2009-03-28

قصيدة لسارة






أول شي أتمنى من الكل يدعي لخال رفيجتي الي يرقد بالمستشفى في العناية المركزة وكان محتاج لفئة دم AB- ومن اليوم نعابل وندور والحمدلله واحد سعودي ساعدنا ودلانا على كويتيين عندهم هالفئة الدم وكلمناهم وتعاونوا معانا الحمدلله ،
الشكر أولا لله وثانيا لعزيزي المدون بوعلي لأنه ساعدني وايد وكان على تواصل معاي واهو الي دلاني على السعودي الي دلاني على الكويتين :p القصة تعيد نفسها لووول المهم ادعوا له لا تنسون .

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

اليوم وصل لي ايميل من خ بالمملكة العربية السعودية وعن جد قريت الي كاتبه لي ودمعت عيني ... وعرفت انه من متابعيين مدونتي فله كل الشكر عل كلامه اللبق وكان المكتوب كالتالي :

والله اني من غلاتك خانت لساني العبارة

جيت ابكتب بك قصيدة وابتدت فيني الاثارة

ياترى من وين ابدى والبداية بك نهاية

بس ياربي عسى هالقصيد ترضي سارة

..

سارة الي يوم تضحك، تضحك الدنيا معاها

والقمر لوهي تأشر لجلها يغير مساره

ولوتسولف يوم تحكي حكيها ماقل ودل

والله بس كنه الحكي ماخذ م الحكمة اختصاره

..

..

عينها اليمنى تشعشع بالأصالةوالبداوة

وعينها اليسرى حضارة مابعدها أي حضارة

والخشم سيف سعودي ورثه عبدالعزيز >>>> فديت خشمي

لا إله الا الله محمد رسول الله شعاره

..

..

وشعرها من الليل ماخذ لونه الأسود أكيد

ومن نجوم الليل ماخذ شعرها حتى الغزارة

رائعة شفافة عذبة مذهلةوأكثر كثير

ناعمة خجلا جميلة طيشها حتى بوقارة

..

..

يحسدون بيدها الخاتم وكل ما تلمسه

حتى ساعتها وقلمها والمجلة والسوارة

والكرم فيها تحدى حاتم الطائي وطافه

يحمد الله حاتم انه قارنوه أصلا بسارة

..

..

راسها فوق السحاب ورجلها على الارض تمشي

وارثة هيبة ملوك العز حكام الإمارة

لما توقف اقتصاد العالم بيوقف معاها

ولما تجلس السهم الأحمر يصير أخضر باشارة

..

..

ولو بشبهها بأحد يمكن يكون الوليد :P

بن طلال الي على ايده أسسوا فن العمارة

ياجماعة شفتوا واحد يوم يعطي والا يكرم

يكرم ويعطي بيمينه دون ماتدري يساره

..

..

ما كتبت الشعر ودي الفت انظار العرب

بس كتبته لني واثق تستحقه وبجدارة

والقصيدة مهما طالت ماتوفي بالمعاني

وأنا ماسكها بيدي صرت اشعر بالحرارة

..

..

والشعر مهما كتبته ماوصل نص مستواها

اهي لو تقراه اصلا راح يعلن انكساره

وفي النهاية عندي كلمة واعذروني يابنات

ما أظن بالدنيا توجد بنت تتقارن بسارة

وحتى لو في وحدة منكم عندها نفس الاسم

اعرفوا مو أي سارة ياجماعة مثل سارة

....................................................

وأنا أقرا هالكلام عيوني صارت @@ بس من كل قلبي اشكره على كلامه الطيب بصراحة قليل الي قصدوا فيني لووووول اشكره من كل قلبي وادري بيقرا هالكلام :) اشكره جزيل الشكر والله ...

ــــــــــــــــــــــــــــــــــــــــــــــــــــــــــــــــــــــــــــــــــــ

حدي مكتأبة وفيني البجية لأني طول اليوم انشغلت والتلفون مو راضي يسكت والمسجات ليش تطنشين ؟؟ وردي وماخلصتي المقابلة ؟؟ ودقيتي على فلانة ... صج صج بروحي ماصدقت نسيت كل همومي امس لا يردونها والله مافيني :(

احب هالاغنية :)




معرض الجاليات _ كلية العلوم

اي السلام عليكم شلونكم ؟؟؟






والله كنت بحط موضوع عن رحلة الجزيرة امس والي كانت انطبيعية والله ، بس قلت احط هالموضوع اول احسن لأن من زمان كانوا طالبيني أحط عنه ولين اجمع الصور من صديقاتي :)




هذي صور معرض الجاليات الي صار في كلية العلوم ، وشاركت فيه اغلب الدول العربية وبعض الدول الشرق آسيوية :) وكان خوش معرض احسن من الي طاف ، وللي يبي يشوفه في مجلة UNIQUE ترا راح ينشرونه في جميع كليات جامعة الكويت وبقية الجامعات ان شاء الله في بداية شهر أبريل :) وعطوني راياتكم :)

















جــــزء من المعرض













جزء آخـــــر









عميد الكلية د.بدر الصقعبي مع كبار الزوار






اليابـــــــان





الهند






سلطنة عمان الشقيقة








البحرين الشقيقة






الأردن











جمهورية مصر العربية ، مع كويتة :p عاد حنوا علي انتي مننا وفينا اوعي ماتصوريش مصر ... قلت لأ مش معؤول لازم اصور ام الدنيا :) واديني صورتهم .. :)












عميد الكلية يتذوق القهوة الفلسطينية





مراسلتكم طموحة مملوحة مع استاذة الهام من العلاقات العامة :)












تونس .... ربع الطفولة :)









المملكة العربية السعودية الشقيقة















الجمهورية السورية الشقيقة





فــــلســــطين





الدكتورة أديبة الحربان تتوسط جاسم عباس وحمد الحمد







كويتيين وعمانيين






صورة مع الزوار







استراحة الزوار في المعرض :)


أخيرا صورة جماعية :)
ـــــــــــــــــــــــــــــــــــــــــــــــــــــــــــــــــــ
ان شاء الله بوست باجر راح يكون حلو جدا ، بصراحة عشت طفولتي أمس وذقت طعم الغزو والأيام القديمة الي كانوا
عايشينها الي قبلنا ، وكنت أسأل وايد وايد وادون بمفكرتي أقول للدكتور بكتب هالمعلومات حق قراء مدونتي شفتوا
شلون أحبكم وايد :) وراح احط لك صور عبيطة ، بس صج صج صج امس كنت أحس ان عمري 10 سنوات مو
21 سنة والله ، صج ان الواحد لمن يشوف وحدة شكبرها طويلة تركض وتضحك ومستانسة وتصور وتسأل الآكو
والماكو ، بس مايعرف شكثر هالطويلة مستانسة لأنها تبي تجمع أكبر عدد ممكن من المعلومات والصور حق مدونتها
وعلشان تزيد الحصيلة المعلوماتية وبنفس الوقت شي يخص بلدها لازم تستانس ، والأكثر من جذي الاجانب مستانسيت
ويسألون بشي ما يخص ديرتهم يبوني أقول أنا شكو وما يهمني لا طبعا :) لوووول المهم شوفوا الفيديو العبيط هذا انا
حدي فصلت عليه ضحك لووول





























































2009-03-26

رســـــــــــالة لحبيبي ..!!!






