2009-01-30

توصوني على شي؟


اليوم الصبح بإذن الله راح أسافر لمدة اسبوع بروح عمرة ..
فإذا احد شايل علي ولا حاطين علي حللوني ..
والي يبيني ادعي له خل يسجل اسمه ؟ :p
وماراح انسى ديرتي والله لتشوف مسوية لستة كاملة حق الي بدعي لهم علشان ما انسى لووول
يعطيكم الف عافية وماقصرتوا ..
وآخذ بريك من المدونة لمدة اسبوع وبشوف منو راح يشتاق لي :p
ادري مو مضبطة البوست عدل توني شارية لاب تو يديد وموعارفة له كلش ملش :(
سوري ..

2009-01-28

تصدقون توني أتعلم حب الكويت .. !!!


اليوم وبعد ماخلصت دوامي الجامعي المتعب .. وطرارة الدرجات من الدكاترة ، رديت البيت اريح شوي من التعب ..
ولا اسمع ابوي يناديني : سارة ؟؟!!! يا سارة
أنا : هلا يبا ..
أبوي : تعالي تعالي شوفي هالبرنامج ..
القيت نظرة :) واذا بقناة سكوب .. برنامج يتكلمون فيه عن حملة التبرعات لصالح الشعب الكويتي ..
جان أقول لأبوي : والله فكرة حلوة .. بس طاع منو الي يتكلم عن هالحملة .
أبوي : حرام واحد اسمع بوخالد فيه وكان وكيت وكيت وكيت ... الخ .. دزي مسج ابي اتبرع لهم واذا دقوا تكلمي انتي متحدثة وتعرفين تتكلمين !!
أنا : يبا شي طيب ان نفكر باخوانا الي بالكويت واهم اولى اكيد .. بس الي يبي يتبرع ماله داعي يطلع جدام الكل ويقول انا تبرعت مثل ما سووا دعاية وحفلة حق حموووسة .. ويورون الناس مننو تبرع وبجم .. بهرجة استغفر الله وبعدين قناة فجر السعيد مليقة يبا شكو حاط عليها ؟؟
أبوي : يابوج حرام والله قاعدين يناقشون مواضيع مهمة قعدي معاي طالعي وعلقي ..
فديته أبوي يبي يسمع تعليقاتي .. واهو يتابع الي قاعدين يتحجون استغفر الله وانا اطالع التعليقات والمسجات السخيفة الي تنكتب ويدزونها المشاهدين السخيفين .. مع احترامي لهم .
شوفوا من أهم الردود الي صعقتني وخلتني أقول لأبوي : يبا خل يولون عما بعينهم !!!!
الي انكتب اهو :
..
..
(( اشكرج يافجر السعيد لأنج علمتي الناس حب الكويت ))
..
..
..
عـــــــــــــــــــــــــــفوًا .....!!!!!!!!!!!
عيد مرة ثانية شنو ؟؟ منو ؟؟؟ وعلمتنا شنو ؟؟
أقول ..
حب الوطن مو بجمع التبرعات .. هذا أولا
ثانيا محنا ناطرين فجر التعيس ولا دلال ولا مزنة يعلمونا حب الوطن ..
ثالثا : طاع منو يتحجى بالكويت والمجتمع الكويتي ؟؟
أقول نسيتوا مسلسلاتها الفاضحة ..؟؟
نسيتوا تصويرها لبنات الكويت بالعاهرات ورايحات فيها و24 ساعة برا البيت ..
والأخ الديوث الي ماعنده غاريه على خواته ..
والأبو الي مدلع بنته على الآخر لو تقول له بروح مع رفيجي يقول روحي فديتج ..
والأم المتسكعة الي 24 ساعة برا البيت مالها والي وتصور ريلها مثل الخروف وراها ..
هذا المجتمع الكويتي !!! بنظر فجر السعيد
شهالتناقض ؟؟ الحين قلبج على الوطن والمواطنين ..؟؟
جان حطيتي هالمشاكل بمسلسلاتج بدل البهدلة وتشويه السمعة ...
هذا واقعنا !!! مو هذاك واقعنا شهالمرض؟؟
ضحكت العالم علينا الحين تبي تسوي قصة هندية ..
يبا كلنا نحب الكويت وشعب الكويت معروف بالكرم حق الي برا مايقصرون تبون الي منهم وفيهم مايساعدونهم ..
والله احتجيت ولمن قلت لأبوي ضحك على ويهي ..
حدي كنت معصبة والله
يبا خل تسوي حملة تنظيف القناة أول شي ..
وخل تسوي شي لله ماتخلي الناس تحط لها رسايل ..
(( إخت رجال ))
والي بط جبدي (( الفزعة)) ياناس هالكلمة كانت تمشي بدمي والله .. بس لمن قالوها لاعت جبدي منها بصراحة ..
آخر عمري اتعلم حب الوطن منها
ماعندنا مشاعر وزعزعت الي بداخلنا تصدقون ..
كنت اعيش بالكويت مادري شالسالفة واقول ياربي شكو احب الكويت ؟؟
لين طلعت فجر التعيس وطلعت قناتها وعلمتني حب الكويت ..
سوري ياكويت بعد 21 سنة توني الحين اتعلم حبج ..
افـــــــا والله كبيرة بحقنا ...
حدي معصبة والله ..

