2009-11-02

إنت ملقوف ؟ أنا بعد ملقوف







أعتبر نفسي من المواطنين الملقوفين الموجودين على أرض الكويت ولكني ، وبعد أن رأيت المواقف الحية التي تحدث كل يوم أمام ناظري وناظر الجميع أعلنت التوقف عن اللقافة وأن أطبق القوانين حتى وان رأيت من لا يطبقها من يصير أعصابي كثيرا .
في السابق كنت أذهب الى كلية العلوم عبر اشارة جسر الخالدية التي نكون في أول السيارات القريبة من الاشارة ولكننا لانزال عالقين بسبب ( الملاقيف ) الذين يأتون بعدنا بعدة دقائق ويقفوابجانب الاشارة في الطريق الفرعي المؤدي لطريق آخر ، وبذلك نقف نحن من أتينا أولا ويتفضلوا حضرات الملاقيف بايقاف الشارع والتسبب في الازدحام ويعبروا وكأنهم الوحيدين الذين تأخروا عن أعمالهم , ومايزعجني حقا مرور دوريات الشرطة وتجاهلهم تلك المناظر لنقول للشرطة مرحبا بكم في دائرة الملاقيف .





اشتكى لي احد الزملاء تصرف زميل لنا ( ملقوف جدا جدا جدا ) قوله : ياخي بط جبدنا فلان .. اوكي قلنا انت شاطر بس مو معناه تتليقف وعسى ما الدكتور شرح لنا شي وطلب منا الاجابة تتليقف انت وتجاوب بصوت عالي ماتخلي لنا مجال نتكلم ، المصيبة لمن الدكتور ايي يبي يشوف شغلنا ايي اهو ويقول دكتور تعال شوف شغلي ويسحب الدكتور محتقر وجودنا وشغلنا .
يازميلي العبقري توقف عن اللقافة أرجوك . ...
هنالك الكثير من المواقف الملقوفة التي تمر علينا ، قد نعتبر اللقافة أحيانا تصرف مضحك ولكن كثرته تجعله تصرف وقح .. لذا كفوا يا أصحاب السيارات الملقوفة عن ازعاج يومنا الكئيب ، وكف يازميلي عن اللقافة واترك مجالا لزملائك .
ــــــــــــــــــــــــــــــــــــــــــــــــــــــــــــــــــــــــــ
بين الحين والآخر نعتبر جزءا كبيرا من حياتنا قد انقشع فجأة فتتغير ملامح شخصيتك وترغب أن تكون مستقلا لذاتك ، دون تدخل الكثيرين في حياتك , تركت أناسا كثيرين ولكن أقول لهم : لم اترككم عبثا بل سأبدأ حياة جديدة صعب هو الوداع ولكن ان تركت لكم جرحا فسامحوني .
اسبوعين امتحانات وعسى الله يكون في عون جميع الطلبة ..
تقبلوا تقديري وشكري وامتناني لكل من يتابع مدونة تخاريف طموحة
أختكم
سارة

18 comments:

مواطن مصري يقول...

ربنا معاكي في الامتحنات

خااالف تعرف يقول...

انا اعتبر نفسي ملقوف في بعض الاحيان
بس مو ملقوف دراسيا
لان هالنوعية صج احتقرها


الله يوفقج في الامتحانات
وعؤبال الفل مارك

Enter-Q8 يقول...

سارة الحل مع زميلكم الملقوف انكم تحتونه او تقاطعونه
اما الملاقيف مالوت المرور بالكويت اهم ثلاث فئات
الفئة الاولى
العسكرين اللي متأخر عن دوامه و كله مشلــع و طاير و يخز اللي ما يوخر له يعني انا عسكري ما تشوفني
الفئة الثانية
التكاسي الجوالة و النقل الجماعي
خو هذول مالهم حل خصوصا ان تأمينهم شامل
الفئة الثالثه و الاخطر
بنات حواء
يا ساتر
اذا تبي تتعنفص بسيارتها بين السييار و تخطر الاوادم و لما تطالعها يعني اللتزمي بالدور تقول انت ما عندك ذوف انا انثى
للحين اتذكر اللي شكلت علي بالهرن عند الدوار خلتني افتح باب السيارة و انزل جدام خلق الله و اقعد ارف رف بايدي يعني اطير بالله عليك

هالحـــــزة يقول...

الملاقيف بكل مكان صدقيني اذا الواحد ما يصير ملقوف في هالديرة لازم تعرفين انه مو كويتي ..

فريج سعود يقول...

انت ملقوف اذا انت كويتي

Jako يقول...