الى حبيبي الغالي



لم أجد مكان أعبر فيه عن حزني وحبي العميق لك الا عبر مدونتي ولا يهمني ما سيأخذه الناس من أفكار نحوي فالحب ليس بالعيب ولا محرم ، ربما وجدت كثيرين في هذا العالم يحبك ويعبر عن حبه لك بطرق مختلفة ولكني لا املك سوى قلمي الالكتروني كي اعبر فيه عن حب العميق لك ، حبي الذي لم أخجل به أمام العالم وأستر عليه من الناس .



وجدت فيك الحضن الدافئ والقلب الحنون المعطاء ، لم أجد أحدا يهتم بي كما اهتممت بي ، ولم أتوقع حبك لي منذ الطفولة ، ليتني اعطيك ربع ما اعطيتني يا حبيبي ...
كم انا محظوظة بحبك وعطائك ، وساعدني لأني أحاول الدفاع عنك من المنافقين حولك لكني لا استطيع فهم كثيرون ، أنك رائع وما بداخلك اروع ، وليت من حولك يشعروا بروعتك ...
أنا خائفة على مستقبلك ، وخائفة ان يتغير وضعك للأسوأ ، صدقني فقليلون من يحبونك يا عزيزي ، وكثيرون من يريدون ايذاءك ،
لا يمكنني الابتعاد عنك ولا يمكنني المشاهدة والسكوت ، حاولت وسأحاول وسأظل أحاول الى أن تعود كما كنت سابقا .
حبيبي الغالي :
للأسف ، قليلون من هم يفهمون ويعون (( حب الوطن )) ، فلك كل حبي وتقديري ياوطني الغالي ، ياحبي الأول والأخير ، يا حبي لذي لا يخون ولا يخدع ولا يقصر ، فأمنياتي لك بكل الأمن والسلام ، وأن يبعدك الله عن شر المنافقين الذين يتراكضون اليوم للكرسي ، لكي يأكلوا من خيرك ، للأسف قليلون هم من يحبونك لنفسك لا لخيرك ، قليلون من هم يحبونك لأجل مستقبلك ، قليلون هم من يوظفوا توجهاتهم ودينهم لأجلك لا لأجلهم .
اللهم احفظ الكويت وأميرها وشعبها من كل مكروه .
أرجوكم أرجوكم أرجوكم
لا تضعوا الكويت في موقف محرج ..
لا تضعوا شيوخنا في موقف محرج ..
لا تضعوا انفسكم في موقف محرج ..
وطاعة ولي الأمر واجبة ، اذا لم ينادي بذلك القانون فقط نادى به الدين سابقا ، معنى الانتقاد لا يعني التطاول على الحكام والشيوخ ولقد مللت وتعبت من مقاطع الفيديو التي يتنقلها الكثيرون خارج الكويت ليضعوا الكويت في وضع قذر وذلك بسبب من يتطاول على من فيها من أبنائها ، نحن نعيش في بلد تمناه الكثيرون فلا تطلبوا المزيد وتتمردوا ، ومسؤولية أمير الدولة حفظه الله كبيرة فلا تضغطوا عليه أكثر ، ولا تجعلوا من هم خارج الكويت يأخذوا راحتهم في السب والشتم ، مرضاة لله وللدين ولأنفسكم ، فاحترام ولي الأمر واجب ولابد لنا منه . هذه الرسالة للبعض وليس الكل لأني رأيت في مواقع كثيرة مالا احب ان أقرأه وأسمعه .
لا تجعلوا الكويت مُحرجة من وجود كارهين لها وآكلين من خيرها .
ولنحاسب أنفسنا قبل أن نحاسب غيرنا .
ولكم يا مرشحين مجلس الأمة ، ابتعدوا عن البحث في عيوب غيركم وابدأوا بعلاج عيوبكم فهذا أفضل بكثير .
ـــــــــــــــــــــــــــــــــــــــــــــــــــــــــــــــــــــــــ
غدا ان شاء الله راح تكون لنا رحلة جيولوجية لجزيرة كُبّر ، بصراحة انا وحدة من الناس الي تحب بشدة الشعاب المرجانية واهتم كثيرا بقراءة المزيد عن الشعاب المرجانية وخاصة الي بالكويت وراح احط موضوع كامل عن الشعاب المرجانية وخطر انقراضها في الكويت بسبب الناس الي يروحون لها ، فأتمنى من الناس الي تحب تكون راقية واتكيت والناس تمدحها ، يحطون زبالتهم وانتو بكرامة بجيس ترا ماراح يموتوون والله ، ولا يقطون شي بالشارع ، عيب يعني انا الملقوفة الهبلة الي احس جني ياهل للحين بنفس الوقت اهتم بنظافة ديرتي يعني المفروض البعضات من البنات الي تسوي نفسها رقيقة ونعومة زايدة عن اللزوم تكملها وتصير احسن مني وتحط زبالتها بالعلبة المسكينة الي مسمينها سلة الخمام ، والله صج يعني موحالة هذي قلنا الناس تطورت بس للحين حركاتهم أرعة (( قرعة )) :)
ــــــــــــــــــــــــــــــــــــــــــــــــــــــــــــــــــــــــــــــــ
حبيت احط اغنيتي الي احب اسمعها وايد .. كل الاغاني احبها شخليت استغفر الله والشكر ..
المهم
سمعوها حلوة :)





2009-03-25

مطلوبة الرسامة طموحة مملوحة ...