2009-01-27

بوست مخرف حده ..

بوست مشكل مع أحلا آزوزة :)
..
..
باركوا لي خلصت امتحاناتي مابغيت والله ..
عاد رديت البيت حدي متصدعة من كثر ما انا (( مو مصدغة ))










مبروك سويرة مبروك ... :D
شوفوا بكتب قصيدة خبلة شوي بس لا تضحكون زين :P
هذي كانت اول محاولة لي بالنبطي على بالي يعني بصير مثل أهل ابوي واني اقدر اكتب نبطي ..
طلع مصري ووايد علي بعد والله ..
كتبتها قبل سنتين .. وضحكوا علي حزتها فيليت ماتضحكون علي انتو بعد :P
.....
أقـــــول فيها :P
فيوم قلتلي يابنت البدو اكتبي قصيدة
قلت ابشر وانا على الوعد ماني بخوان
تضحك على الفصيح علامج متفلسفة؟
مير التفلسف في حبك خذا كل الألوان
جيتني بعد غيبة تنشدني وراج زهقانة ؟؟ :P
تعبت من ذل ذقته من بعد حبك الي كان
ودي أبكي قالها راشد وقلتها لك ألف مرة
واذكر انك تداوي جروحي بالاهتمام
برجوعك رجعت معك بعض المسرّة
كملها وخلني اعيش معك ذاك الزمان
قلبك ديرة وطلبت فيها الشهادة
واشهد ان القلب عد حبك حب الأوطان >>> نصّابة :P
فدوة لك سارة تراها لشوفتك ولهانة
تعلقت بحبل قوانينك فكنا من شرك يا انسان
لعنبو قلب طيب ملكني وبه مبتليّة
طلب الرحمة من كثير ولاشاف منهم احسان
لاني ورثت الشعر من هلي ولاني به مقربة
عرج البدو فجّر بقلبي بركان ودليلي العنوان
وان كان لي خاطر طلبتك قلبي لا ترده
ابي منك رد على قصيدي ولو (( سطران ))
..
..
هذي لو حطيتها ببرنامج شاعر المليون المخرج والمعدين والمصورين والكل بيستقيل .. سارة طلعي برا احسن لج .. روحي روحي ..
ــــــــــــــــــــــــــــــــــــــــــــــــــــــــــــــــــــــــــــــــــ