اكثر شي ينرفزني اللقافة مع اني ثلجة انسي اعصب

بـنـت بـطنـهـا يقول...

بين الحين والآخر نعتبر جزءا كبيرا من حياتنا قد انقشع فجأة فتتغير ملامح شخصيتك وترغب أن تكون مستقلا لذاتك ، دون تدخل الكثيرين في حياتك , تركت أناسا كثيرين ولكن أقول لهم : لم اترككم عبثا بل سأبدأ حياة جديدة صعب هو الوداع ولكن ان تركت لكم جرحا فسامحوني .

اضم صوتي لصوتج بهالموضوع خبرج كل بين فترة وفترة اسوي تصفية اللي يبقون منقيين عالفرازة .. ولأسباب كثيرة ماراح اطول عليج
بس بتمنالج التوفيج بامتحاناتج .. وامتياز يا رب

غير معرف يقول...

الكل صار يحب يطبق قانون


( خالف تعرف ) ياكثرهم في مجتمعنا , ومشكلة بعض الشباب يحب الزحمه . مادري ليش ؟؟


لكن المشكله مالقو حلول يديده عشان نفتك من الزحمه ونخفف منها .. والله يعين الكل يطلعون من الساعه 7 الا ربع وبعضهم من الساعه 6 عشان مايتاخرون عن محاضره او عن دوامهم بسبب هالزحمه بوقت الصبح


واعذريني لو صرت ملقوف بموضوعه طموحه

بس امون عليج خصوصا هاليومين زادو الملاقيف في الدنيه


:)


فواز الرشيدي

capputtino يقول...

والله يا ساره الملاقيف وايد
ويبطون جبدي
بس دايما اقول انا احسن منهم
اللي يعطي اشاره قبل لا يدخل اطوفه
واللي ما يعطي اشاره يشوف له احد ثاني

والشرطه تطبق المثل مع التعديل
( انا ارى و اسمع ... ولا اتكلم )

طموحة مملوحة يقول...

مواطن مصري


ربنا يخليك ياخوي العزيز

طموحة مملوحة يقول...

خالف تعرف

حتى انا ملقوفة حدي والله لووول

ومشكور على دعوتك يالغالي

طموحة مملوحة يقول...

Enter _ q8

صار لي موقف بيوم من الايام رادة من الشويخ مع رفيجتي بالسيارة والاشارة وزحمة والاشارة الي واقفين فيها يالله بوجم ثانية وتسكر تخيل لمن ماصدقنا عقب 3 مرات تفتح وتسكر نوقف ليش؟؟ شرطي يحاجي رفيجه الشرطي الثاني طبعا بسيارة مدنية بس لبسهم شرطة ونطق لهم هرنات حركواورانا محاضرات جان يطلع راسه ويعطينا ذيج المسبات الي والله العظيم قلت ببيعها شنو بنت اطلع واطلع راسه من الدريشة شنو شرطي يسوي لي فيها الي يبيه بدون احترام للناس الي بالشارع الناس تطق لهم هرنات واهو معطيهم طاف لين آخر شي السيارات ماعطته مجال انه يلف لأنه حقير ...

ولا الشرطي الي بدوار الجامعة الي بالمايكروفون
قال لواحد : ك . س . أ . خ . ت . ك تخيل بصوت عالي وجدام الناس شرايك ؟

طموحة مملوحة يقول...

هالحـــــزة


صاج والله ساعات اتليقف تنحل مواضيعي بسرعة بدل النطرة ..

طموحة مملوحة يقول...

فريج سعود

ومزدوجي الجنسية شلون ؟؟

طموحة مملوحة يقول...

Jako


عيل لا تقعد وياي لووول

طموحة مملوحة يقول...

بـنـت بـطنـهـا


أنا تعبت من الي يلومون والله جد ضغط على راسي ماكو بهالدنيا غير سارة ؟؟

مابي ادش المجلس خلاص لووول

طموحة مملوحة يقول...

فواز يالغالي شلونك ياولد عمي ؟

اي ملقوف اي بطيخ يبا انا ناطرة ردودك وتفاعلك بمدونتي أخيرا ؟ :)

اي والله تخيل علشان محاضرتي الساعة 8 الصبح اطلع من البيت الساعة 6:20

اذا طلعت 7 اوصل الجامعة الساعة 9 لوووول

طموحة مملوحة يقول...

capputtino

الملاقيف الي على الاشارة حتى لو عطوك اشارة لا تطلعهم ... لو اهم جان ما طلعوك .. لوووول بس يبطون جبدي والله شنو محد بيعبر الا اهم والبلشة اذا الاشارة بسرعة تسكر والله اتنرفز حدي ..