السلام عليكم جميعا :)

بصراحة توني رادة من الجامعة وحدي لايعة خشمي من كثرة المختبرات الي خلت خشمي يعيش في حالة نفسية مو طبيعية ، المهم وأنا رادة البيت ولا تييلي بنت اخوي الصغيرة ... وكان الحوار كالتالي ..
شهد : عمتي سارة عمتي سارة ؟؟
سارة : هاااااااااااااا شتبين لا تقولين درسيني بدرس تعبت لاعت خشمي والله ..
شهد : لا عمتي شي ثاني .
سارة : خيــــــــــــــــر !!!
شهد : عمتي مدرستي يبون رقمج .
سارة : @@ ليش شحقة ؟؟
شهد : يبون يكرمونج !!
سارة : لوووووول شسويت لهم علشان يكرمونج .؟؟
شهد : اختاروا رسمتج أحلا رسمة بالمسابقة .
سارة : اي رسمة ؟؟ واي مسابقة ؟؟ أنتي متأكدة .؟؟
شهد : اي عمتي ورفيجاتي حدهم متشوقين يشوفونج يبونج تيين المدرسة علشان يكرمونج ويكرموني
سارة : وناسة .. وانتي شكو يكرمونج انا الي تعبانة على الرسمة . ؟
شهد : هههههه عمتي حرام عليج أنا حدي مستانسة كشخت فيج بالمدرسة الرسمة عجبتهم ويبون منج رسمات بعد .
سارة :@@ أقول ذلفي انتي ومدرستج بكبرها .. لوووول
القصة يا محفوظين السلامة ، ان يتلي بنت اخوي هذي قبل اسبوع تبيني اسوي لها رسمة، وانا كانت نفسيتي تعبانة حيييل ومالي خلق وترجوني بالغصب سويت الرسمة وللحين اذكر سهرت وارسم واتحلطم ، المهم ماكنت حاطة ببالي ان الرسمة راح يدخلونها بمسابقة الهم اذكر الرسمة كانت كلها حلوج شكبرها لأنهم كانوا يبون رسمة عن الاسنان ومادري شنو والله ما اذكرها الي اذكره بس الحلوج لووول
المهم وفازت الرسمة @@ حدي مو متوقعة صراحة بس يالله الي نيته زينة الله يوفجه الحمدلله .
عاد اذا خذيت الدرع صفقوا لي زين ؟؟
ـــــــــــــــــــــــــــــــــــــــــــــــــــــــــــــــــــــــــــــــــــــــــــــ
لحـــــــــــظات العبط ..
مبارح ( أمس ) كنت حدي مشغولة حد الدعسة وافتر افتر افتر افتر مادري لي وين بوصل المهم اخلص من محاضرة لمحاضرة ثانية وتدق علي صديقة لي في التوجيه والارشاد علشان التغطيات الاعلامية حق المجلة ، واروح حق الدكتورة حق محاضرة اليوم الي بقول لكم عنها بعد شوي ، المهم ماكليت ولا شي من الصبح وكان عندي مختبر من ال2 لل5 المهم سارة لا تحس بالجوع .. وأنا لمن أقول جوعانة يعني خلاص راح افصل ، ولمن اقول يوعانة عندي عادي كليت ولا ماكليت مو مهم ، المهم بالمختبر الاستاذ يشرح وانا بطني صارت طقاقات والله ويطالعني الدكتور يضحك ، شفيج ياسارة ؟؟ والله جوعانة دكتور والله ، لوووول مارضى يطلعني والكفتيريا تسكر 3 ونص ، المهم طلعنا بريك على ال4 وربع وأنا حدي ببجي ، جوعانة جوعانة مايصير ،بستأذن برح آكل اي شي الدكتور مو راضي ، وعيوني غورقت خلاص ماقدر اسوي شي واطالع العينة بالمجهر احس اني اشوف اكل شوي وآكلهم والله والدكتور يقول لي ويييه ذاك اليوم كليت جذي وجذي وانا دكتور يرحم والديك خلاص والله نفسيتي تعبت والله ، تبوني اشتغل على العينات ؟ ماسويت ولا شي ... على ال5 طلعت قلت لرفيجتي نمر هارديز اييب لي اي شي ابلعه ، المسكينة رفيجتي ذكرت قبل هالمرة شسويت فيها بالمختبر لمن خرعتها ، هالمرة بالسيارة المسكينة بالمصافط مادري وين تطالع ، جان اقول لها : خلصيني تمشين شوي شوي جوعانة . وقلتها فزت وهدت السكان ، جان تصرخ علي رفيجيتي انتي شفيج عليها بس تخرعينها ؟؟؟ البنت قعدت تتعوذ من ابليس المسكينة وكليت لي وجبة كاملة هني وعافية على قلبي ، لا تحاولون تتناقشون معاي وأنا جوعانة مو يوعانة جوعانة لأن يمكن آكلكم لووول
ـــــــــــــــــــــــــــــــــــــــــــــــ
شسالفة المحاضرة ؟؟
اليوم سوينا محاضرة وبالاصح اول اجتماع لنا لمنظمة ال AAPG وتكلمنا عن المنظمة وبصراحة انا حدي متشوقة تصدقون الكتب الي تنباع بالكويت هني الي على 50 دينار احنا تنباع لنا ب15 دينار بس ؟؟؟ وعاد المشكلة الاقتصادية خلت الكويتيين يخافون بس اذا جذي اسعارهم فمن حظنا ان احنا وياهم هذا غير المؤتمرات يعني حق الي يبي يشارك فيها الشخص العادي يدفه 500$ بس احنا ندفع 20$ وكل لمصلحتنا يعني ... يعني بصراحة ... محظوظين والله الجيولوجييين وأنصح الجيولوجييين انهم يشتركون بالمنظمة .
..
..
..
خـــــــــــــــــذ الخذر ...
وحدة من البنات الي كانت تمشي وتقول سارة فيها وفيها وفيها وتطالعني ن تحت لي فوق ، فجأة وبيوم وليلة صارت تحبني وتسلم علي كل يوم ، وتسولف وياي وتضحك ..... @@
ياترى شنو السبب؟؟ انا مخترعة بصراحة للحين مو مستوعبة بجد بجد واللهِ
بسي قرقة بروح ادرس ....
فتكـــــــــــــــــــوا بعافية