مقطع فيديو حده يضحك ... حركات والله حده ذكي



ــــــــــــــــــــــــــــــــــــــــــــــــــــــــــــــــــــــــــــــ

أعرفكم على مولان (( قدوتي الكرتونية )) فتاة طموحة عانت من قمع المجتمع والعادات والتقاليد الي تقيد الفتاة بأعمال معينة وتربط مصيرها أما الزواج أو تفشل اهلها وتييب لهم العار ... مولان طموحة جدا جدا .. فحاولت انها (( تنقز)) أبوها لمن دشت الحرب وصارت ريّالة ، وحررت الصين من جيش الهون ، ويابت مولان لأهلها الفخر والشرف ويابت لها العريس :P

شوفتوا مولان ؟؟

أحبها وايد والله .. نسختي هالبنت :P

وجه الشبه : صرصار الحظ

الاختلاف : الطول والمتن واللغة ..الخ .. واهم شي موشو :P

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

اعلان :

موضوع الفضيحة يبيلها وقت نظرا لتعرضي لعوائق، ومشاركة بعض الزملاء في الصحافة لموضوعي فقريبا اذا ماحطيته هني بحطه بالجريدة وبحط لكم الرابط ...

ــــــــــــــــــــــــــــــــــــــــــــــــــــــــــــــــــــــــــــــــــ

البوستات الياية ان شاء الله راح تحمل أخبار (( سارّة )) جدا جدا :) من حياة اجتماعية ومهنية ونفسية .. أهم شي النفسية خل نركز عليها وايد ..

مع تحياتي وتقديري

أم جرّاح

2009-01-25

طموح انسان يائس !!!!






