانية لاحول ولاقوة الا بالله

مصيبة اذا الي صاحيين جسديا يكونون معاقيين فكريا

طموحة مملوحة يقول...

كاتب الأنثى


الي قصدتهم هذول نظام استشراف شكثر منهم بالديرة ترا :)

طموحة مملوحة يقول...

نون النساء


لوووول الحمدلله يعني شفتي الي بالجمعية والله ذاك اليوم بغيت اتكافخ مع ولد يقحص بالقاري ويبي يدعمني يعني ربعي شوفوني جان ازفه ذيج الزفة ويراددني والله يييت والله لين يوا ناس زفوه تدرين انهم حارقين المكتبة العامة ..؟؟ لوووول


وقلتي فندق المنشر العادة هناك يحطون سكيوريتي غريبة والله

طموحة مملوحة يقول...

mo3ath


زين سوا هالشرطي والله في شرطة يراعون ربهم وضميرهم وفي شرطة اسم بس :)

طموحة مملوحة يقول...

الطاف


صح كلامج والله صاجة ... عسى ماصار شي قلوا عضو يتوسط لنا ، المشكلة لي يا عضو مخلص ويراعي ربه بهالامور قالوا مافيه خير @@

طموحة مملوحة يقول...

{~المباركية~}


صح كلامك

طموحة مملوحة يقول...

أسيرة اللوحة


استغفر الله العلي العظيم من كل ذنب عظيم


يزاج الله خير يالغالية :)

طموحة مملوحة يقول...

Heart To Heart


آميييييييييييييين يارب العالمين

طموحة مملوحة يقول...

جده غير


صاروا 4 ايام :)

طموحة مملوحة يقول...

فريج سعود



بالمكان الي خذيت فيه الصورة :)

طموحة مملوحة يقول...

بوعبدالملك

أول شي على موضوع المدونة روح عند الاعدادات اول شي تلقى تحت مكتوب حذف المدونة .


وثانيا الرسول ماكان يحب مكة والمدينة ؟؟ واهم مو وطن ولا شنو ؟؟

ومو شرط كل شي ماذكره الاسلام يعني حرام @@
خل يقدم استقالته الله وياه يعني عادي عندهم يدرسون برا بجامعات مختلطة ومايبون الحريم يدرسون بجامعات مختلطة ؟
يرضون لنفسهم ومايرضون لغيرهم ؟ واذا كل واحد يشك باخلاق اخته خل ايي الكلية ويراقب اخته عادي مافيها شي :)

طموحة مملوحة يقول...

Jevons


الحجاب والله خوش موضوع بس قبل هالمرة ذكرت موضوع عن المرأة وخذيت جزئية منه عن الحجاب :)

والموظفة ماراح تسوي شي واصلا الشرطة بمنطقتنا دايخين شوي دقيت مرة علشان يمسكون الي يقحص بشارعنا وازعجنا موقادرين ندرس تخيل دقيت عليهم قالوا بندز دورية ولا يت الدورية ولا شي وقعد يقحص لين قال بس سمعت انه سوا حادث وماعاد يقحص استغفر الله الله يشافيه

طموحة مملوحة يقول...

غير معرف

لووووول لا من موبايلي لا تحاتي بلاش لووول

كبرياء وردة يقول...

كل عام وانتي بألف خير مقدما:p

والله تذكرتج ليله عيد ميلادي

Bu Jassem يقول...

:))
ردينا على الصباحيه

يبا يا ساره شيلي بيتكم وروحي الخالديه لا تحاولين فيهم
انا خابرهم يطلعون رونق سايد من صوب برجر كنج من ايام ما كان اسمع الارنب الجائع
وخلي عنج هالجمعيه

وباقي 3 ايام :)

ابو عبدالملك يقول...

المهم
الموضوع طويل

يالله اخر رد
لاني ابي اسوي دليت للمدونه

والله يحفظكم
والسلام عليكم

ملاحظه: كل لم يذكر بالقران او السنه فهو بدعه

وثانيا
اتمنى انج تفرقين بين الوطن وارض الاسلام؟؟

غير معرف يقول...

احييج علي انسانيتج وايجابيتج