2009-03-24

شكوى من طالبة


اقروها أول وبعدين بقول لكم القصة :)
لمن يهمه الأمر....!!!!
صحتنا في خطر
أجل صحتنا في خطر والسبب هو ما يُقدم لنا في كفتيريا العلوم التي تشهد تدني في المستوى الصحي والنظافة حيث يشاركنا الذباب الغداء ويلتقط ما وقع أرضا ليقدم لا أو ماقارب درجة التجمد أو ماتعفن من طعام فقد شهدت هذه الكفتيريا العريقة عدة حالات تسمم لم تسجل والسبب هو ثقة المصاب بعدم الاستجابة .. الىمتى يا جماعة ياترى ؟؟
ألسنا في الكويت التي تقدم الغذاء والمعونات لكل الدول المحتاجة ونحن هنا نعاني من نقص وتردي في الخدمة وسرعة تلبية الطلبات فأغلبنا ليس لديه الكثير من الوقت وفي المقابل العاملين هنا يعاملونا وكأنه ( المنة عليكم أن نخدمكم ) وذلكلعدم وجود رقابة حقيقية وصارمة في الكفتيريا الرائحة قاتلة ربما الشفاطات لم تعد تعمل لووووول أو انه لا يوجد بالاسا أو انه عفا عليها الدهر ..وكذلك الأسعار مرتفعة على الرغم من تدني مستوى الجودة من حيث الطعم والماركة ان صح التعبير نرجو وضع مينيو ( قائمة اسعار ) حتى لا يتم خداع المستهلك لأن الأسعار تختلف بين ليلة وضحاها .
كلنا مسئولين عن هذا الوضع لأننا لم نتكلم ولأننا دوما نقبل بكل ما يضر صحتنا يجب أن نتحرك فصحتنا في خطر وحالتنا النفسيةنتيجة التغذية السيئة في خطر أيضا لقد وضعت عدة اوراق في صندوق الشكاوي ولكن بما أن الصندوق وجدت عليه بعض الأحافير وتكونت عليه صخوررسوبية اووووف شكلها وحدة ن ربعنا بالجيولوجيا فديتها والله :) فلا اعلم هل سيجد من يلمحه أصلا ؟؟
ربما يستهزأ البعض من المقال ولن في الدول المتقدمة توضع هيئات استشارية وتقام دراسات عميقة ومكلفة من أجل هذه القضية ألا وهي التغذية .
نتمنى من كل الطلبة المشاركة بارسال شكاويهم لع هذه المحاولة القبل الأخيرة تجد نفعا ولعل أحدهم يستفيق ويتذكر أن
( كلكم راع وكلكم مسئول عن رعيته )
وخاص شكري وامتناني
( طالب/ة)
ــــــــــــــــــــــــــــــــــــــــــــــــــــــــ
كنت رايحة آخذ أغراضي من اللوكر ولقيت هالورقة داخل لوكري قريتها وبصراحة أشكر صاحبة الرسالة الي متأكدة أنهابنت لأن لو طالب راح يكتب علطول طالب ، ولكن الخوف منتشر بين طلبة الجامعة لأن تعودنا احنا نداوم علشان ندرس وبس ماتعلمنا ان كل واحد يقدريتكلم ويتحجى ولا قائمة تمثله ولاهم يحزنون يقدر يوصل رسالته بستين الف طريقة ، هذا أولا ، وثانيا اعتقد مشكلة الكافتيريا مو طبيعية عندنا بالعلوم ، وللأسف لمن نناشد الموجودين كأننا نناشد طوف ، جنهم يقولون ان شاء الله تموتون ما همنا ، مافكرت أحط كلام البنت علشان يقراها اي احد موجود بالجامعة ابي الناس الموجودة تقراها ويشوفون حال جامعة الكويت ، حتى كافتيريا سنعة ماعندنا ، الواحد يحط مطاعم كشخة ومعروفة الطالب الجامعي يستاهل ، حاطين لنا شركة حي الله ، عندهم البيبسي ب150 فلس لا والطالب الجامعي له خصم ، تدرون شقمت اسوي ؟؟ تذكرون ايام اهلنا لمن يحطون لنا الصمون بجيس مع عصير؟ ؟؟ والله قمت اسوي جذي ، أو آكل من برا، اذكر موقف اهبل صار لي بالكافتيريا يبين النصب والاحتيال الي الجامعة نايمةعلى ودانها ولا قاعد تحاسب هالاشخاص الي يلعبون بحسبة اعانة الجامعة الي مافيها بركة ، خذيت لي صحن سلطة وصحن فيه قطع دياي وعلبة بيبسي ... جك جك جك دينار ونص .. حلو كليت وعلي بالعافية ، اليوم الي وراه خذي نفس الطلب والله العظيم ، تتوقعون جم الحساب ؟؟ يالله يبون يبوقو زيدوا 100 فلس 200 فلس يالله ربع دينار ، والله العظيم الحساب 3دنانير ونص والله العظيم انا بققت عيوني ، نعم ؟؟خير ؟ ليش أكل فرنسي .. ولا مطعم كشخة محد ياكل منه الا الراهيين ؟؟
حتى كاريبو احسن منهم وارخض بصراحة ..
شهالبوق ؟؟؟
للي يحبون يقصون على الناس ويقولون لم جامعةالكويت من أحسن الجامعات ، لا ...محد يعرف للجامعة الا الي يدرسون فيها ، واكثر من الذل الي شفناه كافي ... كــــــــــــــــــــافي
محنا ناطرين من الجمعية تتحرك ، من متى اصلا تتحرك ، يقصون علينا بجم كلمة وخلاص ولا احنا راح نطق درب علشان نشتكي ...
من مدونتي...الى كل الصحف الكويتية ... راح انشر شكاوي طلبة كلية العلوم الي مادري ليش ذالينهم ويعاملونهم جنهم عيال البطة السودا ..
طلبة العلوم ماراح يسكتون ولا راح نرضى بالقوانين الي تمنعنا حتى من وضع اعلانات في الكلية ، تبون ننفذ قوانينكم احترموا وجودنا ... تبونا ننفذ قوانينكم ... خلنا نحط لكم قوانينا :
_ نبي كفتريا سنعة بنت خير رجاء .
_ نبي مختبرات نظيفة مو من سنة 66 ولحد الحين غبرتها موجودة والله عيب أحط الصور يعني ؟؟
_ نبي احترام وتقدير لطلبة العلوم مو ذالينا حتى يوم السبت نداوم رحمونا .
_ نبي شركات تيي تعلن عندنا تتبنى طلبة العلوم مو كلهم مطيحين بالادارية شنو اهم احسن منا ؟
_ نبي استراحات سنعة نقدر نقعد فيها ندرس ، كل ما دشيت لاب جيو . القى طلبة مو معانا داشين يبون ياكلون ولا يسولفون صارت الابات متعددة الاستخدامات .
_ نبي الكلية لطلبتها فقط مو يقولون ماندخل الغير جامعيين ويدخلون ربعهم ياخذون نص اماكن الكلية ومخلين طلبة الكلية يفترون .
_ نبي اماكن نظيفة كثر عاملين النظافة على شنو ؟؟؟ على سلام عليكم بابا ؟؟
_ نبي ممرات سنعة محترمة ، لوووول ضحكوا على ممرات العلوم كله كركبة وتحولت لمخازن .احط الصور؟
_نبي ماكينات ماتبوق ، حتى الماكينات الي ماعندها مخ تبوق منا ؟؟؟ شنوووو شنووو؟؟
_نبي اماكن نظيفة كله دخان وتلوث شنو هذا؟؟
اكمل ؟؟؟ موناطرة من البوست الا التشمت علينا بس :)