الصراحه زهقت
.
.
انبطت جبدي خــــــــــــــــلاص !!!!
.
.
بداية القصه ...
.
كنت انسان شاطر في المدرسه لي توجهات غريبه وصاحب افكار جديده ، طـــمـــوح ، وبنيت حياة مستقبليه
في مملكتي الخياليه ، تخيلت وعشت خيالي ، توقعت المستقبل راح يكون جميل ،شديت حيلي ، حبيت لعبة الجمباز ،
فأشتركت في نادي ،وحصلت على مراكز عديدة، وما أرضى الا بالمركز الأول ، واخر شي عطوني خمسين دينار
وسكتوني !!!
@@
رحت العب لعبة ثانيه ولي مراكز فيها وهم قصوا علي بخمسين دينار ، وهذا انا توني ماتعديت سن ال 13صار عمري
14 رحت واشتغلت في مطعم!!!! ، نعم اشتغلت في مطعم واكتسبت خبرات كثيره واصحاب اجانب اتشرف في معرفتهم
، ولله الحمد لي خبرات في اغلب المجالات .
واخر شي احباط من الواقع ، ما كنت امبطل عيوني ، الكل يتشمت فيني الكل يضحك علي ، ديرتي مو امعبرتني ، محد
امعبرني كل هالأنجازات ومحد يدري عني ؟؟؟ وين تقدير الديرة ؟؟ تحبطت تحبطت لي درجة مو طبيعيه!!
ضعفت !!ما قمت اكل!!مرضت !!وتعبت !! وتأخرت في تخرجي من الثنويه، قعدت 7 سنين في الثنويه ((14
كورس )) شجعني ابوي،اقعدو على راسي وكل اهلي ، ولله الحمد، اشحنوني من جديد، رحت وتخصصت في مجال
الأخراج التلفزيوني ، واصبحت من اصغر المخرجين في الكويت ، ومن اصغر الناقدين في تاريخ الكويت ، ولي اعمالي
الخاصة ،لكن للأسف منعوها .
وللأسف محد يبيني اشتغل عنده، محد تبنى مهاراتي ، الا قناة نبيها تحالف، وابدعت فيها، وكان لي عروض في قناة
الوطن ولكني رفضتها !!!وتسكرت قناة نبيها تحالف، ورجعت اتحبط من جديد ..
ماكو وظيفة !دولتي ماتقبلي في جامعاتها ...لأني ماعندي معدل ...ولا يوجد استثناءات ...!!دولتي ماترسلني للخارج
للدراسه لأنه ماعندي معدل ...!!ورجعنا للأحباط مره ثانيه ...وثالثه و رابعه ....انزين ياجماعه ... انا ابي اعرف
ليش ماتتبنونا ؟؟؟
احنا ناس مستعده للعمل والأنتاج
احنا ناس عندنا غاريّه على دولتنا
نبي وظايف على اختصاصاتنا نبي رعاية من دولتنا
اذكرولي شخص كويتي واحد يقدر يعيش شهر كامل بس على 50 دينار !!الدنيا تغيرت ،راحت الألوان وصارت ابيض
واسود !!والحين حرمتونا حتى من كتاباتنا وآرائنا الشخصيه ... !! ؟
انزين منو يحمينا ؟؟؟
شنو نهايتنا يعني ؟؟؟؟
حرام حرام حرام عليكم ياجماعه
مانبي الواسطه.....
..
خلاص ارحمونا خلونا ناخذ حقنا ، مانبي احد فوق القانون ولا احد تحته، نبي القانون يتطبق علينا كلنا اهتمو فينا
اهتمو فينا والله مانبي شي بس اهتمو فينا ... !احنا منكم وفيكم ...احنا اعيالكم ... مو عيال البطة السوده ...وانا اسف
اذا خلطت الحابل بالنابل .... واسف اذا موضوعي ماكان متوازن ...بس والله محتر محتر محتر .... !!!!
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
رسالة من زميلي مدونة بوفتين ..
اراد زميلي المدون أن أضع رسالته في مدونتي وبالتأكيد يشرفني ذلك ..
................
تعليقي على الرسالة :
.
.
للأسف فمسلسل قتل الطموحات مازال مستمرا في دولتنا الحبيبة ، عندما أرى ويرى الجميع من هم يمتلكون مثل ابداعاتنا في الخارج في كامل تألقهم ، وتفخر بهم الدولة وتملؤ الصحف انجازاتهم ، في حين يجلس الكويتي خائفا من أن يظهر موهبته ، لماذا ؟؟
لأنه يعلم أن الجميع سيستهزئ به وبموهبته وكأن الشعب شبعان من المواهب .
لأن الدولة لا تعطي اي اهمية لهذه الفئة فكل اهتماماتها بأشخاص معينة ونحن نبقى في أحلام كثيرة .
هناك من يطلق طموحه وموهبته للخارج كي يفيد نفسه ومستقبله كما ذكرت في مواضيع سابقة وهناك من يرسل افكاره لتُطبق في دول كثيرة واغلبها دول الخليج .
ويبقى من لا حيلة لديه يضع السيجارة في فمه ويقضي كل وقته في الدواوييين .
أم يتجه للمحضور ويتاجر بالممنوعات ؟؟
فلتحرص دولتنا على هذه الفئة قبل أن يتوهوا في السلبيات .
..
..
..
شكرا لأخي المدون كل الشكر له على ثقته بمدونتي وأتمنى أن يكون محط الاهتمام لأنه يستحق ذلك وبجدارة .
..
..
..
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
خارج الموضوع :
..
..
..
you already are the best student ..
the best writer
the best thinker
you'll be the best wife
best mother
best doctor ever
:)
thanx



حاكوا عقاله لا !!!!!


السلام عليكم ورحمة الله .. :)




فاصل اعلاني


(( كلمة الحق لابــــــــــد لها أن تُــــــــقال ))
.
.
هذا الشعار بنا خالد العتيبي مدونته ..
مدونة جريئة صادقة غير متلونة ... لها شعبية رائعة .. صاحبها ذو خبرة رائعة في مجال المدونات ، وصولي مايخلي
مدونة مايتابعها ويترك بصمته فيها . ..
ويعجبني اهتمامه بتثقيف الآخرين فنجد في صندوق الرسائل دائما رسائل منه زاخرة بالمواضيع الوطنية التي تخص
الكويت ..
مؤمن جدا بالتغيير للأفضل ..
الكويت أولا وآخرا وهذا ماتدل عليه كلماته ..
لا مجال للمجاملات
لا مجال للتلون
فالصدق طريقه ...
ويشرفني أن أكون من المتابعيين لمدونته ..
وهذا رابط المدونة ...
..
...
...
...
...
...
أدري أنكم تعرفونه :P
بس حبيت اسوي دعاية .. والي وده يدش المدونة راح يستانس على الجرءة الممزوجة بالمرح في المدونة ..
تحياتي وشكري لأخوي خالد العتيبي وأتمنى له الافضل دائما وأبدا . .
طموحة مملوحة



2009-01-23

مضمون القلم ومفهوم القارئ ..