2009-03-23

زمن النساء


كم هو محطّم كذبك يا رجل ..
تعبثتْ بهاتفها القديم ..
وقرأت رسائل كثيرة ..
مفرحة و ممتعة ..
الى ان وقعت على رسائل رائعة ..
لأب حنون .. وحبيب مجنون .. وأخ رائع وصديق نصوح
قرأت تلك الرسائل ..
ضغطت على الخيارات ..
وبدأت تساؤلاتها ..
هل أمسح هذه الرسائل ؟؟
نعم ..
لا ..
نعم ..
لا ..
(( حياتي معك جنة )) ...... كـــــــــــــذب
(( انتظريني ... )) ....... كـــــــذب
(( لن أقبل الا ان تكوني زوجة لي ... )) .... كــــــــــــــــذب
(( أحبـــــــــــــــك )) ...... كـــــــــــــذب
.
..
..
ابتسمت وهي تسائل نفسها ... يا الهي لم يكن مراهقا .. ولم يكن طائشًا
لم يكـــــن غبيًا ... فلم الكذب ؟؟
اغلقت الهاتف واعادته في الصندوق مرة أخرى ..
وتذكرت ذاك القلب الحنون المرهف ..
وصدمة لحظات الألم التي مرت بها ، وهي تسمع صوت الأسد يوبخها ..
هل انتهى عهد الرجال المخلصين ؟؟
هل اصبح الكذب محللاً للرجل ؟؟
هل يطمئن الظالمون في حياتهم ؟؟
لم تُجبْ على هذه الاسئلة .. ولن تجد الاجابة إلا منه ..
ربما أخطئتْ في أمور عديدة ، ولكنها واجهتْ..
فوداعا لزمن الرجال الشجعان ..
وأهلا بالرجال الجبناء ..
أصبحت الأمور مملة ، حتى بات هم المرأة التفوق على الرجل ..
فلم لا تحاسبْ نفسكَ يا رجل وتترك تلك الانثى الضعيفة مرتاحة البال ؟
صغيرة في السن وقد عانت !!
في العقد الثالث وقد هرب من المواجهة
فماذا ترك للذكور الصغار ؟؟
لا تحزني يا امرأة
يكفي انك حاولتِ
يكفي أنك عانيتِ
يكفي أنك لم تخسري
فلا تحزني لرحيله
وافرحي لفراقه
فكري بنفسكِ
وانسي امره
لم يكذب عليك
بل على نفسه
ويكفي انك
امرأة
واجهت
كم هي كبيرة تلك الامرأة التي تواجه الجميع لتبين قضيتها في حين يخجل الرجل من الاعتراف امام الجميع ، فمرحبا لعصر النساء :)
ــــــــــــــــــــــــــــــــــــــــــــــــــــــــــــــــــــــــــــ
لووووووووووووول ادري راح تاكلوني ... مابي أقول الكل ولكن هذي رسالة يتني من زميلة عبر الايميل وترجمتها بخاطرة سريعة ، اكيد وايد يحسون مثل احساسها وانا وحدة منهم صراحة ، أبحث عن التفوق دائما . وترى مو كل الرياييل وفي حريم ملاقة ويبطون الجبد وهم اناوحدة منهم لووووول كلش ما يندرا انا شنو ؟؟ لوول
ـــــــــــــــــــــــــــــــــــــــــــــــــــــــــــــــــــــ
سؤال : الحين مو ساعات تحسون بنبض قلبكم مثلا بعينكم ولا رقبتكم ولا اي (( حتة )) بجسمكم ؟؟؟
زين الخشم شكو ؟؟؟ قلناأحب خشمي لحد لجنون وأهو راس مالي .. بس والله صار لي ثلاث ايام خشمي ينبض والله ، ما اتغشمر والله من صجي لمن سألت اختي جان تقول لي عادي بس احس ملاقة يعني قاعدة بالمحاضرة وينبض خشمي بقوة احسه قاعد يرقص شرقي والله مو حلو هالاحساس والله لووووول
ــــــــــــــــــــــــــــــــــــــــــــــــــــــــــــــــــــــــ
..
..
الحمدلله عدت الثقافية على خير ، ويوم الاربعاء عندنا محاضرة راح نلقيها نحن اداريي منظمة ال AAPG
وترد طموحة للمعاناة من جديد ... والله اليوم صج صج يدقون علي خلصتي الشغلة الفلانية ؟ سلميها الخميس ، اسكره يدق مرة ثانية ها وين الشغلة الكيت وكيت ... والمقابلةمع الدكتور الفلاني ، والمعد الفلاني وفلانة الفلاني .. يوم الخميس اوكي ؟ يدق مرة ثانية سارة نبي ناخذ رايج بشغلة فكرة ويطبقها فلان وفلان .. حلو اي خلاص تابعيهم وكتبي تقارير عن هالشغلات وخليج معاهم علشان تساعدينهم بالكلام ...
كل هذا متى ... الخميس ... تدرون شسويت ؟؟؟ سكرت الجهاز وبطيتها بجي بجي بجي بجي مو طبيعي ... لين انتفخ خشمي وهو ينبض مادري شسالفه امه فاصل .... ورحت مزجت لي على الشاي ... وبطلت كتبي ادرس لابو الهم الي يبته لنفسي والله ....
اشوفك على خير وخيرات وتصبحون على خير :)



2009-03-22

ثقافيتي أخيرا مع دعاية :)



غــــــــــــــدا ان شاء الله ستكون أول ثقافية لكلية العلوم ، هالمرة صج ماكو تأجيل لووول ، في الساعة الواحدة بعد الظهر ان شاء الله ، في قاعة c كلية العلوم ، اي خير قاعة جبرة جبرة مو قاعة :p
المهم الي حاب يحضر حياه الله واتمنى يكون في حضور من القوائم الأخرى راح تكون ثقافية خفيفة ان شاء الله مافيها حجي وايد لأنها أول ثقافية ..


اليوم كانت مقابلتي مثل ما قلت لكم سابقا لمجلة يونيك واذا نزلت ان شاء الله بحطها لكم بالمدونة ، المهم كانت المقابلة جدا رائعة ماشاء الله عليه الأخ الي مستضيفينه يعني انا حاطه كذا سؤال والله ماشاء الله بدون ما اسأل استرسل بالكلام وقعدت ادون وان شاء الله بضبط الحجي وتشوفونه اكيد بيعجبكم ان شاء الله ، الشي الي حبيت اقوله لكم ...
أن أكلهم لذيــــــــــــــــــــــــــــــذ

كانت ثنتين من رفيجاتي معاي بالكافيه ، فحبوا يذوقونا من أطباقهم ... ولك والله لو ادري بهالكافيه من زمان جان طحت عندهم 24 ساعة أدري مو مال ريجيم لوووول بس والله ماتوعته جذي ما اقول هالشي علشان اسوي دعاية ليش سويت مقابلة ومن هالحجي بس والله والله الي ماذاق منهم شي انصحه يجرب والله اليوم ماخليت شي مابلعته والله يعني مادري جم كيلو اليوم زدت بس ل.ذ.ي.ذ شوي عليه والله لووول ، الكافيه له ثلاث افرع بالكويت ، الراية سنتر والافينيوز تبعكم هذا تحبونه لوول وبجامعة ..

اذا رحتوا جربوا نوتيلا ... اخيييييييييي يبيله مرة ثانية والله

جربوا وعطوني خبر .. بصراحة اتمنى ان تزيد افرع الكافيه لأنه بصراحة ماكو مثله ولولا المقابلة جان مادريت عنه بس اتمنى من مدونتي اني اسوي دعاية صغيرونة للكافيه انتو جربوا واحكموا بنفسكم :)

على فكرة في توصيل للمنازل بس البيوت الي بالديرة .. :)

وهذا موقعهم للي حاب يتعرف عليهم أكثر ..

CrEpE cAfE

يالله بجهز حق باجر لوووول ان شاء الله ما ياكلوني اسئلة لووول

فتكــــــــــــــــوا بعافية :)

طموحوووو مملوحووووو






الي يعرفني عدل بيعرف شنو تعني لي هالأغنية :

والله مادري شفيني اليوم !!!!!!








يا صباح المزاج العال العال العال

يقول لكم طموحة اليوم بتغني (( ظليت اطق على الراس لووول )) يقولون المفروض باجر عندها مقابلة وللحين ماكتبت الأسئلة ، وهالله هالله هالله هالله هالله ، لووووول ترا قبل شوي رادة من العرس وللحين فصلتي ماخلصت .

اليوم كان يوم حافل على قولة زميلنا المدون ديكاتي ، من صالون ودوخة شعر ثلاثة ماسكين شعري وانا راسي يمين شمال .. لووول قاعدة اغني مع الحركة لوووول ، خلصنا وقحصنا للبيت ، وسويت ماكياجي وخلصنا ورحنا العرس وطبعا ماشاء الله ندل المنطقة عدل نص ساعة على مادليت الصالة لووول ادقدق على كل الي اعرفه عل وعسى يدلون ولكنهم لا يعرفون :p.

دشيت الفرح على قولة المصرييين ، واطالع رفيجتي فديتها قاعدة ومبتسمة ورفيجاتي بعيد .. العن ام الفشلة مشكلة رفيجاتي كلهم قصاصة وانا رحت اسلم شطولي رقبتي عورتني هذا ولابسين كعب ، مشكلة القصر بالكويت لازم يحلون هالمشكلة لووول . وفصلت على الاغاني ، مشكلة رقصنا كل الاغاني ماعدا البدوي كنت ناطرته على احر من الفحم ، بس دق اخوي : يالله ردي !! قالت لي رفيجتي الحين منو يرقص بدوي ؟؟ قلت لها : رقصيه نيابة عني لووول ، قالت لي شلون ، سويت لها جم حركة سريعة لوول يبا البدوي ما يعرف له الا اهله عيل شلون لووول ؟؟ لا واهم شي وحدة تقول لي شكو ترقصين بدوي ؟ تتلزقين فيهم ؟؟ انا عيوني غورقت : لا والنبي لا دانا بدوية واللهِ لوووول ..

الي يبي يرقص بدوي لازم يندمج مع الطق وبعدين الرقص بييله لووول المهم ويحط له جم سكني مثلي لووول .. يطلعون وقت الطق البدوي كاااااك

خلصنا عرسهم وعسى الله يبارك لهم .. وطلعت نص حرة الدراسة لأني صراحة ماشبعت فصلة ، للأسف باجر عندي دوام ومهمة وللحين ماجهزت لا حق هذا ولا هذاك ، درست شوي وعيوني تعبت صراحة من الماكياج صارت حمرا ، وخالتي تقول لي : ها رأصتي بدوي بتوعكوا الي بينططوا ماعرفش ازاي؟ ؟؟

جان اقول لها : للأسف لا وحياتج الحين احطه مع اليهال ونفصل عليها لووول .

يالله جم سؤال ساعدوني فيه لوووووول ...

أهم اغنية فصلت عليها (( سيبة عذب حبيبه )) مع اني كلش اكرهها بس كلماتها خلتني افصل عليها لوووول ، الناس ترقص على الاغاني وانا اسمع الكلمات .. حدج فاضية يا ام الحشرات ..

أمي دايم تقول لي خليج تكانة مثل خواتج ، وكل ما أقرر اصير تكانة بأي عرس افصل وانسى التكانة وأهلها .. ولك انا مو ويه تكشخ كشة وفصلة وتعبط احلا شي ، نوكشخة نو ماكياج نو شعر وتسريحة .. حط الاغاني وعيش الفصلة وخلاص ..

يقول الجسمي بما معناه لوول شارب الخمر تذهب سكرته بعد حين ، وشارب الحب لا يفيق من سكرته ..

الحين شكو هالكلمات بالبوست ..؟؟؟ امبي شفيني ؟؟؟ والله مادري شفيني ياختي اليوم ...

استغفر الله بروح اتوضى واقرا لي شوي قرآن يمكن اهدا ..

لوووول قبل شوي أقول لأختي ودي أتزوج خال .. تقول لي ليش ؟؟ قلت لها ودي عيال شعرهم كشش وسمر أطلع حرتي وعصبيتي وانا امشط شعورهم .. واي فديتهم والله من الحين حبيتهم لوووول

امبي والله مادري شفيني اليوم ... لووول

خوش عضوة بالمجلس لوووول





عـــــــــــــــوفه ...لخاطر ظروفه

الي ما يشوفك لا تشوفه ..

والي عافك يالله عوفه

خلى وسط القلب خوفه

عــــــــــــــــــــوفه

هوبايع وانت شاري

وبعذابك ماهو داري

ليه تتعب لي تداري

نـــــــــاره

خليه بناره

مشتعلة ناره

الي مايعرف قراره

والي ماصح اختياره

اهو جاب لأيده ناره

ماوفى مرة لحبيبه

نكر حبه وخان طيبه

الله لا يجعلها غيبه .