كثرت الصحف الكويتية وكثرت معها الأقلام المبدعة التي تنتج لنا أفكار رائعة وخيالية لا يقرأها الا من عشقها .
هناك الكثيرون ممن يملكون أقلاما مبدعة يكتبون مايجدونه مناسب كي ينشر من مواضيع سياسية واقتصادية واجتماعية ودينية .. الخ
منهم من يتجه للصحف ومنهم للمجلات ومنهم المدونات الالكترونية ومنهم في المنتديات أيضا .
ولكن لنركز على جانب مهم في دولة الكويت وهو الكاتب والقارئ .
نجد قراء في هجوم مستمر لهذا الكاتب الفلاني ، لماذا ؟؟
ربما :
_ لأنهم يكرهونه لأنه ينتقد الجهة الفلانية التي تمثلهم، حتى وان كان كلامه منطقي وصحيح .
_ لأن مستواه التعليمي والثقافي عالي جدا ويشعرون بشيء من الغيرة فدائما ما ينتقدونه .
_ لأن هؤلاء القراء من محبي اخفاء الأمور وعدم كشف الحقائق .
_لأن هؤلاء القراء لا يستطيعون كتابة موضوع متكامل كهذا القلم فيحاولوا قدر الامكان اسقاطه معنويا بالاستهزاء بمقالاته .
لم أقل الجميع ، في حين نجد بعض القراء ، على تشجيع مستمر للقلم لعدة اسباب :
_ هناك قراء يبحثون عن التجديد والافكار المبتكرة فدائما ما يبحثوا عنهم .
_ لأن هناك قراء حتى وان اختلف الكاتب مع رأيهم فهم يحبون كسب معلومات مخالفة لهم .
_ لأن هناك قراء يحبون التعلم من جميع الكتاب حتى وان خالفوهم فهم يحبون اساليبهم الكتابية .
وبشكل عام ، نجد كثيرين من محبي الانتقاد وأكثرهم من يحاول انتقاد الكاتب قبل مقالته او موضوعه ، وهناك من يكون لديه عداوة مع الكاتب فينتقد موضوعه ، وهناك من يجامل صديقه ويرفع من مقاله صديقه وهي ليست بالمستوى الذي يستحق كل هذا التلميع .
وللأسف وخاصة عندنا في الدول العربية فنجد الكاتب دائما ما يمحي النقاط المهمة التي تستند عليها مقالته كي لا يتلقى العقاب ، تلك القوانين التي فرضت على الصحافة وعلى الكتابة ، قتلت الكثير من الابداعات ، أصبح الأغلبية يبحثون عن من يشيد بجهودهم ويعظمهم بكتاباته ،ومن يكتب عن ظاهرة غريبة في المجتمع أو مشكلة يناقشها بحثا عن حل لها ، وينتقد بعض من هم مسؤولين عن انتشار هذه المشاكل نجد التهديد والتوعيد ومحاربته ، اذا كيف يشعر الكاتب بالحرية مادام مقيدا بهذه القوانين ؟؟
أصبح القراء يتابعون مقالات معينة فقط ، الكاتب الجديد لا مكان لديه في الساحة ، حتى في الكتابة أصبحت الواسطات جزءا مهما ، أصبح كثير من الكتاب يخشون من انتقادات المجتمع لهم ، فبدؤوا بكتابات تحت أسماء مستعارة ، ليس الجميع بل البعض منهم ، وهناك من لا يريد أن يعلم الناس أنه يكتب واهو هو ذاك الفلان الذي كتب .
في المجتمع الكويتي .، جل اهتمام الكاتب اليوم ان يناقش الأمور الاقتصادية والسياسية ، ومجلس الأمة ومشاكل الأعضاء المساكين في أول الصفحة ، والمشاكل التي لا حل لها سوا ان هذه المقالات التي تنشر هي الحطب التي تزيد من اشتعال المشاكل .
نقطة أخرى وهي القراءة عند الصغار ، يمل الطالب من كتاب اللغة العربية ، ويهمل قراءة القصة في المادة الانجليزية ؟؟ فماهي اسباب كره القراءة عندنا ؟؟؟ ولماذا يفرح الطالب بحرق كتابه في نهاية العام الدراسي ؟؟