سيــــــــــبه

والله مادري شفيني اليوم :p

تدرون انه الاغنية مليقة ؟؟؟ مو كثري والله لوووول

باجر بحط لكم بوست حلو مثلي لوووول

2009-03-20

فاصل غنائي


2009-03-19

Mersy plz Mersy ...




في البداية أحببت الكتابة عن هذا الموضوع والذي يبدأ بهذا السؤال :

هل لاحظت في ستار باكس ، كاريبو ،كوفي بين .. الخ وغيرها من الكافيهات ان العاملين فيها عندما ينظفون الادوات يتركون الماء مفتوح وقت طويل دون ان يستخدموا هذا الماء لشيء معين ؟؟

دائما ما أقول للموجود : أغلق الماء مادمت لست بحاجة له .

هل نسكت عنهم؟؟ نحن بحاجة لقطرات الماء هذه ... ليس الشعب فقط هو من يحاسب على اهدار الماء ، يجب ان تحاسب كل جهة.. الى متى هذا الاهمال ؟؟؟ متى تطبق القوانين بالبلد .. المادة تجعل الشخص يمشي بخط مستقيم :) فمادام القانون يُطبق كل شخص سيخاف ان يدفع فيطبق القانون ... كفى طبقوا القوانين .. مللت من الشعب المتمرد على القوانين .

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

كعادتي استيقظت متأخرة ، وكان من المقرر ان يكون لدي اجتماع اليوم فذهبت منطلقة كالصاروخ ولله الحمد وصلت وكانت الدكتورة لم تأتِ بعد ، وكان زميل لي في الشركة بانتظار الدكتورة ، فناقشته بأمور الشركة والمعوقات التي واجهتنا ، دخلت الدكتور وتحدثنا بأمور عديدة ، فحددت الدكتورة اول اجتماع الاسبوع القادم وكنت ادون الملاحظات فقالت : سارة انتي من ستتحدث في المحاضرة وتتحدثين عن الشركة للحضور .
صارت عيناي @@ ... لا تعب فوق التعب الذي سأواجهه الأسبوع القادم .. فلقد تم اختياري لمعرض كركتيري ، والثقافية ، كما أن لدي مقابلة يوم الأحد مع أحدهم للمجلة التي أعمل فيها ... فسوف أطق أصبع قريبا ان شاء الله ... :p

ــــــــــــــــــــــــــــــــــــــــــــــــــــــــــــــ

اليوم أمي وخالتي فاصلين يبوني أغني لهم .. فغنيت لهم هالاغنية ....:)




2009-03-18

مبروك الحل ...


احم احم ... أصرح من خلال مدونتي أني .. في قمة السعادة الغير طبيعية جراء حل مجلس الأمة .. أخيرا حلوه صج كان امتحان صعب .. لا معاناة بعد اليوم ياشعب الكويت .. صوتوا لطموحة وعينوا من الله خير :p
هذي وحدة من الحريم الي وعدتهم أني لفزت راح اسوي لها عمليات ترميم من أمه .. بس تعطيني صوتها اهم شي ..
وأطالب من خلال مدونتي ، أن يحطون قرار صوتين للمرأة الحامل ، صوتها وصوت ولدها يالله يستاهل نعلمه الديمقراطية واهو ببطن امه يحليله .
والله خوش قرار صراحة ، وأدري ان المأساة راح تتكرر مثل كل مرة ، أقول لأبوي راح اصوت حق مرأة اذا شفت بدائرتنا مرأة تستاهل .. جان يقول والله كلهم مافيهم خير ، الي فيهم خير راحوا .
وأنا أقول الي فيه خير خل ينزل المجلس ويرشح نفسه ، مو كل من هب ودب نزل وعفس الديرة فوق حدر ، يالله لا انزل المجلس وألهط الي وراكم والي جدامكم ...
واذا صرت عضوة اول عمل خير راح اسويه اعدل جمعية الصباحية الي قصوا علينا يعني غيروا شكلها .. وعلى قولة المثل (( هالله هالله من برا يعلم الله من جوا )) ، أقول روحوا شوفوا الكاشير هناك، أي مصري يشوفونه حطوه كاشير ماكو لباس محدد لهم وحدة توها طالعة من مدرستها راحت على الجمعية والله مصخرة اروح هناك اضحك شوي على المهزلة الي اشوفها بالجمعية ... ولا يقصون علينا يحطون سيارات طول السنة منو يربح ؟؟ تصدقون محد يفوز بالسيارات .. فتتوزع على الربع تعرفون بعد .
المهم أخلص من جمعية الصباحية ، نشوف شسالفة أم ريل خال المشاريع الي بالكويت .. والله الكويت مو سياحية .. عسى ما ايي احد من برا اهي نفسها الاماكن ماتغيرت ، يبا زيدوا من المشاريع السياحية فشلتونا والله . وأجبر الشركات انها تساهم غصبن عليها من على كيفها ، مثل ما تبلع من جيب المواطن خل تحط شي للمواطن يرضيه .. ولك شووو ؟؟
ونخلص من هالسالفة نروح حق السوقة .. يبا بدل ما تحطون هيئة الامر بالمعروف مادري لجنة ظواهر الفضائيين .. حطوا مكان خاص حق الشباب فيه سينما وسوق ووناسة ... وحطوا لهم العاب بنات يعني يتمشون ول يغازلون من هني لباجر بدل ما كل الشباب والشابات بالسوقة لوعوا جبدنا جن كلش ماكو مكان بالكويت الا السوقة ..
نخلص من السوق نروح للتربية .. شنو التربية ؟؟؟ مليون طالب يتخرج من مدارس الكويت وكل همهم متى أفتك من الدراسة ؟؟ شدعوة عليهم عاد؟؟؟مابي اتكلم وايد عن التعليم مالي خلق والله العوي طول عمره عوي مايتعدل :)
والله ماراح أخلص حجي وعندي واجبات اليهال الي هني جني مخلفتهم وانا مادري الحمدلله والشكر قلنا رسامة كركتير كل وحدة تبي تكشخ عند ابلتها عمتي رسامة عمتي رسامة الحمدلله والشكر ..
وأنا قاعدة بالمختبر اييني هالمسج من وحدةمن رفيجاتي (( بس ليكن انتي طايحة ساروه ياية سيارة اسعاف )) !!
طبعا أنا !!!!!!!!! جان ارد عليها .. لاللحين بطاريتي ماخلصت ... جان ترد اشوة لووووووول ...
مسكينة سويرة ... كل كورس لازم اسعاف ومستشفى لووول مرة طايحة من الدري ومرة زالقة ومرة ماقدر اوقف من كليتي شهالامراض الي ماتييني الا بالجامعة ... ؟؟؟
..
..
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
..
..
بنقول لكم سالفة للقارئين كـــــــــــــــــــافة ..
يا محفوظين السلامة ، اليوم يتني وحدة من الزميلات الي وايد اعزها وتعزني جان تقول لي : سارة بسج مشاكل مع البنات ترا عندج عداوات وايد بالجامعة !!
سارة : اي عداوات أنا أقول لج الي معاهم مشاكل وحدة ثنتين ثلاث والرابعة انجلعت للاجتماعية فرقاها عيد وسعيد ..!!
_ تعرفين فلانة الفلاني ؟
سارة : شتطلع هذي ماعرفها ..
_ هذي تقول أنأ أكثر وحدة بالجامعة اكره سارة ..!!
_ خل تكرهني مولازم تحبني أصلا اذا كل الناس حبتني راح يخت التوازن البيئي فالكره ساعات مفيد .
_ لا صج سارة تقول ان سارة وايد open mind وجليلة حيا وماتستحي على ويهها .. وجريئة !!
_ كيفها خل تقول الي تقوله عني اروح ابوس راسها يعني واقول تكفين لا تفهميني غلط ؟؟
_سارة احنا نعرفج وندري شنو الي بنيتج !! بس هالناس مايشوفون الا الظاهر ..
_ ويعني ماكو ظاهر الا سارة ؟؟ بعدين كن يرى الناس بعين طبعه انا ما أضيع وقتي مع هالناس .
طبعا مو هذا كله الحديث ولكن في كلام قوي ماينقال .. مشكلة مجتمعنا يحب يسوي الغلط من ورا الناس ، عسى ما يشوفون أحد معروف بالجامعة ومحبوب من الجميع يحبون يطيحون من قدره . وللحين اذكر كلام الدكاترة لي : ديربالج الشجرة المثمرة دائما ما تُقذف .. وهذول ماخلوا فيها سمعة وشرف ، بس يا ترى هالبنات الي يتكلمون جذي واهم ما يعرفوني ... مايخافون على نفسهم ؟؟ وشي ثاني ، أنا ما أسلم على دكتور ولا اساعد زميل من ورا اهلي ولو اني اخاف من هالشي كنت ماشاركت بهالجمعيات والمؤتمرات والمحاضرات الي اييون فيها وايد من خارج الدولة ... وعلشان افسر أكثر ... اقول لهالبنات للأسف انتو مو مثل سارة الي تشوف الناس كلها بنظرة ايجابية وماتحط ببالها شي قذر من الي انتو تحطونه ، لأني ولله الحمد أثق بنفسي وما أقذف بالأوادم لأني ماعرف باطنهم .. وآخر شي ، أنا ما أسوي نفسي شريفة روما ومن ورا الناس اخش فضايحي .. يعني كل وحدة تحجت فيني وعرفتها للأسف ماكانوا من البنات الي ملفهم ابيض ، فالي بيته من زجاج لا يرمي الناس بحجر .
وخل أقول لكم عن قصة صارت قبل فترة مو طويلة ، مادري اذا كنت ذكرتها بالمدونة ولا لأ .. عن وحدة كنت احترمها وايد لأنها تخاف الله على قولتها لووول ، المهم هالبنت كانت تغار مني بطريقة مو طبيعية .. لدرجة انها بفترة من الفترات كانت تموت وتعرف هل انا مرتبطة ؟؟ وبمنو ولمن انخطبت سألت عن أصل وفصل الي تقدم لي ، وراحت للناس تقول لهم تقدم لي ولد الفلاني الي اهو بالأصل متقدم لي ، انا اسمع هالشي اقول لا فلانة مو خبلة لهالدرجة ، وفوق شينها قوة عينها تروح حق بنت عمي تقول لها سوالف عبيطة ماصارت عني ، حسستني جن بفلم هندي يعني أشياء ماتصير بالكويت لووووول ، كل هذا يطلع مني ؟ طلعت مو هينة والله ، المهم تقدمت بشكوى ضدها في الجامعة ، ووصلت لي تهديدات عديدة ، وبصراحة انا خبلة لأني خفت على نفسي والمفروض اكون انا صاحبة الحق ما أسحب الشكوى ورحت سحبتها وذكر السبب اني تعرضت للتهديدات وقال لي الي هناك لا تسحبينها ومن هالحجي ، المهم اهي مادرت اني سحبتها فحطت اهلها بموقف حرج ان يو لي بيتنا علشان يعتذرون لي ، لهالدرجة الغيرة تسوي جذي؟ ؟ وبعد هذا كله ماقلت السالفة حق احد علشان سمعتها ، بس الحبيبة وبعد ما خلت امها تنحط بهالموقف المحرج ، داومت بالجامعة وكملت مسلسل الاطاحة بصدام ( الي اهي سارة ) ، وأخيرا لمن ماشافت مني فود كله مطنشتها ومطنشة عيشتها وساحبة عليها سيفون قلبت سالفة الشكوى .. وصارت سارة اهي الي متقدم عليها شكاوي الدنيا ..
وصاروا يقولون : سارة للحين مافصلوها من الجامعة ؟؟؟ لووووووووووووول
طلعت مجرمة خطيرة بالجامعة تصدقون ... للأسف وايد بنات راح يوقفون معاها ، ليش ؟؟ لأنها قاصة عليهم بسالفة أنا بريئة وما أكلم وعيب وحلال وحرام ، ولأني وايد تلقائية مع الكل وعدهم معدة الأخوة والأخوات صرت أنا الي اسوي هالسوالف ، بس تدرون الي تقعد تتحجى بأهلها بالشين جدام الناس ماعندها مانع تلعب بشرف بنات العالم .
وأكيد ألف بالمية انها تتابع مدونتي لأنها معقدة المسكينة تييب سيرتي بعدين لمن يدافعون عني تقول سكروا الموضوع . أقول لها
تحلمين ، تحلمين ، تحلمين .... إنج توصلين لربع سارة ، وان وصلتي لربع ربعها بوسي ايدج بطن وظهر ..
عسى الله يشافيج يارب :)
..
قولوا آميـــــــــــــــــــــــــــــن
ـــــــــــــــــــــــــــــــــــــــــــــــــــــــــــــــــــــــــ
..
..
في عشة عصافير بدريشتي وودي أبط راسهم مزعجن حتى بالليل يصفرون لوعوا خشمي ماقدر اركز لوووووول
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