2009-01-22

ولا يصير خاطرك الا طيب يا غير معروف :)

اخواني المشاهدين والمشاهدات :)
قبل جم يوم حطيت بوست بعنوان (( للي يشكك بوطنيتي ))
هذا لنك الموضوع
وعلى فكرة فهذا المنتدى الغير رسمي للوسط الديمقراطي :)
ادري بتتضايقون لأن لازم تسجلون علشان تقرون الموضوع مايخالف يبون يزيدون اعضاء بس كتبوا اي نك خربوطي ودشوا شوفوا الموضوع :)
وللعلم اني كنت مشرفة في المنتدى
وطلعت لأني قلت كلمة الحق بحق بعض الأعضاء ..
منتدى طائفي 100% بس الي فيه مو كلهم وسط علشان لا نظلم الوسط ..
ومع احترامي هناك الكثير من الشيعة الي يؤمنون بالمساواة في الوسط الديمقراطي ..
بس بالمنتدى شفت العكس من بعض الموجودين من المشرفين خاصة ..
موضوع الفالي خط احمر لحد يتحجى عنه ولحد ينتقد ... عيل وين الديمقراطية الي تتكلمون عنها ؟؟؟
موضوع خاص لك ياغير معرف وأتمنى تكتب اسمك مو تحط غير معرف ...
وموضوع بالمنتدى ماراح أحط موضوع
بلوق خاص فيني انتقد الي ابيه على كيفي ما انطركم تمسحون ردودي من كيفكم ... :)
حياك الله :)
ـــــــــــــــــــــــــــــــــــــــــــــــــــــــــــــــــــــــ
الي يضحكني لمن يقول عقلاء ومادري شنو بعدين يقول يردون وخرفان عن قراء مدونتي ....
على الاقل هالعقلاء تكلموا ما صاروا مثلك بس تقول خرفان وتعلق وانت مالك شخصية متنح بس تقرا :)

أنـــــــــا معصبــــة !!!!




البوست الياي يبيله تضبيط شوي وشوي ملح ويطلع اوكي (( فضيحة )) مو أنا _ مواطنة كويتية _ انحط
بهالموقف ولا اسمح بهالشي :p
اشتغل عند ابوهم ؟؟ بحط الموضوع واطلع خياسهم .. مع صور بعد ان شاء الله
اذا الناس ساكتة .. واذا اهلي بس قاعدين ينتقدونهم بدون ما يسوون شي ..
فأنا ومدونتي وقريبا بالجريدة بعد بنفضحهم ..
يخرب بيتهم والله الكويت راقية عيب عيب والله عيب ..
..
..
..
قريبــــــــــــــــــــــــــا
...
...
...
تتوقعون شنو الموضوع ؟؟ :p








ألف مبروك مدونتي الحبيبة ..
..
..
عديت ال100 موضوع :) ادري ماعندي سالفة :)
..
..
..
مبـــــــــــروك (( تخــــــــاريف طمـــــــوحة ))

أخطأت


ألــــــــم ..

كيف سأصفُ هذا الألــــمْ ؟؟

رعشة فؤادي وجسمي توجعني ..

أتذكر لحظاتي معه ..

وأبكي من حرقة الشوق والعذاب ..

أني أتألم ..

هل تسمعني ؟؟

أنا أتألـــــــــمْ

فسامحني ياقلبي الحنون ..

طائشة أنـــــا

..

..

..

أحببته وأتألم من المسافات الطويلة التي تفصلنا

طيب

عطوف

رائع

كم هي قليلة بحقه تلك الكلمات

سكوتك يقتلني !!

وكلماتك القليلة تهيجني

أنا مجنونة بك !!

أنا محتارة لأمرك ..

أخشى فراقك !!

أكرهه هذا الخوف ولكنه ينتابني ..

أحببت دنياي من بعدك ..!!

أحببت نفسي كثيرا بقربك !!

أنت الحياه

أنت الحنان الذي انتظرته طويلا !!!

اني أتألم كثيرا

فأوقف نزف قلبي

وسامحني !!!

أنا متأسفة !!!

لا تلف حول رقبتي حبل فراقك

فالموت أهون عندي من بعدك

سامحنــــــــــــي

سامحـــــــــــــــني

...

..

..

أحبــــــــــــــــــــك

2009-01-21

رسالة للي شكك بوطنيتي ...

خوش اهداء حقه مو ؟؟ لووووول شفت هالصورة العبيطة قلت أحطها وأخليكم تضحكون عليها شوي قبل ما نبدي بالجد :p
بكتب بالعامي عادي ؟؟
اكيد عادي مدونتي شتبون؟؟
ادري مليقة ..
نبدي ..
..
..
..
ـــــــــــــــــــــــــــــــــــــــــــــــــــــــــــــــــــــــــــــ
ســــــــــــــــــــــــــلام
اخوي الوطني المتوطن الي شايف حالك محد يحب الكويت كثرك ..
.
.
منو أنت علشان تيي تتكلم عني وعن وطنيتي ؟؟
.
.
منو أنت علشان تقول عن وطنيتي زائفة ؟؟
.
.
منو أنت علشان تدور على مواضيعي وردودي علشان ترد عليهم بردود تشبع النقص عندك ؟؟
اذا ميت قهر ليش ما أواطن الفالي !!! كيفي !!
أنا بالمواضيع الي تكلم فيها الطبطبائي وغيرهم من أصحاب الأقنعة الدينية انتقدتهم ..
تبيني أتكلم عن الفالي بأنه عظيم واهو أحد الذين استهزؤوا بالكويت ؟؟
وطنيتي زائفة ..؟؟؟
يمكن لو شايفني أسجد له صرت بنظرك وطنية درجة اولى >>>>> (( لا زين )) ويـــــع مو وقته
اخوي روح أخذ لك جم درس من دروس الابتدائي والمتوسط والثانوي الي توهم حاطينهم تربية وطنية
روح ادرس لك جم سطر بعدين تعال تحجى ..
ترى مو ميتة على المكان الي إنت فيه وألف مكان أحسن منه يبوني ماوقفت عليك ولا على منتداك ..!!!
والكبار الي اكبر منك وأعقل منك ماهزوا شعرة من راسي
علشان تيي انت وتستشرف على راسي ، وتقيّم وطنيتي من كيفك ..
حبي للكويت أكبر من حبك للكويت على فكرة وأفعالي تشهد على ذلك
اذا كان حبك للكويت تمجيد الفالي والدفاع عنه روح له هناك خل يعيشك من خيره ..
ولا لا صح نسيت الي مثل هالاشكال تاكل من خير الكويت
وتعيش بأرض الكويت .. وبعدين تتنكر لها ..
مو قصدي بهالشي فقط هالفئة حتى عندنا أشخاص يمجدون اسامة بن لادن والبذالي بعد ..
تعلم حب الوطن ..
وتعلم شلون تكون بسيط
وتعلم شلون تحترم مكانتك
بعدين تعال هايط فوق راسي ..
وآخر كلام أقوله :
(( ياشيــــــــن من خذا منصب كبر خشمه وشاف نفسه على الناس ))
مع شكري واحتراماتي :)
طموحة مملوحة